«Քաղաքացիական պայմանագիր» կուսակցություն - ՔՊ

2021 թվականի հունիսին տեղի ունեցած խորհրդարանական արտահերթ ընտրությունների արդյունքում ՀՀ-ում կառավարություն ձեւավորած եւ խորհրդարանական մեծամասնություն դարձած քաղաքական կուսակցություն է։ 8-րդ գումարման խորհրդարանում՝ «Քաղաքացիական պայմանագիր» խմբակցություն։

Որպես միավոր՝ ձեւավորվել է 2013 թվականին։ Կուսակցությունը պաշտոնապես ստեղծվել է 2015 թվականին։

Կուսակցությունը «Իմ քայլը» դաշինքի կազմով բացարձակ մեծամասնություն է եղել նաեւ ՀՀ 7-րդ գումարման Ազգային ժողովում։ 

Իսկ 2017 թվականի խորհրդարանական ընտրություններին կուսակցությունը դաշինքով էր հանդես եկել «Հանրապետություն» եւ «Լուսավոր Հայաստան» կուսակցութունների հետ, ԱԺ-ում «Ելք» խմբակցություն ձեւավորել՝ 9 պատգամավորով։ Նույն դաշինքով կուսակցությունը մասնակցել էր նաեւ 2017թ․ Երեւանի քաղաքապետի եւ ավագանու ընտրություններին՝ ունենալով 14 հոգանոց խմբակցություն։

2018 թվականին Երեւանի քաղաքապետի ու ավագանու արտահերթ ընտրությունների ժամանակ կուսակցությունը մասնակցել էր «Առաքելություն» կուսակցության հետ՝ «Իմ քայլը» դաշինքով․ դաշինքի ցուցակը գլխավորող Հայկ Մարությանը դարձավ Երեւանի քաղաքապետ` ստանալով 80%-ից ավել քվե։

Փաշինյանը կատարյալ անհեթեթություն անվանեց ականապատ դաշտերի քարտեզները ՌԴ-ից թաքցնելու մասին լուրերը |armenpress.am|

Փաշինյանը կատարյալ անհեթեթություն անվանեց ականապատ դաշտերի քարտեզները ՌԴ-ից թաքցնելու մասին լուրերը |armenpress.am|

armenpress.am: «Քաղաքացիական պայմանագիր» կուսակցության նախընտրական ցուցակը գլխավորող, ՀՀ վարչապետի պաշտոնակատար Նիկոլ Փաշինյանի գլխավորությամբ, հունիսի 14-ին Արարատի մարզում քարոզարշավը եզրափակեց Արտաշատում:  Նիկոլ Փաշինյանը բնակիչների հետ հանդիպմանը շնորհակալություն հայտնեց իրենց աջակցելու համար: Նա վստահություն հայտնեց, որ քաղաքացիները հունիսի 20-ին հաստատելու են սեփական իշխանությունը: Նիկոլ Փաշինյանն, անդրադառնալով  օրեր առաջ հայ ռազմագերիների վերադարձին Հայաստան, նշեց, որ նրանցից մի քանիսը Արարատի մարզից են: «Կան ուժեր, որոնք ոչ միայն չեն ուրախացել, այլև տխրել են այդ կապակցությամբ ու այս քանի օրն ինչ բամբասանք ասես տարածում են: Վերջին ամենաթարմ բամբասանքն այն է, որ իբր մենք Ռուսաստանի մեր գործընկերներից թաքցրել ենք ականապատ դաշտերի քարտեզները: Դա կատարյալ անհեթեթություն է: Մինչ այս մենք ադրբեջանական կողմին ականապատ քարտեզներ փոխանցել ենք, դա արել ենք մեր ռուս գործընկերների միջոցով: Ես ինքս էլ ասել եմ, որ ՌԴ ԱԳ նախարար Սերգեյ Լավրովի հետ ուղարկել ենք այդ քարտեզներից օրինակներ: Նաև ուզում եմ ընդգծեմ, որ այս հարցի հետ կապված ոմանք ցանկանում են ՀՀ-ի և ՌԴ-ի միջև հարաբերություններում սեպ խրել, ասեմ, որ դա չի ստացվի: Մենք շնորհակալ ենք ոչ միայն ԱՄՆ-ի, Վրաստանի, ԵՄ-ի մեր գործընկերներին, որոնք 15 ռազմագերիների վերադարձի հարցում մեծ գործ են ունեցել, բայց ես ուզում եմ հիշեցնել, որ դրանից առաջ Ռուսաստանի ներկայացուցիչներն են շատ մեծ արդյունավետությամբ աշխատել: Նախկինում ավելի քան 50 գերիների վերադարձը ՌԴ իշխանությունների ջանքերի շնորհիվ է: Համոզված եմ, չեմ կասկածում, որ մեր ռուս գործընկերները ոչ մի րոպե չեն մոռանում գերիների հարցը»,-ասաց Նիկոլ Փաշինյանը: Նրա խոսքով, նախորդ տարվա նոյեմբերի 9-ից հետո տասնյակից ավելի հեռախոսային խոսակցություններ է ունեցել ՌԴ նախագահի հետ: Նա նշեց, որ այս տարի երկու անգամ դեմ առ դեմ հանդիպում է եղել ՌԴ նախագահի հետ, և քննարկումների առանցքային հարցը  գերիների վերադարձն էր: Նիկոլ Փաշինյանն ընդգծեց, որ Վլադիմիր Պուտինն անձամբ է այս հարցով զբաղվել: Անդրադառնալով ականապատ քարտեզների հարցի շահարկմանը՝ Նիկոլ Փաշինյանը նշեց, որ այնպես չէ, որ ունեցած բոլոր քարտեզները վերադարձրել են: Տրվել է մի փոքր մասը՝ գերիների վերադարձին ի պատասխան: Նա ընդգծեց, որ խոսքը չի գնում այն հատվածի քարտեզների մասին, որոնք բաժանում են Հայաստանին ու Ադրբեջանին: Խոսքն այն տարածքների մասին է, որոնք ցավալի իրադարձություններով պայմանավորված գտնվում են ադրբեջանցիների թիկունքում: «Մենք այսօր կարող ենք արձանագրել, որ գերիների վերադարձի գործընթացը վերսկսվել է:  Այսօր Ադրբեջանում դատական գործընթացներ են տեղի ունենում, չեմ բացառում, որ մեր գերիները դատապարտվեն, բայց ես ուզում եմ ձեզ բերել Կարեն Ղազարյանի օրինակը, ով դատապարտվեց, սակայն այսօր նա Բերդավանի իրենց տանն է: Այնպես, որ մենք մեր ճանապարհից որևէ կերպ չպետք է շեղվենք»,-հավելեց Նիկոլ Փաշինյանը: Նիկոլ Փաշինյանի գլխավորությամբ «Քաղաքացիական պայմանագիր» կուսակցության Արտաշատում անցկացրած հանդիպումը եզրափակվեց երթով: 
18:43 - 14 հունիսի, 2021
Մենք Հայաստանում հաստատել ենք քրիստոնյա իշխանություն, որովհետև մեր իշխանությունը հենվել է բազմաց ձայնի վրա, իսկ ձայն բազմաց՝ ձայն Աստծո․ Նիկոլ Փաշինյան |tert.am|

