Էկոնոմիկայի նախարարություն

ՀՀ էկոնոմիկայի նախարարությունը գործադիր իշխանության հանրապետական մարմին է, որը ՀՀ օրենսդրությամբ իրեն վերապահված ոլորտներում մշակում է տնտեսական քաղաքականությունը, ապահովում դրա իրականացնումը եւ արդյունքների գնահատումը։

Էկոնոմիկայի նախարարն է Վահան Քերոբյանը, տեղակալներն են Ավագ Ավանեսյանը, Տիգրան Գաբրիելյանը, Նաիրա Մարգարյանը, Վարոս Սիմոնյանը, Արման Խոջոյանը։

Քննարկվել են ՀՀ-ի և Նորվեգիայի միջև առևտրատնտեսական հարաբերությունների զարգացմանը վերաբերող հարցեր

Քննարկվել են ՀՀ-ի և Նորվեգիայի միջև առևտրատնտեսական հարաբերությունների զարգացմանը վերաբերող հարցեր

Էկոնոմիկայի նախարարի տեղակալ Նարեկ Հովակիմյանը հունիսի 14-ին ընդունել է Նորվեգիայի Թագավորության արտակարգ և լիազոր դեսպան Բերգլյոտ Հովլանդին։ Էկոնոմիկայի նախարարության փոխանցմամբ՝ քննարկվել են Հայաստանի և Նորվեգիայի միջև առևտրատնտեսական հարաբերությունների զարգացմանը, Հայաստանի տնտեսության դիվերսիֆիկացմանը, գյուղատնտեսության, վերականգնվող էներգիայի և ջրային ռեսուրսների արդյունավետ կառավարման ոլորտներում համագործակցության և փորձի փոխանակման հնարավորություններին։ Հայ-նորվեգական գործարար կապերի ամրապնդման համատեքստում Նարեկ Հովակիմյանն առաջարկել է դիտարկել նորվեգական ընկերությունների մասնակցության հնարավորությունները Հայաստանում իրականացվող ներդրումային տարբեր ծրագրերում, այդ թվում՝ Գյումրիում «չոր նավահանգստի» կառուցման և Համաշխարհային առևտրի կենտրոնի հիմնման նախագծերին։ Նարեկ Հովակիմյանը դեսպանին ներկայացրել է «Խաղաղության խաչմերուկ» նախագիծը, որը կարող է դառնալ ինչպես տարածաշրջանային, այնպես էլ ավելի լայն տնտեսական համագործակցության կարևոր բաղկացուցիչ։
14:16 - 14 հունիսի, 2024
ԱԺ-ում քննարկվել է ՀՀ-ի՝ ԵՆԱԲ-ին միանալու հարցը. կառույցի հիմնադիրներից են Իրանը, Թուրքիան, Ադրբեջանը
 |1lurer.am|

ԱԺ-ում քննարկվել է ՀՀ-ի՝ ԵՆԱԲ-ին միանալու հարցը. կառույցի հիմնադիրներից են Իրանը, Թուրքիան, Ադրբեջանը |1lurer.am|

1lurer.am: Ազգային ժողովի հունիսի 11-ի նիստում քննարկվեց «Ենթակառուցվածքային ներդրումների ասիական բանկի մասին» (ԵՆԱԲ) համաձանագրին միանալու և Ենթակառուցվածքային ներդրումների ասիական բանկին անդամակցելու՝ ՀՀ կառավարության նախաձեռնությունը, որի նպատակներից է տարածաշրջանում ենթակառուցվածքների փոխկապակցվածության բարելավումը, ինչպես նաև տարածաշրջանային համագործակցության խորացումը: Այդ մասին համաձայնագիրը վավերացնելու նախագիծն ԱԺ-ում ներկայացրեց ՀՀ էկոնոմիկայի նախարարի տեղակալ Նարեկ Հովակիմյանը: «ԵՆԱԲ-ին անդամակցում են 100-ից ավելի երկրներ, իսկ հիմնադիր 57 անդամ երկրների թվում են մեր անմիջական հարևան Իրանը, Թուրքիան և Ադրբեջանը: Բանկին անդամակցումը ՀՀ-ի համար հնարավորություն է ընձեռում մասնակցելու տարածաշրջանային խոշոր նեդրումային ծրագրերին, համագործակցելու զարգացման բազմակողմ և երկկողմ այլ հաստատությունների հետ և ներգրավելու պետական ու մասնավոր կապիտալ: Անդամակցումը նաև նոր խթան կհաղորդի հայ-չինական տնտեսական և քաղաքական երկխոսությանը»,- ասաց նախարարի տեղակալը: Ըստ Նարեկ Հովակիմյանի՝ այն կարող է նաև ՀՀ տրանսպորտային ենթակառուցվածքների արդիականացման նպատակով Չինաստանի ֆինանսավորմամբ ներդրումների ներգրավման հնարավորություն ստեղծել: «Բանկին անդամակցության գործընթացը ենթադրում է բաժանորդագրում բանկի բաժնետիրական կապիտալի բաժնեմասերին վճարվող և ցպահանջ բաժնեմասերի միջոցով: Մեկ բաժնեմասի արժեքն է 100 հազար ԱՄՆ դոլար, իսկ Հայաստանի անդամակցությունը նախատեսվում է 374 բաժնեմասի բաժանորդագրմամբ»,- ասաց նա և հավելեց՝ չինական կապիտալի ներհոսքն ապահովելու համար ավելի շահավետ է, եթե ՀՀ-ն դառնա ԵՆԱԲ-ի անդամ: ««Խաղաղության խաչմերուկ» նախագծի գաղափարախոսության հիմքում ընկած բոլոր թեզերը համահունչ են ներդրումային բանկի [պահանջներին] մեր անդամակցության տեսանկյունից»,- ասաց նա: ԱԺ փոխխոսնակ Հակոբ Արշակյանը կարևորեց համաձայնագիրը վավերացնելու մասին նախագծի ընդունումը՝ որպես Հայաստան-Չինաստան բարեկամական խմբի ղեկավար, ապա տեղեկացրեց, որ առաջիկայում նախատեսվում է պատգամավորական խմբի այց Չինաստան: «Համոզված եմ, որ այս անդամակցությունը ԵՆԱԲ-ի մասով մեզ կբերի նոր հնարավորություններ Չինաստանի և գործընկեր այլ երկրների հետ հարաբերությունների զարգացման առումով»,- ասաց Արշակյանը:
14:07 - 11 հունիսի, 2024
Վահան Քերոբյանի մեղադրանքը փոփոխվել է. Պաշտպաններ
 |aysor.am|

