ԲԴԽ

Բարձրագույն դատական խորհուրդը Սահմանադրական մարմին է, որը կոչված է ապահովելու դատական իշխանության անկախությունը եւ բնականոն գործունեությունը։

1. ԲԴԽ-ն`
1) կազմում եւ հաստատում է դատավորների թեկնածուների, ներառյալ առաջխաղացման ենթակա թեկնածուների ցուցակները.
2) Հանրապետության նախագահին առաջարկում է նշանակման ենթակա, ներառյալ առաջխաղացման կարգով նշանակման ենթակա դատավորների թեկնածուներին, դատարանների նախագահների եւ Վճռաբեկ դատարանի պալատների նախագահների թեկնածուներին. 
3) ԱԺ-ին առաջարկում է Վճռաբեկ դատարանի դատավորների եւ նախագահի թեկնածուներին.
4) լուծում է դատավորներին մեկ այլ դատարան գործուղելու հարցը, իր լիազորությունների իրականացման կապակցությամբ դատավորի նկատմամբ քրեական հետապնդում հարուցելու կամ նրան ազատությունից զրկելու վերաբերյալ համաձայնություն տալու հարցը, դատավորին կարգապահական պատասխանատվության ենթարկելու, դատավորների լիազորությունների դադարեցման հարցերը։

2. Դատավորին կարգապահական պատասխանատվության ենթարկելու վերաբերյալ հարց քննարկելու, ինչպես նաեւ Դատական օրենսգրքով սահմանված այլ դեպքերում Բարձրագույն դատական խորհուրդը հանդես է գալիս որպես դատարան:

3. Օրենքով սահմանված դեպքերում եւ կարգով Բարձրագույն դատական խորհուրդն ընդունում է ենթաօրենսդրական նորմատիվ իրավական ակտեր:

Խորհրդի գործող նախագահը Ռուբեն Վարդազարյանն է։

ԲԴԽ նախագահը հանդիպել է Մոսկվայում աշխատող հայ իրավաբանների հետ

ԲԴԽ նախագահը հանդիպել է Մոսկվայում աշխատող հայ իրավաբանների հետ

Ռուսաստանի Դաշնության Գերագույն դատարանի նախագահ Վյաչեսլավ Լեբեդևի հրավերով պաշտոնական այցով Մոսկվայում գտնվող ՀՀ Բարձրագույն դատական խորհրդի նախագահ Ռուբեն Վարդազարյանի գլխավորած պատվիրակությունը Ռուսաստանում Հայաստանի դեսպանատանը հանդիպել է հայ իրավաբանների հետ: Միջոցառումը նախաձեռնել էր Մոսկվայի հայ իրավաբանների ասոցիացիան: Ինչպես տեղեկացրին Բարձրագույն դատական խորհրդի աշխատակազմի մամուլի և հասարակայնության հետ կապերի ծառայությունից, հանդիպման սկզբում հյուրերին ողջունել է Ռուսաստանի Դաշնությունում Հայաստանի դեսպան Վարդան Տողանյանը: Այնուհետև նախաձեռնությունը ողջունել է ՀՀ Բարձրագույն դատական խորհրդի նախագահ Ռուբեն Վարդազարյանը:  Հանդիպան ընթացքում քննարկվել է մասնագիտական բնույթի հարցերի լայն շրջանակ, կողմերը  փոխանակվել են ոլորտին վերաբերող տեղեկատվությամբ: Ըստ աղբյուրի՝ Մոսկվայում աշխատող հայ իրավաբանները, մասնավորապես, հետաքրքրվել են ՀՀ դատական համակարգի պրակտիկայով, անդրադարձել Ռուսաստանում ՀՀ քաղաքացիների շահերի ներկայացման խնդիրներին և մտքեր փոխանակել հարցերի ողջ շրջանակի վերաբերյալ: Հայկական պատվիրակության ղեկավարն ու անդամները սպառիչ պատասխաններ են տվել մոսկվայաբնակ իրավաբաններին հետաքրքրող բոլոր հարցերին:
19:48 - 31 մարտի, 2021
Մոսկվա կատարած պաշտոնական այցի շրջանակում ԲԴԽ նախագահի գլխավորած պատվիրակությունը հյուրընկալվել է ՌԴ գերագույն դատարանին կից գործող Դատական դեպարտամենտում

Մոսկվա կատարած պաշտոնական այցի շրջանակում ԲԴԽ նախագահի գլխավորած պատվիրակությունը հյուրընկալվել է ՌԴ գերագույն դատարանին կից գործող Դատական դեպարտամենտում

