Աշխատանքի և սոցիալական հարցերի նախարարություն

Առաջարկվում է ուժային կառույցների զինվորական կենսաթոշակը նշանակելու գործառույթը վերապահել սոցիալական ապահովության ծառայությանը |hetq.am|

hetq.am։ Աշխատանքի և սոցիալական հարցերի նախարարությունն առաջարկում է պաշտպանության, արդարադատության, արտակարգ իրավիճակների նախարարությունների, ոստիկանության, ազգային անվտանգության ծառայության զինծառայողների զինվորական կենսաթոշակները նշանակելու գործառույթը վերապահել սոցիալական ապահովության ծառայությանը։ Գործող կարգով կենսաթոշակները նշանակում են առանացված կերպով այս մարմինները։ Նման առաջարկություն է նախարարությունը քննարկման ներկայացրել իրավական ակտերի նախագծերի հրապարակման միասնական կայքում։Աշխատանքի և սոցիալական հարցերի նախարարության հաղորդմամբ՝ այս որոշման հիմք է հանդիսացել վարչապետի աշխատակազմում ապրիլի 5-ին կայացած խորհրդակցությունը։ Դրա արդյունքում հանձնարարվել է քննարկել պաշտպանության նախարարության համակարգի զինծառայողներին և նրանց ընտանիքների անդամներին զինվորական կենսաթոշակ նշանակելու գործառույթը ծառայությանը փոխանցելու հարցը։Նախատեսվում է, որ սոցիալական ապահովության ծառայության կենսաթոշակ նշանակող ստորաբաժանումը զինվորական կենսաթոշակը կնշանակի զորացրման հրամանի քաղվածքի և զինվորական ծառայության ստաժի մասին համապատասխան մարմնի (որտեղ ծառայել է զինծառայողը) ղեկավարի սահմանած ստորաբաժանման տված տեղեկանքի հիման վրա։

07:05 - 10 սեպտեմբերի, 2019

Հայաստանում բարելավում են պետական կառույցներում աշխատանքի ընդունման գործընթացը. նոր հուշագիր է ստորագրվել

Այսուհետ ՀՀ աշխատանքի և սոցիալական հարցերի նախարարության թափուր աշխատատեղերի մասին կարող եք տեղեկանալ նաև staff.am-ի միջոցով: Այս մասին հայտնում են նախարարության մամուլի ծառայությունից:ՀՀ աշխատանքի և սոցիալական հարցերի նախարարությունը և «Թեք սերվիս» սահմանափակ պատասխանատվությամբ ընկերությունը համագործակցության մասին հուշագիր են ստորագրել։ Ըստ այդմ, նախարարության թափուր աշխատատեղերի վերաբերյալ հայտարարությունները կտարածվեն staff.am հարթակի և վերջինիս պատկանող սոցիալական ցանցերի միջոցով։Կողմերը կարևորել են ՀՀ քաղաքացիների՝ զբաղվածության ոլորտի վերաբերյալ իրազեկվածության ապահովումը՝ համոզմունք հայտնելով, որ հուշագրի ստորագրումը կնպաստի պետական կառույցներում աշխատանքի ընդունման գործընթացի բարելավմանը։

07:06 - 03 հուլիսի, 2019

Ծրագրի իրագործման արդյունքում կունենանք հասարակություն բոլորի համար` հավասար իրավունքներով և պարտականություններով․ նախարարություն