Վահան Քերոբյանի մեղադրանքը փոփոխվել է. Պաշտպաններ |aysor.am|

aysor.am: Վարույթ իրականացնող մարմինն այլևս չի համարում, որ պետությանը պատճառվել է վնաս, ի տարբերություն քննչական մարմնի տարածած նախնական պաթոսի, որ  պետությանը պատճառվել էր վիթխարի վնաս. լրագրողների հետ զրույցում հայտարարեց Էկոնոմիկայի նախկին նախարար Վահան Քերոբյանի փաստաբան Վաչե Սիմոնյանը։ «Անցած շաբաթ Վահան Քերոբյանի մեղադրանքը փոփոխվել է և այլևս նշված՝ «պետությանը պատճառված հանրային վնասը» հանվել է մեղադրանքի ձևակերպումից»,-ասաց նա։ Սիմոնյանն ասաց, որ «Սիներջի»-ի գործով 6 մեղադրյալներից մեկն արդարացվել է, մյուսները՝ կիսով չափ,այսինքն՝  քրեական հետապնդումը դադարեցվել է՝ մեղսագրվող արարքը կատարված չլինելու հիմքով:  «Նմանատիպ որոշումներ կայացնելով, թե՛ արդարացնող, թե՛ վնասը հանելու պարագայում, գործն էապես աղքատանում է։ Դատախազության այս որոշումներով ցույց է տրվում, որ չի կարելի վստահել քննչական կոմիտեի հաղորդագրություններին»,- ասաց փաստաբանը։ Հիշեցնենք՝ Վահան Քերոբյանին մեղադրանք էր առաջադրվել Էկոնոմիկայի նախարարության կարիքների համար ծառայության ձեռքբերման մրցույթի ընթացքում առերևույթ չարաշահումների վերաբերյալ քրեական վարույթով քրեական օրենսգրքի 441-րդ հոդվածի՝ «պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը», 2-րդ մասի 4-րդ կետով՝ «մի խումբ պաշտոնատար անձանց կողմից նախնական համաձայնությամբ»: Քննչական կոմիտեն հայտնել էր՝ փաստական տվյալներ են ստացվել, որ էկոնոմիկայի նախարարության պաշտոնատար անձինք նախնական համաձայնությամբ, մի խումբ անձանց դրդմամբ և օժանդակությամբ, չարաշահել են իրենց ծառայողական լիազորությունները: Մասնավորապես՝ «Հանրային ներդրումային ծրագրերի բանկի ստեղծման» ծառայության ձեռքբերման մրցույթի ընթացքում մասնակից բաժնետիրական ընկերություններից մեկի հաղթանակն ապահովելու համար, խախտելով «Գնումների մասին» օրենքի և Կառավարության որոշման պահանջները, մրցույթի մյուս մասնակցին համարել են պայմաններին չհամապատասխանող և փաստացի հեռացրել մրցույթից:
12:28 - 10 հունիսի, 2024
Գևորգ Պապոյանն ու Հնդկաստանի դեսպանը քննարկել են մի շարք ոլորտներում համագործակցության ընդլայնմանը վերաբերող հարցեր

Գևորգ Պապոյանն ու Հնդկաստանի դեսպանը քննարկել են մի շարք ոլորտներում համագործակցության ընդլայնմանը վերաբերող հարցեր

Հայաստանի էկոնոմիկայի նախարար Գևորգ Պապոյանը հունիսի 7-ին ընդունել է Հայաստանում Հնդկաստանի արտակարգ և լիազոր դեսպան Նիլակշի Սահա Սինհային: Այս մասին հաղորդագրություն է տարածել ՀՀ էկոնոմիկայի նախարարությունը։ Զրուցակիցները քննարկել են հայ-հնդկական առևտրատնտեսական հարաբերությունների զարգացմանը, գյուղատնտեսության և արդյունաբերության ոլորտներում համագործակցության ընդլայնմանը վերաբերող հարցեր։ Նախարարն առաջարկել է դիտարկել Հայաստանում պղնձաձուլարանի կառուցման տարբերակը՝ օգտագործելով Հնդկաստանի առաջադեմ տեխնոլոգիաները։  Գևորգ Պապոյանը նաև հնարավոր է համարել համագործակցության խորացումը ոսկերչության ոլորտում և Հնդկաստանի ոսկերչական ցուցահանդեսներում Հայաստանի ներկայացումը ազգային տաղավարով։ Ընդգծելով, որ Հայաստանի կառավարությունը կարևորում է քիմիական և մետալուրգիական արդյունաբերությունը՝ նախարարը հրավիրել է հնդկական ընկերություններին հայկական կողմի հետ համագործակցել «Կանաչ քիմիա» նախագծերի շրջանակում: Երկուստեք կարևորվել է միջազգային և մասնագիտացված ցուցահանդեսների ու գործարար համաժողովների կազմակերպումը՝ երկու երկրների գործարար համայնքների միջև համագործակցությունը խթանելու նպատակով: Կողմերն անդրադարձել են նաև «Խաղաղության խաչմերուկ» նախագծին, որը կարող է դառնալ ինչպես տարածաշրջանային, այնպես էլ ավելի լայն տնտեսական համագործակցության կարևոր բաղկացուցիչ։
16:11 - 07 հունիսի, 2024
Ալեն Սիմոնյանի եղբոր կնոջ եւ Էկոնոմիկայի նախարարության այլ պաշտոնատար անձանց վերաբերյալ քրեական վարույթը կարճվել է

Ալեն Սիմոնյանի եղբոր կնոջ եւ Էկոնոմիկայի նախարարության այլ պաշտոնատար անձանց վերաբերյալ քրեական վարույթը կարճվել է

