Միացյալ Թագավորություն

Պետական կարգը՝ միապետություն
Մայրաքաղաքը՝ Լոնդոն
Տարածքը՝ 244 հզ. կմ
Բնակչությունը՝ 59,8 մլն
Պետական լեզուն՝ անգլերեն
Դրամական միավորը՝ ֆունտ ստեռլինգ

Միացյալ Թագավորությունն ունի մասամբ կարգավորվող շուկայական տնտեսություն։ Ըստ շուկայական փոխարժեքների՝ Միացյալ Թագավորությունը համարվում է աշխարհում 8-րդ և Եվրոպայում 2-րդ (Գերմանիայից հետո) ամենամեծ տնտեսություն ունեցող պետությունը։ Թագուհու գանձապետարանը, որը գլխավորում է կանցլերը, պատասխանատու է բրիտանական կառավարության կողմից հասարակական ֆինանսական և տնտեսական քաղաքականության մշակման և կիրառման համար։

Անգլիայի բանկը կամ Միացյալ Թագավորության կենտրոնական բանկը պատասխանատու է ազգային արտարժույթի՝ ֆունտ ստերլինգի թողարկման համար։ Տուրիզմը համարվում է բրիտանական տնտեսության ամենակարևոր մասը, և 2004թ․ 27 մլն զբոսաշրջիկներով պետությունը զբաղեցնում է 6-րդ տեղը համաշխարհային տուրիզմի շարքերում, իսկ Լոնդոնը համարվում է զբոսաշրջիկների կողմից ամենաշատ այցելվող քաղաքը աշխարհում։

Իրանի արտգործնախարարը Եմենին ԱՄՆ-ի և Մեծ Բրիտանիայի հարվածները ռազմավարական սխալ է անվանել |news.am|

news.am: Միացյալ Նահանգները և Մեծ Բրիտանիան, որոշելով հարվածել Եմենում հութիների թիրախներին, թույլ տվեցին ռազմավարական սխալ, ինչը հանգեցրեց տարածաշրջանում հակամարտությունն ընդլայնելու ռիսկին։ Այս մասին հայտարարել է Իրանի արտգործնախարար Հոսեյն Ամիր Աբդոլլահիանը՝ ելույթ ունենալով ՄԱԿ-ի Անվտանգության խորհրդում Մերձավոր Արևելքի հարցով բաց բանավեճում։ «Միացյալ Նահանգները, ինչպես նաև Միացյալ Թագավորությունը, ռազմավարական սխալ թույլ տվեցին, երբ ռազմական հարձակում գործեցին Եմենի վրա՝ վտանգելով ավելի լայն հակամարտություն տարածաշրջանում: Մենք բոլորս հավատում ենք, որ ծովային անվտանգությունը կարևոր է համաշխարհային առևտրի համար: Միևնույն ժամանակ, անվտանգությունը փոխկապակցված հայեցակարգ է, և զարգացումներն ապացուցում են, որ Գազայում ցեղասպանության կասեցումը առանցքային է տարածաշրջանում կայունության վերականգնման համար»,- ասել է նախարարը։

09:59 - 24 հունվարի, 2024

ԱՄՆ-ն հայտարարել է Եմենին նոր հարված հասցնելու մասին |news.am|

news.am: ԱՄՆ-ն նոր հարված է հասցրել Եմենին և ոչնչացրել երկու բալիստիկ հրթիռ հութիների վերահսկողության տակ գտնվող տարածքներում։ Այս մասին հայտարարել է ԱՄՆ զինված ուժերի կենտրոնական հրամանատարությունը։ «Հունվարի 24-ին, մոտավորապես ժամը 02:30-ին, Սանայի ժամանակով, ԱՄՆ կենտրոնական հրամանատարությունը հարձակվել է Հութիների երկու հականավային հրթիռների վրա», - ասվում է հաղորդագրության մեջ: Այն հրապարակվել է X հրամանի էջում։ Նշվել է, որ Միացյալ Նահանգները «որոշել է, որ դա անմիջական վտանգ է ներկայացնում առևտրային նավերի և նավերի համար»։ Հայտարարության մեջ նշվում է, որ ամերիկյան ուժերը ինքնապաշտպանության նպատակով խոցել և ոչնչացրել են հրթիռները։

