Ռոբերտ Քոչարյան

Եղել է Հայաստանի Հանրապետության 2-րդ եւ Արցախի Հանրապետության 1-ին նախագահը։ 

1992-1994 թվականներին եղել է Արցախի վարչապետ

1994-1997 թվականներին եղել է Արցախի նախագահ

1997-1998 թվականներին եղել է Հայաստանի վարչապետ

1998-2008 թվականներին եղել է Հայաստանի նախագահ։

Գլխավորում է 2021 թ․ հունիսի 20-ի խորհրդարանական արտահերթ ընտրություններին մասնակցող «Հայաստան» դաշինքի նախընտրական ցուցակը։

Ջաբրայիլից մինչեւ Շուշի ողջ ճանապարհին որեւէ բնագիծ չի կառուցվել, խրամատ չի փորվել․ Ռոբերտ Քոչարյան

Ջաբրայիլից մինչեւ Շուշի ողջ ճանապարհին որեւէ բնագիծ չի կառուցվել, խրամատ չի փորվել․ Ռոբերտ Քոչարյան

Ես չեմ հասկանում, թե մեկ տարի անց մենք ինչու ունենք ռազմագերիներ, եւ ավելին՝ չգիտենք՝ թե քանի ռազմագերի ունենք։ Այսօր հրավիրված ասուլիսի ժամանակ ասաց Ռոբերտ Քոչարյանը՝ պատասխանելով հարցին, թե ինչու մեր գերիների վերադարձի դիմաց Հայաստանը պետք է Ադրբեջանին տրամադրի ականապատ դաշտերի քարտեզներն այն պարագայում, երբ գերիների վերադարձի մասին դրույթ կա նոյեմբերի 9-ի եռակողմ հայտարարության մեջ։ «Պատերազմից մեկ տարի անց, չիմանալով զոհվածների հստակ թիվը, անհետ կորածների, գերիների թիվը, մենք հանդուրժում ենք այս իշխանությանը․ ուղղակի աբսուրդ է։ Ես չեմ հավատում, որ աշխարհում որեւէ այլ օրինակ կա․․․ Գոնե  զոհվածների թիվը հնարավոր էր հրապարակել, մարդկանց անուն-ազգանուն-հայրանունը, որտեղ է զոհվել, քանի տարեկան է եղել, գոնե մի գիրք պետք է լինի»,- ասաց Քոչարյանը։ Նրա խոսքով՝ այն, ինչ կատարվում է, արդեն մեկ տարի անց հնարավոր չէ բացատրել անփորձությամբ կամ ապիկարությամբ, նրա համոզմամբ՝ սրանք գիտակցված քայլեր են, որոնց նպատակները, սակայն, Քոչարյանի համար հասկանալի չեն։ Պատասխանելով լրագրողի այն հարցին, թե Քոչարյանն ու իր թիմը ինչ տեղեկություններ ունեն այն մասին, թե, օրինակ, Հադրութից Շուշի հատվածում ինչ-որ պայմանավորվածություններ են եղել, Քոչարյանը պատասխանեց, որ փաստեր գիտի, ըստ որոնց՝ Ջաբրայիլից մինչեւ Շուշի (Ջաբրայիլ, Հադրութ, Տող, Մեծ Թաղլար, Շեխեր, մինչեւ Քարին Տակ,- թվարկեց Քոչարյանը) ողջ ճանապարհին բնագիծ չի կառուցվել․ «Որեւէ բնագիծ չի կառուցվել, խրամատ չի փորվել, ես բացատրություն չունեմ՝ ինչու, հարցրել եմ տարբեր զինվորականների։ Այդ ժամանակ էր, որ Վիտալի Բալասանյանը դիմեց վարչապետին, որ իրեն նշանակեն այդ ուղղության պատասխանատու․ չնշանակեցին։ Այս բոլորը, երբ համադրում ես, տեսնում ես, որ կամ ուղղակի եղել է ապուշության գագաթնակետը, կամ եղել է դավաճանություն։ Դավաճանությունը կարելի է տարբեր կերպ մեկնաբանել․ այս պարագայում եղել է մի թեզ, որ Ալիեւը մինչեւ Շուշին չվերցնի, չի կանգնելու։ Այդ խոսակցություններն այդ ժամանակ եղել են, եւ տպավորություն էր, որ Շուշին վերցնելու մարշրուտը կամ բացում էին, եւ եթե չէին բացում, չէին էլ փակում։ Մենք ունենք շատ հիմնավոր կասկածներ, որ այստեղ եղել է միտումնավորվածություն»,- ասաց Քոչարյանը։ Նա հիշեցրեց, որ մի փաստ է բարձրաձայնել, ըստ որի Ստեփանակերտում նախագահական շենքի շուրջ 300 մետր շառավղով մեկ արկ չի պայթել, այդ շենքի վրա չի եղել մեկ կոտրված ապակի, եւ դա այն ժամանակ, երբ Ստեփանակերտը դաժանորեն ռմբակոծվում էր․ «Ձեզ մոտ հարց չի՞ առաջանում՝ ո՞ւմ էին խնայում։ Ինձ համար անհասկանալի է, թե ինչու մեր այդ քանակի շարասյուներն օդից ոչնչացվում էին՝ դեռ դիրքեր չհասած։ Այսպիսի գործողություններն ինձ մոտ հարցեր են առաջացնում։ Ի դեպ, ես չեմ կարծում, թե իրենք խնայում էին Արայիկ Հարությունյանին։ Հարությունյանը հայտարարել էր, որ Գյանջայի հրետակոծումն իր հրամանով է եղել, բայց ես կարծում եմ, որ այդ շենքում ամբողջ պատերազմի ընթացքում եղել են մարդիկ, որոնց խնայում էր Ադրբեջանը։ Ադրբեջանն ուներ գերճշգրիտ զենքեր, որով կարող էին 100կմ հեռավորության վրա Լաչինում կամուրջ ոչնչացնել, եւ այդ շենքը չեն կարողացել ոչնչացնե՞լ։ Ծիծաղելի է, այդպես չի լինում, ուղղակի չի լինում։ Կան լուրջ կասկածներ, որոնք եթե չփարատվեն, մեր երկրում հանգստություն չի լինելու»,- ասաց Ռոբերտ Քոչարյանը։
13:14 - 04 հոկտեմբերի, 2021
Մոսկվայի հետ Ղարաբաղի կարգավիճակի, Շուշիի, Հադրութի վերաբերյալ որեւէ առարկայական հարց չի բանակցվում, զուտ տեխնիկական հարցեր են քննարկվում․ Քոչարյան

