Ինֆոթեգեր Մեր մասին
hy en ru
Նվիրաբերել

Ֆրանսիա

Ֆրանսիական Հանրապետություն, ունիտար կիսանախագահական հանրապետություն Արևմտյան Եվրոպայում՝ իր մի քանի անդրծովյան տարածքներով և կղզիներով, որոնք տեղակայված են Հնդկական, Խաղաղ և Ատլանտյան օվկիանոսներում։ Մայրցամաքային Ֆրանսիան ձգվում է Միջերկրական ծովից մինչև Անգլիական նեղուց և Հյուսիսային ծով, Հռենոսից մինչև Ատլանտյան օվկիանոս։ Տարածքը՝ 674,843 կմ², բնակչության թիվը 2020-ի տվյալներով ավելի քան 65 միլիոն է։

Ֆրանսիայի մայրաքաղաքը Փարիզն է, պետական լեզուն ֆրանսերենը։

Ֆրանսիայում երկարաձգվել է Դուրովի ձերբակալման ժամկետը. AFP |news.am|

Ֆրանսիայում երկարաձգվել է Դուրովի ձերբակալման ժամկետը. AFP |news.am|

news.am: Ֆրանսիայում դատարանը 48 ժամով երկարացրել է Telegram մեսենջերի հիմնադիր Պավել Դուրովի ձերբակալման ժամկետը, հայտնում է AFP-ն՝ վկայակոչելով հետաքննությանը մոտ կանգնած աղբյուրը։ Գործակալությունը նշում է, որ ձերբակալությունը կարող է տեւել առավելագույնը 96 ժամ, որից հետո դատավորը պետք է կա՛մ ազատի նրան, կա՛մ մեղադրանք առաջադրի Դուրովին։ Bloomberg-ը գրել է նաև, որ Telegram-ի հիմնադրի կալանքը կարող է երկարաձգվել։ Նշվում է, որ ֆրանսիական օրենքների համաձայն՝ կալանքի ժամկետը կարող է ավելացվել միայն մեկ անգամ։ Ֆրանսիայի իշխանությունները Դուրովի գործի վերաբերյալ պաշտոնական մեկնաբանություն չեն տվել։ Միայն Telegram-ի թիմն է հրապարակել իր մեկնաբանությունը։ Այնտեղ ասվում է, որ ընկերության գործադիր տնօրենը թաքցնելու ոչինչ չունի, որ նա հաճախ է շրջում Եվրոպայով, իսկ Telegram-ը համապատասխանում է ԵՄ օրենքներին, այդ թվում՝ թվային ծառայությունների մասին օրենքին։ «Աբսուրդ է պնդել, որ հարթակը կամ դրա սեփականատերը պատասխանատու է այդ հարթակի չարաշահման համար», - ընդգծվում է կիրակնօրյա մեկնաբանության մեջ։ Այն նաև նշում է, որ ամբողջ աշխարհում մոտ մեկ միլիարդ օգտատեր Telegram-ն օգտագործում է որպես հաղորդակցության միջոց և կարևոր տեղեկատվության աղբյուր։ Օգոստոսի 24-ի երեկոյան ֆրանսիական լրատվամիջոցները հայտնել են, որ Telegram-ի հիմնադիր Պավել Դուրովը Ֆրանսիա ժամանելուն պես ձերբակալվել է Լե Բուրժե օդանավակայանում։ Նա հարցաքննվել է և բերման է ենթարկվել։ Դուրովը մասնավոր ինքնաթիռով ժամանել է Ադրբեջանից:
09:36 - 26 օգոստոսի, 2024
Ռուսաստանը պահանջում է հյուպատոսական հասանելիություն տրամադրել Դուրովի մոտ |azatutyun.am|

