Վրաստան

Վրաստանի Հանրապետություն ինքնիշխան պետություն Հարավկովկասյան տարածաշրջանում, որը միջանկյալ դիրք է զբաղեցնում Արևելյան Եվրոպայի և Հարավարևմտյան Ասիայի միջև։ Գտնվում է Առաջավոր Ասիայում՝ Մեծ Կովկասի լեռնային համակարգի արևմտյան և կենտրոնական հատվածներում:

Զբաղեցնում է 69 700 կմ քառ․ տարածք, իսկ բնակչությունը՝ ըստ 2019 թվականի մարդահամարի տվյալների, կազմում է 3 723 500 մարդ։ Բնակչության ճնշող մեծամասնությունը կազմում են վրացիները, գլխավոր ազգային փոքրամասնություններն են ադրբեջանցիներն ու հայերը։ Վրաստանը խորհրդարանական կառավարման համակարգով սահմանադրական, բազմակուսակցական հանրապետություն է։

Կոբախիձե․ «Վրաստանը պատրաստ է վերագործարկել ԱՄՆ հետ իր կապերը» |azatutyun.am|

azatutyun.am: «Վրաստանը պատրաստ է վերագործարկել ԱՄՆ հետ իր կապերը՝ համագործակցության և երկկողմ հարաբերությունների ամրապնդման նպատակով», - այսօր Թբիլիսիում, ամերիկյան կոնգրեսական պատվիրակության հետ հանդիպումից հետո, հայտարարել է Վրաստանի վարչապետ Իրակլի Կոբախիձեն։ Երեկվանից Թբիլիսիում են գտնվում սենատոր Ջին Շահինը և Ներկայացուցիչների պալատի անդամ Մայք Թերները։ Ուրբաթ օրն ամերիկացի օրենսդիրները հանդիպել էին նախագահ Սալոմե Զուաբիշվիլիի հետ՝ նրան փոխանցելով Միացյալ Նահանգների նախագահ Ջո Բայդենի ուղերձը։ Դրանում Բայդենը նշել էր, թե հիասթափված է Վրաստանի իշխանությունների «վերջին հակաժողովրդավարական քայլերից»։ Շարունակությունը` սկզբնաղբյուր կայքում։

19:26 - 10 օգոստոսի, 2024

Վրաստանը մտադիր է ադրբեջանցի լրագրողին արտահանձնել Բաքվին |azatutyun.am|

azatutyun.am: Ադրբեջանցի լրագրող Աֆղան Սադիգովին ձերբակալել են Թբիլիսիում՝ հայրենիք արտահանձնելու նպատակով, հայտնում է Վրաստանի ներքին գործերի նախարարությունը։ Գերատեսչությունը հայտարարել է, որ 2024 թվականից Սադիգովը հետախուզվում էր սպառնալիքների և շորթման համար։ Աֆղան Սադիգովը azel.tv լրատվական կայքի խմբագիրն է։ Կինը նրա կալանավորումն անօրինական է համարում՝ պնդելով, որ նա հետախուզման մեջ չի եղել, և կալանքը Ադրբեջանի կառավարության հրամանն է։ Հուլիսի 18-ին Սադիգովը հայտնել էր, որ իրեն թույլ չեն տվել Թբիլիսիի օդանավակայանից թռչել Թուրքիա։ Նրա խոսքով՝ իրավապահներն ասել են, որ իր անձնագրի հետ կապված «ինչ-որ խնդիր կա», և «նա կարող է միայն վերադառնալ Բաքու»։ Սադիգովների ընտանիքը պնդում է, որ իրենք հեռացել են Ադրբեջանից՝ վախենալով հաշվեհարդարից։ Զույգը 2023 թվականից երկու երեխաների հետ բնակվում է Թբիլիսիում։ Լրագրողը 2016 թվականից ի վեր մի քանի անգամ ձերբակալվել է Բաքվում և ավելի քան մեկ տարի բանտում անցկացրել իր ռեպորտաժների համար։ 2020 թվականին, այն բանից հետո, երբ Սադիկովը դատապարտվեց 7 տարվա ազատազրկման, Լրագրողների պաշտպանության կոմիտեն պահանջեց նրան ազատ արձակել, իսկ առաջադրված մեղադրանքներն անվանեց «հորինված»։ 2 տարի անց նրան ներում շնորհվեց։

