Կորոնավիրուս

Կորոնավիրուսի մասին տեղեկություն ստանալու վստահելի կայքերը |armenpress.am|

Կորոնավիրուսի մասին տեղեկություն ստանալու վստահելի կայքերը |armenpress.am|

armenpress.am: Կորոնավիրուսի տարածմանը զուգահեռ՝ լայն տարածում են գտնում նաև բազմաթիվ ինտերնետային կայքեր, որոնք ներկայանալով որպես պաշտոնական աղբյուր, կեղծ տեղեկություններ են տարածում։ Տեղեկատվության ստուգման կենտրոնը ներկայացնում է պաշտոնական այն աղբյուրները, որտեղից կարելի է ստանալ ստուգված և ճշգրիտ տեղեկություն վիրուսի մասին։ Առողջապահական համաշխարհային կազմակերպություն who.int Ջոն Հոփքինսի համալսարանի ստեղծած հարթակը՝ coronavirus.jhu.edu և worldometers.info ՀՀ Առողջապահության նախարարություն moh.am ՀՀ ԱՆ հիվանդությունների վերահսկման ու կանխարգելման ազգային կենտրոնի ստեղծած հարթակը՝ ncdc.am Կորոնավիրուսի մասին Հայաստանում տարածվող ապատեղեկատվությունների մասին հերքումները կարող եք գտնել Տեղեկատվության ստուգման կենտրոնի (Infocheck.am) COVID-19 բաժնում։ Պաշտոնական տեղեկատվություն կարելի է ստանալ նաև վարչապետ Նիկոլ Փաշինյանի և Առողջապահության նախարար Արսեն Թորոսյանի Ֆեյսբուքյան էջերից։
17:09 - 13 մարտի, 2020
Ազգային ժողովում հակահամաճարակային գործողություններ կիրականացվեն

Ազգային ժողովում հակահամաճարակային գործողություններ կիրականացվեն

 Նոր կորոնավիրուսի տարածմամբ պայմանավորված, Ազգային ժողովում հակահամաճարակային գործողություններ կիրականացվեն: Այս մասին «Ֆեյսբուք»-ի իր էջում գրել է ՀՀ Ազգային ժողովի աշխատակազմի ղեկավար-գլխավոր քարտուղար Տիգրան Գալստյանը: «ՀՀ Ազգային Ժողովի աշխատակազմը պլանավորել և հնարավորինս արագ իրականացնելու է հակահամաճարակային հետևյալ գործողությունները. Պատասխանատու վերաբերմունք առաջացած խնդիրներին: Բոլոր մասնաշենքերի եւ անցակետերի ախտահանում, Բոլոր աշխատակիցների ջերմության ստուգում օրական 3 անգամ, Վերջին ամիսներին արտերկիր մեկնած աշխատակիցներին տնային պայմաններում առցանց աշխատելու թույլտվություն, Դիմակների ձեռք բերում եւ անվճար տրամադրում աշխատակիցներին եւ պատգամավորներին, Բոլոր հնարավոր հարմար տեղերում ալկոգելերի տեղադրում, Ճաշարանից օգտվելու պայմանների փոփոխություն, Բոլոր աշխատասենյակներում համաճարակից պաշտպանվելու տեղեկատվական նյութերի փակցնում, սենյակների անընդհատ օդափոխում»,- գրել է Գալստյանը: Հայաստանում այս պահին առկա է կորոնավիրուսի 8 հաստատված դեպք:
16:51 - 13 մարտի, 2020
«Հայաստան» համահայկական հիմնադրամը բժշկական պարագաներ է տրամադրում առողջապահության նախարարությանը

«Հայաստան» համահայկական հիմնադրամը բժշկական պարագաներ է տրամադրում առողջապահության նախարարությանը