Ռուսաստանը պահանջում է հյուպատոսական հասանելիություն տրամադրել Դուրովի մոտ |azatutyun.am|

azatutyun.am: Ֆրանսիայում Ռուսաստանի դեսպանատունը հյուպատոսական հասանելիություն է պահանջել ծագումով ռուս միլիարդատեր Պավել Դուրովի մոտ, որը երեկ ձերբակալվել է Փարիզի օդանավակայանում, հաղորդում է ռուսական պետական ТАСС գործակալությունը։ Դեսպանատունը պահանջել է նաև ապահովել Տելեգրամ սոցցանցի հիմնադրի իրավունքները։ Մոսկվան պնդել է, թե Ֆրանսիան մինչ այժմ «խուսափում է փոխգործակցությունից» Դուրովի հետ կապված իրավիճակի շուրջ։ Հաղորդագրության մեջ նշվում է, որ ռուս դիվանագետները կապի մեջ են Դուրովի փաստաբանի հետ։ Փարիզը դեռ պաշտոնական մեկնաբանություն չի արել։
14:31 - 25 օգոստոսի, 2024
Փարիզի օդանավակայանում ձերբակալվել է Telegram-ի գործադիր տնօրեն Պավել Դուրովը

Փարիզի օդանավակայանում ձերբակալվել է Telegram-ի գործադիր տնօրեն Պավել Դուրովը

Փարիզի օդանավակայանում Ֆրանսիայի ոստիկանությունը ձերբակալել է Telegram հավելվածի գործադիր տնօրեն Պավել Դուրովին։ Այս մասին տեղեկանում ենք BBC լրատվական գործակալությունից։ Ըստ պաշտոնյաների, 39-ամյա տղամարդը ձերբակալվել է Telegram հավելվածի հետ կապված հանցագործությունների համար: Իրավապահ մարմինները Դուրովին մեղադրում են թմրամիջոցների ապօրինի շրջանառության, երեխաների դեմ հանցագործությունների և խարդախության հանցակից լինելու մեջ՝ Telegram-ի իրավապահ մարմինների հետ համագործակցությունից հրաժարվելու, ինչպես նաև հավելվածում կրիպտոարժույթ ուղարկելու հնարավորության պատճառով, հայտնում է TF1 հեռուստաալիքը։ Ֆրանսիայում Ռուսաստանի դեսպանատունը «անհապաղ քայլեր» է ձեռնարկում իրավիճակը պարզաբանելու համար, հայտնում է ռուսական ՏԱՍՍ ​լրատվական գործակալությունը։Դուրովը ձերբակալվել է, երբ նրա անձնական ինքնաթիռը վայրէջք է կատարել Լե Բուրժե օդանավակայանում․ նա ճամփորդում էր իր անձնական ինքնաթիռով, հաղորդում են ֆրանսիական լրատվամիջոցները: 2018 թվականին հավելվածն արգելվել էր Ռուսաստանում այն բանից հետո, երբ Դուրովը մերժել էր փոխանցել օգտատերերի տվյալները ՌԴ ղեկավարությանը, բայց արգելքը չեղարկվել է 2021 թվականին։
10:26 - 25 օգոստոսի, 2024
Պապիկյանն ու Դըկոտինյին քննարկել են պաշտպանության բնագավառում Հայաստան-Ֆրանսիա համագործակցությանն առնչվող հարցեր

Պապիկյանն ու Դըկոտինյին քննարկել են պաշտպանության բնագավառում Հայաստան-Ֆրանսիա համագործակցությանն առնչվող հարցեր

