Ազգային ժողով

ՀՀ Սահմանադրության համաձայն Ազգային ժողովը ժողովրդի ներկայացուցչական մարմինն է: Այն իրականացնում է օրենսդիր իշխանությունը: Ազգային ժողովը վերահսկողություն է իրականացնում գործադիր իշխանության նկատմամբ, ընդունում է պետական բյուջեն եւ իրականացնում է Սահմանադրությամբ սահմանված այլ գործառույթներ: Ազգային ժողովի լիազորությունները սահմանվում են Սահմանադրությամբ եւ այն գործում է իր կանոնակարգին համապատասխան: Խորհրդարանն ընտրվում է 5 տարի ժամկետով, կազմված է առնվազն 101 անդամից։

Այժմ գործում է 8-րդ գումարման ազգային ժողովը, որը բաղկացած է 106 պատգամավորից, որոնցից 71-ը՝ «Քաղաքացիական պայմանագիր» խմբակցությունից, 28-ը՝ «Հայաստան» խմբակցությունից, 7-ը՝ «Պատիվ ունեմ» խմբակցությունից։ ԱԺ գործող նախագահը Ալեն Սիմոնյանն է։

Հայաստանի և Ադրբեջանի խորհրդարանների ղեկավարները կրկին հանդիպեն հոկտեմբերին
 |civilnet.am|

Հայաստանի և Ադրբեջանի խորհրդարանների ղեկավարները կրկին հանդիպեն հոկտեմբերին |civilnet.am|

civilnet.am: Ազգային ժողովի նախագահ Ալեն Սիմոնյանը հոկտեմբերին Ժնևում կհանդիպի Ադրբեջանի Միլի մեջլիսի նախագահ Սահիբա Գաֆարովայի հետ։ Տեղեկությունը ՍիվիլՆեթին հայտնեց ԱԺ նախագահի օգնական Մովսես Հարությունյանը։ Սիմոնյանի և Գաֆարովայի հանդիպումը, ինչպես նախորդ անգամ, կայանալու է Միջխորհրդարանական միության (IPU) համաժողովի շրջանակում․ «Հենց վերջին հանդիպմանն էլ նախնական պայմանավորվածություն էր ձեռք բերվել հոկտեմբերին Ժնևում հանդիպելու մասին»,- ասաց Հարությունյանը։ Հայաստանի և Ադրբեջանի խորհրդարանների ղեկավարների միջև վերջին ամիսներին երկու հանդիպում է կայացել։ Մարտի 22-ի հանդիպմանը քննարկվել է Հայաստանի և Ադրբեջանի միջև ընթացող խաղաղ բանակցությունների գործընթացին երկու երկրների խորհրդարանների հնարավոր աջակցությունը․ «Կողմերը պայմանավորվել են դիտարկել միջխորհրդարանական մակարդակով երկխոսության հնարավորությունը»։ Ըստ հայկական կողմի հաղորդագրության՝ հանդիպումն անցել է կառուցողական մթնոլորտում։ Երկրորդ հանդիպումը տեղի է ունեցել մայիսի 16-ին՝ Միջխորհրդարանական միության (IPU) խորհրդարանների նախագահների վեցերորդ համաշխարհային համաժողովի նախապատրաստական հանձնաժողովի առաջին նիստի շրջանակում։  
15:39 - 08 հուլիսի, 2024
ԱՄՆ կոնգրեսականները աներկբա իրենց աջակցությունը հայտնեցին ՀՀ ժողովրդավարական զարգացմանը, անկախությանը և տարածքային ամբողջականությանը. Խանդանյան

ԱՄՆ կոնգրեսականները աներկբա իրենց աջակցությունը հայտնեցին ՀՀ ժողովրդավարական զարգացմանը, անկախությանը և տարածքային ամբողջականությանը. Խանդանյան

