Միգրացիոն ծառայություն

Միգրացիոն ծառայությունը Հայաստանի Հանրապետության տարածքային կառավարման և ենթակառուցվածքների նախարարության կառավարման ոլորտում գործող պետական մարմին է, որը մշակում և իրականացնում է միգրացիայի բնագավառում Հայաստանի Հանրապետության կառավարության քաղաքականությունը։

Հուլիսի 17-ից Երևանի բոլոր անձնագրային ծառայություններն անցում կկատարեն էլեկտրոնային հերթագրման համակարգով սպասարկելուն |armenpress.am|

armenpress.am: Անձնագրային ծառայություններում հերթերը կարգավորելու համար ներդրված էլեկտրոնային հերթագրման համակարգը տալիս է իր արդյունքը։ Քաղաքացիները հերթագրվում են https://migration.e-gov.am/ էլեկտրոնային հարթակում, մոտենում անձնագրային ծառայություն ու կարճ ժամանակում սպասարկվում։ ՀՀ ՆԳՆ Միգրացիայի և քաղաքացիության ծառայության պետ Արմեն Ղազարյանը նշեց, որ համակարգի ներդրման առաջին իսկ օրերից անձնագրային ծառայություններում մեծաթիվ հերթեր չկային։ «Դեռ նախորդ տարվա ավարտին, երբ ինստիտուցիոնալ փոփոխություններ տեղի չէին ունեցել, Ոստիկանության անձնագրերի ու վիզաների վարչության վարչական շենքում գործում էր օն-լայն (առցանց) հերթագրումը։ Այս տարվանից արդեն անձնագրային ծառայություններում որոշել ենք ներդնել էլեկտրոնային հերթագրման համակարգերը։ Գիտեք, թե ինչպիսի խնդիրներ են առաջանում հերթերի հետ կապված, երբ մարդիկ ստիպված են լինում ժամերով կանգնել անձնագրայիններում։ Որոշեցինք, որ այս նոր համակարգը կդյուրացնի գործընթացը։ Արդեն իսկ էլեկտրոնային հերթագրման կարգ է գործում Քանաքեռ-Զեյթունի, Արաբկիրի և Մաշտոցի անձնագրային բաժանմունքներում, իսկ հուլիսի 10-ից էլեկտրոնային հերթագրում իրականացվում է նաև Կենտրոնականի, Նոր Նորքի, Մալաթիա-Սեբաստիայի և Շենգավիթի անձնագրային ծառայություններում: Հուլիսի 17-ից Երևանի բոլոր ծառայություններն անցում կկատարեն այս տարբերակով սպասարկելուն»,-ասաց Արմեն Ղազարյանը։ Միգրացիայի և քաղաքացիության ծառայության պետն ընդգծեց, որ էլեկտրոնային հերթագրմանը միացած անձնագրային ծառայություններում սպասարկումն իրականացվելու է բացառապես էլեկտրոնային հերթագրման պարագայում։ Առանց հերթագրման ծառայություն այցելած քաղաքացիները չեն սպասարկվելու։ «Այդպես որոշեցինք, քանի որ այլ կերպ հերթերը դառնում են անկառավարելի։ Եթե տայինք հնարավորություն, որ քաղաքացին այցելեր առանց հերթագրման, ապա կրկին կառաջանար այնպիսի իրավիճակ, երբ հերթերը կառավարել հնարավոր չէր։ Այս նոր համակարգի գործարկմամբ նոր մշակույթ է ձևավորվում անձնագրային