Ռուսաստանի Դաշնության մայրաքաղաք կատարած պաշտոնական այցի շրջանակում Բարձրագույն դատական խորհրդի նախագահ Ռուբեն Վարդազարյանի գլխավորած պատվիրակությունը հյուրընկալվել է ՌԴ Գերագույն դատարանին կից գործող Դատական դեպարտամենտում: Այս մասին հայտնում են Բարձրագույն դատական խորհրդի աշխատակազմի Մամուլի և հասարակայնության հետ կապերի ծառայությունից։ Հայկական պատվիրակությանն ընդունել է դեպարտամենտի գլխավոր տնօրեն Ալեքսանդր Գուսևը: Գերագույն դատարանի դատական դեպարտամենտի ղեկավար կազմը հայկական պատվիրակությանը հանգամանալից ներկայացրել է իրենց կառույցի առանձնահատկությունները, կառուցվածքը, սպասարկման ճյուղերը, մասնավորապես՝ դատական գործերի էլեկտրոնային մակագրման գործիքակազմը, դատավորների ծանրաբեռնվածության խնդիրների լուծման իրենց ուղիները, դատարանների նյութատեխնիկական ապահովման և սպասարկման հնարավորությունները, կառույցի արդյունավետ գործունեությունն ապահովող օրենսդրական կառուցակարգերը: Հանդիպումից հետո հայկական պատվիրակության համար կազմակերպվել է ռուսական դատական մշակույթի ուշագրավ ներկայացում՝ ՌԴ Գերագույն դատարանի թանգարանում:
13:10 - 31 մարտի, 2021
ԲԴԽ նախագահը հանդիպել է Մոսկվայի Արբիտրաժային դատարանի նախագահի հետ

ԲԴԽ նախագահը հանդիպել է Մոսկվայի Արբիտրաժային դատարանի նախագահի հետ

Շարունակվում են ՀՀ դատական իշխանության պատվիրակության պաշտոնական հանդիպումները ՌԴ մայրաքաղաքում:   Այսօր Ռուբեն Վարդազարյանի գլխավորած պատվիրակությանը հյուրընկալել է Մոսկվայի Արբիտրաժային դատարանի նախագահ Նիկոլայ Նովիկովը:   Բարձրագույն դատական խորհրդի ներկայացուցիչները ծանոթացել են Մոսկվայի Արբիտրաժային դատարանի կառուցվածքին, ինչպես նաև գործունեության առանձնահատկություններին:   Այցի շրջանակում կայացել են հանդիպում և մասնագիտական քննարկում Մոսկվայի Արբիտրաժային դատարանի ներկայացուցիչների հետ:   Բարձրագույն դատական խորհրդի նախագահ Ռուբեն Վարդազարյանը և Մոսկվայի Արբիտրաժային դատարանի նախագահ Նիկոլայ Նովիկովը քննարկել են երկու պետությունների մասնագիտական դատարանների փոխգործակցության և փորձի փոխանակման հնարավորությունները:
15:52 - 30 մարտի, 2021
ԲԴԽ նախագահի գլխավորած պատվիրակությունը պաշտոնական այցով Մոսկվայում է

ԲԴԽ նախագահի գլխավորած պատվիրակությունը պաշտոնական այցով Մոսկվայում է

Բարձրագույն դատական խորհրդի նախագահ Ռուբեն Վարդազարյանի գլխավորած պատվիրակությունը պաշտոնական այցով գտնվում է Ռուսաստանի Դաշնության մայրաքաղաք Մոսկվայում: Այս մասին հայտնում են Բարձրագույն դատական խորհրդի աշխատակազմի Մամուլի և հասարակայնության հետ կապերի ծառայությունից։ Այսօր՝ մարտի 29-ին, Բարձրագույն դատական խորհրդի պատվիրակությանն ընդունել է Ռուսաստանի Դաշնության Գերագույն դատարանի նախագահ Վյաչեսլավ Լեբեդևը: Երկու երկրների դատական իշխանությունների ղեկավարները մտքեր են փոխանակել Հայաստանի և Ռուսաստանի դատական համակարգերի արդյունավետ փոխգործակցության և զարգացման հնարավորությունների վերաբերյալ: Կողմերի ներկայացուցիչները քննարկել են փոխադարձ հետաքրքրություն ներկայացնող մի շարք հարցեր ևս: Հանդիպմանը մասնակցել է նաև ՌԴ-ում ՀՀ Արտակարգ և լիազոր դեսպան Վարդան Տողանյանը: Հանդիպումն անցել է ջերմ և կառուցողական մթնոլորտում:
15:59 - 29 մարտի, 2021
ԲԴԽ-ն դատախազություն է ուղարկել Վարչական դատարանի դատավոր Մհեր Պետրոսյանի դիմումի պատճենը

ԲԴԽ-ն դատախազություն է ուղարկել Վարչական դատարանի դատավոր Մհեր Պետրոսյանի դիմումի պատճենը

