ԿԳՄՍՆ

ՀՀ կրթության, գիտության, մշակույթի եւ սպորտի նախարարությունը գործադիր իշխանության հանրապետական մարմին է, որը մշակում եւ իրականացնում է կրթության, գիտության, մշակույթի եւ սպորտի բնագավառներում ՀՀ կառավարության քաղաքականությունը:

Նախարարն է Վահրամ Դումանյանը։ 

Կառավարությունը հավանություն է տվել կրթական ոլորտում միջազգային համագործակցությունը խթանող փաստաթղթերի. ԿԳՄՍՆ

Կառավարությունը հավանություն է տվել կրթական ոլորտում միջազգային համագործակցությունը խթանող փաստաթղթերի. ԿԳՄՍՆ

Այսօր գործադիրը հավանություն է տվել միջազգային համագործակցությունը խթանող մի շարք փաստաթղթերի։ Այս մասին հաղորդում է ԿԳՄՍՆ-ն: Մասնավորապես, Կառավարության նիստում հավանության է արժանացել 2020 թվականի մայիսի 29-ին ստորագրված «Անկախ պետու­թյունների համագործակցության ցանցային համալսարանի հիմնադրման և գործու­նեու­թյան մասին» համաձայնագիրը վավերացնելու մասին» օրենքի նախագծի վերաբերյալ Կառավարության օրենս­դրական նախաձեռնությունը: Օրենքի ընդունման արդյունքում կապահովվեն «Անկախ պետությունների համագործակցության ցանցային համալսարանի հիմնադրման և գործունեության մասին» համաձայնագրի ուժի մեջ մտնելու համար նախատեսված ընթացակարգերը: Գործադիրը հավանություն է տվել նաև 2019 թվականի նոյեմբերի 25-ին ստորագրված «Բարձրագույն կրթության որակավորումների փոխճանաչման մասին» համաշ­խարհային կոնվենցիան վավերացնելու մասին» օրենքի նախագծի վերաբերյալ Կառավարության օրենսդրական նախաձեռնությանը։ «Բարձրագույն կրթության որակավորումների փոխճանաչման մասին» համաշխարհային կոնվենցիան վավերացնելու մասին ՀՀ օրենքի  ընդունումը պայմանավորված է միջազգային ասպարեզում Հայաստանի գիտակրթական և հումանիտար կապերի ընդլայնման անհրաժեշտությամբ։ Միավորված ազգերի կրթական, գիտական և մշակութային կազմակերպությունը (ՅՈՒՆԵՍԿՕ) իր ուրույն տեղն ունի Հայաստանի Հանրապետության զարգացման օրակարգում: Հայաստանը միացել է բարձրագույն կրթության որակավորումների ճանաչման ՅՈՒՆԵՍԿՕ-ի մի շարք տարածաշրջանային կոնվենցիաներին, ակտիվորեն մասնակցում է վերջիններիս կիրարկմանը, և այս առումով սույն կոնվենցիան կոչված է լրացնելու բարձրագույն կրթության որակավորումների ճանաչման ՅՈՒՆԵՍԿՕ-ի մի շարք տարածաշրջանային կոնվենցիաներին, որոնցից Հայաստանի Հանրապետությունը միացել է Փարիզի (1979 թ.), Բանգկոկի (1983 թ.) և Լիսաբոնի (1997 թ.) կոնվենցիաներին: Նախագիծը վավերացնելու արդյունքում ակնկալվում է խթանել և ամրապնդել միջազգային համագործակցությունը բարձրագույն կրթության ոլորտում, ինչպես նաև ապահովել արդար, թափանցիկ և համապարփակ միջոցներ բարձրագույն կրթության որակավորման ճանաչման համար։ Նիստում հավանության է արժանացել նաև 2019 թվականի հուլիսի 5-ին Հանոյում ստորագրված «Հայաս­տանի Հանրապետության կառավարության և Վիետնամի Սոցիալիստական Հանրապե­տության կառավարության միջև կրթության և գիտության բնագավառում համագործակցու­թյան մասին» համաձայնագիրը վավերացնելու մասին» օրենքի նախագծի վերաբերյալ Կառավարության օրենս­դրական նախաձեռնությունը: Վերոնշյալ համաձայնագիրը վավերացնելու մասին ՀՀ օրենքի  ընդունումը պայմանավորված է կրթության և գիտության բնագավառում երկու երկրների ուղղակի համագործակցային հարաբերությունները խթանելու անհրաժեշտությամբ: Նախագծի նպատակն է առավել մատչելի դարձնել երկու երկրների կրթության ոլորտի մասնագետների, կրթական հաստատությունների միջև փորձի փոխանակումը, ինչպես նաև նպաստել պետությունների հետազոտողների, դասախոսների, ուսանողների և աշակերտների փոխանակման ծրագրերին:  Խորհրդային տարիներին երկու երկրների միջև կրթության ոլորտում համագործակցությունը գտնվել է բարձր մակարդակի վրա: Այժմ ՀՀ կրթության, գիտության, մշակույթի և սպորտի նախարարությունը փորձում է վերականգնել երբեմնի սերտ համագործակցությունը, այդ թվում՝ նաև այն միջազգային կազմակերպություններում, որոնց անդամ են երկու երկրները: ՀՀ կառավարության օրենսդրական բոլոր երեք նախաձեռ­նությունները սահմանված կարգով կներկայացվեն Ազգային ժողով:
13:16 - 16 սեպտեմբերի, 2021
Տարկետման համար նախատեսված փաստաթղթերը սահմանված ժամկետում չներկայացելու դեպքերում ԿԳՄՍՆ-ն Կառավարություն է ներկայացնում քաղաքացուն տրված տարկետումը դադարեցնելու մասին որոշման նախագիծ. հայտարարություն

Տարկետման համար նախատեսված փաստաթղթերը սահմանված ժամկետում չներկայացելու դեպքերում ԿԳՄՍՆ-ն Կառավարություն է ներկայացնում քաղաքացուն տրված տարկետումը դադարեցնելու մասին որոշման նախագիծ. հայտարարություն

ՀՀ կառավարության 2018 թվականի ապրիլի 12-ի N 451-Ն որոշմամբ տարկետում ստացած քաղաքացիներին ՀՀ կրթության, գիտության, մշակույթի և սպորտի նախարարությունը հիշեցնում է․ ՀՀ կառավարության 2018 թվականի ապրիլի 12-ի N 451-Ն որոշմամբ հաստատված հավելվածի 11-րդ կետի համաձայն՝ ստացած տարկետման ժամկետի ընթացքում յուրաքանչյուր տարվա մինչև սեպտեմբերի 30-ը քաղաքացին կամ նրա օրինական ներկայացուցիչը կամ նրա կողմից լիազորված անձը Կրթության, գիտության, մշակույթի և սպորտի նախարարություն և քաղաքացու զինվորական հաշվառումն իրականացրած ստորաբաժանում են ներկայացնում համապատասխան ուսումնական հաստատության կողմից տրված տեղեկանքները` հաջորդ կուրս փոխադրվելու վերաբերյալ: Այս մասին հայտնում է ԿԳՄՍՆ-ն: Նախատեսված փաստաթղթերը սահմանված ժամկետում չներկայացվելու դեպքերում ՀՀ կրթության և գիտության բնագավառի պետական լիազոր մարմինը ՀՀ կառավարություն է ներկայացնում քաղաքացուն տրված տարկետումը դադարեցնելու մասին Կառավարության որոշման նախագիծ, որի ընդունումից հետո քաղաքացին կորցնում է տարկետման իրավունքը և ենթակա է պարտադիր զինվորական ծառայության զորակոչի՝ օրենքով սահմանված կարգով: Ըստ այդմ՝ անհրաժեշտ է սահմանված ժամկետում Կրթության, գիտության, մշակույթի և սպորտի նախարարություն և քաղաքացու զինվորական հաշվառումն իրականացրած ստորաբաժանում ներկայացնել համապատասխան փաստաթղթերը:
16:27 - 14 սեպտեմբերի, 2021
Մշակութային համագործակցությունը հատուկ տեղ է գրավում ՀՀ և ՌԴ միջպետական ​​հարաբերություններում. Վահրամ Դումանյանն ընդունել է Միխայիլ Շվիդկոյին