Մենք Հայաստանում հաստատել ենք քրիստոնյա իշխանություն, որովհետև մեր իշխանությունը հենվել է բազմաց ձայնի վրա, իսկ ձայն բազմաց՝ ձայն Աստծո․ Նիկոլ Փաշինյան |tert.am|

tert.am: Մենք գտնվում ենք մի գյուղում, տարածքում, որը մեր քրիստոնեական հավատքի էպիկենտրոնն է, որովհետև այստեղ է գտնվում Խոր Վիրապը, որը կառուցվել է Լուսավորչի գբի վրա, որտեղ նա պահվել է։ Այս մասին «Քաղաքացիական պայմանագիր» կուսակցության՝ Արարատի մարզի Փոքր Վեդի համայնքում կայացած քարոզարշավին հայտարարեց Նիկոլ Փաշինյանը։ Նա նշեց՝ Տրդատ թագավորը խոզանման կերպարանք էր ստացել, և Գրիգոր Լուսավորիչը նրան վերադարձրել է մարդկային կերպարանքը, ապա հայտարարեց․ «Ես կարծում եմ՝ այս պատմության մեջ շատ մեծ սիմվոլ կա, և մեր իրականության ամենամեծ պրոբլեմներից մեկը խոզակերպ իշխանությունն է։ Խոզակերպ իշխանությունը ընդհանրապես ամենամեծ պրեբլեմն է մեր երկրի, և մեր խնդիրն է  եղել, և 2018-ի հեղափոխությունը դրա համար է տեղի ունեցել, որ ՀՀ-ում խոզակերպ իշխանության էջը փակվի»,- ասաց նա՝ նշելով, թե այդտեղ շատ մեծ քրիստոնեական սիմվոլ կա։ «Ես պատահական չէի ասում, որ 2018-ին մեր հեղափոխությունը հենված էր հենց քրիստոնեական արժեքների վրա, և հենց այս համեմատությամբ կարելի է տեսնել այդ արժեքը։ Խոսքը տեսքի մասին չէ, մի մարդ կարող է ավելի սիրունատես լինել, մյուսը կարող է ավելի ոչ այնքան լավ արտաքին ունենալ, խոսքը ներքին բովանդակության և ժողովրդի հետ հարաբերությունների մասին։ Մենք Հայաստանում հաստատել ենք քրիստոնյա իշխանություն, որովհետև մեր իշխանությունը հենվել է բազմաց ձայնի վրա, իսկ ձայն բազմաց՝ ձայն Աստծո»,-ասաց նա։ Շարունակությունը՝ tert.am-ում։
13:43 - 14 հունիսի, 2021
Քարոզարշավ օր 8. քաղաքական ուժերը շարունակում են արշավներ իրականացնել ՀՀ մարզերում |armenpress.am|

Քարոզարշավ օր 8. քաղաքական ուժերը շարունակում են արշավներ իրականացնել ՀՀ մարզերում |armenpress.am|

armenpress.am: Ասուլիսներ, հանրահավաքներ և քայլերթներ իրականացնելով քաղաքական ուժերը կշարունակեն արտահերթ խորհրդարանական ընտրությունների նախընտրական քարոզարշավները։ Ընտրություններին մասնակցում է 25 քաղաքական ուժ՝ 21 կուսակցություն և 4 դաշինք: Ընտրություններն անց են կացվելու հունիսի 20-ին: «Ազատ հայրենիք» դաշինքը հունիսի 14-ին լինելու է Կոտայքի մարզում։ Ժամը 11։00-ին նրանք կլինեն Բյուրեղավանում, ապա 12։30-ին՝ Նոր Հաճնում, 14։00-ին՝ Եղվարդում։ Ժամը 20։00-ին կուսակցության ներկայացուցիչները հանդես կգան մամուլի ասուլիսով՝ Երևանի Դավթաշեն վարչական շրջանի Դավթաշենի այգում։ «Լուսավոր Հայաստան» կուսակցությունը քարոզարշավի 8-րդ օրը մեկնարկելու է Երևանի Շենգավիթ վարչական շրջանում՝ Գարեգին Նժդեհի անվան հրապարակում՝ ժամը 11։00-ին։ Լրագրողների հետ հանդիպումը տեղի կունենա նույն վայրում և նույն ժամին։ «Ազգային-ժողովրդավարական բևեռ» կուսակցությունը քարոզարշավն իրականացնելու է Տավուշի և Գեղարքունիքի մարզերում, աշխատելու են մի քանի խմբով։ Ժամը 13։00-ին քաղաքական ուժի ներկայացուցիչները Գավառում հանդիպեն քաղաքացիների հետ, ապա կմեկնեն Վարդենիս՝ ժամը 16։00-ին, իսկ 18։00-ին՝ Մարտունի։ Տավուշի մարզում մեկնարկը կրտվի ժամը 13։00-ին Դիլիջան քաղաքից, ապա 16։00-ին կլինեն Իջևանում, իսկ 18։00-ին՝ Նոյեմբերյանում։ Նույն ժամին կլինեն նաև Բերդ համայնքում։ ԱԺԲ կուսակցությունը Երևանում նույնպես հանդիպումներ կունենա համակիրների հետ՝ սկսած 19։00-ից կլինեն Քանաքեռ-Զեյթուն, Մալաթիա-Սեբաստիա, Էրեբունի վարչական շրջաններում։  «Ինքնիշխան Հայաստան» կուսակցությունը՝ Դավիթ Սանասարյանի գլխավորությամբ քարոզարշավն իրականացնելու է Արագածոտնի մարզում։ Կուսակցության անդամները ժամը 16։00-ին կլինեն Աշտարակում, այնուհետև կվերադառնան Երևան՝ Աջափնյակ վարչական շրջան։ «Քաղաքացիական պայմանագիր» կուսակցությունը՝ Նիկոլ Փաշինյանի գլխավորությամբ, քարոզարշավն իրականացնելու է Արարատի մարզում։ Կուսակցության ներկայացուցիչները բնակիչների հետ հանդիպումները կսկսեն ժամը 10։00-ից՝ Անթապից, ապա 10։30-ին կլինեն Մասիսում, 11։30-ին՝ Արևշատում, 12։10-ին՝ Վերին Արտաշատում, 13։00-ին՝ Փոքր Վեդիում, 15։00-ին՝ Վեդիում, 15։30-ին՝ Արարատում, 16։20-ին՝ Ավշարում, 16։50-ին՝ Ոսկետափում և 18։30-ին՝ Արտաշատում։ «Հայաստան» դաշինքը՝ ՀՀ երկրորդ նախագահ Ռոբերտ Քոչարյանի գլխավորությամբ և մյուս առաջնորդների մասնակցությամբ կլինեն Արմավիրի մարզում և Երևանում։ Ժամը 12։40-ից սկսած հանդիպումներ կլինեն Էջմիածնում, 15։30-ին՝ Մեծամորում, 17։00-ին Քարակերտում և 18։00-ին՝ Արմավիրում։ Ժամը 19։30-ին դաշինքի անդամները կլինեն Երևանում՝ Գարեգին Նժդեհի հրապարակում։ «Հայ ազգային կոնգրես» կուսակցության ներկայացուցիչները կլինեն Կոտայքի և Գեղարքունիքի մարզերում, կհանդիպեն ընտրողների հետ, կներկայացնեն կուսակցության ծրագիրն ու ապագայի տեսլականը։ Կուսակցության անդամները ժամը 13։00-ին հանդիպումներ կունենան Քաղսի գյուղում, ապա 18։00-ին՝ Նորատուս գյուղում։ «Պատիվ ունեմ» դաշինքը հունիսի 14-ին հանդես կգա ասուլիսով, որը կմեկնարկի ժամը 12։00-ին։ Բանախոսը կլինի «Հայրենիք» կուսակցության անդամ Արսեն Բաբայանը։ Կքննարկվեն ներքաղաքական զարգացումները, նախընտրական քարոզարշավին առնչվող հարցեր։
09:18 - 14 հունիսի, 2021
ԿԸՀ-ն որոշումներ է կայացրել Փաշինյանի գրանցման ու ՔՊ ցուցակի անվավեր ճանաչման դիմումների վերաբերյալ

