ՀՀ կառավարություն

Կառավարությունը գործադիր իշխանության բարձրագույն մարմինն է: Կառավարությունն իր ծրագրի հիման վրա մշակում եւ իրականացնում է պետության ներքին եւ արտաքին քաղաքականությունը, իրականացնում է պետական կառավարման համակարգի մարմինների ընդհանուր ղեկավարումը: Կառավարության լիազորությունները սահմանվում են Սահմանադրությամբ եւ օրենքներով: Կառավարության իրավասությանն են ենթակա գործադիր իշխանությանը վերաբերող բոլոր այն հարցերը, որոնք վերապահված չեն պետական կառավարման կամ տեղական ինքնակառավարման այլ մարմինների: Կառավարությունը կազմված է վարչապետից, փոխվարչապետներից եւ նախարարներից:

Հանրապետության նախագահը վարչապետ է նշանակում խորհրդարանական մեծամասնության ընտրած թեկնածուին, իսկ փոխվարչապետները եւ նախարարները նշանակվում են Հանրապետության նախագահի կողմից՝ վարչապետի առաջարկությամբ: Այժմ գործում է Նիկոլ Փաշինյանի գլխավորած կառավարությունը։

Խոշորածավալ վատնումներ և պաշտոնեական լիազորությունների չարաշահում՝ 2016թ. այլ պետության ղեկավարի այցի կազմակերպման գործընթացում

ՀՀ կրթության, գիտության, մշակույթի և սպորտի նախարարությունից ստացված գրության առթիվ ՀՀ գլխավոր դատախազության պետական շահերի պաշտպանության վարչությունում պետության պաշտպանության հայց հարուցելու հարցի քննարկման նպատակով լայնածավալ ուսումնասիրության է ենթարկվել 2016թ. այլ պետության ղեկավարի այցի կազմակերպման ծախսերի հիմնավորվածությունն ու օրինականությունը: Ուսումնասիրության լիարժեքությունն ապահովելու նպատակով փաստաթղթեր, տեղեկատվություն է պահանջվել և ստացվել նաև ՀՀ ֆինանսների նախարարությունից, ՀՀ կառավարության աշխատակազմից, ՀՀ Հանրային հեռուստառադիոընկերության խորհրդից, ՀՀ պետական եկամուտների կոմիտեից և ՀՀ ոստիկանությունից: Ուսումնասիրության արդյունքում պարզվել է, որ ՀՀ կառավարության 09.06.2016թ. գաղտնի որոշմամբ այլ պետության ղեկավարի այցը պատշաճ կազմակերպելու նպատակով ՍՊԸ-ին նվիրաբերություն տրամադրելու համար ՀՀ մշակույթի նախարարությանը Կառավարության պահուստային ֆոնդից հատկացվել է 576 մլն. դրամ, որը նախարարի գաղտնի հրամանով տրվել է ընկերությանը, կնքվել նվիրաբերության պայմանագիր: Թեև պայմանագրով սահմանված է եղել, որ նվիրառուին հատկացվող գումարը ներառում է հարկերը, տուրքերը և պարտադիր այլ վճարները, այնուամենայնիվ, ՀՀ կառավարության գաղտնի որոշման հիման վրա ՀՀ մշակույթի նախարարի գաղտնի հրամանով ընկերությանը հարկային պարտավորություններ կատարելու՝ ընկերության կողմից ներկայացված պատճառաբանությամբ փոխանցվել է ևս մոտ 60.2 մլն ՀՀ դրամ։ Մինչդեռ ըստ ՀՀ ֆինանսների նախարարությունից ստացված տվյալների՝ ընկերության կողմից կազմված փաստաթղթերում ծախսերի նկատմամբ արդեն իսկ կիրառվել է 10 տոկոս ավելացումներ, այսինքն նշված նպատակով լրացուցիչ գումարների տրամադրումը հիմնավորված չի եղել: Պարզվել է նաև, որ ընկերությանը հատկացված գումարի շրջանակներում ապրանքների, աշխատանքների և ծառայությունների ձեռքբերումները պետք է իրականացվեր «Գնումների