ՊԵԿ - infocom.am

ՊԵԿ

ՀՀ կառավարությանն առընթեր պետական եկամուտների կոմիտեն 2008-2014 թթ. և 2016 թ. մարտի 1-ից գործող հանրապետական գործադիր մարմին է, որն իր իրավասության սահմաններում ապահովում է պետական բյուջեի մուտքերը և հարկային ու մաքսային վարչարարությունը։ Կոմիտեում գործում են հարկային և մաքսային ծառայությունները։

Ներկայումս, Պետական եկամուտների կոմիտեի նախագահի պաշտոնը զբաղեցնում է Էդվարդ Հովհաննիսյանը։

Իրազեկում ռազմական դրության ժամանակահատվածում սահմանված հարկային արտոնությունների վերաբերյալ

Պետական եկամուտների կոմիտեն հայտնում է, որ ՀՀ ԱԺ կողմից 2020թ. հոկտեմբերի 21-ին ընդունվել է «Ռազմական դրության ժամանակահատվածում հարկային արտոնություններ սահմանելու մասին» ՀՀ օրենքը, որով սահմանվել են հարկային արտոնություններ: Օրենքն ուժի մեջ է պաշտոնական հրապարակման օրվան հաջորդող օրվանից և տարածվում է 2020թ. սեպտեմբերի 27-ից հետո ծագած հարաբերությունների վրա: Արտոնությունները վերաբերում են ռազմական դրության ժամանակահատվածում ՀՀ պաշտպանության, արտակարգ իրավիճակների, տարածքային կառավարման և ենթակառուցվածքների, բարձր տեխնոլոգիական արդյունաբերության և (կամ) առողջապահության նախարարություններին ապրանքների անհատույց (նվիրատվությամբ) մատակարարումներին՝ 1) ռազմական դրության ժամանակահատվածում ԵԱՏՄ անդամ հանդիսացող պետություններից Կառավարության սահմանած ցանկում ներառված ապրանքների ներմուծումն ազատվում է ԱԱՀ-ից, ակցիզային հարկից և բնապահպանական հարկից, եթե այդ ապրանքներն անհատույց (նվիրատվությամբ) մատակարարվում են վերոնշյալ նախարարություններին, 2) ռազմական դրության ժամանակահատվածում Կառավարության սահմանած ցանկում ներառված ապրանքների անհատույց (նվիրատվությամբ) մատակարարման գործարքներին վերագրվող ձեռքբերումների մասով ԱԱՀ-ի գումարները ենթակա են հաշվանցման՝ ԱԱՀ վճարողներն այդ ձեռքբերումների մասով հաշվանցման ենթակա ԱԱՀ-ի գումարների նվազեցումներ և (կամ) վերաձևակերպումներ չեն կատարում, 3) օրենքն ուժի մեջ մտնելուց հետո` 10 օրվա ընթացքում Կառավարությունը կսահմանի ապրանքատեսակների ցանկը, որոնց մասով պետք է կիրառվեն նշված կարգավորումները, իսկ 2020թ. սեպտեմբերի 27-ից մինչև ցանկի սահմանումը դրանք կիրառվելու են ՀՀ պաշտպանության, արտակարգ իրավիճակների, տարածքային կառավարման և ենթակառուցվածքների, բարձր տեխնոլոգիական արդյունաբերության և (կամ) առողջապահության նախարարություններին անհատույց (նվիրատվությամբ) մատակարարված բոլոր ապրանքների մասով, 4) ապրանքների