ԿԸՀ-ն որոշումներ է կայացրել Փաշինյանի գրանցման ու ՔՊ ցուցակի անվավեր ճանաչման դիմումների վերաբերյալ

ՀՀ կենտրոնական ընտրական հանձնաժողովը հունիսի 13-ին գումարած նիստում քննության է առել Էդգար Ղարզարյանի և Նաիրա Զոհրաբյանի դիմումները։ Դրանցից առաջինով պահանջվել էր անվավեր համարել «Քաղաքացիական պայմանագիր» կուսակցության ցուցակում վարչապետի թեկնածու Նիկոլ Փաշինյանի գրանցումը և վարչական վարույթ հարուցել։ Նաիրա Զոհրաբյանը ԿԸՀ էր դիմել՝ պահանջելով, որ հանձնաժողովը դիմի Վարչական դատարան` «Քաղաքացիական պայմանագիր» կուսակցության ընտրական ցուցակի գրանցումն անվավեր ճանաչելու համար: Նրա դիմումի հիմքում նաև այն պատճառաբանությունն է եղել, որ քարոզարշավին «Քաղաքացիական պայմանագիր» կուսակցությունը հնչեցնում է վիրավորանքներ: Նիստը վարող ԿԸՀ նախագահ Տիգրան Մուկուչյանի գլխավորությամբ հանձնաժողովը մերժեց Էդգար Ղազարյանի դիմումը, որն, ըստ հանձնաժողովի, ներկայացվել է ոչ իրավասու կառույցի կողմից. դա պետք է լիներ կուսակցությունը կամ դաշինքը, որը մասնակցում է տվյալ ընտրություններին։ Այս որոշումը ԿԸՀ-ն կայացրեց 5 կողմ, 0 դեմ ձայների հարաբերակցությամբ։ Նաիրա Զոհրաբյանի դիմումը ևս մերժվեց նույն հիմնավորումով և ձայների նույն հարաբերակցությամբ։ Տիգրան Մուկուչյանը տեղեկացրեց, որ մերժումների որոշումները կարող են եռօրյա ժամկետում բողոքարկվել Վարչական դատարանում:
19:36 - 13 հունիսի, 2021
Ընտրակեղծարարները խոսում են, որ այս իշխանությունները պատրաստվում են կեղծել ընտրությունները․ Արարատ Միրզոյան

Ընտրակեղծարարները խոսում են, որ այս իշխանությունները պատրաստվում են կեղծել ընտրությունները․ Արարատ Միրզոյան

Շատ տարբեր են այն խոսույթները, ձևակերպումները, որոնք կիրառվում են ընդդիմադիր մի քանի ուժերի կողմից, և «Քաղաքացիական պայմանագրի» կողմից, մեր բանախոսների կողմից զանազան հարթակներում։ Այս մասին «Առաջին լրատվական»-ին տված հարցազրույցի ընթացքում հայտարարել է յոթերորդ գումարման Ազգային ժողովի նախագահ, «Քաղաքացիական պայմանագիր» կուսակցության նախընտրական ցուցակի երկրորդ համար Արարատ Միրզոյանը։ Նրա խոսքով՝ անտեսանելի գիծ կա իշխանությունների դեմ պայքարելու, և արդեն այդ պայքարը պետության և ողջ հասարակության դեմ տանելու։ «Սա մաքուր պատերազմ է ՀՀ –ի դեմ և ՀՀ-ում հիմա կան մարդիկ, կան քաղաքական ուժերի ղեկավարներ, ներկայացուցիչներ, որոնք տանում են այս պատերազմը։ Ես կրկնում եմ՝ երբեմն նույնիսկ տպավորություն է ստեղծվում, որ որոշ ընդդիմադիրների ձևակերպումները, գործողությունները և Ադրբեջանի իշխանությունների գործողությունները կարծես թե համակարգված են և մի կենտրոնից ուղղորդվեն։ Համենայն դեպս, շահերը մեկին մեկին այդպիսի պարագաներում համընկնում են»։ Արարատ Միրզոյանը նշեց, որ իր խոսքը հիմնականում վերաբերում է այն քաղաքական ուժերին, որոնք մասնակցում են խորհրդարանական արտահերթ ընտրություններին։ «Ես նկատի ունեմ հենց Ռոբերտ Քոչարյանի ղեկավարած ուժին, Ռոբերտ Քոչարյանին, նկատի ունեմ Սերժ Սարգսյանին և նրա ղեկավարած ուժին, նախկին վարչապետ կար՝ նա էլ է մասնակցում՝ Հրանտ Բագրատյանը, որը հուշում էր՝ երբ ու ոտեղից է պետք  հարձակվել Հայաստանի վրա։ Մարդիկ կան, որ նախընտրական հոլովակներ ունեն, որտեղ ցույց է տալիս՝ ինչպես են բայրաքթարները հարվածներ հասցնում մեր զինուժին, այդ մարդիկ հաճույքով տարածում են հոլովակները, որոնք ստեղծված են ադրբեջանական քարոզչության մեքենայի կողմից և ուղղված եղել են և մինչ այժմ էլ ուղղված են մեր զինվորականների ռազմական ոգին կոտրելուն, և ընդհանրապես հայ ազգի դիմադրական ոգին կոտրելուն»։ Անդրադառնալով որոշ քաղաքական ուժերի դիտարկումներին, ըստ որոնց հունիսի 20-ին սպասվող խորհրդարանական արտահերթ ընտրությունները վատագույն ընտրություններն են լինելու, Միրզոյանը նշեց․ «Գողերն ու ավազակները խոսում են, որ այս իշխանությունները թալանում են, ընտրակեղծարարները խոսում են այն մասին, որ այս իշխանությունները պատրաստվում են ընտրություններ կեղծել։ Կարծեմ դա առաջին նախագահն էր ասել, որ վատագույն ընտրություններն են լինելու։ Խնդրում եմ, թող այդ մարդը և իր համակիրները հիշեն 1995 և 1996 թ․-ի ընտրությունները»։ Միրզոյանի խոսքով՝ 1991 թ․-ին դեմոկրատական ընտրություններ ունենալուց հետո առաջին անգամ մարդկանց պատկերացումներն ու երազանքները փշրվեցին այդ ընտրակեղծարարության ժայռերին, որոնք հիմնադրեցին և առաջինը իրականացրեցին իրենք 1995 և 1996-ին։ «Իրենց ի՞նչ է թվում, մարդկանց հիշողությունը այդքան կարճ է, կամ մոռացել ենք, կամ վե՞րջ, որ Արցախյան պատերազմ եղավ, էլ ոչ մեկ չի՞ հիշում, որ իրենք ընտրություն են կեղծել, էն մյուսները մարդ են սպանել Երևանի փողոցներում, Մարտի 1-ին կամ հարսնաքարներում, կամ Պապլավոկի սանհանգույցում»։ Նա նաև հավելեց,  որ ընտրապայքարը, քարոզարշավը և ձևակերպումները բավականին կտրուկ են և թեժ են։ «Մի կողմից սա լավ չի, որովհետև, այնուամենայնիվ, ցանկալի կլիներ ունենալ քաղաքական բանավեճ քաղաքական բովանդակության շուրջ՝ մի քիչ այլ տերմինաբանությամբ, բայց մյուս կողմից գուցե բարին այս է, և պետք է վերջնականապես գծեր քաշվեն, այդ մերժվածների կույտը ընդհանրապես նետվի պատմության աղբանոց։ Իրավունք չունեն և տեղ չունեն նրանք հայկական իրականության մեջ, որքան էլ որ իրենց միլիոնների հաշվին փորձեն մի քանի հոգի հավաքել իրենց կամ իրենց շտաբերի շուրջ և ինչ-որ շարժման իմիտացիա ստեղծել»։
18:30 - 12 հունիսի, 2021
Ինչպե՞ս է լուծվելու Արցախյան հիմնախնդիրը․ ՔՊ-ի, ԼՀԿ-ի, ՀԱԿ-ի և «Պատիվ ունեմ» դաշինքի ներկայացուցիչները ներկայացրին իրենց տեսակետները