09:53 - 24 հունվարի, 2024

ԱՄՆ-ն և Մեծ Բրիտանիան հերթական հարվածներն են հասցրել Եմենում հութիների ռազմական օբյեկտներին |armenpress.am|

armenpress.am: ԱՄՆ-ն և Մեծ Բրիտանիան համատեղ հարվածներ են հասցրել Եմենում գործող հութի ապստամբների օբյեկտներին։ Այս մասին համատեղ հայտարարություն են տարածել երկու երկրների պաշտպանական գերատեսչությունները։ Ըստ հայտարարության՝ հունվարի 22-ին հարվածներ են հասցվել 8 թիրախների, այդ թվում՝ ստորգետնյա պահեստարանի, ինչպես նաև «հութիների հրթիռային և հետախուզական հնարավորությունների հետ կապված վայրերի»։ Համատեղ գործողությանը մասնակցել են նաև Ավստրալիան, Բահրեյնը, Կանադան և Նիդեռլանդները։ Կողմերը հայտնել են, որ հարվածներն իրականացվել են՝ «ի պատասխան հութիների կողմից միջազգային և առևտրային նավարկության, ինչպես նաև Կարմիր ծովով անցնող ռազմածովային ուժերի նավերի դեմ ուղղված շարունակական հարձակումների»։ Ըստ հայտարարության՝ նոյեմբերի կեսերից հութիներն ավելի քան 30 հարձակում են գործել միջազգային և առևտրային նավերի վրա։ Խռովարար շարժումը հայտարարել էր, որ կթիրախավորի Իսրայելի հետ կապված նավերը, մինչև Գազայի հատվածում ռազմական գործողությունները չդադարեն։ ԱՄՆ-ն և Մեծ Բրիտանիան վերջին շաբաթների ընթացքում մի շարք ավիահարվածներ են հասցրել Եմենում հութիներին պատկանող ռազմական օբյեկտներին, այդուհանդերձ, հութիների հարձակումները չեն դադարել։

12:27 - 23 հունվարի, 2024

2023 թվականին մեկնարկել է ՀՀ-ի և ՄԹ-ի միջև ռազմավարական երկխոսությունը. ԱԳՆ-ն ամփոփել է նախորդ տարվա ձեռքբերումները

2023 թվականին մեկնարկել է Հայաստանի Հանրապետության և Միացյալ Թագավորության միջև ռազմավարական երկխոսությունը, որի առաջին նիստը կայացել է նոյեմբերին ԱԳ նախարար Արարատ Միրզոյանի՝ Լոնդոն կատարած այցի շրջանակներում: Այս մասին հաղորդագրություն է տարածել Հայաստանի Հանրապետության արտաքին գործերի նախարարությունը՝ ներկայացնելով եվրոպական ուղղությամբ գործընկերների հետ հարաբերությունների զարգացումներին ամփոփիչ հաշվետվությունը «ԱԳ նախարարի այցը նշանավորվել է նաև Լոնդոնում ՀՀ դեսպանության նոր շենքի բացման պաշտոնական արարողությամբ: Տարվա ընթացքում կայացել են նաև Միացյալ Թագավորության Եվրոպայի հարցերով նախարար Լեո Դոքերթիի այցերը տարածաշրջան, ինչպես նաև ՀՀ ԱԳ նախարարի շփումները ՄԹ նորանշանակ ԱԳ նախարար Դեյվիդ Քեմերոնի հետ: Միացյալ Թագավորության գործադիր և օրենսդիր մարմինների, գիտահետազոտական, լրատվական շրջանակների հետ ակտիվ քննարկումները միտված են եղել զարգացնել երկկողմ քաղաքական երկխոսությունը, փոխգործակցությունը բազմակողմ հարթակներում, ինչպես նաև փոխըմբռնումը տարածաշրջանային հարցերի շուրջ: Տնտեսական համագործակցության զարգացման նպատակով Լոնդոնում կազմակերպվել է հայ-բրիտանական գործարար համաժողով»,- նշված է հաղորդագրության մեջ:

11:54 - 17 հունվարի, 2024

Ջո Բայդենը Եմենի հութիներին «ահաբեկչական» խմբավորում է անվանել

ԱՄՆ նախագահ Ջո Բայդենը Եմենի հութիներին «ահաբեկչական» խմբավորում է անվանել` այդ տարածքում ամերիկյան և բրիտանական ռազմական հարվածների ֆոնին: Այս մասին հայտնում է Reuters-ը։ «Կարծում եմ՝ այո», - ասել է Բայդենը՝ պատասխանելով լրագրողի հարցին, թե արդյոք պատրաստ է հութիներին անվանել ահաբեկչական խմբավորում: Բայդենը նշել է, որ Վաշինգտոնը կպատասխանի հութիներին, եթե նրանք շարունակեն նույն վրդովեցուցիչ վարքագիծը դրսևորել: Հիշեցնենք,, որ ԱՄՆ-ի և Մեծ Բրիտանիայի զինված ուժերը հունվարի լույս 12-ի գիշերվանից հարվածներ են հասցնում Եմենի «Անսար Ալլահ» (հութիներ) շարժման օբյեկտներին: Պաղեստինա-իսրայելական հակամարտության սրումից ի վեր հութիները հայտարարել էին, որ հարվածներ կհասցնեն Իսրայելի տարածքին և թույլ չեն տա, որ նավերն անցնեն Կարմիր ծովի և Բաբ-Էլ-Մանդեբի նեղուցի ջրերով:

22:21 - 13 հունվարի, 2024

ՄԱԿ-ը զսպվածության կոչ է անում ինչպես Եմենի հութիներին, այնպես էլ կոալիցիոն ուժերին |panorama.am|

panorama.am: ՄԱԿ-ի գլխավոր քարտուղարը կոչ է արել բոլոր կողմերին «չլարել իրավիճակը» Կարմիր ծովում այն բանից հետո, երբ ԱՄՆ-ն և Մեծ Բրիտանիան հարվածներ են հասցրել Եմենի հութիների թիրախներին: Եվրոնյուզի հաղորդմամբ ՄԱԿ-ի խոսնակ Ստեֆան Դյուժարիկը շեշտել է, որ դա առաջին հերթին վերաբերում է հութիներին, որոնք պետք է դադարեցնեն իրենց հարձակումները։ Միևնույն ժամանակ մերձավորարևելյան որոշ վերլուծաբաններ կարծում են, որ Արևմուտքի ուժային միջամտությունը չի կանգնեցնի հութիներին, այլ նրանց համոզիչ հիմք կտա շարունակելու իրենց ուժեղ հակաարևմտյան գաղափարախոսությանը: Մերձավոր Արևելքի հարցերով Chatam House-ի աշխատակցի խոսքով հութիները ոչ միայն «մահ Ամերիկային» դրոշներ են բարձրացնում հանուն կարգախոսների, այլևնրանք անկեղծորեն հավատում են դրան։ Հիշեցնենք, որ ԱՄՆ-ի և Մեծ Բրիտանիայի զինված ուժերը հունվարի լույս 12-ի գիշերը հարվածներ են հասցրել Եմենի «Անսար Ալլահ» (հութիներ) ապստամբական շարժման օբյեկտներին: Պաղեստինա-իսրայելական հակամարտության սրումից ի վեր հութիները հայտարարել էին, որ հարվածներ կհասցնեն Իսրայելի տարածքին և թույլ չեն տա, որ նավերն անցնեն Կարմիր ծովի և Բաբ-Էլ-Մանդեբի նեղուցի ջրերով: Հարվածներից հետո Հութիները խոստացել են պատասխանել Եմենում ԱՄՆ-ի և Մեծ Բրիտանիայի գործողություններին։ Իրանը խստորեն դատապարտել է ԱՄՆ-ի և Միացյալ Թագավորության կողմից Եմենի դեմ հարձակումները։

15:23 - 13 հունվարի, 2024

Ամբողջ Մերձավոր Արևելքը կարող է բախվել աղետի. ՄԱԿ-ում ՌԴ մշտական ներկայացուցիչ |armeniasputnik.am|