ծառայություններում, որը նախկինում չի եղել։ Մարդիկ տնայնավարության սկզբունքով են վերաբերել անձնագրային գործողություններին՝ հարցերը թողնելով մինչև վերջին պահը։ Սա նաև որոշակի պլանավորման մշակույթի ձևավորման քայլ կարող ենք համարել։ Ինչպես վիզային ծառայություններից օգտվելու դեպքում են նախապես պլանավորում, հերթագրվում, այս դեպքում էլ քաղաքացիները նույնը պետք է անեն»,-ասաց Արմեն Ղազարյանը։ Թեպետ ֆիզիկական հերթեր արդեն էլեկտրոնային հերթագրմամբ աշխատող անձնագրային բաժանմունքներում չկան, միևնույն է անձնագրային ծառայությունները շարունակում են պահանջված մնալ։ Այդ մասին է վկայում այն, որ էլեկտրոնային հարթակի միջոցով գրանցվելու դեպքում մոտակա օրերն արդեն զբաղված են։ Եվ որպեսզի գործն ավելի արագ ստացվի, շատերը սկսել են դիմել երևանամերձ անձնագրային բաժանմունքներ։ Եվ ահա նկատվում է ծանրաբեռնվածություն երևանամերձ անձնագրային ծառայությունում։ Արմեն Ղազարյանի խոսքով՝ դա պայմանավորված է զբոսաշրջային ակտիվ սեզոնով, միգրացիոն հոսքերի մեծացմամբ։ Երևան քաղաքում էլեկտրոնային հերթագրման համակարգն ամբողջությամբ ներդնելուց հետո Միգրացիայի և քաղաքացիության ծառայությունն անցում է կատարելու երևանամերձ հատվածներին, խոշոր քաղաքներին։ Կառույցում թվայնացումն ու էլեկտրոնային ծառայությունների զարգացումն են համարում ճիշտ ճանապարհը։ «Էլեկտրոնային հարթակով հերթագրվելը բավական դյուրին է, այն դյուրացվել է։ Հերթագրվելու համար անհրաժեշտ է ունենալ էլեկտրոնային փոստի հասցե։ Քաղաքացին մուտք է գործում հարթակ, ընտրում է ծառայության տեսակը, նշում է անձնական տվյալները, ինչպես նաև փոստի հասցեն, որի միջոցով էլ ստանում է վերիֆիկացման կոդը։ Անձն ընտրում է այն վայրը, որտեղ ցանկանում է սպասարկվել, ընտրում է նաև օրն ու ժամը և վերջ։ Հերթագրումը կատարված է»,-ասաց Արմեն Ղազարյանը՝ տեղեկացնելով, որ բոլոր անձնագրայիններն այս շրջանում աշխատում են նաև շաբաթ օրերին։ Էլեկտրոնային տարբերակով հնարավոր է հերթագրվել շաբաթ օրերի համար ևս։ Ծանրաբեռնվածությունը կրճատելու համար Միգրացիայի և քաղաքացիության ծառայությունը գնում է ծառայությունները քայլ առ քայլ թվայնացնելու ուղղությամբ։ Ներկայում թվայնացվել է 3 տեսակի տեղեկանքների ձեռքբերման գործընթացն օն-լայն (առցանց) հարթակի միջոցով։ Եթե քաղաքացին անցնի խիստ նույնականացում, ապա հնարավոր է հանրային ծառայությունների համարանիշի, ինչպես նաև հաշվառման մասին տեղեկանքը, անձը հաստատող փաստաթղթերի մասին տեղեկանքը ստանալ օն-լայն (առցանց) ճանապարհով։