Ամերիկայի Միացյալ Նահանգների Կոնգրեսի պատվիրակության այցը Հայաստան աննախադեպ էր այն առումով, որ պատվիրակությունը երկկուսակցական էր՝ ընդգրկելով հանրապետական և դեմոկրատ կոնգրեսականների, ինչպես նաև այն ներառում էր թե՛ Սենատի և թե՛ Ներկայացուցիչների պալատի անդամների։ Այս պատվիրակությունում ներկայացված էին այնպիսի կարևորագույն քաղաքական ինստիտուտների անդամներ, ինչպիսիք են ԱՄՆ Հելսինկյան կոմիտեն (ԵԱՀԿ ԽՎ-ում ԱՄՆ պատվիրակություն), Սենատի Արտաքին հարաբերությունների և Զինված ծառայությունների հանձնաժողովները։ Այս մասին գրել է ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը։ «Կոնգրեսականները աներկբա իրենց աջակցությունը հայտնեցին Հայաստանի ժողովրդավարական զարգացմանը, անկախությանը և տարածքային ամբողջականությանը։ Նրանք խոստացան շարունակական ջանքեր գործադրել՝ նպաստելու Ադրբեջանի հետ խաղաղության և Թուրքիայի հետ հարաբերությունների կարգավորման գործընթացներում առաջընթաց արձանագրելու համար։   Քննարկումների առանցքում էր նաև Հայաստան-ԱՄՆ հարաբերությունները, որոնք գնալով դառնում են ավելի ընդլայնված ու համապարփակ, և ակնհայտ է, որ հարաբերությունների՝ ռազմավարական երկխոսությունից ռազմավարական գործընկերության անցումը արդարացված է և ժամանակին։   Ուրախ եմ, որ ԵԱՀԿ Խորհրդարանական վեհաժողովի շրջանակներում սկսված այս կարևոր համագործակցությունը շարունակվում է նման կարևոր այցի ձևաչափով»,- գրել է Խանդանյանը։
20:16 - 05 հուլիսի, 2024
Հելսինկյան հանձնաժողովի նախագահն Ադրբեջանին հորդորում է ՀՀ–ի հետ խաղաղության գործընթացը հնարավորինս արագ ամփոփել |armenpress.am|

Հելսինկյան հանձնաժողովի նախագահն Ադրբեջանին հորդորում է ՀՀ–ի հետ խաղաղության գործընթացը հնարավորինս արագ ամփոփել |armenpress.am|

armenpress.am: Հելսինկյան հանձնաժողովի նախագահ, ԱՄՆ Ներկայացուցիչների պալատի անդամ Ջո Ուիլսոնը  հորդորում է Ադրբեջանին Հայաստանի հետ խաղաղության գործընթացը հնարավորինս արագ ամփոփել, իսկ Թուրքիային՝ Հայաստանի հետ հարաբերությունների կարգավորման ուղղությամբ քայլեր ձեռնարկել:  Ջո Ուիլսոնն այս մասին ասաց ԱՄՆ սենատոր Ռոջեր Ուիքերի գլխավորած կոնգրեսական պատվիրակության կազմում Հայաստան այցի շրջանակում հրավիրված ասուլիսում:  Նա նկատեց՝ Թուրքիան ՆԱՏՕ–ի անդամ է, Ադրբեջանն օգտվում է իր նավթային և գազային ռեսուրսներից: ԱՄՆ պատվիրակությունը Հայաստանում է, որովհետև գիտակցում է այն առաջընթացը, որ Հայաստանն ունեցել է որպես ժողովրդավարական պետություն: Հայաստանը Միացյալ Նահանգների համար կարևոր գործընկեր է: «Ես հորդորում եմ Ադրբեջանի մեր գործընկերներին խաղաղության գործընթացը հնարավորինս արագ ամփոփել: Դա շահեկան կլինի բոլորի համար: Եվ մենք ուզում ենք նաև հորդորել, որ Թուրքիան ևս հարաբերությունների կարգավորման ուղղությամբ քայլեր ձեռնարկի»,–ասաց Ուիլսոնը: Նա հավելեց, որ պատրաստ են աջակցել Հայաստանին՝ տնտեսական, մարդասիրական աջակցության հարցերով, օգնել, որ ձևավորվի ամուր, ժողովրդավարական և բարեկեցիկ հասարակություն կայուն, ապահով տարածաշրջանում:
14:25 - 05 հուլիսի, 2024
ԱՄՆ-ը ցանկանում է առաջ մղել խաղաղության գործընթացը Հայաստանի և Ադրբեջանի միջև. սենատոր Կարդեն |1lurer.am|

ԱՄՆ-ը ցանկանում է առաջ մղել խաղաղության գործընթացը Հայաստանի և Ադրբեջանի միջև. սենատոր Կարդեն |1lurer.am|

