Բելառուս

Պուտինի օրակարգում Լուկաշենկոյի հետ հանդիպում նախատեսված չէ |24news.am|

24news.am: ՌԴ նախագահ Վլադիմիր Պուտինի օրակարգում Բելառուսի առաջնորդ Ալեքսանդր Լուկաշենկոյի հետ հանդիպում նշանակված չէ: Այս մասին հայտնել են Կրեմլի մամուլի ծառայությունից: «Օրակարգում նման հանդիպում չկա»,- հայտնել են մամուլի ծառայությունից: Օգոստոսի 9-ին Բելառուսում նախագահական ընտրություններ են անցկացվել, որոնց հաջորդել են բողոքի զանգվածային ակցիաները. դրանք վերածվել են ոստիկանության հետ բախումների:

16:34 - 13 օգոստոսի, 2020

Տիխանովսկայային ժամանակ է հարկավոր որոշում կայացնելու համար. Լիտվայի արտգործնախարար |tert.am|

tert.am: Բելառուսի նախագահի ընդդիմադիր թեկնածու Սվետլանա Տիխանովսկայային ժամանակ է հարկավոր հետագա գործունեության վերաբերյալ որոշում կայացնելու համար: Այս մասին այսօր` օգոստոսի 13-ին, Ziniu radijas ռադիոկայանի եթերում հայտարարել է Լիտվայի արտգործնախարար Լինաս Լինկյավիչուսը, գրում է korrespondent.net կայքը: Լինկյավիչուսը նշել է, որ Տիխանովսկայայի համար ընդմիջման կարիքը պայմանավորված է այն հանգամանքով, որ նա ծանր պայմաններում է հայտնվել: «Եկեք նրան ժամանակ տանք, որի կարիքը նա ունի վերապրած սթրեսից հետո, որոշումներ ընդունելու համար, որոնց մասին նա ինքը կհայտնի: Տիխանովսկայան քաղաքական գործիչ չէ, դրա մասին ինքը նույնպես հայտարարել է, նրա ուսերին մեծ ծանրություն է ընկել, որին նա, հնարավոր է, պատրաստ չէր»,-ասել է Լինկյավիչուսը: Նա նաև Տիխանովսկայային «ընտրությունների խորհրդանիշ» է անվանել, և կարծում է, որ նրա գործունեությունը «խթան է հանդիսացել այն հասկացության համար, որ Բելառուսում պետք է ձևավորվի քաղաքացիական հասարակություն»: Արտգործնախարարի խոսքով` Տիխանովսկայան ներկայում 14-օրյա ինքնամեկուսացման մեջ է, ինչը պարտադիր է Բելառուսից Լիտվա եկած անձանց համար: Ավելի վաղ Լինկյավիչուսը հայտարարել էր, որ Բելառուսի նախագահի թեկնածու, ընդդիմադիր Սվետլանա Տիխանովսկայան Լիտվայում է՝ անվտանգության մեջ:

14:58 - 13 օգոստոսի, 2020

Ուկրաինան բողոքի 2 նոտա է հղել Բելառուսին |tert.am|

tert.am: Ուկրաինայի արտգործնախարարությունը բողոքի երկու նոտա է հղել Բելառուսի իր գործընկերներին` պահանջելով տեղեկություն տրամադրել Բելառուսում անցկացվող բողոքի ակցիաների ժամանակ ձերբակալված ուկրաինացիների մասին: Այս մասին տեղեկացնում է korrespondent.net կայքը` հղում տալով Ուկրաինայի արտգործնախարար Դմիտրի Կուլեբային: «Ուկրաինան կառուցողական երկխոսության է տրամադրված Բելառուսի հետ, բայց ես ցանկանում եմ ընդգծել, որ մենք շատ կոշտ կերպով պաշտպանելու ենք Բելառուսում Ուկրաինայի քաղաքացիների շահերն ու իրավունքները: Դրա վերաբերյալ ոչ ոքի մոտ թող որևէ պատրանք չլինի»,-հայտարարել է Կուլեբան: Արտգործնախարարը տեղեկացրել է, որ Բելառուսի իշխանությունները տեղեկություն չեն տրամադրում ձերբակալված ուկրաինացիների մասին, և հյուպատոսը հերթով այց է կատարում քաղաքացիների ժամանակավոր պահման վայրեր` տեղեկանալու ուկրաինացիների գտնվելու վայրի մասին: «Մենք անհապաղ հյուպատոսի հանդիպումն ենք պահանջում այդ ձերբակալված անձանց հետ»,-ընդգծել է նախարարը: Կուլեբան հայտարարել է նաև, որ իրենք պահանջում են ազատ արձակել ձերբակալված ուկրաինացիներին` նրանց հայրենիք վերադարձնելու համար: Առայժմ հայտնի է Ուկրաինայի՝ ձերբակալված 3 քաղաքացու մասին:

14:41 - 13 օգոստոսի, 2020

Երկուշաբթի՝ 3000, երեքշաբթի՝ 2000, չորեքշաբթի՝ 1000. Բելառուսի ՆԳՆ-ն հայտնել է՝ քանի մարդ է ձերբակալվել հետընտրական ցույցերի ժամանակ |tert.am|

tert.am: Բելառուսի իշխանությունները հայտնել են, որ հետընտրական բողոքի ակցիաների և ցույցերի ընթացքում ձերբակալվել է ավելի քան 6000 մարդ, գրում է The Guardian-ը՝ մանրամասնելով, որ կիրակի կայացած նախագահական ընտրությունների վիճահարույց արդյունքների հրապարակումից հետո երկրում չեն դադարում ցույցերը, որոնք զսպվում են ամենախիստ ու դաժան ձևով:Բելառուսի ներքին գործերի նախարարության փոխանցմամբ՝ ընտրություներից հետո տեղի ունեցած ցույցերի ժամանակ երկուշաբթի ձերբակալվել է 3000, երեքշաբթի՝ 2000, չորեքշաբթի՝ հազար մարդ:Ընդդիմությունը ոստիկանությանը մեղադրում է ցուցարարներին բռնության ենթարկելու ու դրա համար անպատիժ մնալու համար: Հրապարակված տեսանյութերից մեկում երևում է՝ ինչպես են ոստիկանները ռետինե փամփուշտներով կրակում անցորդներին ու մահակներով ծեծում ցուցարարներին:Պետական հեռուստատեսությամբ ցուցադրվել է մի տեսանյութ, որում իրավապահներից մեկը ծեծված ցուցարարներին արհեստականորեն փոխված ձայնով հարցնում է.«Դե ինչ՝ էլի՞ եք ուզում հեղափոխություն անել»: Դրան ի պատասխան ցուցարարները տարուբերում են գլուխները:Նշվում է, որ հուսահատ ընտանիքներն ամեն առավոտ հավաքվում են ոստիկանական բաժանմունքի մոտ՝ իրավապահներին խնդրելով որևէ տեղեկություն փոխանցել ցույցերի ժամանակ անհետ կորած իրենց հարազատների մասին: Այդ ֆոնին ժամանում են նոր ոստիկանական մեքենաներ՝ ձերբակալված ցուցարարների նորանոր խմբերով: Նշվում է, որ ձերբակալվածների մեջ կան նաև տասնյակ ռուս լրագրողներ:Երկրի նախագահ Ալեքսանդր Լուկաշենկոն, անդրադառնալով զանգվածային ձերբակալություններին, նշել է.«Այսպես կոչված ցուցարարների մեծ մասը քրեական անցյալով ու ներկայում գործազուրկ մարդիկ են»:Մինչդեռ Եվրոպական միությունը սպառնացել է պատժամիջոցներ կիրառել ընտրությունների հավանական կեղծման և ցուցարարների նկատմամբ դաժան վերաբերմունքի համար: Եվրամիության արտաքին հարաբերությունների գծով բարձրագույն հանձնակատար Ժոզեպ Բորելը հայտարարել է, որ կիրակի օրվա ընտրությունները «ո՛չ ազատ, ո՛չ էլ ազնիվ» են եղել: Բարձրաստիճան պաշտոնյան խոստացել է խորապես վերանայել ԵՄ-ի՝ Բելառուսի հետ հարաբերությունները՝ սպառնալով պատժամիջոցներ սահմանել նրանց նկատմամբ, ովքեր պատասխանատու են բռնության կիրառման, չարդարացված ձերբակալությունների և ընտրակեղծարարության համար:

13:38 - 13 օգոստոսի, 2020

Բելառուսում չարտոնված ակցիաների ընթացքում 103 իրավապահ Է տուժել |armenpress.am|

armenpress.am: Բելառուսի իրավապահ մարմինների ավելի քան հարյուր աշխատակիցներ են տուժել չարտոնված ակցիաների ընթացքում, որոնք տեղի են ունեցել օգոստոսի 9-ից մինչեւ 13-ն ընկած ժամանակամիջոցում: Օգոստոսի 13-ին այդ մասին հայտնել են հանրապետության ներքին գործերի նախարարությունում: «Ընդամենն օգոստոսի 9 – 13-ը քաղաքացիների հակաիրավական գործողությունների հետեւանքով տուժել Է 103 իրավապահ, որոնցից 28-ը հոսպիտալացված Է»,- տեղեկացրել են ներքգործնախարարությունում: Ինչպես նշված Է, հանրապետությունում անկարգությունները կորցրել են զանգվածայնությունը, բայց ագրեսիայի մակարդակն իրապահ մարմինների աշխատակիցների նկատմամբ մնում Է բարձր, հաղորդել Է ՏԱՍՍ-ը:

13:26 - 13 օգոստոսի, 2020

Մինսկում ՕՄՕՆ-ականները կրակ են բացել պատշգամբներից ցուցարարներին հրահանգներ տվող բնակիչների ուղղությամբ |tert.am|

tert.am: Մինսկում ՕՄՕՆ-ի հատուկջոկատայինները սկսել են կրակել մարդկանց ուղղությամբ, որոնք խորհուրդներ էին տալիս ցուցարարներին: Ինչպես հայտնում է РИА Новости-ն, միջադեպը տեղի է ունեցել Ձերժինսկու պողոտայում`մետրոյի «Գրուշևկա» կայարանի մոտ: Հավաքված մարդկանց են մոտեցել ՕՄՕՆ-ականները, որից հետո ցուցարարները սկսել են փախչել: Մոտակա բարձրահարկ շենքերի պատուհաններից նայող բնակիչները բղավել են` հուշելով փախչողներին, թե ուր թաքնվեն, ինչին ի պատասխան ուժայինները մի քանի անգամ կրակ են բացել պատշգամբում գտնվողներին։ Ավելի վաղ բելառուսցիները սկսել էին հավաքվել քաղաքի տարբեր հատվածներում, ՕՄՕՆ-ականները նույնպես տեղակայվել էին քաղաքի կենտրոնում:

10:06 - 13 օգոստոսի, 2020

Բելառուսի դեսպանը Չեխիայի ԱԳՆ է կանչվել՝ Լուկաշենկոյի հայտարարությունների վերաբերյալ բացատրություններ տալու համար |tert.am|

tert.am: Չեխիայում Բելառուսի դեսպանը ԱԳՆ է կանչվել՝ բացատրություն տալու Ալեքսանդր Լուկաշենկոյի արած այն հայտարարության վերաբերյալ, թե Մինսկում տեղի ունեցած հետընտրական բողոքի ցույցերը Չեխայից են կառավարվել, հայտարարել է Չեխայի ԱԳ նախարար Թոմաշ Պետրժիչեկը: Լուկաշենկոն հայտարարել էր, որ նախագահական ընտրություններից հետո Մինսկում մեկնարկած բողոքի ցույցերը Չեխիայից, Մեծ Բրիտանիայից և Լեհաստանից են ուղղորդվել: Չեխիայի արտգործնախարարը հայտարարել է նաև, որ Բելառուսի դեսպանին է փոխանցել իր դիրքորոշումն առ այն, որ Բելառուսում տեղի ունեցողն անընդունելի է, քանի որ, ըստ չեխ պաշտոնյայի, ցույցերը ճնշվում են, ցուցարարների նկատմամբ դաժան վերաբերմունք է ցուցաբերվում, իսկ նախընտրական քարոզարշավի ժամանակ ճնշումներ են եղել:

09:43 - 13 օգոստոսի, 2020

Պոմպեոն հավանական է համարում, որ Բելառուսի դեմ պատժամիջոցներ սահմանվեն |tert.am|

tert.am: ԱՄՆ պետքարտուղար Մայք Պոմպեոն հայտարարել է, որ Բելառուսի դեմ կարող են պատժամիջոցներ սահմանվել, և որ հավանական է նավթի մատակարարման դադարեցումը, հաղորդում է ТАСС-ը: «Ի՞նչ պետք է անենք թե՛ միակողմանի, թե՛ բազմակողմանի հարթությունում, որպեսզի Բելառուսի քաղաքացիների համար նպաստավոր արդյունքների հասնենք, գնալ այդ քայլին պատժամիջոցների՞ թե՞ մատակարարումների դադարեցման միջոցով․ պետք է որոշում կայացնել այս հարցում»,- նշել է Պոմպեոն: Պետքարտուղարն ասել է, որ Բելառուսում տեղի ունեցած իրադարձություններին արձագանքելու հարցում պետք է աշխատեն Եվրամիության հետ:

09:25 - 13 օգոստոսի, 2020

Բելառուս․ բողոքների 4-րդ օրը՝ ամփոփ

Բելառուս․ բողոքների 4-րդ օրը՝ ամփոփ։ • Օգոստոի 12-ի ցերեկը Մինսկում ու Բելառուսի այլ քաղաքներում կանայք դուրս էին եկել ակցիաների ու կազմել կենդանի շղթաներ։ Բժշկական համալսարանի մոտ բժիշկներն ակցիա էին կազմակերպել; • Երեկոյան ցուցարարները նոր մարտավարություն էին կիրառում՝ փորձելով փակել ճանապարհներն, ինչն այնքան էլ չէր հաջողվում։ Մարդիկ փորձում էին կենդանի շղթաներ կազմել նաև հետիոտնի անցումների վրա, սակայն այդ շղթաներն արագորեն քանդվում էին; • Ակցիաները հիմնականում տեղի էին ունենում կենտրոնից հեռու։ • Ուժայինները ավելի քիչ էին կիրառում հատուկ տեխնիկա, երեկ երեկոյան Մինսկում ընդամենը մի քանի անգամ են կիրառվել լուսաձայնային նռնակներ։ • Բերման էին ենթարկում հիմնականում առանձին վայրերում։ • Երեկ պետական մի շարք հեռուստաալիքներից մի քանի լրագրող դուրս է եկել աշխատանքից։ • Համացանցում սկսեցին տարածվել լուսանկարներ ու հոլովակներ, թե ինչպես են զինծառայողներն ու ոստիկանները հանում ու դեն նետում իրենց համազգեստը։ Աղբյուրը՝ bbc.com Թարգմանությունը՝ Լիլիթ Հարությունյանի

09:10 - 13 օգոստոսի, 2020

Ընդդիմության աջակիցները սկսել են հավաքվել Մինսկում. ոստիկանությունը վերահսկողության տակ է առել քաղաքի կենտրոնական հատվածը |tert.am|

tert.am: Մինսկի տարբեր հատվածներում հավաքվում են բելառուսական ընդդիմության կողմնակիցները: Ինչպես փոխանցում է РИА Новости-ն, բելառուսցիները հավաքվում են մի քանի շրջանում, նրանք կենդանի շղթաներ են կազմել փողոցներում: Նշվում է, որ շատերը ծաղիկներ են բերում` ի հիշատակ բողոքի ցույցերի ժամանակ զոհված քաղաքացու: Ներքին զորքերն ու ոստիկանությունը նույնպես տեղակայվել են քաղաքի տարբեր շրջաններում. ուժայինները վերահսկողության տակ են առել «Մինսկը` հերոս քաղաք» հուշակոթողի տարածքը, որտեղ օգոստոսի 9-ին զանգվածային բախումներ են տեղի ունեցել ընդդիմադիրների և իրավապահների միջև: Զինվորականներն ավելի վաղ զինտեխնիկա են տեղափոխել քաղաքի կենտրոն: Շարունակությունը՝ tert.am-ում։