Մշակութային համագործակցությունը հատուկ տեղ է գրավում ՀՀ և ՌԴ միջպետական ​​հարաբերություններում. Վահրամ Դումանյանն ընդունել է Միխայիլ Շվիդկոյին

ՀՀ կրթության, գիտության, մշակույթի և սպորտի նախարար Վահրամ Դումանյանն այսօր ընդունել է Ռուսաստանի Դաշնության նախագահի` միջազգային մշակութային համագործակցության հարցերով հատուկ ներկայացուցիչ Միխայիլ Շվիդկոյին: Այս մասին հայտնում է ԿԳՄՍՆ-ն: Ողջունելով Միխայիլ Շվիդկոյի այցը ՀՀ ԿԳՄՍ նախարարություն՝ Վահրամ Դումանյանը համոզմունք է հայտնել, որ մշակութային համագործակցությունը հատուկ տեղ է գրավում Հայաստանի և Ռուսաստանի երկկողմ միջպետական հարաբերություններում: ԿԳՄՍ նախարարը կարևորել է համագործակցության առկա ներուժի լիարժեք իրացումը, ինչպես նաև նոր ծրագրերի իրականացումը։ «Ուրախ եմ Ձեզ նման մեծ հարգանք և հեղինակություն վայելող գործչի հետ հանդիպման համար: Համոզված եմ՝ Ձեր հարուստ փորձով և գործունեությամբ շարունակելու եք նպաստել մեր երկրների միջև ձևավորված կրթական և մշակութային համագործակցության առավել խորացմանը և զարգացմանը»,- ասել է ԿԳՄՍ նախարարը և համագործակցությունը նոր մակարդակի բարձրացնելու համար անհրաժեշտ քայլեր ձեռնարկելու պատրաստակամություն հայտնել: Միխայիլ Շվիդկոն շնորհակալություն է հայտնել հանդիպման համար և խոսել հայ-ռուսական կրթամշակութային ծրագրերի ընդլայնման, երկկողմ մշակութային փոխգործակցության խորացման կարևորությունից: Զրուցակիցները հանգամանալից քննարկել են երկու երկրների կրթամշակութային գործիչների շփումներն ակտիվացնելու, Հայաստանում և Ռուսաստանում բարձր մակարդակով միջոցառումներ անցկացնելու վերաբերյալ հարցեր:  Վահրամ Դումանյանը Միխայիլ Շվիդկոյի ուշադրությունն է հրավիրել Արցախյան 44-օրյա պատերազմից հետո Ադրբեջանի վերահսկողության ներքո հայտնված տարածքներում համամարդկային արժեքներ հանդիսացող հայկական մշակութային ժառանգության պահպանության խնդրին: Միխայիլ Շվիդկոն նշել է, որ պատրաստ է հնարավորինս նպաստել հարցի լուծմանը: 
15:38 - 14 սեպտեմբերի, 2021
Պատերազմի մասնակից ուսանողները և սոցիալական խմբերը ուսման վարձի զեղչեր կստանան նոր կարգով

Պատերազմի մասնակից ուսանողները և սոցիալական խմբերը ուսման վարձի զեղչեր կստանան նոր կարգով

Մարտական գործողություններին մասնակից ուսանողներին, մարտական գործողությունների մասնակիցների ուսանող զավակներին, կնոջը կամ ամուսնուն, համաձայն ՀՀ կառավարության 2020 թվականի դեկտեմբերի 10-ին ընդունած որոշման՝ հատկացվել է մեկ կիսամյակի ուսման վարձի փոխհատուցում: «Այս ծրագրի շրջանակում արդեն մեկ կիսամյակի ուսման վարձի փոխհատուցում են ստացել 4200 մասնակից ուսանողներ, 2000 մասնակիցների զավակներ և 613 ամուսիններ (կանայք): Ընդհանուր առմամբ ավելի քան 7000 շահառու ստացել է մեկ  կիսամյակի ուսման վարձի 100 տոկոս փոխհատուցում: Այս ծրագրով ուսման վարձի փոխհատուցման գործընթացը կշարունակվի նաև 2022 թվականին` հաշվի առնելով, որ դեռևս կան պատերազմի մասնակից ժամկետային զինծառայողներ, որոնք չեն զորացրվել»,- այս մասին հայտնում են ԿԳՄՍ նախարարությունից: Միաժամանակ ուսման վարձի փոխհատուցումը շարունակական դարձնելու և այն որպես սովորողի հիմնական իրավունք ամրագրելու նպատակով Կառավարության նախաձեռնությամբ փոփոխություններ և լրացումներ են կատարվել «Բարձրագույն և հետբուհական մասնագիտական կրթության մասին», «Նախնական մասնագիտական (արհեստագործական) և միջին մասնագիտական կրթության մասին», «Կրթության մասին» ՀՀ օրենքներում: Օրենսդրական փոփոխություններն ուժի մեջ են մտել  ընթացիկ տարվա օգոստոսի 16-ին: Ըստ այդմ՝  Կառավարությունը պետք է ընդունի համապատասխան կարգ, որով մասնագիտական կրթական ծրագրեր իրականացնող ուսումնական հաստատություններում սովորողների առանձին խմբեր կօգտվեն ուսման վարձի լրիվ կամ մասնակի զեղչերից` ըստ առաջադիմության: ԿԳՄՍ նախարարությունից հայտնում են, որ մշակել են  «Հայաստանի Հանրապետության բարձրագույն ուսումնական հաստատություններում ուսանողական նպաստ և պետական կրթաթոշակ տալու կարգը հաստատելու  մասին» նոր նախագիծ, որն այժմ ներկայացված է այլ շահագրգիռ գերատեսչությունների համաձայնեցմանը, և ակնկալվում է, որ կընդունվի մինչև հոկտեմբեր ու կտարածվի 2021 թվականի սեպտեմբերի 1-ից հետո ծագած հարաբերությունների վրա: Ուսանողական նպաստի ձևով ուսման վարձի լրիվ փոխհատուցում տրամադրվում է հետևյալ ուսանողներին. ՀՀ կառավարության հաստատած տեղերի քանակին համապատասխան` մեկ ուսումնական տարվա քննությունների և ստուգարքների արդյունքներով առավել բարձր գնահատականներ ունեցող ուսանողներին` մրցութային կարգով` հաշվի առնելով նախորդ կիսամյակի կամ տարվա միջին որակական գնահատականի (ՄՈԳ) ցուցանիշները, առանց ծնողական խնամքի մնացած երեխաներին և դրանց թվին պատկանող մինչև 23 տարեկան անձանց, 1-ին և 2-րդ խմբերի հաշմանդամներին և հաշմանդամ երեխայի կարգավիճակ ունեցող անձանց` համաձայն «Հաշմանդամություն ունեցող անձանց իրավունքների մասին» ՀՀ օրենքի, ժամկետային պարտադիր զինվորական ծառայության ժամանակ ծառայողական պարտականությունները կատարելիս 1-ին կամ 2-րդ խմբի հաշմանդամության զինվորական կենսաթոշակի իրավունք ունեցող նախկին զինծառայողներին՝ համաձայն «Զինվորական ծառայության և զինծառայողի կարգավիճակի մասին» ՀՀ օրենքի, զոհված (մահացած) զինծառայողների մինչև 27 տարեկան զավակներին, ծնողներին, ամուսնուն (կնոջը)՝ համաձայն «Զինվորական ծառայության և զինծառայողի կարգավիճակի մասին» ՀՀ օրենքի, պետության համար առաջնահերթություն և կարևորություն ներկայացնող մասնագիտություններով նպատակային ուսուցմամբ ընդունված ուսանողներին: Նպաստի ձևով ուսման վարձի  մասնակի փոխհատուցում տրամադրվում է հետևյալ խմբերին. ընտանիքների անապահովության սահմանային միավորից բարձր միավորներ ունեցող ուսանողներին, սոցիալական աջակցություն ստացող սահմանամերձ համայնքների ուսանողներին, մարտական գործողություններին մասնակցած ուսանողներին, առկա ուսուցմամբ բակալավրի ու անընդհատ և ինտեգրացված կրթական ծրագրերով սովորող երկու և ավելի անչափահաս երեխա ունեցող ուսանողներին: Վերը նշված խմբերն ուսման վարձի զեղչից օգտվելու համար պետք է ապահովեն ՄՈԳ-ի որոշակի շեմ. վարձավճարի զեղչը կավելանա ՄՈԳ-ի ցուցանիշի բարձրացմանը զուգահեռ: Նշվում է, որ ուսման վարձի փոխհատուցման արտոնությունները տարածվում են նաև նախնական արհեստագործական և միջին մասնագիտական ուսումնական հաստատությունների սովորողների վրա:
11:51 - 14 սեպտեմբերի, 2021
Վանաձորում շինարարական աշխատանքների ընթացքում դամբարաններ են հայտնաբերվել․ ԿԳՄՍՆ