1lurer.am: ԱՄՆ-ը հետաքրքրված է և ցանկանում է առաջ մղել խաղաղության գործընթացը Հայաստանի և Ադրբեջանի միջև։ Այս մասին ասուլիսի ժամանակ ասել է Մերիլենդից սենատոր Բին Կարդենը։ «Մենք շատ գործիքներ ունենք, որոնք կարողանում ենք օգտագործել աշխարհի տարբեր երկրների հետ մեր հարաբերություններում։ Մենք տարբեր երկրների հետ տարբեր հարաբերություններ ունենք. ռազմավարական համագործակցություն, անվտանգային պայմանավորվածություններ։ Չեմ ուզում նախանշել, թե ինչպես կարող ենք այդ խառը գործիքակազմը օգտագործել, բայց ԱՄՆ-ը հետաքրքրված է և ցանկանում է առաջ մղել խաղաղության գործընթացը Հայաստանի և Ադրբեջանի միջև։  Մենք աշխատում ենք գործադիր և օրենսդիր ճյուղերի հետ, որպեսզի կարողանանք մեր ձայները լսելի դարձնել»,- ասել է սենատորը։
14:12 - 05 հուլիսի, 2024
Զգուշացեք, թե ինչի կարող է բերել միավորումը Պուտինի Ռուսաստանի հետ. Ուիքերը՝ Ադրբեջանի իրենց գործընկերներին |1lurer.am|

Զգուշացեք, թե ինչի կարող է բերել միավորումը Պուտինի Ռուսաստանի հետ. Ուիքերը՝ Ադրբեջանի իրենց գործընկերներին |1lurer.am|

1lurer.am: Հանրապետական կուսակցության անդամ եմ, և, որ ավելի կարևոր է, ես երկկուսակցական պատվիրակության անդամ եմ, և Կոնգրեսի երկու պալատների ներկայացուցիչներն են պատվիրակության կազմում՝ Ներկայացուցիչների պալատի և Սենատի անդամներ։ Մենք մեր պատվիրակության կազմում ունենք 4 ներկայացուցիչ Ներկայացուցիչների պալատից և 3 սենատոր։ Այդ մասին Երևանում ասուլիսի ժամանակ ասաց սենատոր Ռոջեր Ուիքերը։ «Մենք մասնակցում էինք ԵԱՀԿ ԽՎ-ին Ռումինիայում, և առաջին տեղը, որ մենք ընտրեցինք այդ համաժողովից հետո այցելելու համար, Հայաստանն էր՝ այս գեղեցիկ երկիրը, իմանալու, տեսնելու այն, ինչ մենք կարող ենք միայն տեղում տեսնել, լսել՝ խոսելով Հայաստանի մարդկանց, ղեկավարների հետ, այն ձայների հետ, որոնք ներկայացնում են բազմազան կարծիքներ այս երկրում։ Մեր պատվիրակության անունից կարող եմ ասել, որ ես չեմ մտաբերում որևէ այլ այցելություն, որտեղ այսքան ջերմ և քաղաքավարի ընդունելության արժանանայինք։ Մենք իսկապես հիացած ենք այն ընդունելությամբ, որին արժանացանք Հայաստանում։ Մենք կարծում էինք, որ իրավիճակի մասին, հարևանության վերաբերյալ բավական շատ բան գիտեինք, բայց այցը մեզ թույլ տվեց շատ ավելին իմանալ։ Այն, ինչ մենք իմացանք, մեկ անգամ ևս հաստատեց, որ դժվարին հարևանության մեջ է գտնվում Հայաստանը. մարտահրավերներ կան բոլոր ուղղություններով»,- նշեց սենատորը։ «Երեկ նշվեց ԱՄՆ Անկախության օրը. դա ամերիկյան Անկախության հռչակագրի ընդունման օրն է: Այսօր Հայաստանը  նշում է Սահմանադրության օրը, և նշանակալի օր է, և մենք այսօր այստեղ ենք, և բոլոր քաղաքացիներին ես շնորհավորում եմ տոնի կապակցությամբ»,- ասաց նա։ Ուիքերի խոսքով՝ որոշ ուժեր աշխարհում, նաև այս տարածաշրջանում փորձում են այնպես անել, որ ի չիք դարձնեն ժողովրդավարությունը, ազատությունները: «Հայաստանն այս հարցում մեծ վճռականություն և հաստատակամություն է հանդես բերում դա թույլ չտալու համար։ Հիմա առավել քան երբևէ հստակ է, որ այստեղ Կառավարությունը և Հայաստանի ժողոովուրդը ցանկանում են Խաղաղության համաձայանագիր տեսնել Հայաստանի և Ադրբեջանի  միջև, ուզում են այն ամբողջականացվի և ստորագրվի, և սահմանազատումն ու սահմանագծումն ավարտվեն, որ ռազմագերիները՝ վերջին պատերազմի, ազատ արձակվեն: Նաև նշվեց, որ այս երկրի ղեկավարների շրջանում ցանկություն կա, որ վերաբացվեն սահմանները, որպեսզի լինի մարդկանց ազատ տեղաշարժ հարևան Թուրքիայից, և խթանվի տնտեսությունը Հայաստանում. մենք ձեր կողքին ենք այս հարցում»,- նշեց նա։  Նա նաև խոսք ուղղեց Ադրբեջանի իրենց գործընկերներին և ԵԱՀԿ մյուս անդամներին: «Զգուշացեք, թե ինչի կարող է բերել միավորումը Պուտինի Ռուսաստանի հետ։ Մեր բարեկամներին Ադրբեջանում ես ուզում եմ խորհուրդ տալ, որ փորձեն հասկանալ ազատության գինը, արժեքը: Եվ քանիցս դա տեսել ենք, և այդ զգուշացումը ուզում եմ փոխանցել բոլոր նրանց, ովքեր Ադրբեջանում են. զգուշացեք, որ ռուսական մեծ արջը մեկ անգամ ևս չփորձի գերակայել, գերիշխող դիրք զբաղեցնել նախկին Խորհրդային Միության հանրապետության նկատմամբ»,- ասաց Ռոջեր Ուիքերը։
13:27 - 05 հուլիսի, 2024
Ալեն Սիմոնյանը ԱՄՆ կոնգրեսականներին է ներկայացրել հայ-ադրբեջանական հարաբերություններում տիրող իրավիճակը |armenpress.am|