ՀՀ աշխատանքի և սոցիալական հարցերի նախարարությունը հանրային քննարկման է ներկայացրել «Հոգեկան առողջության և մտավոր խնդիրներ ունեցող 18 տարին լրացած անձանց խնամքի ծառայությունների ապաինստիտուցիոնալացման և այլընտրանքային համայնքային ծառայությունների տրամադրման» ծրագրի նախագիծը: «Ծրագրի իրագործման արդյունքում կունենանք հասարակություն բոլորի համար` հավասար իրավունքներով և հավասար պարտականություններով, անկախ ֆիզիկական, հոգեկան կամ մտավոր առողջությունից, անկախ կարգավիճակից, սեռից և այլ գործոններից:Խնամքի ծառայությունների աստիճանաբար փոխարինումը համայնքային ծառայություններով` շեշտադրելով ընտանիքի և համայնքի դերը, հատկապես` հոգեկան առողջության խնդիրներ ունեցող անձանց պարագայում, խիստ կարևոր է այդ անձանց մասնակցայնության և ներառականության տեսանկյունից: Համայնքային ծառայությունների ստեղծումը և հրատապությունը բխում է հոգեկան առողջության խնդիրներ ունեցող անձանց՝ համայնքում ապրելու և արժանավայել կյանք վարելու իրավունք ունենալու, այդ իրավունքն իրացնելու վերաբերյալ Կոնվենցիայի պահանջներից»,- նշված է նախարարության տարածած հայտարարության մեջ:

11:07 - 01 հուլիսի, 2019

Նպաստների համակարգը պետք է դառնա ժամանակավոր աջակցության գործիք. Ժաննա Անդրեասյան

«Ներկայումս կառավարության քաղաքականությունն ուղղված է կայուն եկամտի ձևավորման միջոցով ընտանիքին դժվար վիճակից հանելուն:Պետության կողմից աջակցության համակարգը պետք է լինի այնպիսին, որ իրականում հնարավորություն ընձեռի հաղթահարել իրավիճակը, ոչ թե տարիներ շարունակ ստանալ աջակցություն, սակայն պահպանել նույն կյանքի որակն ու կենսամակարդակը, որը, մեղմ ասած, լավը չէ»,- այս մասին մարզային Սոցիալական աջակցության տարածքային գործակալությունների (ՍԱՏԳ) ներկայացուցիչների հետ ունեցած հանդիպումների ժամանակ ասել է ՀՀ աշխատանքի և սոցիալական հարցերի փոխնախարար Ժաննա Անդրեասյանը։Փոխնախարարը տեղեկացրել է, որ այսուհետ նպաստների համակարգում գտնվող աշխատունակ անդամին տրվելու է որոշակի ժամանակ, որի ընթացքում նա պետք է ապահովվի աշխատանքով։ Ժաննա Անդրեասյանը կարևորել է աշխատունակ անձանց համար կայուն եկամտի աղբյուրի ստեղծումը, իսկ նպաստների համակարգը պետք է դառնա ժամանակավոր աջակցության գործիք, որը մարդկանց հնարավորություն կտա հաղթահարել սոցիալական խոցելի վիճակը․ «Եթե տվյալ անձը մասնագիտական վերապատրաստման կարիք ունի, մենք մեր զբաղվածության կենտրոնների միջոցով դա կապահովենք։ Երբ անձը անցնի աշխատանքի, որոշ ժամանակ կշարունակի օգտվել սոցիալական աջակցությունից, որպեսզի նրա սոցիալական վիճակը կայունանա։ Բայց, նրա հետ տարված աշխատանքներից կամ զբաղվածության առաջարկից հետո աշխատանքից հրաժարվելու դեպքում, քաղաքացին մեխանիկորեն դուրս կմնա նպաստի համակարգից»,- պարզաբանել է փոխնախարարը։Ժաննա Անդրեասյանը ներկայացրել է նախարարության քաղաքականության մի քանի կարևոր սկզբունքներ, որոնց ուղղությամբ արդեն իսկ տարվում են նպատակային աշխատանքներ։ Ըստ այդմ, նախատեսվում է արդյունավետ քայլեր ձեռնարկել ծայրահեղ աղքատության վերացման ուղղությամբ, նաև կներդրվի սոցիալական դեպքի վարման տեղեկատվական համակարգ, որը մինչև օգոստոսի վերջ ամբողջովին պատրաստ կլինի գործարկման։ Հանդիպման ընթացքում փոխնախարարը կարևորել է տնայցերի ֆինանսավորման մեխանիզմի կիրառումը, ինչը հնարավորություն կտա գալիք տարվանից ունենալ առանձնացված ֆինանսավորման կարգ և այցերի պատշաճ կազմակերպում. «Անչափ կարևոր է ընտանիքների հետ տարվող աշխատանքը՝ երեխաների մուտքը խնամքի հաստատություններ կանխարգելելու տեսանկյունից։ Նախնական կարիքի գնահատումը, երեխայի հետագա խնամքի կազմակերպման հնարավորությունների բացահայտումը ոչ միշտ է պատշաճ իրականացվում, այնինչ դա հաճախ ճակատագրական նշանակություն է ունենում, որովհետև դրանից ելնելով է որոշվում՝ երեխային ուղեգրե՞լ շուրջօրյա խնամքի հաստատություն, թե՞ նրա խնամքը որևէ այլ տարբերակով կազմակերպել։Պետք է ուշադրության կենտրոնում պահել կյանքի դժվարին իրավիճակում հայտնված երեխաների և նրանց ընտանիքների կարիքների գնահատումը՝ որպես առանցքային խնդիր»,- ասել է Ժ․Անդրեասյանը։ Փոխնախարարը Սոցիալական աջակցության տարածքային գործակալությունների ներկայացուցիչներին հանձնարարել է ճշգրտել իրենց գործունեության շրջանակում գտնվող նպաստառու և աշխատունակ անդամ ունեցող ընտանիքների թիվը, նրանց տվյալները, ինչպես նաև՝ վերջիններիս հետ քննարկել զբաղվածության անցնելու՝ պարտադիր նախապայմանի հարցը։Ժ․Անդրեասյանը նաև անհրաժեշտ է համարել փոխել այն թյուրընկալումը, որ ՍԱՏԳ-ները նպաստ բաժանելու գործառույթ իրականացնող օղակներ են և կարևորել այս ուղղությամբ տարվող արդյունավետ աշխատանքի ակտիվացումը։