մասին» ՀՀ օրենքով նախատեսված բանակցային ընթացակարգով՝ առանց գնումների հայտարարությունը նախապես հրապարակելու: Սակայն չեն ներկայացվել բանակցային ընթացակարգի կիրառմանն առնչվող՝ գնային առաջարկների, որակավորման հիմնավորումների, ձեռբերվող ապրանքի անվանման և տեխնիկական բնութագրերի, հայտերի ապահովման վերաբերյալ և այլ փաստաթղթերը: Չեն ներկայացվել տվյալներ այցի ընթացքում պատվիրակության կազմում ընդգրկված անձանց, նրանց քանակի, ժամկետների, օրերի, անհրաժեշտություն համարվող ծախսերի վերաբերյալ: Ընկերության կողմից որպես հաշվետվություն ներկայացված պայմանագրերի ուսումնասիրությամբ պարզվել է, որ մի շարք դեպքերում պայմանագրերի գները էականորեն բարձր են շուկայական գներից, ձեռք են բերվել կամ վարձակալվել գույք, աշխատանքներ կամ ծառայություններ, որոնց անհրաժեշտությունը կամ գնագոյացումը չի հիմնավորվել, պարզ չէ՝ ինչպես է հետագայում տնօրինվել պետական բյուջեի միջոցներով ձեռքբերված գույքը։ Օրինակ ուկրաինական երեք տարբեր ընկերությունների հետ կնքվել են Երևանում, Գյումրիում և Վաղարշապատում 2 շարժական հեռուստատեսային կայանների ծառայությունների, 1 տելեսկոպիկ օպերատորի կռունկների տեխնիկական ծառայությունների ձեռքբերման մասին պայմանագրեր՝ ընդհանուր շուրջ 171 մլն ՀՀ դրամ արժեքով։ Մինչդեռ ըստ ՀՀ ՀՀՌԽ-ից ստացված տվյալների՝ ռուսաստանյան ընկերության կողմից մեկ այլ առիթով 2018թ. արվել է գնային առաջարկ՝ որով նմանատիպ շարժական հեռուստակայանի ծառայություններն առաջարկվել են 1 միավորը շուրջ կրկնակի պակաս գնով։ Կամ՝ ընդհանուր 16.3մլն դրամ արժեքով ձեռք է բերվել կարմիր գորգ, շապիկ, անձրևանոց, պոլիեթիլենային թաղանթ, սակայն որևէ տեղեկատվություն չկա, թե ինչպես են օգտագործվել կամ ում են հանձնվել ձեռքբերված ապրանքները։ Կատարվել են 22 մլն դրամի արգելապատնեշների պատրաստման աշխատանքներ, սակայն պայմանագրում դրա տեխնիկական բնութագրի, չափի, ձևի, նյութի մասին որևէ նշում չկա։ Այլ ընկերության հետ ՍՊԸ-ն կնքել է թարգմանչական ծառայությունների կազմակերպման աշխատանքներ՝ ընդհանուր մոտ 6մլն դրամ արժեքով, սակայն պարզվել է, որ նշված երկու ընկերություններն էլ այդ ժամանակահատվածում գրանցված են եղել Եղեգնաձոր քաղաքի նույն հասցեում, իսկ որպես թարգմանչական ծառայություններ մատուցող ներկայացված ընկերությունը 2016թ.-ի մայիսից մինչև 2017թ.-ի մարտ, այսինքն վերոնշյալ այցի ընթացքում, չի ունեցել ոչ մի գրանցված աշխատակից, իսկ որպես այդ ընկերության տնօրեն հանդես եկած և պայմանագիրն ու կատարողական ակտը ստորագրած անձը ՀՀ ՊԵԿ տվյալներով որպես տնօրեն աշխատել է միայն 2018թ. դեկտեմբեր ամսից։ Պարզվել է, որ այլ ընկերության հետ կնքված պայմանագրով 17.06.2016թ.