Սահման

Չնայած տարածված լուրերին՝ ոչ մի զինծառայող նման գանգատներով չի դիմել բժշկական կենտրոն. Սիսիանի ԲԿ տնօրեն
 |armtimes.com|

Չնայած տարածված լուրերին՝ ոչ մի զինծառայող նման գանգատներով չի դիմել բժշկական կենտրոն. Սիսիանի ԲԿ տնօրեն |armtimes.com|

armtimes.com: Աղիքային վարակիչ հիվանդությունների ախտանշաններով Սիսիանի բժշկական կենտրոն տեղափոխված 17 հիվանդից ստացիոնար բուժում է ստանում 5-ը: Նրանցից 3-ը 0-5 տարեկան են, 2-ը՝ 25-40: Տուժածների վիճակը գնահատվում է միջին ծանրության՝ դրական դինամիկայով: Այս մասին ասաց Սիսիանի բժշկական կենտրոնի տնօրեն Անի Գրիգորյանը: Նրա խոսքով՝ այսօրվա դրությամբ նման ախտորոշմամբ նոր դեպքեր չենք արձանագրվել: Սիսիանի բժշկական կենտրոնի տնօրենը նշեց, որ չնայած տարածված լուրերին, ոչ մի զինծառայող նման գանգատներով չի դիմել բժշկական կենտրոն: Նրա կարծիքով` կեղծ են նաեւ այն տեղեկությունները, թե ջուրը թունավորվել է ադրբեջանցիների կողմից: «Դա հնարավոր չէ, քանի որ մեր ջուրը Շաքիից է գալիս, որը շատ հեռու է ադրբեջանական վերահսկողությունից: Կարծում եմ՝ կեղծ տեղեկատվություն է դա։ Հետազոտությունների համար նմուշները վերցված են: Ե՛վ հիվանդների կղանքն ենք քննության ուղարկել Երեւան վիրուսոլոգիական լաբորատորիա, ե՛ւ նմուշառման ջուրն ենք վերցրել, նույնիսկ մտածել ենք՝ հնարավոր է կորոնավիրուս լինի, դա էլ ենք հետազոտել, բայց բացասական թեստեր ունենք: Վաղը օրվա վերջում պատասխանը կլինի»,- ասաց Անի Գրիգորյանը։
21:53 - 12 մայիսի, 2021
Սյունիքի մարզպետը Տաթև համայնքի ղեկավարի նոր պաշտոնակատար է նշանակել |hetq.am|

Սյունիքի մարզպետը Տաթև համայնքի ղեկավարի նոր պաշտոնակատար է նշանակել |hetq.am|

hetq.am: Սյունիքի մարզպետ Մելիքսեթ Պողոսյանը մայիսի 10-ին Տաթև համայնքի ղեկավարի նոր պաշտոնակատար է նշանակել Արթուր Մաթևոսյանին: Նույն որոշումով մարզպետը դադարեցրել է Տաթև համայնքի ղեկավարի պաշտոնակատար Մուշեղ Հովսեփյանի պարտականությունները, որին այս տարվա փետրվարի 22-ին էր նշանակել:  2021թ. փետրվարի 22-ին լրացավ Տաթև համայնքի ընտրված ղեկավար Մուրադ Սիմոնյանի պաշտոնավարման ժամկետը: Սակայն օրենքի պահանջով ընտրություններ չնշանակվեցին, քանի որ Հայաստանում 2020թ. սեպտեմբերի 27-ին հայտարարված ռազմական դրությունը պահպանվում էր: Մարզպետը դադարեցրեց Մ. Սիմոնյանի լիազորությունները և համայնքի ղեկավարի պաշտոնակատար նշանակեց համայնքի ղեկավարի տեղակալ Մ. Հովսեփյանին:  «Մուշեղ Հովսեփյանին 2021թ. փետրվարի 23-ից նշանակել Սյունիքի մարզի Տաթև համայնքի ղեկավարի պաշտոնակատար՝ մինչև օրենքով սահմանված կարգով նորընտիր համայնքի ղեկավարի լիազորությունների ստանձնումը»,- ասվում է մարզպետի որոշման մեջ: Սակայն չսպասելով տեղական ինքնակառավարման մարմինների ընտրություններին՝ մարզպետը կրկին համայնքի ղեկավարի նոր պաշտոնակատար է նշանակել: Շինուհայր գյուղի բնակիչ Արթուր Մաթևոսյանը տեղական ինքնակառավարման համակարգում չի աշխատել:Շարունակությունը կարդացեք hetq.am-ում։
20:44 - 12 մայիսի, 2021
Քիչ առաջ եմ իջել Սեւ լճից. ադրբեջանցիները մտածված եկել, սահմանը խախտել են, հիմա պիտի գնան իրենց տեղերը. Սյունիքի մարզպետ
 |armtimes.com|

