Իրակլի Ղարիբաշվիլի

Վրաստանի Հանրապետության գործող վարչապետն է։ Ծնվել է 1982 թվականի հունիսի 28-ին՝ Թբիլիսիում։ Վրացի քաղաքական և պետական գործիչ։

Դպրոցական տարիներին զբաղվել է պրոֆեսիոնալ քիքբռնցքամարտով։ 1998-2002 թվականներին սովորել է Թբիլիսիի պետական համալսարանում։ 2004 թվականին ավարտել է Փարիզի (Ֆրանսիա) Սորբոնի համալսարանի միջազգային հարաբերությունների ֆակուլտետը։

Մեր չեզոքությունը և անկողմնակալ դիրքորոշումը տարածաշրջանում բխում է բոլոր երեք երկրների շահերից. Ղարիբաշվիլի |tert.am|

tert.am: Վրաստանը 100 տոկոսով չեզոք է Հայաստանի և Ադրբեջանի միջև հակամարտությունում և չի սատարելու կողմերից ոչ մեկին: Փարիզի «Խաղաղության 6-րդ համաժողովի» պանելային քննարկման ժամանակ հայտարարել է Վրաստանի վարչապետը: «Վրաստանը ռազմավարական գործընկերություն, բարեկամական հարաբերություններ ունի Ադրբեջանի, ինչպես նաև մեր եղբայրական Հայաստանի հետ։ Վրաստանը չի կարող կողմնակալ լինել։ Մենք 100 տոկոսով չեզոք ենք և այս իրավիճակում կողմերից ոչ մեկին չենք աջակցի», - ասել է Ղարիբաշվիլին։ Նրա խոսքով՝ և Հայաստանի վարչապետ Նիկոլ Փաշինյանը, և Ադրբեջանի նախագահ Իլհամ Ալիևը ծանոթ են Վրաստանի դիրքորոշմանը: «Մեր պաշտպանական մեխանիզմներն են չեզոքությունը և անկողմնակալ դիրքորոշումը։ Դա կարևոր է մեր տարածաշրջանում և բխում է բոլոր երեք երկրների շահերից», – ասել Է Ղարիբաշվիլին։

20:41 - 10 նոյեմբերի, 2023

Ղարիբաշվիլին և Մակրոնը քննարկել են Հարավային Կովկասում կայունության ապահովման գործում Վրաստանի հնարավոր դերը |1lurer.am|

1lurer.am: Փարիզում հանդիպել են Վրաստանի վարչապետը և Ֆրանսիայի նախագահը: Անդրադարձ է եղել տարածաշրջանում և ամբողջ աշխարհում անվտանգային իրավիճակին։ Կողմերը քննարկել են Հարավային Կովկասում կայունության ապահովման գործում Վրաստանի հնարավոր դերը: Իրակլի Ղարիբաշվիլին և Էմանուել Մակրոնը նաև բարձր են գնահատել այն փաստը, որ Եվրահանձնաժողովը ԵՄ խորհրդին առաջարկել է Վրաստանին ԵՄ թեկնածուի կարգավիճակ շնորհել։ «Շնորհակալ ենք Ֆրանսիայի նախագահին՝ դեպի Եվրոպա ճանապարհին Վրաստանին աջակցելու համար։ Վստահ ենք, որ Ֆրանսիան ավելի կամրապնդի քաղաքական և գործնական աջակցությունը, կօգնի մեզ հաջողությամբ հաղթահարել անդամակցության հաջորդ փուլերը»,- հանդիպումից հետո X-ի միկրոբլոգում գրել է Վրաստանի վարչապետը։

21:45 - 09 նոյեմբերի, 2023

Վրաստանում կայացել է Հայաստանի և Ադրբեջանի վարչապետների հանդիպումը. Imedi |tert.am|

tert.am: Հայաստանի և Ադրբեջանի վարչապետներ Նիկոլ Փաշինյանը և Ալի Ասադովը Վրաստանի կառավարության ղեկավար Իրակլի Ղարիբաշվիլիի միջնորդությամբ հանդիպում են անցկացրել Թբիլիսիի մերձակայքում գտնվող Մուխրանիում։ Այս մասին հայտնել է Վրաստանի կառավարության մամուլի ծառայությունը։ Բանակցությունների մանրամասները չեն հաղորդվում։ «Իմեդի» հեռուստաալիքի փոխանցմամբ՝ երեք վարչապետների հանդիպումը տեւել է մի քանի ժամ։

