ԱԱԾ - infocom.am

ԱԱԾ

Ազգային անվտանգության ծառայությունը (ԱԱԾ), գործադիր իշխանության հանրապետական մարմին է, որը մշակում և իրականացնում է ազգային անվտանգության բնագավառում Հայաստանի կառավարության քաղաքականությունը, ինչպես նաև ազգային անվտանգության մարմինների կառավարումը։ Այն համարվում է Հայաստանի գլխավոր հատուկ ծառայությունը։ Ազգային անվտանգության ծառայության լիազորություններն ու պարտականությունները սահմանվում են ՀՀ Ազգային անվտանգության մարմինների մասին օրենքով:

2020 թ. նոյեմբերի 8-ին ՀՀ նախագահի հրամանագրով գնդապետ Արմեն Աբազյանը նշանակվեց Հայաստանի Հանրապետության ազգային անվտանգության ծառայության տնօրեն:

ՀՀ ԱԱԾ-ն բացահայտել է ահաբեկչության նախապատրաստության դեպք

ՀՀ ազգային անվտանգության ծառայության քննչական և սահմանադրական կարգի պահպանության ու ահաբեկչության դեմ պայքարի գլխավոր վարչությունների ծառայողների իրականացրած համալիր օպերատիվ-հետախուզական միջոցառումների ու վարութային գործողությունների արդյունքում բացահայտվել է նախնական համաձայնությամբ, խմբի կազմում ահաբեկչության նախապատրաստություն կատարելու դեպք: Այս մասին տեղեկացնում են ԱԱԾ մամուլի կենտրոնից: «Նախաքննության ընթացքում կատարված ապացուցողական և վարութային այլ գործողությունների արդյունքում պարզվել է, որ Ա.Մ-ն, Ս.Մ-ի, Է.Ծ-ի, Վ.Ո-ի, Կ.Ս-ի և քննությամբ դեռևս ինքնությունները չպարզված այլ անձանց հետ նախնական համաձայնությամբ, խմբի կազմում գործիքներ, միջոցներ ձեռք բերելու, դրանք հարմարեցնելու և դիտավորությամբ այլ պայման ստեղծելու եղանակով 2023 թվականի ընթացքում նախապատրաստել են կատարել պայթյուն և այլ հանրավտանգ արարք, ինչպես նաև զավթել և պահել ՀՀ պետական նշանակության և այլ շինություններ՝ զուգորդված քաղաքացիական անձին կյանքից զրկելու, ենթադրյալ խոշոր չափերի գույքային վնաս պատճառելու և այլ ծանր հետևանք առաջացնելու վտանգով, որի նպատակն է եղել հանրային իշխանության մարմինների գործունեությունը կազմալուծելը, սակայն իրենց կամքից անկախ հանգամանքներով չեն կարողացել սկսել դիտավորության մեջ ընդգրկված հանցանքի օբյեկտիվ կողմի կատարումը, քանի որ հանցանքը բացահայտվել է ՀՀ ազգային անվտանգության ծառայության կողմից: Քրեական վարույթի շրջանակներում ձեռք բերված բավարար փաստական տվյալների հիման վրա հանցավոր խմբի 5 անդամների նկատմամբ ՀՀ քրեական օրենսգրքի համապատասխան հոդվածով հարուցվել են հանրային քրեական հետապնդումներ, ներկայացվել են մեղադրանքներ: Վերջիններիս նկատմամբ որպես խափանման միջոց՝ կիրառվել է կալանքը: Միևնույն ժամանակ խուզարկություններ են կատարվել հանցավոր խմբի անդամների բնակության հասցեներում, դրանց կից շինություններում, առանձին հավաքատեղիներում, որոնց արդյունքում հայտնաբերվել են հրազեն, ռազմամթերք, մեկ հատ ազդանշանային պայթուցիկ-սարք, մեկ հատ ազդանշանային