ՀՀ ԱԺ նախագահ Ալեն Սիմոնյանի եղբոր կնոջ եւ Էկոնոմիկայի նախարարության այլ պաշտոնատար անձանց վերաբերյալ քրեական վարույթը կարճվել է։ Տեղեկությունը Ինֆոքոմի հետ զրույցում հաստատեցին Գլխավոր դատախազությունից՝ մանրամասնելով․ «Նկատի ունենալով, որ ներքոնշյալ անձինք նախաքննության ընթացքում համագործակցել են քրեական հետապնդման մարմնի հետ, ամբողջությամբ ընդունել և չեն վիճարկել իրենց ներկայացված մեղադրանքները, դրանցում նկարագրված փաստական հանգամանքները՝ հսկող դատախազի կողմից նշված անձանց կողմից ներկայացված միջնորդությունների քննարկման արդյունքում, որոշումներ են կայացվել վերջիններիս նկատմամբ գործուն զղջալու հիմքով հանրային քրեական հետապնդումը դադարեցնելու մասին»։ Մասնավորապես՝ 2024 թվականի մայիսի 17-ին առևտրային կազմակերպության աշխատակից Լ․ Մ․-ի (Լիլի Մկրյան) նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: 2024 թվականի մայիսի 20-ին առևտրային կազմակերպության աշխատակից Ա․Գ․-ի (Ալեն Սիմոնյանի եղբոր կինը՝ Անի Գևորգյան) նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: 2024 թվականի մայիսի 23-ին Էկոնոմիկայի նախարարության աշխատակից Ա.Ս.-ի նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: 2024 թվականի մայիսի 27-ին Էկոնոմիկայի նախարարության աշխատակից Ա.Ի.-ի նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: 2024 թվականի մայիսի 29-ին Էկոնոմիկայի նախարարության աշխատակից Ս.Գ.-ի նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: Բացի այդ, 2024 թվականի մայիսի 20-ին Էկոնոմիկայի նախարարության աշխատակից Ա.Ղ.-ի նկատմամբ հարուցված հանրային քրեական հետապնդումը դադարեցվել է՝ մեղսագրվող արարքը վերջինիս կողմից կատարված չլինելու հիմքով»: Նշենք, որ ՀՀ քրեական օրենսգրքի համաձայն՝ եթե անձն առաջին անգամ է հանցանք կատարել, ապա կարող է ազատվել քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, եւ նա համագործակցում է քրեական հետապնդման մարմինների հետ, չի վիճարկում իրեն մեղսագրվող արարքը, վնաս պատճառած լինելու դեպքում հատուցել կամ այլ կերպ հարթել է հանցագործությամբ պատճառված վնասը:
17:53 - 05 հունիսի, 2024
ԵՄ որոշ երկրներից ազդակներ կան Հայաստանում ներդրումները ավելացնելու վերաբերյալ․ Պապոյան
 |armenpress.am|

ԵՄ որոշ երկրներից ազդակներ կան Հայաստանում ներդրումները ավելացնելու վերաբերյալ․ Պապոյան |armenpress.am|

armenpress.am: Եվրոպական Միության որոշ երկրներից ազդակներ կան Հայաստանում ներդրումները ավելացնելու վերաբերյալ։ Այս մասին ասաց Էկոնոմիկայի նախարար Գևորգ Պապոյանը՝ ԱԺ մշտական հանձնաժողովների համատեղ նիստում «ՀՀ 2023 թվականի պետական բյուջեի կատարման մասին» տարեկան հաշվետվության քննարկմանը: «Օրինակ՝ ֆրանսիական ընկերություններն արդեն Հայաստանում են և փնտրում են ներդրումներ անելու հնարավոր ոլորտներ, ընդ որում ոլորտները տարբեր են՝ հագուստի համաշխարհային բրենդներից մինչև ենթակառուցվածքների մեջ ներգրավված ընկերություններ։ Սա քաղաքական ազդակի արդյունք է»,- ընդգծեց Պապոյանը։ Նախարարը նշեց, որ վերջերս նա հանդիպել է ֆրանսիացի գործարարների խմբի՝ ելնելով երկրների ղեկավարների քաղաքական հայտարարություններից։ «Կազմակերպվել են B2B հանդիպումներ, մեծ միջոցառում տեղի ունեցավ»,- նշեց Պապոյանը։ Նրա խոսքով՝ կան նաև խնդիրներ, որոնք կապված են ոչ թե ԵՄ-Հայաստան օրակարգի, այլ՝ ԵՄ-ԵԱՏՄ օրակարգի հետ։ «Ակնհայտորեն, սանկցիոն գործողություններն իրենց բացասական ազդեցությունն են ունեցել մեր տնտեսության վրա, և մենք դա տեսնում ենք»,-եզրափակեց Պապոյանը։
15:57 - 04 հունիսի, 2024
«Եթե կա չարաշահում, դրան պետք է տրվի քրեաիրավական գնահատական»․ Գեւորգ Պապոյանը՝ ԱՆԻՖ-ի ձախողման մասին

 |aravot.am|

«Եթե կա չարաշահում, դրան պետք է տրվի քրեաիրավական գնահատական»․ Գեւորգ Պապոյանը՝ ԱՆԻՖ-ի ձախողման մասին |aravot.am|