12:05 - 27 հոկտեմբերի, 2023

Կայացել է Նիկոլ Փաշինյանի և Իրակլի Ղարիբաշվիլիի առանձնազրույցը

Թբիլիսիում տեղի է ունեցել Հայաստանի և Վրաստանի վարչապետներ Նիկոլ Փաշինյանի և Իրակլի Ղարիբաշվիլիի առանձնազրույցը: Այս մասին հայտնում են ՀՀ վարչապետի աշխատակազմից։ Զրուցակիցները քննարկել են հայ-վրացական համագործակցության օրակարգին, այդ թվում՝ երկկողմ տնտեսական կապերին, առնչվող հարցեր: Անդրադարձ է կատարվել տարածաշրջանում տեղի ունեցող գործընթացներին: Զրուցակիցները կարևորել են խաղաղության և կայունության ուղղությամբ հետևողական քայլերի իրականացումը:

15:17 - 26 հոկտեմբերի, 2023

Ղարիբաշվիլին հայտարարել է Հայաստանի և Ադրբեջանի հետ աշխատելու պատրաստակամության մասին՝ խաղաղության հասնելու համար |factor.am|

factor.am: Թբիլիսին պատրաստ է աշխատել Հայաստանի և Ադրբեջանի հետ Հարավային Կովկասում երկարաժամկետ խաղաղության հասնելու համար։ Այս մասին հայտարարել է Վրաստանի վարչապետ Իրակլի Ղարիբաշվիլին։ «Իմ կառավարության «Խաղաղ հարևանության նախաձեռնության» օգնությամբ մենք պատրաստ ենք աշխատել մեր հարևանների և բարեկամների՝ Հայաստանի և Ադրբեջանի հետ՝ վերջապես երկարաժամկետ խաղաղություն հաստատելու Հարավային Կովկասում»,- ասել է Ղարիբաշվիլին՝ Թբիլիսիում բացելով «Մետաքսի ճանապարհ» միջազգային համաժողովը։ Ղարիբաշվիլին նաև նշել է, որ ուրախ է համաժողովում ողջունել Հայաստանի և Ադրբեջանի վարչապետներ Նիկոլ Փաշինյանին և Ալի Ասադովին։ Նախկինում Ղարիբաշվիլին բազմիցս առաջարկել է Թբիլիսին՝ որպես Հայաստանի և Ադրբեջանի միջև հարաբերությունների կարգավորման բանակցությունների հարթակ։

13:45 - 26 հոկտեմբերի, 2023

Վրաստանն ու Ադրբեջանը կենտրոնացած են կապերի ամրապնդման և տնտեսական աճի վրա. Ղարիբաշվիլի |factor.am|

factor.am: Վրաստանը և Ադրբեջանը կենտրոնացած են կապերի ամրապնդման և տնտեսական աճի վրա: X-ի իր միկրոբլոգում այս մասին գրել է Վրաստանի վարչապետ Իրակլի Ղարիբաշվիլին։ Նա նշել է, որ ի շահ երկու երկրների ժողովուրդների՝ Վրաստանն ու Ադրբեջանը աշխատում են առևտրի, էներգետիկայի, ենթակառուցվածքային զարգացման ոլորտներում հնարավոր համատեղ նախագծերի բացահայտման ուղղությամբ։ «Ես շատ լավ հանդիպում ունեցա Ադրբեջանի Հանրապետության նախագահ Իլհամ Ալիևի հետ, Վրաստանը և Ադրբեջանը կենտրոնացած են կապերի ամրապնդման և տնտեսական աճի խթանման վրա։ Ի շահ մեր ժողովրդի՝ մենք բացահայտում ենք պոտենցիալ համատեղ նախագծեր առևտրի, էներգետիկայի, կայունության և ենթակառուցվածքների զարգացման ոլորտներում: Ես հաստատեցի Իլհամ Ալիևին Վրաստանի աջակցությունը տարածաշրջանում երկարաժամկետ խաղաղության և կայունության համար»,- նշել է Իրակլի Ղարիբաշվիլին։