armeniasputnik.am ՄԱԿ-ում ՌԴ մշտական ներկայացուցիչ Վասիլի Նեբենզյան Արևմուտքին հորդորել է զերծ մնալ Մերձավոր Արևելքում էսկալացիայից, այլապես ամբողջ տարածաշրջանը կարող է աղետի բախվել։ Տեղեկությունը հայտնում է ՌԻԱ Նովոստին: Հունվարի 12-ին Ռուսաստանը խնդրել էր ՄԱԿ-ի Անվտանգության խորհրդի հրատապ նիստ անցկացնել՝ կապված Եմենի ուղղությամբ ԱՄՆ-ի և նրա գործընկերների հարվածների հետ: «Մերձավոր Արևելքում կրիտիկական իրավիճակ է ստեղծվել։ Հարցը նույնիսկ այն չէ, որ Արևմուտքի ներկայացուցիչներն իրենց գործողություններով ոչնչացնում են ՄԱԿ-ի և տարածաշրջանային միջնորդության` Եմենի ներսում կարգավորման հասնելու բազմամյա ջանքերի արդյունքները»,-ասել է Նեբենզյան ՄԱԿ-ի ԱԽ նիստում։ Նրա խոսքով՝ խնդիրը շատ ավելի լայն է, քանի որ անխոհեմ և անհեռատես քայլերն ապակայունացնում են անվտանգային իրավիճակը և խաթարում են համատարածաշրջանային իրադրության ուրվագծվող կարգավորումը։ «Եթե էսկալացիան շարունակվի, ապա Մերձավոր Արևելքի ամբողջ տարածաշրջանը կարող է բախվել աղետի, որի համեմատ մինչ այդ տեղի ունեցածը «ծաղիկներ» կթվան: Մարդկանց կորցրած կյանքերն ու կործանված ճակատագրերն անհաշիվ կլինեն»,- ասել է դիվանագետը։ Նեբենզյան հայտարարել է, որ դրա ամբողջ պատասխանատվությունը կընկնի ԱՄՆ-ի և նրան աջակցողների վրա, որոնք հանուն իրենց շահադիտական աշխարհաքաղաքական շահերի ոչ միայն համառորեն խանգարում են միջազգային հանրությանը Գազայի հատվածում հրադադար պահանջելու հարցում, այլև իրենք հերթական անգամ ագրեսոր են դարձել: Հիշեցնենք, որ ԱՄՆ-ի և Մեծ Բրիտանիայի զինված ուժերը հունվարի լույս 12-ի գիշերը հարվածներ են հասցրել Եմենի «Անսար Ալլահ» (հութիներ) ապստամբական շարժման օբյեկտներին: Պաղեստինա-իսրայելական հակամարտության սրումից ի վեր հութիները հայտարարել էին, որ հարվածներ կհասցնեն Իսրայելի տարածքին և թույլ չեն տա, որ նավերն անցնեն Կարմիր ծովի և Բաբ-Էլ-Մանդեբի նեղուցի ջրերով: Հարվածներից հետո Հութիները խոստացել են պատասխանել Եմենում ԱՄՆ-ի և Մեծ Բրիտանիայի գործողություններին։ Իրանը խստորեն դատապարտել է ԱՄՆ-ի և Միացյալ Թագավորության կողմից Եմենի դեմ հարձակումները։

13:00 - 13 հունվարի, 2024

Ռոսավիացիան ավիաընկերություններին արգելել է թռիչքներ իրականացնել Եմենի վրայով |armeniasputnik.am|

armeniasputnik.am: Ռոսավիացիան ավիաընկերություններին արգելել է թռիչքներ իրականացնել Եմենի վրայով։ «Եմենում տեղի ունեցած իրադարձությունների և թռիչքների անվտանգության ռիսկերով պայմանավորված` Ռոսավիացիան արգելել է այդ պետության օդային տարածքն օգտագործել Ռուսաստանի Դաշնության քաղաքացիական օդանավերի թռիչքների համար (ներառյալ տարանցիկ)», - նշվում է գերատեսչության հաղորդագրության մեջ: Ավելի վաղ «Աերոֆլոտ» խմբի ավիաընկերությունները հայտարարել էին, որ չեն օգտագործում Եմենի օդային տարածքը։ Հիշեցնենք` այս գիշեր ԱՄՆ–ն և Մեծ Բրիտանիան ռազմական գործողություն են սկսել Եմենում հուսիթների դեմ։ Ավելի ուշ Եմենի փոխարտգործնախարար Հուսեյն ալ–Ազին հայտարարել է, որ Լոնդոնն ու Վաշինգտոնը պետք է պարտաստ լինեն բարձր գին վճարել Եմենին հասցված զանգվածային հարվածների համար։

16:46 - 12 հունվարի, 2024

Միջազգային իրավունքի անտեսում է. Զախարովան՝ Եմենի ուղղությամբ ԱՄՆ-ի հարվածների մասին |armeniasputnik.am|

armeniasputnik.am: Եմենի ուղղությամբ ԱՄՆ - ի հարվածները միջազգային իրավունքի լիակատար անտեսում են և նպաստում են տարածաշրջանում իրավիճակի սրմանը, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան: Ավելի վաղ հայտնի էր դարձել, որ այս գիշեր ԱՄՆ-ն իր գործընկերների հետ միասին ավիահարվածներ է հասցրել Եմենի տարբեր հատվածներում, այդ թվում ՝ մայրաքաղաք Սանայում գտնվող օբյեկտներին: Պենտագոնի ղեկավար Լլոյդ Օսթինը հայտարարել էր, որ Եմենում ԱՄՆ-ի և գործընկերների հարվածների թիրախը եղել են անօդաչու թռչող սարքերը, հրթիռները, ինչպես նաև հուսիների հետախուզության տեխնիկական հնարավորությունները: «Եմենի ուղղությամբ ԱՄՆ-ի ավիահարվածները անգլոսաքսերի կողմից ՄԱԿ-ի Անվտանգության խորհրդի բանաձևերի այլասերման և միջազգային իրավունքի լիակատար անտեսման հերթական օրինակն են՝ հանուն տարածաշրջանում իրադրության սրման, սեփական կործանարար նպատակների համար»,-նշել է ռուս դիվանագետը իր Telegram-ալիքում: Ավելի վաղ Եմենի հյուսիսում իշխող «Անսար Ալլա» շարժումը, որը վերահսկում է Եմենում Կարմիր ծովի ափերի մեծ մասը, նախազգուշացրել էր Իսրայելի հետ կապ ունեցող կամ նրա նավահանգիստներ ուղևորվող նավերի վրա հարձակվելու մտադրության մասին և մյուս երկրներին կոչ էր արել այդ նավերից հետ կանչել իրենց անձնակազմերը և ծովում չմոտենալ դրանց: ԱՄՆ-ը հայտարարել էր, որ ի պատասխան հուսիների հաճախակի դարձած հարձակումների, տասը այլ երկրների հետ միասին Կարմիր ծովում նավագնացության պաշտպանության գործողություն կսկսեն։ Դրան ի պատասխան «Անսար Ալլան» զգուշացրել էր, որ իրենց իրավունք են վերապահում հարձակվել ԱՄՆ-ի հետ համատեղ կոալիցիայի անդամ երկրների նավերի վրա:

12:31 - 12 հունվարի, 2024

Հութիները խոստացել են պատասխանել Եմենում ԱՄՆ-ի և Մեծ Բրիտանիայի գործողություններին |shantnews.am|

shantnews.am: Կարմիր և Արաբական ծովերը փակ կմնան Իսրայելի հետ կապված նավերի համար այնքան ժամանակ, մինչև Իսրայելը չդադարեցնի ռազմական գործողությունները Գազայի հատվածում և չվերացնի իր շրջափակումը, ասել է Հյուսիսային և կենտրոնական Եմենում իշխող շիա Անսար Ալլահ շարժման քաղբյուրոյի անդամ Խուզամ ալ-Ասադը:։ «Այս թշնամական և չմտածված գործողությունների միջոցով Վաշինգտոնը և Լոնդոնը փորձում են շեղել ուշադրությունը ցեղասպանության շարունակվող հանցագործություններից: Մենք կշարունակենք պաշտպանել մեր սկզբունքային դիրքորոշումը մեզ համար առանցքային հարցի՝ Պաղեստինի վերաբերյալ, և ո՛չ Ամերիկան, ո՛չ Մեծ Բրիտանիան չեն կարողանա մեզ հետ պահել Գազայի հատվածում մեր ժողովրդին աջակցելուց՝ լինի դա Կարմիր, Արաբական ծովում, թե Սիոնիստական տարածքում: Կարմիր և Արաբական ծովերը փակ կմնան իսրայելական թշնամու կամ նրա հետ առնչվող նավերի համար, քանի դեռ չի դադարել Ամերիկայի կողմից աջակցվող Իսրայելի ագրեսիան Գազայի հատվածում մեր ժողովրդի դեմ»,- գրել է ալ-Ասադը X սոցիալական ցանցի միկրոբլոգում։ Նրա խոսքով՝ Միացյալ Նահանգները սահմանել է X ժամը, սակայն «մեր ղեկավարությունը կորոշի ռազմական գործողությունների թատրոնը, ներգրավման կանոնները և ռազմական գործողությունների ուղղությունները»։ «Մեր զինված ուժերը լավ պատրաստված են, և ագրեսորները կզղջան Եմենի ժողովրդի դեմ իրենց ագրեսիայի համար»,- հավելել է շարժման առաջնորդներից մեկը։ Ուրբաթ գիշեր ԱՄՆ-ը և Մեծ Բրիտանիան ավիահարվածներ են հասցրել Եմենի տարբեր շրջանների չորս նահանգներում, այդ թվում՝ մայրաքաղաք Սանայում, Հոդեյդաում, Թաիզում և Սաադայում։ Պենտագոնը հաստատել է, որ ԱՄՆ-ը գործընկերների հետ համակարգելով հարվածներ է հասցրել Եմենում հութիների թիրախներին։ Հութիները հայտարարել են, որ պատասխան հարվածներ են հասցնում ամերիկյան և բրիտանական ռազմակայաններին և կայանքներին, ինչպես նաև պնդում են, որ հրթիռային հարձակման արդյունքում իրենց հաջողվել է խորտակել ամերիկյան ռազմանավը Կարմիր ծովում:

10:35 - 12 հունվարի, 2024

Իրանը խստորեն դատապարտել է ԱՄՆ-ի և Միացյալ Թագավորության կողմից Եմենի դեմ հարձակումները |tert.am|

tert.am: Իրանի արտաքին գործերի նախարարության խոսնակ Նասեր Քանաանին հայտարարություն է տարածել, որում ասվում է, որ երկիրը խստորեն դատապարտում է Եմենի հութիների վրա ԱՄՆ-ի և Մեծ Բրիտանիայի հարձակումը, հայտնում է Nournews-ը։ «Մենք խստորեն դատապարտում ենք այսօր առավոտյան Միացյալ Նահանգների և Միացյալ Թագավորության կողմից Եմենի մի քանի քաղաքների վրա իրականացված ռազմական հարձակումները: Մենք դա համարում ենք Եմենի ինքնիշխանության և տարածքային ամբողջականության և միջազգային օրենքների, կանոնակարգերի և իրավունքների բացահայտ խախտում», - ասվում է հայտարարությունում։ Հիշեցնենք, որ ԱՄՆ-ի և Մեծ Բրիտանիայի զինված ուժերը հունվարի լույս 12-ի գիշերը հարվածներ են հասցրել Եմենի «Անսար Ալլահ» (հութիներ) ապստամբական շարժման օբյեկտներին: Հութիները խոստացել են անպատասխան չթողնել։

10:12 - 12 հունվարի, 2024

ՌԴ-ն ՄԱԿ-ի ԱԽ շտապ նիստ է խնդրել՝ Եմենի վրա ԱՄՆ-ի և Մեծ Բրիտանիայի հարձակման առնչությամբ |aysor.am|

aysor.am: Ռուսաստանը ՄԱԿ-ի Անվտանգության խորհրդի շտապ նիստ է խնդրել՝ կապված Եմենի ուղղությամբ ԱՄՆ-ի և Մեծ Բրիտանիայի հարձակման հետ: Այդ մասին ասվում է ՄԱԿ-ում ՌԴ մշտական ներկայացուցչության հաղորդագրության մեջ։ Հիշեցնենք, որ հունվարի 11-ին ՄԱԿ-ի ԱԽ-ն ընդունել է Կարմիր ծովում նավագնացության անվտանգության վերաբերյալ ԱՄՆ-ի առաջարկած բանաձևը: Փաստաթղթում նշված է այդ տարածքում նավերի վրա հարձակումներն անհապաղ դադարեցնելու պահանջը։ Նույն օրը ԱՄՆ-ն, ռազմական օպերացիայի շրջանակում, հարվածներ են հասցրել Եմենի մի քանի քաղաքներին։