Օգոստոսի 23-ին ՀՀ պաշտպանության նախարար Սուրեն Պապիկյանն ընդունել է ՀՀ-ում Ֆրանսիայի արտակարգ և լիազոր դեսպան Օլիվիե Դըկոտինյիին: Այս մասին տեղեկացնում են ՀՀ ՊՆ-ից: Հանդիպման ընթացքում քննարկվել են պաշտպանության բնագավառում Հայաստան-Ֆրանսիա համագործակցության ներկայիս ընթացքին և առաջիկա ծրագրերին առնչվող հարցեր, մասնավորապես՝ ՀՀ զինված ուժերում տեղի ունեցող բարեփոխումների ու դրանց շրջանակում Ֆրանսիայի հետ համագործակցության ծրագրերի վերաբերյալ:  
11:28 - 23 օգոստոսի, 2024
Շիրակի փոխմարզպետը և Ֆրանսիայի դեսպանը հետևել են Ջրառատի վարչական նստավայրում ֆրանսիացի կամավորների մասնակցությամբ վերանորոգման աշխատանքներին

Շիրակի փոխմարզպետը և Ֆրանսիայի դեսպանը հետևել են Ջրառատի վարչական նստավայրում ֆրանսիացի կամավորների մասնակցությամբ վերանորոգման աշխատանքներին

Շիրակի մարզպետի տեղակալ Աննա Մարտիկյանը Հայաստանում Ֆրանսիայի արտակարգ և լիազոր դեսպան Օլիվիե Դեկոտինյիի, Ախուրյան համայնքի ղեկավար Զավեն Մանուկյանի, պաշտոնատար այլ անձանց հետ այսօր հետևել է Ջրառատի վարչական նստավայրի դահլիճի և հանդերձարանի վերանորոգման աշխատանքներին։ Այդ մասին հայտնում են Շիրակի մարզպետի աշխատակազմից: Շուրջ 100 քառակուսի մետր վերանորոգվող տարածքում շուտով կգործեն մարզամշակութային խմբակներ: Շինարարական աշխատանքներն իրականացվել են «Շեն» ԲՀԿ-ի և «Այո» ֆրանսիական կազմակերպության ջանքերով, ինչպես նաև Ախուրյանի համայնքապետարանի ֆինանսական ներդրումով: Շինաշխատանքներին մասնակցել են նաև ֆրանսիացի կամավորները. 20 ֆրանսիացի կամավորներ շուրջ 20 օր ապրել են Ջրառատում և պատրաստակամությամբ աշխատանքներին մասնակցել։    
19:11 - 22 օգոստոսի, 2024
Դըկոտինյին հանդիպել է Սփյուռքի գործերի գլխավոր հանձնակատար Զարեհ Սինանյանի հետ

Դըկոտինյին հանդիպել է Սփյուռքի գործերի գլխավոր հանձնակատար Զարեհ Սինանյանի հետ

Հայաստանում Ֆրանիսայի արտակարգ և լիազոր դեսպան Օլիվիե Դըկոտինյին տեղեկացրել է, որ հանդիպել է Սփյուռքի գործերի գլխավոր հանձնակատար Զարեհ Սինանյանի հետ «Քննարկում ՀՀ կառավարության սփյուռքի գործերի գլխավոր հանձնակատար պարոն Զարեհ Սինանյանի հետ։ Ֆրանսիայում հայկական սփյուռքը մեծությամբ երրորդն է աշխարհում և ամենամեծը Եվրոպայում»,- նշել է դեսպանը X-ի իր միկրոբլոգում։
15:16 - 20 օգոստոսի, 2024
Մահացել է ֆրանսիացի դերասան Ալեն Դելոնը

Մահացել է ֆրանսիացի դերասան Ալեն Դելոնը

88 տարեկանում մահացել է ֆրանսիացի դերասան Ալեն Դելոնը։ Այս մասին AFP-ին հայտնել են նրա երեք երեխաները։ Ասվում է, որ նա մահացել է Ֆրանսիայի իր տանը։
10:47 - 18 օգոստոսի, 2024
Ֆրանսիայում ավիաշոուի ժամանակ ինքնաթիռ է կործանվել |armenpress.am|