հրթիռի արձակման սարք՝ երկու գլխիկով, մեկ հատ թռչող սարք և վերջինիս ենթադրյալ ամրացվող երկու հատ մեծ ու փոքր գազաբալոն՝ ճնշաչափիչով, երկու հատ փայտե կոթով ծակող գործիք, ռազմամթերքի բեկորներով լի տարրա, զրահաբաճկոն, զինվորական հագուստներ, նշանառության սարք, ձեռնաշղթաներ, հեռահաղորդակցության սարքեր, տեսահսկման սարքեր, համակարգիչներ, բջջային հեռախոսներ, էլեկտրոնային կրիչներ, շուրջ մեկ տասնյակ ՀՀ և ՌԴ կապի օպերատորների փակ տուփերով, չօգտագործված հեռախոսաքարտեր, արևային մարտկոց, տարբեր գրառումներ պարունակող նոթատետրեր, ահաբեկչություն իրականացնելու համար նախապատրաստական գործողություններ կատարելու վերաբերյալ բացահայտ, ինչպես նաև քողարկված բովանդակությամբ գրառումներ պարունակող փաստաթղթեր և այլն։ Խուզարկությունների արդյունքում հայտնաբերված գրառումների և այլ նյութերի ուսումնասիրությամբ պարզվել է, որ նախապատրաստվող ահաբեկչական գործողությունը կրել է «Հյուսիսային տերևաթափ» անվանումը, որի հաջող իրականացման և այնուհետև՝ ահաբեկչական գործողություններին ավելի լայն զանգվածների ներգրավելու դիտավորությամբ նախապես ծրագրվել է ստեղծել ուկրաինական, մոլդովական տելեգրամյան ալիքներ՝ «Ազգային փրկության ապստամբություն» անվանումներով, ահաբեկչական գործողությունները սկսելու նախորդ օրը՝ գիշերային ժամերից սկսած՝ ակտիվացնել տելեգրամյան ալիքները և ակտիվիստներին: Հանցավոր գործունեության հաջող իրականացման համար ծրագրվել է նաև նախապես ձեռք բերել առաջին բուժօգնության պարագաներ, ինչպես նաև հանցավոր խմբի անդամների ընտանիքները դուրս բերել Վրաստան: Մանրակրկիտ պլանավորվել է շինություններ զավթելու համար գրոհելու, նահանջելու և դարանակալելու գործողությունները, նախատեսվել հարձակման վայրերում թողնել նախապես մշակված սիմվոլներ, կանխորոշվել են ստատիկ օբյեկտների տեղակայումներ, ինչպես նաև հանցավոր գործունությունն ավարտին հասցնելու համար այլ գործողությունների իրականացման հերթականությունը, ընթացակարգը, անձանց ներգրավման համար թռուցիկների տարածման և այլ գործողությունները: Նախաքննությունը շարունակվում է, իրականացվում են վարութային գործողություններ և օպերատիվ-հետախուզական միջոցառումներ՝ դեպքի ամբողջական հանգամանքները, հանցավոր խմբի կազմում ներգրավված անձանց ողջ շրջանակը պարզելու, նրանց նկատմամբ քրեաիրավական ներգործության միջոցներ կիրառելու համար: Միաժամանակ, հայտնվում է, որ Հայաստանի Հանրապետության ազգային անվտանգության ծառայությունը հետևողական պայքար է տանելու սահմանադրական կարգի հիմունքների և պետության անվտանգության դեմ ուղղված հանցագործությունների կանխման, խափանման և դրանց բացահայտման ուղղությամբ՝ հասարակության լայն շերտերին կոչ անելով դրսևորել բացառապես իրավահպատակ վարքագիծ»,- ասված է հաղորդագրության մեջ: Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով։