16:16 - 09 հոկտեմբերի, 2023

Վրաստանը հույս ունի, որ Հայաստանն ու Ադրբեջանը շուտով խաղաղության համաձայնագիր կկնքեն |armeniasputnik.am|

armeniasputnik.am: Վրաստանի վարչապետ Իրակլի Ղարիբաշվիլին հույս ունի, որ Հայաստանն ու Ադրբեջանը մոտ ժամանակներս կկնքեն խաղաղության համաձայնագիր: Այս մասին Ղարիբաշվիլին հայտարարել է Վրաստանում Ադրբեջանի նախագահ Իլհամ Ալիևի հետ համատեղ ճեպազրույցի ժամանակ: «Ես վերահաստատել եմ Վրաստանի աջակցությունն ու հարգանքը Ադրբեջանի տարածքային ամբողջականության և ինքնիշխանության նկատմամբ»,– ասել Է Ղարիբաշվիլին: Նա նշել է, որ խաղաղության համաձայնագիրը թույլ կտա հարատև խաղաղություն հաստատել Հարավային Կովկասում, ինչը կբարելավի տարածաշրջանի բոլոր ժողովուրդների կենսամակարդակը: Ղարիբաշվիլին հիշեցրել է, որ այս հարցում Վրաստանը չեզոք դիրքորոշում ունի և հաստատել է Հայաստանի և Ադրբեջանի միջև միջնորդական ջանքեր ներդնելու պատրաստակամությունը: «Թբիլիսին միշտ պատրաստ է մասնակցել այդ գործընթացին։ Մեր ապագան պետք է լինի խաղաղ և կայուն։ Անդրկովկասի երեք երկրները պետք է իրենք լուծեն տարածաշրջանի հարցերը և ապագա զարգացումը»,– ասել Է Ղարիբաշվիլին։

15:08 - 08 հոկտեմբերի, 2023

Հնարավոր է Թբիլիսիում հայ-ադրբեջանական հարաբերությունների կարգավորման շուրջ հանդիպումներ անցկացնել. Ալիև |tert.am|

tert.am: Ադրբեջանի նախագահ Իլհամ Ալիևը հայտարարել է, որ հնարավոր է Թբիլիսիում հայ-ադրբեջանական հարաբերությունների կարգավորման շուրջ հանդիպումներ անցկացնել: Այս մասին հաղորդում է ՌԻԱ Նովոստին:Նշենք, որ ավելի վաղ հաղորդվել էր, որ Թբիլիսիում մեկնարկել է Վրաստանի վարչապետ Իրակլի Ղարիբաշվիլիի և Ադրբեջանի նախագահի դեմ առ դեմ հանդիպումը:Հայտնի է, որ Ալիևը Վրաստան է մեկնել աշխատանքային այցով՝ Ղարիբաշվիլիի հրավերով:

14:48 - 08 հոկտեմբերի, 2023

Թբիլիսիում մեկնարկել է Ղարիբաշվիլիի և Ալիևի դեմ առ դեմ հանդիպումը

Վրաստանում մեկնարկել է Ադրբեջանի նախագահ Իլհամ Ալիևի և Վրաստանի վարչապետ Իրակլի Ղարիբաշվիլիի հանդիպումը։ Այս մասին հայտնում է Վրաստանում գտնվող APA-ի թղթակիցը։ Հիշեցնենք, որ Ալիևը Վրաստան է ժամանել այսօր առավոտյան՝ Ղարիբաշվիլիի հրավերով։

14:10 - 08 հոկտեմբերի, 2023

Իլհամ Ալիևը ժամանել է Վրաստան |hetq.am|

hetq.am: Հոկտեմբերի 8-ին Վրաստանի վարչապետ Իրակլի Ղարիբաշվիլիի հրավերով Ադրբեջանի նախագահ Իլհամ Ալիևը աշխատանքային այցով ժամանել է Վրաստան։ Այդ մասին հայտնում է ադրբեջանական APA գործակալությունը։ Շոթա Ռուսթավելիի անվան Թբիլիսիի միջազգային օդանավակայանում Ալիևի պատվին տեղի է ունեցել դիմավորման հանդիսավոր արարողություն։ Ադրբեջանի նախագահին դիմավորել է Վրաստանի փոխվարչապետ, էկոնոմիկայի և կայուն զարգացման նախարար Լևան Դավիթաշվիլին և պաշտոնատար այլ անձինք։ Օդանավակայանից Ալիևը մեկնել է Վրաստանի վարչապետի հետ հանդիպման։

12:51 - 08 հոկտեմբերի, 2023

Վրաստանը պատրաստ է աշխատել Ադրբեջանի և Հայաստանի հետ՝ Հարավային Կովկասում խաղաղություն ապահովելու համար. Ղարիբաշվիլի |1lurer.am|