Ֆրանսիայում ավիաշոուի ժամանակ ինքնաթիռ է կործանվել |armenpress.am|

armenpress.am: Ֆրանսիայի հարավում ավիաշոուի ժամանակ կործանվել է Fouga Magister ինքնաթիռը, որը պատկանում է ֆրանսիական ավիացիոն ակումբներից մեկին։ Այդ մասին տեղեկացնում է՝ վկայակոչելով «ՌԻԱ Նովոստի»-ն։  «Պարեկային ինքնաթիռների ավիաշոուի ժամանակ Fouga Magister ինքնաթիռը, որն օգտագործվում էր Ֆրանսիայի ռազմաօդային ուժերի կողմից 1964-ից, ընկել է ծովը Լավանդայի ափերի մոտ՝ Վար դեպարտամենտում ժամը 17.00-ի սահմաններում»,- նշված է հաղորդագրության մեջ։ Օդաչուն չի կարողացել լքել ինքնաթիռը, քանի որ օդանավը հագեցած չէ կատապուլտային նստատեղով։ Նշվում է, որ ավիաշոուն դադարեցվել է, փրկարարները սկսել են ծովում որոնողական աշխատանքները։    
20:56 - 16 օգոստոսի, 2024
Փարիզի 17-րդ շրջանի քաղաքապետը հյուրընկալել է Օլիմպիական խաղերի մեդալակիր հայ ըմբիշներին

Փարիզի 17-րդ շրջանի քաղաքապետը հյուրընկալել է Օլիմպիական խաղերի մեդալակիր հայ ըմբիշներին

Փարիզի 17-րդ շրջանի քաղաքապետ Ժոֆրուա Բուլարը քաղաքային այգում օգոստոսի 8-ին հյուրընկալել է Հայաստանի օլիմպիական հավաքականի անդամներ, Օլիմպիական խաղերի մեդալակիր ըմբիշներ Արթուր Ալեքսանյանին և Մալխաս Ամոյանին: Ինչպես  տեղեկացրին ՀՀ կրթության, գիտության, մշակույթի և սպորտի նախարարությունից, միջոցառմանը մասնակցել են նաև ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանը, Ֆրանսիայում ՀՀ դեսպան Հասմիկ Տոլմաջյանը, Հայաստանի օլիմպիական պատվիրակության անդամներ, բազմաթիվ երկրպագուներ: «Ողջունելով մարզիկներին՝ Փարիզի 17-րդ շրջանի քաղաքապետը շնորհավորել է նրանց Փարիզ-2024-ում ունեցած տպավորիչ մրցելույթների և նվաճած մեդալների առթիվ: Ժոֆրուա Բուլարն ընդգծել է՝ Հայաստանի և Ֆրանսիայի միջև հարաբերությունները մշտապես առանձնացել են ջերմությամբ ու բարեկամությամբ: ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանը շնորհակալություն է հայտնել ջերմ ընդունելության և սրտացավ վերաբերմունքի համար: Կարեն Գիլոյանն ընդգծել է՝ Հայաստանի օլիմպիական պատվիրակությունը խաղերի ողջ ընթացքում զգում է թե՛ Փարիզի իշխանությունների, թե՛ ֆրանսիացի ժողովրդի աջակցությունն ու բարեկամական վերաբերմունքը»,- ասվում է հաղորդագրության մեջ: Ըստ աղբյուրի՝ Փարիզի Օլիմպիական խաղերի արծաթե մեդալակիր Արթուր Ալեքսանյանն ու բրոնզե մեդալակիր Մալխաս Ամոյանը ևս շնորհակալություն են հայտնել հյուրընկալության և երկրպագության համար: Ներկաներին ողջունել է նաև Ֆրանսիայում ՀՀ արտակարգ և լիազոր դեսպան Հասմիկ Տոլմաջյանը: Այնուհետև, հայ մարզիկները լուսանկարվել են Փարիզի 17-րդ շրջանի քաղաքային այգում հավաքված երկրպագուների հետ, ինքնագրեր բաժանել նրանց: Արթուր Ալեքսանյանն ու Մալխաս Ամոյանը կհյուրընկալվեն նաև Փարիզում գործող «Հայաստանի օլիմպիական տանը» և կհանդիպեն Ֆրանսիայի հայ համայնքի ներկայացուցիչների ու երկրպագուների հետ:  
20:16 - 08 օգոստոսի, 2024
Փեզեշքիանն ԱՄՆ-ին և արևմտյան այլ երկրներին կոչ է անում դադարեցնել աջակցությունն Իսրայելին |azatutyun.am|