Վանաձորում շինարարական աշխատանքների ընթացքում դամբարաններ են հայտնաբերվել․ ԿԳՄՍՆ

Վանաձորի Խնձորուտ թաղամասում շինարարական աշխատանքների ընթացքում հայտնաբերվել են դամբարաններ, որոնցից մեկի բացվածքից դուրս է բերվել խեցեղեն` 5 կճուճ և սափորներ, խոշոր եղջերավոր կենդանիների ոսկորներ: Այս մասին հայտնում են ԿԳՄՍՆ-ից։  «Հնագիտական աշխատանքների համակարգող, Պատմամշակութային ժառանգության գիտահետազոտական կենտրոնի հնագետ Մելինե Սիմոնյանի խոսքով՝ գտածոներն ուշ բրոնզեդարի վերջի կամ վաղ երկաթեդարյան մշակույթի նմուշներ են, որոնք դեռ համապատասխան մշակում պետք է անցնեն: Հնակենդանաբանական ուսումնասիրության արդյունքում պարզվել է՝ խոշոր եղջերավորի ոսկորները ցուլի ոսկորներ են՝ 1 ազդոսկր և ծնոտի 2 բեկոր: Գտնվել են նաև մարդու ոսկորի ամբողջական բեկորներ: Գտածոները տեղափոխվել են Պատմամշակութային ժառանգության գիտահետազոտական կենտրոնի լաբորատորիա` ուսումնասիրության, նորոգման, վերականգնման, ինչից հետո դրանք կհանձնվեն Լոռի-Փամբակի երկրագիտական թանգարանին: Վերոնշյալ շինարարական աշխատանքներն այսուհետ կիրականացվեն նախարարության մասնագետների հսկողության ներքո, իսկ հայտնաբերված դամբարաններում անհրաժեշտության դեպքում կիրականացվեն ամբողջական պեղումների աշխատանքներ»,- նշված է ԿԳՄՍՆ հաղորդագրության մեջ։
10:40 - 11 սեպտեմբերի, 2021
Արա Խզմալյանը պաշտոնական այցով կմեկնի Մոսկվա

Արա Խզմալյանը պաշտոնական այցով կմեկնի Մոսկվա

Հայաստանի Հանրապետության կրթության, գիտության, մշակույթի և սպորտի նախարարի տեղակալ Արա Խզմալյանը սեպտեմբերի 13-15-ը պաշտոնական այցով կգտնվի Մոսկվայում՝ մասնակցելու Առնո Բաբաջանյանի ծննդյան 100-ամյա հոբելյանին նվիրված միջոցառումներին: Այս մասին հաղորդագրություն է տարածել  ԿԳՄՍ նախարարության հասարակայնության հետ կապերի և տեղեկատվության վարչությունը: «Այս տարի լրացել է Առնո Բաբաջանյանի ծննդյան 100-ամյակը, և ինչպես Հայաստանում են իրականացվել հոբելյանական տարաբնույթ միջոցառումներ, այնպես էլ տարբեր երկրներում, այդ թվում՝ Ռուսաստանի Դաշնությունում մեր հայրենակիցները նշում են Բաբաջանյանի հոբելյանը: «Առնո Բաբաջանյանի հիշատակի հիմնադրամի» ղեկավարության հրավերով նախարարը մասնակցելու է Մոսկվայում կայանալիք միջոցառումներին: ՀՀ ԿԳՄՍ նախարարության աջակցությամբ Հայաստանի դեսպանատանը կայանալիք համերգին կմասնակցի նաև Կոմիտասի անվան պետական լարային  քառյակը: «Մեծանուն կոմպոզիտորի հոբելյանի նշանավորմանը պետական բարձր մասնակցությունը պարտադիր պայման էր, և մենք մեր մասնակցությունն ենք ցուցաբերում միջոցառմանը»,- նշել է նախարարի տեղակալ Արա Խզմալյանը և հավելել, որ Առնո Բաբաջանյանի 100-ամյակին նվիրված հոբելյանական համերգներն ու միջոցառումները լինելու են շարունակական: Նշենք, որ սեպտեմբերի 11-ին Մոսկվայի պետական կոնսերվատորիայի Ռախմանինովի անվան դահլիճում տեղի կունենա համերգ, որի ընթացքում կկատարվեն Առնո Բաբաջանյանի դասական ստեղծագործությունները, իսկ սեպտեմբերի 14-ին ՌԴ-ում՝ ՀՀ դեսպանությունում, կկայանա երեք մեծանուն կոմպոզիտորների՝ Ալեքսանդր Հարությունյանի, Առնո Բաբաջանյանի և Էդվարդ Միրզոյանի հոբելյաններին նվիրված համերգ. կկատարվեն անվանի կոմպոզիտորների ստեղծագործություններից: ՀՀ ԿԳՄՍ նախարարության աջակցությամբ մեծանուն հայ կոմպոզիտոր, դաշնակահար, ԽՍՀՄ ժողովրդական արտիստ, պետական մրցանակների դափնեկիր Առնո Բաբաջանյանի ծննդյան 100-ամյակին նվիրված հոբելյանական միջոցառումները մեկնարկել են կոմպոզիտորի ծննդյան օրը՝ հունվարի 22-ին»,-ասված է հաղորդագրության մեջ:
10:30 - 11 սեպտեմբերի, 2021
Բուհերի կառավարման խորհուրդները կունենան 20 անդամ՝ կողմերի հավասար ներկայացվածությամբ. ԿԳՄՍՆ

Բուհերի կառավարման խորհուրդները կունենան 20 անդամ՝ կողմերի հավասար ներկայացվածությամբ. ԿԳՄՍՆ