«Հայաստան» համահայկական հիմնադրամի ԱՄՆ–ի արևմտյան շրջանի  գրասենյակը արձագանքել է ՀՀ Առողջապահության նախարարության և Սփյուռքի գործերի գլխավոր հանձնակատարի գրասենյակի խնդրանքին և  Հայաստան է ուղարկել մեծաքանակ բժշկական պարագաներ: Այս մասին հայտնեցին «Հայաստան« համահայկական հիմնադրամից: Այս նախաձեռնությունը իրականություն է դարձել «Chevy Chase Surgery Center»-ի և «Հայ օգնություն միություն» բարեգործական կազմակերպության հետ սերտ համագործակցության շնորհիվ։ Նոր կորոնավիրուսի (COVID-19) տարածման վտանգը կանխելու, իսկ տարածման պարագայում իրավիճակը վերահսկելի դարձնելու նպատակով Հայաստան է ուղարկվել մեծ քանակով կանխարգելիչ, պաշտպանիչ, ինչպես նաև ախտահանիչ բժշկական պարագաներ, ներառյալ՝ բժշկական պաշտպանիչ հանդերձանք, դեմքի ռեսպիրատորային դիմակներ, ախտահարիչ հեղուկների համար հատուկ շշեր, ախտահանիչներ, պաշտպանիչ ակնոցներ, թվային ջերմաչափեր և այլ միջոցներ: Փետրվարի 28-ին Հայաստանում գրանցվեց կորոնավիրուսով վարակվածության առաջին դեպքը, իսկ ներկայիս դրությամբ արձանագրվել է կորոնավիրուսի 6 դեպք: Հիշեցնենք, որ Առողջապահության համաշխարհային կազմակերպությունը կորոնավիրուսը հայտարարել է համաշխարհային համաճարակ։  Առողջապահության նախարարությունը ձեռնարկում է համապատասխան միջոցներ Հայաստանում վիրուսի հնարավոր տարածումը կանխելու համար: «Ուրախ ենք Առողջապահության նախարարության հետ մեր հերթական արդյունավետ համագործակցության համար: ԱՄՆ–ում արևմտյան շրջանի մեր տեղական մարմնի ջանքերի շնորհիվ՝ սեղմ ժամանակահատվածում կարողացանք ապահովել անհրաժեշտ պարագաների մուտքը Հայաստան», նշում է Հայաստան համահայկական հիմնադրամի գործադիր տնօրեն Հայկակ Արշամյանը: Նշենք որ հիմնադրամը բազում առողջապահական ծրագրեր է իրականացնում: Ամեն տարի ԱՄՆ–ից բժշկական առաքելություն է այցելում Հայաստան և Արցախ  իրականացնելու բազում վիրահատություններ, խորհրդատվություն, ինչպես նաև արդի սարքավորումներով և դեղորայքով են զինվում տեղական բուժկենտրոնները: Հիմնադրամի կայքում առցանց գործում է նաև «Առողջ Հայաստան» դրամահավաք արշավի հարթակը, որի շրջանակներում նախատեսվում է բարձրորակ բժշկական ծառայություններ տրամադրել Հայաստանի հեռավոր համայնքներին՝ խթանելով գյուղական բժշկությունը: ––– ՀՀՀ առաքելությունը համահայկական ցանցային համակարգի ձևավորում է, որի նպատակը Հայաստանի, Արցախի, ինչպես նաև աշխարհասփյուռ հայկական համայնքների համաչափ, կայուն և փոխկապակցված զարգացման ապահովում է՝ հիմնվելով ընդհանուր ինքնության վրա։
16:16 - 13 մարտի, 2020
Հայաստանում կորոնավիրուսով վարակված 6 մարդուց 5-ն իրենց լավ են զգում և լուրջ սիմպտոմներ չունեն, մեկ անձի մոտ առկա է թոքաբորբ |tert.am|