13:08 - 24 հունիսի, 2019

Առաջարկվում է սոցիալական աջակցության տարածքային մարմինները տեղափոխել սոցապ նախարարության ենթակայության ներքո |hetq.am|

09:20 - 20 հունիսի, 2019

Նորքի տուն-ինտերնատում կոսմետիկ վերանորոգում է իրականացվում. Աշխատանքի և սոցիալական հարցերի նախարարությունը հանձնարարականներ է տվել |armenpress.am|

armenpress.am։ ՀՀ աշխատանքի և սոցիալական հարցերի նախարարության աշխատակիցներն այցելել են Երևանի Նորքի տուն-ինտերնատ՝ «Ֆեյսբուք» սոցիալական ցանցի օգտատեր Ռուզաննա Սահակյանի հրապարակած լուսանկարների հետքերով:ՀՀ աշխատանքի և սոցիալական հարցերի նախարարի առաջին տեղակալ Գեմաֆին Գասպարյանը նշեց, որ իրենք չգիտեն, թե լուսանկարները երբ են արվել և ում կողմից: «Այդ հրապարակումը տեսնելուն պես, որտեղ պայմաններն ուղղակի սահմռկեցուցիչ էին (ոչ մաքուր հատակ, կիսափլված պատեր, անմխիթար պայմաններ-խմբ.)՝ աշխատակազմի ղեկավարը, մի քանի գործընկեր և ես գնացել էինք տուն-ինտերնատ, որպեսզի տեղում ինքներս հասկանանք բոլոր խնդիրներն ու հասկանանք մեր հետագա քայլերը: Մեր այցի մասին չէինք տեղեկացրել ոչ ոքի: Այնտեղ մաքուր էր ամեն ինչ, խնդիր չկար, սակայն հստակ կարող եմ ասել, որ այդ մասնաշենքում կապիտալ վերանորոգման կարիք, միանշանակ, կար: Նկարներն արված էին այն բաժանմունքից, որտեղ անկողնային հիվանդ տարեցներ են պառկած: Ես եղել եմ այդ հատվածում նույնպես և կարող եմ ասել, որ այնտեղ այդ վիճակը չէր, ինչ նկարներում է»,- նշեց Գասպարյանը և հավելեց, որ 1991 թվականից ի վեր այնտեղ վերանորոգման որևէ աշխատանք չի կատարվել:Նրա խոսքով՝ կողքի մասնաշենքի 3-րդ և 4-րդ հարկերը համեմատաբար բարվոք վիճակում են գտնվում: Գասպարյանն ընդգծեց, որ արդեն իսկ հանձնարարականներ են տրվել, որպեսզի նախարարության բյուջեի հնարավորությունների շրջանակում հարցերը լուծվեն: Հունիսի 19-ի առավոտվանից այդ հարցի շուրջ գործողություններ են իրականացվում:Նախարարի առաջին տեղակալը նկատեց, որ նմանատիպ իրավիճակ է նաև մի շարք այլ տուն-ինտերնատներում, և դրա լուծումը տեսնում է ապաինստիտուցիոնալացման քաղաքականություն վարելու մեջ:Նրա պնդմամբ՝ այդ քաղաքականության մի մասը կազմում է այն, որ պետք է բարելավել այն պայմանները, որտեղ ապրում են տարեցները և մեծ շենքերը դարձվեն համայնքային տներ:«Այսօր առավոտվանից իմ հանձնարարությամբ սկսվել են որոշակի ոչ կապիտալ՝ կոսմետիկ վերանորոգման աշխատանքներ, որպեսզի տարածքը բերվի համեմատաբար նորմալ վիճակի: Այդ փոքրիկ վերանորոգմամբ, իհարկե, չենք սահմանափակվի, և մենք պլանավորում ենք ավելի մեծ աշխատանքներ իրականացնել: Հույս ունեմ, որ աշնանը փոքր տներ կունենանք, որպեսզի մեծ հաստատությունները փոքրացվեն և լինեն փոքր համայնքային տներ՝ մոտ 8-12 հոգու համար»,- նշեց ՀՀ աշխատանքի և սոցիալական հարցերի նախարարի առաջին տեղակալը: Գասպարյանը նաև շեշտեց և կարևորեց այն հանգամանքը, որ անգամ բարի նպատակներով նմանատիպ նկարներ հրապարակելու դեպքում չպետք է երևան այդ մարդկանց դեմքերը, քանի որ նրանք այնտեղ գտնվում են անօգնական վիճակում կամ չեն տվել լուսանկարվելու իրենց համաձայնությունը:

09:01 - 20 հունիսի, 2019

Նախարարությունը խնդիր է դրել բարեփոխել սոցիալական աջակցության համակարգը. Զարուհի Բաթոյան |armenpress.am|

armenpress.am։ ՀՀ աշխատանքի և սոցիալական հարցերի նախարարությունն իր առաջ խնդիր է դրել նախ և առաջ հասնել ամենախոցելի խմբերին, ովքեր դուրս են մնացել համակարգից համապատասխան քաղաքականության և ընթացակարգերի բացակայության պատճառով: Այս մասին Ազգային ժողովում 2018 թվականի պետական բյուջեի կատարման մասին հաշվետվության քննարկմանն իր ելույթում ասաց ՀՀ աշխատանքի և սոցիալական հարցերի նախարար Զարուհի Բաթոյանը:«Հակված ենք մշտապես թարմացնել և փոփոխություններ կատարել գործող ծրագրերում:ՀՀ աշխատանքի և սոցիալական հարցերի նախարարությունն իր առջև խնդիր է դրել բարեփոխել սոցիալական աջակցության համակարգն այնպես, որ բոլոր տեսակի ծառայություները` ֆինանսական և ոչ ֆինանսական, մատուցվեն անհատական կարիքի հիմա վրա` խրախուսելով մարդկանց կարողությունների զարգացումը` աշխատանքի և զբաղվածության հնարավորությունների մեծացման միջոցով»,-ասաց Բաթոյանը:Նախարարությունը նախատեսում է տեղեկատվական տեխնոլոգիաների կիրառման միջոցով քաղաքացիներին մատուցվող ծառայությունները դարձնել հասանելի և մատչելի` նվազագույնի հասցնելով մարդկային գործոնը և շփումը պետական մարմինների հետ, եթե դրա անհրաժեշտությունը չկա:ՀՀ աշխատանքի և սոցիալական հարցերի նախարարության միջոցով իրականացվող ծրագրերի գծով փաստացի ծախսը 2018 թվականին կազմել է շուրջ 352 մլրդ դրամ, որից նախարարության միջոցով 10 մլրդ դրամ, իսկ հիմնական մասը` սոցիալական ապահովության ծառայության միջոցով:

07:31 - 20 հունիսի, 2019

Սոցապն առաջարկել է չընդունել նվազագույն աշխատավարձը բարձրացնող՝ «Իմ քայլի» նախագիծը |panarmenian.net|

07:22 - 19 հունիսի, 2019

ՀՀ աշխատանքի և սոցիալական հարցերի փոխնախարարը մասնակցել է «Սոցիալական ձեռնարկատիրության ուսուցման հեռանկարները Հայաստանում» համաժողովին

ՀՀ աշխատանքի և սոցիալական հարցերի նախարարի տեղակալ Արման Ուդումյանը մասնակցել է «Սոցիալական ձեռնարկատիրության ուսուցման հեռանկարները Հայաստանում» համաժողովին, որի ընթացքում քննարկվել է Հայաստանի սոցիալական ձեռնարկատիրության ոլորտում կրթության ներկա վիճակը, ձեռքբերումներն ու զարգացման հնարավորությունները:Նախարարի տեղակալը ներկայացրել է նախարարության կողմից իրագործվող զբաղվածության ծրագրերը, կարևորել նաև մասնագիտական դասընթացների և վերապատրաստումների իրականացումը, ինչը խոցելի խմբերին հնարավորություն կտա մուտք գործել աշխատաշուկա։ Նա նշել է նաև, որ երբեմն բյուջետային սուղ միջոցներով իրականացվող ծրագրերը ի զորու չեն ամբողջովին լուծելու զբաղվածության խնդիրները, և այս առումով, սոցիալական ձեռնարկատիրությունը կարող է լրացնել այդ բացը։ Համաժողովի ընթացքում կարևորվել է նաև սոցիալական ձեռնարկատիրության բնագավառում հայաստանյան ուսուցանողների (թրեյներների) կարողությունների զարգացումը՝ համապատասխան մեթոդաբանության, գործիքակազմի և ուսուցողական ծրագրերի ապահովմամբ։ Այն նպատակ ունի նպաստել սոցիալական խնդիրների լուծմանն ու ոլորտային արժեքների ստեղծմանը։