ՀՀ պետական բուհերի հոգաբարձուների խորհուրդներն այսուհետ կձևավորվեն միասնական մոտեցմամբ․ դրանց թվակազմը նվազեցվել է մինչև «Բարձրագույն և հետբուհական մասնագիտական կրթության մասին» օրենքով սահմանված շեմը՝ 20 անդամ։  Ներկայացուցչական համամասնությունը՝ պրոֆեսորադասախոսական կազմ, ուսանողություն, բուհի հիմնադրի և լիազորված մարմնի ներկայացուցիչներ, բաշխվել է հավասարապես․ խորհրդի ձևավորող յուրաքանչյուր կողմին հատկացվում է կազմի 25 տոկոսը ձևավորելու իրավունք` 5-ական անդամի ներկայացվածություն։ Հոկտեմբերի 8-ին կայացած նիստում ՀՀ Կառավարությունը նմանօրինակ որոշում է կայացրել՝ փոփոխություններ կատարել Կառավարության մի շարք որոշումներում՝ պետական բարձրագույն ուսումնական հաստատությունների կանոնադրություններում։ Որոշման անհրաժեշտությունը պայմանավորված է բուհական համակարգի կառավարման արդյունավետության բարձրացման և բարձրագույն կրթության բնագավառում իրականացվող բարեփոխումները համակարգային դարձնելու նպատակադրությամբ։ Ներկայում 16 պետական բարձրագույն ուսումնական հաստատություններից 12-ն ունեն հիմնադրամների կազմակերպական-իրավական ձև, իսկ 4-ը՝ պետական ոչ առևտրային կազմակերպության: Դրանց գործունեությունը կարգավորվում է «Հիմնադրամների մասին», «Բարձրագույն և հետբուհական մասնագիտական կրթության մասին», «Կրթության մասին», «Պետական ոչ առևտրային կազմակերպությունների մասին» օրենքներով և համապատասխան բուհերի՝ հիմնադրի հաստատած կանոնադրություններով։ ՀՀ Կառավարության 2005 թվականի հունիսի 23-ի «Հայաստանի Հանրապետության պետական բարձրագույն ուսումնական հաստատության խորհրդի ձևավորման կարգը հաստատելու մասին» N 975-Ն որոշմամբ և բուհերի կանոնադրություններում այժմ սահմանված են խորհուրդների տարբեր թվաքանակներ՝ 32 կամ 24 հոգի (ոչ պակաս 20 և ոչ ավելի, քան 32), իսկ «Բարձրագույն և հետբուհական մասնագիտական կրթության մասին» օրենքով նախատեսված ներկայացուցչական համամասնությունը բաշխված է հավասարապես՝ խորհրդի ձևավորող յուրաքանչյուր կողմին հատկացվում է կազմի 25 տոկոսը ձևավորելու իրավունք։ Ներկայացվածության նման բաշխվածությունը և գործող թվաքանակը երբեմն բացասաբար են անդրադառնում խորհուրդների՝ կառավարչական որոշումներ կայացնելու օպերատիվության վրա, որոշ դեպքերում հանգեցնում խորհուրդների նախագահների և ռեկտորների ընտրության գործընթացի արգելափակմանը։  Ընդունված որոշմամբ փաստացի պահպանվում են բուհերի հոգաբարձուների խորհրդի ձևավորման նախկինում գործող համամասնությունները, ըստ որի՝ խորհրդում ներգրավված բոլոր կողմերն ունեն հավասար ներկայացվածություն։ Ակնկալվում է, որ պետական բուհերի կանոնադրություններում առաջարկվող փոփոխություններով կապահովվի վերջիններիս բնականոն գործունեությունը: Որոշմամբ սահմանվել է նաև, որ բարձրագույն ուսումնական  հաստատությունների խորհուրդները կձևավորվեն մինչև 2021 թվականի դեկտեմբերի 30-ը, իսկ գործող խորհուրդները կշարունակեն իրենց լիազորությունների իրականացումը, որոնք կդադարեն նոր խորհուրդների ձևավորման պահից:
11:58 - 09 սեպտեմբերի, 2021
«Ձեր միջոցով պետք է գրանցենք մեր լավագույն հաղթանակները». Վահրամ Դումանյանը Կազանում հանդիպել է հայ մարզիկների հետ

«Ձեր միջոցով պետք է գրանցենք մեր լավագույն հաղթանակները». Վահրամ Դումանյանը Կազանում հանդիպել է հայ մարզիկների հետ

ՀՀ կրթության, գիտության, մշակույթի և սպորտի նախարար Վահրամ Դումանյանը Ռուսաստանի Դաշնության Կազան քաղաք կատարած աշխատանքային այցի շրջանակում հանդիպել է ԱՊՀ երկրների առաջին խաղերին մասնակցող հայ մարզիկների հետ: Այս մասին հայտնում է ԿԳՄՍՆ-ն: ԿԳՄՍ նախարարը, ողջունելով մարզաշխարհի ներկայացուցիչներին, նրանցից հետաքրքրվել է, թե ինչպես են ընթանում խաղերը կազմակերպչական տեսանկյունից, և ինչպիսի տրամադրվածություն ունի Հայաստանի մարզական պատվիրակությունը: Ներկաները փաստել են, որ ամեն ինչ կազմակերպված է բարձր մակարդակով, իսկ իրենք տրամադրված են հաղթանակների:  «Դուք մեր ուժն եք: Ձեր միջոցով մենք պետք է գրանցենք մեր լավագույն հաղթանակները: Այս խաղերը ևս մեկ հնարավորություն են՝ ցույց տալու, որ մենք եղել ենք, կանք և կլինենք: Լավ մասնակցության շնորհիվ դուք բացում եք ավելի մեծ հաղթանակների ճանապարհը»,- ասել է Վահրամ Դումանյանը՝ դիմելով հայ մարզիկներին:  ԱՊՀ առաջին խաղերում Հայաստանն արդեն 5 արծաթե և 4 բրոնզե մեդալ է նվաճել, ևս 2 բրոնզե մեդալ երաշխավորված է մուայթայ մարզաձևում: Վահրամ Դումանյանն իր գոհունակությունն է հայտնել հայ մարզիկների ելույթներից և նշել, որ նրանք պետք է մրցահարթակ դուրս գան հնարավորինս անկաշկանդ. «Իհարկե, հաղթանակները կարևոր են, բայց ինքներդ ձեզ չկաշկանդեք անպայման հաղթելու մտքով. հաղթելու ցանկությունը պետք չէ դարձնել մոլուցք: Եթե այս անգամ չստացվի, կստացվի հաջորդ անգամ. կարևորը չընկճվելն է»:  Մարզիկները, խոսելով առաջին անգամ անցկացվող ԱՊՀ երկրների խաղերին իրենց մասնակցությունից, ընդգծել են, որ այս մարզական ստուգատեսը կարևոր է հատկապես փորձառություն ձեռք բերելու տեսանկյունից: ԿԳՄՍ նախարարը ևս փաստել է փորձի կարևորությունը. «Փորձառության շնորհիվ ձեռք եք բերում կամային հատկանիշներ, սառնասրտություն, էմոցիաները վերահսկելու կարողություն: Դուք դա ինձնից լավ գիտեք: Հնարավոր է՝ մարզումների ժամանակ ռեկորդներ գրանցել, իսկ բուն մրցումների ժամանակ՝ լարվել: Այնպես որ՝ համակարծիք եմ, որ ԱՊՀ երկրների առաջին խաղերին մասնակցության կարևոր նպատակներից է փորձ ձեռք բերելը. փորձն է հանգեցնում հաղթանակների»: Հանդիպման ընթացքում խոսվել է նաև ԿԳՄՍ նախարարության՝ սպորտի ոլորտի զարգացման ուղղությամբ տարվող աշխատանքներից և առկա խնդիրներից: ԿԳՄՍ նախարար Վահրամ Դումանյանը վստահեցրել է, որ առկա հնարավորությունների սահմաններում արվում է առավելագույնը. «Գուցե այս պահին կտրուկ թռիչքաձև վերելքներ չկան, բայց կան հաստատուն քայլեր, որոնք ապահովելու են զարգացում: Վստա՛հ եղեք: Կատարվում են մարզադպրոցների, մարզադահլիճների շինարարություններ, մշակվում են մարզիկներին աջակցության ծրագրեր: Դուք պարզապես շարունակե՛ք նույն սպորտային ոգևորությամբ շարժվել դեպի նոր հաղթանակներ»: Հավելենք, որ Ռուսաստանի Դաշնություն կատարած այցի շրջանակում ԿԳՄՍ նախարարը Կազանում կմասնակցի «Ռուսաստան – սպորտային պետություն» («Россия – спортивная держава») ֆորումին, ԱՊՀ ֆիզիկական կուլտուրայի և սպորտի հարցերով խորհրդի նիստին:
15:25 - 08 սեպտեմբերի, 2021
Ռազմամարզական ճամբարի ծրագիրը կընդլայնվի. քննարկում ԿԳՄՍ նախարարությունում