Ինչպե՞ս է լուծվելու Արցախյան հիմնախնդիրը․ ՔՊ-ի, ԼՀԿ-ի, ՀԱԿ-ի և «Պատիվ ունեմ» դաշինքի ներկայացուցիչները ներկայացրին իրենց տեսակետները

Մենք, ի վերջո, պիտի ընդունենք փաստը, որ խաղաղությունը չեն մուրում, չեն խնդրում, այն պարտադրում են։ Ե՛վ նախկին իշխանությունները, և՛ այսօրվա իշխանությունները ձախողել են իրենց պետականաշինության գործը, և դրա արդյունքում երկուսն էլ հրաժարվում են ստեղծել պարիտետային քննիչ հանձնաժողով, որը կքններ բացթողումները։ Այս մասին ասաց «Լուսավոր Հայաստան» կուսակցության պատգամավորի թեկնածու Գևորգ Գորգիսյանը՝ Ազատություն ՌԿ-ի՝ «Արցախյան հիմնախնդիր, անվտանգություն» թեմայով բանավեճի ժամանակ։ Թեմայի շուրջ «Հայ ազգային կոնգրես» կուսակցության պատգամավորի թեկնածու Արման Մուսինյանը նշեց, որ Հայաստանը ծնկած, ջարդված, կազմալուծված, կազմաքանդված վիճակում է այս իշխանությունների վարած քաղաքականության շնորհիվ։ «Մի օրինակ բերեմ․ խոսում ենք Արցախի հարցի կարգավորման մասին, Հայաստանում այսօր ԱԳՆ գոյություն չունի։ Ինչ պետք է անի նոր իշխանությունը։ Առաջինը՝ պետք է լուծի պետական համակարգի կառավարելիության հարցը և պետական ինստիտուտների անխափան աշխատանքի հարցը, ապահովի ներքաղաքական կայունությունը, որպեսզի ունենա ուժեղ թիկունք բանակցություններում, երրորդը նաև բանակի վերականգնումը և ակտիվորեն ներգրավի Արցախի հարցով արտաքին դիվանագիտական հարաբերությունների մեջ և՛ գործընկերների, դաշնակիցների, դաշնակից կազմակերպությունների, և՛ նաև հակառակորդների՝ այդ թվում Ադրբեջանին»,- հավելեց Մուսինյանը։ «Քաղաքացիական պայմանագիր» կուսակցությունից Ռուբեն Ռուբինյանն էլ ընդգծեց, որ ԵԱՀԿ Մինսկի խմբի շրջանակներում պիտի լուծվի հարցը, որը լուծված չէ, այսինքն՝ Արցախի կարգավիճակի հարցը՝ Արցախի ժողովրդի ինքնորոշման իրավունքի հիման վրա։  «Եթե նկատել եք, վերջին շրջանում միջազգային հանրությունը և ԵԱՀԿ ՄԽ համանախագահները ակտիվորեն խոսում են սրա մասին, և անհրաժեշտ է վերաակտիվացնել ՄԽ գործունեությունը, միաժամանակ սրանից անհնար է տարանջատել մեր անվտանգային համակարգը, մեր բանակի արդիականացումը պիտի սրան զուգահեռ ընթանա»։ «Պատիվ ունեմ» դաշինքի պատգամավորի թեկնածու Հայկ Մամիջանյանն էլ հայտնեց, որ իրենք հաստատ չեն կրկնի նախորդների սխալը, որը հետևյալն էր․ իրենք չգիտես ինչու փորձ էին կատարում բանակցել Ադրբեջանի հետ․ «Աշխարհում չկա ազգերի ինքնորոշման խնդիր, որը լուծվել է ուղիղ մետրոպոլիայի հետ բանակցություններով։ Դու չես կարող Ալիևի հետ բանակցել, որ էդ խնդիրը լուծես։ Դու պիտի բանակցես ամբողջ աշխարհի հետ, որ, ամբողջ աշխարհի մեծամեծներ անվանենք, գերտերություն անվանենք, ՄԽ համանախագահ երկրներ անվանենք, ճնշում գործադրեն մետրոպոլիայի վրա, որ դու կարողանաս ստանալ խնդրի լուծում։ Այլ կերպ ասած, լուծման տրամաբանությունը կարող է լինել միայն միջազգային շփումների և ոչ մի դեպքում Ադրբեջանի հետ ուղիղ բանակցությունների մեջ»։
17:55 - 12 հունիսի, 2021
Ծեծկռտուք՝ քարոզարշավի ժամանակ․ մասնակցել են Հակոբ Արշակյանը և այլ ՔՊ-ականներ |factor.am|

