ՏԿԵՆ - infocom.am

ՏԿԵՆ

Տարածքային կառավարման և ենթակառուցվածքների նախարարությունը գործադիր իշխանության հանրապետական մարմին, որը մշակում և իրականացնում է Հայաստանի Հանրապետության կառավարության քաղաքականությունը տարածքային կառավարման և զարգացման բնագավառում։

ՏԿԵ նախարարն է Սուրեն Պապիկյանը, տեղակալներն են Լիլիա Շուշանյանը, Հակոբ Վարդանյանը, Արմեն Սիմոնյանը, Վաչե Տերտերյանը, Կարեն Իսախանյանը։

Վարչապետին է ներկայացվել Պետական գույքի կառավարման կոմիտեի 2023 թ. գործունեության հաշվետվությունը

Վարչապետ Նիկոլ Փաշինյանն այցելել է ՀՀ ՏԿԵՆ պետական գույքի կառավարման կոմիտե՝ քննարկելու կոմիտեի 2023 թ. գործունեության հաշվետվությունը։ Պետական գույքի կառավարման կոմիտեի նախագահ Առնակ Ավետիսյանը և նրա տեղակալները զեկուցել են հաշվետու ժամանակաշրջանում իրականացված միջոցառումների մասին: Հանգամանալից զեկուցվել է 2023 թ. կատարված օտարումների և ներդրումային պարտավորությունների մասին։ Նշվել է, որ նախորդ տարում պետական գույքի օտարման և մասնավորեցման դրամական արժեքը կազմել է 34․9 մլրդ դրամ, որը շուրջ 14․2 մլրդ դրամով ավելի է 2022 թ․ ցուցանիշից։ Պետական մարմիններին ամրացված ավտոմեքենաների թվաքանակի կրճատման տեսանկյունից կարևորվել է 2023 թ․ օտարված տրանսպորտային միջոցների թիվը, որը կազմել է 488՝ 386-ով ավելի 2022 թվականից։ Օտարված տրանսպորտային միջոցների ընդհանուր արժեքը կազմել է 340 մլն դրամ, որը նախորդ տարվա ցուցանիշից ավելի է 166%-ով։ Տրանսպորտային միջոցների օպտիմալացման առումով խոսվել է 2024 թ․ նախատեսվող՝ մեքենաների հատկացման նոր չափորոշիչներից և գործընթացի կենտրոնացված կառավարումից։ Վարձակալությունից մուտքերը կազմել են շուրջ 674 մլն դրամ, որը 43․2 %-ով ավելի է 2022 թ․ ստացված մուտքերից։ Հաշվետվության ներկայացման ընթացքում նշվել է, որ 2023 թ․ կատարված գործարքների արդյունքում ներդրողները ստանձնել են ընդհանուր 37 մլրդ դրամի ներդրումային պարտավորություն Անդրադառնալով այս գործընթացին՝ վարչապետը նշել է. «Մենք ունենք մասնավորեցման շատ երկար պատմություն և այդ մասնավորեցումների ընթացքում ունենք նաև այդպիսի դեպքեր, երբ 25 տարի առաջ մասնավորեցվել է՝ արձանագրվել է այսքան պարտավորություն, ներդրում, աշխատատեղ և այլն, սակայն այդ շենքը շարունակում է այդպես ուղղակի կանգնած մնալ: Մենք այստեղ որևէ անդրադարձ և մեխանիզմ ունե՞նք և ո՞րն է մեր մոտեցումն ընդհանարապես: Մենք աշխատո՞ւմ ենք այս ուղղությամբ»: Զեկուցվել է, որ 2023 թվականին 10 հայցադիմում է ներկայացվել դատարան մասնավորի կողմից ստանձնած պարտավորությունները չկատարելու հիմքով: Հայցադիմումը վերաբերվում է պարտավորությունները կատարելուն հարկադրելուն: Ըստ պատասխանատուների՝ հիմնականում Պետական գույքի կառավարման կոմիտեի օգտին վճիռներ են կայացվել: Եթե պարտավորությունները չեն կատարվել, նոր արդեն երկրորդ փուլով հայցադիմում է ներկայացվում՝ գույքը պետությանը վերադարձնելու պահանջով: Ի պատասխան վարչապետի հարցի՝ նշվել է, որ արդեն իսկ պետության վերադարձված 4 դեպք է առկա. 3-ը հողամաս են, մեկը՝ անշարժ գույք: Այսպիսով, Պետական գույքի կառավարման կոմիտեի գործունեության արդյունքում 2023 թ․ բյուջետային մուտքերը կազմել են 15․4 մլրդ դրամ՝ 72․2 %-ով ավելի 2022 թվականից։ Այս ցուցանիշն աննախադեպ բարձր է վերջին տարիներին պետական գույքի կառավարման ոլորտում եղած ցուցանիշներից։ Զեկուցվել է, որ մասնավորեցվող