Չինաստան

Չինաստանը (ամբողջական անունը՝ Չինաստանի Ժողովրդական Հանրապետություն) սոցիալիստական պետություն է Ասիայի արեւելքում։ Տարածքով (9,6 մլն կմ2) ամենամեծ երկիրն է արեւելյան Ասիայում եւ, ըստ տարբեր հաշվարկների, երրորդը կամ չորրորդն աշխարհում։ Բնակչության թվով ամենախոշոր երկիրն է՝ 1.294,4 մլրդ մարդ։ Պետությունը ղեկավարվում է կոմունիստական կուսակցության կողմից։ Մայրաքաղաքը Պեկինն է։

Չինաստանը բաղկացած է 22 գավառներից, 5 ինքնավար շրջաններից, 4 ուղիղ-ղեկավարվող քաղաքներից, 2 գրեթե ինքնավար քաղաքներից (Հոնկոնգ եւ Մակաո) եւ իր սուվերենությունը պնդող Թայվանից։

ՉԺՀ-ի նախագահը համարվում է պետության գլխավորը եւ հանդես է գալիս Չինաստանի ազգային կոնգրեսի անունից: Երկրի գործող նախագահն է Սի Ցզինպինը, որը միեւնույն ժամանակ Չինաստանի կոմունիստական կուսակցության գլխավոր քարտուղարն է, եւ Չինաստանի կենտրոնական ռազմական խորհրդի նախագահն է, որոնցով նա հանդիսանում է Չինաստանի գլխավոր առաջնորդ։

ԱԳ փոխնախարար Ավետ Ադոնցը հանդիպել է ՀՀ-ում ՉԺՀ դեսպան Ֆան Յունի հետ

Դեկտեմբերի 17-ին արտգործնախարարի տեղակալ Ավետ Ադոնցը հանդիպում ունեցավ Չինաստանի դեսպան Ֆան Յոնի հետ: Հանդիպմանը կողմերը քննարկեցին երկկողմ օրակարգին, ինչպես նաև տարածաշրջանային իրավիճակին առնչվող հարցեր: ԱԳ նախարարի տեղակալը դեսպանին տեղեկատվություն հաղորդեց թուրք-ադրբեջանական ագրեսիայի հետևանքով Արցախում առաջացած իրավիճակի և դրա հասցեագրման ուղղությամբ ձեռնարկվելիք գործողությունների վերաբերյալ: Անդրադարձ կատարվեց տարածաշրջանային անվտանգության և կայունության խնդիրներին: ՀՀ ԱԳ նախարարի տեղակալը նշեց, որ Չինաստանի հետ համագործակցության խորացումը ՀՀ արտաքին քաղաքականության առաջնայնություններից է, և կողմերն արդունավետ կերպով փոխգործակցում են միջազգային կազմակերպությունների շրջանակներում: Հայաստանը մշտապես աջակցում է Չինաստանին՝ «մեկ Չինաստանի» քաղաքականության իրականացման հարցում: ՉԺՀ դեսպան Ֆան Յունը նշեց, որ Հայաստանի և Չինաստանի ավանդական բարեկամական հարաբերությունները նպաստում են համագործակցության առաջխաղացմանը բոլոր ուղղություններով: Դեսպանը նշել է, որ Չինաստանը հավատարիմ է պետական ինքնիշխանության և տարածքային ամբողջականության փոխադարձ հարգանքի սկզբունքին, Չինաստանը և Հայաստանը մշտապես աջակցում են միմյանց առանցքային կարևոր հարցերում: Զրուցակիցները մտքեր փոխանակեցին Հայաստանի և Չինաստանի միջև երկկողմ օրակարգը հարստացնելու և առկա երկխոսությունն առավել ակտիվացնելու, ինչպես նաև՝ առևտրի, ներդրումների և տեխնիկատնտեսական ոլորտներում հետագա համատեղ աշխատանքների ուղղությամբ ձեռնարկվելիք քայլերի շուրջ:

18:58 - 17 դեկտեմբերի, 2020

Հունվարի 1-ից ՀՀ-ում կգործի թուրքական ծագման ապրանքների ներկրման արգելքը. ապրանքների ցանկը կտրամադրվի չինական կողմին