Ծեծկռտուք՝ քարոզարշավի ժամանակ․ մասնակցել են Հակոբ Արշակյանը և այլ ՔՊ-ականներ |factor.am|

factor.am: Հունիսի 9-ին Երևանի Արաբկիր վարչական շրջանում «Քաղաքացիական պայմանագիր» կուսակցության անդամների մասնակցությամբ միջադեպ է տեղի ունեցել։ Տեղեկությունը  հաստատեց Քննչական կոմիտեի խոսնակ Վարդան Թադևոսյանը։ «Գործը ոստիկանությունից ուղարկվել է Արաբկիրի քննչական բաժին, հիմա նյութեր են նախապատրաստվում։ Առայժմ այլ տեղեկություններ չեմ կարող հաղորդել»,- նշեց Թադևոսյանը։ Տեղի ունեցածին իր ֆեյսբուքյան էջում անդրադարձել է նաև «Քաղաքացիական պայմանագիր» կուսակցության մամուլի խոսնակ, ԱԺ «Իմ քայլը» խմբակցության պատգամավոր Վահագն Ալեքսանյանը։ «ՔՊ վարչության անդամ Հակոբ Արշակյանը և ՔՊ 4 անդամներ Արաբկիրի բակերից մեկում քարոզարշավ իրականացնելիս են եղել, երբ զրուցարանից մի տղամարդ հայհոյել է բոլոր քաղաքական գործիչներին և քաղաքական ուժերին։ ՔՊ անդամները կոռեկտության կոչ են արել և փորձել բացատրել, որ չի կարելի բոլորին մեկ արշինով չափել։ Այդ պահին վրա են հասել մոտ 10 երիտասարդ, որոնք գտնվել են ալկոհոլի ազդեցության տակ։ 10 երիտասարդները փորձել են խոչընդոտել ՔՊ-ի քարոզարշավը և բռնություն գործադրել դրա մասնակիցների նկատմամբ, սակայն ըստ ամենայնի ՝ ալկոհոլը չարաշահած լինելու պատճառով հեշտությամբ սաստվել են 4 ՔՊ-ականների կողմից, որոնք դիմել են համարժեք ինքնապաշտպանության»,- գրել է Ալեքսանյանը։
17:07 - 11 հունիսի, 2021
Վերջին 30 տարում ՀՀ-ում ձևավորվել է կառավարման կաստայական համակարգ. Փաշինյան |1lurer.am|

Վերջին 30 տարում ՀՀ-ում ձևավորվել է կառավարման կաստայական համակարգ. Փաշինյան |1lurer.am|

1lurer.am: ՀՀ վարչապետի պաշտոնակատար, «Քաղաքացիական պայմանագիր» կուսակցության նախընտրական ցուցակը գլխավորող Նիկոլ Փաշինյանը Տավուշի մարզում՝ Դիլիջանում, ընտրողների հետ հանդիպմանը հիշեցրեց, որ երեկ Վանաձորում ինքը հայտարարել է, որ առաջիկա խորհրդարանական ընտրություններում պետք է իրականացնեն հեղափոխության երկրորդ փուլը, որը պիտի անվանեն ոչ բռնի, ժողովրդական, բայց այս անգամ ոչ թե թավշյա, այլ պողպատյա հեղափոխություն: Նրա խոսքով՝ ակնհայտ է, որ այսօր ժողովրդի պահանջը իրենցից հստակ է՝ նրանք ուզում են, որ ՀՀ-ում գոյություն ունենա ուժեղ, ինստիտուցիոնալ իշխանություն, որը երկրում օրենքի անառարկելիության մթնոլորտ կստեղծի: «Ի՞նչ է նշանակում պողպատյա իշխանություն: Դա նշանակում է օրենքի կիրառման ինստիտուտների ուժեղացում, դա նշանակում է օրենքի դիկտատուրա Հայաստանում, և մենք ձեր մանդատով գնալու ենք այդ ճանապարհով: Օրենքի մասին է խոսքը, ոչ թե բռնության մասին, օրենքի իշխանության մասին է խոսքը: Եվ ես ուզում եմ ասել, որ մենք այսպես ինստիտուցիոնալ ճանապարհով պիտի գնանք, շարունակական պետական ինստիտուտների ուժեղացման և օրենքի կիրառման ինստիտուտների ուժեղացման ճանապարհով: Եվ սա այսօր այլընտրանք չունի»,- ասաց Փաշինյանը:   Նա նաև բացատրեց, թե ինչի համար էր հարկավոր թավիշը: «Դա հարկավոր էր, որպեսզի մեր հանրության պոտենցիալը ի վերջո ի ցույց տրվի: Բայց մենք արդյունքում տեսանք, որ, ըստ էության, վերջին 30 տարիների ընթացքում ՀՀ-ում ձևավորվել է կառավարման կաստայական համակարգ»,- նշեց Փաշինյանը՝ հիշեցնելով իր կողմից պարբերաբար ներկայացվող վիճակագրությունը, ըստ որի՝ Հայաստանում 10 տարեկան երեխաների 30 տոկոսը կարդալ ընդհանրապես չգիտի: «Այս 30 տոկոսը կարդալ չգիտի, դա նշանակում է, որ մի ուրիշ 30 տոկոս կիսագրագետ է, մեկ ուրիշ 30 տոկոս վատ կրթություն է ստացել: Սա վկայում է, որ երկրում հաստատված է եղել, և այսօր էլ այդ համակարգը վերացված չէ, կաստայական համակարգ, երբ գոյություն է ունեցել իշխող էլիտա, որը ինքն իրեն անընդհատ վերարտադրում է: Եթե որևէ աշխատատեղ կա՝ դա այդ էլիտայի ներկայացուցիչների համար է, պետական պաշտոններ՝ դա այդ էլիտայի ներկայացուցիչների համար է»,- նշեց վարչապետի պաշտոնակատարը՝ հավելելով, որ դա ամենաշատը երևում է իրավաբանների շրջանում:
12:56 - 11 հունիսի, 2021
Կանենք էնքան հեղափոխություն, մինչև էլիտաները՝ հոգևորից սկսած՝ քաղաքականով վերջացրած, խոնարհվեն ժողովրդի առաջ․ Նիկոլ Փաշինյան

Կանենք էնքան հեղափոխություն, մինչև էլիտաները՝ հոգևորից սկսած՝ քաղաքականով վերջացրած, խոնարհվեն ժողովրդի առաջ․ Նիկոլ Փաշինյան

