Ջո Բայդեն

ԱՄՆ 46-րդ նախագահը՝ Դեմոկրատական կուսակցությունից։

Ծնվել է 1942 թվականի նոյեմբերի 20-ին, ԱՄՆ-ի Փենսիլվանիա նահանգում։ Ամերիկացի քաղաքական գործիչ է, 2009 թվականի հունվարի 20-ին դարձել է Միացյալ նահանգների փոխնախագահը։ Մինչ փոխնախագահ դառնալը՝ նա սենատոր է եղել Դելավեր նահանգից՝ 1973-2009 թվականներին։ Նա ԱՄՆ դեմոկրատական կուսակցությունից առաջադրվել է 2020 թվականի նախագահական ընտրություններում՝ ընդդեմ գործող նախագահ Դոնալդ Թրամփի եւ նոյեմբերի 7-ին` վերջնական արդյունքներով ընտրվել է ԱՄՆ-ի նախագահ։

Սովորել է Դելավերի համալսարանում՝ ստանալով իրավաբանի մասնագիտություն։ 1970 թվականին ընտրվել է Նյու Քասլի շրջանի խորհրդում եւ դարձել վեցերորդ ամենաերիտասարդ սենատորը ԱՄՆ-ի պատմության մեջ, երբ 1972 թվականի ԱՄՆ-ի սենատորների ընտրություններում հաղթեց Դելավերում։ Բայդենը երկար ժամանակ Սենատի արտաքին հարաբերությունների հանձնաժողովի անդամ է եղել, նաեւ հանձնաժողովի նախագահ։ Նա դեմ էր 1991 թվականի Իրաք-քուվեյթյան պատերազմին, սակայն կողմ էր ՆԱՏՕ-ի ընդարձակմանը՝ դեպի Արեւելյան Եվրոպա եւ նրա ներքաշմանը 1990-ականների Հարավսլավիայի պատերազմներին։ Նա կողմ էր 2002 թվականի Իրաքի պատերազմի բանաձեւին, բայց դեմ էր 2007 թվականին Իրաքի պատերազմում ԱՄՆ զորքերի ավելացմանը։ Բայդենը ղեկավարել է Սենատի դատական հանձնաժողովը՝ 1987 թվականից մինչեւ 1995 թվականը, զբաղվել թմրանյութերի քաղաքականությամբ, հանցագործությունների կանխարգելմամբ եւ քաղաքացիական ազատությունների խնդիրներով։

Բայդենը վերընտրվել է Սենատում վեց անգամ եւ հրաժարվել Սենատորի պաշտոնից 2008 թվականի նախագահական ընտրություններին մասնակցելու համար՝ որպես Բարաք Օբամայի փոխնախագահ։ Օբաման եւ Բայդենը վերընտրվել են 2012 թվականին։

Միացյալ Նահանգներն աջակցում է Հայաստանի ինքնիշխանությանը, անկախությանը, տարածքային ամբողջականությանը և սեփական ապագան որոշելու իրավունքին․ Ջո Բայդեն

ԱՄՆ նախագահ Ջո Բայդենը ՀՀ Անկախության օրվա առթիվ շնորհավորական ուղերձ է հղել վարչապետ Նիկոլ Փաշինյանին․«Հարգելի պարոն վարչապետ, Միացյալ Նահանգների ժողովրդի անունից մեր բարեմաղթանքներն եմ հղում Ձեզ և Հայաստանի ժողովրդին Անկախության 33-րդ տարեդարձի առիթով։ Հայաստանն ու Միացյալ Նահանգները, կապված լինելով մեր ժողովուրդների միջև խորը կապերով, միասին աշխատում են ստեղծելու ավելի լավ ապագա, այդ թվում՝ բարձրացնելով մեր հարաբերությունները դեպի ռազմավարական գործընկերություն: Սա կխթանի մեր համագործակցությանն ամբողջ ծավալով՝ սկսած անվտանգության և պաշտպանության մեր գործընկերության ամրապնդումից մինչև մաքուր էներգիայի և առևտրի դիվերսիֆիկացման մեր նախաձեռնությունների արագացում: Այս ռազմավարական գործընկերությունը նաև կօժանդակի ժողովրդավարական ուղուն միտված Հայաստանի շարունակական ջանքերին՝ քաղաքացիական գործողությունների, լավ կառավարման, օրենքի գերակայության և հակակոռուպցիոն միջոցառումների միջոցով։ Սրանք արժեքներ են, որոնք կիսում են թե՛ ամերիկացիները և թե՛ հայերը: Միացյալ Նահանգներն աջակցում է Հայաստանի ինքնիշխանությանը, անկախությանը, տարածքային ամբողջականությանը և սեփական ապագան որոշելու իրավունքին։ Մենք աջակցում ենք ողջ տարածաշրջանում կայուն խաղաղության հասնելու Ձեր շարունակական հանձնառությանը: Եվ մենք անհամբեր սպասում ենք Ձեզ հետ աշխատելուն և շարունակելու ձևավորել ապագա, որտեղ յուրաքանչյուրը կարող է ապրել արժանապատվությամբ, անվտանգ», - նշված է ուղերձում։