Մոսկվայի հետ Ղարաբաղի կարգավիճակի, Շուշիի, Հադրութի վերաբերյալ որեւէ առարկայական հարց չի բանակցվում, զուտ տեխնիկական հարցեր են քննարկվում․ Քոչարյան

«Իսկ դու ո՞վ ես, ի՞նչ ես քեզանից ներկայացնում՝ նման նպատակներ հնչեցնելու եւ նման նպատակներ հետապնդելու ժամանակ»,- այսօր հրավիրված մամուլի ասուլիսի ժամանակ նման հարց հնչեցրեց Ռոբերտ Քոչարյանը՝ անդրադառնալով տարածաշրջանում խաղաղության դարաշրջան բացելու մասին քննարկումներին․ «Ամենից զավեշտալին այն է, որ այսօր դու բանակցային սեղանի շուրջ չես նստած, այսօր ինքդ այդ բանակցային սեղանի վրա ես, քեզ են քննարկում՝ առանց քո մասնակցության, դու դադարել ես լինել բանակցային գործընթացի սուբյեկտ, արդեն վաղուց բանակցային գործընթացի օբյեկտ ես»,- ասաց Քոչարյանը՝ հավելելով՝ չես կարող տարածաշրջանում խաղաղության դարաշրջան բացել, երբ չես կարողանում այդ խաղաղության դարաշրջանը հաստատել քո սեփական երկրում, եւ չես արել որեւէ քայլ՝ այդ նպատակին հասնելու համար՝ հատկապես պատերազմից հետո։ Քոչարյանի համոզմամբ՝ այս ամենում հնարավոր է բան փոխել, բայց, նրա խոսքով, «այս մարդիկ (գործող կառավարությունը-խմբ․) պետք է գնան։ Ընդհանրապես, ծնկների վրա կանգնած բանակցելն ուղղակի հարմար չէ, մարդը չոքած հոգնում է, չի ստացվելու։ Հատկապես չես կարող բանակցել մի մարդու հետ, որը ծաղրում է քեզ, չես կարող բանակցել, չի ստացվում, չի ստացվելու»։ Միեւնույն ժամանակ, Քոչարյանի համոզմամբ, եթե այսպես շարունակվի, ոչինչ հնարավոր չի լինի փոխել․ «Մեկ տարի է՝ Հայաստանն այս պրոցեսին մասնակից չէ։ Ես մոտավորապես գիտեմ՝ ինչ է բանակցվում Մոսկվայի հետ․ զուտ տեխնիկական հարցեր են քննարկվում, Ղարաբաղի ապագայի, կարգավիճակի, Շուշիի, Հադրութի վերաբերյալ որեւէ առարկայական հարց չի բանակցվում։ Եթե այսպես շարունակվի, ոչինչ չենք ունենալու, ամեն օրը կորցրած օր է»։
12:48 - 04 հոկտեմբերի, 2021
ՀՀ իշխանություններն Արցախի հետ կապված բոլոր հարցերը հասցեագրում են ռուսական կողմին, Արցախն այսօր անորոշությունների առջեւ է կանգնած․ Ռոբերտ Քոչարյան

ՀՀ իշխանություններն Արցախի հետ կապված բոլոր հարցերը հասցեագրում են ռուսական կողմին, Արցախն այսօր անորոշությունների առջեւ է կանգնած․ Ռոբերտ Քոչարյան