Փեզեշքիանն ԱՄՆ-ին և արևմտյան այլ երկրներին կոչ է անում դադարեցնել աջակցությունն Իսրայելին |azatutyun.am|

azatutyun.am: «Համաս»-ի առաջնորդի սպանության պատճառով Մերձավոր Արևելքում աճող լարվածության ֆոնին Իրանի նախագահ Մահսուդ Փեզեշքիանն ԱՄՆ-ին և արևմտյան այլ երկրներին կոչ է անում դադարեցնել աջակցությունն Իսրայելին։ «Եթե Միացյալ Նահանգները և արևմտյան երկրները ցանկանում են կանխել պատերազմն ու անկայունությունը տարածաշրջանում, ապա պետք է անհապաղ դադարեցնեն զենք վաճառել և աջակցել Սիոնիստական ռեժիմին», - ասել է Փեզեշքիանը ֆրանսիացի պաշտոնակից Էմանյուել Մակրոնի հետ հեռախոսազրույցում։ «Միացյալ Նահանգները և արևմտյան երկրներն աջակցում են մի ռեժիմի, որը չի ենթարկվում միջազգային օրենքներից և կանոնակարգերից որևէ մեկին», - Իրանի նախագահի մամլո ծառայության փոխանցմամբ՝ պնդել է Փեզեշքիանը: Իրանի և Իսրայելի միջև ուղիղ հակամարտության մտավախությունները սրվել են անցած շաբաթ Թեհրանում «Համաս» խմբավորման քաղաքական առաջնորդ Իսմայիլ Հանիյեի սպանությունից հետո: ԱՄՆ-ի և ԵՄ-ի կողմից ահաբեկչական կառույց ճանաչված պաղեստինյան խմբավորման առաջնորդը Իրանի մայրաքաղաքում մասնակցում էր նախագահ Փեզեշքիանի երդմնակալության արարողությանը։ Իրանը և «Համաս»-ը Հանիեյի մահվան համար մեղադրել են Իսրայելին սպառնալով պատասխան քայլեր ձեռնարկել։
20:01 - 07 օգոստոսի, 2024
ՀՀ-ում Ֆրանսիայի դեսպանը շնորհավորել է Հայաստանին Օլիմպիական խաղերում առաջին մեդալը նվաճելու առթիվ

ՀՀ-ում Ֆրանսիայի դեսպանը շնորհավորել է Հայաստանին Օլիմպիական խաղերում առաջին մեդալը նվաճելու առթիվ

Հայաստանի Հանրապետությունում Ֆրանսիայի արտակարգ և լիազոր դեսպան Օլիվիե Դըկոտինյին շնորհավորել է Հայաստանին Փարիզի Օլիմպիական խաղերում առաջին մեդալի նվաճման առթիվ։  Այդ մասին Ֆրանսիայի դեսպանը գրառում է կատարել X-ի միկրոբլոգում՝ կից հրապարակելով տեսանյութ։  «Շնորհավորում ենք Հայաստանի առաջին մեդալը նվաճած մարմնամարզիկ Արթուր Դավթյանին»,-գրել է դեսպան Դըկոտինյին։  Հիշեցնենք, որ 35-ամյա Վահագն Դավթյանը 6-րդ տեղն է զբաղեցրել Փարիզում ընթացող 33-րդ ամառային Օլիմպիական խաղերում: Նա օղակների վարժության եզրափակչում վաստակել է 14,866 միավոր։
13:43 - 05 օգոստոսի, 2024
Հարյուրամյակի տարբերությամբ եզդիների նահատակությունը կրկնեց 1915 թ. հայերի նահատակությունը. Դըկոտինյի |1lurer.am|