պետական գույքից և հողից ստացվող միջոցների 30 տոկոսը հատկացվում է համայնքին: Վարչապետ Փաշինյանը հետաքրքրվել է. «Բոլոր դեպքերում, երբ պետական գույքը մասնավորեցնում ենք, համայնքին մասնաբաժին ենք տալիս, և հիմա մասնաբաժինն ավելացրել ենք և պատրաստվում ենք նորի՞ց ավելացնել»: Տարածքային կառավարման և ենթակառուցվածքների նախարար Գնել Սանոսյանը նշել է, որ գույքի վաճառքից 30 տոկոսը հատկացվում է համայնքին և հավելել. «Հիմա նաև առաջարկում ենք պետական հողի վաճառքից էլ գումար տալ: Մենք ունենք բազմաթիվ դեպքեր, երբ համայնքն այդքան շահագրգռված չէ ֆիզիկապես իր տարածքում գտնվող պետական գույքի օտարման հետ կապված: Մենք հիմա այս գումարը հատկացնելով՝ համայնքի մոտ ստեղծում ենք շահագրգռվածություն, որ այդ չօգտագործվող գույքը նաև ինքը հետաքրքրված լինի վաճառել՝ հաշվի առնելով երկու հանգամանք, վաճառքից իր բյուջե ուղիղ 30 տոկոս գումար կմտնի, հետո իր համայնքում տնտեսական էֆեկտ կլինի»,- ասել է նախարարը: Նշվել է, որ 2023 թվականին պետական գույքի վաճառքից ընդհանուր առմամբ համայնքներին տրամադրվել է 2.3 մլրդ դրամ: Անդրադարձ է կատարվել նաև «Կարեն Դեմիրճյանի անվան մարզահամերգային համալիր» ՓԲԸ-ում իրականացված աշխատանքներին։ Մասնավորապես նշվել է, որ 2023 թ․ Մարզահամերգային համալիրում կայացել է 119 միջոցառում, որից ստացվել է 768 մլն դրամի եկամուտ՝ 18%-ով ավելի 2022 թ․ եկամուտից։ Նշվել է, որ Մարզահամերգային համալիրում լայն թափով ընթացել և ընթանում են շինարարական աշխատանքներ․ կապիտալ նորոգվել է պոմպակայանը, ձեռք են բերվել օդափոխության և հակահրդեհային համակարգերի նախագծանախահաշվային փաստաթղթերը, իրականացվում են տանիքի վերանորոգման նախապատրաստական աշխատանքներ։ Քննարկվել են նաև ոլորտում իրականացված համակարգային բարեփոխումներին և պետական գույքի կառավարման ռազմավարությանը վերաբերող հարցեր։ Վարչապետ Փաշինյանը հետաքրքրվել է, թե քանի պետական առևտրային կազմակերպություն է առկա: Պատասխանատուների խոսքով, դրանց թիվը հասնում է 146-ի: Վարչապետը կարևորել է վերջիններիս գործունեության վերաբերյալ մոնիթորինգի իրականացումը: «Առնվազն մենք պետք է իմանանք՝ ինչ է կատարվում այնտեղ, եթե աշխատում է, պետք է հասկանալ՝ ինչպես է աշխատում: Եթե պոտենցիալ ունի, չունի և այլն, այստեղ մենք առանձին մոտեցում պետք է ունենանք»,- ասել է Նիկոլ Փաշինյանը: Նշվել է, որ 2022 թվականից սկսել են մոնիթորինգի իրականացումը: «Առնվազն վատ չէ, որ մենք այդ թեմային հասել, անդրադարձել ենք: Ես կարծում եմ, որ դա դեպք առ դեպք պետք է անդրադառնանք, որովհետև տարբեր պրոֆիլների, տարբեր նրբությունների և ուղղությունների ընկերություններ են, բայց որ այդտեղ պետք է շատ նախանձախնդիր լինել, որովհետև պետական բյուջեի եկամուտների, ֆինանսական հոսքերի և ոչ ֆինանսական ակտիվների կառավարման մասին է խոսքը: Եկեք պայմանավորվենք, որ արագ բանաձև ենք դուրս բերելու, թե ինչպես ենք գործելու»,- նշել է վարչապետը: Նշվել է, որ 2023 թ․ գույքի արդյունավետ կառավարման և ֆոնդային բորսայի միջոցով հետագա մասնավորեցման նպատակով հիմնադրվել է «Ռիփաբլիք պլազա» ԲԲԸ-ն, ինչը պետական գույքի կառավարման տեսանկյունից նոր երևույթ է։ Նախորդ տարում Կադաստրի կոմիտեի հետ համագործակցության արդյունքում ազգային տարածական տվյալների ենթակառուցվածքի Ազգային գեոպորտալի քարտեզագրական համակարգում ապահովվել է պետական սեփականություն հանդիսացող գույքի շերտի հասանելիություն։