10:52 - 11 հուլիսի, 2023

Միգրացիոն ծառայությունը ներկա ձևաչափով ավարտում է իր գործունեությունը. Արմեն Ղազարյանն ամփոփում է տարին |armenpress.am|

armenpress.am: Հայաստանի միգրացիոն ծառայության համար տարին բավական բարդ էր և միաժամանակ շրջադարձային՝ մի շարք բարեփոխումների համատեքստում: Մասնավորապես, Ներքին գործերի նախարարության ձևավորման վերջին փուլն էր, և մեծ աշխատանք է կատարվել այդ ուղղությամբ: Ամփոփելով տարին՝ Հայաստանի միգրացիոն ծառայության պետ Արմեն Ղազարյանը նշեց, որ ՆԳ նախարարության ձևավորումը, ինչպես նաև ՆԳ նախարարության կազմում Միգրացիայի և քաղաքացիության ծառայության ձևավորումը, ինստիտուցիոնալ իմաստով ամենամասշտաբային ռեֆորմն է: Այս ուղղությամբ կատարվել է մեծ ծավալի օրենսդրական աշխատանք: «Չէի ցանկանա, որ այս փոփոխությունները զուտ ընկալվեին որպես գերատեսչությունների պարզ միավորում, որովհետև իրականացվել է ֆունկցիոնալ բազային ամբողջական գնահատում և օպտիմալացում: Մենք գործառույթներն առնվազն դնում ենք այնպիսի ուղու վրա, որ ակնկալենք երկու կարևոր հանգամանք: Այն է՝ վարչարարական գործընթացներում ժամանակի կորստի էական նվազում, ծառայությունների մատուցման որակի էական բարձրացում: Այս երկու նպատակներին հասնելու համար կարևոր գործիք է թվայնացումը: Դրա միջոցով է հնարավոր նվազեցնել ավելորդ բյուրոկրատիան, թղթաբանությունը, վարչական մարմնի և քաղաքացու շփումը նվազագույնի հասնելը»,-ասաց Արմեն Ղազարյանը՝ հավելելով, որ այս փոփոխությունները ուղղված են ոչ թե վերահսկողական գործընթացներին, այլ՝ քաղաքացուն: Դրանից բացի, կարևոր գործառույթ է վերապահվում նոր ստեղծվող ՆԳ նախարարությանը: Արմեն Ղազարյանը նկատեց, որ այսօր միգրացիոն քաղաքականության մշակումը՝ որպես օրենսդրական գործառույթ, որևէ պետական մարմնի վրա դրված չէ: Այնինչ, իրականում քաղաքականությունները պետք է մշակվեն նախարարությունների և իրականացվեն ոլորտային ենթակա մարմինների կողմից: Խոսելով ՆԳՆ-ի ստեղծման փաթեթից՝ Արմեն Ղազարյանը նկատեց, որ այնտեղ բավական հստակ ուրվագծված է՝ միգրացիոն քաղաքականության մշակման, քաղաքականության իրականացման համակարգման և մոնիտորինգի գործառույթները դրված են ՆԳ նախարարության վրա, իսկ իրականացումը կապահովի Միգրացիայի և քաղաքացիության ծառայությունը: Ներկայացնելով ընթացիկ տարվա աշխատանքները՝ Արմեն Ղազարյանը նշեց, որ գործարկել են օտարերկրացիներին աշխատանքի հիմքով կացության կարգավիճակի տրամադրման էլեկտրոնային հարթակը, որի միջոցով գործատուները, օտարերկրացի աշխատողները միասնական հարթակի միջոցով, էլեկտրոնային ճանապարհով իրականացնում են վարչարարությունը: Բոլոր պետական մարմինները, որոնք ներգրավված են այդ գործընթացում, ևս աշխատում են այդ հարթակի միջոցով: «Մենք կարողացանք հասնել այն իրավիճակին, որ պետական մարմին և օտարերկրացու շփումը դարձել է մեկանգամյա: Օտարերկրացին մեկ պատուհանի սկզբունքով ստանում է իր ժամանակավոր կացության կարգավիճակը»,-ասաց Արմեն Ղազարյանը: Ընթացիկ տարում շարունակվել են աշխատանքները նաև այլ գործառույթների թվայնացման ուղղությամբ: Ապաստանի գործառույթի իրականացման համար ևս գործարկվել է ներքին վարչարարական հարթակը: Դրանից բացի, 2019 թվականից գործում էր ռեադմիսիոն հայցերի կառավարման էլեկտրոնային հարթակը, որն արդեն 2022-ին ընդլայնել է իր աշխարհագրությունը: Մի շարք եվրոպական երկրներ, որոնք