Բարձրագույն դատական խորհրդում մարտի 25-ին ստացվել է Վարչական դատարանի դատավոր Մհեր Պետրոսյանից դիմում, որի կապակցությամբ Բարձրագույն դատական խորհրդի կողմից անմիջապես կազմակերպվել է քննարկում: Քննարկմանը հրավիրվել և լսվել է դատավոր Մհեր Պետրոսյանը: Այս մասին հայտնեցին Բարձրագույն դատական խորհրդի աշխատակազմի մամուլի և հասարակայնության հետ կապերի ծառայությունից: Կայացած քննարկումից հետո Բարձրագույն դատական խորհուրդը, ղեկավարվելով «Հայաստանի Հանրապետության դատական օրենսգիրք» սահմանադրական օրենքի 89-րդ հոդվածի 1-ին մասի 18-րդ կետով, ՀՀ գլխավոր դատախազություն է ուղարկել Վարչական դատարանի դատավոր Մհեր Պետրոսյանի՝ Բարձրագույն դատական խորհրդին ուղղված դիմումի պատճենը՝ ՀՀ դատախազության լիազորությունների շրջանակում դիմումում բարձրացված հարցերի լուծման ուղղությամբ անհրաժեշտ միջոցներ ձեռնարկելու համար:
17:36 - 26 մարտի, 2021
Օնիկ Գասպարյանի դիմումը քննող դատավորը դիմել է ԲԴԽ |azatutyun.am|

Օնիկ Գասպարյանի դիմումը քննող դատավորը դիմել է ԲԴԽ |azatutyun.am|

azatutyun.am: Իրավունքի ուժով ԶՈւ ԳՇ պետի պաշտոնից ազատված Օնիկ Գասպարյանի դիմումը քննող դատավոր Մհեր Պետրոսյանը երեկ երեկոյան դիմել է Բարձրագույն դատական խորհուրդ (ԲԴԽ), այս մասին ասաց ԲԴԽ նախագահ Ռուբեն Վարդազարյանը։ Իր անհանգստությունը ԲԴԽ-ին ներկայացրած դատավորն անցած շաբաթ քննելով Օնիկ Գասպարյանի դիմումը ընդդեմ հանրապետության նախագահի և վարչապետի միջանկյալ որոշում էր կայացրել, որից բխում է, որ Զինված ուժերի Գլխավոր շտաբի պետը դեռ Գասպարյանն է: Վարդազարյանն ասաց, որ իրենք անհանգստանալու հիմք և ռեալ սպառնալիքներ չեն տեսել։ «Ազատության» հարցին, թե ի՞նչ ազդակներ են եղել անհանգստանալու համար, Վարդազարյանը չմեկնաբանեց։ Վերջերս էլ մամուլը գրել էր, որ ԱԱԾ-ն այցելել է դատավորին, փորձել մուտք գործել նրա աշխատասենյակ, բայց, ինչպես դատավորն էր փոխանցել, ԲԴԽ դիմելուց հետո այցը ընդհատվել էր։ Նշենք՝ Գասպարյանը դատարանում վիճարկում էր իր պաշտոնանկությունը։ Օրերս հայտնի դարձավ, որ Օնիկ Գասպարյանի դիմումը քննելով՝ վարչական դատարանը որոշել է բավարարել նրա միջնորդությունը, որով Գասպարյանն ու փաստաբանը դատարանին խնդրել են մինչև այս գործը ըստ էության քննելը Գասպարյանին համարել ԶՈւ գլխավոր շտաբի պետ։ Ի պատասխան՝ կառավարությունը պարզաբանեց՝ «Օնիկ Գասպարյանն ազատված է ԳՇ պետի պաշտոնից, ԳՇ նոր պետի նշանակման գործընթացը շարունակվում է»։ Արտակ Դավթյանը մարտի 22-ին իրավունքի ուժով դարձավ Հայաստանի ԶՈւ գլխավոր շտաբի նոր պետ։
13:29 - 26 մարտի, 2021
Երկուսն էլ լուրջ պրոֆեսիոնալներ են. Սիմոնյանը՝ Վճռաբեկ դատարանի դատավորի թեկնածուների մասին |1lurer.am|

Երկուսն էլ լուրջ պրոֆեսիոնալներ են. Սիմոնյանը՝ Վճռաբեկ դատարանի դատավորի թեկնածուների մասին |1lurer.am|

1lurer.am: Նրանցից որևէ մեկի ընտրությունն այս պարագայում կհամարենք միանշանակ դրական՝ անկախ նրանից, թե ով կընտրվի, որովհետև երկուսն էլ բավականին լուրջ պրոֆեսիոնալներ են ու մեծ հարգանք են վայելում իրավական համայնքում՝ ոչ միայն իրենց մասնագիտական գիտելիքների համար, այլև մարդկային որակների: Այդ մասին ԱԺ-ում Վճռաբեկ դատարանի դատավոր ընտրության քննարկմանն ասաց «Լուսավոր Հայաստան» խմբակցության պատգամավոր Տարոն Սիմոնյանը: Նշենք, որ Վճռաբեկ դատարանի դատավորի թեկնածուները երկուսն են՝ Արմեն Հայկյանցը և Արսեն Մկրտչյանը:              «Ցավոք, ՀՀ-ում մենք կադրային մեծ բազա չունենք իրավաբանության բնագավառում և նաև մնացած բնագավառներում: Երբ գտնում ենք լավ կադրեր, արհեստավարժ մասնագետներ, նրանց պետք է բռնենք, համոզենք, բերենք պետական ապարատ՝ մասնավորապես նաև դատական իշխանություն: Չպետք է թույլ տանք, որ լավ կադրերը հիասթափվեն պետական ապարատից և գնան մասնավոր ոլորտ: Պետական մտածողություն է պետք բոլորիս»,- ասաց Սիմոնյանը:
11:56 - 24 մարտի, 2021
ԱԺ-ում մեկնարկեց Վճռաբեկ դատարանի դատավորի ընտրության փակ-գաղտնի քվեարկությունը |armtimes.com|