Չափազանց շատ են փաստերը, որոնք խոսում են հնարավոր պլանավորված պարտության մասին։ Եւ բոլորս այնքան ժամանակ իրավունք ունենք մտածելու, որ դա այդպես է, մինչեւ դա լուրջ եւ խոր քննության ճանապարհով չհերքվի։ Այս մասին այսօր հրավիրված ասուլիսի ժամանակ ասաց Ռոբերտ Քոչարյանը։ Փաստերի համադրումը, ըստ նրա, հիմք է տալիս մտածելու, որ հավանական է՝ պատերազմը սկսվել է տգիտության, անկարողության, ապիկարության պատճառով, բայց ավարտվել է՝ ըստ պայմանավորվածության․ «Այս ամենն առերեւույթ հանցագործություններ են, մենք ակնկալում ենք, որ պատշաճ մարմինները դրանով պետք է զբաղվեն։ Գալու է ժամանակ, որ բոլորը պատասխան են տալու այս ամենի համար, նաեւ նրանք, որոնք իրենց պաշտոնական դիրքից ելնելով՝ պետք է զբաղվեին այս հարցերով ու չեն զբաղվել»։ Այս կասկածները փարատելու համար, ըստ Քոչարյանի, առաջին հերթին պետք է քննել պատերազմի հանգամանքները, բայց անպայման ընդդիմության ակտիվ ներգրավմամբ․ «Յուրաքանչյուր այլ տարբերակ հանրության մոտ վստահություն չի վերականգնելու։ Երկրում ճգնաժամը չի կարող վերականգնվել առանց այս ֆունդամենտալ հարցերի պատասխանների։ Երկրում կա բավական մեծ մարդկային ներուժ, որոնք երբեք չեն հարմարվելու այս իրավիճակի հետ այնքան ժամանակ, մինչեւ այդ պարզաբանումները չստանան»։ Ինչ վերաբերում է Արցախի խնդրին՝ Քոչարյանը կարծիք հայտնեց, որ մենք դադարել ենք լինել Արցախի անվտանգության երաշխավորը․ «Արցախն այսօր անորոշությունների առջեւ է կանգնած։ Ըստ էության, ՀՀ իշխանությունները խուսափում են Արցախի մասին ընդհանրապես խոսել, ընդհանրապես չեն խոսում կարգավորման տարբերակներից, տպավորությունն այնպիսին է, որ ձեռքերն ուղղակի լվանում են Արցախից։ Արցախի հետ կապված բոլոր հարցերը հասցեագրում են ռուսական կողմին։ Մի քիչ էլ ժամանակ անցնի, այլեւս նաեւ մեր հանրությունն էլ բոլոր հարցերն ու անբարենպաստ որոշումները կապելու է ռուսական կողմի հետ»,- ասաց Քոչարյանն ու նշեց, որ սա, ըստ իրեն, գիտակցաբար է արվում։ «Ադրբեջանը հայտարարում է, որ ինքը վերջանակապես լուծել է Ղարաբաղի հարցը, եւ, ցավոք, մենք բանակցային սեղանին չունենք որեւէ լուրջ արգումանետ՝ արդյունավետ բանակցություններ վարելու համար, փաստը սա է»,- ասաց Քոչարյանը՝ հավելելով, որ ինքն իրեն ամեն օր հարց է տալիս՝ «ի՞նչ է լինելու երեքուկես տարի հետո, եթե հանկարծ Ադրբեջանը չհամաձայնի խաղաղապահ ուժերի մանդատի շարունակությանը»․ «Ինձ հետաքրքիր է՝ այս իշխանությունն այս հարցը ինքն իրեն տալի՞ս է։ Ես կարծում եմ՝ յուրքանչյուր հայ ամեն օր այդ հարցն ինքն իրեն պետք է տա»։ Քոչարյանն անդրադարձավ նաեւ Հարավային Կովկասում աշխարհաքաղաքական իրավիճակին։ Նրա խոսքով՝ ակնհայտ է, որ լուրջ գործընթացներ են ընթանում, եւ ո՛չ մեր օգտին․ «Փաստն այն է, որ ՌԴ-ի ռազմաքաղաքական դաշնակից ՀՀ-ն պարտվել է պատերազմում, Թուրքիայի ռազմաքաղաքական դաշնակից Ադրբեջանը հաղթել է։ Սա առաջին դեպքն է, երբ հետխորհրդային տարածքում այլ պետություն ուղղակի մասնակցում է ռազմական գործողություններին։ Խոսքը Թուրքիայի մասին է։ Մինչ այդ բոլորը խուսափում էին նման գործողություններից՝ ՌԴ-ին չնյարդայնացնելու համար։ Հիմա սա ի՞նչ հետեւանքներ է ունենալու՝ դժվար է ասել։ Ակնհայտ է, որ Հայաստանը կամ դադարել է որպես գործոն գոյություն ունենալ այստեղ, կամ էապես նվազել է Հայաստանի ազդեցությունը։ Ակնհայտ է, որ ՌԴ-ն այս ամենը հաշվի է առնելու այս տարածաշրջանում իր քաղաքականության մեջ․ Ադրբեջանի, Թուրքիայի դերակատարումն աճել է․ ՌԴ-ն չի կարող հաշվի չնստել այս հանգամանքի հետ»,- ասաց Քոչարյանը՝ հավելելով, որ Ադրբեջանն ավելի քիչ է փորձելու բալանսավորել իր հարաբերությունները ՌԴ-ի եւ Թուրքիայի հետ՝ հօգուտ Թուրքիայի։
12:10 - 04 հոկտեմբերի, 2021
Քոչարյանի գործով դատական նիստը հետաձգվեց․ Արմեն Գևորգյանը նոր պաշտպան ունի |armenpress.am|

