Սամվել Շահրամանյան

Պարզ էր, որ մենք ծանր տեխնիկայով չէինք կարող դուրս գալ Արցախից, և այսօր խոսել ծանր տեխնիկայի դուրսբերման մասին, անիմաստ է․ Սամվել Շահրամանյան

Պարզ էր, որ մենք ծանր տեխնիկայով չէինք կարող դուրս գալ Արցախից, և այսօր խոսել ծանր տեխնիկայի դուրսբերման մասին, անիմաստ է․ Սամվել Շահրամանյան

Տեղյակ եմ, որ կան հարցադրումներ, թե ինչու է սպառազինությունը հանձնվել, թողնվել Արցախում։ Այս մասին Արցախի հանրային հեռուստաընկերության տված հարցազրույցում ասաց Արցախի նախագահ Սամվել Շահրամայնաը։ «Դրանք Հայաստան տեղափոխելու հնարավորությունը մենք կորցրել ենք Ադրբեջանի կողմից հսկիչ անցագրային կետի տեղադրումից հետո, և պարզ էր, որ մենք ծանր տեխնիկայով չէինք կարող դուրս գալ Արցախից, և այսօր խոսել ծանր տեխնիկայի դուրսբերման մասին, անիմաստ է։  Մենք այդ հայտարարության [ռազմական գործողությունների դադարեցման վերաբերյալ] համաձայն՝ ամբողջ սպառազինությունը հանձնել ենք ռուսական կողմին՝ հետագա ուտիլիզացիայի համար․ դա, ըստ պայմանավորվածության, պետք է ոչնչացվի», - նշեց Շահրամանյանը։ Շահրամանյանի խոսքով՝ Հայաստանը տեղյակ էր՝ Արցախն ինչ է ստորագրում․ «Քննարկում էինք ՀՀ իշխանությունների հետ այդ փաստաթղթերի հնարավոր վտանգները, բայց նորից եմ ասում՝ մեր նպատակը այդ իրավիճակում արցախցիների կյանքերը փրկելն էր»։ Շահրամանյանը նշում է, որ ինչ որոշում, որ կայացվել է Արցախի ղեկավարության և անձամբ իր կողմից, ունեցել է մի նպատակ՝ փրկել արցախցիների, բանակի և սպայակազմի կյանքերը, ինչը, նրա կարծիքով, կարողացել են իրականացնել։  «ՊԲ ողջ անձնակազմը, անցագրային կետով անցել է, և որևէ մեկը չի ձերբակալվել․ դա հենց եղել է մեր պայմանավորվածությունների արդյունքում։ Մենք պայմանավորվել էինք, որ ստուգումները պետք է անցկացվեն շատ թեթև կամ գրեթե չանցկացվեն, ինչը, սկզբնական շրջանում, հենց այդպես էլ իրականացվում էր»։
22:48 - 28 հոկտեմբերի, 2023
Կեղծ թեզ է, թե  Ադրբեջանի հարձակումը եղավ նոր նախագահի ընտրության պատճառով․ ես՝ որպես ԱԽ քարտուղար, մշտապես ստանում էի այդ տեղեկությունը վերջին ամիսներին

Կեղծ թեզ է, թե Ադրբեջանի հարձակումը եղավ նոր նախագահի ընտրության պատճառով․ ես՝ որպես ԱԽ քարտուղար, մշտապես ստանում էի այդ տեղեկությունը վերջին ամիսներին

Արցախի նախագահ Սամվել Շահրամանյանը հարցազրույց է տվել Արցախի հանրային ՀԸ-ին։ Խոսելով այն կարծիքի մասին, թե Ադրբեջանի վերջին հարձակումը տեղի է ունեցել նոր նախագահի ընտրության պատճառով, Շահրամանյանն այն կեղծ թեզ որակեց․ «Ադրբեջանական կողմը հաշվի չի առնում, թե ինչ գործընթացներ են տեղի ունենում Արցախում, պարզ է, որ իմ ընտրվելուց հետո չէ մշակվել ռազմական գործողությունների այդ պլանը․ դա նախօրոք պատրաստված էր, և դուք տեղյակ եք, որ մենք 9 ամիս եղել ենք բլոկադայի մեջ, վերջին 4 ամիսները՝ պաշարման մեջ, ինչ խնդիրներ ենք ունեցել ներքին կյանքում։ Վերջին ամիսներին ես՝ որպես Անվտանգության խորհրդի քարտուղար, մշտապես ստանում էի այդ տեղեկությունը, և մենք պարբերաբար քննարկում էինք, թե ինչ կուտակումներ է իրականացնում Ադրբեջանը շփման գծի ողջ երկայնքով, նաև ծանր տեխնիկա, հրետանի, մեծ քանակով անձնակազմ՝ այդ թվում հատուկ նշանակության։ Եվ խոսել, որ վերջին օրերին է այդ գաղափարը ծագել և ընտրությունների հետ է կապված, ինձ թվում է՝ ճիշտ չի ու կեղծ թեզ է»։
22:39 - 28 հոկտեմբերի, 2023
Արցախի պետական ապարատի աշխատակիցների մի մասը ստացել է աշխատավարձ․ Մետաքսե Հակոբյան |tert.am|