անհատույց (նվիրատվությամբ) մատակարարումների փաստը հավաստվում է կազմակերպությունների, անհատ ձեռնարկատերերի կամ նոտարների կողմից սահմանված կարգով դուրս գրված` ստացող նախարարության կողմից վավերացված հաշիվ վավերագրերով, իսկ անհատ ձեռնարկատեր չհամարվող ֆիզիկական անձանց մասով՝ կողմերի միջև օրենսդրությամբ սահմանված կարգով կազմված այլ փաստաթղթերով, 5) կազմակերպությունների և անհատ ձեռնարկատերերի կողմից ռազմական դրության ժամանակահատվածում ՀՀ պաշտպանության, արտակարգ իրավիճակների, տարածքային կառավարման և ենթակառուցվածքների, բարձր տեխնոլոգիական արդյունաբերության և (կամ) առողջապահության նախարարություններին անհատույց (նվիրատվությամբ) մատակարարվող դրոշմավորման ենթակա ապրանքներն ակցիզային դրոշմանիշներով կամ դրոշմապիտակներով դրոշմավորման ենթակա չեն: Ռազմական դրության ժամանակահատվածում դրոշմավորված ապրանքներ հանձնելու դեպքում դրա վերաբերյալ համապատասխան նշում է կատարվում անհատույց (նվիրատվությամբ) մատակարարումների փաստը հավաստող փաստաթղթում։ Օրենքով սահմանված կարգավորումների կիրառման առումով Պետական եկամուտների կոմիտեն տեղեկացնում է, որ ԵԱՏՄ անդամ հանդիսացող պետություններից ապրանքների ներմուծման մասով մինչև ապրանքները ներմուծելու (ՀՀ պետական սահմանը հատելու) օրն ընդգրկող ամսվան հաջորդող ամսվա 20-ը ներառյալ հարկային մարմին պետք է ներկայացվեն` -կազմակերպությունների և անհատ ձեռնարկատերերի կողմից ներմուծման հարկային հայտարարագիր, ապրանքների ներմուծման և անուղղակի հարկերի վճարման մասին հայտարարություն, -անհատ ձեռնարկատեր չհամարվող ֆիզիկական անձանց կողմից ներմուծման հարկային հայտարարագիր Կառավարության 13.02.2020թ. N171-Ն որոշմամբ սահմանված ակնհայտ առևտրային չափաքանակները գերազանցող ապրանքների մասով։ Ապրանքների ներմուծման մասով արտոնության կիրառումը հիմնավորելու նպատակով հարկային մարմին ներկայացվող ներմուծման հարկային հայտարարագրին անհրաժեշտ կլինի կցել հարկ վճարողի կողմից սահմանված կարգով դուրս գրված (կազմված)` ստացող նախարարություն կողմից վավերացված հաշվարկային փաստաթուղթը: Պետական եկամուտների կոմիտեն պատրաստակամություն է հայտնում աշխատանքային կարգով օժանդակել հարկ վճարողներին և ֆիզիկական անձանց՝ արտոնության կիրառման շրջանակում հայտարարագիր ներկայացնելու կարգի և պայմանների հետ կապված բոլոր հարցերում: Լրացուցիչ հարցերի դեպքում կարող եք դիմել ՀՀ պետական եկամուտների կոմիտեի հեռախոսազանգերի կենտրոն՝ 060 544 444 կամ 0 8000 0007 հեռախոսահամարներով։