aravot.am: Ազգային ժողովի մշտական հանձնաժողովների նիստում «Հայաստանի Հանրապետության 2023 թվականի պետական բյուջեի կատարման մասին» տարեկան հաշվետվության նախնական քննարկման ժամանակ ՔՊ խմբակցության պատգամավոր Արսեն Թորոսյանը հարցրեց Էկոնոմիկայի նախարար Գեւորգ Պապոյանին․ «Ի վերջո ԱՆԻՖ-ը ի՞նչ ճակատագրի է արժանանալու եւ ինչո՞ւ։ Նաեւ ասեք, թե ինչքանո՞վ է իրականությանը համապատասխանում մամուլում հրապարակված այս տեղեկատվությունը, որ ԱՆԻՖ-ի որոշ աշխատակիցներ, որոնց աշխատանքի արդյունքում մենք հասկանում ենք, որ այդ պրոյեկտը ձախողվել է, ստացել են ամսական տասնյակ միլիոնավոր դրամ աշխատավարձեր»։ Գեւորգ Պապոյանն ասաց․ «Իմ մոտեցումն այն է, որ եթե անգամ 10 հազար դրամ ծախս է, պետք է հիմնավորենք, թե ինչի համար ենք այդ ծախսն անում։ Էլ ուր մնաց 10 մլն, 100 մլն, 1 մլրդ կամ 10 մլրդ։ Ես որքան գիտեմ, այս մասով առնվազն ստուգումներ կան Պետական վերահսկողական ծառայության կողմից։ Այս պահին Էկոնոմիկայի նախարարությունն ԱՆԻՖ-ի բաժնետերը չէ, կառավարության որոշմամբ ԱՆԻՖ-ի բաժնետերը Պետական գույքի կառավարման կոմիտեն է։ Բայց այն ժամանակ, երբ Էկոնոմիկայի նախարարությունն էր բաժնետերը, գրությամբ դիմել եմ հանրապետության վարչապետին եւ ստացել եմ դրական արձագանք, որ պետք է այդտեղ Պետական վերահսկողական ծառայությունը ստուգումներ իրականացնի։ Ես կարծում եմ, որ ստուգումների արդյունքները կլինեն, դրանց հիման վրա, եթե լինեն այնպիսի դրվագներ, որոնք արժանի են, որ ստանան քրեաիրավական գնահատական, ես կարծում եմ, որ դա պետք է լինի։ Ես հաստատ վստահ եմ, որ մենք ունենք այդ քաղաքական հանձնառությունը՝ մինչեւ վերջ գնալու եւ բացահայտելու ամեն ինչ, ինչ տեղի է ունեցել»։ Անդրադառնալով բարձր աշխատավարձերի մասին հարցին՝ Պապոյանն ասաց․ «Ես այս պահին գիտեմ, որ նման աշխատավարձեր չկան։ Այս պահին աշխատավարձերը Հայաստանում միջին վիճակագրական մենեջմենթին վերաբերող աշխատավարձեր են՝ մի քանի հարյուր հազարից մինչեւ գուցե միլիոնից մի փոքր ավելի։ Այդպիսի բարձր աշխատավարձեր հիմա չի եղել, նախկինի համար չեմ կարող ասել։ Այսինքն՝ իմ մոտեցումը հետեւյալն է, եթե կա չարաշահում, դրան պետք է տրվի քրեաիրավական գնահատական, եթե չկա, դրա մասին պետք է բացահայտ հայտարարել»։ Արսեն Թորոսյանն ասաց, որ արդեն կա հարուցված քրեական գործ, ինքը Գլխավոր դատախազից նման պաշտոնական տեղեկություն է ստացել։
14:23 - 31 մայիսի, 2024
«Ֆլայ Արնա»-ի աշխատակիցները ահազանգում են, որ չեն ստացել խոստացված աշխատավարձը
 |hetq.am|

«Ֆլայ Արնա»-ի աշխատակիցները ահազանգում են, որ չեն ստացել խոստացված աշխատավարձը |hetq.am|

hetq.am: Հայկական «Ֆլայ Արնա» («Fly Arna») ավիաընկերության («Հայաստանի ազգային ավիաուղիներ» ՓԲԸ) աշխատակիցներն ահազանգում են, որ այս տարվա մարտից հետո, երբ իրենց ծանուցվել է ընկերության գործունեության դադարեցման մասին, աշխատավարձ չեն ստացել, թեև խոստացել են օրենսդրության համաձայն առաջիկա 2 ամսվա համար աշխատավարձ և արձակման նպաստ վճարել։  Ընկերության աշխատակիցը, որն, ինչպես իր մյուս գործընկերները, նախընտրում է անանուն մնալ, «Հետք»-ին պատմել է, որ այս տարվա մարտի 19-ին ընկերության էլ. փոստից աշխատակիցները էլեկտրոնային նամակներ են ստացել այն մասին, որ ընկերությունը դադարեցնում է գործունեությունը, և նշված օրվանից լուծվում է ընկերության ու աշխատակիցների մինչև կնքված աշխատանքային պայմանագիրը։  «Ծանուցման մեջ հղում է արվում ՀՀ Աշխատանքային օրենսգրքին, որի համաձայն՝ մենք պետք է վճարվենք մինչև մայիսի 19-ի համար, ինչպես նաև՝ արձակման նպաստ ստանանք։ Սակայն, մենք վճարվել ենք միայն մարտի համար։ Դրանից հետո իմացել ենք, որ ընկերության 49%-ի սեփականատեր «Էյր Արաբիա» ընկերությունը հրաժարվել է կառավարումից, որից հետո աշխատավարձերի վճարման կազմակերպման խնդիր է առաջացել, քանի որ չկա տնօրեն, որը կստորագրի դրա ներքո»,- պատմում է աշխատակիցներից մեկը։  «Ֆլայ Արնա»-ն հայ-արաբական համատեղ բիզնես ծրագրերից է։  «Հայաստանի ազգային ավիաուղիներ» ՓԲԸ-ի 49%-ը պետական է։ Այն պատկանում է «Հայաստանի պետական հետաքրքրությունների ֆոնդ»-ին, որն առավել հայտնի է ԱՆԻՖ անունով։ Ֆոնդի շուրջ ուշագրավ զարգացումներ են տեղի ունենում այս օրերին։ Մյուս  49%-ը պատկանում է արաբական «Ինթերնեշնլ Բիզնես Քամփնի (ՖԶԵ)» ՍՊԸ-ին, որը փոխկապակցված է «Էյր Արաբիա» («Air Arabia») ավիաընկերությանը։ «Ֆլայ Արնա»-ն կառավարող կազմակերպությունը «Էյր Արաբիա» ԲԲԸ-ն է։ Բաժնետոմսերի մնացած 2%-ը պատկանում է ՀՀ քաղաքացի Վարուժան Ներգիզյանին, որը ծնունդով Հալեպից է, գործարար։ «Ֆլայ Արնա»-ի սեփականատերերի մասին տեղեկությունները հրապարակված են պետական ռեգիստրում՝ ընկերության կանոնադրության մեջ։  Սակայն, ինչպես հայտնի է դարձել, «Ֆլայ Արնա»-ի սեփականատեր «Հայաստանի պետական հետաքրքրությունների ֆոնդ»-ը՝ ԱՆԻՖ-ը, դադարեցնում  է գործունեությունը, և ներկայում ընթանում են ընկերության լուծարման գործընթացի հետ կապված աշխատանքներ։  Կառավարության այսօրվա՝ մայիսի 23-ի նիստի օրակարգում ընդգրկված նախածերից մեկով «Հայաստանի պետական հետաքրքրությունների ֆոնդ» ՓԲԸ-ի կառավարման լիազորությունը փոխանցվում է ՀՀ տարածքային կառավարման և ենթակառուցվածքների նախարարության պետական գույքի կառավարման կոմիտեին։  Ավելի վաղ հայտնի էր դարձել նաև, որ ԱՆԻՖ-ը հայտնվել է կոռուպցիոն գործարքների մեջ։ Աշխատակիցները կվճարվեն միայն, երբ «Ֆլայ Արնա»-ն տնօրեն ունենա «Ֆլայ Արնա»-ի աշխատակիցների աշխատավարձերի խնդրի վերաբերյալ մեկնաբանություն ստանալու համար «Հետք»-ը երկու օր առաջ՝ մայիսի 21-ին, գրավոր դիմել է ինչպես ԱՆԻՖ-ին, այնպես էլ՝ Էկոնոմիկայի նախարարություն։  ԱՆԻՖ-ի տնօրենի ժամանակավոր պաշտոնակատար Տիգրան Ղազարյանը  վստահեցնում է, որ որպես «Ֆլայ Արնա»-ի բաժնետեր՝ ԱՆԻՖ-ն իր իրավասությունների սահմաններում քայլեր է ձեռնարկում, որ ընկերությունն ունենա տնօրեն, որից հետո հնարավոր կլինի վճարել աշխատակիցների աշխատավարձերը։  «Աշխատավարձերի ուշացումը պայմանավորված է «Ֆլայ Արնա» ավիաընկերության տնօրինության փոփոխությամբ»,- նշում է Ղազարյանը։  Ընկերությունից հետաքրքրվել էինք՝ կա՞ն վճարման նախանշված ժամկետներ։ Պատասխանել են,  որ աշխատավարձերի վճարման գործընթացը կսկսվի տնօրենի նշանակումից հետո։  ԱՆԻՖ-ից նաև հաստատում են, որ աշխատավարձերի ուշացման թեմայով «Ֆլայ Արնա»-ի աշխատակիցների հետ հանդիպումներ են տեղի ունեցել։ Ավելի մանրամասն՝ սկզբնաղբյուրում։   
18:36 - 23 մայիսի, 2024
Քննարկվել են ՀՀ - ԱՄԷ առևտրատնտեսական կապերի ամրապնդմանը վերաբերող հարցեր