Քիչ առաջ եմ իջել Սեւ լճից. ադրբեջանցիները մտածված եկել, սահմանը խախտել են, հիմա պիտի գնան իրենց տեղերը. Սյունիքի մարզպետ |armtimes.com|

armtimes.com: Սյունիքի մարզպետ Մելիքսեթ Պողոսյանը քիչ առաջ Սեւ լճի տարածքից վերադարձել է: Մարզպետը տեղեկացրեց, որ ադրբեջանցիները դեռ հետ չեն քաշվել իրենց դիրքերը, սպասում են իրենց վերադասի հրահանգին: Զրույցը մարզպետի հետ՝ ստորեւ. - Պարոն Պողոսյան, ի՞նչ իրավիճակ է սահմանին, բանակցությունները ավարտվեցի՞ն, թե՞ ոչ: - Չէ, չէ, բանակցությունները ընթացքում են, գնում են, ես նոր իջա Սեւ լճի տարածքից, սպասենք այնտեղ բանակցություններին մասնակցող մեր պաշտոնյաները իջնեն, ճիշտ ինֆորմացիան կտանք, ԱԱԾ շտաբի պետն այնտեղ է: - Այսինքն հետ չե՞ն գնացել ադրբեջանցիները: - Գիտե՞ք ոնց, իրենք որ եկել-անցել են մեր պետական սահմանը, դրանք ստորաբաժանումներ են, բայց իրենց վերադասը պետք է ասի, որ հետ քաշվեն, զինվորական են: Իրենք էլ մի հատ քարտեզ են վերցրել, էդ քարտեզով ուզում են ապացուցել, որ դա իրենց տարածքն է, բայց մերն է, էլի, իրոք մերն է դա: Հիմա խնդիրը նրա մեջ է, որ բանակցության փուլում ապացուցենք, որ դա ոչ թե իրենցն է, այլ մերը: ԱԱԾ-ն, այդ ուղղության հրամանատարը հակառակորդի հետ պետք է հանդիպեն, որ ճշտեն, որից հետո զորքերը հետ քաշեն իրենց տեղը: - Այսինքն այն տարածքը, որտեղ իրենք հիմա փորձում են դիրքավորվել՝ դա մերն է, վստահ եք: - 100 տոկոսով է մերը: Մեր անձնակազմը մի տեղ է, բլուրները իրարից հեռու են. երբ որ ձյունը հալվել է, ճանապարհները բացվել են, հիմա ուզում են գալ, իրենց պոստերը դնել, բայց պոստերը թող դնեն իրենց սահմանում, ոչ թե մեր սահմանում: Եթե ասենք մոլորվել են, չէ, մտածված էլ եկել են: Մտածված եկել են, պետական սահմանը խախտել են, հիմա պիտի գնան իրենց տեղերը: - Շա՞տ են առաջ անցել: - Տարբեր հատվածներում տարբեր չափի՝ 1.8 կիլոմետրից 2 կիլոմետր: - Իրենք քանի՞ հոգի են: - Վաշտեր են, դասակներ՝ տարբեր ուղղություններով տարբեր քանակի: Այնպես էլ չի, որ շատ են: Շարունակությունը կարդացեք Armtimes.com-ում։
20:17 - 12 մայիսի, 2021
Խնդրի լուծումը շատ մոտ է, վիրավորներ և կրակոցներ չկան. Քոչարյանը՝ Սյունիքի սահմանային միջադեպի մասին |armenpress.am|