14:31 - 02 նոյեմբերի, 2023

Անտեսելով լրատվամիջոցի հարցումները՝ պատասխանները հնչեցնում են ԱԺ-ում

Ազգային ժողովի մշտական հանձնաժողովների այսօրվա համատեղ նիստում Պաշտպանության և անվտանգության հարցերի հանձնաժողովի նախագահ, պատգամավոր Անդրանիկ Քոչարյանը մի մտահոգություն բարձրաձայնեց․ «Լեռնային Ղարաբաղում կալանավորման մեջ գտնվող մարդիկ են, դուռը բացվել է, եկել են, մենք դա ո՞նց ենք [տնօրինում], տնօրինո՞ւմ ենք - չե՞նք տնօրինում, ո՞նց են տեղափոխվել, ի՞նչ հիմքերով, որովհետև էդ գործընթացը էդպես քաոտիկ բնույթ է կրել, և էդտեղ նաև ռիսկեր կան, որ պետք է կարողանանք էստեղ կառավարել»,- դիմելով ՀՀ ներքին գործերի նախարար Վահե Ղազարյանին՝ ասաց նա։ Ի պատասխան՝ Վահե Ղազարյանը հայտնեց, որ ազատ է արձակվել ԼՂ-ի մոտ 11 կալանավոր, և իրենք բոլորի տվյալներն ունեն․ «Անցյալ շաբաթ սպանությունով մեկը կար, եթե չեմ սխալվում՝ էնտեղ ձերբակալվա՞ծ, թե՞ կալանավորված էր, մեկին արդեն Վանաձոր քաղաքից հայտնաբերեցինք, բոլորի տվյալները ունենք, որոշ անձանցով զբաղվում է Ազգային անվտանգության ծառայությունը, որոնք մեղադրվել են պետական դավաճանության համար, որոշ անձանցով՝ ոստիկանությունը»,- ասաց նախարարը։ Նա նաև նշեց, որ հիշյալ բոլոր անձանց՝ Հայաստանի Հանրապետությունից դուրս գալու վրա սահմանափակում է դրված։ Դեռ հոկտեմբերի 11-ին «Ինֆոքոմը», հղում անելով Արցախի մարդու իրավունքների պաշտպան Գեղամ Ստեփանյանին, գրել էր, որ ազատ են արձակվել Արցախի 15 կալանավոր (որոնցից 3-ը՝ Հայաստանում պահվող), և 1 դատապարտյալ։ Նույն օրը տեղեկատվության հարցում էինք ուղարկել ոստիկանությանն ու Ազգային անվտանգության ծառայությանը՝ խնդրելով տրամադրել տեղեկություններ տեղահանման ընթացքում Ստեփանակերտից ազատ արձակված կալանավորների և դատապարտյալների թվի, և նրանց մեղսագրվող հանցանքների վերաբերյալ։ Թե՛ ոստիկանությունը և թե՛ ԱԱԾ-ն խուսափել էին մեզ տեղեկություններ տրամադրել։ Հաշվի առնելով այն հանգամանքը, որ Հայաստանում ազգային անվտանգության հարցերով զբաղվում է ԱԱԾ-ն, իսկ հասարակական անվտանգության պահպանմամբ՝ ոստիկանությունը՝ խնդրել էինք նաև մանրամասնել, թե ինչ քայլեր են նրանք ձեռնարկում ազատության մեջ գտնվող կալանավորների և դատապարտյալների հայտնաբերման ուղղությամբ։ Ընդ որում, երկու կառույցներին հարցրել էինք նաև, թե արդյո՞ք այդ անձինք ներառված են Սահմանային էլեկտրոնային կառավարման տեղեկատվական համակարգում (ՍԷԿՏ)։ Այս համակարգում ընդգրկվում են այն անձանց տվյալները, որոնց տարբեր քրեական վարույթների շրջանակում արգելվում է բացակայել Հայաստանից։ Այս հարցն ընդհանրապես անտեսվել էր։ ԱԱԾ-ից մեր հարցմանը պատասխանել էր Ս․ Գեւորգյանը՝ նշելով, որ տեղեկություն չունեն Արցախում ազատ արձակված և Հայաստան մուտք գործած կալանավորների և դատապարտյալների վերաբերյալ։ ՆԳ նախարար Վահե Ղազարյանը, սակայն, ԱԺ-ում հավաստիացրեց, որ ԱԱԾ-ն զբաղվում է Արցախից Հայաստան եկած պետական դավաճանության մեջ մեղադրվողներով։ Այստեղից կարելի է ենթադրել հետևյալը. ԱԱԾ-ն զբաղվում է պետական դավաճանության