Ռազմամարզական ճամբարի ծրագիրը կընդլայնվի. քննարկում ԿԳՄՍ նախարարությունում

ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանի հրավիրած աշխատանքային հանդիպման ժամանակ քննարկվել է այս ամռանը փորձարկված մարզառազմական ճամբարի ծրագրի ընդլայնման հարցը: Այս մասին հայտնում է ԿԳՄՍՆ-ն։  «Նախնական զինվորական պատրաստություն» առարկայի գիտելիքների ու գործնական հմտությունների զարգացմանը միտված մարզառազմական ճամբարի 12-օրյա ծրագիրն այս տարի կյանքի է կոչվել առաջին անգամ` հունիսի 22-ից հուլիսի 4-ն ընկած ժամանակահատվածում: Փորձնական ծրագրին մասնակցել են Երևանի Գ. Էմինի անվան թիվ 182, Ա. Իսահակյանի անվան թիվ 16, Երևանի թիվ 97, Չարենցավանի Մ. Մաշտոցի անվան թիվ 1 ավագ և Գեղաշենի Ռ. Ստեփանյանի անվան միջնակարգ դպրոցների 100 աշակերտներ՝ 86 տղա և 14 աղջիկ: ԿԳՄՍ նախարարությունում տեղի ունեցած քննարկմանը մասնակցել են ռազմամարզական ճամբարի ծրագրի պատասխանատու Ա. Մանուկյանի անվան մարզառազմական մասնագիտացված դպրոցի տնօրեն Արկադի Պետրոսյանը, նույն դպրոցի մասնագետները, «Նախնական զինվորական պատրաստություն» առարկայի չափորոշչի հեղինակային խմբի նախագահ, Մոնթե Մելքոնյանի անվան վարժարանի փոխտնօրեն Արթուր Կարապետյանը, փորձնական ծրագրում ընդգրկված ուսումնական հաստատությունների զինղեկները: Աշխատանքային հանդիպման ընթացքում ամփոփվել են ճամբարային ուսումնական ծրագրի հիմնական արդյունքները, քննարկվել է ծրագրի ընդլայնման կարևորությունը: ԿԳՄՍ նախարարի տեղակալ Ժաննա Անդրեասյանը նշել է, որ մարզառազմական ճամբարը «Նախնական զինվորական պատրաստություն» (ՆԶՊ) առարկայի ուսուցման գործնական բաղադրիչն է: «Շատ կարևոր է, որ երեխաները մարզառազմական ճամբարին վերաբերեն ոչ թե որպես ամառային միջոցառման, այլ հասկանան, որ ճամբարը ՆԶՊ առարկայի ուսուցման պարտադիր բաղադրիչ է: Այս առումով շատ կարևոր է նախապատրաստական աշխատանքը, որ մինչև ճամբարային ծրագրի մեկնարկը պետք է կատարվի դպրոցներում»,- շեշտել է նախարարի տեղակալը: Քննարկման ընթացքում նշվել է, որ ՆԶՊ առարկայի նոր չափորոշչում կարևոր տեղ է տրված գործնական պարապմունքներին, որոնց ծավալն ընդհանուր առարկայական ծրագրում ավելի քան 70 տոկոս է կազմում: 2021-22 ուսումնական տարում ռազմամարզական ճամբարի ծրագիրը կիրականացվի ՀՀ Տավուշի մարզի դպրոցների ավագ դասարաններում՝ հաշվի առնելով, որ Հանրակրթության պետական նոր չափորոշիչն ու առարկայական ծրագրերը փորձարկման նպատակով ներդրվել են հենց այդ մարզում: Դիմելով քննարկմանը մասնակից զինղեկներին` ԿԳՄՍ նախարարի տեղակալ Ժաննա Անդրեասյանը հորդորել է նրանց առաջարկներ և դիտողություններ ներկայացնել ՆԶՊ առարկայի չափորոշչի վերաբերյալ, որոնք հաշվի կառնվեն լրամշակման և վերջնական խմբագրման ընթացքում: Քննարկման մասնակիցները ՆԶՊ առարկայի ուսուցման որակը բարձրացնելու տեսանկյունից կարևորել են հատկապես նյութատեխնիկական հագեցվածության, զինղեկների` պարտադիր ատեստավորման շրջանակում իրականացվող վերապատրաստումների արդյունավետության խնդիրները: Նշենք, որ ռազմամարզական ճամբարի ծրագրի շրջանակում երեխաներն ուսանում են ռազմարվեստի պատմություն, մարտավարություն, կրակային, շարային, հոգեբանական պատրաստություն, ռազմական տեղագրություն (գործնական), համազորային կանոնադրություններ, անվտանգ կենսագործունեություն, առաջին օգնություն, կապ և հեռահաղորդակցություն և այլ դասընթացներ` մասնավորապես զարգացնելով գործնական հմտությունները:
21:17 - 07 սեպտեմբերի, 2021
Վահրամ Դումանյանն ու Կարեն Գիլոյանն աշխատանքային այցով մեկնել են ՌԴ

Վահրամ Դումանյանն ու Կարեն Գիլոյանն աշխատանքային այցով մեկնել են ՌԴ

ՀՀ կրթության, գիտության, մշակույթի և սպորտի նախարար Վահրամ Դումանյանը և նախարարի տեղակալ Կարեն Գիլոյանը սեպտեմբերի 7-12-ն աշխատանքային այցով կլինեն Ռուսաստանի Դաշնությունում: Վահրամ Դումանյանը և Կարեն Գիլոյանը Կազանում կմասնակցեն «Ռուսաստան – սպորտային պետություն» («Россия – спортивная держава») ֆորումին, դրա շրջանակում նախատեսված խորհրդակցություններին և քննարկումներին, ԱՊՀ ֆիզիկական կուլտուրայի և սպորտի հարցերով խորհրդի նիստին: Այցի շրջանակում նախատեսված են նաև առանձին հանդիպումներ ԱՊՀ երկրների սպորտի ոլորտի ղեկավարների, ինչպես նաև Ռուսաստանի Դաշնության պետական մարզական կառույցների պատասխանատուների հետ:  Հավելենք նաև, որ ԿԳՄՍ նախարարը և նախարարի տեղակալը կհետևեն այս օրերին Կազանում ընթացող ԱՊՀ երկրների առաջին խաղերին, որտեղ Հայաստանը ներկայացված է 55 մարզիկով:
13:42 - 07 սեպտեմբերի, 2021
Վահրամ Դումանյանը հանդիպել է ՀԲ տարածաշրջանային պատասխանատուների հետ