ՀՀ էկոնոմիկայի նախարար Վահան Քերոբյանը դեկտեմբերի 16-ին հանդիպում է ունեցել Հայաստանի Հանրապետությունում ՉԺՀ նորանշանակ արտակարգ և լիազոր դեսպան Յոն Ֆանի հետ: Հանդիպմանը մասնակցել են ՀՀ էկոնոմիկայի նախարարի տեղակալ Ավագ Ավանեսյանը, նախարարության արտաքին կապերի վարչության պետ Արմեն Այվազյանը, Հայաստանում ՉԺՀ դեսպանության առևտրատնտեսական հարցերով խորհրդական Ռույժուան Վանը, էկոնոմիկայի նախարարության և ՉԺՀ դեսպանության այլ աշխատակիցներ։ Ինչպես տեղեկացրին ՀՀ էկոնոմիկայի նախարարության տեղեկատվության և հասարակայնության հետ կապերի վարչությունից, դեսպան Յոն Ֆանը շնորհակալություն է հայտնել հանդիպման համար։ Այնուհետև նախարարը և դեսպանը փոխադարձ շնորհավորել են միմյանց իրենց պաշտոնները ստանձնելու կապակցությամբ։ Անդրադառնալով Հայաստանի և Չինաստանի միջև փոխգործակցության հեռանկարներին, ՉԺՀ դեսպանը նշել է, որ երկու երկրների միջև առևտրատնտեսական հարաբերությունները լավ հիմքի վրա են կառուցված, սակայն առկա է դրանք զարգացնելու մեծ ներուժ։ Կողմերը գոհունակությամբ նշել են կորոնավիրուսի համավարակի պայմաններում երկու երկրների միջև առևտրաշրջանառության ծավալների դրական դինամիկան։ Էկոնոմիկայի նախարարը կարևորել է փոխշահավետ գործակցության ուղղությամբ նորացված օրակարգի ձևավորումը և դրա իրականացման ճանապարհային քարտեզի ուրվագծումը։ Վահան Քերոբյանը չինական ընկերություններին հրավիրել է մասնակցելու Հայաստանում ներդրումային ծրագրերին, մասնավորապես նշելով ջրամբարաշինության, ճանապարհաշինության, բազմաբնակարան շենքերի կառուցման, արդյունաբերության, արդյունաբերական քաղաքի ծրագրերը, նաև առաջարկել է Հայաստանում հիմնել համատեղ արտադրություն՝ արտադրանքը ԵԱՏՄ և Իրանի շուկաներում սպառելու հեռանկարով։ Նախարարը նաև տեղեկացրել է, որ 2021թ. հունվարի 1-ից կգործի թուրքական ծագման ապրանքների՝ Հայաստանի տարածք ներմուծելու արգելքը։ Այդ կապակցությամբ չինական կողմին կտրամադրվի նշված ապրանքատեսակների ցանկը, որպեսզի չինական ընկերությունները ուսումնասիրեն և ներկայացնեն իրենց առաջարկությունները՝ նման ապրանքներ Հայաստան ներկրելու վերաբերյալ։ Կողմերն անդրադարձել են նաև զբոսաշրջության ոլորտում հետագա համագործակցության խորացմանը՝ կարևորելով երկու երկրների միջև ուղիղ ավիաչվերթների գործարկման անհրաժեշտությունը։ Հանդիպման ավարտին կողմերն առաջարկել են ձեռնարկել կոնկրետ քայլեր նախանշված ծրագրերի իրականացման ուղղությամբ, նաև պայմանավորվել են տեղեկատվություն փոխանակել հանդիպման ընթացքում բարձրացված բազմաբնույթ հարցերի վերաբերյալ՝ հետագայում առավել առարկայական քննարկումներ կազմակերպելու նպատակով։

18:54 - 16 դեկտեմբերի, 2020

ԵԱՏՄ-ն կարող է ՉԺՀ-ից ներկրվող եռակցված խողովակների համար հակադեմպինգային տուրքեր սահմանել |armenpress.am|

armenpress.am: Եվրասիական տնտեսական միությունը (ԵԱՏՄ) մինչև 2020 թվականի ավարտը կարող է հակադեմպինգային տուրքեր սահմանել Չինաստանից եռակցված չժանգոտվող խողովակների վրա: Այս մասին տեղեկացրել է Ռուսաստանի Խողովակների արդյունաբերության զարգացման հիմնադրամի փոխտնօրեն Պավել Ռոդինը: «Մինչ այս տարեվերջ պետք է ընդունվի որոշում Չինաստանից եռակցված չժանգոտվող խողովակների նկատմամբ հակադեմպինգային տուրքերի ներդրման վերաբերյալ: Մենք ակնկալում ենք, որ այս հարցում որոշումը կընդունվի մինչ այս տարեվերջ, ինչի համար բոլոր նախադրյալները կան»,- ասել է նա: Տուրքերի չափը կարող է կազմել 17,28 տոկոս, այն կարող է ներդրվել 5 տարի ժամկետով: Բացի այդ, 2021 թվականին կարող են երկարաձգվել հակադեմպինգային տուրքերը Ուկրաինայից և Չինաստանից ներկրվող խողովակների նկատմամբ:

19:47 - 15 դեկտեմբերի, 2020

COVID-19. Աշխարհում վարակվածների թիվը 71 միլիոն 560 հազարից ավելի է |armenpress.am|

armenpress.am: Աշխարհում նոր տիպի կորոնավիրուսային վարակի՝ COVID-19-ի հաստատված դեպքերի թիվն անցել է 71 միլիոն 560 հազարից: Կորոնավիրուսի հետազոտական կենտրոնների տվյալների համաձայն՝ մահացածների թիվն անցել է 1 միլիոն 603 հազարից: Ապաքինվել է ավելի քան 49 միլիոն 780 հազար մարդ: Վիրուսով վարակվածների թվով առաջին տեղում գտնվող ԱՄՆ-ում 16 մլն 295 հազար 714 հաստատված դեպք կա: Այստեղ մահացածների թիվը 302 հազար 762 է: Այս ցուցանիշով ևս ԱՄՆ-ն առաջինն է աշխարհում: Ընդհանուր ցուցանիշով երկրորդ տեղում հայտնված Հնդկաստանում հաստատված դեպքերի թիվը հասել է 9 մլն 829 հազար 136-ի, մահերինը՝ 142 հազար 680-ի: Հաջորդ տեղում Բրազիլիան է, որտեղ ընդհանուր առմամբ կորոնավիրուսով վարակվել է 6 հազար 836 հազար 313 մարդ: Երկրում վարակի հետևանքով մահացել է՝ 180 հազար 453: Վարակվածների թվով չորրորդ տեղում հայտնված Ռուսաստանն առանձնանում է 2 մլն 625 հազար 848 դեպքով: Այստեղ վերջին մեկ օրում 28 հազար 137 նոր դեպք է գրանցվել: Վարակի բռնկումից ի վեր կորոնավիրուսի հետևանքով Ռուսաստանում մահացել է 46 հազար 453 մարդ: Վարակվածների ընդհանուր թվով 5-րդ տեղում Ֆրանսիան է, որտեղ հաստատված դեպքերի թիվը կազմում է 2 մլն 351 հազար 372, մահերինը՝ 57 հազար 567: Տասնյակում են նաև Մեծ Բրիտանիան, Իտալիան, Թուրքիան, Իսպանիան, Արգենտինան: Տարածաշրջանային երկրներից Իրանն առանձնանում է 1 մլն 100 հազար 818 վարակվածության ընդհանուր, 51 հազար 949 մահվան դեպքով: Վրաստանում հաստատված դեպքերի թիվը հասել է 187 հազար 006-ի, վարակի բռնկումից ի վեր այստեղ մահացել է 1744 մարդ: Վարակի ծագման երկիր Չինաստանը հայտնվել է 79-րդ տեղում: Հաստատված ընդհանուր դեպքերի թիվը 86 հազար 701 է, որից ապաքինվել է 81 հազար 774-ը: Մահերի թիվը կազմում է 4 հազար 634: Առողջապահության համաշխարհային կազմակերպության տվյալներով՝ վարակ արձանագրած երկրների և տարածքների թիվն անցել է 220-ը:

17:22 - 12 դեկտեմբերի, 2020

Տիգրան Ավինյանն ընդունել է Հայաստանում Չինաստանի դեսպանին

Դեկտեմբերի 11-ին փոխվարչապետ Տիգրան Ավինյանն ընդունել է Հայաստանում Չինաստանի Ժողովրդական Հանրապետության նորանշանակ դեսպան Ֆան Յունին: Այս մասին տեղեկանում ենք փոխվարչապետի աշխատակազմից։ Ողջունելով հյուրին՝ Տիգրան Ավինյանը նշել է, որ Չինաստանը Հայաստանի ամենակարևոր գործընկերներից է և փոխվստահության ու փոխադարձ շահերի վրա հիմնված հայ-չինական հարաբերությունների հետագա զարգացումը Հայաստանի համար շատ կարևոր է: Շնորհակալություն հայտնելով ընդունելության համար՝ դեսպան Ֆան Յունը նշել է, որ ջանք չի խնայի հայ-չինական համագործակցության հետագա զարգացման ու ընդլայնման համար: Փոխվարչապետ Ավինյանը խոսել է Արցախի շուրջ տեղի ունեցած վերջին զարգացումներից, ներկայացրել գերիների փոխանակման գործընթացը և հայկական կողմի դիրքորոշումը: Զրուցակիցները քննարկել են Հայաստանին տրամադրվող տեխնիկական աջակցության, մասնավորապես, հանրային տրանսպորտի ու առողջապահության ոլորտում ծրագրերը, ինչպես նաև նախանշել տեխնիկական աջակցության շրջանակներում համագործակցության հետագա հնարավորությունները: Անդրադառնալով առևտրատնտեսական հարաբերություններին՝ կողմերը գոհունակությամբ արձանագրել են, որ Չինաստանը Հայաստանի հիմնական առևտրական գործընկերներից է և համատեղ աշխատանքի միջոցով հնարավոր է առևտրաշրջանառության ծավալները էլ ավելի մեծացնել: Տիգրան Ավինյանը կարևորել է չինական ուղղակի ներդրումների ներգրավումը և փոխշահավետ ծրագրերի իրականացումը: Հանդիպման ընթացքում անդրադարձ է կատարվել Հայաստանում ժամանակակից տեխնոլոգիաների կիրառմամբ պղնձաձուլարանի կառուցման շուրջ քննարկումները վերսկսելու հնարավորությունը, ինչի վերաբերյալ գործընթացը սկսվել էր դեռ անցած տարվա վերջին, սակայն ժամանակավորապես դադարել էրէ պայմանավորված կորոնավիրուսի համավարակով: Քննարկվել է նաև հայ-չինական «Շանսի-Նաիրիտ» համատեղ ձեռնարկության աշխատանքը և դրա գործունեության ընդլայնման հնարավորությունները:

17:53 - 11 դեկտեմբերի, 2020

Պոմպեոն հայտարարել է, որ ՌԴ-ի ու Չինաստանի դեմ սահմանված պատժամիջոցների պատճառն Իրանին ցուցաբերված աջակցությունն է |tert.am|

tert.am: Ռուսական ու չինական կազմակերպությունների դեմ օրերս Վաշինգտոնի սահմանած նոր պատժամիջոցները կապված են Իրանի հրթիռային ծրագրի շրջանակներում իրականացված մատակարարումների հետ։ Այս մասին հայտարարել է ԱՄՆ պետքարտուղար Մայք Պոմպեոն։«Մենք պատժամիջոցներ ենք սահմանել Չինաստանում Chengdu Best New Materials-ի և Zibo Elim Trade-ի, ինչպես նաև Nilco Group-ի դեմ, որը հայտնի է նաև որպես Nil Fam Khazar ու Santers Holding, իսկ Ռուսաստանում՝ «Էլեկոն» ԲԲԸ-ի նկատմամբ Իրանի հրթիռային ծրագրին «զգայուն» տեխնոլոգիաների ու ապրանքների փոխանցման համար։ Այս միջոցների ձեռնարկումը Իրանի կործանարար գործունեությանը մեր արձագանքի մասն է կազմում», - նշված է Պոմպեոյի գրավոր հայտարարության մեջ։Նա նաև հավելել է, որ երկու տարի ժամկետով սահմանված նոր պատժամիջոցները ներառում են նաև ԱՄՆ-ից պետական գնումներ անելու ու Վաշինգտոնի կողմից պետական աջակցություն ստանալու հնարավորությունների և արտահանման սահմանափակումներ։Պոմպեոյի խոսքով՝ ԱՄՆ-ն շարունակելու է աշխատել Իրանի հրթիռային ծրագրին խոչընդոտելու ուղղությամբ և դրա համար պատժամիջոցներ է կիրառելու։Հիշեցնենք, որ նոյեմբերի 26-ին Իրանի և Վենեսուելայի հարցերով ԱՄՆ հատուկ ներկայացուցիչ Էլիոտ Աբրամսը Բեյրութի համալսարանի կազմակերպած տեսակոնֆերանսի ժամանակ հայտարարել էր, որ ԱՄՆ-ն նոր պատժամիջոցներ կսահմանի Ռուսաստանի և Չինաստանի չորս իրավաբանական անձի նկատմամբ, որոնք, Վաշինգտոնի կարծիքով, աջակցում էին Իրանին զարգացնել իր հրթիռային ծրագիրը։

