Ժողովուրդը պիտի որոշի, թե ապագան ում հետ պետք է կառուցի, և ապագայի կառուցման գործում ով ինչպիսի դերակատարություն պիտի ունենա․ Նիկոլ Փաշինյան
Կառավարության այսօրվա նիստի ընթացքում ՀՀ վարչապետ Նիկոլ Փաշինյանը հայտնեց, որ նիստը սկսում են կառավարության նորացված կազմով, առաջիկայում սպասվում է նաև Էկոնոմիկայի նախարարի փոփոխություն:
«Մենք ապրում ենք չափազանց դժվար ժամանակներ, բայց այսօրվա մեր հրամայականը և անելիքը հետևյալն է. մենք պետք է հաղթահարենք ժամանակն ու նրա ծանրությունը: Ուզում եմ նորից ասել, որ որպես ՀՀ վարչապետ՝ ինձ վրա եմ վերցնում ստեղծված իրավիճակի ամբողջ պատասխանատվությունը, բայց գիտակցում եմ, որ ինձ վրա է ոչ միայն մինչև օրս տեղի ունեցածի, այլև հետագա զարգացումների պատասխանատվությունը»-, ասաց վարչապետը:
Նիկոլ Փաշինյանը նշեց, որ արտաքին և ներքին կայունության ու անվտանգության ապահովումը և իր հրապարակած ճանապարհային քարտեզի իրականացումը բացարձակ առաջնահերթություն են, և բոլոր ջանքերը պետք է կենտրոնացած լինեն այս խնդրի լուծման վրա:
«Կառավարությունն Արցախի մեր հայրենակիցներին աջակցող արդեն երկու բավականին մասշտաբային միջոցառում է ընդունել: Աջակցության միջոցառումների ընդունումը կշարունակվի այնքան, որքան անհրաժեշտ է: Առաջիկայում մեր ուշադրության կենտրոնում է լինելու նաև Սյունիքի և Գեղարքունիքի մարզերի` պատերազմից տուժած բնակավայրերի վերականգնումը Տավուշի մարզում մեր իրականացրած ծրագրերի նմանությամբ»-, ասաց վարչապետը:
Փաշինյանի խոսքով` բացարձակ առաջնահերթություն են անհետ կորածների որոնողական աշխատանքները, գերիների փոխանակումը, և այս խնդիրների ուղղությամբ կառավարությունն աշխատում է ամենօրյա ռեժիմով:
«Հիմնական բարդությունն այն է, որ այս աշխատանքի արդյունավետությունը, ցավոք, կախված է ոչ միայն մեզնից: Զոհվածների ընտանիքների, հաշմանդամություն ստացած անձանց և պատերազմից տուժած այլ խմբերի և քաղաքացիների սոցիալական պաշտպանության երաշխիքների գործունեությունը և հետագա կատարելագործումը մեր հրատապ անելիքների ցանկում է»-, նշեց վարչապետը:
Վարչապետն ընդգծեծ, որ նույնիսկ այս դժվարին ժամանակներում Հայաստանում պետք է ստեղծել բարեփոխումների հետագա շարունակականության երաշխիք, իսկ բարեփոխումների ընդգրկումն ու օրակարգը պետք է ընդլայնվեն ի հայտ եկած նոր մարտահրավերների բերումով:
«Ամենահրատապ խնդիրների լուծմանը զուգընթաց պետք է տեղի ունենա նաև կատարվածի պատճառների վերհանման, պարզաբանման և վերլուծության գործընթաց, և հայ հանրությունը պետք է ստանա հստակ պատասխաններ, թե ինչ է տեղի ունեցել և ինչու: Ժողովուրդը պետք է հասու լինի ճշմարտությանը և որոշումներ կայացնելու հնարավորություն ունենա: Ըստ այդմ, կառավարության ամենակարևոր անելիքը ՀՀ քաղաքացիների՝ սեփական երկրի և իրավիճակի տերը լինելու զգացողության և փաստի պահպանումն է, և այս հանգամանքի ինստիտուցիոնալ հզորացումը: ՀՀ քաղաքացին պետք է վստահ լինի, որ ինքն է իրավիճակի իրական տերը, և այս զգացողության վրա պետք է կառուցի իր ապագան: Նաև ժողովուրդը պիտի որոշի, թե այդ ապագան ում հետ պետք է կառուցի, և այդ ապագայի կառուցման գործում ով ինչպիսի դերակատարություն պիտի ունենա»,- ասաց Փաշինյանը։
11:45 - 26 նոյեմբերի, 2020