-28.06.2016թ. ընթացքում 5 տարբեր մակնիշի ավտոմեքենաներով կատարվել են ուղևորափոխադրումներ, մինչդեռ ՀՀ ՊԵԿ-ից ստացված տվյալներով ծառայությունները, իբր, մատուցած ընկերությունը 2016-2017թթ., բացի տնօրենից, որևէ գրանցված աշխատակից չի ունեցել։ ՍՊԸ-ի կողմից նաև ներկայացվել են ֆինանսական համակարգման, ֆինանսական խորհրդատվության, վերահսկման ծառայությունների, փաստաբանական ծառայությունների ծախսեր, որոնց կապը նշված այցի հետ որևէ հիմնավորում չունի: Ուսումնասիրությամբ պարզվել է, որ ՀՀ մշակույթի նախարարի կողմից ՀՀ կառավարությանը ներկայացված՝ ՍՊԸ-ին գումարներ հատկացնելու վերաբերյալ ՀՀ կառավարության վերոնշյալ գաղտնի որոշումների նախագծերի փաթեթում ծախսերի բնույթի, անհրաժեշտության և չափի վերաբերյալ որևէ հիմնավորում չի եղել, և նշվել է միայն «այցը պատշաճ կազմակերպելու նպատակով» արտահայտությունը։ Այսպիսով, ուսումնասիրությամբ ձեռք են բերվել տվյալներ՝ 2016թ.-ին ՀՀ մշակույթի նախարարության պատասխանատու պաշտոնատար անձանց կողմից առերևույթ Կառավարությանն անարժանահավատ տվյալներ ներկայացնելու, դրա հետևանքով պետական բյուջեի միջոցներց ընկերությանն անհիմն 60.2 մլն դրամ հատկացնելով պետության համար ծանր հետևանքներ առաջացնելու, պաշտոնեական դիրքն օգտագործելով առանձնապես խոշոր չափերով՝ շուրջ 110.3 մլն դրամի անարժանահավատ ծախսեր՝ վատնում կատարելու վերաբերյալ։ Նկատի ունենալով վերանշյալը՝ ՀՀ գլխավոր դատախազության պետական շահերի պաշտպանության վարչությունում ՀՀ քրեական օրենսգրքի 179-րդ հոդվածի 2-րդ մասի 1-ին կետի, նույն հոդվածի 3-րդ մասի 1-ին կետի և 308-րդ հոդվածի 2-րդ մասի հատկանիշներով հարուցվել է քրեական գործ: Նախաքննությունը հանձնարարվել է ՀՀ քննչական կոմիտեին: Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

14:37 - 11 մարտի, 2020

Կհստակեցվի բժշկասոցիալական փորձաքննության գործընթացը

Տեղի է ունեցել ՀՀ կառավարության հերթական նիստը, որը վարել է ՀՀ վարչապետ Նիկոլ Փաշինյանը: Նախքան օրակարգային հարցերի քննարկումը վարչապետն Առողջապահության նախարար Արսեն Թորոսյանից հետաքրքրվել է կորոնավիրուսի դեմ տարվող պայքարի շրջանակում ձեռնարկվող միջոցառումների ընթացքից: Արսեն Թորոսյանը տեղեկացրել է, որ բոլոր միջոցառումները շարունակում են իրականացվել: «Ունենք մեկ հաստատված դեպք, որը գտնվում է «Նորք» ինֆեկցիոն հիվանդանոցում, և 31 քաղաքացիներ, որոնք հատուկ մեկուսացված պայմաններում գտնվում են Ծաղկաձորում: Բոլորի ինքնազգացողությունը և առողջությունը լավ է: Որևէ մեկը գանգատ չունի, այդ թվում՝ հաստատված պացիենտը: Երեկ հետազոտել ենք նրա կնոջը, որի մոտ հերքվել է հիվանդության առկայությունը»,- ասել է նախարարը՝ հավելելով, որ ամեն օր կատարվում են նմուշառումներ և իրավիճակը վերահսկվում է: Արսեն Թորոսյանը նշել է նաև, որ Ծաղկաձորում կարանտինի մեջ գտնվող քաղաքացիներն ապահովված են անհրաժեշտ ամեն ինչով՝ սննդով, գրքերով, ինտերնետով և այլն: Նախարարի խոսքով՝ այս պահին մեկուսացված քաղաքացիներից ոչ մեկի մոտ ոչ մի ախտանշան չկա: Արսեն Թորոսյանը տեղեկատվություն է ներկայացրել նաև աշխարհում կորոնավիրուսի տարածության, զարգացման միտումների մասին: «Չինաստանը, լինելով հիվանդության աղբյուրը, ամենաառաջինն էր սկսել միջոցառումները, նոր դեպքերի գրանցման և նոր մահերի տեմպը կտրուկ անկում է ապրել: Մեր տեղեկություններով արդեն նույնիսկ այն նահանգը, որում սահմանափակման միջոցառումներ են