Ալեն Սիմոնյանը ԱՄՆ կոնգրեսականներին է ներկայացրել հայ-ադրբեջանական հարաբերություններում տիրող իրավիճակը |armenpress.am|

armenpress.am: Ազգային ժողովի նախագահ Ալեն Սիմոնյանը Երևանում ԱՄՆ սենատոր Ռոջեր Ուիքերի գլխավորած կոնգրեսական պատվիրակությանն է ներկայացրել հայ-ադրբեջանական հարաբերություններում տիրող իրավիճակը, նաև հայ-թուրքական հարաբերությունները:  Սիմոնյանն այս մասին ասաց ամերիկյան պատվիրակության հետ հանդիպումից հետո ԱԺ-ում կազմակերպված համատեղ ասուլիսում:  Նա հանդիպումը շատ արդյունավետ որակեց: Կողմերը քննարկել են հայ-ամերիկյան համագործակցության տարբեր ոլորտներ:  «Ես ներկայացրեցի տարածաշրջանում տիրող իրավիճակը, հայ-ադրբեջանական հարաբերություններում տիրող իրավիճակը և ԱՄՆ-ի աջակցությունն այդ հարաբերություններում և ներգրավվածությունը»,- ասաց Սիմոնյանը: ԱԺ նախագահը խոսել է նաև Ադրբեջանում ապօրինաբար պահվող հայ ռազմագերիների վերաբերյալ:  Հանդիպմանն անդրադարձ է կատարվել նաև Հայաստան-Թուրքիա հարաբերություններին:  «Հայ-ամերիկյան հարաբերությունները գտնվում են շատ բարձր մակարդակի վրա: Փոխադարձ այցերը, որոնք անընդհատ տեղի են ունենում, շատ կարևոր բաղադրիչ մաս են այս հարաբերությունների համար»,- ասաց ԱԺ նախագահը՝  կարևորելով այդ շրջանակում ԱՄՆ պատվիրակության այցը:
12:27 - 05 հուլիսի, 2024
Ազգային ժողոը որևէ ջանք չի խնայելու ձեր կյանքն առավել բարեկեցիկ, արժանապատիվ ու հարմարավետ դարձնելու համար. Ալեն Սիմոնյանի ուղերձը