09:50 - 12 հունվարի, 2024

ԱՄՆ-ն և Մեծ Բրիտանիան հարվածել են Եմենին․ հութիները խոստացել են պատասխանել. ինչ է հայտնի գիշերը տեղի ունեցած իրադարձություններից |tert.am|

tert.am: ԱՄՆ-ի և Մեծ Բրիտանիայի զինված ուժերը հունվարի լույս 12-ի գիշերը հարվածներ են հասցրել Եմենի «Անսար Ալլահ» (հութիներ) ապստամբական շարժման օբյեկտներին: Այս մասին հայտնում է ՏԱՍՍ գործակալությունը։ Արևմտյան պետությունների ներկայացուցիչների հայտարարությունների համաձայն՝ խոցվել են հութիների հրթիռների, անօդաչու թռչող սարքերի տեղակայման վայրերը և ռադիոտեղորոշիչ կայանները։ Տուժածների մասին տեղեկություններ չկան։ Պաղեստինա-իսրայելական հակամարտության սրումից ի վեր՝ հութիները հայտարարել են, որ հարվածներ կհասցնեն Իսրայելի տարածքին և թույլ չեն տա, որ նավերն անցնեն Կարմիր ծովի և Բաբ-Էլ-Մանդեբի նեղուցի ջրերով: Հունվարի 11-ի երեկոյան The Times-ի լրագրող Սթիվեն Սուինֆորդը հայտարարել է, որ Մեծ Բրիտանիայի վարչապետ Ռիշի Սունակը նախարարների կաբինետի հետ կքննարկի արևմտյան կոալիցիայի հնարավոր պատասխանը «Անսար Ալլահ»-ի գործողություններին։ Ավելի ուշ լրագրողը հայտնել է, որ ԱՄՆ-ն ու ՄԲ-ն հարվածներ կհասցնեն Եմենին։ Հութիները հավաստիացրել են, որ պատասխան գործողություններ կձեռնարկեն, եթե ԱՄՆ-ն ու Մեծ Բրիտանիան ավիահարվածներ հասցնեն Եմենին: Ալ Հադաթ հեռուստաալիքը հայտնել է, որ ԱՄՆ-ի և Մեծ Բրիտանիայի զինված ուժերը Կարմիր ծովի կողմից հարվածներ են հասցրել հութիների դիրքերին՝ երկրի արևմուտքում գտնվող Հոդեյդա նավահանգստային քաղաքի մոտակայքում: Reuters-ը, վկայակոչելով ամերիկացի պաշտոնյաներին, նույնպես հայտնել է հարվածների մասին: Reuters-ի տեղեկատվության համաձայն՝ հութիների դիրքերին հարվածները հասցվել են ինքնաթիռներից, նավերից և սուզանավերից։ ԱՄՆ նախագահ Ջո Բայդենը հայտարարել է, որ Եմենում հարվածը հասցվել է՝ ի պատասխան Կարմիր ծովում հուսիների հարձակումների․ նա հայտարարել է, որ ՄԹ-ի հետ համատեղ ԱՄՆ-ն ռազմական օպերացիայի շրջանակներում ավիա և հրթիռային հարվածներ է հասցրել Եմենի մի քանի քաղաքների` թիրախում ունենալով ապստամբ հութիների մի շարք ռազմական օբյեկտները։ Մեծ Բրիտանիայի վարչապետը հութիներին կոչ է արել դադարեցնել քաղաքացիական նավերի գնդակոծումը և լարվածության նվազեցման քայլեր ձեռնարկել: Հութիների ղեկավարության ներկայացուցիչ Աբդուլլահ բեն Ամերը Al Jazeera հեռուստաալիքին իր հերթին հայտնել է, որ շարժումը կհարվածի տարածաշրջանում ԱՄՆ-ի և Մեծ Բրիտանիայի բազաներին, եթե այդ երկու երկրներն ընդլայնեն ռազմական գործողությունների մասշտաբները: Ինչպես հայտարարել է Եմենի փոխարտգործնախարար Հուսեյն Ալ Ազին, Լոնդոնն ու Վաշինգտոնը պետք է պատրաստ լինի բարձր գին վճարել Եմենին զանգվածային հարվածների համար: Շարժման մամուլի ծառայության ղեկավարի տեղակալ Նասրեդին Ամերը նշել է, որ երկրի զինված ուժերը պատասխան կտան: Շարունակությունը՝ սկզբնաղբյուր կայքում