Խնդրի լուծումը շատ մոտ է, վիրավորներ և կրակոցներ չկան. Քոչարյանը՝ Սյունիքի սահմանային միջադեպի մասին |armenpress.am|

armenpress.am: Սյունիքում սահմանային միջադեպի առնչությամբ տեղի են ունենում բանակցություններ՝ այդ թվում ռուսական կողմի ներկայացուցչի ներգրավվածությամբ. կրակոցներ չեն եղել, վիրավորներ չկան: Այս մասին լրագրողների հետ զրույցում ասաց ՀՀ ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ նշելով, որ հիմա ընթանում է այդ լարվածության հետ կապված խնդիրների լուծման և հստակեցման պրոցես: «Ադրբեջանցիները՝ 1974 թվականի քարտեզ ձեռքներին, եկել ինչ-որ բարձունքի վրա, ասում են, թե սա իրենցն է: Բնականաբար, դա չի կարող վերածվել լարվածության, որովհետև հրադադարի ռեժիմը, նաև Հայաստանի պետական սահմանի հետ կապված խնդիրները լուծվում են լրիվ այլ փաստաթղթերի և այլ պայմանագրերի շրջանակում: Այս հարցն առաջացել է սահմանային ճշտումների պատրվակով»,-ասաց Քոչարյանն ու նկատեց, որ Ադրբեջանը, թեև ոչ պետական մակարդակով, սակայն սկսել է բարձրաձայնել, թե Ռուսաստանի ներկայությունն այս հրադադարի ռեժիմում այնքան էլ ցանկալի չէ: Նրա խոսքով՝ հակառակորդի նման գործողությունները քաղաքական կոմպոնենտ են պարունակում, որի նպատակը նաև ՀՀ ներքաղաքական կյանքում լարվածություն առաջացնելն է: Քոչարյանը վստահեցրեց, որ հենց հիմա ընթանում են բանակցություններ: «Հենց հիմա այնտեղ է գտնվում հրադադարի ռեժիմի մեջ ներգրավված ռուսական կողմի ներկայացուցիչը, մեր սահմանապահ զորքերի հրամանատարը, բանակցությունների փուլում ենք: Եվ ես համոզված եմ, որ դա ավարտվելու է հանգուցալուծմամբ»,- ասաց հանձնաժողովի նախագահը: Քոչարյանն ընդունում է՝ խնդիր կա, բայց դա այն խնդիր չէ, որի համար մարդկանց վախի մեջ պահեն: «Պրոբլեմի լուծումը շատ մոտ է: Զոհեր չկան, վիրավորներ չկան, կրակոցներ չկան, չեն էլ եղել»,-ասաց Քոչարյանը: Կրակոցների մասին տեղեկությունները Քոչարյանը համարեց պլանավորված պրովոկացիա՝ հորդորելով չտրվել դրանց, հասարակության գերլարված վիճակում չպահել: Նրա վստահեցմամբ՝ տարածվող տարատեսակ լուրերն իրականությանը չեն համապատասխանում:
16:45 - 12 մայիսի, 2021
Այսօրվա դրությամբ` Սիսիան համայնքում արձանագրվել է աղիքային վարակներին բնորոշ ախտանշաններով 296 դեպք. ԱՆ

Այսօրվա դրությամբ` Սիսիան համայնքում արձանագրվել է աղիքային վարակներին բնորոշ ախտանշաններով 296 դեպք. ԱՆ