13:50 - 04 օգոստոսի, 2024

Դադարեցված ամերիկյան օգնության ծրագիրը Վրաստանի բյուջեի հետ կապ չունի․ Վրաստանի խորհրդարանի նախագահ |shantnews.am|

shantnews.am: Վրաստանում «Օտարերկրյա գործակալների մասին» օրենքի ընդունման պատճառով դադարեցված ամերիկյան օգնության ծրագիրը Վրաստանի բյուջեի հետ կապ չունի։ Այս մասին լրագրողներին հայտնել է Վրաստանի խորհրդարանի նախագահ Շալվա Պապուաշվիլին։ «Մենք այլ պետության կողմից սուբսիդավորվող հետամնաց երկիր չենք, կարևոր է նշել, որ մեր հասարակությանն ասել են, որ ինչ-որ տեղ ինչ-որ մեկը դադարեցրել է մեզ ֆինանսավորել, և սա աղետ կլինի: Այս գումարը բյուջեի հետ կապ չունի: Որքան ես գիտեմ՝ Վրաստանի խորհրդարանի հաստատած բյուջեում նման գումար չի եղել»,- ասել է Պապուաշվիլին։ Բանախոսն ընդգծել է, որ Վրաստանի քաղաքացիներն իրենք են ստեղծում երկրի բյուջեն և համալրում գանձարանը, որտեղից գումարները բաժանվում են տարբեր կարիքների համար։ Նրա խոսքով՝ դեռ հայտնի չէ, թե դրսից երկիր մտած գումարներն ինչի վրա են ծախսվել։ ԱՄՆ պետքարտուղար Էնթոնի Բլինկենը հուլիսի 31-ին ասել է, որ Վաշինգտոնը որոշել է դադարեցնել Թբիլիսիին ավելի քան 95 մլն դոլարի չափով օգնության ծրագիրը՝ կապված Վրաստանում «Օտարերկրյա գործակալների մասին» օրենքի ընդունման հետ։ Նախկինում նույն պատճառով ԵՄ-ն որոշել էր սառեցնել 30 միլիոն եվրոն, որը նախատեսվում էր հատկացնել Վրաստանի պաշտպանության նախարարությանը

19:26 - 03 օգոստոսի, 2024

Վրաստանում այսօրվանից ուժի մեջ է մտել «օտարերկրյա գործակալների» մասին աղմկահարույց օրենքը |tert.am|