Այսօր Հայաստանի լրատվական դաշտը վերածվել է իսկական աղբանոցի։ Այս մասին Դիլիջանում «Քաղաքացիական պայմանագիր» կուսակցության քարոզարշավի ժամանակ ասաց վարչապետի թեկնածու Նիկոլ Փաշինյանը։ «Մենք պետք է նաև լրագրողական հանրությանը քաջալերենք, նաև օրենքով որոշակի մեխանիզմներ ստեղծենք, որ ստեղծվեն էթիկայի կանոններ հենց լրագրողական համքարության կողմից, ստեղծվեն էթիկայի կանոնների պահպանման մեխանիզմներ, կանոնները խախտելու համար՝ սահմանափակումներ։ Ինչու պիտի պետական պաշտոնյան ունենա էթիկայի կանոններ (և պետք է ունենա). նույնը պետք է տեղի ունենա նաև լրատվական դաշտի հետ, որովհետև լրատվական դաշտում էսօր գործում են մարդիկ, որոնք ավելի շատ «քիլլերի» են նման, քան լրագրողի»,- նշեց նա։ Անդրադառնալով քաղաքացիների կրթության մակարդակին՝ Փաշինյանը խոսեց նաև Երևանի պետական համալսարանի Իրավաբանական ֆակուլտետի մասին․ «ԵՊՀ Իրավաբանության ֆակուլտետում կլոնացված իրավաբանական մի համակարգ է ձևավորվել, որի 60 տոկոսը պարզապես ատում է սեփական ժողովրդին»։ Նրա խոսքով՝ ամենևին պատահական չէ, որ նոյեմբեր-դեկտեմբեր-հունվար ամիսներին էդ մարդիկ ուզում էին Հայաստանում հեղափոխություն անել, վեր էին կենում հարթակից ժողովրդին անվանում «ժեխ», «բոմժ», վիրավորելու համար ասում են «Եհովայի վկա», «զոմբի»․ «Էս պատմությունը պատերազմի հետ կապ չունի։ Չե՞ք նկատում՝ արդեն մոռացել են։ Նրանք չեն հասկանում՝ ոնց կարող է երկրում ժողովուրդը որոշիչ լինել, իրենք «էլիտայով» պետք է որոշեն»։ Վարչապետի թեկնածուն դարձյալ շեշտեց, որ Հայաստանում իշխանությունը ժողովրդի ձեռքին է, և որևէ մեկը չփորձի ժողովրդի ձեռքից վերցնել իշխանությունը։ «Մենք էդ կեղծ «էլիտաներին» թույլ չենք տալու վերարտադրվել։ Այո՛, եթե պետք լինի, կանենք հեղափոխություն, կանենք էլի հեղափոխություն, կանենք էնքան հեղափոխություն, ,ինչև էլիտաները՝ հոգևորից սկսած՝ քաղաքականով վերջացրած, խոնարհվեն ժողովրդի առաջ։ Դուք տեր չեք, դուք ծառա եք, դուք այլևս Հայաստանում չեք լինելու տեր, Հայաստանում լինելու է տեր ժողովուրդը, և դուք բոլորդ պիտի խոնարհ ծառայեք նրանց»,- ասաց Նիկոլ Փաշինյանը։
10:59 - 11 հունիսի, 2021
Քարոզարշավ օր 5. Հայաստանում քաղաքական ուժերի միջև  շարունակվում է ընտրապայքարը  |armenpress.am|

Քարոզարշավ օր 5. Հայաստանում քաղաքական ուժերի միջև շարունակվում է ընտրապայքարը |armenpress.am|

armenpress.am: Հանրահավաքներից ու հանդիպումներից մինչև քաղաքական զբոսանքներ. արտահերթ խորհրդարանական ընտրությունների քարոզարշավի 5-րդ օրը քաղաքական ուժերը կշարունակեն արվաշներ իրականացնել և՛ մարզերում, և՛ մայրաքաղաքում: Ընտրություններին մասնակցում է 25 քաղաքական ուժ՝ 21 կուսակցություն և 4 դաշինք: Ընտրություններն անց են կացվելու հունիսի 20-ին: «Լուսավոր Հայաստան» կուսակցության ներկայացուցիչները Էդմոն Մարուքյանի գլխավորությամբ նախընտրական քարոզարշավի հինգերորդ օրը հանդիպումները անցկացնելու են Երևանի Երիտասարդական մետրոյի հարակից տարածքում՝ Իսահակյանի արձանի դիմաց՝ ժամը 11:00-ին։ Լրագրողների հետ հանդիպումը տեղի կունենա նույն վայրում և նույն ժամին։ 12։30-ին կուսակցության անդամները կլինեն Հարավ-արևմտյան Բ1 թաղամասում, ապա 16։30-ին Իսահակյան թաղամասում, իսկ 19։00-ին՝ Ծարավ աղբյուր թաղամասում։ «Ինքնիշխան Հայաստան» կուսակցությունը քարոզարշավն իրականացնելու է Արագածոտի և Շիրակի մարզերում։ Ուղղությունը սկսելու են Թալինից, ապա կայցելեն Արտենի, Մարալիկ, Արթիկ և Գյումրի։  «5165 ազգային պահպանողական շարժում» կուսակցությունը հունիսի 11-ին՝ լինելու է Գեղարքունիքի մարզում: Նրանք կայցելեն Մարտունի քաղաք, ապա կլինեն Գավառի հրապարակում: «Քաղաքացիական պայմանագիր» կուսակցությունը՝ Նիկոլ Փաշինյանի գլխավորությամբ վաղ առավոտից լինելու է Տավուշի մարզում։ Բնակիչների հետ հանդիպումները կկայանան 10։30-ից՝ Դիլիջանում, ապա կլինեն նաև Բերդ, Բերդավան, Նոյեմբերյան, Աչաջուր և Իջևան համայնքներում։ «Ազատ հայրենիք» դաշինքը հունիսի 11-ին լինելու է Լոռու մարզում։ Անդամները ժամը 12։00-ից լինելու են Տաշիրում, ապա Ստեփանավանում և Ալավերդիում։ Երեկոյան ժամը 20։00-ին դաշինքի ներկայացուցիչ Արշակ Սադոյանը ասուլիով հանդես կգա։ Նա կխոսի սպասվող ընտրությունների վերաբերյալ իրենց ակնկալիքների, ԼՂ հիմնախնդրի և հարակից այլ հարցերի մասին։ «Հայաստան» դաշինքը՝ ՀՀ երկրորդ նախագահ Ռոբերտ Քոչարյանի գլխավորությամբ և մյուս առաջնորդների մասնակցությամբ լինելու է Կոտայքի մարզում։ Ժամը 11-ին, Եղվարդի մշակույթի տանը կլինի հանդիպում քաղաքացիների հետ, այնուհետև կայցելեն Նոր Հաճն, Աբովյան, Չարենցավան։ Քաղաքացիների հետ հանդիպում կլինի նաև ժամը 19:00-ին Էրեբունի վարչական շրջանի Վարդավառի այգում: «Հայ ազգային կոնգրես» կուսակցությունը թեկնածուների և համակիրների մասնակցությամբ կիրականացնի քաղաքական զբոսանք։ Զբոսանքի մեկնարկը տրվելու է Սարյան պուրակից՝ ժամը 20։00-ին։ «Զարթոնք» կուսակցությունը առավոտյան ժամը 9:00-ից՝ Կենտրոն վարչական շրջանի Սուրբ Գրիգոր Լուսավորիչ եկեղեցուց կսկսի արտահերթ խորհրդարանական ընտրությունների 5-րդ օրվա քարոզարշավը։ Կուսակցության հիմնադիր անդամներ Վրեժ Խաչիկյանն ու Տաթևիկ Բուջատյանն էլ ասուլիսով հանդես կգան։ Նրանք կխոսեն ներքաղաքական օրակարգի ու ընտրապայքարի մասին։ «Մեր տունը Հայաստանն է» կուսակցությունը քարոզարշավ կանցկացնի ժամը 13։00-ին Գիտությունների ազգային ակադեմիայի դիմացի հարթակից։  «Հայաստանի եվրոպական կուսակցություն»-ը կներկայանա ասուլիսային ձևաչափով։ Բանախոսը կլինի կուսակցության նախագահ, ԱԺ պատգամավորի թեկնածու Տիգրան Խզմալյանը, որը կխոսի ներքին և արտաքին քաղաքական իրավիճակի մասին։
09:26 - 11 հունիսի, 2021
ՔՊ-ն խոստանում է հաջորդ տարիներին ապահովել 7 տոկոս տնտեսական աճ |armenpress.am|