Քոչարյանի գործով դատական նիստը հետաձգվեց․ Արմեն Գևորգյանը նոր պաշտպան ունի |armenpress.am|

armenpress.am: Երևան քաղաքի ընդհանուր իրավասության դատարանում (Շենգավիթի նստավայր) այսօր շարունակվեց Քոչարյանի և մյուսների գործով քննությունը։ Դատավոր Աննա Դանիբեկյանը տեղեկացրեց, որ գործով անցնող նախկին փոխվարչապետ Արմեն Գևորգյանն ունի երկու նոր պաշտպան՝ փաստաբաններ Ալեքսանդր Կոչուբաևը և Լուսինե Սահակյանը։ Կոչուբաևը ներկա չէր նիստին, իսկ Լուսինե Սահակյանը նշեց, որ Գևորգյանի շահերը կարող է պաշտպանել միայն սույն գործով, քանի որ մարտի 1-ի իրադարձությունների հետ կապված մի շարք քրեական գործերով ինքն այլ անձանց է ներկայացրել․ շահերի բախման խնդիր կա։ Քննարկումից հետո Լուսինե Սահակյանը ներգրավվեց որպես Գևորգյանի պաշտպան։ Նիստի ընթացքում Արմեն Գևորգյանը ցանկություն հայտնեց հայտարարությամբ հանդես գալ՝ ԵԽԽՎ նիստին մասնակցելու նպատակով երկրից մեկնելու համար թույլտվության մերժման վերաբերյալ։ Սակայն Դանիբեկյանը թույլ չտվեց ընթերցել հայտարարությունը։ Արմեն Գևորգյանն առարկեց, իսկ պաշտպան Լուսինե Սահակյանը փորձեց ինքը ներկայացնել այդ հայտարարությունը, ինչը դատավորը նույնպես թույլ չտվեց։ Արդյունքում Աննա Դանիբեկյանը հրահանգեց խոսափողը վերցնել փաստաբանի մոտից։ ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը նկատեց, որ դատավարությունը պիտի ընթանա ՀՀ քրեական դատավարության օրենսգրքով սահմանված կանոններով․ ըստ այդմ՝ մեղադրյալն իրավունք ունի առարկել նախագահող դատավորի գործողությունների դեմ, նույն իրավունքը սահմանված է նաև պաշտպանի համար։ «Ձեր իրականացրած դատավարությունն էապես շեղվում է Քր․ դատավարությունից»,- ասաց Ալումյանը՝ պահանջելով դատարանից հարգել պաշտպանական կողմի իրավունքները և չխախտել դրանք։ Գործի նյութերին ծանոթանալու համար դատարանը Լուսինե Սահակյանին մեկ շաբաթ ժամանակ տրամադրեց և այսօրվա դատական նիստը հետաձգեց մինչև հոկտեմբերի 5-ը։
15:29 - 28 սեպտեմբերի, 2021
Այսօր լրանում է մեր անկախության երեսուն տարին, սակայն չկա այն ուրախությունը, որ պետք է զգայինք այս նշանակալի օրը․ Ռոբերտ Քոչարյանը ուղերձը

Այսօր լրանում է մեր անկախության երեսուն տարին, սակայն չկա այն ուրախությունը, որ պետք է զգայինք այս նշանակալի օրը․ Ռոբերտ Քոչարյանը ուղերձը

ՀՀ երկրորդ նախագահ Ռոբերտ Քոչարյանը ուղերձ է հղել Անկախության օրվա առթիվ։ «Թանկագին հարենակիցներ, Այսօր լրանում է մեր անկախության երեսուն տարին, սակայն չկա այն ուրախությունը, որ պետք է զգայինք այս նշանակալի օրը։ Մենք այս տոնը առաջին անգամ ենք դիմավորում ծրագրված ծանր պարտությունից, տարածքային կորուստներից, մեր ինքնիշխանությունը մասնակի կորցնելուց և հազարավոր ճակատագրերի խեղվելուց հետո։ Հայաստանի՝ իբրև անկախ պետության կայացումը, անքակտելիորեն կապված էր Արցախյան մեր հաղթանակի հետ, սնուցվում էր այդ հերոսական հաղթանակով, որը հայկական ինքնության մաս էր դարձել։ Ընդամենը մեկ տարի առաջ մենք հպարտանում էինք մեր զինված ուժերով և Հարավային Կովկասում աշխարհաքաղաքական դասավորվածության էական գործոն էինք: Սակայն այսօր մենք ոչ միայն դադարել ենք Արցախի անվտանգության երաշխավորը լինելուց, այլ նաև ի վիճակի չենք պաշտպանել սեփական ինքնիշխանությունը և մեր քաղաքացիներին։ Մենք կորցրեցինք այն, ինչով հպարտանում էինք վերջին երեսուն տարիներին, և ինչը երկրին ուժ և աշխարհաքաղաքական արժեք էր տալիս։ Պետությունները կառուցվում են ազգային վերելքի շնորհիվ և հենվում ազգային միասնության վրա։ Պարտությունը և դա խորհրդանշող իշխանությունները չեն կարող ներշնչանքի և արարման աղբյուր լինել։ Այսօր, շնորհավորելով Անկախության Տոնը, ուզում եմ հույս և վստահություն հայտնել, որ ազգն իր մեջ ուժ կգտնի ձերբազատվելու այն իշխանությունից, որն ազգային աղետի պատճառ դարձավ։ Ուժեղ և ծաղկող Հայաստան կառուցելու այլ ճանապարհ պարզապես չկա»,- նշված է ուղերձում։
10:12 - 21 սեպտեմբերի, 2021
Դատարանը մերժել է Ռոբերտ Քոչարյանի մեկնումը արտերկիր․ «Հայաստան» դաշինք