1lurer.am: Վրաստանի վարչապետ Իրակլի Ղարիբաշվիլին ՄԱԿ-ի Գլխավոր ասամբլեայի 78-րդ նստաշրջանում ունեցած ելույթի ժամանակ նշել է, որ Վրաստանը պատրաստ է աշխատել Ադրբեջանի և Հայաստանի հետ՝ Հարավային Կովկասում մշտական խաղաղություն ապահովելու համար: «Մեր կառավարության հիմնարար սկզբունքն է խուսափել պատերազմից և պահպանել խաղաղություն։ Չնայած մեր աշխարհագրական դիրքի առաջացրած դժվարություններին՝ մեզ հաջողվել է ոչ միայն աջակցել Ուկրաինային և միջազգային հանրությանը մեր հավասարակշռված քաղաքականությամբ և մեր գործընկերների հետ սերտ համակարգմամբ, այլև պահպանել մեր ժողովրդի անվտանգությունը։ Մեր կառավարության կողմից առաջ է քաշվել «խաղաղ հարևանության նախաձեռնությունը»։ Մենք պատրաստ ենք աշխատել Հայաստանի և Ադրբեջանի մեր հարևանների և բարեկամների հետ, որպեսզի վերջապես մշտական խաղաղություն բերենք Հարավային Կովկաս»,- ասել Է Ղարիբաշվիլին։

13:02 - 23 սեպտեմբերի, 2023

Էրդողանն ու Ղարիբաշվիլին Նյու Յորքում քննարկել են Բաքու-Թբիլիսի-Կարս երկաթուղու գործարկման, «Միջին միջանցքի» հարցեր |azatutyun.am|

azatutyun.am: Նյու Յորքում գտնվող Թուրքիայի նախագահ Ռեջեփ Էրդողանը երեկ ընդունել է Վրաստանի վարչապետ Իրակլի Ղարիբաշվիլիին։ Ըստ Անկարայի՝ Էրդողանը կարևորել է Բաքու-Թբիլիսի-Կարս երկաթուղու արագ գործարկումը՝ որպես առանցքային առաջնահերթություն։ Կողմերը քննարկել են նաև «Միջին միջանցքի» իրականացման կարևորությունը: «Միջին միջանցքը» տրանսպորտային ուղի է, որը Չինաստանից՝ Ղազախստանով, Կասպից ծովով, Ադրբեջանով, Վրաստանով պետք է հասնի Թուրքիա ու այնտեղից էլ Եվրոպա: Ըստ Անկարայի՝ սա «Մետաքսի ճանապարհի» վերականգնմանն ուղղված ջանքերի կարևորագույն բաղադրիչներից է։

11:11 - 18 սեպտեմբերի, 2023

Վրաստանի վարչապետը հայտարարել է երկրի տարածքային ամբողջականության խաղաղ վերականգնմանն իր հավատարմության մասին |factor.am|

factor.am: Վրաստանի կառավարությունը հավատարիմ է մնում «երկրի տարածքային ամբողջականության վերականգնման և միավորման խաղաղ ճանապարհին»։ Հարավային Օսիայում ռազմական գործողությունների բռնկման 15-ամյակի կապակցությամբ այս մասին հայտարարել է վարչապետ Իրակլի Ղարիբաշվիլին, գրում է Սպուտնիկի վրացական ծառայությունը։ Նա նշել է, որ 2008 թվականի օգոստոսին «ռուսական ռազմական ագրեսիան հանգեցրեց մարդկային զանգվածային զոհերի», ինչպես նաև «մեր տարածքների ժամանակավոր օկուպացմանը, որը շարունակում է լուրջ մարտահրավեր մնալ երկրի ինքնիշխանությանն ու զարգացմանը»։ «Մեզ առաջնորդում է այն անսասան համոզմունքը, որ խաղաղ, միասնական, ուժեղ, զարգացած Վրաստանը լավագույն հեռանկարն է վրացիների, օսերի, աբխազների, մեր հողի վրա ապրող բոլոր մարդկանց համար, և մենք ամեն ինչ անում ենք, որպեսզի այդ նպատակն իրականություն դառնա որքան հնարավոր է՝ շուտ»,- գրել է Ղարիբաշվիլին Facebook-ում։ Հիշեցնենք, որ 2008 թվականի օգոստոսի 7-ի լույս 8-ի գիշերը վրաց-օսական հակամարտությունը սրվեց, ինչը հանգեցրեց ռազմական գործողությունների՝ Ռուսաստանի մասնակցությամբ։ ՌԴ-ն Վրաստանի դեմ ռազմական գործողություն իրականացրեց, որը տևեց հինգ օր։ Նույն ամսվա վերջին Ռուսաստանի Դաշնությունը ճանաչեց Աբխազիայի և Հարավային Օսիայի անկախությունը։ Ի պատասխան՝ Թբիլիսին խզեց դիվանագիտական հարաբերությունները Մոսկվայի հետ և օրենսդրական մակարդակով հակամարտությունների գոտիները հայտարարեց օկուպացված տարածքներ։