Հայաստանում կորոնավիրուսով վարակված 6 մարդուց 5-ն իրենց լավ են զգում և լուրջ սիմպտոմներ չունեն, մեկ անձի մոտ առկա է թոքաբորբ |tert.am|

tert.am: Վարչապետ Նիկոլ Փաշինյանի գլխավորությամբ կառավարությունում տեղի է ունեցել խորհրդակցություն, որի ընթացքում քննարկվել է Հայաստանի Հանրապետությունում կորոնավիրուսի տարածումը կանխարգելելուն ուղղված միջոցառումների ընթացքը: Առողջապահության նախարար Արսեն Թորոսյանը ներկայացրել է Հայաստանում, նաև աշխարհում և տարածաշրջանում կորոնավիրուսի տարածվածության վերաբերյալ ընթացիկ վիճակագրական տվյալները: Նրա խոսքով՝ մեր երկրում կորոնավիրուսով վարակվել է 6 մարդ, նրանցից 5-ն իրենց լավ են զգում և լուրջ սիմպտոմներ չունեն, մեկ անձի մոտ առկա է թոքաբորբ, սակայն առողջական վիճակի վատթարացում չի արձանագրվել: Նախարարը նշել է, որ երեկվանից համապատասխան քայլեր են իրականացվել կորոնավիրուսով վարակվածների հետ շփված անձանց շրջանակը պարզելու և մեկուսացնելու ուղղությամբ:  Առողջապահության նախարարը հավելել է, որ դեղորայքի և բժշկական պարագաների դեֆիցիտ պետությունը չունի, առկա է նաև դիմակների պահուստավորված անհրաժեշտ խմբաքանակ, որի միջոցով էլ բժշկական հաստատությունները համալրվում են: Միաժամանակ, նշվել է, որ քայլեր են ձեռնարկվում դիմակների նոր խմբաքանակ ներկրելու ուղղությամբ: Նախարարն ընդգծել է, որ փողոցում դիմակ կրելու անհրաժեշտություն չկա, դա անելու անհրաժեշտություն ունի այն մարդը, ով ունի հիվանդության ախտանշաններ և նա, ով շփվում է հիվանդի հետ:   Արսեն Թորոսյանը տեղեկացրել է, որ այսօր կհետազոտվեն դեռևս մարտի 1-ին մեկուսացված մեր հայրենակիցները և մեծ է հավանականությունը, որ արդյունքները կլինեն բացասական, այսինքն` նրանց մոտ կորոնավիրուս չի ախտորոշվի: Խորհրդակցության ընթացքում քննարկվել են կորոնավիրուսի դեմ պայքարի ուղղությամբ տարվող ոլորտային աշխատանքները և հետագա քայլերը: Որոշում է կայացվել մինչև մարտի 23-ը դադարեցնել նախակրթարանների, դպրոցների, և բուհերի գործունեությունը: «Մարտի 18-19-ին մենք ևս մեկ անգամ կանդրադառնանք խնդրին, և եթե լինի անհրաժեշտություն, ժամկետը կրկին կհետաձգենք: Խնդրում ենք, կոչ ենք անում հնարավորինս խուսափել զանգվածային միջոցառումներին մասնակցելուց ու կազմակերպելուց, առավել ևս մեր այն հայրենակիցներին, որոնք ունեն որևէ ախտանշան, որ կարող է նրանց մոտ վարակվածության դեպք արձանագրվել: Կորոնավիրուսի կանխարգելման հանձնաժողովն ամենօրյա ռեժիմով աշխատում է, այսօր էլ նիստ տեղի կունենա: Ամենժամյա ռեժիմով հետևում ենք իրադարձությունների զարգացմանը: Որևէ որոշման վերանայման անհրաժեշտություն եթե լինի, թեկուզ կես, մեկ կամ երկու ժամ հետո, մենք դա կանենք: Մեզ համար մեծագույն խնդիրը ոչ միայն որոշում կայացնելն է, այլ որ այդ որոշումները լինեն մաքսիմալ արդյունավետ»,- նշել է վարչապետ Փաշինյանը՝ ավելացնելով, որ կորոնավիրուսի տարածումը կանխարգելելու լավագույն միջոցը յուրաքանչյուրի անհատական գիտակցումն է և պատասխանատվությունը: Վարչապետը հորդորել է քաղաքացիներին հետևել պաշտոնական տեղեկատվությանը և չվստահել սոցցանցերում շրջանառվող չստուգված և կեղծ լուրերին:
14:59 - 13 մարտի, 2020
Չեղարկվել են 5 մեծ տուրիստական խմբերի ամրագրումներ. Մարտի 26-ին սպասվող Մեմինգեն-Գյումրի առաջին թռիչքը կարող է չեղարկվել |aysor.am|