Քննարկվել են ՀՀ - ԱՄԷ առևտրատնտեսական կապերի ամրապնդմանը վերաբերող հարցեր

Մայիսի 21-ին ԱՄԷ Աբու Դաբի քաղաքում կայացել է Հայաստան-ԱՄԷ միջկառավարական համատեղ հանձնաժողովի երկրորդ նիստը։ Այս մասին հայտնում են ՀՀ էկոնոմիկայի նախարարությունից։ ՀՀ-ԱՄԷ միջկառավարական հանձնաժողովի հայկական կողմի համանախագահն էր ՀՀ էկոնոմիկայի նախարար Գևորգ Պապոյանը, իսկ էմիրաթական կողմի համանախագահը՝ Արաբական Միացյալ Էմիրությունների կառավարության պետնախարար Ահմադ Ալի Ալ-Սայեղը։ Գևորգ Պապոյանը նշել է, որ Հայաստանը Արաբական Միացյալ Էմիրությունները դիտարկում է որպես կարևորագույն գործընկեր՝ Հայաստանի և Ծոցի տարածաշրջանի երկրների միջև՝ առևտրատնտեսական և ներդրումային համագործակցության խորացման համար։ Նիստի ընթացքում քննարկվել են ՀՀ և ԱՄԷ միջև առևտրատնտեսական կապերի ամրապնդմանը, առևտրի, էներգետիկայի, բարձր տեխնոլոգիաների, գյուղատնտեսության, թվայնացման, առողջապահության, միջտարածաշրջանային և այլ ոլորտներում համագործակցության ընդլայնմանը վերաբերող հարցեր։ Կողմերը եկել են կարևոր համաձայնությունների, որոնց շուրջ ստորագրել են փաստաթուղթ։ Անդրադարձ է կատարվել նաև ՀՀ տնտեսության դիվերսիֆիկացման հնարավորություններին։ Հայաստան-ԱՄԷ միջկառավարական համատեղ հանձնաժողովի անդրանիկ նիստը անց է կացվել Երևանում 2019 թ․ մայիսի 2-ին։
10:14 - 22 մայիսի, 2024
Հայաստանը՝ «Ամերիկյան երկրների մրցունակության փոխանակում» (ACE) ծրագրի հյուրընկալող երկիր։

Հայաստանը՝ «Ամերիկյան երկրների մրցունակության փոխանակում» (ACE) ծրագրի հյուրընկալող երկիր։