Դատարանը մերժել է Ռոբերտ Քոչարյանի մեկնումը արտերկիր․ «Հայաստան» դաշինք

Ինչպես հայտնի է, ՌԴ իշխող կուսակցությունը՝ «Եդինայա Ռոսիան», շուրջ մեկ շաբաթ առաջ Մոսկվա այցելելու հրավեր էր ուղարկել «Հայաստան» դաշինքի առաջնորդ, ՀՀ երկրորդ Նախագահ Ռոբերտ Քոչարյանին։ Այս մասին հայտարարություն է տարածել «Հայաստան» դաշինքը: «Ակնկալվում էր, որ սեպտեմբերի 19-ին մեկնարկող այցի ընթացքում ռուսական կողմի հետ կքննարկվեին ոչ միայն միջկուսակցական համագործակցության, այլեւ լայն շրջանակի այլ հարցեր։ Սակայն ՀՀ առաջին ատյանի դատարանն մերժեց արտոնել Ռոբերտ Քոչարյանի մեկնումն արտերկիր։ Մենք պարտադրված ենք չեղարկել այցը։ Դատարանի կողմից մերժման որեւէ իրավական պատճառ չկար, քանի որ Նախագահ Քոչարյանն արդեն մի քանի անգամ մեկնել է Մոսկվա, եւ դատարանը որևէ խնդիր չի արձանագրել։ Ականատեսն ենք դատարանի վրա իշխանության հերթական ճնշման, ինչն ուղղված է «Հայաստան» դաշինքի քաղաքական գործունեության սահմանափակմանը։ Տեղի ունեցողը, գնահատում ենք որպես իշխանության նեղ անձնական քինախնդրության հերթական դրսեւորում եւ պետական մտածելակերպի կատարյալ բացակայության նոր ապացույց»,- ասված է հայտարարության մեջ:
19:45 - 17 սեպտեմբերի, 2021
Դատախազը միջնորդեց բեկանել Քոչարյանին և մյուսներին արդարացնելու որոշումը |armenpress.am|

Դատախազը միջնորդեց բեկանել Քոչարյանին և մյուսներին արդարացնելու որոշումը |armenpress.am|

armenpress.am: Վերաքննիչ քրեական դատարանում Ռոբերտ Քոչարյանի և մյուսների գործով շարունակվում է առաջին ատյանի դատարանի որոշման դեմ բողոքի քննությունը: Գլխավոր դատախազի տեղակալ Գևորգ Բաղդասարյանը ներկայացրեց դատախազության բողոքը և Վերաքննիչ դատարանին միջնորդեց բեկանել առաջին ատյանի դատարանի` ՀՀ երկրորդ նախագահ Ռոբերտ Քոչարյանին, 2008-ին Զինված ուժերի գլխավոր շտաբի պետ Սեյրան Օհանյանին, 2008-ին ՀՀ պաշտպանության նախարարի տեղակալ Յուրի Խաչատուրովին և 2008-ին Հայաստանի նախագահի աշխատակազմի ղեկավար, Անվտանգության խորհրդի քարտուղար Արմեն Գևորգյանին արդարացնելու որոշումը և քրեական գործն ուղարկել դատարան` նոր քննության: «Սահմանադրական դատարանի որոշմամբ` քրեական հոդվածը, որով մեղսագրվում էր ամբաստանյալների արարքը, դադարեց գոյություն ունենալ, բայց չդադարեց գոյություն ունենալ այն արարքը, որը կատարվել է և որը նկարագրված է իրենց մեղադրանքներում: Այդ արարքները այդ նկարագրությամբ կարող են որակվել Քրեական օրենսգրքի 309 հոդվածի 3-րդ մասով (պաշտոնեական լիազորություններն անցնելը, որը անզգուշությամբ առաջացրել է ծանր հետևանքներ- խմբ.)»,- ասաց Բաղդասարյանը:
13:02 - 30 օգոստոսի, 2021
Ռոբերտ Քոչարյանի և Արմեն Գևորգյանի գործով դատական նիստը հետաձգվեց. Գևորգյանին բերման կենթարկեն դատարան |armenpress.am|