tert.am: Վրաստանում օգոստոսի 1-ին ուժի մեջ է մտել «Օտարերկրյա ազդեցության թափանցիկության մասին» աղմկահարույց օրենքը, որը երկրում զանգվածային բողոքի ցույցեր է առաջացրել։ Իրավական նորմը իրենց եկամուտների առնվազն 20 տոկոսն արտերկրից ստացող հասարակական կազմակերպություններին ու լրատվամիջոցներին պարտավորեցնում է գրանցվել Հանրային ռեգիստրի ազգային գործակալությունում, գրում է dw.com-ը։ Օրենքի տարածման տիրույթում ընդգրկված կազմակերպությունները պարտավոր են ամեն տարի Արդարադատության նախարարություն ներկայացնել եկամուտների և ծախսերի հայտարարագիր: Այս պահանջներից խուսափելու դեպքում կկիրառվի 25 հազար լարի (մոտ 8,5 հազար եվրո) տուգանք։ Վիճահարույց օրենքի ընդունումն ուղեկցվում էր բողոքի ակցիաներով ապրիլի կեսերից։ Վրաստանի նախագահ Սալոմե Զուրաբիշվիլին վետո էր դրել փաստաթղթի վրա՝ այն անվանելով «օտարերկրյա գործակալների մասին» ռուսական օրենքի պատճենը, սակայն իշխող «Վրացական երազանք» կուսակցությունը հաղթահարել էր պետության ղեկավարի վետոն խորհրդարանում իր մեծամասնության շնորհիվ: Վրաստանի կառավարությունը պնդում է, որ, այսպես կոչված, «օտարերկրյա գործակալների» մասին օրենքը կամրապնդի պետական ինքնիշխանությունը և կնվազեցնի հասարակության բևեռացումը։ «Օտարերկրյա ազդեցության թափանցիկության մասին» օրենքը Թբիլիսիի հասցեին քննադատություններ է առաջացրել Եվրամիության և ԱՄՆ-ի կողմից։ ԵՄ երկրների ղեկավարները կասեցրել են Վրաստանի՝ Եվրամիությանն անդամակցելու գործընթացը և սառեցրել 30 միլիոն եվրոն, որը նախատեսված էր Թբիլիսիին պաշտպանական ոլորտում: ԱՄՆ-ն վիզային արգելքներ է մտցրել վրացի մի շարք քաղաքական գործիչների և իրավապահ մարմինների ներկայացուցիչների համար, ինչպես նաև հայտարարել է Վրաստանի հետ համագործակցության վերանայման մասին։ Մասնավորապես, Վաշինգտոնը դադարեցրել է 95 միլիոն դոլարի օգնությունը Թբիլիսիին և անորոշ ժամանակով հետաձգել Վրաստանի հետ «Արժանի գործընկեր» համատեղ զորավարժությունները։

13:19 - 01 օգոստոսի, 2024

ԱՄՆ-ը դադարեցնում է օգնությունը Վրաստանին․ Բլինկեն |tert.am|

tert.am: ԱՄՆ-ը դադարեցնում է օգնությունը Վրաստանին՝ նրա կառավարության գործողությունները համարելով անհամատեղելի ԵՄ-ին և ՆԱՏՕ-ին անդամակցության հետ։ Այս մասին հայտարարել է պետքարտուղար Բլինկենը, փոխանցում է ՌԻԱ Նովոստին։ Մայիսի կեսերին ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ'Բրայենը Թբիլիսիում կայացած մամուլի ասուլիսում ասել էր, որ Վաշինգտոնը կարող է անձնական պատժամիջոցներ կիրառել Վրաստանի ղեկավարության դեմ, եթե օտարերկրյա գործակալների մասին ընդունված օրենքը չհամապատասխանի միջազգային չափանիշներին։ Օ՛Բրայենը հավելել էր, որ ամերիկյան կողմը նույնպես կարող է դադարեցնել ֆինանսական օգնությունը։

18:29 - 31 հուլիսի, 2024

Վրաստանում հետաքննում են երկրի գործող իշխանությունների տապալման փորձը

Վրաստանի Պետական անվտանգության ծառայությունը չորեքշաբթի հայտարարել է, որ հետաքննում է կառավարող «Վրացական երազանք» կուսակցության ղեկավար Բիձինա Իվանիշվիլիի սպանության պլանները և կառավարությունը տապալելու դավադրությունը։Ավելի վաղ «Իմեդի» հեռուստաալիքը հայտնել էր, որ Բիձինա Իվանիշվիլիի և կուսակցության այլ բարձրաստիճան անձանց դեմ ահաբեկչություն է նախապատրաստվել, նշված գործով կասկածյալներն արդեն մի քանի օր է՝ հարցաքննվում են։ Նրանց մեծ մասը վարձկաններ են, որոնք կռվել են Ուկրաինայում։ Ըստ աղբյուրի՝ այն «կազմակերպվել և ֆինանսավորվել է» նախկին կառավարության բարձրաստիճան պաշտոնյաների և իրավապահ մարմինների նախկին աշխատակիցների կողմից, որոնք ներկայումս տեղակայված են Ուկրաինայում։ Պետական անվտանգության ծառայության հաղորդագրության համաձայն՝ «նշված հանցավոր արարքների նպատակն էր բռնությամբ տապալել կառավարությունը՝ անկարգություններ ստեղծելով և իշխանությանը թուլացնելով»։ Վերոնշյալ հաղորդագրությունը տարածվել է Թբիլիսիի քաղաքային դատարանի դատավորի կողմից ուկրաինական կոնֆլիկտում ներգրավված վրացի կամավոր Գելա Կախաբրիշվիլի հարցաքննությունից հետո։ Նրա գործը ներառում է ահաբեկչության պլանների և ապստամբության կազմակերպման վերաբերյալ տվյալներ։ Վրաստանի վարչապետ Իրակլի Կոբախիձեն էլ հայտարարել է, որ Բիձինա Իվանիշվիլիի դեմ մահափորձը նախապատրաստել են այն ուժերը, որոնք փորձել են սպանել Սլովակիայի վարչապետ Ռոբերտ Ֆիցոյին և ԱՄՆ նախագահ Դոնալդ Թրամփին։