ՀՀ Էկոնոմիկայի նախարարությունը հայտարարել է, որ «Ամերիկյան երկրների մրցունակության փոխանակում» (ACE) ծրագրի հյուրընկալող երկիրն է։ ՀՀ Էկոնոմիկայի նախարար Գևորգ Պապոյանը և նախարարի տեղակալ Նարեկ Հովակիմյանը ԱՄՆ Միչիգան նահանգի Դետրոյթ քաղաքում մասնակցել են «Ամերիկյան երկրների մրցունակության փոխանակում» (ACE) ծրագրին։ Միջոցառման եզրափակիչ մասում Հայաստանը պաշտոնապես հայտարարվել է որպես ծրագրի հաջորդ հյուրընկալող երկիր։ Նշենք, որ ՀՀ-ն, որպես դիտորդ, երրորդ երկիրն է ԱՄՆ մայրցամաքից դուրս, որտեղ իրականացվելու է այս ծրագիրը։ Էկոնոմիկայի նախարար Գևորգ Պապոյանը, ողջունելով միջոցառման մասնակիցներին, մեծապես կարևորել է ԱՄՆ-ի, ինչպես նաև ամերիկյան տարածաշրջանի այլ երկրների հետ հարաբերությունների ամրապնդումն ու համագործակցության նոր հնարավորությունների բացահայտումը ինչպես պետական, այնպես էլ մասնավոր և կրթական ոլորտների համար։ Նախարարը նաև ընդգծել է Հայաստանի տնտեսության դիվերսիֆիկացման կարևորությունը և այդ ուղղությամբ իրականացվելիք աշխատանքները։ «Ամերիկյան պետությունների մրցունակության փոխանակում» ծրագիրը Ամերիկայի տնտեսական զարգացման, նորարարության և ձեռնարկատիրական կարևորագույն միջոցառումներից մեկն է, որին մասնակցում են Ամերիկյան պետությունների կազմակերպության անդամ և դիտորդ բոլոր երկրները: Ծրագիրը համախմբում է անդամ և դիտորդ երկրների մինչև 50 բարձրաստիճան պաշտոնյաների, քաղաքականություն մշակողներին, բիզնեսի, քաղաքացիական հասարակության և գիտակրթական շրջանակների ներկայացուցիչներին։ Ծրագիրը Հայաստանում անցկացնելու արդյունքում կստեղծվեն նոր գործարար կապեր և լուրջ նախադրյալներ՝ Հյուսիսային և Հարավային Ամերիկայի, ինչպես նաև կազմակերպության մշտական դիտորդ հանդիսացող պետությունների հետ տնտեսական և առևտրային փոխշահավետ հարաբերությունների հաստատման համար, ինչը, իր հերթին, կնպաստի հանրային և մասնավոր հատվածների փոխգործակցությանը, կապիտալ ներդրումների ներգրավմանն ու կրթական հաստատությունների միջև համագործակցության հաստատմանը։
17:34 - 11 մայիսի, 2024
Գևորգ Պապոյանի մասնակցությամբ քննարկվել են զբոսաշրջության ոլորտի գրավչությունը բարձրացնելուն ուղղված գործողությունները

Գևորգ Պապոյանի մասնակցությամբ քննարկվել են զբոսաշրջության ոլորտի գրավչությունը բարձրացնելուն ուղղված գործողությունները

Նախարար Գևորգ Պապոյանը մայիսի 6-ին ընդունել է Տուրիզմի հայկական ֆեդերացիայի նախագահ Մեխակ Ապրեսյանին և զբոսաշրջության ոլորտի ներկայացուցիչներին։ Հանդիպմանը ներկա է եղել նաև ԱԺ պատգամավոր Դավիթ Առուշանյանը։   Ինչպես հայտնում են ՀՀ էկոնոմիկայի նախարարությունից, կողմերը քննարկել են ոլորտում առկա մարտահրավերներն հաղթահարելու ճանապարհները, զբոսաշրջության ոլորտի գրավչությունը բարձրացնելուն ուղղված գործողությունների պլանը, Հայաստանի զբոսաշրջության ռազմավարության բրենդինգի, ներքին և ներգնա զբոսաշրջության զարգացման, օտարերկրյա պետությունների, տարածաշրջանային և միջազգային կազմակերպությունների հետ համագործակցության, զբոսաշրջային ծառայությունների որակի բարելավմանը վերաբերող հարցեր։   Երկուստեք կարևորվել է նման քննարկումների նշանակությունը և որոշում կայացվել դրանք շարունակական դարձնելու վերաբերյալ
11:01 - 07 մայիսի, 2024
Էկոնոմիկայի նախարարը ՄԹ դեսպանի հետ քննարկել է մի շարք ոլորտներում համագործակցությունը խորացնելու հնարավորությունները

Էկոնոմիկայի նախարարը ՄԹ դեսպանի հետ քննարկել է մի շարք ոլորտներում համագործակցությունը խորացնելու հնարավորությունները

Հայաստանի էկոնոմիկայի նախարար Գևորգ Պապոյանը մայիսի 3-ին ընդունել է Հայաստանում Միացյալ Թագավորության դեսպան Ջոն Գալագերին։ Հանդիպմանը ներկա է եղել նաև նախարարի տեղակալ Նարեկ Հովակիմյանը։ Այս մասին հաղորդագրություն է տարածել ՀՀ էկոնոմիկայի նախարարությունը։ Քննարկվել են երկու երկրների միջև առևտրաշրջանառության ծավալների ավելացման, սննդարդյունաբերության, հանքարդյունաբերության, գյուղատնտեսության և զբոսաշրջության բնագավառներում գործակցության խորացման հնարավորությունները։  Կողմերը մտքեր են փոխանակել առևտրի և ներդրումների խթանման աշխատանքներում համագործակցության ընդլայնման, ծառայությունների և արտադրության դիվերսիֆիկացման, միջազգային և մասնագիտացված ցուցահանդեսների, գործարար համաժողովների կազմակերպման վերաբերյալ։ Անդրադարձ է կատարվել Միացյալ Թագավորության «Լավ կառավարման հիմնադրամի» հետ համագործակցությանը կորպորատիվ կառավարման ոլորտում բարեփոխումների իրականացման գործում։ Գևորգ Պապոյանը հյուրերին ներկայացրել է «Խաղաղության խաչմերուկ» նախագիծը, որը կարող է դառնալ ինչպես տարածաշրջանային, այնպես էլ ավելի լայն տնտեսական համագործակցության կարևոր բաղկացուցիչ։
16:20 - 03 մայիսի, 2024
Վարչապետին է ներկայացվել Մտավոր սեփականության գրասենյակի 2023թ. գործունեության հաշվետվությունը

Վարչապետին է ներկայացվել Մտավոր սեփականության գրասենյակի 2023թ. գործունեության հաշվետվությունը