13:52 - 31 հունվարի, 2024

Հաջողվել է վթարների և զոհերի որոշակի նվազեցում ունենալ. Փաշինյան |1lurer.am|

1lurer.am: Ճանապարհային ցանցի և թունելների անվտանգության մակարդակը կբարձրանա, դրանց հնարավոր ռիսկերը կնվազեցվեն: Այս մասին որոշման նախագիծը Կառավարության հունվարի 25-ի նիստին ներկայացրեց ՏԿԵ նախարար Գնել Սանոսյանը: Ըստ նախարարի՝ առաջին կարգավորումը վերաբերում է ճանապարհային անվտանգության աուդիտին, այն է՝ ճանապարհային անվտանգության աուդիտը դառնում է պարտադիր պահանջ, ինչպես շինարարությունը սկսելուց առաջ, ընթացքում, այդպես էլ աշխատանքների ավարտից 1 տարի հետո: «Առաջին փուլը նախատեսում ենք սկսել 2025 թվականի հուլիսից՝ միջպետական ճանապարհները, այնուհետև հերաթականությամբ՝ հանրապետական և տեղական ճանապարհները»,- ասաց նա: Երկրորդ փոփոխությամբ առաջարկվում է ստեղծել ճանապարհների անվտանգային տվյալների կառավարման միասնական և ինտեգրված համակարգ, որում կներառվեն ճանապարհատրանսպորտային պատահարները, զոհվածների և վիրավորների հետ կապված ինֆորմացիայի հավաքումը, ճանապարհային երթևեկության մասով վարչական իրավախախտումները, ավտոմոբիլային տվյալների վերլուծությունը և այլն: «Մենք հիմա տարբեր գերատեսչություններով ենք այս ինֆորմացիան վերլուծում, և նպատակն է, որ միասնական համակարգ լինի, որպեսզի կարողանանք վերլուծել: Կարևոր է, որ իրականացնենք պատահարների հանրային ծախսերի հաշվարկ»,- ասաց նախարարը և պարզաբանեց, որ խոսքը «վթարի արժեքի մասին» պատկերացում կազմելն է, ու երբ այդ ուսումնասիրությունն արվի, պարզ կլինի՝ մարդկային և ֆինանսական ինչ ռեսուրս է ծախսվում վթարի վրա, և գուցե կարիք կա ավելացնելու անվտանգային միջոցառումները այդ վթարները կանխելու նպատակով: Երկրորդ փոփոխությունը վերաբերում է թունելների հետ կապված կարգավորումներին: «Անվտանգային որոշակի պահանջներ ենք դնում՝ օդափոխության, լուսավորության, թունելներից տարհանման, հակահրդեհային համակարգերի հետ կապված»,- ասաց նախարարը և տեղեկացրեց, որ նախատեսվում է յուրաքանչյուր թունելի մասով ունենալ անվտանգության պատասխանատու: Վարչապետ Նիկոլ Փաշինյանն ընդգծեց՝ ճանապարհային երթևեկության անվտանգությունը Կառավարության ուշադրության կենտրոնում է: «Լավ լուրն այն է, որ մենք այդ աշխատանքների արդյունքը նաև տեսնում ենք, որովհետև որոշակի մեթոդաբանությամբ աշխատել ենք, և տեսնում ենք, որ հաջողվել է վթարների և զոհերի որոշակի նվազեցում