12:32 - 24 հուլիսի, 2024

Հայաստանի և Վրաստանի առողջապահության նախարարներն ընդգծել են դեղերի գների քաղաքականությունը պարբերաբար վերանայելու անհրաժեշտությունը

Հայաստանի Հանրապետության առողջապահության նախարար Անահիտ Ավանեսյանն աշխատանքային այցով Թբիլիսիում է` գործընկերոջ, Վրաստանի օկուպացված տարածքներից տեղահանված բնակչության, առողջապահության և սոցիալական հարցերի նախարար Միխեիլ Սարջվելաձեի հրավերով: Ինչպես տեղեկանում ենք ՀՀ առողջապահության նախարարության տարածած հաղորդագրությունից, հանդիպման ընթացքում նախարարները քննարկել են առողջապահական ոլորտին առնչվող տարաբնույթ հարցեր, համընդհանուր խնդիրներ, որոնց լուծման շուրջ կարևորվել է երկու երկրների առողջապահական գերատեսչությունների առավել սերտ փոխգործակցությունը, առկա մարտահրավերներին ժամանակին անդրադառնալը: Անդրադարձ է եղել համագործակցության խորացմանը և փորձի փոխանակման հնարավորություններին, մասնագիտական խմբերի համար հարթակների ձևավորման գաղափարին: Նախարարը ներկայացրել է նաև էլեկտրոնային առողջապահության բնագավառում վերջին բարեփոխումները, շեշտադրվել է բուժանձնակազմի շարունակական կրթական բաղադրիչի կարևորությունը: Համատեղ ընդգծել են դեղերի գների և գրանցման քաղաքականությունը պարբերաբար վերանայելու անհրաժեշտությունը, կարևորվել է համատեղ ծրագրերի իրականացումը` համընդհանուր գործընկերների, մասնավորապես` Առողջապահության համաշխարհային կազմակերպության ներգրավմամբ: Առողջապահական հարցերի շուրջ քննարկումները շարունակվել են Վրաստանի խորհրդարանի ներկայացուցիչ, Վրաստանի առողջապահության պաշտպանության և սոցիալական հարցերի կոմիտեի նախագահ Զազա Լոմինաձեի հետ հանդիպման ընթացքում:

15:46 - 18 հուլիսի, 2024

Վրաստանի կառավարության գործողությունները փոխել են հարաբերություններն ԱՄՆ-ի հետ․ Միլլեր |azatutyun.am|