2021 թվականի մայիսի 9-ից 11-ն ընկած ժամանակահատվածում աղիքային վարակիչ հիվանդությունների ախտանշաններով Սիսիանի բժշկական կենտրոն է դիմել 13 բնակիչ, որոնցից 5-ը հոսպիտալացվել է: Այս մասին տեղեկացնում է ՀՀ ԱՆ-ն: Համաճարակաբանական հետազոտությունների շրջանակում ՀՀ ԱՆ հիվանդությունների վերահսկման և կանխարգելման ազգային կենտրոնի մասնագետները մայիսի 11-ին իրականացրել են բակային համայցեր, ինչի արդյունքում հայտնաբերվել է աղիքային վարակիչ հիվանդություններին բնորոշ ախտանշաններոով ևս 199 բնակիչ: Բնակիչների մեծամասնությունն ունեցել է նույն գանգատները՝ փսխում, լուծ, թուլություն և ջերմաստիճանի բարձրացում մինչև 38°C: Մայիսի 12-ին Սիսիանի բժշկական կենտրոն դիմել է աղիքային վարակիչ հիվանդությունների ախտանշաններոով ևս 14 բնակիչ և բակային համայցով հայտնաբերվել է ևս 70 հիվանդ: Այսօրվա դրությամբ` Սիսիան համայնքում արձանագրվել է աղիքային վարակներին բնորոշ ախտանշաններով 296 դեպք (դեպքերից 281-ը մինչև 18 տարեկան են, իսկ 15-ը՝ մեծահասակ): Սիսիանի բժշկական կենտրոնում ստացիոնար պայմաններում բուժումը շարունակում է 5 հիվանդ, իսկ գանգատ ունեցող մյուս բնակիչները բուժում են ստանում ամբուլատոր պայմաններում: Բոլոր հիվանդների վիճակը գնահատվում է միջին և թեթև ծանրության՝ դրական շարժընթացով: Որպես բռնկման հավանական պատճառ` դիտարկվում է ջրային գործոնը: Համաճարակաբանական հետազոտությունների ընթացքում պարզվել է, որ դեպքերին նախորդել է վթար` բնակավայրի ջրամատակարարման համակարգում, որի վերացման ուղղությամբ իրականացվել են աշխատանքներ: Լաբորատոր հետազոտությունների նպատակով իրականացվել է բնակավայրի խմելու ջրի և հիվանդների կենսանմուշների նմուշառում:
16:44 - 12 մայիսի, 2021
16 մարզային մասնագիտական կրթության և ուսուցման հաստատությունների հատկացվել են համակարգչային նոր սարքավորումներ

16 մարզային մասնագիտական կրթության և ուսուցման հաստատությունների հատկացվել են համակարգչային նոր սարքավորումներ