ՔՊ-ն խոստանում է հաջորդ տարիներին ապահովել 7 տոկոս տնտեսական աճ |armenpress.am|

armenpress.am: «Քաղաքացիական պայմանագիր» կուսակցությունը նախատեսում է հաջորդ տարիներին ապահովել 7 տոկոս տնտեսական աճ, աղքատության մակարդակը կրկնակի նվազեցնել: Գյումրիում հանրահավաքի ժամանակ այս մասին հայտարարեց ՀՀ ազգային ժողովի տնտեսական հարցերի մշտական հանձնաժողովի նախագահ, «Քաղաքացիական պայմանագիր» կուսակցության նախընտրական ցուցակի 25-րդ համար Բաբկեն Թունյանը: «Բացի այդ, նախատեսում ենք գործազրկության մակարդակը իջեցնել 10 տոկոսի: Նախատեսում ենք, որպեսզի թոշակը հասնի այնպիսի մակարդակի, որ մարդը կարողանա ապրել, ոչ թե այնքան լինի, որ սպառողական զամբյուղից անգամ հացի փողին չբավարարի»,- ասաց Թունյանը: Ըստ Թունյանի` գործող իշխանությունը նաև հասկանում է, թե ներկա պահին ինչ հնարավորություններ ունի: «Մարդիկ ասում են, թե գալու են բոլորի վարկերը մարելու են ու հույս ունեն, որ մարդկանց մեծամասնությունը իրենց կհավատա: Ով այդպիսի բան է ասում, հավատացեք, որ ձեզ ուղղակի խաբում են, որովհետև վարկերը ներել, թոշակները բարձրացնել, բայց հարկերը չավելացնել, այդպիսի բաներ չի լինում, մենակ հեքիաթներում է լինում»,- ընդգծեց Թունյանը:
19:48 - 09 հունիսի, 2021
Պատգամավորի թեկնածուների դրամական միջոցները․ մաս առաջին [«Քաղաքացիական պայմանագիր» կուսակցություն]

Պատգամավորի թեկնածուների դրամական միջոցները․ մաս առաջին [«Քաղաքացիական պայմանագիր» կուսակցություն]

