ՌԴ

Ռուսաստանը (պաշտոնական անվանումը՝ Ռուսաստանի Դաշնություն) միջմայրցամաքային պետություն Եվրասիայի հյուսիսարևմտյան հատվածում։ Տարածքի հիմնական մասը գտնվում է Հյուսիսային Ասիայում, իսկ որոշակի հատված՝ նաև Արևելյան Եվրոպայում: ՌԴ-ն աշխարհի խոշորագույն պետությունն է և զբաղեցնում է երկրագնդի ցամաքային տարածքի 1/8-ը։ Բնակչության թվով 9-րդն է աշխարհում․ ըստ 2018-ի մարդահամարի տվյալների՝ ավելի քան 144 մլն մարդ։ Երկրի ազգաբնակչության 77%-ը կենտրոնացված է արևմուտքում՝ եվրոպական հատվածում։

Մայրաքաղաքն է Մոսկվան։ Վերջինս համարվում է Եվրոպայի խոշորագույն քաղաքը, ինչպես նաև խոշորագույններից մեկն ամբողջ աշխարհում։ ՌԴ նշանավոր քաղաքներից են նաև Սանկտ Պետերբուրգը, Նովոսիբիրսկը, Եկատերինբուրգը և Նիժնի Նովգորոդը։ Պետական լեզուն ռուսերենն է։ Խոշոր ազգային փոքրամասնություններն են թաթարները, ուկրաինացիները, բաշկիրները, հայերը, չուվաշները, չեչենները և այլն։

Ռուսաստանը նախագահական կառավարմամբ դաշնային հանրապետություն է, որտեղ նախագահը՝ պետության, իսկ վարչապետը՝ կառավարության ղեկավարն է։ ՌԴ գործող նախագահն է Վլադիմիր Պուտինը, վարչապետը՝ Միխայիլ Միշուստինը։

Զախարովան հույս է հայտնել, որ շուտով կսկսվի Լեռնային Ղարաբաղում ռուս խաղաղապահներին սպանած ադրբեջանցի զինծառայողների դատավարությունը |1lurer.am|

1lurer.am: ՌԴ ԱԳՆ պաշտոնական ներկայացուցիչ Մարիա Զախարովան, պատասխանելով այն հարցին, թե մեկ տարի առաջ Լեռնային Ղարաբաղում ռուս խաղաղապահներին սպանած ադրբեջանցի զինծառայողներն ինչու պատասխանատվության չեն ենթարկվել, նշել է. «Երկու երկրների գլխավոր դատախազությունները, քննչական մարմինները սերտորեն շփվում են այդ հարցով, և խաղաղապահների զոհվելու հանգամանքների քննությունն իրականացվում է քրեական գործերի շրջանակներում»: Նա նշել է, որ քրեական գործեր են հարուցվել ինչպես Ադրբեջանում, այնպես էլ Ռուսաստանում: Զախարովան հույս է հայտնել, որ շոարցաւտով կսկսվի դատավարությունը:

14:11 - 20 սեպտեմբերի, 2024

ԿԳՄՍ նախարարը հանդիպել է ՀՀ-ում ՌԴ դեսպանին

ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր ընդունել է ՀՀ-ում Ռուսաստանի Դաշնության արտակարգ և լիազոր դեսպան Սերգեյ Կոպիրկինի գլխավորած պատվիրակությանը: Այս մասին հայտնում են ՀՀ ԿԳՄՍՆ-ից։ Հանդիպմանը ներկա է եղել նաև ԿԳՄՍ նախարարի տեղակալ Արթուր Մարտիրոսյանը: Հանդիպման ընթացքում քննարկվել են Հայաստան-Ռուսաստան երկկողմ հարաբերությունները կրթության, գիտության, մշակույթի և սպորտի ոլորտներում: Մասնավորապես, անդրադարձ է եղել կրթական ծրագրերին, ինչպես նաև միջմշակութային համատեղ նախաձեռնություններին: Միջպետական համաձայնագրերով նախատեսված ոլորտային երկկողմ ծրագրերի իրականացման համատեքստում կարևորվել է դրանց շարունակականության հարցը: Հանդիպման ընթացքում անդրադարձ է եղել նաև առաջիկայում նախատեսվող միջոցառումներին: Քննարկվել են նաև երկկողմ հետաքրքրություն ներկայացնող այլ հարցեր:

18:07 - 19 սեպտեմբերի, 2024

Մոսկվայում Wildberries-ի գրասենյակի մոտ կրակոցների հետևանքով կա զոհ |azatutyun.am|

azatutyun.am: Մոսկվայում՝ Կրեմլի մերձակայքում գտնվող Wildberries ռուսական խոշորագույն առցանց խանութի գրասենյակի մոտ, հրաձգություն է տեղի ունեցել, մեկ մարդ զոհվել է, մի քանիսը՝ վիրավորվել։ Խանութի հիմնադիր, Ռուսաստանի ամենահարուստ կանանցից Տատյանա Բակալչուկն իր ամուսնուն է մեղադրել, նշելով, որ վերջինս փորձում է տիրանալ ընկերությանը։ Նրա խոսքով՝ Վլադիսլավ Բակալչուկը մի խումբ զինված մարդկանց հետ փորձել է մտնել գրասենյակ։ Նա իր հերթին նշում է, որ ժամանել է բանակցությունների համար, սակայն իր թիմի հետ ենթարկվել է հարձակման անհայտ անձանց կողմից։ Ընդհանուր առմամբ, կոնֆլիկտի արդյունքում ոստիկանություն է տարվել մոտ 30 մարդ, գրում է РИА Новости-ն՝ վկայակոչելով իրավապահ մարմիններին։

20:29 - 18 սեպտեմբերի, 2024

ՌԴ դեսպանն այցելել է հայ-իրանական սահման |tert.am|

tert.am: ՀՀ-ում ՌԴ դեսպան Սերգեյ Կոպիրկինը սեպտեմբերի 17-ին այցելել է հայ-իրանական սահման, որտեղ տեղակայված է ՌԴ ԱԴԾ 127-րդ սահմանապահ ջոկատը:Դիվանագիտական առաքելության ղեկավարին և նրան ուղեկցողներին դիմավորել է ջոկատի ղեկավար, գնդապետ Ա. Շչերբակովը, ներկայացրել է զորամասի պատմությունը, որը հաջորդ տարի նշելու է 70-ամյակը։Նա նաև ներկայացրել է պատասխանատվության գոտում տիրող իրավիճակը և նշել ջոկատի այս տարվա օպերատիվ և ծառայողական գործունեության կարևորագույն արդյունքները։ Դրանց թվում են սինթետիկ և բուսական ծագման թմրամիջոցների խոշոր խմբաքանակի առգրավումը, Ագարակի անցակետում պետական սահմանախախտների բազմաթիվ ձերբակալություններ։

17:45 - 18 սեպտեմբերի, 2024

ՌԴ-ում Իրանի դեսպանը Իգոր Խովաևի հետ քննարկել է Հարավային Կովկասի զարգացումներին առնչվող հարցեր |1lurer.am|

1lurer.am: ՌԴ-ում Իրանի դեսպան Քազեմ Ջալալին հանդիպել է Հարավային Կովկասում հարաբերությունների կարգավորման հարցով ՌԴ ԱԳՆ հատուկ ներկայացուցիչ Իգոր Խովաևի հետ, հաղորդում է Tasnim լրատվական գործակալությունը: Հանդիպումը տեղի է ունեցել երկու երկրների միջև խորհրդակցությունների շրջանակներում։ Կողմերը քննարկել են Հարավային Կովկասի զարգացումներին առնչվող հարցեր, ընդգծել այդ տարածաշրջանում համագործակցության կարևորությունը:

13:55 - 18 սեպտեմբերի, 2024

Եթե ՀՀ տարածքով Ադրբեջանից տարանցիկ գազամուղ անցնի, Ադրբեջանից գազ ներկրելու տարբերակը չի կարելի բացառել. Փաշինյան |news.am|

news.am: Ռուսաստանից ու Իրանից ներկրում ենք գազ, որոշ ժամանակ առաջ Ադրբեջանից հայտարարություններ էին հնչում, որ ապագայում խաղաղության հաստատման դեպքում կարող է Հայաստանը գազ ներկրել նաեւ Ադրբեջանից: Այս մասին, այսօր՝ սեպտեմբերի 18-ին, Համաշխարհային հայկական գագաթաժողովի ժամանակ հայտարարեց ՀՀ վարչապետ Նիկոլ Փաշինյանը: «Եթե պատկերացնենք, որ Հայաստանի տարածքով տարանցիկ գազամուղ է անցնում դեպի Նախիջեւան կամ դեպի Թուրքիա, այդ տարբերակները նույնպես չի կարելի բացառել»,-ասաց նա: Փաշինյանը նկատեց, որ աշխարհում էներգետիկ անկախություն չկա. «Չկա մի երկիր, որ էներգետիկ անկախ է: Խոսք կարող է լինել միայն էներգետիկ դիվերսիֆիկացման մասին»,-ասաց վարչապետը:

13:38 - 18 սեպտեմբերի, 2024

Կրեմլը բացարձակապես համաձայն չէ Նիկոլ Փաշինյանի հետ ՀԱՊԿ-ի վերաբերյալ նրա գնահատականի հարցում․ Կրեմլ

Կրեմլը բացարձակապես համաձայն չէ Հայաստանի վարչապետ Նիկոլ Փաշինյանի հետ ՀԱՊԿ-ի վերաբերյալ նրա գնահատականի հարցում։ Կազմակերպությունը որևէ վտանգ չի ներկայացնում Հայաստանի ինքնիշխանության համար։ Այս մասին ասել է ՌԴ նախագահի մամուլի քարտուղար Դմիտրի Պեսկովը։ «Պետք է կտրականապես չհամաձայնենք Փաշինյանի հետ։ Հայաստանի ինքնիշխանությանը ՀԱՊԿ-ից որևէ վտանգ չի սպառնում և չի կարող սպառնալ։ Ընդհակառակը, այս կազմակերպությունը պաշտպանում է անդամ պետությունների ինքնիշխանությունը։ Բայց մենք համբերատարորեն կշարունակենք Հայաստանի ղեկավարությանը տեղեկացնել այս դիրքորոշման մասին»,- լրագրողներին ասաց նա։ Հիշեցնենք, որ այսօր ՀՀ վարչապետ Նիկոլ Փաշինյանը հայտարարել էր, որ ՀՀ-ն ՀԱՊԿ-ում իր անդամակցությունը սառեցրել է ոչ միայն այն պատճառով, որ ՀԱՊԿ-ը չի ապահովում Հայաստանի նկատմամբ իր ունեցած անվտանգային պարտավորությունները, այլև այն պատճառով, որ ՀԱՊԿ-ը ստեղծում է սպառնալիքներ ՀՀ անվտանգության համար, Հայաստանի հետագա գոյության, ինքնիշխանության և պետականության համար։

13:33 - 18 սեպտեմբերի, 2024

Մոսկվան աջակցում է Ադրբեջանի հետ միջանցքների և հաղորդակցության ուղիների հարցում Իրանի քաղաքականությանը․ Շոյգուն՝ Թեհրանում |azatutyun.am|

azatutyun.am: Ռուսաստանի անվտանգության խորհրդի քարտուղար Սարգեյ Շոյգուն երեքշաբթի այցելել է Թեհրան, հանդիպել Իրանի ազգային անվտանգության բարձրագույն խորհրդի քարտուղար Ալի-Աքբար Ահմադիանի հետ։ Ըստ իրանական Mehr գործակալության՝ Շոյգուն Թեհրան է այցելել Ռուսաստանի նախագահ Վլադիմիր Պուտինի ուղերձը փոխանցելու նպատակով։ Շոյգուն վերահաստատել է Մոսկվայի աջակցությունն Ադրբեջանի հետ միջանցքների և հաղորդակցության ուղիների հարցում Իրանի քաղաքականությանը։ Ռուսաստանի անվտանգության խորհրդի քարտուղարը հանդիպել է նաև Իրանի նախագահի հետ։ Մասուդ Փեզեշքիանն ընդգծել է երկու երկրների միջև կառուցողական հարաբերությունները՝ շեշտելով՝ իր վարչակազմը լրջորեն հետամուտ է լինելու Իրանի և Ռուսաստանի միջև հարաբերությունների բարելավմանը։ Իրանի և Ռուսաստանի միջև հարաբերությունների խորացումն ու ամրապնդումը կնվազեցնեն երկու երկրների դեմ պատժամիջոցների ազդեցությունը, ասել է Իրանի նախագահը՝ հավելելով՝ Թեհրանի և Մոսկվայի հարաբերությունները կզարգանան մշտական, շարունակական և տևական ճանապարհով։ Շոյգուն Թեհրանում փոխանցել է Պուտինի ուղերձը՝ շեշտելով, որ Ռուսաստանի դիրքորոշումը տարածաշրջանային հարցերում Իրանի հետ համագործակցելու հարցում չի փոխվել։ Ռուսաստանի անվտանգության խորհրդի քարտուղարը հավելել է, որ Վլադիմիր Պուտինն անհամբեր սպասում է իրանցի գործընկերոջ հետ հանդիպմանը՝ Կազանում կայանալիք BRICS-ի գագաթնաժողովի շրջանակներում։ Իրանի նախագահն էլ հույս է հայտնել, որ երկու երկրները կքննարկեն երկկողմ, տարածաշրջանային և միջազգային հարցեր BRICS-ի, Շանհայի համագործակցության կազմակերպության (ՇՀԿ) և Եվրասիական տնտեսական միության (ԵԱՏՄ) շրջանակներում։