14:24 - 21 սեպտեմբերի, 2024

Բայդենն ու Հարիսը Վաշինգտոնում կհանդիպեն Զելենսկու հետ. Սպիտակ տուն |1lurer.am|

1lurer.am: ԱՄՆ նախագահ Ջո Բայդենը հաջորդ շաբաթ Վաշինգտոնում կընդունի Ուկրաինայի նախագահին՝ հայտնում է Սպիտակ տունը։ Վոլոդիմիր Զելենսկին առանձին հանդիպում կունենա նաև փոխնախագահ, նախագահի թեկնածու Քամալա Հարիսի հետ: Ամերիկյան կողմի տվյալով՝ հանդիպումների օրակարգում են լինելու ռուս-ուկրաինական հակամարտության վերջին զարգացումները և ԱՄՆ աջակցությունը Կիևին։ Հնարավոր է՝ Զելենսկու հետ հանդիպի նաև ԱՄՆ նախագահի հանրապետական թեկնածու Դոնալդ Թրամփը: Ուկրաինայի նախագահի այցն ԱՄՆ տեղի է ունենում վերջին շրջանում ակտիվացած քննարկումների ֆոնին, որ Արևմուտքն Ուկրաինայի զինված ուժերին կարող է թույլ տալ արևմտյան զենքով հարվածել Ռուսաստանի խորքում գտնվող ռազմական օբյեկտներին: ԱՄՆ պետքարտուղարության խոսնակը հայտարարել է, որ Վաշինգտոնն այդ հարցով կապի մեջ է դաշնակիցների և գործընկերների հետ: Մեթյու Միլլերը հիշեցրել է, որ եվրոպական մի շարք երկրներ արդեն թույլ են տվել իրենց զենքն օգտագործել ռուսական տարածքում գտնվող ռազմական թիրախների դեմ:

13:21 - 20 սեպտեմբերի, 2024

Սպիտակ տունը մանրամասներ է հայտնել Զելենսկիի և Բայդենի առաջիկա հանդիպման մասին |shantnews.am|

shantnews.am: Միացյալ Նահանգների նախագահ Ջո Բայդենը սեպտեմբերի 26-ին Վաշինգտոնում կընդունի Վլադիմիր Զելենսկիին, իսկ նախագահի թեկնածու Քամալա Հարիսը առանձին հանդիպում կունենա Ուկրաինայի առաջնորդի հետ։ Այս մասին գրում է «ՌԻԱ Նովոստի»-ն՝ Սպիտակ տան մամուլի ծառայությանը հղումով։ Նշվում է, որ կողմերը կքննարկեն Մոսկվայի և Կիևի միջև հակամարտությունը, ինչպես նաև «Ուկրաինայի և ԱՄՆ աջակցության ռազմավարական պլանավորումը»։ Մամուլի ծառայությունը հայտնում է, որ Բայդենը և Հարիսը մտադիր են ընդգծել Ուկրաինային աջակցելու իրենց «մնայուն հանձնառությունը»։

22:03 - 19 սեպտեմբերի, 2024

Բայդենի որդին իրեն մեղավոր է ճանաչել դաշնային հարկերը չվճարելու գործով |armenpress.am|

armenpress.am: ԱՄՆ նախագահ Ջո Բայդենի որդին՝ Հանթեր Բայդենն, իրեն մեղավոր է ճանաչել դաշնային հարկերը չվճարելու համար։ Այս անակնկալ քայլի շնորհիվ նա կխուսափի դատավարությունից՝ ԱՄՆ նախագահական ընտրություններից շաբաթներ առաջ: Այս մասին հաղորդում է Reuters գործակալությունը։ Հանթեր Բայդենը պետք է կանգներ Լոս Անջելեսի դաշնային դատարանի առջև 1,4 միլիոն դոլարի հարկերը չվճարելու քրեական մեղադրանքով։ Փոխարենը, նա իրեն մեղավոր է ճանաչել բոլոր ինը մեղադրական հոդվածներով, որ իրեն ներկայացվել են: Դատավորը Բայդենին ասել է, որ նրան սպառնում է մինչև 17 տարվա ազատազրկում և մինչև 450 000 դոլար տուգանքի վճարում։ Նրա դատավճիռը կհայտնեն դեկտեմբերի 16-ին։ Սովորաբար մեղադրյալները, որոնք իրենց մեղավոր են ճանաչում, նախապես համաձայնության են հասնում դատախազների հետ՝ դատավարությունից խուսափելու դիմաց ստանալով ավելի մեղմ դատավճիռ։ Սակայն Հանթեր Բայդենի դեպքում նման բան չի եղել։ Նա իրեն մեղավոր է ճանաչել՝ առանց դատախազների հետ նախապես համաձայնություն ձեռք բերելու։ Դատական լսումներից հետո արված հայտարարության մեջ Հանթեր Բայդենն ասել է, որ իրեն մեղավոր է ճանաչել, որպեսզի իր ընտանիքը ստիպված չլինի ներկա գտնվել մի քանի շաբաթ տևող դատական լսումներին, որոնց ընթացքում վատ մանրամասներ կհրապարակվեին իր կյանքի այն փուլի մասին, երբ նա տառապում էր թմրանյութերից կախվածությունից։ Նա նաև հայտնել է, որ վճարել է բոլոր չվճարված հարկերը։ Հանթեր Բայդենը, որը բացահայտորեն խոսում է թմրամոլության և ալկոհոլային կախվածության դեմ իր պայքարի մասին, մեղադրվում է այն բանում, որ 2016-ից 2019 թվականներին չի վճարել հարկերը, սակայն միևնույն ժամանակ հսկայական գումար է ծախսել «թմրանյութերի, մարմնավաճառուհիների և ընկերուհիների, շքեղ հյուրանոցների և անշարժ գույքի վարձակալության, էկզոտիկ մեքենաների, հագուստի և անձնական բնույթի այլ իրերի վրա»։ Մեկ այլ գործի շրջանակներում Հանթեր Բայդենը բողոքարկել է դատարանի որոշումը, որով իրեն մեղավոր են ճանաչել թմրանյութերի ազդեցության տակ գտնվելիս անօրինական կերպով զենք ձեռք բերելու մեջ։ Սպիտակ տունը հայտարարել է, որ նախագահ Ջո Բայդենը բացառել է իր որդուն համաներում շնորհելու հնարավորությունը։