ունենալ»,- նշեց նա: Փաշինյանը նաև հորդորեց խնդրին ստեղծագործաբար մոտենալ և պատմեց ՆԳ նախարարի ներկայացրած մի միջոցառման մասին, երբ ոստիկանությունը գնացել է ավտոկայաններ՝ ստուգելու միկրոավտոբուսների անվադողերը: Այն անվադողերով մեքենաները, որոնք մաշվածության բարձր աստիճան են ունեցել, թույլ չեն տվել դուրս գալ երթուղի: «Եթե նրանք դուրս գային երթուղի, 10-ից 6-ը ճանապարհին երեկվա եղանակային պայմաններում հաստատ վթարի ենթարկվելու էր: Մենք չգիտենք՝ այս գործողության արդյունքում ինչքան կյանք ենք փրկել, ինչքան վիրավոր ենք փրկել, ինչքան միջադեպից ենք ազատվել»,- ասաց վարչապետը: Փաշինյանը նաև նկատեց՝ խնդիր կա ոչ միայն ճանապարհների անվտանգության, այլև դրանց որակի աուդիտի: 4 տարի առաջ կառուցված ճանապարհն այսօր այն վիճակում չէ, ինչ պետք է լիներ, ուստի պետք է երաշխիք, ստանդարտ ունենալ, թե հիմնանորոգված ճանապարհը քանի տարի պետք է առանց միջամտության ծառայի: «Մենք պետք է բանաձև ունենանք, թե ինչ վիճակում պետք է լինի այդ ճանապարհը երթևեկության ինտենսիվությունից և այլնից [հետո]...»,- ասաց նա՝ միաժամանակ նշելով, որ այս մասով խնդիրներից մեկը բեռնատարների գերբեռնվածություն է: Ֆինանսների նախարար Վահե Հովհաննիսյանը նշեց, որ միջազգային պրակտիկայում կա պայմանագրի մի ձև, երբ պետությունը կապալառու ընկերության հետ կնքում է երկարաժամկետ պայմանագիր, որտեղ ոչ թե կառուցում է ճանապարհը, այլ վճարում է, որ այդ ճանապարհը հիմնանորոգումից հետո ևս լինի առանց փոսերի, գծանշումներով, և այդ մասով պատասխանատուն շինարարն է, որն ամսվա կտրվածքով մոնիթորինգ է իրականացնում, եթե թերություններ են հայտնաբերվում, տուգանքներ են սահմանվում: Այս մասով ՏԿԵ նախարարը տեղեկացրեց, որ ՀՀ-ում հիմնանորոգված ճանապարհները 3 տարվա երաշխիքային սպասարկման մեջ են: Այս համատեքստում Նիկոլ Փաշինյանը նկատեց՝ ՀՀ-ում չկա ճանապարհի վրա մի կետ, որով երթևեկելիս չզգաս՝ ճանապարհը փոխվեց: Նա նաև նկատեց, որ փոսը վերացնելիս վերանորոգված ճանապարհներին սպասարկման արդյունքում կարկատաններ են առաջանում, իսկ փոսալցումների դեպքում սովորաբար փոսալցված հատվածը ավելի բարձր է լինում, քան բուն ճանապարհը: Փաշինյանը սա լուծման ենթակա խնդիր համարեց: Վարչապետը նաև տեղեկացրեց, որ ճանապարհաշինական մի ընկերությանը նվեր է ուղարկել, որովհետև վերջինս իր աշխատանքներն իրականացնելիս պահպանել է ստանդարտները:

12:48 - 25 հունվարի, 2024