Վայոց ձորի, Գեղարքունիքի և Սյունիքի մարզերի մասնագիտական կրթության և ուսուցման (ՄԿՈՒ) 16 հաստատություն ստացել է պլանշետներ՝ կրթության որակի բարելավման, հեռավար ուսուցման արդյունավետ կազմակերպման նպատակով: Այս մասին տեղեկացնում է ՀՀ ԿԳՄՍՆ-ն: Միջոցառումն իրականացվել է ՄԱԶԾ-ՅՈՒՆԻՍԵՖ «Վայոց ձորի, Գեղարքունիքի և Սյունիքի մարզերի սահմանամերձ համայնքների դիմակայունության ամրապնդում» ծրագրի շրջանակում՝ Միացյալ Թագավորության կառավարության Հակամարտությունների, կայունության և անվտանգության հիմնադրամի ֆինանսական աջակցությամբ: Համակարգչային սարքավորումների հանձնման միջոցառմանը մասնակցել է ՀՀ ԿԳՄՍ նախարարի տեղակալ Ժաննա Անդրեասյանը: Նրա խոսքով՝ սա հերթական կարևոր քայլն է համավարակի հետևանքով կրթական համակարգում առաջացած խնդիրների լուծման գործում: «Սա գործընկերային ճկուն հարաբերությունների դրսևորում է, երբ ջանքերի համախմբմամբ ուսումնական հաստատությունների համար առաջացած ճգնաժամային իրավիճակում ստեղծվում են զարգացման, հեռավար ուսուցման բարելավման պայմաններ: Անկախ նրանից, թե երբ վերջնականապես կհաղթահարենք համավարակը, այս ընթացքում զարգացրած կարողությունների, գործիքների մի մասը կկարողանանք օգտագործել նաև հետագայում: Հույս ունեմ՝ այս սարքավորումները կծառայեն որպես ճգնաժամի հաղթահարման, հաստատությունների զարգացման գործիք: Գիտենք, որ կան ընթացիկ բարելավման խնդիրներ, բայց սա ևս շատ քայլ է: Պետք է մշտապես շարունակել զարգացման գործընթացը»,- ասել է Ժաննա Անդրեասյանը և շնորհակալություն հայտնել ՄԱԶԾ-ՅՈՒՆԻՍԵՖ-ին արդյունավետ համագործակցության և նախարարության կողմից ՄԿՈՒ ոլորտում իրականացվող բարեփոխումներին ցուցաբերած շարունակական աջակցության համար: Ծրագրի համակարգող Կարինե Սիմոնյանը ևս կարևորել է ԿԳՄՍ նախարարության հետ գործընկերային հարաբերությունները և ասել, որ համակարգչային սարքավորումների տրամադրումը ոչ թե պարզապես գեղեցիկ քայլ է, այլ կարիքների գնահատման արդյունքում առաջացած գաղափար: «Մեր ծրագրերում փորձում ենք անպայման ներառել մարդկային կարողությունների զարգացման բաղադրիչը` կրթական խնդիրների հաղթահարման և երիտասարդության՝ աշխատաշուկայում մրցունակ լինելու համար անհրաժեշտ քայլերի ձեռնարկման նպատակով: Սա հակաճգնաժամային ծրագիր է, որն իրականացվել է հետպատերազմական և համավարակի պայմաններում՝ կոնկրետ 3 մարզի համար: Սարքավորումների տրամադրման որոշումը կայացվել է կատարված հետազոտության արդյունքում. ՄԿՈՒ հաստատություններն ունեն համակարգչային տեխնիկայի թարմացման և ստեղծված պայմաններին համապատասխան գիտելիքների զարգացման կարիք»,- ասել է Կարինե Սիմոնյանը և վստահեցրել, որ պատրաստ են ծրագրերն առավել բարելավել և դարձնել հասցեական՝ հաշվի առնելով ՄԿՈՒ հաստատությունների առաջարկները: «Վայոց ձորի, Գեղարքունիքի և Սյունիքի մարզերի սահմանամերձ համայնքների դիմակայունության ամրապնդում» ծրագրի շրջանակում իրականացվել է «Մասնագիտական կրթության և ուսուցման (ՄԿՈՒ) հաստատոււթյունների և քաղաքականություն մշակողների հարմարեցումը «նոր բնականոնին» ՔՈՎԻԴ-19 ճգնաժամի պայմաններում» թեմայով հետազոտություն. հավաքագրվել և ամփոփվել է ՄԿՈՒ հաստատությունների առջև ծառացած մարտահրավերների վերաբերյալ տեղեկատվություն, որի հիման վրա մշակվել են վերոնշյալ սահմանամերձ մարզերի ՄԿՈՒ հաստատությունների ինստիտուցիոնալ և մարդկային կարողությունների զարգացմանն ուղղված առաջարկություններ: Բացի դրանից՝ առցանց դասընթացները լավագույնս նախապատրաստելու և վարելու համար վերապատրաստվել է ՄԿՈՒ հաստատությունների ավելի քան 400 աշխատակից:
16:14 - 12 մայիսի, 2021
ՀՀ պետական սահմանի նկատմամբ որևէ ոտնձգություն չի իրականացվել, մենք որևէ տեղից նահանջ չունենք․ Թագուհի Թովմասյանը՝ Վարդենիսի ուղղությամբ տարածվող լուրերի մասին |tert.am|

ՀՀ պետական սահմանի նկատմամբ որևէ ոտնձգություն չի իրականացվել, մենք որևէ տեղից նահանջ չունենք․ Թագուհի Թովմասյանը՝ Վարդենիսի ուղղությամբ տարածվող լուրերի մասին |tert.am|

tert.am: Ես քիչ առաջ խոսեցի բանակային կորպուսի հրամանատարի հետ, և նա ինձ հավաստիացրեց, որ Հայաստանի պետական սահմանի նկատմամբ որևէ ոտնձգություն չի իրականացվել, որևէ ագրեսիա չկա հակառակորդի դիրքերում այդ հատվածում։ Այս մասին ասաց Ազգային ժողովի պատգամավոր Թագուհի Թովմասյանը՝ անդրադառնալով լուրերին, թե ադրբեջանական կողմը երեկվանից դիրքերն առաջ է բերել Վարդենիսում։ «Խնդիրն այն է, որ երբ նրանք նախկինում դիրքավորված են եղել՝ եղանակային պայմաններով պայմանավորված՝ առատ ձյան պատճառով, չեն կարողացել դիրքավորվել այն դիրքերում, որտեղ նախատեսել էին և որտեղ GPS-ը ցույց է տալիս որպես ադրբեջանական սահման։ Այսինքն՝ նրանք ավելի հետ են եղել և հիմա, որ ձյունը հալվել է, իրենք ուղղակի առանց ագրեսիայի իրենց դիրքերում են դիրքավորվում»,– ասաց նա։«Մենք որևէ տեղից նահանջ չունենք, մեր զորքերը ամուր կանգնած են իրենց տեղում և չեն էլ պատրաստվում նահանջել»։
15:41 - 12 մայիսի, 2021
3-րդ բանակային կորպուսը, համաձայն այս տարվա պլանի՝ իրականացնում է զորավարժություն․ Սամվել Ասատրյանը՝ «տագնապ» հրամանով զորք դիրքեր բարձրացնելու մասին |168.am|

