Գեղարքունիքի մարզ

Հայտարարվել է Մ11-Ախպրաձոր 14,5 կմ երկարությամբ ճանապարհահատվածի վերականգնման շինարարական աշխատանքների մրցույթ

ՀՀ տարածքային կառավարման և ենթակառուցվածքների նախարարության Ճանապարհային դեպարտամենտը Համաշխարհային բանկի կողմից ֆինանսավորվող Կենսական նշանակության ճանապարհային ցանցի բարելավման ծրագրի երկրորդ լրացուցիչ ֆինանսավորում ծրագրի շրջանակներում հայտարարել է Գեղարքունիքի մարզի Մ11-Ախպրաձոր կմ 0+000-կմ 7+828 և Մ11-Ախպրաձոր կմ 7+828-կմ 14+480 ճանապարհային հատվածների վերականգնման շինարարական աշխատանքների մրցույթ։ Շուրջ 14,5 կմ երկարությամբ ճանապարհն անցնում է մարզի Ծովակ, Լճավան, Մաքենիս և Ախպրաձոր համայնքներով։Մրցույթին մասնակցել ցանկացող հայտատու կազմակերպությունները պետք է ունենան համապատասխան շինարարական աշխատանքների իրականացման փորձ և ռեսուրսներ, ինչը մանրամասն ներկայացված է մրցութային փաստաթղթերում: Հետաքրքրված իրավասու հայտատուներն ամբողջական մրցութային փաստաթղթերը կարող են ներբեռնել, ինչպես նաև մրցույթի վերաբերյալ այլ մանրամասների կարող են ծանոթանալ www.gnumner.am կամ www.armeps.am կայքերից։ Հայտերի ընդունման վերջնաժամկետը սույն թվականի մայիսի 7-ն է։

10:16 - 20 մարտի, 2020

Գեղարքունիքի մարզում կորոնավիորուսով վարակված անձ չկա. թեստը բացասական է եղել

Գեղարքունիքի մարզպետ Գնել Սանոսյանը ֆեյսբուքի իր էջում գրել է. «Գեղարքունիքի մարզի հարգելի' բնակիչներ.Ուրախ եմ տեղեկացնել, որ Գավառի մեր բնակիչը անցավ կորոնավիրուսի հետազոտման տեստը և արձանագրվեց բացսական արդյունք։Այս պահին մարզում կորոնավիրուսով վարակված կամ մեկուսացված դեպքեր չունենք։ Հետևեք միայն պաշտոնական լրահոսին, պահպանեք արտակարգ դրության կանոնները և եղեք առողջ»։

14:22 - 17 մարտի, 2020

Վերջին երկու շաբաթներին ռիսկային երկրներից Գեղարքունիքի մարզ են ժամանել 21 համաքաղաքացիներ

Երկրի մակարդակով կորոնավիրուսային վարակի բերովի դեպքերով պայմանավորված Գեղարքունիքի մարզում արտակարգ իրավիճակների արձագանքման նպատակով ստեղծվել է աշխատանքային թիմ, որի առաջին նիստը տեղի ունեցավ 2020 թվականի մարտի 12-ին, Գեղարքունիքի մարզպետարանում՝ աշխատանքային թիմի անդամների մասնակցությամբ: Հանդիպումը վարեց Գեղարքունիքի մարզպետ, աշխատանքային թիմի ղեկավար Գնել Սանոսյանը: Մարզում կորոնավիրուսով պայմանավորված դեպքերի հետ կապված իրավիճակը ներկայացրեց ՀՀ ԱՆ հիվանդությունների վերահսկման և կանխարգելման ազգային կենտրոնի Գեղարքունիքի մասնաճյուղի աշխատակից Ժաննա Մակարյանը: Նա նշեց, որ վերջին երկու շաբաթների ընթացքում ռիսկային երկրներից մարզ են ժամանել 21 համաքաղաքացիներ, որոնցից այս պահի դրությամբ հսկողության տակ են գտնվում 4-ը: Մնացած քաղաքացիները միանգամայն առողջ վիճակում են: Հրահանգված է կրթական և նախակրթական հաստատություններն ապահովել մշտական ջրով և ախտահանիչ նյութերով, բուժաշխատակիցների միջոցով ապահովված է ամենօրյա հերթապահություն և վերահսկողություն: Ինչպես նշեց թիմի անդամ, մարզպետարանի քարտուղարության ընդհանուր բաժնի պետ Սիմոն Մանուկյանը, մարզում առանձնացված են այն չորս հյուրանոցային համալիրները, որտեղ, անհրաժեշտության դեպքում, կմեկուսացվեն և բուժում կստանան հայտնաբերված հիվանդները: Աշխատանքային թիմի մյուս անդամների առաջարկությամբ՝ նպատակահարմար գտնվեց չեղարկել նախoրոք հայտարարված մասսայական բնույթի միջոցառումները և նվազագույնի հասցնել մարդկային կուտակումները և շփումները: «Մենք առաջին հերթին պետք է ի հայտ բերենք ռիսկային բոլոր վտանգները և հստակեցնենք մեր գործողությունների պլանը: Առաջին հերթին հարկավոր է այնպես անել, որ մարդկանց մոտ խուճապային տրամադրություններ չստեղծվեն: Հարկավոր է աշխատանքային ժամերից դուրս պահպանել հերթապահության ռեժիմը առաջնային առողջության պահպանման օղակում և հայտնաբերված դեպքերի մասով ձեռնարկել համապատասխան միջոցներ: Այն դպրոցներում, որտեղ բուժքույրերի կարիք է զգացվում, հարկավոր է բացը լրացնել բուժամբուլատորիաների մասնագետների հաշվին»,- նշեց Գնել Սանոսյանը, տեղեկացնում են մարզպետարանից:

10:34 - 13 մարտի, 2020

Գավառում եւ Մարտունիում բացվել են ընտանեկան բռնության ենթարկված կանանց աջակցության կենտրոններ |armenpress.am|

armenpress.am: Գեղարքունիքի մարզկենտրոն Գավառում եւ Մարտունի քաղաքում պետական աջակցությամբ բացվել եւ գործում են Ընտանեկան բռնության ենթարկված կանանց աջակցության կենտրոններ: Այս մասին Գեղարքունիքի մարզպետ Գնել Սանոսյանի մոտ հրավիրված հանդիպման ժամանակ հավաստեց «Մարտունու կանանց համայնքային խորհուրդ» հասարակական կազմակերպության նախագահ, նորաստեղծ կենտրոնների գործունեության համակարգող Անահիտ Գեւորգյանը: «Ընտանեկան բռնության ենթարկված կանանց աջակցության մարզային նորաբաց կենտրոնների նպատակն է աջակցություն ցուցաբերել ընտանեկան բռնության ենթարկված կանանց և երեխաներին, նրանց անվճար հիմունքներով տրամադրել ապաստարաններ, իրավաբանական, հոգեբանական, փաստաբանական ուղղորդումներ: Աշխատանքները կենտրոններում իրականացվում են հոգեբանի, իրավաբանի և սոցիալական աշխատողի միջոցով: Կենտրոններ կարող են դիմել բռնության ենթարկված անձինք, երեխաներ, որտեղ նրանք կստանան անհրաժեշտ խորհրդատվություն, աջակցություն եւ ապաստան՝ խնդիրների լուծման ընթացքում: Բոլոր տեսակի ծառայությունները մատուցվում են անվճար: Ծրագրի տեւողությունը մեկ տարի է: Այս ծրագիրը կարեւորվում է նրանով, որ ավելի ընդգրկուն կանխարգելիչ գործունեություն է ծավալում եւ լրացնում այն բացը, որն առկա է ոստիկանության անչափահասների տեսչության գործունեության մեջ: Մենք ակնկալում ենք մարզպետարանի եւ պետական այլ կառույցների աջակցությունը բռնության ենթարկված անձանց մեր կենտրոններ ուղղորդելու հարցում: Ակնկալում ենք մարզպետարանի աջակցությունը նաև մարզային ենթակայության կրթական հաստատություններում բռնության ենթարկված ծնողների հետ հանդիպումներ կազմակերպելու համար»,- նշեց Անահիտ Գևորգյանը: Գեղարքունիքի մարզպետ Գնել Սանոսյանը կարևորեց նման կենտրոնների դերը մարզի տարբեր տարածաշրջաններում, հույս հայտնելով, որ դրանք իրենց գործունեությամբ կմեղմեն ընտանեկան բռնության դեպքերը: Կողմերը պայմանավորվածություն ձեռք բերեցին` իրազեկման եւ հետագա համագործակցության նպատակով առաջիկայում կազմակերպել եւս մեկ հանդիպում, որին կմասնակցեն ընտանեկան բռնության կանխարգելման գործում շահագրգռվածություն ցուցաբերող կազմակերպությունների ներկայացուցիչները:

15:16 - 11 մարտի, 2020

Գեղարքունիքում նախորդ տարվա անորակ շինարարության դիմաց չի վճարվել երեք կազմակերպության գումարները |armenpress.am|