azatutyun.am: Միացյալ Նահանգները շարունակում է աջակցել վրաց ժողովրդի եվրաատլանտյան ձգտումներին, սակայն Վրաստանի կառավարությունն այլ ճանապարհ է ընտրել, ճեպազրույցում ասել է ԱՄՆ պետդեպարտամենտի խոսնակը։ Մեթյու Միլլերն ընդգծել է, որ հենց Վրաստանի կառավարության ընդունած օրենքներն են հեռացնում Վրաստանին իր ժողովրդավարական ուղուց։ «Վրաստանի կառավարության գործողությունները հիմնովին փոխել են նրա հարաբերությունները Միացյալ Նահանգների հետ, և ոչ միայն Միացյալ Նահանգների, այլը՝ Եվրոպայի երկրների հետ», - ասել է Միլլերը՝ նկատի ունենալով «Օտարերկրյա գործակալների» մասին վիճահարույց օրենքը, որը չնայած արևմտյան գործընկերների բազմաթիվ հորդորներին, նախազգուշացումներին, Վրաստանի խորհրդարանը մայիսի 14-ին ընդունեց։ Ի պատասխան Բրյուսելը հուլիսի 9-ին հայտարարեց, որ Վրաստանի անդամակցության գործընթացը ԵՄ-ին կասեցված է, ինչպես նաև ԵՄ-ն սառեցրել է 30 միլիոն եվրոն, որը նախատեսված էր պաշտպանության ոլորտում Վրաստանին աջակցելու համար։ Իսկ ավելի վաղ էլ Վաշինգտոնն էր հայտարարել, որ անորոշ ժամանակով հետաձգում է Վրաստանում հուլիսի 25-ից մինչև օգոստոսի 6-ը նախատեսված "NOBLE PARTNER" ամենամյա զորավարժությունները։ «ԵՄ կողմից 30 միլիոն եվրոյի օգնության կասեցումն ու վրաց-ամերիկյան «Արժանի գործընկեր 2024» զորավարժությունների չեղարկումն Արևմուտքի պատասխանն է «Վրացական երազանքի» թշնամական քայլերին», - հայտարարել է Վրաստանի նախագահ Սալոմե Զուրաբիշվիլին, ով դեմ էր օրենքի ընդունմանն ու այն վետոյի էր ենթարկել։

10:45 - 17 հուլիսի, 2024

Զուրաբիշվիլին հայց է ներկայացրել ՍԴ «օտարերկրյա գործակալների» օրենքի դեմ |azatutyun.am|

azatutyun.am: Վրաստանի նախագահ Սալոմե Զուրաբիշվիլին այսօր հայց է ներկայացրել սահմանադրական դատարան՝ վիճարկելով «Օտարերկրյա ազդեցության թափանցիկության մասին» օրենքի դրույթների սահմանադրականությունը։ Հայցի մասին հայտնել է նախագահի խորհրդարանական քարտուղար Գեորգի Մսխիլաձեն։ Սահմանադրական դատարան դիմելու մտադության մասին են հայտնել նաև ընդդիմադիր պատգամավորներ, մարդու իրավունքների պաշտպանը, ոչ կառավարական կազմակերպությունների և լրատվամիջոցների ներկայացուցիչներ։ Չնայած արևմտյան գործընկերների բազմաթիվ հորդորներին, նախազգուշացումներին, ներքին ընդվզումներին ու բազմահազարանոց ցույցերին՝ «Օտարերկրյա գործակալների մասին» վիճահարույց օրենքը Վրաստանում ընդունվեց և հունիսի 4-ին ուժի մեջ մտավ, դրսից ֆինանսավորում ստացող բոլոր կազմակերպությունները պարտավոր են գրանցվել հատուկ պորտալում։

19:05 - 15 հուլիսի, 2024

Վրաստանում պատրաստվում են դիմել ՍԴ՝ վիճարկելու «Օտարերկրյա գործակալների» օրենքի սահմանադրականությունը |azatutyun.am|