12:53 - 06 սեպտեմբերի, 2024

Ցուկերբերգը պնդում է՝ Բայդենի վարչակազմը ճնշում է գործադրել Meta-ի վրա՝ գրաքննելու բովանդակությունը |azatutyun.am|

azatutyun.am: Meta-ի գործադիր տնօրեն Մարկ Ցուկերբերգն ասել է, որ Բայդենի վարչակազմը ճնշում է գործադրել ընկերության վրա՝ «գրաքննելու» բովանդակությունը COVID-19 համաճարակի ժամանակ՝ հեռացնելու ապատեղեկատվությունը կորոնավիրուսի և պատվաստանյութերի մասին, հայտնում է Reuters-ը: Ցուկերբերգը ԱՄՆ Ներկայացուցիչների պալատի դատական հանձնաժողովին ուղղված նակամում ափսոսանք է հայտնել, որ ավելի վաղ չի բարձրաձայնել ճնշման մասին, ինչպես նաև այլ որոշումների համար, որոնք նա կայացրել է որպես Facebook-ի, Instagram-ի և WhatsApp-ի սեփականատեր՝ որոշակի բովանդակություն հեռացնելու վերաբերյալ: Ցուկերբերգն նշել է, որ իր ընկերության վրա ճնշում է գործադրվել բովանդակության «գրաքննության» համար, և որ ընկերությունը հետ կկանգնի, եթե նորից նման պահանջների հանդիպի: «2021 թվականին Բայդենի վարչակազմի բարձրաստիճան պաշտոնյաները, ներառյալ Սպիտակ տունը, ամիսներ շարունակ բազմիցս ճնշում էին մեր թիմերին՝ գրաքննելու COVID-19-ի որոշակի բովանդակություն, ներառյալ հումորն ու երգիծանքը, - գրել է Ցուկերբերգը նամակում և ընդգծել, - կարծում եմ, որ կառավարության ճնշումը սխալ էր, և ես ափսոսում եմ, որ ավելի անկեղծ չէինք այդ մասին»:

09:34 - 28 օգոստոսի, 2024

Մոդին Բայդենի հետ քննարկել է Ուկրաինա այցը |azatutyun.am|

azatutyun.am: Հնդկաստանի վարչապետ Նարենդրա Մոդին օգոստոսի 26-ին ԱՄՆ նախագահ Ջո Բայդենի հետ հեռախոսազրույցի ընթացքում քննարկել է Ուկրաինա իր այցը: Հնդկաստանի վարչապետը օգոստոսի 23-ին այցելել է Կիև և նախագահ Վլադիմիր Զելենսկիին ասել, որ «ոչ մի խնդիր չպետք է լուծվի մարտի դաշտում»։ Բայդենին տեղեկացնելով իր ուղևորության մասին՝ Մոդին «կրկնել է Հնդկաստանի հետևողական դիրքորոշումը երկխոսության և դիվանագիտության օգտին և լիակատար աջակցություն է հայտնել խաղաղության և կայունության վաղ վերադարձին», ասվում է Հնդկաստանի ԱԳՆ հայտարարության մեջ։ Սպիտակ տան Ազգային անվտանգության խորհրդի խոսնակ Ջոն Քիրբին նշել է, որ Միացյալ Նահանգները ողջունում է «ցանկացած այլ երկրի, որը ցանկանում է օգնել» Զելենսկիին արդար խաղաղության հասնելու համար։