ռեադմիսիոն հայցեր են ուղարկում Հայաստանին, ևս միացել են նշված հարթակին: Արմեն Ղազարյանն ընդգծեց, որ միգրացիոն ծառայության գրեթե բոլոր վարչական գործընթացներն իրականացվում են էլեկտրոնային հարթակների միջոցով: Ամփոփիչ տեսքի է բերվել Ադրբեջանից բռնագաղթած և Հայաստանում ժամանակավոր կացարաններում բնակվող փախստականներին բնակարանների գնման վկայագրերի տրամադրման գործընթացը: Այն Երևանում ամբողջությամբ ավարտվել է: 2022 թվականին ընդունվել են կարևոր որոշումներ, որոնք թույլ կտան 2023-ին ծրագիրն իրականացնել մյուս մարզերում ևս: Կատարվել է շահառուների ամբողջական վերահաշվառում: Այսօրվա դրությամբ մարզերում հաշվառվել է 194 ընտանիք, որոնք կարող են դառնալ այս ծրագրի շահառու: Հունվարի կեսերին կավարտվի դիմումների ընդունման գործընթացը: Ինչ է սպասվում այս ծրագրերին բարեփոխումներից, ծառայությունների միավորումներից հետո. արդյոք դադարեցվելու ե՞ն: Արմեն Ղազարյանը վստահեցրեց, որ բոլոր ծրագրերն ու ծառայությունները շարունակելու են իրականացվել, որևէ դադար չի լինելու: Միայն հաջորդ տարվա համար նախատեսված է Միգրացիոն ծառայության սոցիալական բնույթի գործառույթները փոխանցել ՀՀ աշխատանքի և սոցիալական հարցերի նախարարությանը: «Միգրացիոն ծառայությունը իրականացնում է մի խումբ սոցիալական գործառույթներ, որոնք բնորոշ չեն միգրացիոն ծառայություններին: Վստահեցնում եմ՝ ծրագրերը, ծառայությունները կանգ չեն առնելու: Այն ծրագրերը, որոնք նախանշեցի, շարունակվելու են իրականացվել, բայց սոցիալական բնույթի գործառույթները փոխանցվելու են ՀՀ աշխատանքի և սոցիալական հարցերի նախարարությանը: Օրինակ, երբ դրական որոշում է տրվում, և քաղաքացին ճանաչվում է փախստական, հաջորդիվ իրականացվում է ծրագիր, որով սուբսիդավորվում է բնակարանի վարձը 6 ամիս ժամկետով: Սա սոցիալական գործառույթ է, որը փոխանցվելու է ՀՀ աշխատանքի և սոցիալական հարցերի նախարարությանը»,-ասաց Արմեն Ղազարյանը: Հայաստանի միգրացիոն ծառայության պետը վստահեցրեց, որ անցումը կազմակերպել են բավականին հարթ: Այդ աշխատանքները դեռ կշարունակեն իրականացվել Միգրացիոն ծառայության կողմից՝ մինչև նոր կանոնադրության հաստատումը: Ինչ կադրային քաղաքականություն է սպասվում նոր կառույցի ստեղծմամբ ու ծառայությունների միավորմամբ: Փոփոխությունների փաթեթը ենթադրում է գործող կադրերի վերապատրաստում: Դրա արդյունքներով էլ կիրականացվեն նշանակումները: «Ստացվում է Միգրացիոն ծառայության ներկայիս ֆորմատով գործունեության ավարտն է: Այն 30 և ավելի տարիների ընթացքում շատ մեծ աշխատանք է կատարել ու հիմնականում փախստականների խնդիրների լուծման ուղղությամբ, հնարավորինս դիմակայել է ժամանակի մարտահրավերներին, սակայն ժամանակները փոխվել են, մարտահրավերները՝ նույնպես: Կցանկանայի, որ այս բարեփոխումները ընկալվեն որպես արդիականացման գործընթացի մաս: Միգրացիոն կարողությունները, օրենսդրությունն արդիականացվում են, համապատասխանեցվում են ժամանակակից աշխարհի կարիքներին, իհարկե՝ տեղային իրողությունները հաշվի առնելով»,-հավելեց Արմեն Ղազարյանը: Նոր ձևավորվող նախարարության կազմում միգրացիոն ծառայության ամբողջական ընդգրկումն ապահովելու համար տրված է անցումային փուլ՝ մինչև 10 ամիս: Այդ ընթացքում ծառայությունը շարունակելու է գործել իր ներկայիս հասցեում, պահպանվելու են նույն կոորդինատները:

10:40 - 30 դեկտեմբերի, 2022