ԱԺ-ում մեկնարկեց Վճռաբեկ դատարանի դատավորի ընտրության փակ-գաղտնի քվեարկությունը |armtimes.com|

armtimes.com: Ազգային ժողովում մեկնարկել է Վճռաբեկ դատարանի դատավորի ընտրության փակ- գաղտնի քվեարկությունը: ԱԺ հաշվիչ հանձնախմբի նախագահ Վահագն Հովակիմյանն ասաց, որ քվեարկությունը կավարտվի 12:30-ին: Հիշեցնենք, որ ԱԺ-ում ընթանում է Վճռաբեկ դատարանի դատավորի ընտրության երկրորդ փուլը: Բարձրագույն դատական խորհուրդը Վճռաբեկ դատարանի դատավորի պաշտոնում առաջադրել է Արսեն Մկրտչյանի և Արմեն Հայկյանցի թեկնածությունները: Նախորդ քառօրյայի ընթացքում Ազգային ժողովը նույնպես  քննարկել է Վճռաբեկ դատարանի դատավորի ընտրության հարցը,  սակայն քննարկման ավարտին «Իմ քայլը» խմբակցության ղեկավար Լիլիթ Մակունցը հայտարարել էր, որ խմբակցությունը չի ընտրելու թեկնածուի և այդպիսով իր դիրքորոշումն է արտահայտելու Բարձրագույն դատական խորհրդի նախագահ Ռուբեն Վարդազարյանի գործունեության և հայտարարությունների նկատմամբ: ԱԺ նախագահ Արարատ Միրզոյանը հայտարարել էր, որ Վճռաբեկ դատարանի դատավորի ընտրության երկրորդ փուլը կայանալու է այս քառօրյայի ընթացքում:
11:51 - 24 մարտի, 2021
Թեկնածուներին ներկայացնող անձը պետք է կատարեր նման գործառույթ. Հայկյանցը՝ ԲԴԽ նախագահի և առաջին փուլում չընտրվելու մասին |1lurer.am|

Թեկնածուներին ներկայացնող անձը պետք է կատարեր նման գործառույթ. Հայկյանցը՝ ԲԴԽ նախագահի և առաջին փուլում չընտրվելու մասին |1lurer.am|

1lurer.am: Վճռաբեկ դատարանի դատավորի թեկնածու Արմեն Հայկյանցը խորհրդարանում իր ելույթի ժամանակ անդրադարձավ Վճռաբեկ դատարանի դատավորի նախորդ ընտրությանը, որի ժամանակ «Իմ քայլը» որոշեց չմասնակցել քվեարկությանը: Հայկյանցը նշեց, որ Վճռաբեկ դատարանի դատավորների ընտրության ընթացակարգը սկսում է դատավորներին ներկայացնող իրավասու անձի ելույթով: «Ի՞նչ նպատակ է հետապնդում օրենսդիրն այս ընթացակարգային քայլը նախատեսելով: Ո՞վ է այն իրավասու անձը, ո՞վ պետք է ներկայացնի դատավորներին: Բնականաբար, դա այն անձն է, ով ի պաշտոնե շատ լավ է ճանաչում դատավորներին, դատավորների թեկնածուներին և իր ելույթով, հետագայում նաև հարցուպատասխանի ընթացքում պետք է օգնի պատգամավորներին՝ առավել ճանաչելու Վճռաբեկ դատարանի դատավորի թեկնածուներին և այդքանով կատարելու առավել ճիշտ ընտրություն՝ ելնելով արժանավորության սկզբունքից: Եվ որևէ այլ դերային գործառույթ, քան դատավորի թեկնածուներին ներկայացնելը և նրանց վերաբերյալ ճանաչողության սահմանների ընդլայնումը, ներկայացնելու իրավասություն ունեցող անձն ուղղակի չուներ»,- նշեց Հայկյանցը: Առաջին փուլում ներկայացումից հետո առաջադրված հարցերի շրջանակը մեզ թույլ է տալիս եզրակացնել, որ մենք, ըստ էության, դուրս եկանք այդ ընթացակարգային կարգավորումից, այն ուղեծրից, որը նախատեսում էր օրենսդիրը՝ նշեց Հայկյանցը: «Ուղեծիրն ընդամենը մեկն էր. թեկնածուներին ներկայացնող իրավասու անձը ընդամենը պետք է կատարեր նման գործառույթ: Ես չեմ ժխտում, որ բարձրացված հարցերը կարևոր չեն պետության համար, բայց կարևոր հարցերը պետք է քննարկվեն օրենսդրորեն նախատեսված ընթացակարգի շրջանակում: Վճռաբեկ դատարանի դատավորի ընտրության համար նախատեսված ընթացակարգ նման կարևորության հարցերի համար նախատեսված չէր»,- նշեց Վճռաբեկ դատարանի դատավորի թեկնածուն:
11:39 - 24 մարտի, 2021
Խորհրդարանն ամբողջությամբ ընդունեց ԲԴԽ-ի լիազորությունների շրջանակն ընդլայնող օրինագիծը