Ռոբերտ Քոչարյանի և Արմեն Գևորգյանի գործով դատական նիստը հետաձգվեց. Գևորգյանին բերման կենթարկեն դատարան |armenpress.am|

armenpress.am: Երևանի ընդհանուր իրավասության դատարանը (Շենգավիթի նստավայր), նախագահությամբ դատավոր Աննա Դանիբեկյանի, մեկ շաբաթով հետաձգեց ՀՀ երկրորդ նախագահ Ռոբերտ Քոչարյանի և նախկին փոխվարչապետ, ներկայումս ՀՀ ԱԺ պատգամավոր Արմեն Գևորգյանի գործով դատական նիստը։ Արմեն Գևորգյանի պաշտպան Էրիկ Ալեքսանյանը միջնորդեց հետաձգել նիստը՝ հաշվի առնելով այն հանգամանքը, որ իր պաշտպանյալ Արմեն Գևորգյանն ընտրվել է ԱԺ պատգամավոր և այժմ մասնակցում է խորհրդարանի աշխատանքներին։ «Իմ պաշտպանյալը նաև առաջադրվել է Տարածաշրջանային և եվրասիական ինտեգրման հարցերի մշտական հանձնաժողովի նախագահի թեկնածու: Հանձնաժողովների նախագահների ընտրության գործընթացը սկսել է օգոստոսի 9-ից և դեռ ընթացքի մեջ է: Խնդրում եմ բացակայությունը համարել հարգելի»,- ասաց Ալեքսանյանը: Նա նաև նշեց, որ «Հայաստան» խմբակցությունը դիմում է ներկայացրել Սահմանադրական դատարան՝ պատգամավորի անձեռնմխելիության հարցով: Ռոբերտ Քոչարյանի պաշտպան Հովհաննես Խուդոյանը դիմելով դատարանին՝ ասաց, որ համաձայն է նիստը հետաձգելուն: «Ունեմ նաև մեկ վերապահում՝ կա 1 միջնորդություն, որը գործընկերս է ներկայացրել՝ Սեդրակ Քոչարյանի իրավունքների հարցը քննարկելու համար: Կարծում եմ, որ պարոն Գևորգյանի բացակայությունը չի խոչընդոտում այդ հարցը քննարկելուն, որովհետև առնչություն չունի իր շահերի և իրավունքների հետ»,- ասաց Խուդոյանը: Ի պատասխան դատավոր Աննա Դանիբեկյանը նշեց, որ ամբաստանյալի բացակայությամբ դատարանը հնարավոր չի համարում որևէ այլ հարցի քննարկում, բացի  նրա բացակայության հետ կապված հարցերից:  «Նախորդ նիստի ժամանակ դատարանը չի արձանագրել Արմեն Գևորգյանի անհարգելի բացակայության հանգամանքը՝ հաշվի առնելով, որ նոր ձևավորված ԱԺ-ի առաջին նիստն էր: Հաշվի առնելով, որ նման վարքագիծը կրկնվում է, դատարանն այստեղ անբարեխղճություն է տեսնում Արմեն Գևորգյանի կողմից: Դատարանը համարում է, որ Գևորգյանը դատարան չի ներկայացել անհարգելի պատճառի:   Դատախազ Գևորգ Բաղդասարյանը դատարանին առաջարկեց հաջորդ դատական նիստին բերման ենթարկել Արմեն Գևորգյանին:   «Արմեն Գևորգյանն ունի նոր կարգավիճակ, նա անձեռնմխելի է և որևէ հարկադրանքի միջոց, առանց ԱԺ-ի թույլտվության չի կարող կիրառվել: Դատախազի նման որոշումը չի բխում քրեական դատավարության և Սահմանադրության պահանջներից»,- դատախազի նման առաջարկին հակադարձեց Էրիկ Ալեքսանյանը: Դանիբեկյանն ընդգծեց, որ հաշվի առնելով հանգամանքը, որ Արմեն Գևորգյանը նիստին չի ներկայացել անհարգելի պատճառով, անհրաժեշտ է միջոցներ կիրառել հաջորդ նիստին Գևորգյանի ներկայությունն ապահովելու համար: «Դատարանն այդ պատճառաբանությամբ, ղեկավարվելով ՀՀ քրեական դատավարության օրենսգրքի 153-րդ հոդվածով, որոշեց հաջորդ նիստին բերման ենթարկել Արմեն Գևորգյանին»,- ասաց Դանիբեկյանը: Հաշվի առնելով, որ դատական նիստը չի կարող շարունակվել առանց դատավարության մասնակիցներից որևէ մեկի, դատարանը հետաձգեց գործի քննությունը մինչև օգոստոսի 17-ը, ժամը 13:00-ն:
14:26 - 10 օգոստոսի, 2021
Վճռաբեկ դատարանը հաստատել է «Քոչարյանը և մյուսները» գործով ՀՀ դատախազության դիրքորոշումների հիմնավորվածությունը

Վճռաբեկ դատարանը հաստատել է «Քոչարյանը և մյուսները» գործով ՀՀ դատախազության դիրքորոշումների հիմնավորվածությունը