09:29 - 18 սեպտեմբերի, 2024

ՌԴ և Ադրբեջանի փոխվարչապետները քննարկել են փոխադարձ հետաքրքրություն ներկայացնող մի շարք հարցեր |1lurer.am|

1lurer.am: Մոսկվայում տեղի է ունեցել Ադրբեջանի և Ռուսաստանի տնտեսական համագործակցության գծով միջկառավարական հանձնաժողովի համանախագահների՝ փոխվարչապետներ Շահին Մուստաֆաևի և Ալեքսեյ Օվերչուկի հանդիպումը։ Ի զարգացումն ՌԴ և Ադրբեջանի նախագահներ Վլադիմիր Պուտինի և Իլհամ Ալիևի՝ 2024 թ․ օգոստոսի 19-ին Բաքվում կայացած բանակցությունների ընթացքում ձեռք բերված պայմանավորվածությունների՝ հանձնաժողովի համանախագահները քննարկել են առևտրատնտեսական և գիտատեխնիկական երկկողմ համագործակցության մի շարք հարցեր։ Հատուկ ուշադրություն է դարձվել տրանսպորտի, կրթության, շրջակա միջավայրի պահպանության ոլորտներում փոխգործակցությանը։ Քննարկվել են նաև ՌԴ և Ադրբեջանի միջև փոխադարձ հետաքրքրություն ներկայացնող այլ հարցեր։ Օվերչուկն ու Մուստաֆաևը վերահաստատել են պատրաստակամությունը՝ շարունակելու երկխոսությունը՝ բոլոր ուղղություններով ռուս-ադրբեջանական հարաբերությունների ամրապնդման համար:

22:16 - 17 սեպտեմբերի, 2024

ՌԴ իշխանությունները Կուրսկի ևս 2 բնակավայրից պարտադիր տարհանում են հայտարարելվ |armenpress.am|

armenpress.am: ՌԴ Կուրսկի մարզի ղեկավար Ալեքսեյ Սմիռնովը հայտարարել է Ռիլսկիի և Խոմուտովի շրջանների բնակիչների պարտադիր տարհանման մասին։ Այս մասին նահանգապետը գրել է իր Telegram ալիքում։ «Օպերատիվ տեղեկատվության հիման վրա՝ տարածաշրջանային օպերատիվ շտաբն անվտանգությունն ապահովելու նպատակով որոշում է կայացրել պարտադիր տարհանել Ռիլսկիի և Խոմուտովի շրջանների բնակավայրերը, որոնք գտնվում են Ուկրաինայի հետ սահմանին հարող 15 կիլոմետրանոց գոտում», - գրել է նա։ Սմիռնովը հավելել է, որ տեղի բնակիչների հեռանալու գործընթացի համակարգումը վստահված է իրավապահ մարմիններին, տեղական վարչակազմին և «Պատրիոտ» դրուժինայի Կուրսկի կենտրոնին: Ուկրաինայի զինված ուժերը Կուրսկի մարզ են ներխուժել օգոստոսի 6-ին՝ իրենց վերահսկողության տակ առնելով մի քանի բնակավայր և առաջ շարժվելով մոտ 30 կմ։ Սակայն Ուկրաինայի առաջխաղացման տեմպերը նվազել են ռուսական ուժերի հակահարվածի պատճառով։ Հազարավոր մարդիկ տարհանվել են։