3-րդ բանակային կորպուսը, համաձայն այս տարվա պլանի՝ իրականացնում է զորավարժություն․ Սամվել Ասատրյանը՝ «տագնապ» հրամանով զորք դիրքեր բարձրացնելու մասին |168.am|

168.am: «Մեդիապորտ» տելեգրամյան ալիքը քիչ առաջ գրել է, որ ՀՀ ԶՈՒ 3-րդ բանակային կորպուսում տագնապ է հայտարարվել, և որ Վանաձոր քաղաքի զորամասից «տագնապ» հրամանով  դիրքեր են բարձրացնում: «Հրապարակ» կայքն էլ գրել է, որ Լուսակերտի զորամասից զորք են տեղափոխում Սյունիք: «3-րդ բանակային կորպուսը, համաձայն 2021 թվականի տարվա պլանի՝ իրականացնում է զորավարժություն: Լուսակերտի և այլ զորամասերում Հայաստանի պաշտպանության նախարարության ռազմական վերահսկողական ծառայությունը մարտական պատրաստության ստուգումներ է իրականացնում»,- այս մասին ասաց ԳՇ վարչակազմակերպչական վարչության տեղեկատվության բաժնի պետ, գնդապետ Սամվել Ասատրյանը: Գնդապետ Ասատրյանը հորդորեց զերծ մնալ սոցցանցերում և մեդիահարթակներում բաց աղբյուրներով հակառակորդին տեղեկություն տալուց:
15:10 - 12 մայիսի, 2021
Սյունիքում բողոքի ակցիաների դեպքերով մեղադրյալ Հայկ Հայրապետյանն արդարացվել է |hetq.am|

Սյունիքում բողոքի ակցիաների դեպքերով մեղադրյալ Հայկ Հայրապետյանն արդարացվել է |hetq.am|

hetq.am: Սյունիքում տեղի ունեցած բողոքի ակցիաների գործով մեղադրյալ Հայկ Հայրապետյանն արդարացվել է: Այս մասին «Հետքի» հետ զրույցում ասաց Հայրապետյանի պաշտպան Միքայել Շխիմյանը: Հիշեցնենք, որ Հայրապետյանին մեղադրանք էր առաջադրվել Քրեական օրենսգրքի 258-րդ հոդվածի 3-րդ մասի 2-րդ և 5-րդ կետերով՝ խմբի կազմում խուլիգանությունը՝ զուգորդված բռնությամբ և առանձնակի ցինիզմով: Վարույթն իրականացնող մարմնի որոշմամբ՝ նա ձերբակալվել էր, ապա դատարանի որոշմամբ՝ ազատ արձակվել: Շխիմյանը «Հետքի» հետ զրույցում ասաց, որ Հայրապետյանի նկատմամբ քրեական հետապնդումը դադարեցվել է՝ հանցակազմի բացակայության հիմքով: Հիշեցնենք, որ Նիկոլ Փաշինյանը ապրիլի 20-ին և 21-ին եղել է Սյունիքի մարզում, որտեղ այցելել է Շուռնուխ․ Ագարակ, Մեղրի ու Կապան։ Այցի ընթացքում քաղաքացիներն ընդվզել և դժգոհություն են հայտնել, բողոքի ակցիաներ կազմակերպել, վիրավորական արտահայտություններ, հայհոյանքներ հնչեցրել, ճանապարհ փակել։ Մեղրիում քաղաքացիների և ոստիկանների միջև բախում է տեղի ունեցել։ Շարունակությունը՝ hetq.am–ում
14:58 - 12 մայիսի, 2021
ԱԱԾ-ն զգուշացնում է. հայտարարություն Սյունիքի իրավիճակի վերաբերյալ