ՀՀ գլխավոր դատախազությունն ստացել է քրեական գործով ամբաստանյալ Ռոբերտ Քոչարյանի վերաբերյալ ՀՀ վերաքննիչ քրեական դատարանի 2020թ. հունիսի 18-ի որոշման դեմ ՀՀ գլխավոր դատախազ Արթուր Դավթյանի և տուժողների ներկայացուցիչների, տուժողների իրավահաջորդների ներկայացուցիչների և Ռ. Քոչարյանի պաշտպանի՝ շուրջ մեկ տարի առաջ ներկայացված  վճռաբեկ բողոքների վերաբերյալ ՀՀ վճռաբեկ դատարանի 2021թ. հուլիսի 30-ի որոշումը: «Հիշեցնենք, որ ՀՀ վերաքննիչ քրեական դատարանն իր 18.06.2020թ. վերոնշյալ որոշմամբ բավարարել էր Ռ. Քոչարյանի պաշտպանների բողոքը, մասնակիորեն բեկանել և փոփոխել էր Առաջին ատյանի դատարանի որոշումը, և, վերացնելով Ռ. Քոչարյանի նկատմամբ ընտրված խափանման միջոց կալանքը, նրա նկատմամբ որպես խափանման միջոց էր ընտել գրավը՝ 2 մլրդ դրամի չափով: ՀՀ գլխավոր դատախազն իր բողոքով ՀՀ վճռաբեկ դատարանից հայցել էր Ռ. Քոչարյանի նկատմամբ որպես խափանման միջոց գրավ կիրառելու մասով բեկանել ՀՀ վերաքննիչ դատարանի այդ որոշումը, և նոր դատական ակտով նրա նկատմամբ որպես խափանման միջոց կիրառել կալանավորումը»,- ասվում է հաղորդագրության մեջ: Ըստ աղբյուրի՝ իր որոշման մեջ ՀՀ վճռաբեկ դատարանը գրեթե ամբողջությամբ ընդունել է ՀՀ դատախազության հիմնավորումները, համաձայնել վերջինիս դիրքորոշումների հետ առ այն, որ քննության տվյալ փուլում միայն խափանման միջոց կալանավորումը կարող էր ապահովել ամբաստանյալ Ռոբերտ Քոչարյանի պատշաճ վարքագիծը: «Մասնավորապես, ՀՀ Վճռաբեկ դատարանը գտել է, որ Ռ. Քոչարյանին ՀՀ քրեական օրենսգրքի 300.1-րդ հոդվածի 1-ի մասով մեղսագրվող արարքների բնույթն ու վտանգավորության աստիճանը, ակնկալվող պատժի խստությունը, ենթադրյալ հանցավոր արարքները հանցակիցների ներգրավմամբ կատարելը, ովքեր զբաղեցնում էին պետական բարձր պաշտոններ և ամբաստանյալից գտնվում էին ծառայողական կախվածության մեջ, դատավարության մասնակիցների աննախադեպ մեծ  քանակը, ինչպես նաև ի սկզբանե ենթադրյալ հանցավոր արարքները դրանք թաքցնելուն ուղղված գործողություններով զուգակցելը և գործի բուն քննության ընթացքում նույնպես դատավարության մասնակիցների նկատմամբ անօրինական ազդեցություն գործադրելու մասին վկայող տվյալների առկայությունն առանցքային նշանակություն ունեն և հանդիսանում են այնպիսի գործոններ, որոնք էականորեն բարձրացնում են գործի քննությանը խոչընդոտելու հավանականության ռիսկը հատկապես դատավարության տվյալ պահին, երբ գործը դատաքննության փուլ դեռևս չէր անցել և որևէ ապացույց դեռևս չէր հետազոտվել»,- հայտնում են ՀՀ գլխավոր դատախազությունից՝ հավելելով, որ Վճռաբեկ դատարանը, ըստ այդմ, անընդունելի է համարել Վերաքննիչ դատարանի այն դիրքորոշումը, որ ժամանակի ընթացքում ամբաստանյալ Ռ. Քոչարյանի կողմից հնարավոր ոչ իրավաչափ վարքագիծ դրսևորելու ռիսկերը նվազել են այնքան, որ հնարավոր չէ այլևս կալանավորումը որպես խափանման միջոց դիտարկել: ՀՀ գլխավոր դատախազության գնահատմամբ՝ այս իմաստով հատկանշական է ՀՀ դատախազության կողմից մշտապես արտահայտված դիրքորոշումից բխող՝ ՀՀ վճռաբեկ դատարանի այն դիտարկումը, որ Ռ. Քոչարյանին մեղսագրվել են իր ծառայողական գործունեության ոլորտում ենթադրաբար կատարված հանցավոր արարքներ, գործի հետ առնչություն ունեցող անձինք ամբաստանյալից գտնվել են ծառայողական կախվածության և ենթակայության հարաբերությունների մեջ, իսկ նրանց մի մասն էլ անցնում են գործով որպես ամբաստանյալի հանցակիցներ: Հետևաբար, ըստ Վճռաբեկ դատարանի, Ռ. Քոչարյանի՝ երկար տարիներ զբաղեցրած պաշտոնը, ունեցած դիրքն ու հեղինակությունը, հսկայական ազդեցությունը, կապերն ու լծակները, ինչպես նաև նրան մեղսագրվող հանցագործությունների բնույթը վկայում էին դատավարության տվյալ փուլում գործի քննությանը միջամտելու, դատավարության մասնակիցների նկատմամբ հնարավոր անօրինական ազդեցություն դրսևորելու ռիսկի շարունակական առկայության մասին: ՀՀ վճռաբեկ դատարանը գտել է, որ տվյալ փաստական հանգամանքների պայմաններում գրավը չէր կարող լինել ազատության մեջ գտնվելու դեպքում ամբաստանյալ Ռ. Քոչարյանի կողմից ոչ պատշաճ վարքագիծ դրսևորելու հավանականությունը զսպելու արդյունավետ միջոց: «Չնայած այս և այլ իրավական հետևություններին՝ ՀՀ վճռաբեկ դատարանն իր որոշմամբ  մերժել է ՀՀ գլխավոր դատախազի բողոքը՝ ըստ էության, միայն այն պատճառաբանությամբ, որ նախքան գործով որոշում կայացնելը, ՀՀ Սահմանադրական դատարանի համապատասխան որոշման հիման վրա Ռ. Քոչարյանին մեղսագրվող հանցավոր արարքներից մեկով՝ ՀՀ քրեական օրենսգրքի 300.1-րդ հոդվածի 1-ին մասով առավել ծանր հանցագործության դրվագով, որի շրջանակներում են արվել նրա նկատմամբ խափանման միջոց կալանքի անայլընտրանքայնության վերաբերյալ հիմնական եզրահանգումները, քրեական հետապնդումը դադարեցվել է: Ընդ որում, Վճռաբեկ դատարանն այս որոշմամբ նաև մերժել է Ռ. Քոչարյանի պաշտպանի կողմից ներկայացված բողոքը իր պաշտպանյալի նկատմամբ խափանման միջոց անձնական երաշխավորությունը կիրառելու կամ կիրառված գրավի գումարի չափը նվազեցնելու մասով»,- տեղեկացնում է ՀՀ գլխավոր դատախազությունը:          
22:44 - 04 օգոստոսի, 2021
Մենք պետք է վերակագնենք մեր սուբյեկտայնությունը․ մինչ այսօր այդ նպատակին ուղղված որևէ քայլ չեմ տեսել․ Ռոբերտ Քոչարյան