Չեղարկվել են 5 մեծ տուրիստական խմբերի ամրագրումներ. Մարտի 26-ին սպասվող Մեմինգեն-Գյումրի առաջին թռիչքը կարող է չեղարկվել |aysor.am|

aysor.am: Գյումրիում 20 և ավելի հյուրանոցային ամրագրումներ չեղարկվել են կորոնավիրուսի պատճառով, ասաց Շիրակի մարզի տուրիզմի զարգացման կենտրոնի տնօրեն Նաիրա Գրիգորյանը: Վերջինս նշեց, որ հարցումներ են ուղարկվել հյուրանոցներ և հյուրատներ պարզելու, թե որքան ամրագրում է չեղարկվել:Արդյունքը հետևյալն է ստացվել. «Հարցված 17 հյուրանոցներից 6-ի մոտ մեկ ամսվա կտրվածքով ամրագրում չի գրանցվել, մնացածի մոտ ակնհայտ պասիվ է: Ընդհանուր չեղարկվել են 5 մեծ տուրիստական խմբերի ամրագրումներ, 2 փոքր խմբեր։ Անհատական անձանց կողմից չեղարկվել են 20 և ավելի ամրագրումներ` պատճառաբանելով կորոնավիրուսի առկայությունը։ Մնացած բոլոր ամրագրումները չեղարկվել են օնլայն տիրույթում առանց պատճառաբանության։ Ամրագրումները հիմնականում կատարվել են ՌԴ-ից, Ավստրիայից, Գերմանիայից, ՀՀ-ից: Հարցված 20 հյուրատներից և B&B-ներից, շատերը ինքնակամ փակել են իրենց հյուրատները` կապված վիրուսի տարծման հետ։ Հարցվածներից 7-ի մոտ տուրիստական պասիվությունը զգացվել է տարվա սկզբից։ Ամրագրումները հիմնականում չեղարկվել են օնլայն տիրույթում առանց պատճառաբանության։ Ամրագրումները հիմնականում կատարվել են ՌԴ-ից, Հնդկաստանից, Թաիլանդից, ՀՀ-ից»: Նաիրա Գրիգորյանը նկատեց՝ մտավախություն կա, որ կարող է չեղարկվել նաև մարտի 26-ին Ryanair ավիաընկերության Գերմանիայի Մեմինգեն քաղաքից առաջին չվերթը դեպի Գյումրի, քանի որ Իտալիայից ժամանելու փոխարեն մարդիկ կարող են ժամանել Գերմանիայով: «Եթե Իտալիայից գային Հայաստան, միանգամից կիզոլացվեին, հիմա կարող են Գերմանիայով գալ», - ասաց վերջինս՝ հավելելով. «Իտալիայից եկածները երկու շաբաթ կարանտինի մեջ են լինում, դրա համար հիմա շատերը խուսափում են միանգամից Իտալիայից գալ», - ասաց նա:     Մարտի 13-ի դրությամբ Հայաստանում կորոնավիրուսով վարակման վեց դեպք է հաստատված: 
14:43 - 13 մարտի, 2020
Բանակը կորոնավիրուսից զերծ պահելու համար ամեն ինչ անում ենք․ զինծառայողների մոտ խուճապ չկա |24news.am|

Բանակը կորոնավիրուսից զերծ պահելու համար ամեն ինչ անում ենք․ զինծառայողների մոտ խուճապ չկա |24news.am|