Արցախի պետական ապարատի աշխատակիցների մի մասը ստացել է աշխատավարձ․ Մետաքսե Հակոբյան |tert.am|

tert.am: Արցախի պետբյուջեի հաշվին պետական ապարատի աշխատակիցների մի մասն արդեն ստացել են սեպտեմբերի աշխատավարձը։ Այս մասին Tert.am-ի հետ զրույցում հայտնել է ԱՀ ԱԺ «Արդարություն» խմբակցության պատգամավոր Մետաքսե Հակոբյանը։ Նրա փոխանցամբ, սակայն, աշխատավարձն ամբողջությամբ չի վճարվել, այլ՝ պահումներով։ «Կառավարության անդամները և աշխատակիցները, պատգամավորները, ինչպես նաև ուսուցիչները ստացել են աշխատավարձ։ Շատ մեծ տարբերությամբ են աշխատավարձը վճարել, բայց փոխանցումներն արվել են։ Չեմ կարող ասել՝ ամբողջ համակարգը ստացել է, թե՝ ոչ, բայց պատագամավորների և ուսուցիչների մասով կարող եմ վստահեցնել։ Իմ ունեցած տեղեկություններով՝ հոկտեմբերի 27-ի դրությամբ դեռ բժիշկներն աշխատավարձ չէին ստացել»,- մանրամասնեց նա։ Հիշեցնենք, որ Արցախի պետաշխատողների աշխատավարձի հարցը մեծ աղմուկ էր բարձրացրել: Թեև Սամվել Շահրամանյանի հրամանագրով Արցախի պետական գերատեսչությունները մինչև 2024-ի հունվարի 1-ը գործում են, այսինքն՝ փաստացի մինչև տարեվերջ պետաշխատողները պետք է վճարվեն, սակայն, ինչպես հետո պարզվեց, նրանք անգամ սեպտեմբերի աշխատավարձերը չէին ստացել: Օրերս էլ արցախցիները հավաքվել էին Հայաստանում Արցախի ներկայացուցչության շենքի մոտ և բողոքում էին Արցախի նախագահի հոկտեմբերի 19-ի ստորագրած հրամանագրից, համաձայն որի հոկտեմբերի 1-ից աշխատավարձ չեն ստանալու։
18:25 - 28 հոկտեմբերի, 2023
ԼՂ նախագահը պետք է կողմնորոշվի՝ ստորագրե՞լ է ԼՂ-ն լուծարելու փաստաթուղթ, թե՞ ոչ․ Անդրանիկ Քոչարյան |armenpress.am|

ԼՂ նախագահը պետք է կողմնորոշվի՝ ստորագրե՞լ է ԼՂ-ն լուծարելու փաստաթուղթ, թե՞ ոչ․ Անդրանիկ Քոչարյան |armenpress.am|

armenpress.am: Հայաստանի իշխանությունները ցանկանում են, որ Լեռնային Ղարաբաղի իշխանությունները պատասխանեն այն հարցերին, որոնց սպասում է արցախահայությունը:  Լրագրողների հետ ճեպազրույցում այս մասին ասաց Հայաստանի Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։ «Ուզում ենք, որպեսզի Արցախի իշխանությունները պատասխանեն այն հարցերին, որոնց սպասում են արցախահայերը Հայաստան տեղափոխվելուց հետո։ Այդ իշխանությունները մի օր ասում են՝ «ստորագրել ենք», մի օր ասում են՝ «չենք ստորագրել», մի օր ասում են՝ «այս պաշտոնյաները պետք է պաշտոնյա մնան, մյուսները պետք է չմնան», մեկ էլ ասում է՝ «պետք է գլուխ ջարդենք»։ Ես էլ ասում եմ՝ չէ, պարո՛ն Շահրամանյան, դուք 22 ձայնով ընտրված նախագահ եք, եկել է ժամանակը գլուխներ փրկելու, գլուխներ ջարդել չպետք է լինի»,- նշեց նա։  Քոչարյանն ընդգծեց՝ ԼՂ նախագահը պետք է կողմնորոշվի՝ ստորագրե՞լ է ԼՂ-ն լուծարելու փաստաթուղթ, թե՞ ոչ։ «Շահրամանյանը եթե չի ստորագրել ԼՂՀ-ն լուծարելու փաստաթուղթը, այդ դեպքում ինչո՞ւ է գտնվում Հայաստանում, ինքը պետք է պաշտոնավարեր Լեռնային Ղարաբաղում։ Ինչո՞ւ արցախահայությունը լքեց իր բնակավայրը»,- եզրափակեց Քոչարյանը։  Հոկտեմբերի 20-ին Հայաստանում Լեռնային Ղարաբաղի ներկայացուցչության մոտ բողոքի ակցիա էին անցկացնում մի խումբ արցախցիներ՝ պահանջելով հանդիպում ԼՂ նախագահ Սամվել Շահրամանյանի հետ։ Նրանք պահանջում էին, որպեսզի ԼՂ նախագահը պարզաբանում ներկայացնի 2024 թվականի հունվարից ԼՂ-ն լուծարելու վերաբերյալ հրամանագիրը ստորագրելու հարցի շուրջ։ Ակցիայի մասնակիցների հետ հանդիպմանը Շահրամանյանը վստահեցրեց, որ որևէ մեկը չի կարող Լեռնային Ղարաբաղը լուծարելու մասին հրամանագիր ստորագրել՝ նշելով, որ ավելին այդ պահին չի կարող ասել և հետագայում պարզաբանումներով հանդես կգա։ 
13:08 - 23 հոկտեմբերի, 2023
Արցախի իշխանությունները դատապարտում են Երևանի ներկայացուցչությունում տեղի ունեցածը. Շտաբ