Վարչապետ Նիկոլ Փաշինյանը 2023թ. գործունեության հաշվետվությունը քննարկելու նպատակով այցելել է ՀՀ էկոնոմիկայի նախարարության մտավոր սեփականության գրասենյակ: Խորհրդակցության սկզբում վարչապետը նշել է, որ տարբեր, այդ թվում՝ ռազմավարական հարցերի քննարկման ժամանակ հանգում են եզրակացության, որ տնտեսության զարգացման և ներդրումային միջավայրի բարելավման իմաստով մտավոր սեփականության պաշտպանության մեխանիզմները և դրանց լավարկումն ունեն էական առանցքային նշանակություն: Նիկոլ Փաշինյանի խոսքով՝ այսօրվա խորհրդակցության նպատակն է նաև պատկերացում կազմել, թե ինչ մեխանիզմներ են գործում ՀՀ-ում, ինչքանով են այդ մեխանիզմները գործում և մեր երկիրն ինչքանով է կարողանում պաշտպանել մտավոր սեփականությունը: Զեկույցով հանդես է եկել Մտավոր սեփականության գրասենյակի ղեկավար Քրիստինե Համբարյանը՝ ներկայացնելով գրասենյակի հիմնական գործառույթները՝ արդյունաբերական սեփականության օբյեկտների հայտերի ընդունումն ու փորձաքննության անցկացումը, պետական գրանցումը, արտոնագրերի և վկայագրերի հանձնումն ու նշված օբյեկտների պետական գրանցամատյանների վարումը, ֆրանչայզինգի, լիցենզային պայմանագրերի և իրավունքների փոխանցման պայմանագրերի գրանցումը: Վարչապետին է ներկայացվել նաև 2021-2023 թվականների գյուտերի, արդյունաբերական դիզայնների, ապրանքային նշանների գրանցման հայտերի վերաբերյալ տեղեկատվություն։ Նշվել է, որ նախորդ տարիների համեմատ աճել է ազգային ընթացակարգով ստացված ապրանքային նշանների գրանցման հայտերի, ինչպես նաև միջազգային ընթացակարգով (Մադրիդյան համակարգ) Հայաստանի Հանրապետության նշմամբ ստացված ապրանքային նշանների միջազգային հայտերի քանակը: Վարչապետ Փաշինյանը հիշեցրել է՝ տարիներ առաջ եղել է հայտնի գործ, երբ տեղացի մի գործարար միջազգային հայտնի բրենդ էր գրանցել ՀՀ-ում և հետաքրքրվել, թե ինչ ավարտ է ունեցել այդ գործը: Քրիստինե Համբարյանը նշել է, որ խնդիրը լուծվել է դատարանում՝ ի օգուտ իրավատիրոջ, իսկ գրանցումը ճանաչվել է անվավեր: Գրասենյակի ղեկավարի խոսքով՝ այժմ խնդրահարույց գրանցումներ չունեն, նաև գործող օրենքը թույլ չի տալիս խնդրահարույց գրանցումներ: «Մենք լուծել ենք դա նաև օրենքով: Այսինքն՝ մենք նայում ենք օգտագործումը: Անբարեխիղճ գրանցումները կանխել ենք, ստեղծվել է մեխանիզմ»,- ասել է Քրիստինե Համբարյանը: «Արդյունաբերական դիզայնի, գյուտի հետ կապված մարդն ինչի՞ համար է շահագրգռված բերի, գրանցի, որպեսզի հետագայում որևէ մեկը դա իրենից չվերցնի և չօգտագործի: Հիմա մեր մեխանիզմները բավարա՞ր են, երբ մենք գրանցում ենք՝ դրա պաշտպանության լիազորությունն ո՞ւմն է, պետությա՞նը»,- հարցրել է վարչապետը: Գրասենյակի ղեկավարը նշել է, որ պաշտպանության լիազորությունն իրավատիրոջն ու պետությանն են միաժամանակ: «Պետությունը ստեղծում է մեխանիզմներ, իսկ իրավատերն այնքան իրազեկված պետք է լինի, որ իր իրավունքներին իրազեկ լինի ու դիմի համապատասխան մարմիններին: Մենք ունենք Ոստիկանությունում ստորաբաժանում, որը զբաղվում է նաև մտավոր սեփականության խախտումներով: Ունենք մաքսային մարմնում գրանցամատյան, որտեղ օրինակ՝ իրավատերերը գրանցում են իրենց ապրանքային նշանները, օտարերկրյա ընկերությունների մասին է խոսքը, եթե ապրանք է ներկրվում այդ անվանմամբ, մաքսավորը պարտավոր է այդ ապրանքը կանգնեցնել և կապվել իրավատիրոջ հետ ստուգելու՝ օրինակա՞ն ներկրվող արտադրանք է դա, թե՝ ոչ, իսկ երկրի ներսում արդեն՝ Ոստիկանությունն ու դատարանները»,- ասել է Գրասենյակի ղեկավարը: Քրիստինե Համբարյանը տեղեկացրել է, որ 2023թ. մայիսի 17-ից հայտերի ընդունման էլեկտրոնային համակարգում ներդրվել է գյուտերի և արդյունաբերական դիզայնների հայտերի նյութերը 3D մոդելների միջոցով ներկայացնելու հնարավորություն: Այդ մոդելի շնորհիվ հայտատուները կարող են ներկայացնել հայտերը 3D մոդելների կիրառմամբ: Հաշվետու տարում Մտավոր սեփականության գրասենյակը միացել է «Ես եմ» ազգային նույնականացման հարթակին: Շարունակվում են մտավոր սեփականության օբյեկտների գրանցման հայտերի և դրանց ամբողջ գործավարությանը վերաբերող փաստաթղթերի թվայնացման աշխատանքները: Վարչապետին են ներկայացվել նաև 2021-2023 թվականների ընթացքում իրականացրած օրենսդրական բարեփոխումները: Մասնավորապես՝ ուժի մեջ են մտել «Արտոնագրերի մասին» «Արդյունաբերական դիզայնի մասին» նոր օրենքները, ինչպես նաև «Աշխարհագրական նշումների մասին», «Ապրանքային նշանների մասին» և «Պետական տուրքի մասին» օրենքներում փոփոխություններ և լրացումներ կատարելու մասին» օրենքները: ՀՀ կառավարության կողմից հաստատվել են թվով 14 ենթաօրենսդրական ակտեր: Շրջանառության մեջ է դրվել «Հեղինակային իրավունքի և հարակից իրավունքների մասին» նոր օրենքը, որը մշակվել է Մտավոր սեփականության համաշխարհային կազմակերպության փորձագետների հետ համատեղ: Միաժամանակ տեղեկացվել է, որ «Հեղինակային իրավունքի և հարակից իրավունքների մասին» նոր օրենքի նախագծի վերաբերյալ ստացվել են գերատեսչություններից առաջարկություններ, որոնք շուտով կամփոփվեն և նախագծի վերջնական տարբերակը կներկայացվի կառավարության քննարկմանը: Նշվել է, որ գրասենյակն իր մատուցած ծառայությունների դիմաց՝ մտավոր սեփականության օբյեկտների իրավական պահպանության հետ կապված գործողությունների համար գանձում է պետական տուրք՝ «Պետական տուրքի մասին» օրենքի համաձայն: Նախորդ տարվ գանձված տուրքերի ծավալը կազմել է 687,5 մլն դրամ՝ 2022 թվականի 614 մլն դրամի դիմաց: Տեղեկացվել է նաև, որ ՀՀ բյուջե այլ ֆինանսական մուտքեր են ստացվում գրասենյակի կողմից՝ միջազգային հայտերի փորձաքննության անցկացման համար: Ֆինանսական այլ միջոցները գոյանում են Եվրասիական արտոնագրային կոնվենցիայի (Հայաստանի Հանրապետությունը անդամակցում է 27.02.1996թ.-ից), Ապրանքային նշանների միջազգային գրանցման մասին Մադրիդյան համաձայնագրի (Հայաստանի Հանրապետությունը անդամակցում է 25.12.1991թ.-ից) և Հաագայի Համաձայնագրի Ժնևյան Ակտի (Հայաստանի Հանրապետությունը անդամակցում է 13.07.2007թ.-ից) դրույթներով սահմանված կարգերով։ Վարչապետ Փաշինյանը հիշեցրել է, որ պետությունը երգիչներից, շոու բիզնեսի այլ ներկայացուցիչներից պահանջում է եկամտային հարկ և այս քաղաքականությունը պետք է ընդլայնել: Միաժամանակ, Նիկոլ Փաշինյանը հավելել է՝ սա նաև որոշակի դժգոհություն է բերում և այդ առումով պետությունը նույն երգիչների համար պետք է լրացուցիչ աղբյուր ապահովի՝ օրենքի համապատասխան ռեստորաններից պահանջելով պահպանել հեղինակային իրավունքները և հնչեցվող երաժշտության դիմաց կատարել համապատասխան վճարում հեղինակին: «Սա իրականում երկրի դասի և երկրի մակարդակի մասին է: Հիմա, եկեք տեսնենք, թե մենք այս ոլորտում ինչ խնդիր ունենք: Միջազգային կազմակերպությունները, խոշոր բրենդները մեզ անընդհատ ահազանգում են, ընդ որում՝ մենք միշտ էլ ասել ենք, որ այս հարցը պետք է լուծվի, բայց նաև հասկանալով, որ մենք դա մի գործողությամբ չենք կարող լուծել, որոշակի քաղաքական խնդիր ենք առաջադրել, որ լուծվի ժամանակի մեջ: Սա երկրի հեղինակության հարցն է: Եվ ես զգում եմ, որ նախ այս օրակարգի լրջությունը մեզանում բավարար չափով ընկալված չէ և առաջին հերթին, ինձ թվում է, պետք է այս ընկալումը ստեղծել: Կարծում եմ, որ այստեղ ամենակարևոր բաներից մեկը նորից հանրային կոմունիկացիան է: Նախ պետք է հասնել նրան, որ այս խոսակցությունը վայրի չհնչի հանրապետությունում, որտեղ այս մասին խոսեն՝ մարդիկ առնվազն սկսեն գլխով անել, որ կա այդտեղ պրոբլեմ, եկեք լուծենք»,- ասել է վարչապետը: Նշվել է նաև, որ գրասենյակը խորացրել և ամրապնդել է համագործակցությունը Մտավոր սեփականության համաշխարհային կազմակերպության (WIPO), Եվրոպական Միության մտավոր սեփականության գրասենյակի (EUIPO) Եվրասիական արտոնագրային կազմակերպության (EAPO), և օտարերկրյա պետությունների գերատեսչությունների հետ, մասնակցել է ոլորտում կազմակերպված միջազգային վեհաժողովների, նիստերի, աշխատաժողովների, սեմինարների, աշխատանքային հանդիպումների: Անդրադարձ է կատարվել ՀՀ-ում մտավոր սեփականության ոլորտում առկա խնդիրներին, ներկայացվել են առաջարկություններ դրանց հնարավոր լուծումների վերաբերյալ։Վարչապետ Փաշինյանը կարևորել է գրասենյակի կողմից աշխարհագրական տեղանունների գրանցման ուղղությամբ հետևողական աշխատանքների իրականացումը:
18:25 - 02 մայիսի, 2024
Համաշխարհային առևտրի կենտրոն կկառուցվի. Գևորգ Պապոյանը և Էդուարդ Մարությանը պայմանագիր են ստորագրել