09:31 - 27 օգոստոսի, 2024

Բայդենը Նեթանյահուին հայտնել է ՀԱՄԱՍ-ի հետ համաձայնության հասնելու հրատապության մասին |armenpress.am|

armenpress.am: ԱՄՆ նախագահ Ջո Բայդենն Իսրայելի վարչապետ Բեմիամին Նեթանյահուի հետ հեռախոսազրույցի ժամանակ շեշտել է պաղեստինյան ՀԱՄԱՍ արմատական շարժման հետ Գազայի հատվածում հրադադարի հասնելու հրատապությունը։ Այս մասին հաղորդագրություն է տարածել Սպիտակ տունը։ «Նախագահն ընդգծել է հրադադարի և պատանդների ազատ արձակման գործարքը կնքելու հրատապությունը և քննարկել է Կահիրեում կայանալիք բանակցությունները՝ վերացնելու մնացած բոլոր խոչընդոտները», - նշված է հաղորդագրության մեջ: Կողմերը նաև քննարկել են «ԱՄՆ-ի ակտիվ և շարունակական ջանքերը՝ աջակցելու Իսրայելի պաշտպանությանը Իրանից եկող բոլոր սպառնալիքներից», որը ներառում է նաև ԱՄՆ-ի պաշտպանական ռազմական տեղակայումները, հավելել են Սպիտակ տանը։ Օգոստոսի 15-ին Դոհայում սկսվել է բանակցությունների նոր փուլ՝ ԱՄՆ-ի, Եգիպտոսի և Կատարի միջնորդությամբ։ Ըստ երեք միջնորդների հայտարարության՝ բանակցությունների ընթացքում հնարավոր է եղել նվազեցնել ՀԱՄԱՍ-ի և Իսրայելի միջև տարաձայնությունները։ Բանակցություններն առաջիկա օրերին կշարունակվեն Կահիրեում։ Գազայի հատվածում պատերազմը սկսվել է ՀԱՄԱՍ-ի հարձակումից հետո, որի հետևանքով Իսրայելում 1200 մարդ է զոհվել, շուրջ 250-ը՝ գերեվարվել։ Իսրայելի պատասխան ռազմական գործողությունների հետևանքով Գազայի հատվածում զոհերի թիվը հասել է 40 200-ի։

10:47 - 22 օգոստոսի, 2024

ԱՄՆ նախագահն առաջին անգամ մեկնաբանել է ուկրաինական զորքերի հարձակումը Կուրսկի շրջանում |news.am|

news.am: ԱՄՆ նախագահ Ջո Բայդենը հայտարարել է, որ ուկրաինական զորքերի հարձակումը Կուրսկի շրջանում Ռուսաստանի նախագահ Վլադիմիր Պուտինին իսկական երկընտրանքի առաջ է կանգնեցնում, հայտնում է BBC-ն։ Սա տեղի ունեցողի վերաբերյալ ամերիկացի առաջնորդի առաջին պաշտոնական մեկնաբանությունն է։ «Մենք անմիջական, մշտական կապի մեջ ենք ուկրաինացիների հետ։ Սա այն ամենն է, ինչ ես կարող եմ ասել դրա մասին, քանի դեռ հարձակումը շարունակվում է», - ըստ Ֆրանսպրես գործակալության՝ հայտարարել է Բայդենը:

09:37 - 14 օգոստոսի, 2024

Բայդենը Էրդողանի հետ քննարկել է Գազայի հատվածում և տարածաշրջանում վերջին զարգացումները |1lurer.am|

1lurer.am: Հեռախոսազրույց են ունեցել Թուրքիայի և ԱՄՆ-ի նախագահները։ Թուրքական կողմի հաղորդագրության համաձայն՝ քննարկվել են երկու երկրների հարաբերությունները, Գազայի հարցը, Թուրքիայում տեղի ունեցած գերիների փոխանակումը, տարածաշրջանային և միջազգային զարգացումները։ Նշվում է, որ Ռեջեփ Էրդողանը ասել է՝ Նեթանյահուի վարչակազմն ամեն քայլով ցույց է տալիս, որ չի ցանկանում հրադադար և խաղաղություն, ԱՄՆ-ի Ներկայացուցիչների պալատի կադրերը Թուրքիայում և աշխարհում խոր հիասթափություն են առաջացրել, իսկ ՀԱՄԱՍ-ի քաղբյուրոյի ղեկավար Իսմայիլ Հանիեի սպանությունը հարված է հասցրել հրադադարի ջանքերին։ Թուրքիայի ղեկավարի խոսքով՝ Իսրայելն անում է ամեն ինչ՝ Գազայի «հրդեհը» ողջ տարածաշրջանում տարածելու համար։ Էրդողանը նշել է, որ Թուրքիայի և ԱՄՆ-ի հարաբերությունների զարգացման համար Թուրքիան անում է հնարավորը և շարունակելու է անել։ Ջո Բայդենն էլ, ըստ թուրքական կողմի հաղորդագրության, շնորհակալություն է հայտնել Էրդողանին՝ գերիների փոխանակումն «անխնդիր կերպով իրականացնելու ուղղությամբ ցուցաբերած ջանքերի համար»։