16:47 - 08 օգոստոսի, 2023

Միրզոյանը Վրաստանի իր գործընկերոջը առաջարկել է Հայաստանի կառավարության աջակցությունն աղետի հետևանքների վերացման հարցում

Օգոստոսի 4-ին ՀՀ արտաքին գործերի նախարար Արարատ Միրզոյանը հեռախոսազրույց է ունեցել Վրաստանի արտաքին գործերի նախարար Իլյա Դարչիաշվիլիի հետ։ Արարատ Միրզոյանը ևս մեկ անգամ ցավակցություն է հայտնել իր գործընկերոջը, Վրաստանի կառավարությանն ու բարեկամ վրաց ժողովրդին Ռաճայի շրջանում սողանքների հետևանքով մարդկային զոհերի կապակցությամբ: Նախարար Միրզոյանն առաջարկել է Հայաստանի կառավարության աջակցությունն աղետի դեմ պայքարի և դրա հետևանքների վերացման հարցում:

21:36 - 04 օգոստոսի, 2023

Վրաստանում սողանքի հետևանքով զոհերի թիվը հասել է 6-ի․ օգոստոսի 7-ը հայտարարվել է սգո օր |armenpress.am|

armenpress.am: Փրկարարները Ռաչայի բարձրլեռնային երկրամասում գտնվող Շովի առողջարանում սողանքից հետո հայտնաբերել են ևս չորս զոհի մարմին։ Sputnik գործակալության վրացական ծառայությունը տեղեկացնում է, որ արդեն հաջողվել է տարհանել 210 մարդու։ Նշենք, որ օգոստոսի 3-ի ցերեկը Շովիում տեղի ունեցած սողանքի հետևանքով զոհվել է 2 մարդ։ Քանդվել են կամուրջներ, վնասվել է Շովի տանող ճանապարհի մուտքը, զբոսաշրջային քոթեջներ և «Սանսեթ Շովի» հյուրանոցը։ Sputnik-ը հավելում է, որ փրկարարներն ու ոստիկանությունը գտնվում են տարերային աղետի վայրում ՆԳՆ սահմանապահ ոստիկանության ուղղաթիռներով՝ մարդկանց տարհանելու համար։ Շարունակվում են 31 հոգու որոնումները, որոնք գտնվում են տարերային աղետի գոտում, և որոնց հետ առայժմ չի հաջողվում կապ հաստատել: Վրաստանի վարչապետ Իրակլի Ղարիբաշվիլին հայտարարել է, որ օգոստոսի 7-ը կլինի սգո օր։

14:39 - 04 օգոստոսի, 2023

Շուրջ 50 եվրախորհրդարանականներ Վրաստանի իշխանություններին կոչ են անում Սաակաշվիլիին բուժման նպատակով տեղափոխել Եվրոպա |aliq.ge|

aliq.ge: Շուրջ 50 եվրախորհրդարանականներ Վրաստանի իշխանություններին կոչ են անում երրորդ նախագահ, այժմ անազատության մեջ գտնվող Միխեիլ Սաակաշվիլիին բուժման նպատակով տեղափոխել Եվրոպա։ Նամակի հասցեատերերն են Վրաստանի նախագահ Սալոմե Զուրաբիշվիլին, վարչապետ Իրակլի Ղարիբաշվիլին և խորհրդարանի նախագահ Շալվա Պապուաշվիլին։ ԵԽ պատգամավորները շեշտել են, որ իրենց խիստ անհանգստացնում է Սաակաշվիլիի արտաքինը: Նրանց կարծիքով, այս պատկերը յուրօրինակ կերպով արտացոլում է Սաակաշվիլիի առողջության արագ ու կտրուկ վատթարացումը։ Դա, ըստ նրանց, խոսում է այն մասին, որ ներկայիս բժշկական միջամտությունները չեն ապահովում և չեն օգնում նրա արագ ապաքինմանը։ Ուստի նրանք կարծում են, որ իրավիճակի շտկման հրատապ միջոցառումներն ընդունելի են, քանի դեռ իրավիճակը կրիտիկական կետի չի հասել։ Շարունակությունը՝ սկզբնաղբյուր կայքում

13:53 - 15 հուլիսի, 2023