Հարյուրամյակի տարբերությամբ եզդիների նահատակությունը կրկնեց 1915 թ. հայերի նահատակությունը. Դըկոտինյի |1lurer.am|

1lurer.am: Տասը տարի առաջ՝ 2014 թվականի օգոստոսի 3-ին, սկսվեց եզդիերի բնաջնջումը «Իսլամական պետության» կողմից՝ X-ի իր միկրոբլոգում գրել է Հայաստանում Ֆրանսիայի դեսպան Օլիվիե Դըկոտինյին։ «Զանգվածային սպանություններ, բռնաբարություններ, բռնի կրոնափոխություն. հարյուրամյակի տարբերությամբ նրանց նահատակությունը կրկնեց հայերի նահատակությունը 1915 թվականին»,- նշել է դիվանագետը։              
18:55 - 03 օգոստոսի, 2024
ՄՕԿ-ը ներողություն է խնդրել Ադրբեջանի երիտասարդության և սպորտի նախարարությունից

ՄՕԿ-ը ներողություն է խնդրել Ադրբեջանի երիտասարդության և սպորտի նախարարությունից

Միջազգային օլիմպիական կոմիտեն ներողություն է խնդրել Ադրբեջանի երիտասարդության և սպորտի նախարարությունից Օլիմպիական խաղերի արարողության վերահեռարձակման ժամանակ France2-ի հաղորդավարների հայտարարությունների համար։ «Նման խոսքերը համահունչ չեն այն սկզբունքներին և արժեքներին, որոնց ՄՕԿ-ը նպաստում է սպորտի և Օլիմպիական խաղերի միջոցով։ Հետևաբար, մենք կապի մեջ ենք եղել բոլոր պատասխանատու կողմերի հետ՝ հիշեցնելու մեր սկզբունքների և աշխատանքային արձանագրությունների մասին»,- ասված է ՄՕԿ-ի նամակում։ Հաշվի առնելով ՄՕԿ-ի ներողությունը, Ադրբեջանի երիտասարդության և սպորտի նախարարությունը հայտարարել է, որ այժմ անկնկալում է Ֆրանսիայի կառավարության պաշտոնական ներողությունը Ադրբեջանից։Հիշեցնենք, որ Բաքուն բողոք էր հղել Միջազգային օլիմպիական կոմիտեին France-2 հեռուստաալիքի հաղորդավարի մեկնաբանության պատճառով Փարիզում Օլիմպիական խաղերի բացման արարողության ուղիղ հեռարձակման ժամանակ։ «Հայերն, իհարկե, մեր բարեկամներն են, և Հայաստանը պատմականորեն ֆրանսիացիների սրտին մոտիկ երկիր է։ Անցած տարին սգո տարի էր Հայաստանի համար, որը հանգեցրեց Ղարաբաղի կորստին, այն անցավ ադրբեջական բանակի ձեռքը», - ըստ ադրբեջանական լրատվամիջոցների Օլիմպիական խաղերի բացման արարողությանը մասնակից թիմերի շքերթում, երբ Սենայով անցել են հայ մարզիկները, ասել էր France-2-ի հաղորդավարը։ 
11:56 - 03 օգոստոսի, 2024
Ֆրանսիան իր քաղաքացիներին հորդորում է հնարավորինս շուտ հեռանալ Իրանից