ԱԱԾ-ն զգուշացնում է. հայտարարություն Սյունիքի իրավիճակի վերաբերյալ

ՀՀ ազգային անվտանգության ծառայությունը պաշտոնապես տեղեկացնում է, որ Սյունիքի մարզի տարածքում մեկնարկած ու ընթացող մարտերի վերաբերյալ զանգվածային լրատվության միջոցներով և սոցիալական ցանցերում տարածվող տեղեկություններն իրականությանը չեն համապատասխանում: Նկատի ունենալով հիշյալ տեղեկությունների տարածման արդյունքում հանրության շրջանում ձևավորված անհանգստությունները՝ ՀՀ ազգային անվտանգության ծառայությունը խստորեն զգուշացնում է զերծ մնալ ապատեղեկատվություն տարածելու, ազգաբնակչության շրջանում խուճապ առաջացնելու և անհարկի լարվածություններ հրահրելու գործելաոճից ու տեղեկացնում, որ նմանատիպ երևույթներն ունենալու են համապատասխան իրավական հետևանքներ՝ ամենախիստ գործիքակազմերի կիրառմամբ: Ազգային անվտանգության մարմինները դարձյալ հորդորում են զերծ մնալ ոչ պաշտոնական ու չճշտված տեղեկությունների տարածումից և ապավինել բացառապես պաշտոնական լրահոսին:
14:45 - 12 մայիսի, 2021
Տեղ համայնքի ղեկավարը հերքում է տեղեկությունը, թե հակառակորդը Խնածախ բնակավայրի մոտ մի փոքր առաջ է եկել

Տեղ համայնքի ղեկավարը հերքում է տեղեկությունը, թե հակառակորդը Խնածախ բնակավայրի մոտ մի փոքր առաջ է եկել

Սյունիքի մարզի Տեղ համայնքի ղեկավար Ներսես Շադունցն Infocom-ի հետ զրույցում հերքում է տեղեկությունները, թե հակառակորդը Տեղ համայնքի Խնածախ բնակավայրի մոտ մի փոքր առաջ է եկել․ «Տեղեկությունները ճիշտ չեն, մենք մեր գործը նորմալ անում ենք, չանհանգստանաք»։ Նշենք, որ ՀՀ ՊՆ-ն հայտարարություն է տարածել, որ մայիսի 12-ի վաղ առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում։ Սյունիքի փոխմարզպետ Կարո Ավանեսյանը Infocom-ի հետ զրույցում հերքել է մամուլում շրջանառվող լուրերը, թե հակառակորդը Սյունիքի Իշխանասարի ուղղությամբ հարձակում է նախաձեռնել։ Իսկ Վերիշեն բնակավայրի ղեկավար Արարատ Օրդյանը հայտնլ է, որ այս գիշեր հակառակորդը Սյունիքի մարզի Սեւ լճի տարածքով առաջացել է դեպի Գորիսի Վերիշեն բնակավայրի վարչական տարածք՝ լճի տարածքը վերցնելով իր հսկողության տակ՝ հավելելով, որ մինչեւ այս գիշեր՝ լճի միայն 30 տոկոսն է եղել հակառակորդի հսկողության տակ։ Կապանի քաղաքապետ Գեւորգ Փարսյանն էլ Infocom-ի հետ զրույցում հերքել է տեղեկությունները, թե Կապանում տղամարդկանց հրահանգվել է պատրաստ լինել կամավորագրման։   
14:12 - 12 մայիսի, 2021
Ադրբեջանցիները դիրքային աշխատանքների ընթացքում խախտել են մեր վարչական սահմանը, մերոնք միջամտել են. սյունեցի պատգամավոր |armtimes.com|