12:12 - 28 նոյեմբերի, 2020

Արտգործնախարար Արա Այվազյանն ընդունեց Չինաստանի նորանշանակ դեսպան Ֆան Յունին

Նոյեմբերի 19-ին արտգործնախարար Արա Այվազյանն ընդունեց Չինաստանի նորանշանակ դեսպան Ֆան Յունին՝ հավատարմագրերի պատճենը հանձնելու կապակցությամբ։ Նախարար Այվազյանը շնորհավորեց Ֆան Յունին՝ պատասխանատու առաքելությունը ստանձնելու կապակցությամբ և վստահություն հայտնեց, որ նորանշանակ դեսպանն իր արժեքավոր ավանդը կունենա հայ-չինական բազմաոլորտ հարաբերությունների դինամիկան պահպանելու և երկկողմ օրակարգն առավել ընդլայնելու գործում: Շնորհակալություն հայտնելով ջերմ բարեմաղթանքների համար՝ դեսպան Յունը նախարար Այվազյանին փոխանցեց ՉԺՀ ԱԳ նախարար Վան Իի շնորհավորանքները և բարեմաղթանքները նախարարի պաշտոնում նշանակվելու կապակցությամբ: Զրուցակիցները մտքեր փոխանակեցին երկկողմ օրակարգին առնչվող հարցերի շուրջ՝ առանձնահատուկ շեշտելով առևտրատնտեսական ոլորտում առկա ներուժի լիարժեք կիրառման ուղղությամբ համատեղ քայլերի ձեռնարկման անհրաժեշտությունը: ԱԳ նախարարը դեսպանին համապարփակ տեղեկատվություն հաղորդեց թուրք-ադրբեջանական ագրեսիայի հետևանքով Արցախում առաջացած հումանիտար ճգնաժամի և դրա հասցեագրման ուղղությամբ իրականացվող գործողությունների մասին: Նախարար Այվազյանն այս առնչությամբ կարևորեց միջազգային հանրության հնարավորինս լայն աջակցությունը: Չինաստանի նորանշանակ դեսպանը հայտնեց, որ ՉԺՀ պաշտոնական դիրքորոշումը մնում է անփոփոխ առ այն, որ ԼՂ հիմնախնդրի վերջնական կարգավորումը պետք է լինի բացառապես խաղաղ ճանապարհով ԵԱՀԿ Մինսկի խմբի համանախագահության շրջանակներում:

19:29 - 19 նոյեմբերի, 2020

Չինաստանը և Հարավ-արևելյան Ասիայի պետությունների ասոցիացիայի երկրները տնտեսական գործընկերության մասին համաձայնագիր են ստորագրել |armenpress.am|

armenpress.am: Չինաստանը, Հարավ-արևելյան Ասիայի պետությունների ասոցիացիայի անդամ 10 երկրներ, ինչպես նաև Ճապոնիան, Հարավային Կորեան, Ավստրալիան և Նոր Զելանդիան տարածաշրջանային տնտեսական գործընկերության մասին համաձայնագիր են ստորագրել: Այս մասին հայտնում է «ՌԻԱ նովոստի»-ն: Համաձայնագրի ստորագրման արարողությունը կայացել է Հարավ-արևելյան Ասիայի պետությունների ասոցիացիայի ամենամյա գագաթնաժողովի ընթացքում՝ տեսակապի ձևաչափով:

12:16 - 15 նոյեմբերի, 2020

Չինաստանը շնորհավորում է Ջո Բայդենին հաղթանակի կապակցությամբ |azatutyun.am|

azatutyun.am: Պաշտոնական Պեկինը շնորհավորել է ընտրյալ նախագահ Ջո Բայդենին ընտրություննեում հաղթելու կապակցությամբ: «Չինաստանը հարգում է Ամերիկայի ժողովրդի ընտրությունը և շնորհավորում է դեմոկրատական թեկնածու Ջո Բայդենին, միաժամանակ մենք հաշվի ենք առնում այն հանգամանքը, որ ԱՄՆ-ում ընտրությունների արդյունքները կամփոփվեն ամերիկյան համապատասխան օրենքով»,- այսօր հայտարարել է Չինաստանի արտաքին գործերի նախարարության պաշտոնական ներկայացուցիչ Վան Վենբինը: Ջո Բայդենին հաղթանակի կապակցությամբ շնորհավորել են մեծ թվով պետություններ և միջազգային հաստատություններ: Ռուսաստանը դեռ պաշտոնապես չի շնորհավորել Բայդենին, սակայն ընդգծել է, որ «Կրեմլը պատրաստ է համագործակցել ԱՄՆ հաջորդ նախագահի հետ»: Գործող հանրապետական նախագահ Դոնալդ Թրամփը դեռ հրաժարվում է ճանաչել մրցակցի հաղթանակը և շնորհավորել նրան:

13:48 - 13 նոյեմբերի, 2020

Չինաստանը հորդորել Է հրաժարվել երկակի ստանդարտներից ահաբեկչության դեմ պայքարի հարցերում |armenpress.am|

armenpress.am: Չինաստանը Ֆրանսիայում տեղի ունեցած հարձակումից հետո երկրներին հորդորել Է հրաժարվել երկակի ստանդարտներից ահաբեկչության դեմ պայքարի հարցերում: Այդ մասին հոկտեմբերի 30-ին կայացած ճեպազրույցում հայտարարել Է ՉԺՀ-ի ԱԳ նախարարության պաշտոնական ներկայացուցիչ Վան Վենբինը: «Ես կցանկանայի ասել, որ, իսկապես, մենք նույնպես զգացել ենք, որ մի շարք երկրներ պաշտպանում են երկակի ստանդարտները ահաբեկչության դեմ պայքարի հարցերում եւ այն հարցերում, որոնք վերաբերում են չինական Սինցզյանին: Մենք կարծում ենք, որ դա չի համապատասխանում ահաբեկչության դեմ պայքարի հարցում միջազգային հանրակցության ընդհանուր շահերին»,-պատասխանել Է դիվանագետը Փարիզի եւ մի շարք այլ երկրների այն հակազմանը մեկնաբանելու խնդրանքին, որը վերաբերում Է Ֆրանսիայում իրադրության սրմանը: Նրա խոսքով՝ «հարկ Է հրաժարվել երկակի ստանդարտներից ահաբեկչության դեմ պայքարի հարցերում եւ հարկավոր չԷ միջամտել Չինաստանի ներքին գործերին՝ որպես պատրված օգտագործելով Սինցզյանի հետ կապված հարցերը»: Հոկտեմբերի 29-ին դանակով զինված տղամարդը Նիսի կենտրոնում հարձակվել Է Նոտր Դամ եկեղեցու ծխականների վրա: Միջադեպի հետեւանքով զոհվել Է երեք մարդ: Հարձակվողը ձերբակալված Է: «Նա «Ալլահ աքբար» Էր գոռում նույնիսկ այն ժամանակ, երբ նրան բուժօգնություն Էին ցուցաբերում ձերբակալելուց հետո»,-լրագրողներին պատմել Է Նիսի քաղաքագլուխը: Բոլորը նշում են, որ տեղի ունեցածն ահաբեկչական գործողություն Է, ընդգծել Է քաղաքապետը: Քաղաք Էր ժամանել նաեւ Ֆրանսիայի նախագահ Էմանուել Մակրոնը: ԱՄՆ-ը եւ իր դաշնակիցները կանոնավոր կերպով մեղադրում են Չինաստանին Սինցզյան-Ույղուրական ինքնավար օկրուգում ույղուր Էթնիկ փոքրամասնության իրավունքները խախտելու մեջ, Պեկիին այդ մեղադրանքները կտրականապես հերքում Է, հաղորդել Է ՌԻԱ Նովոստին:

16:29 - 30 հոկտեմբերի, 2020

Միջուկային զենքի արգելման պայմանագիրն ուժի մեջ կմտնի 2020 թ. հունվարի 22-ից |tert.am|

tert.am: Միջուկային զենքի արգելման մասին պայմանագիրը ուժի մեջ կմտնի 2021 թ. հունվարի 22-ից, հաղորդում է ТАСС-ը՝ հղում անելով Միջուկային զենքի արգելման միջազգային շարժման (ICAN) հաղորդագրությանը: Պայմանագիրը վավերացվել է 50 երկրի կողմից: «Սա միջուկային զինաթափման ոլորտում նոր փուլ է: Տասնյակ տարիների ակտիվ աշխատանքի արդյունքում հնարավոր եղավ հասնել նրան, ինչը շատերն անհնար էին համարում: Այսպիսով, միջուկային զենքն արգելված է»,- հայտարարել է ICAN-ի գործադիր տնօրեն Բեատրիս Ֆինը: Միջուկային զենքի արգելման պայմանագիրն ընդունվել է 2017 թ. հուլիսի 7-ին, Նյու Յորքում 122 պետության հավանությամբ, այդ թվում՝ Ռուսաստանի, Մեծ Բրիտանիայի, Չինաստանի, ԱՄՆ-ի և Ֆրանսիայի, այն է՝ ՄԱԿ-ի Անվտանգության խորհրդի մշտական 5 անդամների: Պայմանագրին միացած պետությունները պարտավորվում են երբեք և որևէ պարագայում չմշակել, չփորձարկել, չարտադրել և չկուտակել միջուկային զենք, ինչպես նաև՝ չկիրառել այն կամ էլ հանդես գալ նման սպառնալիքով, ինչպես նաև՝ իրենց տարածքում չտեղակայել այլ պետության միջուկային զենքը:

09:47 - 25 հոկտեմբերի, 2020

Չինաստանն անիմաստ Է համարել սպառազինությունների շուրջ բանավեճերի եռակողմ ձեւաչափը |armenpress.am|

15:56 - 13 հոկտեմբերի, 2020

Մխիթար Հայրապետյանը Չինաստանի հավատարմարարին ներկայացրել է շփման գծում տիրող իրավիճակը

ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը այցելել է Հայաստանում Չինաստանի Ժողովրդական Հանրապետության դեսպանության նոր մասնաշենք և հանդիպում ունեցել ՀՀ-ում ՉԺՀ դեսպանության գործերի ժամանակավոր հավատարմատար Ճոու Հունյուի հետ: Այս մասին հայտնեցին Մխիթար Հայրապետյանի գրասենյակից: Մխիթար Հայրապետյանը պարոն Հունյուին, դեսպանության աշխատակիցներին և, ի դեմս նրանց՝ Չինաստանի ողջ ժողովրդին շնորհավորել է ազգային տոնի՝ Չինաստանի Ժողովրդական Հանրապետության հիմնադրման 71-րդ տարեդարձի առթիվ: ԱԺ պատգամավորը հանդիպման ընթացքում մանրամասն ներկայացրել է շփման գծի ողջ երկայնքով թուրք-ադրբեջանական ագրեսիայի հետևանքով ստեղծված իրավիճակը, խոսել է նաև Հայաստանի ու Արցախի խաղաղ բնակչության և քաղաքացիական ենթակառուցվածքների դիտավորյալ թիրախավորման վերաբերյալ՝ ուշադրություն հրավիրելով ռազմական գործողություններում Ադրբեջանի զինված ուժերում, ըստ հավաստի տեղեկությունների, հենց Թուրքիայի միջոցով վարձկան ահաբեկիչների ներգրավման հանգամանքի վրա։ Հայրապետյանը դեսպանության գործերի ժամանակավոր հավատարմատարին հայտնել է, որ այն ռազմական գործողությունները, որոնք վերջին օրերին իրականացվում են հայկական զինված ուժերի կողմից ի պատասխան թուրք-ադրբեջանական դաշինքի ագրեսիայի, ոչ միայն լուծում են մեր հարենակիցների ֆիզիկական անվտանգության խնդիրը, այլև միտված են տարածաշրջանում անվտանգության և կայունության ամրապնդմանը, ինչպես նաև Էրդողանի՝ պանթյուրքական ծրագրերի խափանմանը: Պարոն Հունյուն էլ, իր հերթին, վերահաստատել է Չինաստանի դիրքորոշումն Արցախյան հիմնախնդրի շուրջ՝ հույս հայտնելով, որ խնդիրը կհանգուցալուծվի խաղաղ բանակցությունների միջոցով:

15:59 - 02 հոկտեմբերի, 2020

ՉԺՀ ԱԳՆ-ն հուսով է, որ ԼՂ հակամարտության կողմերը կխուսափեն լարվածության հետագա աճից |armenpress.am|