armenpress.am: Գեղարքունիքի մարզում նախորդ տարում իրականացված շինարարական անորակ աշխատանքների դիմաց պետությունը չի վճարել երեք կազմակերպության, որոնք չեն կատարել համապատասխան պայմանագրերով սահմանված պարտավորությունները: Այս մասին Գանձակ համայնքում, պատասխանելով բնակիչների հարցերին, հայտարարեց Գեղարքունիքի մարզպետ Գնել Սանոսյանը: «Նախորդ տարում մենք Հայաստանի Հանրապետությունում առաջինն էինք սուբվենցիոն ծրագրերի իրականացման քանակով ու ծավալներով: Միեւնույն ժամանակ անորակ շինարարության չորս դեպք է արձանագրվել մեզանում, որը, մյուս կողմից, ամենանվազն է Հայաստանում: Շինարարական բոլոր տեղամասերում մենք ժամանակին հատուկ զգուշացրել ենք բոլոր շինարարներին, որ որեւէ անորակ աշխատանքի դիմաց իրենք չեն վճարվելու: Բացի այդ, կատարել ենք այցելություններ ու դիտարկումներ, տվել համապատասխան ցուցումներ՝ նկատված թերությունները վերացնելու մասին: Այդուհանդերձ, ճանապարհաշինական չորս տեղամասերում՝ Վարդենիկում, Գանձակում, Գեղարքունիքում եւ Ճամբարակի Նադարյան փողոցում որակը չի համապատասխանել սահմանված չափորոշիչներին, ուստի եւ այդ կազմակերպությունները չեն վճարվել: Գանձակում եւ Գեղարքունիքում աշխատանքներն իրականացրել է նույն կազմակերպությունը: Մենք պարզել ենք, որ ճանապարհաշինության որակը չի ապահովվել հիմնականում երկու պատճառով. առաջին, որ ասֆալտապատման աշխատանքները կատարվել են եղանակային անբավարարության պայմաններում, եւ երկրորդ, որ մրցույթները շահած կազմակերպությունները չեն ունեցել շինարարության որակն ապահովող տեխնիկա: Կարծում եմ, որ սա դաս կլինի մյուսներին, որպեսզի չկրկնեն նույն սխալները եւ ամեն գնով ապահովեն շինարարության որակը: Մենք տարվա ընթացքում քանիցս զգուշացրել ենք Սեւան-Մարտունի-Գետափ միջպետական ճանապարհի Ծակքար-Մարտունի հատվածի ճանապարհաշինարարական կազմակերպությանը, արել համապատասխան դիտողություններ, սակայն այդպես էլ նրանց կողմից անհրաժեշտ հետեւություն չարվեց: Արդյունքում՝ այդ կազմակերպությանը չվճարվեց շուրջ 100 միլիոն դրամ: Մենք ոչ մի շինարարի կամ անձի հանդեպ կաշկանդված չենք, մեզ համար չկան արտոնյալներ, քանի որ նրանցից միայն օրենքով մի բան ենք պահանջում՝ որակյալ շինարարություն»,-նշեց Գնել Սանոսյանը:

21:11 - 10 մարտի, 2020

Արծվանիստի ներհամայնքային ճանապարհները կհիմնանորոգվեն պետական միջոցների հաշվին

Գեղարքունիքի մարզի Արծվանիստ գյուղի ներհամայնքային ճանապարհները կասֆալտապատվեն պետականի միջոցների հաշվին: Գեղարքունիքի մարզպետարանի քաղաքաշինության վարչության պետ Արմեն Զոհրաբյանի տեղեկացմամբ, ասֆալտապատվող ճանապարհների երկարությունը կազմում է շուրջ 3,3 կիլոմետր, ընդհանուր մակերեսը՝ 22 հազար քառակուսի մետր: Շինարարական աշխատանքների նախահաշվային արժեքը կազմում է 451 միլիոն դրամ, որն ամբողջությամբ հատկացվելու է պետբյուջեի միջոցներից: «Փետրվարի 28-ին արդեն հայտարարվել է շինարարական աշխատանքների իրականացման մրցույթ, որը կանցկացվի այս տարվա ապրիլին: Մրցույթի արդյունքների ամփոփումից հետո կձեռնարկվեն շինարարական աշխատանքները: Կհիմնանորոգվեն նաեւ Վանեվան պատմաճարտարապետական համալիր եւ Արծվանիստի գերեզմանոց տանող ճանապարհները: Արծվանիստի ներհամայնքային ճանապարհները հիմնանորոգման չեն ենթարկվել վերջին երեք տասնամյակներում եւ գտնվում են քարուքանդ վիճակում: Ներհամայնքային ճանապարհների հիմնանորոգումը, որի ավարտը նախատեսված է 2020 թվականի ընթացքում, անգնահատելի նվեր կլինի Արծվանիստի բնակչության համար»,-ներկայացրել է Արմեն Զոհրաբյանը:

09:25 - 04 մարտի, 2020

Ապօրինություն՝ Գեղարքունիքի մարզում․ հափշտակվել է 5 միլիոն դրամից ավելի գումար

Քրեական ոստիկանության գլխավոր վարչության կոռուպցիոն և տնտեսական հանցագործությունների դեմ պայքարի վարչությունում նախապատրաստված նյութերով փաստական տվյալներ են ձեռք բերվել Գեղարքունիքի մարզում կատարված ապօրինությունների վերաբերյալ։ Այս մասին հայտնում են ոստիկանության լրատվական ծառայությունից։ Մասնավորապես, պարզվել է, որ 2013 թվականին Գեղարքունիքի մարզպետարանի և Շորժա համայնքի ղեկավարի կողմից հիմնադրված ու փաստացի կառավարվող ընկերության միջև կնքվել է համայնքային կենտրոնի կառուցման աշխատանքների 38 միլիոն 941 հազար 580 դրամի կապալային պայմանագիր։ Փաստացի կապալառու հանդիսացող համայնքի ղեկավարը, օգտվելով Գեղարքունիքի մարզպետարանի համապատասխան պաշտոնատար անձի կողմից իր պարտականությունները ոչ պատշաճ կատարելու հետևանքով ստեղծված հնարավարությունից, օգտագործել է պաշտոնեական դիրքն ու, կազմելով աշխատանքների պատշաճ կատարման վերաբերյալ բովանդակությամբ կեղծ կատարողական ակտեր և հանձնման-ընդունման արձանագրություններ, հափշտակել է առանձնապես խոշոր չափերի՝ ընդհանուր 5 միլիոն դրամից ավելի գումար։Նյութերի նախապատրաստման ընթացքում պետությանը հասցված վնասն ամբողջությամբ վերականգնվել է։ Քրեական ոստիկանության գլխավոր վարչությունում հարուցված քրեական գործն ուղարկվել է քննչական կոմիտե։