Ադրբեջանցիները դիրքային աշխատանքների ընթացքում խախտել են մեր վարչական սահմանը, մերոնք միջամտել են. սյունեցի պատգամավոր |armtimes.com|

armtimes.com: Սյունիքում այս պահին իրավիճակը հանգիստ է, հայկական, ադրբեջանական եւ ռուսական կողմերի մասնակցությամբ բանակցություններ են ընթանում՝ առաջացած հակասությունները հարթելու ուղղությամբ: Այդ մասին տեղեկացրեց սյունեցի պատգամավոր Արմեն Խաչատրյանը՝ ընդգծելով, որ մարզպետը եւս տեղում է: Խոսելով մամուլում տարածված տեղեկությունների մասին՝ համաձայն որոնց մարտեր են ընթացել Իշխանասարի ուղղությամբ, Խաչատրյանը դրանք ապատեղեկատվություն որակեց. «Իմ տեղեկություններով՝ ադրբեջանցիները, օգտվելով ձնհալից, փորձել են Իշխանասարի ուղղությամբ դիրքերի տեղադրման աշխատանքներ իրականացնել: Բայց քանի որ այդ ամենի հետեւանքով խախտել են մեր վարչական սահմանը՝ մերոնք միջամտել են եւ թույլ չեն տվել: Որեւէ միջադեպ չի եղել, լրատվամիջոցներում տեղ գտած տեղեկությունները ապատեղեկատվություն են, չեն համապատասխանում իրականությանը եւ ավելորդ տագնապ են առաջացնում ժողովրդի մոտ»,- ասաց Խաչատրյանը: Հարցին՝ վիրավորներ ունե՞նք, պատգամավորը բացասական պատասխան տվեց. «Չէ, չէ, չունենք, ի՞նչ վիրավոր»: Շարունակությունը՝ armtimes.com-ում։
14:02 - 12 մայիսի, 2021
Գիշերը հակառակորդը Սև լճի տարածքը վերցրել է իր հսկողության տակ․ Վերիշեն բնակավայրի ղեկավար Արարատ Օրդյան

Գիշերը հակառակորդը Սև լճի տարածքը վերցրել է իր հսկողության տակ․ Վերիշեն բնակավայրի ղեկավար Արարատ Օրդյան

Այս գիշեր հակառակորդը Սյունիքի մարզի Սեւ լճի տարածքով առաջացել է դեպի Գորիսի Վերիշեն բնակավայրի վարչական տարածք՝ լճի տարածքը վերցնելով իր հսկողության տակ։ Այս մասին Infocom-ի հետ զրուցում ասաց Վերիշեն բնակավայրի ղեկավար Արարատ Օրդյանը։ Նա նշեց, որ մինչեւ այս գիշեր՝ լճի միայն 30 տոկոսն է եղել հակառակորդի հսկողության տակ։ Նրա խոսքով՝ այս պահին բանակցություններ են ընթանում, որպեսզի հակառակորդը հետ քաշվի․ տարածքում են ՀՀ ՊՆ ներկայացուցիչները, համայնքապետը պատրաստվում է միանալ նրանց։ Նշենք, որ ՀՀ ՊՆ-ն հայտարարություն է տարածել, որ մայիսի 12-ի վաղ առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում։ Հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։ Այս պահին ընթանում են բանակցություններ՝ ստեղծված իրավիճակը հարթելու ուղղությամբ։
13:17 - 12 մայիսի, 2021
Ադրբեջանական զինուժը փորձել է որոշակի աշխատանքներ իրականացնել Սյունիքի սահմանային հատվածներից մեկում․ ՊՆ-ն պարզաբանում է տարածել

Ադրբեջանական զինուժը փորձել է որոշակի աշխատանքներ իրականացնել Սյունիքի սահմանային հատվածներից մեկում․ ՊՆ-ն պարզաբանում է տարածել

Մայիսի 12-ի վաղ առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում։ Այս մասին հայտնում են ՀՀ ՊՆ-ից «Հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։ Այս պահին ընթանում են բանակցություններ՝ ստեղծված իրավիճակը հարթելու ուղղությամբ։ Մամուլում տարածվող տեղեկությունները «Իշխանասարի ուղղությամբ ընթացող մարտերի մասին» չեն համապատասխանում իրականությանը։ Նման զարգացումների դեպքում պաշտպանության նախարարությունն առաջինը հանդես կգար հայտարարությամբ։ Կոչ ենք անում ձեռնպահ մնալ չճշտված, առավել ևս՝ խուճապ տարածող տեղեկություններ հրապարակելուց»,- նշված է ՊՆ հաղորդագրության մեջ։
13:10 - 12 մայիսի, 2021