24news.am: «Կորոնավիրուսով պայմանավորված՝ ԶՈւ-ում իրականացվում են բոլոր անհրաժեշտ միջոցառումները: Զինծառայողների մոտ որևէ խուճապ չկա։ Էապես սահմանափակվել են քաղաքացիական անձանց մուտքը զորամասեր, նույնիսկ՝ ՊՆ վարչական համալիր»,-այդ մասին նշեց ՊՆ տեղեկատվության և հասարակայնության հետ կապերի վարչության պետ Գևորգ Ալթունյանը։ «Փորձում ենք այնպես անել, որ զինծառայողների շփումն այլ անձանց հետ սահամանափակվի։ Հորդորում ենք, որ զինծառայողների և հարազատների միջև տեսակցություններ չկատարվեն, նույնիսկ հետաձգվել են զորամասերում նախատեսված բոլոր միջոցառումները», - հայտնեց Ալթունյանը։ «Վստահաբար կարող եմ ասել, որ բոլոր միջոցառումներն իրականացվում են բանակը կորոնավիրուսից զերծ պահելու համար։ ԶՈւ-ն ապահովված է կորոնավիրուսի թեստերով և անհրաժեշտ պարագաներով», - հավելեց ՊՆ տեղեկատվության և հասարակայնության հետ կապերի վարչության պետը։
14:32 - 13 մարտի, 2020
ԿԲ-ն բանկերին պետք է հորդորի առնվազն երեք ամսով բոլոր բիզնես վարկերը սառեցնել. Էդմոն Մարուքյան |aysor.am|

ԿԲ-ն բանկերին պետք է հորդորի առնվազն երեք ամսով բոլոր բիզնես վարկերը սառեցնել. Էդմոն Մարուքյան |aysor.am|

aysor.am:   ԱԺ «Լուսավոր Հայաստան» խմբակցության ղեկավար Էդմոն Մարուքյանը դիմել է Կենտրոնական բանկի նախագահին՝ վարկերի մարումը երեք ամսով հետաձգելու առաջարկությամբ։ Ֆեյսբուքյան ուղիղ եթերի ժամանակ նա նշել է.«Բազմաթիվ զանգեր ենք ստանում քաղաքացիներից, օրինակ՝ դպրոցներում «վինետկաներ» պատրաստող մի ֆոտոնկարիչ դիմել է ինձ։ Նա այդ գործի համար վարկ ունի վերցրած, փոքր բիզնես ունի։ Հիմա մարդն ասում է՝ քանի որ դպրոցները փակվել են, ինքը չի կարող լուսանկարել, բայց վարկի օրը մոտ է։ Նույնը՝ վարկով մեքենա վերցրած, տուրիստներ տեղափոխողները, փոքր հյուրատներ ու սննդի կետեր ունեցողները։ Ուզենք, թե չուզենք՝ մեր տնտեսությունը պետք է վերափոխումների ենթարկվի։Ես չէի ուզի, որ որևէ մեկը մտներ բանկերի սև ցուցակի մեջ։ Ես գրություն եմ պատրաստել ԿԲ նախագահի անունով։ Նպատակս այն է, որ ԿԲ նախագահը, ԿԲ խորհրդի հետ միասին, քննարկեն այս հարցը և Հայաստանում գործող բոլոր կոմերցիոն բանկերին, վարկային կազմակերպություններին հորդորեն, որ առնվազն երեք ամսով բոլոր բիզնես վարկերը սառեցվեն՝ մինչև կյանքը հունի մեջ կընկնի, և տնտեսությունը կսկսի գործել»։
14:29 - 13 մարտի, 2020
Կորոնավիրոսով վարակված Էջմիածնի քաղաքացին թաքցրել է ջերմելու փաստը |panarmenian.net|

Կորոնավիրոսով վարակված Էջմիածնի քաղաքացին թաքցրել է ջերմելու փաստը |panarmenian.net|