18:16 - 16 սեպտեմբերի, 2024

Բաքուն Մոսկվային նոտա է փոխանցել՝ ադրբեջանցիներին հարկադրաբար Ուկրաինայում պատերազմական գոտի ուղարկելու համար |factor.am|

factor.am: Ադրբեջանը դիմել է ՌԴ ԱԳՆ-ին՝ Չեչնիայում ձերբակալված ադրբեջանցիների հետ կապված, որոնց հարկադրաբար ուղարկել են Ուկրաինայում պատերազմական գոտի։ Այս մասին հայտնում է ադրբեջանական APA-ն՝ վկայակոչելով դիվանագիտական աղբյուրներին։ Հաղորդվում է, որ Մոսկվային նոտա է ուղարկվել Չեչնիայում ձերբակալված Ադրբեջանի քաղաքացիներ Նիհադ Ռզաևի, Էլհան Շիրինովի և Վուգար Մահերամովի հետ կապված։ Ավելի վաղ ադրբեջանական լրատվամիջոցները գրել էին, որ Նիհադ Ռզաևը, ինչպես նաև նրա ազգականներ Էլխան Շիրինովը և Վուգար Մահերամովը, որոնք մայիսին մեկնել էին Չեչնիա աշխատանքի, կալանքի տակ են միգրացիոն փաստաթղթերի հետ կապված հարցերով։ Այս մասին հայտնել էր Նիհադի հայրը՝ Թոֆիգ Ռզաևը։ Նա դիմել էր լրատվամիջոցին՝ նշելով, որ զինվորականների ճնշման տակ փորձում են հարազատներին ստիպել փաստաթղթեր ստորագրել՝ Ուկրաինա կռվելու ուղարկելու համար։ Կապ էին հաստատել Էլխան Շիրինովի և Վուգար Մահերամովի հետ, որոնք գտնվում են Չեչնիայի մայրաքաղաք Գրոզնիի «Հյուսիսային Ախմատ» զորամասում։ Շիրինովը հայտնել է, որ մեկուսարանում իրենց ստիպել են փաստաթղթեր ստորագրել, և որ իրենց հետ, ընդհանուր առմամբ, հինգ ադրբեջանցի է պահվում։ «Հիմա ես ու Վուգար Մահերամովը զորամասում ենք, ևս երեք հոգի, այդ թվում՝ Նիհադը, բանտում են։ Ավելի վաղ այստեղ երկու ադրբեջանցու էին բերել։ Հավանաբար, նրանց էլ կստիպեն փաստաթղթեր ստորագրել։ Մեզ որպես միգրանտ են ձերբակալել փաստաթղթերի անհամապատասխանության պատճառով։ Մեկուսարանում մեզ առաջարկեցին բանակ գնալ, սակայն մենք հրաժարվեցինք։ Դրանից հետո մեզ ստիպեցին դատարկ թուղթ ստորագրել, և բավարար գիտելիք չունենալով՝ մենք ստորագրել ենք։ Հետո մեզ տեղափոխեցին այն զորամաս, որտեղ այժմ գտնվում ենք։ Ինչո՞ւ ես պետք է գնամ Ուկրաինա կռվելու»,- պատմել է Շիրինովը։

15:41 - 16 սեպտեմբերի, 2024

Իրանի խորհրդարանում հայտարարել են, որ ՌԴ-ն «Զանգեզուրի միջանցքի» վերաբերյալ անընդունելի պնդումներ է անում, և ԱԳՆ-ն պետք է խիստ նախազգուշացում անի Մոսկվային |tert.am|

tert.am: Իրանի խորհրդարանի Ազգային անվտանգության և արտաքին քաղաքականության հանձնաժողովի անդամ Ֆադա Հոսեյն Մալեքին հայտարարել է, որ Ռուսաստանը, այսպես կոչված, «Զանգեզուրի միջանցքի» վերաբերյալ «պնդումներ է անում», ինչը բացարձակապես «ընդունելի չէ» Իրանի ժողովրդի և խորհրդարանի համար: Այս մասին գրում է isna.irկայքը:Նա Իսլամական Հանրապետության արտաքին գործերի նախարարությանը կոչ է արել «խիստ նախազգուշացում» անել ռուսական կողմին։«Երկրի դիվանագիտական համակարգը ռուսներին պետք է լուրջ նախազգուշացում տա: Մեզ մի կողմից մեղադրում են ուկրաինական պատերազմում ռուսներին աջակցելու համար, մյուս կողմից՝ ռուսները մեկնաբանություն են անում երեք կղզիների (Մեծ և Փոքր Թոմբերը, Աբու Մուսան) վերաբերյալ և չգիտես ինչու իրանական կղզիները համարում են Արաբական Միացյալ Էմիրություններինը, իսկ մյուս կողմից՝ միջամտում են Ադրբեջանի և Հայաստանի հարցերին, ինչը ոչ մի կերպ ընդունելի չէ», - ասել է քաղաքական գործիչը։

10:52 - 16 սեպտեմբերի, 2024