իրականացրել, աստիճանաբար վերադառնում է իր բնականոն կյանքին: Սակայն աշխարհի այլ երկրներում է իրավիճակը մի քիչ ավելի բարդանում. Հարավային Կորեայում, մեր հարևան Իրանում, ինչպես նաև Իտալիայում:Արդեն մի քանի հարյուր դեպքեր են արձանագրել Ֆրանսիայում, Գերմանիայում և Իսպանիայում: Ես իմ գործընկերների հետ ամենօրյա կապի մեջ եմ և ակնկալվում է, որ երկու-երեք շաբաթից հետո, եթե իմ նշած եվրոպական երկրները կարողանան ճիշտ միջոցառումներն իրականացնել, այդ ռիսկն անցնելուց հետո նորից նվազում կտեսնենք նաև այդ երկրներում: Հաշվի առնելով այս վիճակագրությունը՝ կարծում եմ, որ մենք էլ 2-3 շաբաթ հետո մեր բոլոր սահմանափակող միջոցառումներին կանդրադառնանք, այդ թվում՝ Չինաստանի հետ»,-նշել է նախարարը: Արտաքին գործերի նախարար Զոհրաբ Մնացականյանն էլ նշել է, որ Իրանի հետ ձևավորվել է երկխոսություն տարբեր մակարդակներով և աշխատանքներ են տարվում՝ իրավիճակին միասին հակազդելու համար: Կրթության, գիտության, մշակույթի և սպորտի նախարար Արայիկ Հարությունյանն էլ տեղեկացրել է, որ հավանաբար երկուշաբթի օրվանից` մարտի 9-ից, դասերն ուսումնական հաստատություններում կվերսկսվեն: «Ամենօրյա կապի մեջ ենք Առողջապահության նախարարության հետ: Այս պահին, ըստ էության, հատուկ ցուցումներ չունենք՝ դասերը չվերսկսելու համար: Եթե առաջիկա օրերին ևս ցուցում չունենանք, երկուշաբթիից դասերը կվերսկսենք»,- նշել է նախարարը: Այնուհետև Նիկոլ Փաշինյանը Էկոնոմիկայի նախաար Տիգրան Խաչատրյանից հետաքրքվել է հայ-վրացական սահմանի մոտ կուտակված բեռնատար ավտոմեքենաների հարցից: Նախարարը տեղեկացրել է, որ մարտի 5-ին՝ մինչև օրվա ավարտը, այդ բեռնատարները կհատեն սահմանը: Տարածքային կառավարման և ենթակառուցվածքների նախարար Սուրեն Պապիկյանը, անդրադառնալով բիտումի որոշակի քանակ ներկրելու անհրաժեշտությանը, առաջարկել է այդ հարցը փոխվարչապետներից մեկի մոտ քննարկման առարկա դարձնել: Անդրադառնալով հարցին՝ կառավարության ղեկավարը նշել է. «Շատ լավ: Կարծեմ՝ բիտումի որակի հետ կապված էլ խնդիր ունեինք: Պետք է առիթն օգտագործել, որ մեր շուկայում ճանապարհաշինարարական աշխատանքներում ավելի որակյալ բիտում օգտագործվի, մեր շուկաներն այդ առումով նույնպես դիվերսիֆիկացնենք, որպեսզի ճանապարհաշինության որակի վրա դրական ազդեցություն ունենա»: Այնուհետև վարչապետը հետաքրքրվել է ճանապարհաշինական ծրագրերի ընթացքից: Սուրեն Պապիկյանը տեղեկացրել է, որ այս տարի պետական բյուջեով նախատեսված հիմնանորոգման ծրագրերից 244 կմ-ից 228-ն արդեն իսկ հայտարարված է: Ավելի լավ պայմաններ՝ նոր կարգավորմամբ. ՀՀ մշտական բնակության եկողներն առանց մաքսատուրքի ավելի շատ անձնական գույք կկարողանան բերել Կառավարությունն առաջարկություններ է ներկայացրել «Մաքսային կարգավորման մասին» ՀՀ օրենքում փոփոխություններ և լրացումներ կատարելու մասին» ՀՀ օրենքի նախագծի վերաբերյալ: Գործադիրի առաջարկությունների հիման օրինագիծը լրամշակվել է: Ըստ այդմ՝ ավելի լավ պայմաններ են նախատեսվում Հայաստան վերադարձող քաղաքացիների համար՝ անձնական գույքն առանց մաքսային