16:12 - 03 մարտի, 2020

Սեւանա լճի ջրածածկ եւ ջրածածկման ենթակա տարածքներում իրականացվում են անտառմաքրման աշխատանքներ

Համաձայն «Սևանա լճի էկոհամակարգի վերականգնման, պահպանման, վերարտադրման, բնականոն զարգացման և օգտագործման միջոցառումների» 2020 թվականի տարեկան ծրագրի, Սևանա լճի շրջակայքում ջրածածկ և ջրածածկման ենթակա տարածքներում շարունակվում են անտառմաքրման աշխատանքները: Այս մասին տեղեկացնում է Գեղարքունիքի մարզպետարանի լրատվական ծառայությունը: Հունվարի 9-ից «Սևանա ազգային պարկ» ՊՈԱԿ-ի Ծովակի տեղամասում վերսկսվել են 2020 թվականի մաքրման աշխատանքները, որոնք իրականացվում են «Հարությունյան Շին» ՍՊԸ-ի կողմից: Աշխատանքներում ներգրավված է 16 միավոր տեխնիկա: Իրականացվող աշխատանքների ընթացքը ուսումնասիրելու նպատակով մարզպետարանի գյուղատնտեսության և բնապահպանության վարչության բնապահպանության բաժնի աշխատակիցները հերթական դիտարկումն են կատարել մաքրվող տարածքում: Նրանց տեղեկացմամբ՝ նախատեսված է մաքրել շուրջ 887 հա անտառապատ տարածք: Փետրվարի 28-ի դրությամբ մաքրվել է շուրջ 85 հա ջրածածկ տարածք: Աշխատանքներն, ըստ վարչության մասնագետների, իրականացվում են բարեխղճորեն, նախատեսված չափորոշիչներին համապատասխան: Սևանա լճի շրջակայքում ջրածածկ և ջրածածկման ենթակա տարածքներում մաքրման աշխատանքները կշարունակվեն մինչև 2022 թվականը:

09:15 - 03 մարտի, 2020

Արծվանիստի ներհամայնքային ճանապարհները կհիմնանորոգվեն պետական միջոցների հաշվին |armenpress.am|

armenpress.am: Գեղարքունիքի մարզի Արծվանիստ գյուղի ներհամայնքային ճանապարհները կասֆալտապատվեն պետականի միջոցների հաշվին: Ինչպես տեղեկացրեց Գեղարքունիքի մարզպետարանի քաղաքաշինության վարչության պետ Արմեն Զոհրաբյանը, ասֆալտապատվող ճանապարհների երկարությունը կազմում է շուրջ 3,3 կիլոմետր, ընդհանուր մակերեսը՝ 22 հազար քառակուսի մետր: Շինարարական աշխատանքների նախահաշվային արժեքը կազմում է 451 միլիոն դրամ, որն ամբողջությամբ հատկացվելու է պետբյուջեի միջոցներից: «Փետրվարի 28-ին արդեն հայտարարվել է շինարարական աշխատանքների իրականացման մրցույթ, որը կանցկացվի այս տարվա ապրիլին: Մրցույթի արդյունքների ամփոփումից հետո կձեռնարկվեն շինարարական աշխատանքները: Կհիմնանորոգվեն նաեւ Վանեվան պատմաճարտարապետական համալիր եւ Արծվանիստի գերեզմանոց տանող ճանապարհները: Արծվանիստի ներհամայնքային ճանապարհները հիմնանորոգման չեն ենթարկվել վերջին երեք տասնամյակներում եւ գտնվում են քարուքանդ վիճակում: Ներհամայնքային ճանապարհների հիմնանորոգումը, որի ավարտը նախատեսված է 2020 թվականի ընթացքում, անգնահատելի նվեր կլինի Արծվանիստի բնակչության համար»,-ներկայացրեց Արմեն Զոհրաբյանը:

22:15 - 02 մարտի, 2020

Գեղարքունիքի մարզում 5 նոր դպրոցներ կկառուցվեն |armenpress.am|

armenpress.am: Ընթացիկ տարում Գեղարքունիքի մարզում 5 նոր դպրոցներ կկառուցվեն: Հրավիրված ասուլիսում մարզպետ Գնել Սանոսյանը նշեց, որ մինչև 100 աշակերտի համար դպրոցներ կկառուցվեն Ջիլ, Շատջրեք և Լեռնահովիտ բնակավայրերում: Ավելի մեծ դպրոցներ կկառուցվեն Գեղհովիտ և Ճամբարակ համայնքներում: «Դպրոցների հետ կապված լրջագույն խնդիրներ ունենք: Հանրապետության դպրոցների մեծ մասը 1960-80-ական թվականներին են կառուցվել և հիմնականում նախատեսված են 7 բալ հզորության երկրաշարժի համար: Հիմա սեյսմիկ առումով լուրջ խնդիրներ կան: Հաջորդ հարցն այն է, որ երկար տարիներ բազմաթիվ դպրոցներ չեն սպասարկվել, ընթացիկ վերանորոգում չեն անցել, և հիմա այնպիսի է իրավիճակ է, որ որոշ դեպքերում ավելի ձեռնտու է նոր դպրոցներ կառուցելը»,-ասաց Գնել Սանոսյանը: Նրա խոսքով, սեյսմիկ խնդիրներ ունեցող դպրոցներում չեն կարողանում ջեռուցման հարցերը կարգավորել: Շատ տեղերում վառարաններով են ջեռուցումը կազմակերպում: Մարզպետը նշեց, որ դեռ 57 դպրոցում կենտրոնացված ջեռուցման համակարգեր չկան:

16:17 - 20 փետրվարի, 2020

Ակունքում սուբվենցիայի եւ տեղական միջոցների հաշվին կիրականացվեն կենսական նշանակության ծրագրեր |armenpress.am|

armenpress.am: Գեղարքունիքի մարզի Ակունք գյուղում 2020 թվականի ընթացքում նախատեսվում է ՀՀ կառավարության կողմից իրականացվող սուբվենցիոն ծրագրերի եւ տեղական միջոցների հաշվին կյանքի կոչել մի շարք կենսական նշանակության ծրագրեր: Ինչպես տեղեկացրեց Ակունքի գյուղապետ Նիկոլա Խաչատրյանը, սուբվենցիոն ծրագրերի իրականացման համար Ակունքի համայնքապետարանը հատկացնելու է շուրջ 30 միլիոն դրամ: «Սուբվենցիոն ծրագրերով նախատեսել ենք համայնքում արարողությունների սրահի եւ զբոսայգու կառուցում, Բարեկամության փողոցի մասնակի եւ Շահումյան փողոցի վերջնամասի ասֆալտապատում , տվյալ թաղամասի խմելու ջրագծի հիմնանորոգում, կոյուղիների վերանորոգում: Տեղական բյուջեի միջոցներով կամ բարերարների ու համայնքի բնակիչների աջակցությամբ նախատեսում ենք Հայոց ցեղասպանության եւ Արցախյան ազատամարտի զոհերին նվիրված հուշակոթողի կառուցում, ֆուտբոլի մեծ խաղադաշտի կանաչապատում, գերեզմանատների տարածքների պարսպապատում կամ ցանկապատում, որոշ թաղամասերում մոտ 2500 մետր ընդհանուր երկարության լուսավորության ցանցի անցկացում, եկեղեցի տանող հիմնական ճանապարհի բարեկարգում եւ բակի կառուցապատում, նոր բազմաֆունկցիոնալ տրակտորի ձեռքբերում: Այս ծրագրերի իրականացման համար մենք ունենք բավարար միջոցներ, իսկ մյուս հիմնախնդիրների կարգավորման համար քայլեր կձեռնարկենք, եթե ի հայտ գան նոր հովանավորներ, նոր միջոցներ: Բոլոր ծրագրված աշխատանքները կսկսենք ու կավարտենք 2020 թվականի ընթացքում»,-հավաստեց համայնքի ղեկավարը:

21:08 - 19 փետրվարի, 2020

Գեղարքունիքի մարզպետն ընդունեց ՀՀ կրթության տեսչական մարմնի ղեկավարին եւ ներկայացուցիչներին |armenpress.am|