 |armenpress.am|

Խորհրդարանն ամբողջությամբ ընդունեց ԲԴԽ-ի լիազորությունների շրջանակն ընդլայնող օրինագիծը |armenpress.am|

armenpress.am: Հայաստանում դատավորին կարգապահական պատասխանատվության ենթարկելու համար ԲԴԽ-ին դիմելու իրավունք կունենան նաև ֆիզիկական և իրավաբանական անձինք՝ իրենց մասնակցությամբ կոնկրետ գործերով:  ԱԺ-ն երկրորդ ընթերցմամբ և ամբողջությամբ ընդունեց «Իմ քայլը»-ի պատգամավորների հեղինակած «Հայաստանի Հանրապետության դատական օրենսգիրք» սահմանադրական օրենքում փոփոխություններ եւ լրացումներ կատարելու մասին և կից ներկայացված օրենքների նախագծերի փաթեթը: Նախատեսվում է ԲԴԽ-ին օժտել դատարանների բնականոն գործունեություն ապահովելու լիազորություն` նախատեսելով, որ վերջինիս իրականացման ուղղությամբ ԲԴԽ-ն իրավունք ունենա ընդունելու նորմատիվ իրավական ակտեր: Սահմանվում է նաև, որ դատավորին կարգապահական պատասխանատվության ենթարկելու համար ՀՀ արդարադատության նախարարից և Դատավորների ընդհանուր ժողովի էթիկայի և կարգապահական հարցերի հանձնաժողովից բացի, ԲԴԽ-ին դիմելու իրավունք կունենան նաև ֆիզիկական և իրավաբանական անձինք՝ իրենց մասնակցությամբ կոնկրետ գործերով, եթե առերևույթ առկա է էական կարգապահական խախտման որոշակի հիմք: Այս դեպքում քաղաքացու կամ իրավաբանական անձի դիմումն ինքնին առիթ է լինելու՝ հարցը ԲԴԽ-ի կողմից քննելու համար: Նախագծի համահեղինակ Վլադիմիր Վարդանյանն անդրադարձավ փոփոխություններին, որոնք կատարվել են երկրորդ ընթերցմամբ քննարկման համար: Նախագծից դուրս է եկել դատական սանկցիաների հետ կապված հատվածը: Մի շարք կանոնակարգումներ ևս հանվել են նախագծից: Վարդանյանն անդրադարձավ նաև բավականին մեծ քննարկում առաջացրած կանոնակարգմանը, որը վերաբերում էր մեկ դատավորից գործեր վերցնելուն և մյուսին հանձնելուն: «ԲԴԽ-ն ունի լիազորություն՝ բաշխելու և վերաբաշխելու գործերը: Դատական օրենսգիրքն արդեն իսկ նախատեսում է առանձնակի բարդության գործերի հետ կապված ընթացակարգեր: Օրենքի 21-րդ հոդվածի 4-րդ մասով նախատեսված որոշումը ԲԴԽ-ի կողմից ընդունվելուց հետո երկամսյա ժամկետում առանձին տեսակի կամ բարդության այն գործեր, որոնցով դատաքննություն չի սկսվել, կարող են վերաբաշխվել ԲԴԽ-ի սահմանած կարգով»,-ասաց պատգամավորը: Հարակից զեկուցող Սիսակ Գաբրիելյանն էլ նշեց, որ հնչեցված քննադատությունների մեծ մասը փոփոխություններով փարատվել է:  Նախագիծը երկրորդ ընթերցմամբ քննարկմանը ստացավ 81 կողմ, 15 դեմ ձայներ: ԼՀԿ-ն առաջին ընթերցմամբ քննարկմանը կտրականապես դեմ էր արտահայտվել նախագծին:
20:58 - 19 մարտի, 2021
ԲԴԽ լիազորություններն ընդլայնող նախագիծն ընդունվեց առաջին ընթերցմամբ. ընդդիմությունը դեմ էր |tert.am|