panarmenian.net: Իտալիայից Էջմիածին վերադարձած և կորոնավիրուսով վարակված ՀՀ քաղաքացին թաքցրել է ջերմություն ունենալու փաստը ու մասնակցել հարազատի նշանադրությանը, ֆեյսբուքյան ուղիղ եթերում հայտարարել է վարչապետ Նիկոլ Փաշինյանը: Էջմիածին վերադարձած քաղաքացու և ևս 2 հոգու մոտ կորոնավիրուս էր հաստատվել մարտի 11-ին, մեկ օր անց՝ այդ քաղաքացու ընտանիքի երկու անդամի մոտ ևս հաստատվել էր վիրուսը: Վարչապետը նշել է, որ փաստացի մեկ ընտանիքի 3 անդամ վարակվել է կորոնավիրուսով, մեկ գերդաստան մեկուսացվել է: Փաշինյանը նաև դեպքից մանրամասներ է պատմել. «Քաղաքացին ոչ միայն պետությունից է թաքցնում ջերմությունը բարձր լինելու հանգամանքը, այլև ընտանիքից, քանի որ մեր հասկանալի ավանդույթի համաձայն շատ կարևոր է հարազատի նշանադրության արարողությունը: Ըստ էության նաև, եթե շատ կոպիտ ասենք, այդ ընթացքում կաթիլային է ընդունում և, կոպիտ ասած՝ «սիստեմայի տակից» դուրս գալով, վճռական որոշում է կայացնում մասնակցելու հարազատի նշանադրության արարողությանը՝ այդ ընթացքում շփվելով վարսավիրի, ոսկերչի հետ»,- ասել է վարչապետը՝ հավելելով, որ դեպքը պատմում է իրավիճակը վերլուծելու, ոչ թե որևէ քաղաքացու մեղադրելու կամ վերապահում ներկայացնելու համար: Փաշինյանը նշել է, որ նշանադրության մասնակիցները՝ այդ թվում վարսավիրն ու ոսկերիչը, մեկուսացված են: «Մենք, ըստ էության, ունենում ենք այսպիսի ճգնաժամային իրավիճակ, երբ նրա մորաքրոջ տղան և ամուսինն արդեն հաստատապես վարակված են, իսկ նշանադրության մասնակիցները՝ այդ թվում վարսավիրը, ոսկերիչը՝ մեկուսացված»,- պատմել է Փաշինյանը: Վարչապետը նշել է, որ այս դեպքը կանխարգելելու միակ տարբերակը անհատի, մարդու անհատական պատասխանատվությունն է: ՀՀ-ում կորոնավիրուսով վարակման 6 դեպք կա:
14:09 - 13 մարտի, 2020
Չոր հազ, հևոց, ջերմություն. մասնագետները հորդորում են նման ախտանշանների դեպքում դիմել բժշկի |armenpress.am|

Չոր հազ, հևոց, ջերմություն. մասնագետները հորդորում են նման ախտանշանների դեպքում դիմել բժշկի |armenpress.am|

armenpress.am: Ջերմություն, չոր հազ, հևոց. սրանք կորոնավիրուսի հիմնական ախտանշաններ են: Մասնագետները հորդորում են նման ախտանշանների դեպքում ինքնաբուժությամբ չզբաղվել և անմիջապես կապ հաստատել տարածքային բժիշկների հետ: ԱՆ հիվանդությունների վերահսկման եւ կանխարգելման ազգային կենտրոնի գլխավոր տնօրենի տեղակալ Լիլիթ Ավետիսյանը նշեց, որ շնչառական վարակների ցանկացած ախտանշանների դեպքում  կարիք կա անձին հետազոտելու և  հասկանալու, թե դրանք ինչի հետևանք են: «Կորոնավիրուսը,  ի տարբերություն մյուս շնչառական վարակների, ընթանում է չոր, ոչ խորխային հազով, և այս դեպքում թոքաբորբն ավելի դանդաղ է զարգանում: Հետևաբար, ախտանշանների դեպքում մենք բոլորին խնդրում ենք, հորդորում ենք, որ հնարավորինս շուտ դիմեն բժիշկներին, ինքնաբուժությամբ չզբաղվեն, ինչը վտանգավոր է: Բժշկի զննելուց և նշանակումից հետո նոր միայն պետք է բուժում ստանալ»,-ասաց Լիլիթ Ավետիսյանը: Նա ընդգծեց, որ եթե մարդիկ ունեն ճամփորդական փորձ, այսինքն՝ եղել են այն երկրներում, որտեղ կորոնավիրուսի համաճարակային իրավիճակը լարված է, ապա անպայման հետևեն իրենց ջերմությանը: «Եթե տեսնում են, որ ունեն ջերմություն, ապա պետք է տեղեկացնել բժշկին: Ջերմություն ունենալու դեպքում չպետք է ընդունել ջերմությունն իջեցնող դեղեր: Բժիշկը պետք է գնահատի անձի առողջական իրավիճակը և, անհրաժեշտության դեպքում, բուժում նշանակի: Հայաստան վերադարձողների հետ մասնագետները կապի մեջ են, եթե կլինեն այնպիսի արտահայտված կլինիկական նշաններ, որոնք անհանգստացնող են, ապա անձը կուղղորդվի ինֆեկցիոն հիվանդանոց՝ մասնագիտացված բժշկական օգնություն ստանալու համար»,-ասաց Լիլիթ Ավետիսյանը: Ինչ վերաբերում է այն քաղաքացիներին, որոնք վերջին շրջանում ճամփորդական փորձ չունեն, ապա Լիլիթ Ավետիսյանը նշեց, որ այս դեպքում նույնպես անհրաժեշտ է հենց առաջին իսկ նախանշաններից դիմել բժշկի: «Պետք է առաջին հերթին զանգահարել բժշկին, ներկայացնել խնդիրը և ստանալ համապատասխան ցուցումներ: Հիշեցնեմ, որ պոլիկլինիկաներում գործում է նաև կանչերի ինստիտուտը, անհրաժեշտության դեպքում բժիշկը կմոտենա»,-ասաց նա:
13:51 - 13 մարտի, 2020
Ուղևորահոսքի այսպիսի նվազում երբևէ չի եղել. Ռևազյանը՝ կորոնավիրուսով պայմանավորված իրավիճակի մասին |armenpress.am|