Համաշխարհային առևտրի կենտրոն կկառուցվի. Գևորգ Պապոյանը և Էդուարդ Մարությանը պայմանագիր են ստորագրել

Ապրիլի 30-ին ՀՀ էկոնոմիկայի նախարար Գևորգ Պապոյանը՝ ՀՀ կառավարության անունից և «Ռենշին» ՍՊԸ-ի կողմից՝ գլխավոր տնօրեն Էդուարդ Մարությանը ստորագրել են Համաշխարհային առևտրի կենտրոն (WORLD TRADE CENTER (WTC) կառուցելու քաղաքաշինական կառուցապատման ծրագրի իրականացման պայմանագիրը։ Այս մասին տեղեկացնում են Կառավարության մամուլի ծառայությունից: Այսօր ստորագրվել է նաև մեկ այլ եռակողմ պայմանագիր՝ ՀՀ կառավարության, «Ռենշին» ՍՊԸ-ի և «Հայփոստ» ՓԲԸ-ի կողմից, որով կստեղծվի «Համաշխարհային առևտրի կենտրոն Երևան» փակ բաժնետիրական ընկերությունը։ Համաշխարհային առևտրի կենտրոն (WORLD TRADE CENTER (WTC) կառուցելու քաղաքաշինական կառուցապատման ծրագրին և «Համաշխարհային առևտրի կենտրոն Երևան» փակ բաժնետիրական ընկերության հիմնադրմանը մասնակցելու մասին» որոշումը գործադիրը հաստատել է 2023 թ․ սեպտեմբերի 7-ի N 1529-Ա որոշմամբ:
16:10 - 30 ապրիլի, 2024