23:00 - 12 օգոստոսի, 2020

Անվտանգության խորհրդի առաջ ծառացած կարևորագույն խնդիրներից է մեր քաղաքացիների անվտանգության ապահովումը. Ալեքսանդր Լուկաշենկո |tert.am|

tert.am: Բելառուսի նախագահ Ալեքսանդր Լուկաշենկոն հայտարարել է սահմանադրական կարգը պաշտպանելու և քաղաքացիների անվտանգությունն ապահովելու անհրաժեշտության մասին: «Ինչպես և պայմանավորվել էինք մինչև ընտրությունները, պետք է հանդիպեինք և քննարկեինք մեր պետության համար արդիական հարցերը: Ստեղծված իրավիճակից պարզ է, որ իշխանության մարմինների և հատկապես Անվտանգության խորհրդի առաջ ծառացած կարևորագույն խնդիրներից է մեր քաղաքացիների անվտանգության ապահովումը, սահմանադրական կարգի պաշտպանությունը և կառավարման պետական մարմինների բնականոն գործունեության ապահովումը»,- БелТА գործակալության փոխանցմամբ` ասել է Լուկաշենկոն Անվտանգության խորհրդի անդամների հետ հանդիպման ժամանակ: Լուկաշենկոն ընդգծել է, որ առաջնահերթ է շարունակում մնալ տնտեսության գործունեության հարցը: Շարունակությունը՝ tert.am-ում

21:02 - 12 օգոստոսի, 2020

Բելառուսի ընտրություններն ազատ չեն եղել. ԱՄՆ պետքարտուղար |armenpress.am|

armenpress.am: Բելառուսում տեղի ունեցած նախագահական ընտրություններն ազատ չեն եղել։ Չեխական հեռուստաընկերությանը տված հարցազրույցում հայտարարել է ԱՄՆ պետքարտուղար Մայք Փոմպեոն։ «Բելառուսում ընտրություններն ազատ չեն եղել։ Այժմ սկսվել են կոշտ գործողություններ խաղաղ ցուցարարների դեմ։ Ինչ այժմ տեղի է ունենում այնտեղ, ողբերգություն է»,- ասել է Փոմպեոն։ Բելառուսում օգոստոսի 9-ին տեղի ունեցած նախագահական ընտրություններում, ըստ երկրի Կենտրոնական ընտրական հանձնաժողովի տվյալների, գործող նախագահ Ալեքսանդր Լուկաշենկոն ստացել է ձայների 80 տոկոսը։

20:28 - 12 օգոստոսի, 2020

Պուտինն ու Մակրոնը քննարկել են Բելառուսում ստեղծված վիճակը |armenpress.am|

armenpress.am: Ռուսաստանի Դաշնության նախագահ Վլադիմիր Պուտինը հեռախոսազրույց է ունեցել Ֆրանսիայի նախագահ Էմանուել Մակրոնի հետ: Այս մասին հաղորդում է Կրեմլի մամուլի ծառայությունը: Զրուցակիցները քննարկել են Բելառուսում ստեղծված իրավիճակն ու կորոնավիրուսի դեմ պայքարում համագործակցությանը վերաբերող հարցեր՝ հաշվի առնելով Ռուսաստանում պատվաստանյութի գրանցման փաստը: Երկրների առաջնորդները նաև անդրադարձ են կատարել Լիբանանում առկա վիճակին՝ Բեյրութում տեղի ունեցած պայթյունից տուժած քաղաքացիներին աջակցելու համատեքստում: Բելառուսում մասսայական բողոքի ակցիները սկսվել են օոգոստոսի 9-ից՝ նախագահական ընտրություններից հետո, որում երկրի գործող նախագահ Ալեքսանդր Լուկաշենկոն ըստ Կենտրոնական ընտրական հանձաժողովի՝ ստացել էր ընտրություններին մասնակցած քաղաքացիների ավելի քան 80 տոկոսի քվեն:

19:35 - 12 օգոստոսի, 2020

Լուկաշենկոյի մրցակիցները բողոքարկել են նախագահական ընտրությունների արդյունքները |tert.am|