Վահրամ Դումանյանը հանդիպել է ՀԲ տարածաշրջանային պատասխանատուների հետ

ՀՀ կրթության, գիտության, մշակույթի և սպորտի նախարար Վահրամ Դումանյանը հանդիպել է Համաշխարհային բանկի (ՀԲ) Հարավային Կովկասի տարածաշրջանային տնօրեն Սեբաստիան Մոլինեուսի և ՀԲ-ի Հայաստանի գրասենյակի նորանշանակ ղեկավար Կարոլին Գեգինատի հետ: Այս մասին հայտնեցին ՀՀ ԿԳՄՍ նախարարությունից: Ողջունելով հյուրերին` նախարար Վահրամ Դումանյանը շեշտել է, որ ԿԳՄՍ նախարարությունը ՀԲ-ի հետ տարիներ շարունակ իրականացրել է ոլորտային և բովանդակային բազմաթիվ ծրագրեր, որոնք ունեցել են բարձր արդյունավետություն: Այդ համատեքստում նախարարը մասնավորապես շեշտել է կրթության ոլորտի՝ ՀԲ աջակցությամբ իրականացված և ընթացքի մեջ գտնվող ծրագրերը: Շնորհավորելով Կարոլին Գեգինատին ՀԲ-ի Հայաստանի գրասենյակի ղեկավարի  առաքելությունը ստանձնելու կապակցությամբ` ԿԳՄՍ նախարարը հույս է հայտնել, որ նրա պաշտոնավարումը կնպաստի համագործակցության արդյունավետության առավել բարելավմանը: Իր հերթին ՀԲ Հարավային Կովկասի տարածաշրջանային տնօրեն Սեբաստիան Մոլինեուսը շնորհավորել է Վահրամ Դումանյանին նոր Կառավարության կազմում ընդգրկվելու համար` շեշտելով, որ միջնաժամկետ և երկարաժամկետ հեռանկարում համագործակցության շարունակականության ապահովումն արդյունավետ գործակցության համար կարևոր նախապայման է: ՀԲ ներկայացուցիչները որպես կարևոր նախադրյալ ընդգծել են այն հանգամանքը, որ ՀՀ կառավարության ծրագրում որպես մարդկային կապիտալի զարգացման հիմնական ուղղություն առանցքային տեղ է հատկացված կրթությանը․ դա համահունչ է ՀԲ հիմնական հանձնառություններին: «Մեզ համար կարևոր է ամրապնդել գործընկերությունը ՀԲ-ի և ԿԳՄՍ նախարարության միջև»,- շեշտել է ՀԲ Հայաստանի գրասենյակի ղեկավարը: Քննարկման ընթացքում կողմերը կարևորել են աջակցությունը մասնագիտական հմտությունների զարգացման ծրագրերին, որոնք կնպաստեն աշխատաշուկայի պահանջներին համահունչ մրցունակ մասնագետների պատրաստմանը և արտադրողականության խթանմանը: Այդ համատեքստում կարևորվել է նաև միջգերատեսչական համագործակցությունը: ԿԳՄՍ նախարար Վահրամ Դումանյանը, բարձր գնահատելով ՀԲ ոլորտային աջակցությունը, նշել է, որ այժմ մշակվում է Կառավարության գործողությունների ծրագիրը, որտեղ առավել մանրամասն կնշվեն ոլորտային համագործակցության թիրախները: Նախարարի ընդգծմամբ` շատ կարևոր է իմանալ, թե ինչ պատվեր և ինչպիսի պահանջներ են դրվում կրթության համակարգի առջև: ԿԳՄՍ նախարարի տեղակալ Ժաննա Անդրեասյանը նշել է, որ գործում է միջգերատեսչական աշխատանքային խումբ` Էկոնոմիկայի, Աշխատանքի և սոցիալական հարցերի և այլ նախարարությունների հետ համատեղ: Հանդիպման ընթացքում կողմերն արծարծել են նաև ոլորտային բարեփոխումների թեման՝ մասնավորապես քննարկելով «Բարձրագույն կրթության և գիտության մասին» նոր օրենքով և Հանրակրթության պետական նոր չափորոշչով ամրագրված ինստիտուցիոնալ փոփոխությունները: Անդրադարձ է կատարվել նաև դպրոցաշինության ծրագրերին, և շեշտվել է, որ սեպտեմբերի 3-ին տեղի է  ունեցել Համաշխարհային բանկի Եվրոպայի և Կենտրոնական Ասիայի երկրների կրթության ծրագրերի ղեկավար Հարրի Պատրինոսի և նրա ղեկավարած կրթության թիմի հետ առցանց հանդիպում, որի շրջանակում առավել մանրամասն քննարկվել են իրականացված ծրագրերը:  Նշենք, որ ՀԲ աջակցության ծրագրերով հիմնվել են 136 նախակրթարաններ, որոնց թվում՝ 127 նախակրթարան ՀՀ մարզերում, 9-ը՝ Երևան քաղաքում, հիմնանորոգվել են 13 ավագ դպրոցներ (10՝ մարզերում, 3-ը՝ Երևանում): 107 ավագ դպրոցներում բացվել են բնագիտական առարկաների  (ֆիզիկա, քիմիա, կենսաբանություն և աշխարհագրություն) լաբորատորիաներ: Իրականացվել է նորարարական 18 դրամաշնորհային ծրագիր՝ բուհերի կարողությունների հզորացման ուղղությամբ, կատարվել են ուսուցիչների վերապատրաստման ծրագրեր:
11:32 - 07 սեպտեմբերի, 2021
«Գառնի» պատմամշակութային արգելոցում նմանօրինակ պայմաններով անցկացված միջոցառումը չի եղել նախարարության համաձայնությամբ. ԿԳՄՍ

«Գառնի» պատմամշակութային արգելոցում նմանօրինակ պայմաններով անցկացված միջոցառումը չի եղել նախարարության համաձայնությամբ. ԿԳՄՍ

«Գառնի» պատմամշակութային արգելոցում 2021 թվականի սեպտեմբերի 4-ին տեղի ունեցած հարսանեկան արարողության վերաբերյալ ՀՀ ԿԳՄՍ նախարարությունը պարզաբանում է տարածել: «ՊՈԱԿ-ի հայտարարությունն առ այն, թե իբր նմանօրինակ պայմաններով միջոցառումն անց է կացվել նախարարության համաձայնությամբ, չի համապատասխանում իրականությանը»,- նշված է ԿԳՄՍ նախարարության տարածած հաղորդագրության մեջ: Մշակույթի գերատեսչությունից ընդգծում են, որ նախարարության մշակութային քաղաքականության առաջնահերթություններից է հասարակության մշակութային հասանելիության անխաթար ապահովումը, և դատապարտելի են այդ իրավունքի խաթարման երևույթները: «Ըստ այդմ՝ ի պատասխան «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի 2021 թվականի օգոստոսի 12-ին արգելոցի տարածքում մասնավոր միջոցառում կազմակերպելու վերաբերյալ գրության՝ նախարարությունը հանձնարարել է՝  միջոցառումը կարող է անցկացվել միայն աշխատանքային ժամերին՝ կազմակերպության բնականոն գործունեությունը չխաթարող պայմանների ապահովմամբ, միջոցառման ընթացքում օգտագործել բացառապես դասական, հոգևոր, ազգային, ժողովրդական, ջազ, ռոք երաժշտություն և հեղինակային երգեր՝ առաջնորդվելով ՀՀ մշակույթի նախարարի 2014 թվականի հուլիսի 24-ի N 430-Ա «Հայաստանի Հանրապետության մշակույթի նախարարության ենթակայության արգելոցների, արգելոց-թանգարանների և թանգարանների տարածքները վարձակալության տրամադրելու ընթացակարգով» սահմանված պահանջներով»,- շեշտված է հաղորդագրության մեջ: Ներկայում ուսումնասիրվում են խնդրին առնչվող մանրամասները, և համապատասխան միջոցառումներ կձեռնարկվեն ՊՈԱԿ-ի կողմից վերոնշյալ կարգի պահանջների և նախարարության հանձնարարականները շրջանցելու,  ինչպես նաև հետագայում նմանօրինակ դեպքերը բացառելու ուղղությամբ:
15:21 - 06 սեպտեմբերի, 2021
ԱԻ նախարարը ԿԳՄՍ նախարարի հետ քննարկել է քաղպաշտպանության թեման ուս. հաստատությունների դասաժամերում ներառելու հարցը. գործընկերը դրական է արձագանքել