azatutyun.am: Վրաստանի նախագահը, ընդդիմադիր պատգամավորները, մարդու իրավունքների պաշտպանը, ոչ կառավարական կազմակերպություններ, լրատվամիջոցներ, պատրաստվում են դիմել Սահմանադրական դատարան՝ վիճարկելու «Օտարերկրյա ազդեցության թափանցիկության մասին» օրենքը Սահմանադրությանը համապատասխանելու հարցը։ Ըստ մամուլի հրապարակումների՝ նախագահ Սալոմե Զուրաբիշվիլին պահանջում է նախ կասեցնել օրենքի գործողությունը, ապա չեղարկել այն։ Օմբուդսմեն Լևան Իոսելիանին լրագրողների հետ զրույցում ասել է, որ ինչ-որ ձևով ներգրաված է լինելու Սահմանադրական դատարան դիմելու գործում և իրենց դիրքորոշումը հայտնի է։ «Մենք կոչ էինք անում չնդունել այդ օրենքը, մենք կոչ էինք անում այդ նպատակին հասնել մյուս օրենքներում փոփոխություններ կատարելու միջոցով, սակայն (օրենքն ընդունելու) որոշումն ընդունվեց»,- ասել է Վրաստանի մարդու իրավունքների պաշտպանը։ Չնայած արևմտյան գործընկերների բազմաթիվ հորդորներին, նախազգուշացումներին, ներքին ընդվզումներին ու բազմահազարանոց ցույցերին՝ «Օտարերկրյա գործակալների մասին» վիճահարույց օրենքը Վրաստանում ընդունվեց և հունիսի 4-ին ուժի մեջ մտավ, 3 ամսից դրսից ֆինանսավորում ստացող բոլոր կազմակերպությունները պարտավոր են գրանցվել հատուկ պորտալում։ Այս ֆոնին Բրյուսելը հայտարարեց, որ որոշել է սառեցնել ԵՄ-ին Վրաստանի անդամակցության գործընթացը, նաև կասեցնել Վրաստանի պաշտպանության նախարարության համար նախատեսված 30 միլիոն եվրոյի հատկացումը։ Մինչ այդ էլ ԱՄՆ-ն չեղարկել էր վրաց-ամերիկյան ամենամյա զորավարժությունները՝ հայտարարելով, թե որոշումը պայմանավորված է «Միացյալ Նահանգների և արևմտյան այլ կառույցների հասցեին կեղծ մեղադրանքներով»։

17:10 - 15 հուլիսի, 2024

Վրաստանի վարչապետի համոզմամբ՝ ԱՄՆ-ի հետ հարաբերությունները կբարելավվեն 2025 թվականի սկզբից |armenpress.am|

17:56 - 13 հուլիսի, 2024

Վերջին տարիներին Հայաստանը երրորդ տեղն է զբաղեցնում Վրաստան այցելողների ցուցակում |tert.am|

tert.am: Հայաստանը 2024 թվականի առաջին կիսամյակում Վրաստան այցելությունների թվով զբաղեցրել է երրորդ տեղը։ Այս մասին նշված է Վրաստանի զբոսաշրջության ազգային վարչության վիճակագրության զեկույցում։ 2024 թվականի հունվար-հունիս ժամանակահատվածում Հայաստանից Վրաստան է այցելել 387,691 մարդ, ինչը 2,4 տոկոսով քիչ է 2023 թվականի նույն ժամանակահատվածի ցուցանիշից։ Առաջին և երկրորդ տեղերը զբաղեցնում են Թուրքիայից և Ռուսաստանից ժամանած այցելուները։ Հնգյակում են նաև Իսրայելն ու Ադրբեջանը։ Նշվում է, որ օտարերկրացիները Վրաստան կատարել են ավելի քան 3 մլն այցելություն 2024թ. առաջին կիսամյակում, ինչը 5,6 տոկոսով ավելին է անցած տարվա նույն ցուցանիշներից։