ԲԴԽ լիազորություններն ընդլայնող նախագիծն ընդունվեց առաջին ընթերցմամբ. ընդդիմությունը դեմ էր |tert.am|

tert.am: Այսօր Ազգային ժողովում առաջին ընթերցմամբ ընդունվեց «Հայաստանի Հանրապետության դատական օրենսգիրք» սահմանադրական օրենքում փոփոխություններ եւ լրացումներ կատարելու մասին և կից ներկայացված օրենքների նախագծերի փաթեթը: Նախագծին կողմ քվեարկեց 80 պատգամավոր, դեմ՝ 6, ձեռնպահ՝ 1:Ըստ նախագծի՝ դատավորին կարգապահական պատասխանատվության ենթարկելու համար ՀՀ արդարադատության նախարարից և Դատավորների ընդհանուր ժողովի էթիկայի և կարգապահական հարցերի հանձնաժողովից բացի, ԲԴԽ-ին դիմելու իրավունք կունենան նաև ֆիզիկական և իրավաբանական անձինք՝ իրենց մասնակցությամբ կոնկրետ գործերով, եթե առերևույթ առկա է էական կարգապահական խախտման որոշակի հիմք: Այս դեպքում քաղաքացու կամ իրավաբանական անձի դիմումն ինքնին առիթ է լինելու հարցը ԲԴԽ-ի կողմից քննելու համար:
13:27 - 19 մարտի, 2021
Իշխանությունը չի լինելու փլուզվող արդարադատության լուռ երաշխավորը․ Արեն Մկրտչյան |armtimes.com|

Իշխանությունը չի լինելու փլուզվող արդարադատության լուռ երաշխավորը․ Արեն Մկրտչյան |armtimes.com|

armtimes.com: Վճռաբեկ դատարանի դատավորի ընտրության հարցի քննարկմանը «Իմ քայլը» խմբակցության պատգամավոր Արեն Մկրտչյանը անդրադարձավ ԲԴԽ նախագահ Ռուբեն Վարդազարյանի երեկվա պատասխաններին: «Բարձրագուն դատական խորհրդի նախագահը ԱԺ նիստերի դահլիճում Ազգային ժողովի 132 պատգամավորի ասում է՝ մի շփոթեք, սա Գլխավոր դատախազի տարեկան զեկույց չէ: Պարոն Վարդազարյան, դուք եք շփոթել ձեր գտնվելու վայրը, դուք Բարձրագույն դատական խորհրդի նիստի չեք, ձեզ կոռեկտ պահեք: Ի տարբերություն շատերի մեզ արյունոտ ձեռքերով բորենիեր չեն նշանակել պաշտոնի, ՀՀ քաղաքացիների ձայնն է ամփոփված այս դահլիճում»: Մեջբերելով Ռուբեն Վարդազարյանի՝ նոյեմբերի 15-ի հայտարարությունը, Մկրտչյանն ասաց. «Այս հայտարարությունն ու նոյեմբերի 15-ը կարող ենք հռչակել Ռուբեն Վարդազարյանի քաղաքական բենֆիսի օր և այն ընդգրկել տոների և հիշատակի օրերի ցանկում, քանի որ նոյեմբերի 15-ին հուղարկավորվեցին որոշների՝ երկիրը 20 տարի հետ շպրտելու բաղձալի երազանքները»: Մկրտչյանն ասաց՝ մարդակերներին չեն կալանավորել, բայց իրենց պատրաստ են կալանավորել: «Կալանավորելու եք հինգ րոպեում, առանց ձեռքը դողալու, որովհետ ձեզնից որոշների տերերը մեզ չեն ներել 2018-ը, չեն ներել հեղափոխությունը, քանի որ արդեն երեք տարի դասավորված են պատմության փոշոտ դարակներում: 2018-ը մեզ չեն ներելու որոշ դատավորներ, որոնք 2018 ապրիլ-մայիսին շտապօգնության մեքենաների տակ պաղկված գնում էին գործի, գալիս էին տուն»: Պատգամավորն ասաց՝ իշխանությունը չի լինելու փլուզվող արդարադատության լուռ երաշխավորը: «Վստահ եմ, որ թե՛ Բարձրագույն դատական խորհրդում, թե՛ մյուս դատական մարմիններում կան հայրենիքին նվիրված ազնիվ պրոֆեսիոնալներ, որոնք իրենց ներդրումն են ունենալու մեր երազանքների Հայաստանի կերտման գործում: Ռուբեն Վարդազարյան, դուք արատավոր անցյալի ուրվականն եք ներկայում: Նոյեմբերի 15-ի ձեր մարտակոչը մարտակոչ էր ընդդեմ Հայաստանի Հանրապետության: Դուք պատերազմ եք հայտարարել ՀՀ քաղաքացիներին: ԲԴԽ նախագահը անցած տարվա նոյեմբերին դիմել էր դատավորներին.«Այսօր է, թերևս, առարկայական ու վերջնական տրվելու շուրջ երկու տարի ողջ հանրությանը ալեկոծած և դատավորներիս համար ամոթալի չարաբաստիկ հարցի պատասխանը՝ մենք պատերի տակ վնգստացող դատավորնե՞ր ենք, թե՞ հայրենիքին նվիրված ազնիվ պրոֆեսիոնալներ»:
14:17 - 04 մարտի, 2021
Ռուբեն Վարդազարյանը պետք է պատասխանատվություն կրի՝ կլինենք մենք իշխանության, թե ոչ. Հայրապետյան |1lurer.am|