18:12 - 22 հոկտեմբերի, 2020

Սփյուռքից Հայաստան օգնություն ուղարկելու որևէ խոչընդոտ չկա․ ազատամարտիկի դժգոհության հետքերով |fip.am|

fip.am: «Ֆիդայիներ» ՀԿ նախագահ Սեյրան Չիլինգարյանը ֆեյսբուքյան իր էջում դժգոհել էր, որ ազատամարտիկների համար Ֆրանսիայից դեղեր են ուղարկել, սակայն մաքսակետում խնդիրներ են ստեղծում։ «Ամոթ ձեզ, եթե պետք է այս օրով օրենք ման գաք դեղերի վրա՝ ազատամարտիկի համար…»,- նշել էր նա։ Այս բողոք-հայտարարությունը, բացի սոցցանցերում ակտիվորեն տարածվելուց, հրապարակվել էր նաև որոշ կայքերում։ ՊԵԿ-ից պարզաբանում են՝ Սփյուռքից ուղարկված ցանկացած օգնություն անմիջապես, առանց խոչընդոտի տեղ է հասնում Պետական եկամուտների կոմիտեի մամուլի խոսնակ Լուսինե Մկրտչյանը Fip.am-ի հետ զրույցում պնդեց, որ մաքսային մարմիններն ամեն ինչ անում են, որ ռազմաճակատի և բանակի համար ուղարկված օգնությունն օր առաջ տեղ հասնի։ «Ցանկացած օգնություն, որ գալիս է այս պատերազմական օրերին, անմիջապես արձագանք է ստանում։ Սփյուռքի գրասենյակի հետ համատեղ աշխատում ենք օրուգիշեր, օպերատիվ կազմակերպվում են մաքսային ձևակերպումները, որ գնան տեղ հասնեն, եթե դա նախատեսված է ռազմաճակատի համար։ Բայց եթե անձնական օգտագործման համար են, դեղ ու դեղորայքն ունեն կարգավորում. երեք անուն դեղորայք-դեղից յուրաքանչյուրը 10 տուփ կարող է առանց ձևակերպման դուրս բերվել, մնացածը մաքսային ընթացակարգով է»,- ասաց նա։ ՊԵԿ խոսնակն անդրադարձավ նաև կոնկրետ տարածվող տեսանյութին և հաստատեց, որ նշված դեղորայքը՝ 5 կգ բեռով, դուրս է գրվել Ֆրանսիայից և փոստային կապի միջոցով ուղարկվել է դեռ սեպտեմբերի 23-ին, երբ պատերազմական իրավիճակ չէր էլ եղել։ «Մենք հայտարարություն ենք տարածել, որ փոստով Հայաստան եկած դեղերն ունեն հստակ ընթացակարգ, բայց դա էլ մի կողմ թողած, հաշվի առնելով, որ նման իրավիճակ է, և եկել հասել է, չենք ուզում խնդիր առաջացնել և էլի պատրաստ ենք բեռը տալ, եթե Առողջապահության նախարարությունից թույլտվություն ներկայացվի։ Դեղորայքի հետ կապված ցանկացած վերահսկողություն Առողջապահության նախարարությունն է համակարգում՝ ի՞նչ դեղորայք է մտնում երկիր, ի՞նչ պարունակության, և տալիս համապատասխան թույլտվություն։ Մաքսայինի հետ այստեղ որևէ խնդիր չկա, եթե այդ անձը նշված թույլտվությունը կստանա և կներկայացնի, կստանա նաև բեռը։ Այսօր այդչափ արդեն գործընթացը պարզեցված է»,- ասաց նա։ Դեղերի ներկրումը կարգավորվում է կառավարության համապատասխան որոշմամբ Առողջապահության նախարարությունից Fip.am-ի հետ զրույցում ասացին, որ հանրապետության տարածք դեղեր, դեղանյութեր, դեղաբուսական հումք և հետազոտվող դեղագործական արտադրանք ներմուծելու և արտահանելու կարգը սահմանված է կառավարության N 202-Ն որոշմամբ։ Ընթացակարգի կարգավորման լիազոր մարմինը Առողջապահության նախարարությունն է։ Որոշման 51-րդ կետում նշվում է, որ դիմումատուի կողմից միջազգային փոստային առաքանիների միջոցով այլ երկրից ուղարկված բեռն ստանալու դեպքում մաքսային ծառայության ներկայացուցիչը «Մեկ պատուհան» էլեկտրոնային համակարգում մուտքագրում է ներմուծման մասին հայտ՝ կցելով լիազոր մարմնի նախնական թույլտվության պատճենը: Այս դեպքում խնդիրը բարձրացված անձից պահանջվել է Առողջապահության նախարարության թույլտվության պատճենը։ Ի դեպ, Առողջապահության նախարարությունից նաև հայտնեցին, որ բարձրացված խնդրի առնչությամբ իրենց հետ որևէ մեկը կապ չի հաստատել։ Սփյուռքի տարբեր համայնքներից հայրենիք օգնություն ուղարկելու ճշգրիտ ընթացակարգը Սփյուռքի գործերի գլխավոր հանձնակատարի գրասենյակի Սփյուռքի ներուժի քարտեզագրման և ներգրավման վարչության ներուժի ներգրավման բաժնի ավագ մասնագետ Ամալյա Կարապետյանը Fip.am-ին ասաց, որ հնարավոր խնդիրներից խուսափելու համար պետք է համագործակցել Սփյուռքի գործերի գլխավոր հանձնակատարի հետ։ «Այս օրերին սփյուռքի տարբեր համայնքներից հայրենիք օգնություն ուղարկելիս հնարավոր խնդիրներից խուսափելու և ճշգրիտ ընթացակարգով առաջնորդվելու համար խնդրում ենք կապ հաստատել Սփյուռքի գործերի գլխավոր հանձնակատարի գրասենյակի հետ (հեռ.՝ (+37410) 58-91-55, էլ. փոստ` [email protected], ֆբ էջ): Օգնությունը կարող է հասցեագրվել ինչպես ՀՀ որոշ գերատեսչությունների, այնպես էլ ֆիզիկական անձանց կամ հասարակական կազմակերպությունների, և գործընթացը հնարավորինս անխոչընդոտ և համակարգված կազմակերպելու համար Սփյուռքի գործերի գլխավոր հանձնակատարի հետ համագործակցությունն անհրաժեշտ է»,-նշում են հանձնակատարի գրասենյակից: Այսպիսով, կարող ենք արձանագրել, որ Սփյուռքի տարբեր համայնքներից Հայաստան օգնություն ուղարկելու որևէ խոչընդոտ չկա։ Նելլի Լազարյան

21:03 - 06 հոկտեմբերի, 2020