tert.am: Բելառուսում օգոստոսի 9-ին կայացած նախագահական ընտրությունների արդյունքների վերաբերյալ ընդդիմադիր թեկնածու Սվետլանա Տիխանովսկայայից հետո բողոք են ներկայացրել նաև երկրի գործող նախագահ Ալեքսանդր Լուկաշենկոյի մյուս 3 մրցակիցները` Աննա Կանոպացկայան, Անդրեյ Դմիտրիևը և Սերգեյ Չերեչենը: Այս մասին տեղեկանում ենք «ՌԻԱ Նովոստի» գործակալությունից: Նախագահի թեկնածու Անդրեյ Դմիտրիևը տեղեկացրել է, որ ինքը բողոք է ներկայացրել Կենտրոնական ընտրական հանձնաժողով, որում նշել է, որ չի ընդունում ընտրությունների արդյունքներն ու ձայների վերահաշվարկ է պահանջում: «Համաձայն այն տվյալների, որոնք կան մեր տրամադրության տակ, առնվազն երկրորդ փուլ պետք է լինի, որին ձայների մեծ տարբերությամբ պետք է մասնակցեն Սվետլանա Տիխանովսկայան և Ալեքսանդր Լուկաշենկոն»,-հայտարարել է Դմիտրիևը: Գործակալության հարցին այն մասին, թե արդյոք ինքն ընդունում է նախագահական ընտրությունների արդյունքները, Դմիտրիևն ասել է. «Ոչ, չեմ ընդունում: Երկրորդ փուլն արդեն սկսվել է: Այն կազմակերպել է ինքը՝ իշխանությունն իր այն ստով, որը մենք հերթական անգամ լսեցինք հեռուստացույցներից: Երկրորդ փուլը, ըստ ընտրական օրենսգրքի, օգոստոսի 23-ին չի անցկացվի, բայց ես համոզված եմ, որ այն կլինի»: Իր հերթին, նախագահի թեկնածու Սերգեյ Չերեչենը գործակալությանը տեղեկացրել է, որ ինքը նույնպես բողոք է ներկայացրել ԿԸՀ` ընտրությունների արդյունքներն անվավեր ճանաչելու պահանջով: «Երեկ բողոք ենք ներկայացրել: Խնդրում ենք նախագահական ընտրությունների արդյունքներն անվավեր ճանաչել»,-հայտարարել է Չերեչենը: Ավելի վաղ իր ներկայացրած բողոքի մասին տեղեկացրել էր նաև նախագահի թեկնածու Աննա Կանոպացկայան:

17:43 - 12 օգոստոսի, 2020

Բելառուսի Բրեստ քաղաքում իրավապահները հրազեն են կիրառել ցուցարարների դեմ

Բելառուսի Բրեստ քաղաքում իրավապահները հրազեն են կիրառել ցուցարարների դեմ։ Այս մասին հայտնել է Բելառուսի ներքին գործերի նախարարությունը։ «Բրեստում ոստիկանության աշխատակիցների վրա հարձակում է իրականացրել ագրեսիվ ցուցարարների մի խումբ․ ցուցարարները ձեռքներին ունեին մետաղական ձողեր։ Դեպի օդ նախազգուշական կրակոցները նրանց չեն կանգնեցրել։ Աշխատակիցների կյանքն ու առողջությունը պաշտպանելու նպատակով կրակ է բացվել մարդկանց ուղղությամբ, հարձակվողներից մեկը վիրավորվել է», - նշվում է ՆԳՆ հայտարարության մեջ։

15:14 - 12 օգոստոսի, 2020

Բելառուսի նախագահի թեկնածու Աննա Կանոպացկայան չի ընդունել ընտրությունների արդյունքները. նա պատրաստվում է բողոք ներկայացնել ԿԸՀ |tert.am|

tert.am: Բելառուսում օգոստոսի 9-ին անցկացված նախագահական ընտրությունների մասնակից, նախագահի թեկնածու Աննա Կանոպացկայան «ՌԻԱ Նովոստի» գործակալությանը տեղեկացրել է, որ պատրաստվում է բողոք ներկայացնել երկրի Կենտրոնական ընտրական հանձնաժողով, որով պահանջում է երկրի նախագահի ընտրությունների արդյունքներն անվավեր ճանաչել: «Իմ դիրքորոշումն այն է, որ ես պահանջում եմ անվավեր ճանաչել ընտրություններն ամբողջ հանրապետության տարածքում՝ անկախ ԿԸՀ-ի հրապարակած տվյալներից: Բողոքը, որպես Բելառուսի նախագահի թեկնածու, ես ներկայացնում եմ այսօր»,-հայտարարել է Կանոպացկայան:

14:55 - 12 օգոստոսի, 2020