ԱԻ նախարարը ԿԳՄՍ նախարարի հետ քննարկել է քաղպաշտպանության թեման ուս. հաստատությունների դասաժամերում ներառելու հարցը. գործընկերը դրական է արձագանքել

Արտակարգ իրավիճակների նախարարությունում սեպտեմբերի 6-ին՝ նախարար Անդրանիկ Փիլոյանի գլխավորությամբ տեղի է ունեցել խորհրդակցություն: Գերատեսչության ստորաբաժանումներն ու ՊՈԱԿ-ներն ամփոփել են նախորդ ամսվա ընթացքում իրականացված աշխատանքները:Զեկույցներ են ներկայացրել ԱԻՆ գլխավոր քարտուղարի պաշտոնակատար Արմենուհի Գրիգորյանը, հրդեհային և տեխնիկական անվտանգության հետաքննության վարչության պետ Աշոտ Մկրտչյանը, կադրային քաղաքականության բաժնի պետ Քրիստինե Ռաթևոսյանը և ԱԻՆ Ճգնաժամային կառավարման պետական ակադեմիայի ռեկտոր Համլետ Մաթևոսյանը:Արմենուհի Գրիգորյանը զեկուցել է, որ «Տեխնիկական անվտանգության ազգային կենտրոն» ՊՈԱԿ-ից և հավատարմագրված անձանցից մեկ ամսում ստացվել, վերլուծվել և Արտադրական վտանգավոր օբյեկտների ռեեստրում գրառվել է թվով 870 տեխնիկական անվտանգության փորձաքննության եզրակացություն:«Տեխնիկական անվտանգության ազգային կենտրոն» ՊՈԱԿ-ի կողմից կնքվել են 178 պայմանագրեր, որոնք հանձնվել են փորձագետներին` փորձաքննություն իրականացնելու նպատակով, 622 ԱՎՕ-ներին տրվել են դրական եզրակացություններ: Ուսուցանվել են տեխնիկական անվտանգության 164 մասնագետեր:Սեյսմիկ պաշտպանության տարածքային ծառայության կողմից հաշվետու ժամանակահատվածում 307 երկրաշարժի տվյալ է գրանցվել: Սեյսմիկ ռիսկի նվազեցման ուղղությամբ միջոցառումների շրջանակում իրականացվել են շենք-շինությունների տեխնիկական վիճակի և սեյսմիկ խոցելիության գնահատման աշխատանքներ՝ ինչպես պետական համալիր ծրագրերի համաձայն, այնպես էլ պայմանագրային հիմունքներով:Հրդեհային և տեխնիկական անվտանգության հետաքննության վարչության պետ Աշոտ Մկրտչյանի ներկայացմամբ՝ ընդհանուր առմամբ, նշված ժամանակահատվածում հանրապետությունում գրանցվել են 1024 հրդեհային դեպքեր, նախորդ ամսվանից փոխանցվել է 168-ը, հարուցվել է 8 քրեական գործ:ՃԿՊԱ ռեկտոր Համլետ Մաթևոսյանի զեկույցի համաձայն` օգոստոսին Հարավկովկասյան երկաթուղի ընկերության մասնագետների հետ ուսումնական հաստատությունն իրականացրել է 120-ժամյա տեսական և գործնական դասընթացներ, անցկացվել է առաջին օգնության ցուցաբերման թեմայով 40-ժամյա դասընթաց` ԱԻՆ ՓԾ Բժշկական ապահովման վարչությունում և Լուսակերտի ուսումնական բազայում: Ակադեմիայի ՏՏ խումբն ԱԹՍ-ների միջոցով իրականացրել է անտառային հրդեհների դեպքում և դրանցից խուսափելու համար վարքականոնների վերաբերյալ ազդարարման թռիչքներ Հրազդան-Հանքավան ճանապարհահատվածում` Մեղրաձորի հարակից հանգստյան գոտիներում: Ազդարարման նպատակով թռիչքներ են իրականացվել նաև Սևանա լճում: Ռեկտոր Մաթևոսյանը տեղեկացրել է, որ սկսվել են ուսուցողական ԱԹՍ-ների տեխնիկական հագեցվածության աշխատանքներ, նախագծման փուլում է գտնվում ունիվերսալ ռոբոտ սարքի ստեղծումը: Այն իրենից ներկայացնում է անօդաչու թռչող սարք, որը կարող է քայլել պատերի վրայով: Նախարար Ա. Փիլոյանը նշել է, որ ԱԹՍ-ների կիրառման հետ կապված ուսանողների և մարզային վարչությունների փրկարարների պատրաստվածությանն ուղղված աշխատանքը պետք է շարունակվի, գերատեսչությունն իր առջև խնդիր է դրել` մարզային վարչություններին ապահովել անօդաչուներով:Հ. Մաթևոսյանը տեղեկացրել է նաև, որ օգոստոսին շարունակվել է ընդունելության գործընթացը. առաջին կուրս ընդունվել է 174 դիմորդ`107-ը հեռակա, մագիստրոսական ծրագրով ընդունելությունը շարունակվում է: Միջին մասնագիտական ծրագրով առաջարկվում է 90 անվճար տեղ:Նախարար Անդրանիկ Փիլոյանը նշել է, որ ԿԳՄՍ նախարարի հետ քննարկել է քաղպաշտպանության թեման ուսումնական հաստատությունների դասաժամերում ներառելու հարցը. գործընկերը դրական է արձագանքել:Ա. Փիլոյանն անդրադարձել է նաև պատվաստումների գործընթացին:
14:49 - 06 սեպտեմբերի, 2021
5 սփյուռքահայ մասնագետ կաշխատի ԿԳՄՍՆ-ում