Ֆրանսիան իր քաղաքացիներին հորդորում է հնարավորինս շուտ հեռանալ Իրանից

Ֆրանսիան Իրանում գտնվող իր քաղաքացիներին խորհուրդ է տվել հնարավորինս շուտ լքել այդ երկիրը՝ էսկալացիայի վտանգի պատճառով: «Ֆրանսիացիներին, որոնք գտնվում են Իրանում, խորհուրդ է տրվում հնարավորինս շուտ լքել երկիրը՝ տարածաշրջանում ռազմական էսկալացիայի մեծ ռիսկի պատճառով»,- լրատվամիջոցների փոխանցմամբ՝ նշված է Ֆրանսիայի արտաքին գործերի նախարարության հաղորդագրության մեջ: Ավելի վաղ գերատեսչությունը Ֆրանսիայի քաղաքացիներին կոչ էր արել զերծ մնալ Իսրայել, Լիբանան և պաղեստինյան տարածքներ այցելելուց:
18:20 - 02 օգոստոսի, 2024
Փեզեշքիանն ու Մակրոնը քննարկել են երկկողմ և միջազգային հարցեր |1lurer.am|

Փեզեշքիանն ու Մակրոնը քննարկել են երկկողմ և միջազգային հարցեր |1lurer.am|

1lurer.am: Իրանի նորընտիր նախագահ Մասուդ Փեզեշքիանը և Ֆրանսիայի նախագահ Էմանուել Մակրոնը հեռախոսազրույց են ունեցել: Մակրոնը շնորհավորել է Փեզեշքիանին ընտրությունում հաղթանակի կապակցությամբ՝ հույս հայտնելով, որ նրա նախագահության օրոք Ֆրանսիայի, եվրոպական մյուս երկրների և Իրանի հարաբերություններն ավելի կզարգանան: Փեզեշքիանն էլ ընդգծել է փոխվստահության հիման վրա Փարիզի հետ շփումները զարգացնելու Թեհրանի պատրաստակամությունը:  Նախագահները քննարկել են նաև հակաիրանական պատժամիջոցների չեղարկմանն ուղղված բանակցությունները, ռուս-ուկրաինական պատերազմը, Մերձավոր Արևելքի հետ կապված հարցեր: Ըստ իրանական կողմի հաղորդագրության՝ Փեզեշքիանը մտահոգություն է հայտնել Իսրայել-Լիբանան սահմանին լարվածության աճի հետ կապված: «Եթե Իսրայելը հարձակվի Լիբանանի վրա, դա մեծ սխալ կլինի, որը հետևանքներ կունենա»,- նախազգուշացրել է նա: Իրանի նորընտիր նախագահը նաև վստահեցրել է, որ Թեհրանը ջանքեր չի խնայի Գազայի ճգնաժամը կարգավորելու համար, հույս հայտնել, որ մյուս երկրները նույնպես կկատարեն պաղեստինցիների հանդեպ իրենց պարտավորությունները:
12:20 - 30 հուլիսի, 2024
Ֆրանսիան ներգրավված է Տաթևի Մեծ Անապատ վանական համալիրի վերականգնման ծրագրում

Ֆրանսիան ներգրավված է Տաթևի Մեծ Անապատ վանական համալիրի վերականգնման ծրագրում

Հայաստանում Ֆրանսիայի արտակարգ և լիազոր դեսպան Օլիվյե Դըկոտինյին հայտարարել է, որ Փարիզը ներգրավված է Տաթևի Մեծ Անապատ վանական համալիրի վերականգնման ծրագրում։ Այս մասին դեսպանը նշել է X-ի իր միկրոբլոգում կատարված գրառման մեջ՝ կից հրապարակելով Տաթևի վանական համալիրի նկարը։  «Տաթևի վանքը հայկական մշակութային ժառանգության գոհարներից է և նշանավորում է երկրի ինքնությունը: Ֆրանսիան ներգրավված է Տաթևի Մեծ Անապատ վանական համալիրի վերականգնման ծրագրում», -գրել է Դըկոտինյին։ 
10:11 - 30 հուլիսի, 2024