Ազգային ժողոը որևէ ջանք չի խնայելու ձեր կյանքն առավել բարեկեցիկ, արժանապատիվ ու հարմարավետ դարձնելու համար. Ալեն Սիմոնյանի ուղերձը

ԱԺ նախագահ Ալեն Սիմոնյանը շնորհավորական ուղերձ է հղել Սահմանադրության օրվա առթիվ: «Սիրելի՛ հայրենակիցներ, Հայաստանի Հանրապետության օրինապաշտ քաղաքացիներ, Հուլիսի 5-ին մենք նշում ենք մեր մայր օրենքի՝ Սահմանադրության օրը: 29 տարի առաջ այս օրը մեզանից շատերը, մեր մայրերն ու քույրերը, հայրերն ու եղբայրները համաժողովրդական հանրաքվեով ընդունեցին Հայաստանի Հանրապետության Սահմանադրությունը՝ ամրագրելով ՀՀ բնույթը՝ որպես ինքնիշխան, ժողովրդավարական, իրավական եւ սոցիալական պետություն ու հռչակելով մարդու եւ քաղաքացու հիմնական իրավունքներն ու ազատությունները: Սահմանադրության 2-րդ հոդվածն ամրագրում է, որ Հայաստանի Հանրապետությունում իշխանությունը պատկանում է ժողովրդին: Չնայած որոշ կենտրոնների ու խմբերի կողմից պարբերաբար փորձ է կատարվում ժողովրդից խլել իր այս սահմանադրական անքակտելի իրավունքը, սակայն վերջին իրադարձությունները կրկին ի ցույց դրեցին մեր ժողովրդի խոհեմությունը՝ ապացուցելով, որ ՀՀ-ում իշխանությունը պատկանում է ժողովրդին: Սիրելի՛ հայրենակիցներ, որպես ՀՀ Ազգային ժողովի նախագահ եւ որպես ժողովրդավարական հստակ ուղեգիծ որդեգրած քաղաքական թիմի ներկայացուցիչ համամիտ եմ ձեզ հուզող մի շարք մտահոգությունների հետ, որ չնայած Սահմանադրությամբ ամրագրված դրույթներին՝ դեռեւս տարբեր ոլորտներում առկա են որոշ օրենսդրական բացեր, որոնք հաճախ անհարմարություն, երբեմն էլ՝ օրենքի առաջ պաշտպանված չլինելու զգացում են պատճառում շատերիդ: Շնորհավորելով Սահմանադրության օրը՝ ուզում եմ կրկին շեշտել ժողովրդավարական ուղով առաջ շարժվելու մեր հաստատակամությունն ու վստահեցնել, որ Ազգային ժողովն իր օրինաստեղծ գործունեության ճանապարհին որեւէ ջանք չի խնայելու ձեր կյանքն առավել բարեկեցիկ, արժանապատիվ ու հարմարավետ դարձնելու համար»,- ասվում է ուղերձում:
10:17 - 05 հուլիսի, 2024
Հուլիսի 11-ին ԱԺ-ն Ազգային ժողովը արտահերթ նստաշրջան կգումարի

Հուլիսի 11-ին ԱԺ-ն Ազգային ժողովը արտահերթ նստաշրջան կգումարի

Կառավարության որոշմամբ՝ հուլիսի 11-ին Ազգային ժողովը արտահերթ նստաշրջան կգումարի: Նստաշրջանի օրակարգում ներառված հարցերի մի մասը համարվել է հրատապ, իսկ մյուս մասը 2-րդ ընթերցմամբ քննարկման համար նախատեսված նախագծեր են: Համաձայն որոշման հիմնավորման՝ Ազգային ժողովի հերթական նստաշրջանը ավարտվել է հունիսի 20-ին, իսկ հաջորդ նստաշրջանը մեկնարկելու է սեպտեմբեր ամսվանից: Հերթական նստաշրջանի ավարտից՝ հունիսի 20-ից հետո Ազգային ժողով ներկայացված օրենսդրական նախաձեռնությունները, ընթացակարգի համաձայն, կարող են Ազգային ժողովում քննարկվել սեպտեմբերից գումարվող հերթական նիստերի ընթացքում: Արտահերթ նստաշրջան նախաձեռնելու անհրաժեշտությունը պայմանավորված է այն հանգամանքով, որ այս պահին առկա են օրենսդրական նախաձեռնություններ, որոնց քննարկումը նպատակահարմար է կազմակերպել մինչև սեպտեմբեր ամսվա հերթական նիստերի մեկնարկը: Առաջարկվում է հուլիսի 11-ին գումարվող Հայաստանի Հանրապետության Ազգային ժողովի արտահերթ նստաշրջանի օրակարգային հարցերի երկու ընթերցում նախատեսող օրենսդրական նախաձեռնությունների երկրորդ ընթերցմամբ քննարկումը կազմակերպել առաջին ընթերցմամբ դրանց ընդունումից հետո՝ 24 ժամվա ընթացքում, իսկ նախագծերի վերաբերյալ գրավոր առաջարկները և գլխադասային հանձնաժողովի եզրակացությունը ներկայացնելու համար սահմանել երեքական ժամ:
11:44 - 04 հուլիսի, 2024
Պատերազմը ժողովրդավարության ամենամեծ թշնամին է, բայց այդ մարտահրավերը չի խանգարել կառավարությանը. Ջուլհակյանը՝ ԵԽԽՎ-ում