Ռուբեն Վարդազարյանը պետք է պատասխանատվություն կրի՝ կլինենք մենք իշխանության, թե ոչ. Հայրապետյան |1lurer.am|

1lurer.am: ԱԺ «Իմ քայլը» խմբակցության պատգամավոր Մխիթար Հայրապետյանը Վճռաբեկ դատարանի դատավորի ընտրության հարցի քննարկմանն անդրադարձավ ԲԴԽ նախագահի հայտարարություններին, ըստ նրա՝ «ստերին»:  «Ռուբեն Վարդազարյանը նշեց, որ քաղաքականությունից ոչինչ չի հասկանում՝ սուտ համար մեկ, և նշեց, որ քաղաքականության մեջ չի լինելու՝ սուտ համար երկու: Պետք է վստահեցնեմ, որ նա բավականին լավ տիրապետում է քաղաքական տարատեսակ մանյովրների, ճարպկությունների, խարդավանքների, և երկրորդ՝ նա արդեն իսկ քաղաքականության մեջ է: Հիմա, որպեսզի խոսքերս ծածկադմփոց չլինեն ու հիմնավոր հնչեն, կրկին այդ «լեգենդար» հայտարարությունից մեջբերումներ պետք է անեմ»,- ասաց պատգամավորը: Հայրապետյանը ընթերցեց Վարդազարյանի հայտարարությունից հատվածներ ու մեկնաբանեց: «Իր հայտարարությունը մի քանի շերտեր ունի իրականում: Առաջին շերտը ուղերձ է իր սեփական դատավորներին և ջարդարարներին: Երկրորդ հատվածը անարգանք է ծայրից ծայր արժանապատիվ դատավորների նկատմամբ և դատական համակարգի, այդ ինստիտուտի նկատմամբ: Երրորդ շերտը՝ վրեժ վարչապետ Նիկոլ Փաշինյանից և քաղաքական ռևանշիզմ, ըստ էության, իր ողջ հմայքով»,- ասաց պատգամավորը՝ նշելով, որ այդ հայտարարությանը հաջորդեցին նաև գործողություններ: Հայրապետյանն ասաց, թե ինչու հենց նոյեմբերի 15-ին եղավ այդ հայտարարությունը, քանի որ, պատգամավորի խոսքով, նոյեմբերի 13-16-ն այն օրերն էին, երբ դատարաններում քննվում էին ԱԺ և Կառավարություն մտած, ԱԺ նախագահի նկատմամբ մահափորձ իրականացրած մարդկանց գործերը: «Այն, ինչ մեր գործընկերոջ նկատմամբ տեղի է ունեցել, սրա արմատներն այս հայտարարությունն է և ոչ միայն: Պետք է հստակ արձանագրենք՝ այսօր, վաղը, թե վաղը չէ մյուս օրը Ռուբեն Վարդազարյանը պետք է պատասխանատվություն կրի սրա համար, մենք կլինենք իշխանության, թե ոչ, շուտ թե ուշ, միևնույն է, ճշմարտությունը և արդարությունը հաղթանակելու են»,- ասաց Հայրապետյանը՝ նշելով, որ Վարդազարյանի հայտարարությունը ոտքից գլուխ քաղաքական հայտարարություն է, որին պետք է  գնահատական տրվի: Պատգամավորի խոսքով՝ եթե ԲԴԽ գործող նախագահը վստահ լիներ, որ երեկ հրավիրվելու է ԱԺ՝ պատասխանելու նաև մեր հարցերին, 100 տոկոսով երաշխավորում եմ՝ այդ հայտարարությունը չէր լինելու: Ըստ Հայրապետյանի՝ Վարդազարյանը մեղք չունի, նրան վստահեցնում էին ինչ-որ տեղից, որ ինքն էլ պետք է իր քայլն անի:  Հայրապետյանը շեշտեց՝ Ռուբեն Վարդազարյանին չհաջողվեց անկախ դատական համակարգ ձևավորել, այլ հիմնականում ձևավորեց պետությանը և ժողովրդին ընդդիմադիր քաղաքական հայացքներ ունեցող, երբեմն դրսևորող դատական համակարգ:  ԱԺ պատգամավորը նշեց՝ Վարդազարյանին համարում է ընդդիմադիր քաղաքական գործիչ և կոչ է անում համապատասխան դիրքավորվել:
14:04 - 04 մարտի, 2021
«Իմ քայլն» այսօր չի ընտրելու դատավորի թեկնածու՝ իր դիրքորոշումն արտահայտելով ԲԴԽ նախագահի գործունեությանը. Մակունց