5 սփյուռքահայ մասնագետ կաշխատի ԿԳՄՍՆ-ում

Կրթության, գիտության, մշակույթի և սպորտի նախարարությունը տեղեկացնում է, որ Սփյուռքի գործերի գլխավոր հանձնակատարի գրասենյակի «իԳործ» ծրագրի շրջանակում այս տարի կընդունի 5 սփյուռքահայ մասնագետի: Ինչպես հայտնում են նախարարությունից, մասնագետներից Մարինա Ներսեսյանը և Հակոբ Մակդիսն այսօր առաջին աշխատանքային հանդիպումն են ունեցել ԿԳՄՍ նախարարի տեղակալ Արթուր Մարտիրոսյանի հետ: Ողջունելով և բարի երթ մաղթելով գերատեսչության նոր աշխատակիցներին՝ ԿԳՄՍ նախարարի տեղակալն ընդգծել է, որ նրանք մեկ տարվա աշխատանքի արդյունքում կարող են իրենց ներդրումն ունենալ պետական համակարգի բարեփոխումների գործում:  «Հայաստանի Հանրապետության հանրային կառավարման ոլորտի բարեփոխումների համատեքստում այս ծրագիրը շատ կարևոր բաղադրիչ է: Այն օգնում է սփյուռքի մասնագիտական ներուժն ուղղել Հայաստանին: Սա հնարավորություն է պետական համակարգի աշխատանքը ներսից տեսնելու և այն բարեփոխելու գործում ներդրում ունենալու տեսանկյունից: Ծրագիրը նաև հայրենասիրության դրսևորում է, քանի որ շատերը, վստահաբար, թողնում են ավելի լավ պայմաններ և գալիս Հայաստան»,- ասել է Արթուր Մարտիրոսյանը: ԿԳՄՍ նախարարի տեղակալի խոսքով՝ ծրագրի մասնակիցներից յուրաքանչյուրն իր ուրույն մասնակցությունը կունենա գերատեսչության աշխատանքներին. «Մասնակիցները տարբեր երկրներից են, ինչը նշանակում է՝ ունենալու ենք 5 տարբեր փորձառություն և աշխատելաոճ: Լիահույս ենք, որ բոլորի գործունեությունը կհաջողվի: Նախարարությունը կանի հնարավորը, որպեսզի ծրագրի մասնակիցներից յուրաքանչյուրն արագ ինտեգրվի աշխատակազմին»: Ծրագրի ղեկավար Լիանա Սիմոնյանը հույս է հայտնել, որ սփյուռքահայ մասնագետները նախարարությունում լիովին կիրացնեն իրենց ներուժը. «Շնորհակալ եմ ԿԳՄՍ նախարարությանը երկրորդ տարին անընդմեջ մեր մասնագետներին ընդունելու համար: Առաջին ամիսներին հնարավոր են դժվարություններ՝ պայմանավորված մշակութային տարբերություններով ևս, բայց մեր մասնակիցներին խնդրում եմ կենտրոնանալ ոչ թե ակնկալիքների, այլ մտադրությունների վրա: Հուսով ենք՝ այնքան կսիրեք ԿԳՄՍ նախարարությունում ձեր աշխատանքը, որ մեկ տարի հետո կցանկանաք շարունակել աշխատել և ապրել Հայաստանում»: «իԳործ» ծրագրի մասնակիցներից Մարինա Ներսեսյանը նշել է, որ Միացյալ Նահանգների Բոստոն քաղաքից հայրենիք է ժամանել հստակ նպատակով. «Հայաստան եմ եկել, քանի որ սիրում եմ իմ երկիրը և ցանկանում եմ օգտակար լինել կարողություններիս չափով: Պատրաստակամ եմ կիսել իմ փորձն ու գիտելիքները և վստահ եմ, որ շատ բան էլ սովորելու եմ ձեզանից»:  Հալեպից Հայաստան ժամանած Հակոբ Մակդիսը ևս ընդգծել է ծրագրի կարևորությունը. «Շնորհակալ ենք այս հնարավորության համար: Կարծում եմ՝ սա շատ կարևոր նախաձեռնություն է մեր երկրի զարգացման գործում»:  Յուրօրինակ կոչ հղելով սփյուռքին՝ ծրագրի մասնակիցը շեշտել է. «Մենք չենք կարող Հայաստանը սիրել միայն խոսքերով, պետք է գալ հայրենիք, աշխատել և ներդրում ունենալ հանրապետության զարգացման գործում»:
23:16 - 03 սեպտեմբերի, 2021
Մարինա Մալախյանն ազատվել է Երևանի թիվ 122 դպրոցի տնօրենի պաշտոնից

Մարինա Մալախյանն ազատվել է Երևանի թիվ 122 դպրոցի տնօրենի պաշտոնից

 ՀՀ ԿԳՄՍ նախարար Վահրամ Դումանյանը Մարինա Մալախյանին Երևանի Ալ. Բլոկի անվան թիվ 122 հիմնական դպրոցի ղեկավարի իրավունքի հավաստագրի գործողությունը դադարեցնելու վերաբերյալ հրաման է ստորագրել: Այս մասին հաղորդագրություն է տարածել ԿԳՄՍ նախարարությունը: «Հրամանի համար հիմք են հանդիսացել համացանցում տեղադրված ձայնագրությունը և ՀՀ կրթության, գիտության, մշակույթի և սպորտի նախարարության հանրակրթության վարչության պետի զեկուցագիրը»,- նշված է հաղորդագրության մեջ: Ավելի վաղ, «Փաստերի ստուգման հարթակ» համացանցային լրատվական կայքում 02.09.2021 թ. հրապարակվել էր «Կաշառք ու աշխատավարձի «ատկատ»՝ Երեւանի 122 դպրոցում» վերտառությամբ հոդված: Երևանի քաղաքապետարանը Երեւանի թիվ 122 դպրոցի տնօրեն Մարինա Մալախյանի կողմից նույն դպրոցի ուսուցչուհի Մելինե Հակոբյանից աշխատանքի ընդունելու համար ենթադրյալ կաշառք վերցնելու և այժմ էլ վարձատրության մի մասը պահանջելու վերաբերյալ լրատվամիջոցներում հրապարակված նյութն ու ձայնագրությունը ուղարկել է ՀՀ ոստիկանություն:
21:17 - 03 սեպտեմբերի, 2021
Երևանի Կամերային և Հ. Պարոնյանի անվան երաժշտական կոմեդիայի պետական թատրոնները ստացել են աջակցություն. ԿԳՄՍՆ

Երևանի Կամերային և Հ. Պարոնյանի անվան երաժշտական կոմեդիայի պետական թատրոնները ստացել են աջակցություն. ԿԳՄՍՆ

ՀՀ կառավարության այսօրվա նիստում գործադիրը որոշում է կայացրել համապատասխան աջակցություն ցուցաբերել Երևանի Կամերային և Հ. Պարոնյանի անվան երաժշտական կոմեդիայի պետական թատրոններին։ Այս մասին տեղեկացնում է ԿԳՄՍՆ-ն: Մասնավորապես, Կրթության, գիտության, մշակույթի և սպորտի նախարարության համապատասխան հատկացումներից կատարվել է 7231.9 հազ. դրամի վերաբաշխում, որից 6265.8 հազ. դրամն ուղղվել է «Թատերահամերգային կազմակերպությունների նյութատեխնիկական բազայի  համալրում» միջոցառմանը (1500.0 հազ. դրամ` ֆլեյտայի ձեռքբերում, 4765.8 հազ. դրամ՝ լուսաձայնային սարքավորումների և գույքի ձեռքբերում), իսկ 973.3 հազ. դրամը՝ «Թատրոնների շենքերի ընթացիկ նորոգում» միջոցառմանը (մետաղական կոնստրուկցիաների պատրաստում): Որոշման ընդունումը պայմանավորված է այն հանգամանքով, որ Երևանի Կամերային պետական թատրոնի հիմնական, փակ դահլիճն ունի օդափոխության խնդիր: Դահլիճում պատշաճ որակի օդափոխման համակարգի բացակայության հանգամանքը թատրոնի համար անհրաժեշտություն է առաջացրել գործարկել բացօթյա հարթակում ներկայացումների անցկացման ձևաչափը, ինչը թույլ կտա պահպանել ՀՀ առողջապահության նախարարության սահմանած սոցիալական հեռավորությունը և համավարակի կանխարգելման այլ կանոնները: Թատրոնի լուսաձայնային սարքավորումների տեխնիկական հնարավորությունները ևս չեն համապատասխանում բացօթյա պայմաններում պատշաճ շահագործման համար: Հետևաբար, վերոնշյալ թատերական բացօթյա հարթակի համար լուսաձայնային սարքավորումների և գույքի ձեռքբերումը խիստ անհրաժեշտ է: Որոշման արդյունքում Երևանի Կամերային պետական թատրոնը 2021 թվականի սեպտեմբերին կարող է իրականացնել բացօթյա ներկայացումներ: Բացօթյա թատերական հրապարակը կդառնա երևանցիների ու մայրաքաղաքի հյուրերի սիրելի և նախընտրելի վայրերից մեկը՝ հետագայում ձևավորելով բարի ավանդույթ: Հ. Պարոնյանի անվան երաժշտական կոմեդիայի պետական թատրոնն ունի երաժշտական գործիքների (մասնավորապես ֆլեյտայի խիստ պահանջ),  առանց որոնց հնարավոր չէ ապահովել կատարողական և  մասնագիտական լավ որակ: Ըստ այդմ՝ առաջացել է գործիքների ձեռքբերման անհրաժեշտություն: Որոշման արդյունքում Հ. Պարոնյանի անվան երաժշտական կոմեդիայի պետական թատրոնի նվագախումբը մասնագիտական և կատարողական որակի բարձրացման հնարավորություն կունենա:
14:47 - 02 սեպտեմբերի, 2021