Պատերազմը ժողովրդավարության ամենամեծ թշնամին է, բայց այդ մարտահրավերը չի խանգարել կառավարությանը. Ջուլհակյանը՝ ԵԽԽՎ-ում

ՀՀ ԱԺ պատվիրակությունը մասնակցում է Ստրասբուրգում ընթացող ԵԽԽՎ նստաշրջանի աշխատանքներին: Այս մասին հայտնում են ՀՀ ԱԺ մամուլի ծառայությունից։  Իր ելույթում ՀՀ ԱԺ պատվիրակության անդամ Արուսյակ Ջուլհակյանն ասել է. «Հարգարժա'ն գործընկերներ, Մեծ պատիվ է այսօր պատմել ձեզ 2018 թվականի հեղափոխությունից ի վեր Հայաստանում իրականացված նշանակալի ժողովրդավարական բարեփոխումների մասին: Թավշյա հեղափոխությունը բեկումնային պահ էր մեր ժողովրդի պատմության մեջ` սկիզբ դնելով հույսի, փոփոխությունների եւ ժողովրդավարության վերականգնման դարաշրջանին: Թավշյա հեղափոխությունը մի պահ էր, երբ Հայաստանի ժողովուրդը համախմբվեց` պահանջելով վերջ տալ կոռուպցիային եւ ավտորիտարիզմին: Այս հեղափոխությունը միայն առաջնորդներ փոխելու մասին չէր. այն Հայաստանի քաղաքական լանդշաֆտը հիմնովին վերափոխելու մասին էր: Հեղափոխությունից ի վեր Հայաստանը բռնել է համապարփակ ժողովրդավարական բարեփոխումների ուղին, որն ուղղված է ժողովրդավարական ինստիտուտների ամրապնդմանը, թափանցիկության բարձրացմանը եւ օրենքի գերակայության խթանմանը: Հետհեղափոխական ամենակարեւոր ձեռքբերումներից մեկն ընտրական համակարգի հիմնանորոգումն է: Հայաստանի կառավարության կողմից ջանքեր են գործադրվել ապահովելու, որ ընտրություններն անցնեն ազատ, արդար եւ թափանցիկ: Ընտրական օրենսգիրքը, ինչպես նաեւ «Կուսակցությունների մասին» օրենքն էական փոփոխությունների են ենթարկվել: Վենետիկի հանձնաժողովի բազմաթիվ, ինչպես նաեւ ԵԱՀԿ/ԺՀՄԻԳ-ի առաջարկություններին համապատասխան: Դատական իշխանության անկախության ամրապնդումը եղել է Հայաստանի ժողովրդավարական բարեփոխումների հիմնաքարը: Քայլեր, ինչպիսիք են դատավորների, դատախազների, քննիչների թեկնածուների բարեվարքության ստուգումը, ձեռնարկվել են` երաշխավորելու, որ այդ պաշտոններում ընտրության գործընթացն արժանիքահենք է եւ զերծ քաղաքական ազդեցությունից: Հատուկ ուշադրություն է դարձվել կոռուպցիայի դեմ պայքարին: Ոստիկանության ոլորտում իրականացված հավակնոտ բարեփոխումները, հակակոռուպցիոն մարմինների ստեղծումը եւ կոռուպցիոն դրսեւորումների դեմ խիստ միջոցառումների նախաձեռնումը նպաստել են կոռուպցիայի կանխարգելմանը եւ հակազդմանը` ստեղծելով ավելի թափանցիկ եւ հաշվետու դատական ու իրավապահ մարմիններ: Զգալի առաջընթաց է գրանցվել