Արցախի իշխանությունները դատապարտում են Երևանի ներկայացուցչությունում տեղի ունեցածը. Շտաբ

Արցախի Հանրապետության իշխանությունները դատապարտում են հոկտեմբերի 20-ին ՀՀ-ում Արցախի մշտական ներկայացուցչությունում տեղի ունեցածը, երբ բռնության ու վիրավորանքի դրսևորումներով մի խումբ անձինք, խախտելով հասարակական կարգը, ոչ կառուցողական մթնոլորտ են ստեղծել ներկայացուցչության բակում քաղաքացիների հավաքի ժամանակ՝ փորձելով հրահրել զանգվածային անկարգություններ: Այս մասին հաղորդագրություն է տարածել Արցախի տեղեկատվական շտաբը։ «Նախագահ Սամվել Շահրամանյանն ի սկզբանե պատրաստ էր լսել  քաղաքացիներին՝ հնարավորության սահմաններում պարզաբանումներ տալով նրանց հուզող հարցերին: Հակառակ արհեստականորեն ստեղծված բոլոր խոչընդոտներին՝ նախագահ Շահրամանյանն ընդունել է հավաքի ակտիվին, պարզաբանումներ տվել սույն թվականի սեպտեմբերի 19-ից 20-ը Արցախի Հանրապետության շուրջ ստեղծված ռազմաքաղաքական իրավիճակի վերաբերյալ: Հանդիպման ընթացքում քաղաքացիները բարձրացրել են մի շարք սոցիալական, այդ թվում՝ ՀՀ-ում կացարանով ապահովված չլինելու հետ կապված խնդիրներ:  Սամվել Շահրամանյանը նշել է, որ Արցախի կառավարությունը շարունակելու է գույքագրել նմանատիպ բոլոր հարցերը և դրանք ներկայացնել ՀՀ կառավարությանը, քանի որ ինչպես արդեն հայտարարել ենք, Արցախից բռնի տեղահանված քաղաքացիների առողջապահական, կրթական, սոցիալական աջակցության և համանման այլ հարցերով աշխատանքները համակարգում է ՀՀ կառավարության հումանիտար կենտրոնը։ Առաջացող բոլոր հարցերի կապակցությամբ պարզաբանումներ ստանալու նպատակով կարող եք զանգահարել ՀՀ աշխատանքի և սոցիալական հարցերի նախարարության շուրջօրյա գործող թեժ գիծ՝ 114 հեռախոսահամարով, կամ դիմել Միասնական սոցիալական ծառայության տարածքային (մարզային) կենտրոններ)»,- հայտնում են Շտաբից։ Նշվում է նաև, որ Արցախի Հանրապետության իշխանությունները հայցում են այն լրագրողների և քաղաքացիների ներողամտությունը, ում աշխատանքը անկարգության պայմաններում խոչընդոտվել է, և ովքեր չեն կարողացել ստեղծված իրավիճակում իրենց հարցերն ուղղել կառավարության ներկայացուցիչներին: «Միևնույն ժամանակ ՀՀ իրավապահ մարմինների ուշադրությունն ենք հրավիրում կատարվածի վերաբերյալ՝ կոչ անելով հետագայում բացառել բռնության դրսևորումներն ու զանգվածային անկարգությունները»,- ընդգծել են Շտաբից։
16:31 - 21 հոկտեմբերի, 2023