մեջ մեղադրվող ազատ արձակվածներով, սակայն մինչ այժմ որևէ տեղեկություն չի կարողացել հավաքել։ ԱԱԾ-ն զբաղվում է այդ անձանցով, տեղեկություններ ունի, սակայն օպերատիվ գործողություններից ելնելով՝ այն դեռևս չի ցանկանում տրամադրել լրատվամիջոցին։ Այս դեպքում ԱԱԾ-ն կարող էր հարցման պատասխանում ձևակերպել, որ այս պահին տեղեկություն տրամադրել չի կարող։ Այս սցենարը քիչ հավանական է, քանի որ ՆԳ նախարարն այսօր ԱԺ ամբիոնից օպերատիվ տեղեկություններ դժվար թե հայտներ։ ԱԱԾ-ն տեղեկություններ ունի, սակայն խուսափել է այն տրամադրել լրատվամիջոցին, ինչն անհարգալից վերաբերմունքի դրսևորում է հանրության նկատմամբ, քանի որ լրատվամիջոցի գործունեությունն ու տեղեկատվություն ստանալու բուն նպատակը հանրությանը տեղեկացնելն է առկա վտանգների և դրանց կանխարգելմանն ուղղված գործողությունների կամ անգործության մասին։ ԱԱԾ-ն տեղեկություններ չունի, բայց նախարարին զեկուցել է, որ զբաղվում է այդ անձանցով։ Այս պարագայում դատողությունները թողնում ենք ՆԳՆ-ին։ ԱԱԾ-ն մեր հարցմանը պատասխանել է հոկտեմբերի 20-ին։ Միգուցե այդ օրվա դրությամբ՝ իսկապես որևէ տեղեկություն չի ունեցել նշված կալանավորների և դատապարտյալների վերաբերյալ և սկսել է նրանցով զբաղվել միայն վերջին 10 օրերին՝ ազատ արձակվելուց մոտ 1 ամիս անց։ Ոստիկանությունից մեր հարցմանը պատասխանել էր Քրեական ոստիկանության գլխավոր վարչության պետի պարտականությունները ժամանակավոր կատարող, գնդապետ Գ․ Մկրտչյանը՝ նշելով, որ պահանջվող տեղեկությունների տրամադրումը դուրս է ՀՀ ՆԳՆ ոստիկանության լիազորությունների շրջանակից։ Միաժամանակ, նա առաջարկել էր դիմել ՀՀ արդարադատության նախարարությանը։ Նախարար Ղազարյանի՝ այսօր հայտնած մանրամասներից, սակայն, պարզ է դառնում, որ ոստիկանությունը «բոլորի տվյալներն ունի», իրականացնում է հայտնաբերման գործողություններ։ Այստեղից կարելի է ենթադրել, որ ոստիկանությունը չի ցանկացել տեղեկություն տրամադրել լրատվամիջոցին՝ ուղղորդելով հարցումն Արդարադատության նախարարությանը։ Այստեղ անհրաժեշտ է նշել, որ Արդարադատության նախարարությունը զբաղվում է ՔԿՀ-ներում գտնվող կալանավորներով և դատապարտյալներով, իսկ առանց օրինական հիմքի ազատ արձակված անձանց հայտնաբերումը ոստիկանության լիազորության շրջանակում է։ Ոստիկանությունը մեր հարցմանը պատասխանել է հոկտեմբերի 18-ին։ Այսինքն՝ կալանավորների/դատապարտյալների ազատ արձակվելուց մոտ 1 ամիս անց գերատեսչությունը այս խնդիրն իր լիազորությունների շրջանակում չի համարել։ Մնում է հասկանալ՝ այդ ի՞նչ սկզբունքով է իրավապահ համակարգը որոշում, որ պատգամավորի բարձրացրած մտահոգությունն ավելի ծանրակշիռ է, և դրան պետք է պատասխանել, իսկ լրագրողի հարցերը, փաստորեն, կարելի է առանց վարանելու անտեսել։ Նման խտրական և ոչ գործընկերային մոտեցումը՝ պետության և հանրության երկխոսության մեջ կարևորագույն դերակատարի՝ մեդիայի նկատմամբ, շահավետ չէ նույն այդ պետության և հանրության միջև վստահության ձևավորման և ամրապնդման տեսանկյունից։ Ինֆոքոմ

20:41 - 30 հոկտեմբերի, 2023