11:42 - 17 հունիսի, 2019

Հայաստանում կստեղծվի Սոցիալական շտապօգնության համակարգ |armenpress.am|

armenpress.am։ Աշխատանքի և սոցիալական հարցերի նախարարի տեղակալ Ժաննա Անդրեասյանը հանդիպում է ունեցել գործընկեր հասարակական կազմակերպությունների հետ: Այս մասին հայտնեցին ՀՀ աշխատանքի և սոցիալական հարցերի նախարարության հասարակայնության հետ կապերի բաժնից:«Սոցիալական շտապօգնության համակարգի ներդրման գաղափարը քննարկվել է դեռևս նախորդ տարիներին, բայց այժմ գործընթացի տրամաբանական ավարտին ենք հասել: Այս համակարգի հիմնական նպատակը, ըստ էության, հրատապ օգնության կարիքների համակարգված հավաքագրումն ու արձագանքումն է:Այն ենթադրում է ապակենտրոն աշխատանք, այսինքն՝ պետք է ունենանք սերտ ներգրավվածություն՝ թե՛ տարածքային մարմինների, և թե՛ գործող հասարակական կազմակերպությունների կողմից, որպեսզի շատ ավելի արդյունավետ ու հասցեական կարողանանք կարգավորել բոլոր խնդիրները»,- ասել է փոխնախարարը: Փոխնախարարը նշել է, որ ստեղծվելու է մի հարթակ, որտեղ ենթադրվում է սերտ համագործակցություն պետական մարմինների, հասարակական կազմակերպությունների ու անհատների միջև և որտեղ հնարավոր կլինի քաղաքացիների կարիքներն ամբողջությամբ, համակարգված հասցեագրել.«Բուն գործընթացը պատկերացնում ենք տարբեր կազմակերպությունների և անձանց ներգրավմամբ, իսկ տրվող աջակցությունը՝ ավելի համակարգված ձևով, որպեսզի ունենանք և՛ համաչափ բաշխում, և՛ կարիքների համաչափ հասցեագրում տարբեր բնակավայրերում: Սա կօգնի նաև արմատավորել փոխօգնության մշակույթը համայնքային մակարդակում, որը շատ կարևոր եմ համարում»:Նախարարության սոցիալական աջակցության վարչության պետ Աստղիկ Մինասյանը տեղեկացրել է, որ գործընկեր կազմակերպությունների աջակցությամբ նախատեսվում է օգտագործման պիտանի մթերքի և այլ բնաիրային օգնության (օրինակ՝ կահույք, հագուստ) հավաքագրում, որը կբավարարի սահմանված անվտանգության չափանիշները. «Նախատեսել ենք ժամանակ առ ժամանակ որոշակի ծրագրեր իրականացնել նաև այն սահմանամերձ բնակավայրերում, որոնք մարտական գործողությունների հետևանքով սոցիալական որոշակի ռիսկեր ունեն»,- հավելել է Ա. Մինասյանը:Պատասխանելով հասարակական կազմակերպությունների ներկայացուցիչների՝ իրենց մասնակցության և գործառույթների վերաբերյալ հարցին, փոխնախարարը տեղեկացրել է, որ ծրագրում ներգրավվելիք կազմակերպությունները պետք է ցանկություն հայտնեն մասնակցելու աշխատանքներին, գրանցվեն, որից հետո հետագա գործողությունները կհամակարգվեն հարթակում: Իսկ համակարգի գործունեության վերահսկման ապահովման հարցի վերաբերյալ Ժ. Անդրեասյանը նշել է, որ նախատեսվում է համակարգումը պատվիրակել՝ որպես առանձին գործառույթ. «Ունենալու ենք առնվազն հինգ հոգի, որոնց հիմնական գործունեությունը և աշխատանքը լինելու է սոցիալական շտապօգնության համակարգի գործարկումն ու վերահսկողությունը: Երբ համակարգը կզարգանա և իսկապես կդառնա փոխօգնության մշակույթ, նախարարության մասնակցությունը այլևս չի պահանջվի: Մենք ուղղակի հարթակը կհամակարգենք, որպեսզի մարդիկ կարողանան տեղեկատվության փոխանցում իրականացնել և կկարողանանք ուղղորդել այն կազմակերպություններին, որոնք ուզում են որոշակի աջակցություն ցուցաբերել անհատներին... Ու, քանի որ կա համակարգում և որակական նվազագույն պահանջներ, օրինակ՝ սննդամթերքի, բնաիրային օգնության և ծառայությունների վերաբերյալ, մենք նաև կերաշխավորենք, որ այդ աջակցությունը սահմանված մակարդակից ցածր չլինի: Այսինքն՝ պետությունը պետք է համակարգի և երաշխավորի նվազագույն որակակական չափանիշները»,- նշել է Ժաննա Անդրեասյանը:

08:18 - 05 հունիսի, 2019

Կոռուպցիոն չարաշահումներ կատարելու համար ՀՀ Սոցիալական ապահովության պետական ծառայության 6 աշխատակցի մեղադրանքներ են առաջադրվել