12:49 - 02 օգոստոսի, 2024

Բայդենը դիմավորել է ՌԴ-ի հետ բանտարկյալների ամենախոշոր փոխանակման արդյունքում վերադարձված ամերիկացիներին |armenpress.am|

armenpress.am: Ռուսաստանի և Արևմուտքի միջև Սառը պատերազմի ժամանակներից ի վեր բանտարկյալների ամենախոշոր փոխանակումը ներառել է 24 մարդու, որոնք փոխանակվել են մի քանի ամիս տևած բանակցությունների և փոխզիջումների արդյունքում։ The Associated Press գործակալությունը հաղորդում է, որ Ռուսաստանը բաց է թողել 16 մարդու, այդ թվում՝ Wall Streeet Journal-ի լրագրող Էվան Գերշկովիչին և նախկին ծովային Փոլ Ուիլանին, որոնք դատապարտված էին լրտեսության համար, ինչպես նաև Ազատություն ռադիոկայանի ռադիոլրագրող Ալսու Կուրմաշևային, որն ԱՄՆ-ի և ՌԴ-ի երկքաղաքացիություն ունի։ Գերշկովիչը, Ուիլանը և Կուրմաշևան օգոստոսի 1-ի ուշ երեկոյան ժամանել են Մերիլենդում գտնվող ռազմակայան, որտեղ նրանց դիմավորել են ԱՄՆ նախագահ Ջո Բայդենը և փոխնախագահ Քամալա Հարիսը։ Ռուսաստանը բաց է թողել նաև պետական դավաճանության համար դատապարտված հրապարակախոս Վլադիմիր Կարա-Մուրզային։ Գերմանացի Ռիկո Կրիգերը, որը Բելառուսում դատապարտված էր մահապատժի լրտեսության համարս, և որին նախագահ Ալեքսանդր Լուկաշենկոն ներում էր շնորհել, նույնպես ազատ է արձակվել։ Իսկ Ռուսաստանին վերադարձված 8 հոգու ցանկում, թերևս, ամենահայտնին Վադիմ Կրասիկովն է, որը Գերմանիայում դատապարտված էր ցմահ ազատազրկման ծագումով չեչեն Վրաստանի քաղաքացի Զելիմխան Խանգոշվիլիի սպանության համար։ Ռուսաստանին են վերադարձվել նաև Սլովենիայում լրտեսության համար դատապարտված Արտյոմ և Աննա Դուլցևները, ԱՄՆ-ում դատապարտված 3 տղամարդիկ, 1 հոգի՝ Նորվեգիայից, 1-ը՝ Լեհաստանից։ The Associated Press-ը նշում է, որ դեռ մի քանի ԱՄՆ քաղաքացի մնում է ՌԴ-ում բանտարկված։ Բանտարկյալների փոխանակմանը, փաստորեն, մասնակցել է 7 երկիր՝ ԱՄՆ-ն, Գերմանիան, Լեհաստանը, Սլովենիան, Նորվեգիան, Ռուսաստանը և Բելառուսը։ Գործընթացին նպաստել է Թուրքիան։

10:59 - 02 օգոստոսի, 2024

Ջո Բայդենը հրաժարվել է հրաժարական տալ |news.am|

news.am: ԱՄՆ նախագահ Ջո Բայդենը, հրաժարվելով երկրորդ ժամկետով վերընտրվելու իր փորձից, հայտարարել է, որ կշարունակի պաշտոնավարել որպես պետության ղեկավար: Նա համապատասխան հայտարարություն է հրապարակել X սոցիալական ցանցի իր էջում: «Մենք Ամերիկայի Միացյալ Նահանգներն ենք, չկա մի բան, որը մենք չկարողանանք անել, եթե դա անենք միասին: Պարզապես պետք է հիշել, թե ով ենք մենք։ Ես իմ նախագահությունը նվիրել եմ դա ապացուցելուն, և կշարունակեմ դա անել այսօր, վաղը և ամեն օր, քանի դեռ ես պատիվ ունեմ ծառայելու որպես ձեր նախագահ», - ասված է ԱՄՆ նախագահի հայտարարության մեջ: Այն բանից հետո, երբ Բայդենը դուրս եկավ նախագահական մրցապայքարից, Ներկայացուցիչների պալատի խոսնակ, հանրապետական Մայք Ջոնսոնը պետության ղեկավարին կոչ արեց հրաժարական տալ։ «Եթե Ջո Բայդենը պիտանի չէ նախագահական ընտրություններում առաջադրվելու համար, նա պիտանի չէ նախագահ լինելու համար: Նա պետք է անհապաղ հրաժարական տա»,- գրել է Ջոնսոնը սոցիալական ցանցի իր X էջում: Այն, որ Բայդենը որոշել է հանել իր թեկնածությունն ընտրություններից, հայտնի դարձավ անցած կիրակի։ Նա ասել է, որ ծրագրում է դիմել ժողովրդին այս շաբաթվա վերջին՝ «բացատրելու իր որոշումը»: Բայդենը հավանություն է տվել փոխնախագահ Քամալա Հարիսին որպես իր իրավահաջորդ։ Նոր թեկնածուի մասին որոշումը պետք է կայացնի Դեմոկրատական կուսակցության համագումարը, որը կկայանա մի քանի շաբաթից։ 81-ամյա Բայդենը՝ Ամերիկայի նախագահներից ամենատարեցը, հայտնվել էր ուժեղ ճնշման տակ Դոնալդ Թրամփի հետ աղետալի բանավեճից հետո, որին հաջորդեցին հրապարակային ելույթներում նոր սայթաքումներ. հուլիսի 12-ին ՆԱՏՕ-ի գագաթնաժողովում Բայդենը Ուկրաինայի նախագահ Վլադիմիր Զելենսկուն անվանել է Վլադիմիր Պուտին, իսկ 5 օր անց BET-ին տված հարցազրույցի ժամանակ նա չի կարողացել հիշել պաշտպանության նախարար Լլոյդ Օսթինի անունը՝ նրան անվանելով «սևամորթ»: Եվ չնայած Բայդենի վարկանիշն աղետալի անկում չի ապրել (ըստ NYT/Sienna-ի հարցման՝ հուլիսի սկզբին նա ուներ 43%՝ Թրամփի 49%-ի դիմաց), ավելի քան 20 կոնգրեսականներ, այդ թվում՝ Սենատի մեծամասնության դեմոկրատ ղեկավար Չակ Շումերը, հրապարակավ կոչ են արել, որ նա հանի իր թեկնածությունը, իսկ Դեմոկրատական կուսակցության դոնորները սկսել են հետ կանչել նվիրատվությունները:

09:47 - 23 հուլիսի, 2024

Քամալա Հարիսը հայտարարում է՝ պատրաստ է պաշտոնապես առաջադրվել որպես նախագահի թեկնածու |azatutyun.am|

azatutyun.am: ԱՄՆ փոխնախագահ Քամալա Հարիսը հայտարարել է, որ մտադիր է պաշտոնապես առաջադրվել Դեմոկրատական կուսակցությունից և հաղթել հանրապետական թեկնածու Դոնալդ Թրամփին 2024 թվականի նոյեմբերի ընտրություններում։ Այս մասին հայտնում է «Ազատության» Настоящее Время ծառայությունը։ Ավելի վաղ Ջո Բայդենը, որը հրաժարվել էր մասնակցել ընտրություններին, հորդորել էր նրան առաջադրել որպես նախագահի թեկնածու։ «Ես կանեմ ինձնից կախված ամեն ինչ՝ միավորելու Դեմոկրատական կուսակցությունը և միավորելու մեր երկիրը՝ Դոնալդ Թրամփին հաղթելու համար»,- ասել է Հարիսը։ Քանալա Հարիսը շնորհակալություն է հայտնել Բայդենին իրեն առաջադրելու համար և նախագահական մրցապայքարից դուրս գալու նրա որոշումը համարել է «անձնուրաց և հայրենասիրական»։ «Մենք 107 օր ունենք մինչև ընտրությունները։ Միասին մենք կպայքարենք։ Միասին մենք կհաղթենք»,- ասել է Հարիսը։ Դոնալդ Թրամփն էլ, մեկնաբանելով Բայդենի՝ ընտրապայքարից դուրս գալու որոշումը, հայտարարել է, թե վերջինս պատմության մեջ կմտնի որպես «վատագույն նախագահ»։ Այսպես է նա CNN-ին տված հարցազրույցում մեկնաբանել Բայդենի դուրս գալը ԱՄՆ նախագահական ընտրարշավից: Նա նաև հայտարարել է, թե Քամալա Հարիսին հաղթելը ընտրություններում անհամեմատ ավելի հեշտ կլինի, քան Բայդենին: Նշենք, որ տարբեր հարցումների համաձայն՝ Բայդենը պարտվել էր հանրապետական Թրամփին նախընտրական բանավեճում: Այդ ֆոնին ԱՄՆ Դեմոկրատական կուսակցության ներկայացուցիչները սկսեցին ակտիվորեն կոչ անել առաջադրել մեկ այլ թեկնածուի: Դեմոկրատների հավանական այլընտրանքային թեկնածուն փոխնախագահ Հարիսն է: Տեսականորեն կուսակցությունը թեկնածուին փոխարինելու հնարավորություն կունենա օգոստոսին կայանալիք համագումարում, սակայն դրա համար անհրաժեշտ է նախնական ընտրություններում հաղթած թեկնածուի համաձայնությունը: Ավելի վաղ Բայդենը հայտարարում էր, որ մտադիր է գնալ մինչև վերջ: ԱՄՆ նախագահի ընտրությունները տեղի կունենան նոյեմբերի 5-ին:

09:56 - 22 հուլիսի, 2024

Բայդենն ասել է, որ կարող է դուրս գալ նախագահական մրցապայքարից, եթե առողջական խնդիրներ ունենա |shantnews.am|

shantnews.am: ԱՄՆ նախագահ Ջո Բայդենը հայտարարել է, որ դուրս կգա նախագահական մրցապայքարից, եթե բժիշկները պարզեն, որ նա առողջական խնդիրներ ունի։ Այս մասին նա ասել է BET-ին տված հարցազրույցում։ «Անկեղծ ասած, ես կարծում եմ, որ միակ բանը, որ տարիքը բերում է՝ իմաստությունն է»,- հավելել է Բայդենը։ Բայդենն ավելի վաղ ասել էր, որ ինքը կհրաժարվի նախընտրական մրցապայքարից միայն այն դեպքում, եթե «Աստված իրեն ասի դա անել»։