17:36 - 13 հուլիսի, 2024

Նիկոլ Փաշինյանն ընդունել է Վրաստանի պաշտպանության նախարար Իրակլի Չիկովանիին

Վարչապետ Նիկոլ Փաշինյանն ընդունել է Վրաստանի պաշտպանության նախարար Իրակլի Չիկովանիին։ Այս մասին հայտնում են ՀՀ կառավարության մամուլի ծառայությունից. «Վարչապետը նշել է, որ Հայաստանի և Վրաստանի հարաբերությունները գտնվում են բարձր մակարդակի վրա եւ կարեւորել պարոն Չիկովանիի այցը: Նիկոլ Փաշինյանը ընդգծել է, որ Հայաստանը շահագրգռված է Վրաստանի հետ բազմաոլորտ համագործակցության խորացմամբ և զարգացմամբ: Վարչապետը արդյունավետ է գնահատել երկու երկրների պաշտպանական գերատեսչությունների միջև ծավալված գործընկերությունը: Իրակլի Չիկովանին իր խոսքում կարևորել է Հայաստանի պաշտպանության նախարարության հետ գործակցությունը և դրա ընդլայնմանը միտված ծրագրերը: Զրուցակիցները մտքեր են փոխանակել պաշտպանական ոլորտում գործընկերության ամրապնդման, ինչպես նաեւ տարածաշրջանային անվտանգությանն ու կայունությանը վերաբերող հարցերի շուրջ», - նշված է հայտարարությունում։

13:22 - 13 հուլիսի, 2024

Վրաստանի պաշտպանության նախարարն այցելել է Հայոց ցեղասպանության զոհերի հուշահամալիր

Վրաստանի պաշտպանության նախարար Իրակլի Չիկովանին այցելել է Հայոց ցեղասպանության զոհերի հուշահամալիր, հարգանքի տուրք մատուցել զոհերի հիշատակին: Այդ մասին հայտնում են ՀՀ ՊՆ-ից: Նախարարը ծաղկեպսակ է դրել հուշակոթողին և ծաղիկներ խոնարհել Հայոց ցեղասպանության զոհերի հիշատակը հավերժացնող անմար կրակի մոտ։

16:50 - 12 հուլիսի, 2024

Պապիկյանն ու Չիկովանին ստորագրել են ՀՀ և Վրաստանի ՊՆ-ների միջև 2024-ի համագործակցության պլանը

ՊՆ վարչական համալիրում դիմավորման հանդիսավոր արարողությունից հետո տեղի է ունեցել ՀՀ պաշտպանության նախարար Սուրեն Պապիկյանի և Վրաստանի պաշտպանության նախարար Իրակլի Չիկովանիի առանձնազրույցը, որին հաջորդել է պատվիրակությունների ընդլայնված կազմով հանդիպումը: Այս մասին հայտնում են ՀՀ ՊՆ-ից։ Հանդիպման ընթացքում բարձր է գնահատվել համագործակցության ներկայիս մակարդակը։ Քննարկվել են պաշտպանության բնագավառում Հայաստան-Վրաստան համագործակցությանը և տարածաշրջանային անվտանգությանն առնչվող հարցեր: Կողմերը միմյանց ներկայացրել են նաև երկու երկրների զինված ուժերում ընթացող բարեփոխումների վերաբերյալ մանրամասներ: Հանդիպման ավարտին պաշտպանության նախարարները ստորագրել են ՀՀ պաշտպանության նախարարության և Վրաստանի պաշտպանության նախարարության միջև 2024 թվականի համագործակցության պլանը։

15:05 - 12 հուլիսի, 2024

ՊՆ վարչական համալիրում տեղի է ունեցել Վրաստանի պաշտպանության նախարարի դիմավորման հանդիսավոր արարողությունը

Հուլիսի 12-ին ՀՀ պաշտպանության նախարար Սուրեն Պապիկյանը ՊՆ վարչական համալիրում ընդունել է պաշտոնական այցով Հայաստան ժամանած Վրաստանի պաշտպանության նախարար Իրակլի Չիկովանիին: Այս մասին տեղեկացնում են ՀՀ ՊՆ-ից: ՊՆ վարչական համալիրում տեղի է ունեցել Վրաստանի պաշտպանության նախարար Իրակլի Չիկովանիի դիմավորման հանդիսավոր արարողությունը՝ պատվո պահակախմբի և զինվորական նվագախմբի մասնակցությամբ։ Հնչել են Հայաստանի Հանրապետության և Վրաստանի պետական օրհներգերը:

14:40 - 12 հուլիսի, 2024