վճարումներ կատարելու երկիր բերելու դեպքում։Ինչպես նշել է ՊԵԿ նախագահ Դավիթ Անանյանը, գործող օրենսդրությամբ, հիմնական խոչընդոտն այն է, որ անձը արտոնությունից կարող էր օգտվել այն դեպքում, եթե վերջին 5 տարում՝ յուրաքանչյուր տարվա ընթացքում 180 և ավելի օր պետք է ՀՀ-ում գտնված չլիներ: Փոփոխությամբ առաջարկվում է այդ պահանջը ձևակերպել այսպես՝ 5 տարի (1825 օր) ժամանակահատվածում առնվազն 915 օր բացակայել է Հայաստանի Հանրապետությունից: Բացի այդ, ՀՀ մշտական բնակության տեղափոխվող ճանաչված կամ փախստականի, հարկադիր տեղահանվածի կարգավիճակ ստացած օտարերկրյա ֆիզիկական անձիք կարող են արտոնությամբ ՀՀ ներմուծել իրենց անձնական օգտագործման ապրանքները, եթե ՀՀ մաքսային մարմիններ են ներկայացնում համապատասխան կարգավիճակը հաստատող փաստաթուղթ: Նախորդ բնակության երկրից Միության մաքսային տարածք ներմուծումն իրականացվում է 18 ամսվա ընթացքում: Դավիթ Անանյանը տեղեկացրել է, որ անձը սկզբում պետք է Հայաստան գա առանց ապրանքների և մաքսային մարմիններին տեղեկացնի, որ 60 օրվա ընթացքում դիմելու է Անձնագրային և վիզաների վարչություն՝ որևէ կարգավիճակ ստանալու համար: Ըստ ՊԵԿ նախագահի՝ անձը կարգավիճակը ստանալուց հետո նոր պետք է բերի իր գույքը: Տարբեր ապարատներով ծառայությունների մատուցումը գերատեսչություններում կազմակերպել մրցույթներով. վարչապետն անդրադարձել է նախկինում տրված հանձնարարականների կատարման ընթացքին Կառավարության այսօրվա նիստում Նիկոլ Փաշինյանն անդրադարձել է նաև նախկինում իր կողմից տրված հանձնարարականների կատարման ընթացքին, մասնավորապես՝ գերատեսչություններում տեղադրվող վճարումների, սուրճի ապարատների վերաբերյալ: «Ես հանձնարարարական էի տվել, որ այդ գործառույթներն իրականացվեն մրցույթներով: Այսինքն՝ ուղիղ որոշումներով նման հարցերը չկարգավորվեն, նույնիսկ այն դեպքում, երբ արդեն տեղադրված է: Բոլոր դեպքերում պետք է մրցույթ հայտարարվի, որպեսզի պետական գերատեսչության համար լավագույն պայմաններով դա կատարվի: Բայց ես տեղեկանում եմ, որ այդ հանձնարարականից հետո, կարծես թե, դեպք ենք ունեցել, երբ որոշում ենք կայացրել և ուղիղ գնում ենք այդ ծառայությունը կատարելուն: Ընդ որում, որքան ես հասկանում եմ, այդ ապարատները տեղադրելու համար պետությանը ոչ մի վճարում չի կատարվում: Ես կարծում եմ, որ այնուամենայնիվ տեխնիկական առաջադրանքներով, մենք պետք է փորձենք մրցույթ հայտարարել և վարձավճար վերցնել դրա համար: Մի հատ տեսնենք՝ այդ տարբերակով հետաքրքրվող կան, թե ոչ»,-ասել է կառավարության ղեկավարը և հիշեցրել, որ թեմայի վերաբերյալ հանձնարարականներ է տվել 2018 թվականի հուլիս-օգոստոսից, սակայն հարցն այսօր կարգավորված չէ։ Այնուհետև վարչապետը մեկ անգամ ևս հանձնարարել է՝ բոլոր այն գերատեսչություններում, որտեղ տեղադրված են սուրճի, վճարումների ապարատներ, բոլոր այդ ծառայությունների համար հնարավորինս ամենակարճ ժամկետում հայտարարել մրցույթ: Նիկոլ Փաշինյանն անդրադարձել է նաև բանկերում հերթ կանգնելու խնդրին՝ նշելով, որ բանկերում հերթ կանգնելու մշակույթ պետք է ապահովել: Այդ համատեքստում ընդգծվել է նաև նոր տեխնոլոգիաների կիրառման, մասնավորապես՝ հեռախոսներով օնլայն վճարումներ կատարելու կարևորությունը։ «Մենք այսօր ունենք բազմաթիվ օնլայն հարթակներ, որոնք կարելի է օգտագործել, բայց ցանկացած հարթակ, որ լինում է՝ պետք է դրա մասին մարդիկ տեղյակ լինեն: Իսկ տեղեկացնելն առաջին հերթին այդ հարթակները ստեղծող մարմինների, սուբյեկտների պարտականությունն է, այսինքն՝ ամբողջ կառավարության», -ասել է գործադիրի ղեկավարը և հանձնարարել պատասխանատու գերատեսչություններին՝ սկսել իրազեկման լայնածավալ արշավներ և տեղեկացնել քաղաքացիներին ժամանակակից այդ համակարգերի մասին: Սահմանվել են շարժական և մոդուլային սպանդանոցներին ներկայացվող պահանջները Շարժական և մոդուլային սպանդանոցներին ներկայացվող պահանջների սահմանման անհրաժեշտությամբ պայմանավորված՝ կառավարությունը փոփոխություն և լրացումներ է կատարել նախկինում ընդունած որոշումներից մեկում: Արդյունքում՝ հնարավոր կլինի հանրապետությունում շահագործել օրենսդրության պահանջներին համապատասխան շարժական և մոդուլային սպանդանոցներ: Հիմնավորման համաձայն՝ ներկա պահին օրենսդրությամբ սահմանված են միայն առանձին շինության, շինությունների համալիրի տեսքով կամ մսի կոմբինատների, սառցային կոմբինատների և կենդանական ծագման մթերք արտադրող, վերամշակող կազմակերպությունների կազմում գործող սպանդանոցներին ներկայացվող պահանջները։ Մինչդեռ առկա են համապատասխան տեխնոլոգիապես հագեցված, շահագործմանը պատրաստ շարժական և մոդուլային տարբերակները, որոնք փոխադրելի են։ Շարժական և մոդուլային սպանդանոցների առկայությունը հնարավորություն կտա հանրապետությունում առավել արդյունավետորեն կազմակերպել կենդանիների սպանդանոցային մորթը։ Անդրադառնալով ընդունված որոշմանը՝ վարչապետ Փաշինյանը հիշեցրել է, որ պայմանավորվածության համաձայն հուլիսի 1-ի դրությամբ պետք է լինի մաքսիմալ հասանելի ցանց, այդ թվում շարժական, մոդուլային սպանդանոցների: Կոնյակի սպիրտների և կոնյակների գծով առաջացող բնական կորուստների չափերը կտարածվեն նաև մրգային օղիների արտադրության վրա Խաղողի, մեղրի, պտուղների և հատապտուղների թորվածքների և օղիների արտադրության ոլորտներում հարկման բազայի որոշման նպատակով համախառն եկամտից նվազեցվող գույքի բնական կորուստների չափերը սահմանելու անհրաժեշտությամբ պայմանավորված՝ գործադիրն ընդունել է որոշում: Ըստ այդմ առաջարկվում է հարկման բազայի որոշման նպատակով համախառն եկամտից նվազեցվող կոնյակի սպիրտների և կոնյակների գծով առաջացող բնական կորուստների չափերը տարածել նաև մրգային օղիների արտադրության վրա։ Արդյունքում՝ կսահմանվեն այդ արտադրության ժամանակ առաջացող բնական կորուստների չափեր, ինչը հնարավորություն կտա նվազեցնելու ոլորտի տնտեսավարողներին համախառն եկամտից արտադրության ընթացքում առաջացող բնական կորուստները։ Ըստ հիմնավորման՝ այդ հարցում աջակցելու խնդրանքով ՀՀ էկոնոմիկայի նախարարություն են դիմել ոլորտի մի շարք տնտեսավարողներ։ Կառավարությունը միջոցառումներ կիրականացնի