12:02 - 17 հուլիսի, 2024

Ջո Բայդեն. «Քաղաքականությունը երբեք չպետք է դառնա ռազմի դաշտ» |amerikayidzayn.com|

amerikayidzayn.com: ԱՄՆ նախագահը դիմել է երկրին ուղերձով Դոնալդ Թրամփի դեմ մահափորձի կապակցությամբ՝ կոչ անելով քաղաքական դաշտի բոլոր կողմերին մեղմացնել իրենց հռետորաբանությունը։ Նախագահ Ջո Բայդենը դատապարտել է գալիք նոյեմբերի ընտրություններում իր ենթադրյալ մրցակից Դոնալդ Թրամփի դեմ մահափորձը՝ ասելով, որ Ամերիկայում բռնության տեղ չկա և ընդգծելով, որ քաղաքականությունը «չպետք է դառնա ռազմի դաշտ», և որ բոլոր տարաձայնությունները պետք է լուծվեն քվեաթերթիկների միջոցով։ Բայդենն այս հայտարարությունն արել է երկրին ուղղված հեռուստաուղերձի ժամանակ, որը հեռարձակվել է արևելյան ժամանակով երեկոյան 20:00-ին՝ արձագանքելով Թրամփի դեմ մահափորձին, որը տեղի է ունեցել շաբաթ երեկոյան Փենսիլվանիայում ընթացող հանրահավաքում: Ջո Բայդենը օգտագործեց Սպիտակ տան Օվալաձև գրասենյակի պաշտոնական միջավայրը՝ շեշտելու Թրամփի մահափորձից հետո ամերիկացիների համախմբման անհրաժեշտությունը: «Թրամփի վրա կրակելը ազդանշան էր բոլորիս համար՝ հետ կանգնելու համար», - ասել է Բայդենը։ Բարեբախտաբար, Դոնալդ Թրամփը լուրջ վնասվածքներ չի ստացել, հավելել է նա։ «Մենք չենք կարող թույլ տալ, որ այս բռնությունը դառնա նորմ։ Այս երկրում քաղաքական հռետորաբանությունը շատ թեժացել է։ Ժամանակն է սառեցնել այն»,- ասել է Բայդենը: «Մենք բոլորս պատասխանատվություն ենք կրում դրա համար»,- հավելել է նախագահը: Ամերիկացիների համար կարևոր հարցերի վերաբերյալ Օվալաձև գրասենյակի ուղերձը Բայդենի երրորդն էր 2021 թվականին պաշտոնը ստանձնելուց հետո: Բայդենի ելույթը թույլ տվեց նրան ցույց տալ նախագահության հեղինակությունն ու կշիռը, ինչը կարևոր խորհրդանշական ազդանշան է իր դեմոկրատական կուսակցության այն հետևորդներին, ովքեր կոչ են անում 81-ամյա առաջնորդին հրաժարվել վերընտրվելուց՝ մտավախություն ունենալով, որ նրա առողջական վիճակը կխանգարի նրան հաջողությամբ կատարել Սպիտակ տան ղեկավարի պարտականությունները հաջորդ չորս տարում։ Կիրակի ավելի վաղ Բայդենը հրամայել էր դաշնային անվտանգության վերանայում անցկացնել այն բանից հետո, երբ մահափորձ էր արվել Դոնալդ Թրամփի դեմ, իսկ հանրահավաքին ներկաներից մեկը զոհվել էր: Ենթադրյալ հրաձիգը կարողացել է շրջանցել Գաղտնի ծառայության գործակալներին, որոնց հանձնարարվել է պաշտպանել Թրամփին, բարձրացել է թեկնածուի ելույթի մոտ գտնվող շենքի տանիք և մի քանի կրակոց է արձակել, նախքան իրավապահների կողմից սպանվելը։ Այսօր կեսօրին ելույթ ունենալով Սպիտակ տանը՝ Բայդենն ասել է, որ հանձնարարել է Գաղտնի ծառայությանը վերանայել այս շաբաթ Միլվոկիում Հանրապետականների ազգային համագումարի համար նախատեսված անվտանգության բոլոր միջոցները, որտեղ Թրամփը պաշտոնապես կառաջադրվի որպես հանրապետականների նախագահի թեկնածու: Նա նաև ասել է, որ երեկվա հանդիպմանը հանձնարարել է «Ազգային անվտանգության անկախ վերանայում կատարել՝ ճշգրիտ գնահատելու, թե ինչ է տեղի ունեցել»։ Նա ասաց, որ հետաքննության արդյունքները կներկայացվեն ամերիկացի ժողովրդին: Բայդենն ընդգծել է, որ միջադեպի առնչությամբ ՀԴԲ-ի հետաքննությունը գտնվում է վաղ փուլում և հրամայել է այն իրականացնել մանրակրկիտ և արագ։ «Ես խրախուսում եմ բոլորին, բոլորին, խնդրում եմ, ենթադրություններ մի արեք [կրակողի] դրդապատճառների կամ կապերի մասին։ Թող ՀԴԲ-ն և նրանց գործընկեր գործակալությունները իրենց գործն անեն»,- ասաց նա: Շարունակությունը՝ սկզբնաղբյուր կայքում