ՀՀ աշխատանքի և սոցիալական հարցերի նախարարության սոցիալական ապահովության պետական ծառայությունում (ՍԱՊԾ) բացահայտված՝ բենզինի և գործուղման ծախսերի հատուցման գումարների հափշտակության համար մեղադրանք է առաջադրվել ՀՀ աշխատանքի և սոցիալական հարցերի նախարարության 5 աշխատակցի:Ինչպես տեղեկացվել է ավելի վաղ, 2018թ. հոկտեմբերի 15-ին ՀՀ գլխավոր դատախազություն է ստացվել ՀՀ ֆինանսների նախարարի հանձնարարագրերի հիման վրա 2017թ. դեկտեմբերից 2018թ. հունվարին իրականացված՝ 2014-ից 2016 թվականներին ՍԱՊԾ-ում պետական բյուջեի ծախսերի կատարմանն ուղղված գործունեության, արտաբյուջետային միջոցների գոյացման և օգտագործման ճշտության ստուգման վերաբերյալ ՀՀ աշխատանքի և սոցիալական հարցերի նախարարի գրությունը և կից փաստաթղթերը:Վերջիններիս ուսումնասիրության արդյունքում ՀՀ գլխավոր դատախազության կոռուպցիոն և տնտեսական գործունեության դեմ ուղղված հանցագործությունների գործերով վարչությունում 2018թ. հոկտեմբերի 18-ին ՀՀ քրեական օրենսգրքի 308-րդ հոդվածի 2-րդ մասի հատկանիշներով հարուցվել էր քրեական գործ և նախաքննություն կատարելու համար ուղարկվել ՀՀ քննչական կոմիտե:Նախաքննությամբ պարզվել է, որ 2014թ. հունվարից 2017թ սեպտեմբեր ընկած ժամանակահատվածում ՀՀ ՍԱՊԾ աշխատակիցների կողմից ծառայության տարբեր տարածքային բաժիններ երթևեկելու և գործուղման մեկնելու համար ծառայողական ավտոմեքենաները վառելիքով ապահովելու նպատակով ներկայացված զեկուցագրերի, երթևեկելու թույլտվություն տալու բանավոր դիմումների հիման վրա Ծառայության պետի և աշխատակազմի ղեկավարի կողմից արձակվել են համապատասխան հրամաններ: Դրանց հիման վրա հատկացվել է ընդհանուր 9307 լիտր բենզին: Սակայն նախաքննությամբ պարզվել է, որ Ծառայության աշխատակիցներն իրականում գործուղումների չեն մեկնել և շահադիտական դրդումներով խարդախությամբ հափշտակել են հատկացված բենզինը՝ պետությանը պատճառելով ընդհանուր 3.567.800 ՀՀ դրամի առանձնապես խոշոր չափի վնաս:Ձեռք բերված փաստական տվյալներով հիմնավորվել է նաև, որ աշխատակիցների կողմից Ծառայության աշխատակազմ են ներկայացվել համապատասխան տարածքային բաժիններ գործուղված լինելու հանգամանքը հավաստող՝ տարածքային բաժինների պետերի ստորագրությամբ և կնիքով հաստատված պաշտոնեական փաստաթուղթ հանդիսացող կեղծ գործուղման վկայականներ: Դրանց հիման վրա խաբեությամբ հափշտակվել է ընդհանուր՝ 636.400 ՀՀ դրամ գումար:Բավարար ապացույցների հիման վրա տարածքային բաժիններ գործուղման և երթևեկի համար հատկացված բենզինի և գործուղման ծախսերի հատուցման գումարների հափշտակության համար ՀՀ աշխատանքի և սոցիալական հարցերի նախարարության 6 աշխատակցի (տեղեկատվական տեխնոլոգյաների և ռիսկերի կառավարման վարչության պետ, տնտեսական բաժնի պետ, 2 գլխավոր մասնագետ, պարետ, խորհրդատու) մեղադրանքներ են առաջադրվել ՀՀ քրեական օրենսգրքի 178-րդ հոդվածի 2-րդ մասի 1-ին, 1.1-րդ, 2-րդ, 314-րդ հոդվածի 1-ին, 325-րդ հոդվածի 1-ին մասով:Արձանագրված խախտումներով պատճառված վնասն ամբողջությամբ վերականգնվել է:Նախաքննությունը շարունակվում է:

09:22 - 03 հունիսի, 2019

Արտակ Գրիգորյանն ազատվել է Աշխատանքի եւ սոցիալական հարցերի նախարարության գլխավոր քարտուղարի պաշտոնից

ՀՀ վարչապետ Նիկոլ Փաշինյանի որոշմամբ Արտակ Գրիգորյանն ազատվել է աշխատանքի եւ սոցիալական հարցերի նախարարության գլխավոր քարտուղարի պաշտոնից:

09:09 - 06 մայիսի, 2019

Խստորեն դատապարտում եմ «Իմ մարմինն անձնական է» գրքի շնորհանդեսի խափանման փորձը․ Աշխատանքի և սոցիալական հարցերի նախարար

Խստորեն դատապարտում եմ այսօր «Բուկինիստ» սրճարանում տեղի ունեցածը, երբ փորձ է արվել խափանել «Սեռական բռնության ճգնաժամային կենտրոն» ՀԿ-ի կազմակերպած «Իմ մարմինն անձնական է» գրքի շնորհանդեսը: Մի գրքի, որի նպատակն է կանխարգելել երեխաների նկատմամբ սեռական բռնությունը։ Քննչական կոմիտեի տվյալների համաձայն՝ 2017 թվականին քննված սեռական բնույթի 161 հանցագործություններից 101-ը երեխաների նկատմամբ է եղել։ Բռնության դեմ պայքարի ամենաարդյունավետ ճանապարհը կրթությունն է։ Առանց ծնողների և երեխաների իրազեկությունը բարձրացնելու անհնար է պաշտպանել նրանց։ Վերը նշված կազմակերպությունը նախարարության միակ գործընկերն է, որը Հայաստանում մատուցում է մասնագիտացված ծառայություններ սեռական բռնության ենթարկված անձանց: Կազմակերպության ջանքերով 2013 թ. ՀՀ քրեական օրենսգրքում փոփոխություններ կատարվեցին, և ավելի խիստ պատասխանատվություն սահմանվեց անչափահասների նկատմամբ սեռական բռնության հանցագործությունների համար: Մեր գործընկեր կազմակերպությունները, որոնք աջակցում են մեզ մեր պարտավորությունները իրականացնելու հարցում, պիտի կարողանան իրենց դժվար աշխատանքն անել մի միջավայրում, որտեղ չկա բռնություն կամ բռնության սպառնալիք իրենց և իրենց ընտանիքի անդամների նկատմամբ: Բռնությունը չարիք է, իսկ անտեղյակությունը և ապատեղեկատվության տարածումը` պարարտ հող չարիքի արմատավորման համար։

20:49 - 04 մայիսի, 2019

Աշխատանքի և սոցիալական հարցերի նախարարությունը դիմել է դատախազություն

ՀՀ աշխատանքի և սոցիալական հարցերի նախարարությունը ՀՀ գլխավոր դատախազություն է ուղարկել 4 նույնաբովանդակ դիմում-բողոքներ: Կասկածի տեղիք տված գրությունները վերաբերում են «Վարդենիսի նյարդահոգեբանական տուն-ինտերնատ» ՊՈԱԿ-ի տնօրենի նորանշանակ ժ/պ Կարեն Խաչատրյանի կողմից նախարարություն ներկայացված փաստաթղթերի հավաստիությանը: Հատկանշական է, որ չորս տարբեր քաղաքացիների կողմից նախարար Զարուհի Բաթոյանին հասցեագրված և վերահասցեագրված դիմում-բողոքները ամբողջությամբ կրկնում են իրար: Դիմում-բողոքների հասցեատերերի ինքնության, դրանցում ներկայացված տվյալների հավաստիության ստուգման, ինչպես նաև՝ հետագա գործընթացները իրավական դաշտ բերելու ակնկալիքով՝ նախարարությունը դիմել է ՀՀ գլխավոր դատախազություն՝ ներկայացնելով ստացված դիմում-բողոքները և ունեցած մյուս փաստաթղթերը:

08:10 - 27 մարտի, 2019