09:37 - 12 հունվարի, 2024

ԱՄՆ-ի, Մեծ Բրիտանիայի և Կանադայի կառավարությունները պետք է պատասխանատվության ենթարկվեն․ Իրանի ԱԳՆ |news.am|

news.am: Իրանի արտգործնախարարության խոսնակ Նասեր Քանանին հայտարարել է, որ ԱՄՆ-ի, Մեծ Բրիտանիայի և Կանադայի կառավարությունները պետք է պատասխանատվության ենթարկվեն Գազայի դեմ Իսրայելի պատերազմին մեղսակցության համար, գրում է Mehr-ը։ Նասեր Քանանին կիրակի օրը հանդես է եկել ի պատասխան արևմտյան երեք կառավարությունների՝ ամբողջ աշխարհում Իրանի մի շարք քաղաքացիների նկատմամբ պատժամիջոցներ կիրառելու չարդարացված քայլի: «Այն երկրները, որոնք ունեն գաղութատիրության և մարդու իրավունքների սիստեմատիկ ոտնահարման պատմություն… նման կանխակալ և կեղծ միջոցներով փորձում են շեղել համաշխարհային հանրային կարծիքը մարդու իրավունքների դեմ իրենց գործողություններից և երեխաների սպանող սիոնիստական ռեժիմի անմարդկային հանցագործությունների հետ իրենց լիարժեք համագործակցությունից», - ասել է Իրանի ԱԳՆ ներկայացուցիչը։ Նա մատնանշել է երեք երկրների «սկանդալային մասնակցությունը իսրայելական ռազմական հանցագործություններին հոկտեմբերի սկզբից շրջափակված Գազայի հատվածում», նշելով, որ նրանք «ընդհանրապես ի վիճակի չեն դատելու և մեկնաբանելու այլ երկրներում մարդու իրավունքների իրավիճակը»:

20:18 - 10 դեկտեմբերի, 2023

Լոնդոնը ոգևորված է հարաբերությունների կարգավորմանն ուղղված Հայաստանի և Ադրբեջանի ղեկավարների քայլերով |1lurer.am|

1lurer.am: Հայ-ադրբեջանական հարաբերությունների կարգավորմանն ուղղված երկու հանրապետությունների ղեկավարների ջանքերը ողջունել է նաև Մեծ Բրիտանիան: Այդ երկրի Եվրոպայի հարցերով նախարար Լեո Դոքերթին X-ի իր միկրոբլոգում գրել է. «Ինձ շատ ոգևորում է Հայաստանի և Ադրբեջանի հայտարարությունը, որը վերահաստատում է հարաբերությունները կարգավորելու նրանց մտադրությունը։ Ինչպես ես ընդգծել եմ երկու երկիր կատարած իմ վերջին այցի ժամանակ, Մեծ Բրիտանիան լիովին աջակցում է պատմական և տևական խաղաղության հասնելու նրանց ջանքերին»։

20:43 - 08 դեկտեմբերի, 2023

ԱԽ քարտուղարը Մեծ Բրիտանիայի վարչապետի խորհրդականին ներկայացրել է խաղաղության հաստատմանն ուղղված Հայաստանի ջանքերը

Լոնդոն կատարած աշխատանքային այցի ընթացքում ՀՀ ԱԽ քարտուղար Արմեն Գրիգորյանը հանդիպել է Մեծ Բրիտանիայի և Հյուսիսային Իռլանդիայի Միացյալ Թագավորության վարչապետի ազգային անվտանգության հարցերով խորհրդական Սըր Թիմ Բարոունին: Այս մասին հայտնում են ԱԽՔ գրասենյակից: Զրուցակիցները կարևորել են ժողովրդավարական արժեքների վրա հիմնված հայ-բրիտանական հարաբերությունների զարգացման կայուն դինամիկան, ՀՀ-ՄԹ ռազմավարական երկխոսության պաշտոնական մեկնարկը՝ ընդգծելով, որ վերոնշյալը երկու երկրների պատրաստակամության ապացույցն է առավելագույնս իրացնելու առկա ներուժը: Մտքեր են փոխանակվել մեր տարածաշրջանում և ՀՀ-ի շուրջ ստեղծված անվտանգային իրավիճակի վերաբերյալ: ԱԽ քարտուղարը ներկայացրել է Հայաստան-Ադրբեջան հարաբերությունների կարգավորմանն ու խաղաղության հաստատմանն ուղղված Հայաստանի ջանքերը։

09:47 - 08 դեկտեմբերի, 2023