դեռահասների ու երիտասարդ անձանց վերարտադրողական առողջությունը բարելավելու ուղղությամբ Գործադիրը հաստատել է Առողջապահական գործոնով պայմանավորված ծնելիության բարելավման ծրագիրը և ծրագրի կատարումն ապահովող 2020-2023 թթ. միջոցառումները: Փաստաթղթի մշակման համար հիմք են հանդիսացել վերջին տարիների, ծնելիության, բնական աճի, վերարտադրողական առողջությանը վերաբերող պաշտոնական և այլընտրանքային հետազոտության տվյալները, համաձայն որի Հայաստանում առկա է ժողովրդագրական ցուցանիշների վատթարացում և ստեղծվել է անբարենպաստ ժողովրդագրական իրավիճակ, մասնավորապես առկա է ծնելիության ցածր, անգամ պարզ վերարտադրություն չապահովող մակարդակ: Ծնելիության գումարային գործակցը 2018թ. կազմել է 1.57, մինչդեռ պարզ վերարտադրության համար գործակիցը պետք է լինի 2,1 և ավելի:Ըստ այդմ՝ առաջարկվում է օրենսդրորեն ամրագրել բնակչության որոշ խմբերի սկրինինգներում ներգրավման, վերարտադրողական խանգարումների վաղ հայտնաբերման ու բուժման նպատակով կիրառվող պետության կողմից երաշխավորված ծառայությունների տրամադրման կարգն ու պայմանները: Արդյունքում ակնկալվում է բարելավել դեռահասների ու երիտասարդ անձանց վերարտադրողական առողջությունը, կանխարգելել վերարտադրողական և պերինատալ կորուստները: Այլ որոշումներ. կհստակցեվի բժշկասոցիալական փորձաքննության գործընթացը Կառավարությունը փոփոխություններ և լրացումներ է կատարել նախկինում ընդունած որոշումներից մեկում՝ բժշկասոցիալական փորձաքննության գործընթացը հստակեցնելու և առավել օբյեկտիվ ու միասնական որոշումներ կայացնելու նպատակով: Հիմնավորման համաձայն՝ որոշմամբ հաստատված բժշկասոցիալական փորձաքննության չափորոշիչներով սահմանված են համապատասխան ցանկեր, որոնց դեպքում 2 կամ 4 տարի դիտման պայմաններում հաշմանդամության խմբերը սահմանվում են անժամկետ, իսկ «հաշմանդամ երեխա» կարգավիճակը՝ մինչև 18 տարին լրանալը:Սակայն այդ ցանկերով սահմանված հիվանդությունները և ախտաբանական վիճակները հաճախ չեն համապատասխանում երեխաների տարիքային առանձնահատկություններին: Ըստ այդմ, հաշվի առնելով երեխաների զարգացման առանձնահատկությունները, առաջարկվում է սահմանել ցանկեր, որոնց դեպքում մինչև 18 տարեկան երեխաների հաշմանդամությունը կսահմանվի հստակ ժամկետներով: Ցանկերը սահմանելիս հաշվի են առնվել մի շարք գործոններ՝ հիվանդությունների զարգացման ընթացքը, երեխաների տարիքային առանձնահատկությունները, ժամանակակից բժշկության նվաճումները և այլն: Կառավարությունը բավարարել է «Լոմո գրուպ» ՓԲԸ ներկայացրած հայտը՝ «ԷԿՈՍ» ազատ տնտեսական գոտու շահագործողների ռեեստրում ներառվելու վերաբերյալ: Ընկերությունը նախատեսում է գործունեություն ծավալել բարձր և տեղեկատվական տեխնոլոգիաների ոլորտում։ 2020-2024թթ. ծրագրի շրջանակում իրականացվելիք ներդրումները կկազմեն շուրջ 1 280 000 ԱՄՆ դոլար: Կստեղծվի 5 նոր աշխատատեղ` մոտ 200 000 դրամ միջին աշխատավարձով: Ընկերությունն ազատ տնտեսական գոտում ունենալու է մոտ 79.2 քմ տարածք, որը կտրամադրվի 5 տարի ժամկետով:

17:25 - 05 մարտի, 2020