լրատվամիջոցների ազատության ապահովման ուղղությամբ: Աշխատանքներ են տարվել անկախ լրագրությունը խթանելու ուղղությամբ: Արդյունքում Հայաստանը 180 երկրների շարքում 43-րդն է ԶԼՄ-ների ազատության ինդեքսում 2024 թվականի դրությամբ` ամեն տարի անընդմեջ բարելավելով իր վարկանիշը: Հարգելի' գործընկերներ, պատերազմը ժողովրդավարության ամենամեծ թշնամին է: Այդուհանդերձ, այս մարտահրավերը չի խանգարել Հայաստանի կառավարությանը շարունակել ժողովրդավարական բարեփոխումներն անվտանգության հետ կապված խնդիրներին զուգահեռ: Լեռնային Ղարաբաղում 44-օրյա պատերազմից հետո Հայաստանի ինքնիշխան տարածքի վրա հետագա հարձակումներից հետո հայ հասարակության շրջանում քննարկվում էր, որ ժողովրդավարությունն ու անվտանգությունը բացառում են միմյանց, եւ հնարավոր չէ լինել ուժեղ երկիր` լինելով ժողովրդավար: Չնայած անվտանգության հետ կապված բոլոր դժվարություններին` հայ ժողովրդի պատասխանն այս բանավեճին հստակ էր: Ժողովրդավարությունն ու անվտանգությունը չեն հակասում, ավելի շուտ լրացնում են միմյանց: Ժողովրդավարությունը Հայաստանի ժողովրդի գիտակցված ընտրությունն է, եւ այն ամուր կանգնած է Հայաստանի ժողովրդավարության պաշտպանության խրամատում: Հարգելի' գործընկերներ, չնայած զգալի առաջընթաց է գրանցվել, սակայն ժողովրդավարական բարեփոխումների ճանապարհը շարունակվում է: Հիմքերը դրված են, բայց մեզնից է կախված, թե ինչ կկառուցենք այդ հիմքերի վրա: Այս բարեփոխումների հաջողությունը կախված է Հայաստանի կառավարության քաղաքական կամքից: Մենք պետք է հավատարիմ մնանք ժողովրդավարության սկզբունքներին` ապահովելով, որ մեր ինստիտուտները լինեն դիմակայուն եւ արձագանքող բոլոր քաղաքացիների կարիքներին: Գործընկերնե'ր, 2018 թվականի հեղափոխությունից ի վեր Հայաստանում իրականացված ժողովրդավարական բարեփոխումները մեր ժողովրդին կանգնեցրել են ավելի լուսավոր, ավելի ժողովրդավարական ապագայի ուղու վրա: Եվ Հայաստանի կառավարությունն ամեն ինչ կանի մեր ժողովրդավարական արժեքները պաշտպանելու եւ այնպիսի հասարակություն կառուցելու համար, որտեղ գերակայում են ազատությունը, արդարությունը եւ հավասարությունը: Շնորհակալություն»:
11:56 - 27 հունիսի, 2024
ՀՀ առաջնահերթություններից է ԵՄ-ի հետ վիզաների ազատականացման երկխոսության մեկնարկը. Ալեն Սիմոնյանը՝ Լատվիայի ԱԳ նախարարին

ՀՀ առաջնահերթություններից է ԵՄ-ի հետ վիզաների ազատականացման երկխոսության մեկնարկը. Ալեն Սիմոնյանը՝ Լատվիայի ԱԳ նախարարին