armenpress.am: Գեղարքունիքի մարզպետ Գնել Սանոսյանն ընդունեց ՀՀ կրթության տեսչական մարմնի ղեկավար Ալեքսանդր Շագաֆյանին եւ տեսչական մարմնից մարզ գործուղված աշխատակիցներին: Ինչպես տեղեկացրին Գեղարքունիքի մարզպետարանի տեղեկատվության եւ հասարակայնության հետ կապերի բաժնից, հանդիպման սկզբում ՀՀ կրթության տեսչական մարմնի ղեկավարը մարզպետին տեղեկացրել է, որ 2020 թվականին, ըստ ժամանակացույցի, նախատեսված է պլանային տեսչական ստուգումներ իրականացնել մարզպետարանի ենթակայությամբ գործող Ծովազարդի, Վանեւանի, Դդմաշենի, Գանձակի թիվ 2, Սարուխանի թիվ 2, Զոլաքարի թիվ 2 միջնակարգ դպրոցներում եւ ՀՀ ԿԳՄՍ նախարարության ենթակայությամբ գործող Սևանի ավագ դպրոցում: Նշված կրթօջախներում ստուգվելու են կրթության ոլորտի իրավական ակտերը, իսկ դպրոցականների գիտելիքները ստուգելու նպատակով նրանց գրավոր աշխատանք է տրվելու հայոց լեզու, մաթեմատիկա եւ ինֆորմատիկա առարկաներից: Աշխատանքները մարզում ավելի արդյունավետ իրականացնելու եւ պլանային ստուգումների ընթացակարգին ծանոթացնելու համար կրթության տեսչական մարմնի ներկայացուցիչները նույն օրը հանդիպում կունենան նաեւ Գեղարքունիքի մարզպետարանի կրթության վարչության ներկայացուցիչների եւ մարզի հանրակրթական ուսումնական հաստատությունների տնօրենների հետ: «Դպրոցների տնօրենների հետ մեր հանդիպումը կանխարգելիչ միջոցառում կարելի է համարել: Այդ հանդիպմամբ մենք կհորդորենք, որպեսզի դպրոցներում նրանք ինքնաստուգմամբ զբաղվեն, հասկանան ոլորտում առկա խնդիրները եւ օր առաջ դրանց լուծում գտնեն, որպեսզի ստուգումների ժամանակ դրանք բացառվեն: Տեղեկացնեմ նաեւ, որ 2019 թվականին մեր տեսչական մարմնին հասցեագրված 134 դիմում-բողոքներից ընդամենը երեքն են Գեղարքունիքի մարզից եղել, ինչը նշանակում է, որ Գեղարքունիքի մարզային ենթակայության կրթական հաստատություններում խնդիրները լուծվում են տեղում, մարզպետարանի հետեւողականության շնորհիվ»,- նշել է Ալեքսանդր Շագաֆյանը: Հանդիպման ընթացքում կողմերը քննարկել են կրթության ոլորտին վերաբերող մի շարք հարցեր եւ լուծում ենթադրող խնդիրներ: Մարզպետ Գնել Սանոսյանն առաջարկել է՝ համատեղ մոտեցում ցուցաբերել նման խնդիրների կարգավորմանը: «Կրթության ոլորտում բավականաչափ անելիքներ կան եւ, բնականաբար, նաեւ՝ խնդիրներ: Մենք պատրաստ ենք մեր լիազորությունների շրջանակներում համագործակցել եւ ընդառաջել ձեր տեսչությանը ցանկացած հարցում, եթե այն կբերի հանրակրթության ոլորտում ծագած խնդիրների կարգավորմանը: Այսօր մենք բացահայտում ենք որոշ դպրոցների տնօրենների կողմից թույլ տրված մի շարք ֆինանսական խնդիրներ, որոնք հաճախ խլում են մեր կողմից կրթությանը հատկացվելիք ժամանակը: Մենք պետք է աշխատենք խնդիրներին լուծում գտնել համատեղ ուժերով եւ թույլ չտալ, որ որեւէ օրինազանց կամ իր մասնագիտությանը չտիրապետող անձ պաշտոն զբաղեցնի կրթության համակարգում»,- նշել է մարզպետ Գնել Սանոսյանը:

20:40 - 19 փետրվարի, 2020

Ավարտվել է կեղծ թղթադրամներ իրացնելու դեպքի առթիվ հարուցված քրեական գործի նախաքննությունը

ՀՀ քննչական կոմիտեի Գեղարքունիքի մարզային քննչական վարչությունում ավարտվել է կեղծ փողեր պատրաստելու, պահելու և իրացնելու դեպքի առթիվ հարուցված քրեական գործի նախաքննությունը: Քննությամբ ձեռք բերված տվյալների համաձայն՝ 2019թ. հուլիսի 20-ին՝ տարբեր ժամերի, Երևան քաղաքի 26-ամյա բնակիչը., կեղծ փողեր իրացնելու նպատակով, Սևանի թերակղզու տարածքում գտնվող ռեստորանային համալիրում Գավառ քաղաքի 44-ամյա բնակչի օժանդակությամբ, ինչպես նաև՝ Դիլիջանում գտնվող ռեստորանային համալիրում՝ միայնակ, հայտնել է, որ դրամ չունի վճարելու համար: Այնուհետև փոխանակելու միջոցով մենեջերներին իրացրել է իր մոտ եղած 500 Եվրո անվանական արժեքով 1-ական կեղծ փող, որի դիմաց վերջիններս իրենց անձնական գումարից վճարել են 250 000-ական ՀՀ դրամ գումար, իսկ 26-ամյա երիտասարդը նշված գումարից վճարել է մատուցած սննդի դիմաց և հեռացել: Բացի այդ, Երևան քաղաքի 26-ամյա բնակիչը, 500 Եվրո անվանական արժեքով կեղծ փող իրացնելու շուրջ նախնական համաձայնության գալով 44-ամյա տղամարդու հետ, 2019թ. հուլիսին Գավառ քաղաքի բնակչուհու միջոցով Երևան քաղաքի ոսկու շուկաներից մեկում գնել է 13.9գ քաշով ոսկյա զարդ՝ կրկին վճարելով կեղծ թղթադրամով: Ձեռք բերված բավարար ապացույցների հիման վրա՝ Երևան քաղաքի 26-ամյա բնակչին մեղադրանք է առաջադրվել՝ ՀՀ քրեական օրենսգրքի 202-րդ (կեղծ փողեր կամ արժեթղթեր՝ իրացնելու նպատակով պատրաստելը կամ պահելը կամ դրանք իրացնելը) հոդվածի 1-ին մասով (երկու դրվագ) և 202-րդ հոդվածի 2-րդ մասի 2-րդ կետով (կեղծ փողեր կամ արժեթղթեր՝ իրացնելու նպատակով պատրաստելը կամ պահելը կամ դրանք իրացնելը մի խումբ անձանց կողմից նախնական համաձայնությամբ): Նրա նկատմամբ որպես խափանման միջոց է կիրառվել կալանավորումը: Գավառ քաղաքի բնակչին մեղադրանք է առաջադրվել՝ ՀՀ քրեական օրենսգրքի 38-202-րդ (կեղծ փողեր կամ արժեթղթեր՝ իրացնելու նպատակով պատրաստելուն կամ պահելուն կամ դրանք իրացնելուն օժանդակելը) հոդվածի 1-ին մասով և 202-րդ հոդվածի 2-րդ մասի 2-րդ կետով (կեղծ փողեր կամ արժեթղթեր՝ իրացնելու նպատակով պատրաստելը կամ պահելը կամ դրանք իրացնելը մի խումբ անձանց կողմից նախնական համաձայնությամբ): Դատարանը թույլատրելի է համարել նրա նկատմամբ այլընտրանքային խափանման միջոց գրավի կիրառումը: Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել դատարան:

18:38 - 14 փետրվարի, 2020

Բացահայտվել է բժշկասոցիալական փորձաքննության գործակալության պաշտոնատար անձանց կողմից կաշառք ստանալու դեպք․ ԱԱԾ

ՀՀ ազգային անվտանգության ծառայությունը ստացել է փաստական տվյալներ՝ ՀՀ աշխատանքի եւ սոցիալական հարցերի նախարարության բժշկասոցիալական փորձաքննության գործակալության պաշտոնատար անձանց կողմից կաշառք ստանալու հերթական առերեւույթ դեպքի մասին։ Այս մասին հայտնում են ԱԱԾ-ի լրատվության ծառայությունից։ Ձեռք բերված տվյալների համաձայն՝ ՀՀ աշխատանքի եւ սոցիալական հարցերի նախարարության բժշկասոցիալական փորձաքննության գործակալության Գեղարքունիքի մարզի թիվ 2 բժշկասոցիալական փորձաքննության հանձնաժողովի նախագահը, փորձաքննություններ կատարելիս ի պաշտոնե օժտված լինելով կազմակերպչա-տնօրինչական լիազորություններով, նույն հանձնաժողովի անդամների եւ բուժվիճակագրի հետ նախնական համաձայնությամբ, գործակալություն դիմած քաղաքացիների օգտին որոշում կայացնելու, այն է՝ հաշմանդամության տեւողության ժամկետը հաստատելու, խումբը փոխելու համար, վերջիններիցս պարբերաբար որպես կաշառք պահանջել եւ ստացել է տարբեր չափերի գումարներ՝ դրանցից մասնաբաժին տալով հանցավոր համաձայնության եկած հանձնաժողովի անդամներին: ՀՀ քրեական օրենսգրքի համապատասխան հոդվածներով առերեւույթ հանցագործության դեպքերի առթիվ ՀՀ ԱԱԾ քննչական դեպարտամենտում հարուցված քրեական գործի շրջանակներում ենթադրյալ հանցագործություն կատարած 4 անձինք ՀՀ ԱԱԾ օպերատիվ ստորաբաժանումների աշխատակիցների հսկողության ներքո հերթական անգամ կաշառք ստանալիս բռնվել են: Կատարված խուզարկությամբ հայտնաբերվել է կաշառքի առարկան, որից հետո հիշյալ անձինք բերման են ենթարկվել եւ ձերբակալվել։ Անհերքելի ապացույցների առկայության պարագայում պաշտոնատար անձ հանդիսացող հանձնաժողովի նախագահը եւ նրա հանցակիցները խոստովանել են կատարած հանցագործությունը: Նախաքննությունը շարունակվում է, ձեռնարկվում են համապատասխան միջոցառումներ՝ խմբի կողմից կատարած այլ հանցադեպերը, հանցավոր շղթայի մեջ ներգրավված անձանց բացահայտելու եւ պատասխանատվության ենթարկելու ուղղությամբ։

17:14 - 12 փետրվարի, 2020

Գեղարքունիքից կառավարության քննարկմանն է ներկայացվել 135 սուբվենցիոն ծրագրային հայտ