armenpress.am: Չինաստանի ԱԳՆ-ում հուսով են, որ ղարաբաղյան հակամարտության մեջ ներգրավված կողմերը սառը դատողությամբ կառաջնորդվեն, կցուցաբերեն զսպվածություն, կխուսափեն լարվածության հետագա աճից և կլուծեն խնդիրները քաղաքական երկխոսության միջոցով: Այս մասին նշել է ՉԺՀ ԱԳՆ մամուլի խոսնակ Վանգ Վենբինի՝ պատասխանելով «Reuters» լրատվական գործակալության հարցին։ Հարցի ու պատասխանի ոչ պաշտոնական թարգմանությունը ներկայացվում է ամբողջությամբ։ Հարց․ Կիրակի օրը Լեռնային Ղարաբաղում Հայաստանի և Ադրբեջանի միջև տեղի ունեցած լուրջ բախումների հետևանքով զոհվել է առնվազն 16 զինվորական և մի քանի քաղաքացիական անձ: Սա կասկածի տակ է դնում կայունությունը Հարավային Կովկասում, որը հանդիսանում է գազա- և նավթամուղների անցման կարևոր միջանցք: Ինչպե՞ս կմեկնաբանեք այս իրավիճակը: Վանգ Վենբին․ Մենք ստացել ենք համապատասխան զեկույցներ: Տարածաշրջանում խաղաղության և կայունության պահպանումը բխում է բոլոր կողմերի շահերից, այդ թվում՝ Հայաստանի և Ադրբեջանի: Հույս ունենք, որ ներգրավված կողմերը սառը դատողությամբ կառաջնորդվեն, կցուցաբերեն զսպվածություն, կխուսափեն լարվածության հետագա աճից և կլուծեն խնդիրները քաղաքական երկխոսության միջոցով:

00:07 - 30 սեպտեմբերի, 2020

Չինաստանը Լեռնային Ղարաբաղի իրադրության ապաԷսկալացիայի կոչ Է արել |armenpress.am|

armenpress.am: Չինաստանի կառավարությունը Հայաստանին եւ Ադրբեջանին Լեռնային Ղարաբաղի իրադրության շուտափույթ ապաԷսկալացիայի եւ երկխոսության միջոցով տարաձայնությունների կարգավորման կոչ Է արել: Սեպտեմբերի 28-ին կայացած ճեպազրույցում այդ մասին հայտարարել Է ՉԺՀ-ի արտգործնախարարության պաշտոնական նեկայացուցիչ Վան Վենբինը: «Չինաստանը կարծում Է, որ տարածաշրջանում խաղաղության եւ կայունության պահապնումը համապատասխանում Է բոլոր կողմերի, ներառյալ Հայաստանի եւ Ադրբեջանի շահերին: Հուսով ենք, որ համապատասխան կողմերը հանդես կբերեն զսպվածություն եւ միջոցներ կձեռնարկեն՝ բախումների հետագա սաստկացումից խուսափելու համար»,- նշել Է նա: «Հույս ենք հայտնում, որ նրանք տարաձայնությունները կգարգավորեն քաղաքական երկխոսության միջոցով»,- հավելել Է դիվանագետը:

14:23 - 28 սեպտեմբերի, 2020

Վարչապետն ընդունել է Հայաստանում Չինաստանի դեսպան Թիան Էրլունին

Վարչապետ Նիկոլ Փաշինյանն այսօր ընդունել է Հայաստանում Չինաստանի արտակարգ և լիազոր դեսպան Թիան Էրլունին, ով ավարտում է դիվանագիտական առաքելությունը մեր երկրում: Վարչապետի աշխատակազմի տեղեկատվության և հասարակայնության հետ կապերի վարչությունը հայտնում է, որ Փաշինյանը նշել է՝ դեսպանի պաշտոնավարման տարիներին երկու պետությունների համագործակցությունը տարբեր ուղղություններով եղել է սերտ ու արդյունավետ: Վարչապետն ընդգծել է, որ ՀՀ կառավարությունը շահագրգռված է Չինաստանի հետ գործակցությունն ընդլայնել ու առավել ամրապնդել: Թիան Էրլունը ասել է, որ չինական կողմը ևս հետաքրքրված է Հայաստանի հետ քաղաքական, տնտեսական և հումանիտար կապերի ընդլայնմամբ: Դեսպանի խոսքով՝ անցած տարիների ընթացքում երկու պետությունների միջև աճել է առևտրաշրջանառությունը, ընդլայնվել են հումանիտար կապերը: Նա վստահություն է հայտնել, որ երկկողմ համագործակցության մեծ ներուժը կիրացվի առաջիկա տարիների ընթացքում, ինչի հիմքը Հայաստանի և Չինաստանի կառավարությունների կամքն է: Հանդիպման ընթացքում զրուցակիցները քննարկել են նաև ճանապարհաշինության, ենթակառուցվածքների զարգացման, զբոսաշրջության, առողջապահության, կրթական ոլորտներում համագործակցությանը և նոր ծրագրերի իրականացմանը վերաբերող հարցեր:

19:27 - 23 սեպտեմբերի, 2020