Լատվիայի Հանրապետություն կատարած պաշտոնական այցի շրջանակում Ալեն Սիմոնյանը հանդիպել է Լատվիայի ԱԳ նախարար Բայբա Բրաժեի  հետ: Այս մասին հայտնում են ՀՀ ԱԺ-ից։  Ալեն Սիմոնյանն ընդգծել է, որ ՀՀ առաջնահերթություններից է ԵՄ-ի հետ վիզաների ազատականացման երկխոսության մեկնարկը՝ հայտնելով, որ այդ հարցում Հայաստանն ակնկալում է նաեւ Լատվիայի Հանրապետության օգնությունը: Խոսելով Հայաստանի կառավարության նախաձեռնած «Խաղաղության խաչմերուկ» նախագծի մասին՝ ԱԺ նախագահը նշել է, որ այդ ծրագիրը նախատեսում է տարածաշրջանային հաղորդակցությունների զարգացում՝ հիմնված ինքնիշխանության, փոխադարձության եւ իրավահավասարության սկզբունքների վրա: Անդրադառնալով Հայաստան-Ադրբեջան խաղաղության պայմանագրին՝ Ալեն Սիմոնյանը վերահաստատել է ՀՀ-ի հավատարմությունն Ալմա-Աթայի հռչակագրի հիման վրա փոխադարձ տարածքային ամբողջականության ճանաչման սկզբունքին: Բարձր գնահատելով Հայաստանում տեղակայված ԵՄ դիտորդական առաքելության դերը՝ Ալեն Սիմոնյանը նաեւ իր երախտագիտությունն է հայտնել Լատվիայի կառավարությանը՝ Լեռնային Ղարաբաղի հայ փախստականներին աջակցելու նպատակով տրամադրված մարդասիրական օգնության համար: Քննարկվել են նաեւ Ադրբեջանում պահվող հայ գերիների հայրենադարձությանը վերաբերող հարցեր։
11:33 - 27 հունիսի, 2024
Նախատեսվում է ձեւավորել ուսանողական ջոկատներ, որոնք դիրքերում կմասնակցեն որոշակի ինժեներական աշխատանքների

Նախատեսվում է ձեւավորել ուսանողական ջոկատներ, որոնք դիրքերում կմասնակցեն որոշակի ինժեներական աշխատանքների

Ազգային ժողովի պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանն առաջարկում է ձեւավորել ուսանողական կամավոր ջոկատներ, որոնք դիրքերում կմասնակցեն որոշակի ինժեներական աշխատանքների: Պատգամավորի խոսքով նախաձեռնության գաղափարն առաջացել է հանձնաժողովի եւ պաշտպանական գերատեսչության ղեկավարության հետ առաջնագծի ինժեներական կառույցներ այցերի ընթացքում: Այս մասին հայտնում են ՀՀ ԱԺ-ից։  Հանձնաժողովի նախագահը տեղեկացրել է, որ առաջարկը քննարկել է թե' իր ղեկավարած հանձնաժողովի անդամների եւ թե' Պաշտպանության ու ԿԳՄՍ նախարարների հետ' ստանալով վերջիններիս հավանությունը: Անդրանիկ Քոչարյանի խոսքով այն ուսանողները, որոնք մասնակցություն կունենան ծրագրին, կխրախուսվեն պետության կողմից: Նախաձեռնությունը հունիսի 26-ին քննարկվել է ԱԺ պատգամավորների, Պաշտպանության նախարարության, Զինված ուժերի գլխավոր շտաբի,  Վազգեն Սարգսյանի անվան ռազմական ակադեմիայի ու Բարձրագույն կրթության եւ գիտության կոմիտեի ներկայացուցիչների հետ: Մասնակիցները ողջունել են մտահղացումը: Նշվել է, որ առաջարկն ուղարկվել է բարձրագույն ուսումնական հաստատություններ եւ արդեն կան արձագանքներ: Ծրագիրը նախատեսվում է իրականացնել հուլիս-օգոստոս ամիսներին: Ձեւավորվելիք ուսանողական ջոկատների պատասխանատուները կլինեն Վազգեն Սարգսյանի անվան ռազմական ակադեմիայի կուրսանտները, խմբերում ընդգրկված կլինեն նաեւ աղջիկներ: Անդրանիկ Քոչարյանը նշել է, որ ծրագիրը հնարավորություն կտա երիտասարդներին մասնակից լինելու երկրի պաշտպանական խնդիրների լուծմանը, ձեռք բերելու նոր հմտություններ, ծանոթանալու բանակի առօրյային: Պատգամավորի տեղեկացմամբ ուսումնասիրելով միջազգային փորձը` պարզվել է, որ նմանատիպ ծրագրեր իրականացվում են եվրոպական մի շարք երկրներում: Մասնակիցները մանրամասն քննարկել են ծրագրի իրականացմանը վերաբերող հարցեր:
16:27 - 26 հունիսի, 2024