Կենտրոնական ընտրական հանձնաժողովում կուսակցությունների գրանցվելուց հետո վերջիններս ներկայացրել են հայտարարագրեր, որում ներառված են ինչպես կուսակցության, այնպես էլ կուսակցությունում ներգրավված պատգամավորի թեկնածուների գույքի, եկամտի և շահերի հայտարարագրերը։ Արդեն մի քանի օր է, ինչ մեկնարկել է նախընտրական քարոզչությունը և շարունակվելու է մինչև հունիսի 18-ը։ Հունիսիս 20-ն արտահերթ խորհրդարանական ընտրությունների քվեարկության օրն է։  Infocom-ն ուսումնասիրել է «Քաղաքացիական պայմանագիր» կուսակցության ցուցակով առաջադրված պատգամավորի թեկնածուների ներկայացրած հայտարարագրերը, որոնցում ընդգրկված են գործարարներ և բավականին շատ դրամական միջոցներ ունեցող անձինք։ «Քաղաքացիական պայմանագիր» կուսակցության նախընտրական ցուցակում ընդգրկված են 157 պատգամավորի թեկնածուներ, որում ներառված չեն ազգային փոքրամասնությունների ներկայացուցիչները։ Կուսակցության վարչապետի թեկնածուն՝ Նիկոլ Փաշինյանը, հայտարարագրի ներկայացման պահին չի ունեցել և չի հայտարարագրել դրամական միջոցներ։ Վարչապետի թեկնածուն չի հայտարարագրել նաև շարժական և անշարժ գույք։ Վերջինս միայն ներկայացրել է աշխատավարձից ստացված եկամուտը։ Կուսակցության ամենահարուստ, ամենաշատ դրամական միջոցներ հայտարարագրած թեկնածուն Գուրգերն Արսենյանն է։ Վերջինս հայտարարագրել է 26 մլն 520 հազար ՀՀ դրամ, 11 մլն 702 հազար 131 ԱՄՆ դոլար և 140 հազար 200 եվրո գումար։ Եթե ամբողջը վերածենք ՀՀ դրամի, ապա պատգամավորի թեկնածուն հայտարարագրել է 6 մլրդ 164 մլն 567 հազար ՀՀ դրամ։ Արսենյանի հայտարարագրից տեղեկանում ենք, որ վերջինս ունի 18 անշարժ գույք, այդ թվում 4 շենք, 3 շինություն և 11 հողամաս։ Արսենյանն ունի 4 մեքենա՝ «Ռենջ Ռովեր L405», «Մերսեդես Բենց S63», «Նիսսան X-Trail 2.5l» և «Բենտլի Bentayga 4.0T»։ Պատգամավորի թեկնածու Գուրգեն Արսենյանը հայտարարագրել է 8 մլն դրամը գերազանցող 22 թանկարժեք գույք, այդ թվում 51 մլն 300 հազար դրամ և 82 մլն դրամ արժողությամբ 2 ժամացույց, 32 մլն 55 հազար դրամ արժողությամբ 1 ոսկյա ձուլակտոր և  532 մլն 900 հազար դրամ արժողությամբ 19 նկար։ Արսենյանը 8 ընկերությունների՝ «Արսօյլ» ՓԲԸ (100%), «Յունիքորն ֆլորա» ՓԲԸ (100%), «Յունիքորն փրինթ» ՓԲԸ (100%), «Յունիքորն քոնսթաքշըն» ՓԲԸ (100%), «Յունիքորն գրուպ» ՓԲԸ (100%), «Յունիքորն սերվիս» ՓԲԸ (100%), «Վկրեդիտ 24» ՍՊԸ (13%), և «Էլդորադո-Արմեն» ՍՊԸ (51%) բաժնետեր է։ Հայտարարագրած դրամական միջոցներով երկրորդ տեղում է Խաչատուր Սուքիասյանը։ Վերջինս հայտարարագրել է 4 մլրդ 851 մլն 752 հազար ՀՀ դրամ, 2 մլն 5 հազար 651 ԱՄՆ դոլար և 185 հազար եվրո գումար։ Սուքիասյանի հայտարարագրած դրամական միջոցները ՀՀ դրամի վերածած կազմում է շուրջ 6 մլրդ 4 մլն 853 հազար ՀՀ դրամ։ Սուքիսայանը հայտարարագրել է 37 անշարժ գույք, այդ թվում 22 շինություն և 15 հողամաս։ Սուքիասյանը հայտարարագրել է 8 մլն դրամը գերազանցող 29 թանկարժեք գույք, այդ թվում 4 նկար «Գրիգորի Խանջյան», 2 նկար «Մարտիրոս Սարյան», 3 նկար «Մինաս», 1 նկար «Կոջոյան», 5 նկար «Գարզու», 1 նկար «Ա․ Ֆյոդորով», 2 նկար «ԱվեԱրթուր», 2 նկար «Վարդան», 2 նկար «Գուռուզ», 5 ձեռագործ հնաոճ խալի, 1 հնաոճ կահույք և 1 հնաոճ տնային ժամացույց։ Նշված թանկարժեք գույքերի արժեքները նշված չեն։ Խաչատուր Սուքիասյանը «Հայէկոնոմբանկ» ԲԲԸ-ում ունի 12․02% հասարակ և 5,75% արտոնյալ բաժնետոմս, «Սիլ Ինշուրանս» ՓԲԸ-ում և «Երևանի Ալրաղաց» ԲԲԸ-ում 25% բաժնետոմս, «Նարեկ» ՍՊԸ-ում, «Սիլ Կոնցեռն» ՍՊԸ-ում և «Առաջ» ՍՊԸ-ում 25% բաժնեմաս, «Երևանի «Զովք» գործարան» ՀՁ ԲԲԸ-ում 16% բաժնետոմս, «Բջնի գրուպ» ՍՊԸ-ում 20% բաժնեմաս, «Ինլոբբի» ՍՊԸ-ում 90% բաժնեմաս, «Գլոբալ մայնինգ» ՍՊԸ-ում 100% բաժնեմաս և «Երևանի «Պոլիպլաստ» գործարան» ՀՁ ԲԲԸ-ում 45․17% բաժնետոմս։ Ընդհանուր առմամբ Խաչատուր Սուքիասյանը բաժնեմասեր և բաժնետոմսեր ունի 11 ընկերությունում։ Կուսակցության նախընտրական ցուցակով առաջադրված պատգամավորի թեկնածու Տիգրան Պետրոսյանը հայտարարագրել է 78 մլն 450 հազար ՀՀ դրամ և 70 հազար ԱՄՆ դոլար գումար որպես հայտարարագրման պահին առկա դրամական միջոց։ Ընդհանուր առմամբ Տիգրան Պետրոսյանի հայտարարագրած գումարը ՀՀ դրամով կազմում է 114 մլն 640 հազար ՀՀ դրամ։ Պատգամավորի թեկնածուն հայտարարագրել է 2 մեքենա և 4 անշարժ գույք, այդ թվում 2 բնակարան և 2 հողամաս։ Ըստ հայտարարագրած դրամական միջոցների՝ հաջորդը Ռոբերտ Աֆանդյանն է։ Վերջինս հայտարարագրել է 20 մլն ՀՀ դրամ և 70 հազար ԱՄՆ դոլար գումար։ Ռոբերտ Աֆանդյանի դրամական միջոցները ՀՀ դրամով կազմում են 56 մլն 190 հազար։ Աֆանդյանը հայտարարագրել է 4 անշարժ գույք, այդ թվում 3 բնակարան և 1 տարածք։ Պատգամավորի թեկնածուն ունի 3 ավտոմեքենա՝ «Մերսեդես E-350», «Մերսեդես ML» և «Օպել Աստռա G»։ Աֆանդյանը հայտարարագրել է 2 ոսկե շղթա 8 մլն դրամ արժողությամբ։ Նշված 4 պատգամավորի թեկնածուներն ամենաշատ դրամական միջոց հայտարարագրածներն էին։ Ինչպես նաև նրանցից երկուսը բացի հայտարարագրած դրամական միջոցներից, ունեն նաև մեծաքանակ թանկարժեք գույք, անշարժ և շարժական գույք, ինչպես նաև մի շարք ընկերությունների բաժնետեր են։ Սակայն կան պատգամավորի թեկնածուներ, որոնց դրամական միջոցները շատ չեն զիջում ներկայացվածներից։  Պատգամավորի թեկնածուներից ոմանց մոտ 2018 թվականի խոհրդարանական ընտրություններից հետո դրամական միջոցները շեշտակի ավելացել են։ Օրինակ՝ պատգամավորի թեկնածու Ռուբեն Ռուբինյանը 2018 թվականի ընտրություններից առաջ որպես դրամական միջոց հայտարարագրել է 400 հազար ՀՀ դրամ, այս ընտրություններից առաջ դրամական միջոցները 16 մլն 350 հազար են։ Ռոմանոս Պետրոսյանը 2018 թվականի ընտրություններից առաջ որպես դրամական միջոց հայտարարագրել էր 450 հազար ՀՀ դրամ, այժմ հայտարարագրել է 11 մլն 768 հազար ՀՀ դրամ։ Սուրեն Պապիկյանը 2018 թվականի ընտրություններից առաջ հայտարարագրել էր 2 մլն 500 հազար ՀՀ դրամ և 1000 ԱՄՆ դոլար, որը դրամի վերածած կազմում է շուրջ 3 մլն 17 հազար։ Այս ընտրություններից առաջ հայտարարագրել է 14 մլն ՀՀ դրամ, 13 հազար ԱՄՆ դոլար և 4500 եվրո դրամական միջոց։ Վերջինները դրամի վերածած կազմում են 23 մլն 547 հազար դրամ, ինչը նախորդ հայտարարագրածից ավելի է շուրջ 20 մլն 530 հազարով։ Ընդհանուր առմամբ, եթե դիտարկենք հայտարարագիր ներկայացրած բոլոր պատգամավորի թեկնածուների միայն դրամական միջոցները, ապա «Քաղաքացիական պայմանագիր» կուսակցության նախընտրական ցուցակում տեղ գտած անձանց դրամական միջոցները միասին կազմում են 5 մլրդ 558 մլն 492 հազար ՀՀ դրամ, 14 մլն 304 հազար 488 ԱՄՆ դոլար, 417 հազար 192 եվրո, 270․000 ռուբլի, 45 լարի և 0,5 բիթքոին։ Եթե վերածենք ՀՀ դրամի, ապա ընդհանուր առմամբ կուսակցության թեկնածուների դրամական միջոցները կազմում են 14 մլրդ 805 մլն 635 հազար ՀՀ դրամ և 0,5 բիթքոին։ Նշենք, որ սրանք միայն դրամական միջոցներն են, որոնցում ներառված չեն անշարժ և շարժական գույքը, ինչպես նաև թանկարժեք գույքը։ Վերևում ներկայացված 4 թեկնածուների եկամուտը միասին կազմում է 12 մլրդ 340 մլն 250 հազար, որը կուսակցության նախընտրական ցուցակում ընդգրկված թեկնածուների ընդհանուր դրամական միջոցների 83․3%-ն է։ Նարեկ Մարտիրոսյան
18:05 - 09 հունիսի, 2021