09:34 - 15 հուլիսի, 2024

Բայդենը և Սթարմերը խոստացել են շարունակել աջակցությունն Ուկրաինային |armenpress.am|

armenpress.am: Վաշինգտոնում անցկացվող ՆԱՏՕ-ի գագաթնաժողովի շրջանակներում ԱՄՆ նախագահ Ջո Բայդենը Սպիտակ տանը երկկողմ հանդիպում է անցկացրել Մեծ Բրիտանիայի վարչապետ Քիր Սթարմերի հետ։ Այս մասին հաղորդագրություն է տարածել Սպիտակ տունը։ Բայդենը շնորհավորել է Սթարմերին խորհրդարանական ընտրությունների արդյունքներով Մեծ Բրիտանիայի վարչապետի պաշտոնը ստանձնելու համար և նշել, որ Բրիտանիան ԱՄՆ-ի կարևոր գործընկերն է։ «Ղեկավարները վերահաստատել են իրենց հանձնառությունը ԱՄՆ-Մեծ Բրիտանիա համագործակցությանը համաշխարհային մակարդակով, մինչ նրանք հասցեագրում են ընդհանուր մարտահրավերները և հնարավորությունները։ Նրանք ընդգծել են իրենց ընդհանուր հանձնառությունը Ուկրաինային աջակցությանը, մինչ երկիրը պայքարում է ռուսական ագրեսիայի դեմ», - նշված է Սպիտակ տան հայտարարությունում։ Իր հերթին Բրիտանիայի վարչապետի գրասենյակը հավելել է, որ կողմերը համաձայնել են անել ամեն բան Ուկրաինային աջակցության համար և երաշխավորել, որ ՌԴ նախագահ Վլադիմիր Պուտինը չհաղթի պատերազմում։ Կողմերը նաև ընդգծել են Իսրայելի և պաղեստինյան ՀԱՄԱՍ արմատական շարժման միջև հրադադարի կարևորությունը՝ շեշտելով իրենց հանձնառությունը երկու պետությունների ստեղծման միջոցով խնդրի լուծմանը։ Բրիտանիայի վարչապետի գրասենյակը նաև հայտարարություն է տարածել Ուկրաինային մինչև 2030-2031 ֆինանսական տարին տարեկան առնվազն 3 մլրդ ֆունտ ստեռլինգի (3,85 մլրդ դոլար) ռազմական աջակցությունը շարունակելու մասին, ինչպես խոստացել էր իր նախորդ Ռիշի Սունակը։

10:15 - 11 հուլիսի, 2024

Ուկրաինան ՀՕՊ համակարգեր կստանա․ Բայդենը՝ ՆԱՏՕ-ի գագաթնաժողովում |azatutyun.am|

azatutyun.am: ԱՄՆ նախագահ Ջո Բայդենը երեկ Վաշինգտոնում, ՆԱՏՕ-ի գագաթնաժողովի բացման ժամանակ, հայտարարել է Ուկրաինային զենիթահրթիռային համակարգեր մատակարարելու ծրագրերի մասին։ «Միացյալ Նահանգները կանի հնարավորը, որպեսզի Ուկրաինան հակաօդային պաշտպանության համակարգերի առաջին ստացողներից լինի», - հայտարարել է Բայդենը։ Միացյալ Նահանգները, Գերմանիան և Ռումինիան Կիևին կտրամադրեն մեկական Patriot զենիթահրթիռային համակարգեր, Նիդեռլանդները ևս, այլ երկրների հետ համագործակցելով, Ուկրաինային կմատակարարի ևս մեկ Patriot համակարգ։ Ուկրաինան, ըստ նախագահ Բայդենի, տարվա ընթացքում ստացել է հարյուրավոր որսացող սարքեր, որոնք կօգնեն պաշտպանել ուկրաինական քաղաքները ռուսական հրթիռներից։ ԱՄՆ նախագահը հայտարարել է Ուկրաինային աջակցելու պատրաստակամության մասին։ «Պուտինը ցանկանում է Ուկրաինայի լիակատար հպատակեցումը, ցանկանում է վերջ դնել ուկրաինական ժողովրդավարությանը, ոչնչացնել Ուկրաինայի մշակույթը և ջնջել այն քարտեզից։ Մենք գիտենք, որ Պուտինը դրանով կանգ չի առնելու, բայց Ուկրաինան կարող է և կկանգնեցնի Պուտինին», - հայտարարել է Բայդենը։ Իր ելույթում ԱՄՆ նախագահը նաև շեշտել է՝ ամերիկացիների ճնշող մեծամասնությունը հասկանում է, որ ՆԱՏՕ-ի դաշինքն աշխարհն ավելի անվտանգ է դարձնում։ «Ամերիկացիները գիտեն, որ մենք ավելի ուժեղ ենք, երբ գործում ենք ընկերների հետ միասին», - ասել է ԱՄՆ նախագահը։ Երեկ Վաշինգտոն այցից հետո Ուկրաինայի նախագահ Վլադիմիր Զելենսկին ասել է, որ կդիմի ՆԱՏՕ-ի երկրների ղեկավարներին՝ լրացուցիչ հակաօդային պաշտպանության համակարգեր, F-16 կործանիչներ ստանալու խնդրանքով, ինչպես նաև անվտանգության լրացուցիչ երաշխիքներ կպահանջի: Վաշինգտոնում ընթանում է ՆԱՏՕ-ի հոբելյանական գագաթնաժողովը։ Գագաթնաժողովի հիմնական թեման ուկրաինական հակամարտությունն է։

10:39 - 10 հուլիսի, 2024