ՀՀ Գեղարքունիքի մարզի համայնքներից 2020 թվականի համար ՀՀ կառավարություն է ներկայացվել 135 նպատակային եւ հիմնավորված սուբվենցիոն ծրագրային հայտ: Դրանցից 35-ը վերաբերում են ներհամայնքային փողոցների ասֆալտապատմանը,11-ը՝ հրապարակների, պուրակների, մայթերի կառուցմանը եւ եզրաքարերի տեղադրմանը, 32-ը՝ խմելու եւ ոռոգման ջրագծերի վերանորոգմանը, ջրամատակարարման ցանցերի անցկացմանը, խորքային հորերի մաքրմանը, ջրահեռացման համակարգերի կառուցմանը եւ վերանորոգմանը, գաբիոնե հենապատի կառուցմանը, 31-ը՝ բազմաբնակարան շենքերի տանիքների եւ մուտքերի, մանկապարտեզների, հանդիսությունների սրահների վերանորոգմանը, մշակույթի տների եւ մանկապարտեզների գույքի ձեռքբերմանը, խաղահրապարակների կառուցմանն ու կահավորմանը, երաժշտական, արվեստի, մարզադպրոցների և համայնքային կենտրոնների հիմնանորոգմանը, 23-ը՝ փողոցային լուսավորության ցանցերի կառուցմանը և ընդլայնմանը, ֆոտովոլտային կայանների, լուսատուների և արևային ջրատաքացուցիչների տեղադրմանը, 2-ը՝ գազիֆիկացմանը և ջերմամեկուսացման համակարգի տեղադրմանը, 1-ը՝ բազմաֆունկցիոնալ ամբարձիչ էքսկավատորի ձեռքբերմանը: Նշված ծրագրային հայտերի գումարի չափը նախնական հաշվարկներով կազմում է շուրջ 6 միլիարդ 390 մլն դրամ: Նախորդ տարվա համեմատ այս տարի Գեղարքունիքի մարզում ծրագրային հայտերի թիվն ավել է 31-ով: Ավելացել է նաեւ հայտ ներկայացրած համայնքների թիվը: Ընդհանուր հաշվարկներով՝ Գեղարքունիքի մարզի 57 համայնքից այս տարի ծրագրային հայտ չի ներկայացրել 8 համայնք: Հաստատված ժամանակացույցին համապատասխան՝ Գեղարքունիքի մարզպետարանի կողմից ծրագրային հայտերը ներկայացվել են ՀՀ կառավարության հաստատմանը:

12:00 - 10 փետրվարի, 2020

Գեղարքունիքում նախատեսվում է տեղադրել կենսաբանական մաքրման աերացիոն կայաններ |armenpress.am|

armenpress.am։ Սեպտեմբերի 19-ին Գեղարքունիքի մարզպետ Գնել Սանոսյանն ընդունեց ՀՀ Գիտությունների Ազգային Ակադեմիայի Սևանի պահպանության փորձագիտական հանձնաժողովի նախագահ Յուրի Ջավադյանին, «Թիմ Մաստեր» ՍՊԸ հիմնադիր Մանվել Գաբրիելյանին, կազմակերպության այլ ներկայացուցիչների: Հանդիպմանը մասնակցում էր նաև «Գեղարքունիք» ՋՕԸ տնօրեն Կարեն Սարգսյանը: Ինչպես տեղեկացրեց «Թիմ Մաստեր» ՍՊԸ հիմնադիր Մանվել Գաբրիելյանը, աշխատանքային խումբը նպատակ ունի Գեղարքունիքի մարզի Գավառ, Մարտունի և Վարդենիս քաղաքների մաքրման կայանների տեղադրումից հետո նույն հատվածներում տեղադրել կոյուղաջրերի կենսաբանական մաքրման աերացիոն կայաններ,որոնք հնարավորություն կտան՝ կոյուղաջրերի մաքրման աստիճանը հասցնել մինչև 98 տոկոսի:«Հիմա մենք պետք է հասկանանք, թե այդ երեք քաղաքների կոյուղաջրերին ինչպիսի ջրեր են խառնվում, հնարավո՞ր է արդյոք փոխել դրանց ուղղությունը, որպեսզի հստակեցնենք, թե ինչ հզորության կայաններ կարող ենք տեղադրել տվյալ տարածքներում: Որքան քիչ ջրեր խառնվեն կոյուղաջրերին, այնքան փոքր հզորության կենսաբանական մաքրման աերացիոն կայաններ կտեղադրենք և ֆինանսական առումով պակաս գումար կծախսենք դրանց ձեռքբերման ընթացքում»,- նշեց «Թիմ Մաստեր» ՍՊԸ հիմնադիր Մանվել Գաբրիելյանը:Գնել Սանոսյանը պատրաստակամություն հայտնեց՝ աջակցել գործընթացին իր հնարավորության և լիազորության շրջանակներում և աշխատանքային խմբի անդամներին առաջարկեց անձամբ այցելել տարածքներ, ուսումնասիրություն անցկացնել և ևս մեկ հանդիպում ունենալ՝ գաղափարի շուրջ ավելի կոնկրետ քննարկում կազմակերպելու համար:Գեղարքունիքի մարզպետարանի բնապահպանության բաժնի աշխատակիցների ուղեկցությամբ աշխատանքային խումբը մեկնեց մաքրման կայանների տարածքներ՝ դիտարկում անցկացնելու համար:

12:01 - 19 սեպտեմբերի, 2019