Ուղևորահոսքի այսպիսի նվազում երբևէ չի եղել. Ռևազյանը՝ կորոնավիրուսով պայմանավորված իրավիճակի մասին |armenpress.am|

armenpress.am: ՀՀ քաղաքացիական ավիացիայի կոմիտեի նախագահ Տաթևիկ Ռևազյանը Հայաստանում կորոնավիրուսով պայմանավորված ուղևորահոսքի զգալի նվազում է նկատում, դրա վնասների մասին խոսելը, սակայն, դեռ վաղ է համարում: Ռևազյանն այս մասին ասաց Կորոնավիրուսի տարածումը կանխարգելող հանձնաժողովի նիստից հետո լրագրողներից հետ զրույցում: «Շատ շուտ է ասել, թե ինչ վնասներ կլինեն, սակայն նման բան երբևէ չի եղել ամբողջ աշխարհում: Այսպիսի հոսքի նվազում երբևէ չի եղել: Տարբեր մասնագետներ դա համեմատում են Երկրորդ համաշխարհայինի հետ»,-ասաց նա ու նկատեց, որ տնտեսությունն իսկապես կախված է այդ ուղևորահոսքից: Նա նշեց՝ իրոք շատ կտրուկ նվազում կա, սակայն խնդիրը միայն Հայաստանում չէ: Մյուս պետությունները շատ ավելի մեծ վնաս են կրել: Այսօրվա դրությամբ չվերթները չեղարկել է «RyanAir»-ը, «Wizair»-ից չեղարկում չի եղել: «Շատ լուրջ չեղարկումներ չկան,սակայն  ուղևորահոսքը հաստատ նվազել է»,-ասաց Ռևազյանը: Անդրադառնալով կորոնավիրուսի առումով ռիսկային երկրների հետ օդային սահմանը փակելու վերաբերյալ հարցին՝ նա արձագանքեց. «Դա թվում է մի քայլ, որը կլուծի մեր բոլոր խնդիրները, սակայն կարող է խնդիրը լրջացնել: Ուղևորները, որոնք արդեն եկել են, եթե գային տարանցիկ ուղիներով, շատ ավելի բարդ կլիներ իրավիճակը: Մենք ունենք ուղիղ չվերթներ, կարող ենք միջոցառումներ կազմակերպել օդանավակայանում, որ իրենք տարանջատված լինեն մնացած ուղևորներից: Տարանցիկի հարցը շատ ավելի բարդ է»,-ասաց Ռևազյանը:
13:49 - 13 մարտի, 2020