«Իմ քայլն» այսօր չի ընտրելու դատավորի թեկնածու՝ իր դիրքորոշումն արտահայտելով ԲԴԽ նախագահի գործունեությանը. Մակունց

Նախ ուզում եմ նշել, որ ԲԴԽ գործող նախագահը չի առաջադրվել և չէր կարող առաջադրվել «Իմ քայլը» խմբակցության կողմից, չի առաջադրվել խորհրդարանական ընդդիմության կողմից և ոչ էլ կառավարության կողմից, որովհետև դատավորներն առաջադրվում են դատական իշխանության կողմից, և նրանց ընտրում է դատավորների ընդհանուր ժողովը։ Այս մասին այսօր Ազգային ժողովում ասաց «Իմ քայլը» խմբակցության ղեկավար Լիլիթ Մակունցը՝ նշելով, որ ցանկանում է հանրությանը ներկայացնել իրողությունը, որպեսզի զերծ մնան ապատեղեկատվություններից։  Խոսելով Վճռաբեկ դատարանի դատավորի թեկնածուների մասին՝ Մակունցը շեշտեց, որ թեկնածուներին ներկայացնում է ԲԴԽ-ն, և դա է պատճառը, որ այս օրերին նրանց ներկայացնում էր ԲԴԽ նախագահը։ Խմբակցության ղեկավարն իր ելույթում ասաց․ «Ինչպես ակնհայտ էր երեք օրերի նիստերից, «Իմ քայլը» խմբակցությունը ավելի շատ կենտրոնացել էր՝ հասկանալի ու ընկալելի դարձնելու հանրության և մեզ համար 2020 թվականի նոյեմբերի 15-ին ԲԴԽ նախագահի հայտնի հայտարարությունը։ Ցավոք սրտի, ԲԴԽ նախագահի պարզաբանումները ոչ միայն բավարար ու սպառիչ չէին, այլև վերահաստատեցին մեր մտահոգությունները առ այն, որ պարոն Վարդազարյանի հայտարարությունը կանխամտածված քաղաքական էր։ Ուզում եմ հիշեցնել, որ հարցերին արձագանքի ժամանակ պարոն Վարդազարյանը ինքը նշեց, որ այն հանպատրաստից չի եղել»։ Մակունցն իր խոսքում նաև նշեց, որ, լինելով մի մարմին անդամ, որն ըստ Սահմանադրության պետք է երաշխավորի դատարանների և դատավորների անկախությունը, պարոն Վարդազարյանը իր գործունեությամբ որևէ կերպ չի նպաստել և չի նպաստում դատական իշխանության անկախության և քաղաքական զսպվածության երաշխավորմանը, ավելին՝ քաղաքականացրել և քաղաքականացնում է իշխանության երեք ճյուղերից ապաքաղաքական դիտարկվող դատական իշխանությունը։ ««Իմ քայլը» խմբակցությունը խորը ակնածանք ունի ներկայացված թեկնածուների՝ պարոն Հայկյանցի և պարոն Մկրտչյանի նկատմամբ։ «Իմ քայլը» խմբակցությունը նաև գնահատում է բազմաթիվ անկախ, ազնիվ, արհեստավարժ դատավորներին, և վստահ ենք, որ դատական համակարգում իրականացվելիք անհրաժեշտ բարեփոխումներին և փոփոխություններին զուգընթաց և դրանից հետո նրանք շարունակելու են ծառայել արդարադատությանը, պետությանն ու ժողովրդին»,- ասաց պատգամավորը։ Որպես ամփոփում Մակունցը տեղեկացրեց, որ, հաշվի առնելով պարոն Վարդազարյանի գործունեության վերաբերյալ իրենց գնահատականը, ինչպես նաև այն, որ պարոն Վարդազարյանը բացահայտ անհարգալից վերաբերմունք դրսևորեց առաջնային մանդատով օժտված, լեգիտիմ Ազգային ժողովի նկատմամբ, «Իմ քայլը» խմբակցությունը այսօր չի ընտրելու ներկայացված թեկնածուներին և իր այս քայլով դիրքորոշում է հայտնելու ոչ թե թեկնածուների նկատմամբ, այլ հենց պարոն Վարդազարյանի՝ որպես ԲԴԽ նախագահի գործունեության և հայտարարության վերաբերյալ։ «Մեր այս դիրքորոշումը ամրապնդվում է մեկ այլ հանգամանքով, հասել ենք այնտեղ, որ քրեական ենթամշակույթին առնչվող անձինք միջնորդավորված կապ են հաստատում ԱԺ պատգամավորների հետ՝ ի պաշտպանություն ԲԴԽ նախագահ պարոն Վարդազարյանի։ Այ էստեղ ենք հասել տիկնայք և պարոնայք»,- եզրափակեց «Իմ քայլը» խմբակցության ղեկավարը։ 
13:59 - 04 մարտի, 2021