Մենք պետք է վերակագնենք մեր սուբյեկտայնությունը․ մինչ այսօր այդ նպատակին ուղղված որևէ քայլ չեմ տեսել․ Ռոբերտ Քոչարյան

ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը 3 հեռուստաընկերություններին տված հարցազրույցում անդրադարձել է Հայաստանի սուբյեկտայնության վերաբերյալ հարցին։ «Սուբեյկտայնության երևալու համար պետք է այդ սուբյեկտայնությունը ունենաս։ Եթե դա կորցրել ես, ինչքան էլ աքլորանաս, ոչ ոք ուղղակի չի հավատալու։ Մենք պետք է վերակագնենք մեր սուբյեկտայնությունը, ես մինչ այսօր չեմ տեսնում որևէ քայլ, որ ուղղված է նպատակին»։ Քոչարյանը բերեց Սև լճի շուրջ ստեղծված իրավիճակից օրինակ։ «Բավական մեծ աղմուկ էր Հայաստանում, թե ինչու ՀԱՊԿ-ը չի միջամտում այս հարցերին, ինչու՞ Ռուսաստանը չի միջամտում այդ հարցերին։ Երբ Հայաստանի պաշտոնյան ուղղակի հայտարարում է՝ «ինչ-որ մի հատ Սև լճի 30%-ի համար հո պատերազմ չենք սկսելու», եթե  մեր երկրի ղեկավարը այդպես է մտածում, ինչու՞ պետք է այլ կերպ մտածի ՀԱՊԿ-ը կամ Ռուսաստանը, որոնք կյանքում Սև լճի մասին չեն էլ լսել, չգիտեն էլ թե ինչ է, թե որտեղ է գտնվում»։ Նրա խոսքով՝ տարածքային ամբողջականության մասին խոսելիս չի կարելի խոսել այդ ամբողջականության  ինչ-որ տոկոսի մասին։ «Եթե  5%-ով է խախտվել տարածքային ամբողջականությունը, նորմալ է, կամ եթե 1%-ով է խախտվել, նորմալ։ Կամ կա, կամ չկա, կամ դու կաս քո տարածքային ամբողջականությունը պաշտպանելու գործում, քո սուբյեկտայնությունը հստակ դրսևորելու գործում, կամ չկաս։ Կապ չունի՝ դա Սև լճի 30%-ն է, թե ոչ։ Խախտված է, դու ոչինչ չես անում, հայատարում ես, որ պատրաստ չես ոչինչ անել, բայց ուրիշներին ասում ես՝ եկեք, դուք իմ տեղը արեք։ Ուղղակի աբսուրդ է, և նման դրսևորումներով երբեք միջազգային հարաբերություններում հարգանքի նշույլ չես ունենալու»։
23:17 - 21 հուլիսի, 2021
Այն պատճառները, որոնք բերել են ներքաղաքական ճգնաժամի, չեն վերացվել․ Ռոբերտ Քոչարյան

Այն պատճառները, որոնք բերել են ներքաղաքական ճգնաժամի, չեն վերացվել․ Ռոբերտ Քոչարյան

ՀՀ երկրորդ նախագահ Ռոբերտ Քոչարյանն  3 հեռուստաընկերություններին տված հարցազրույցի ընթացքում անդրադարձել է հարցին՝ արդյոք հունիսի 20-ին կայացած խորհրդանական արտահերթ ընտրություններով Հայաստանում ներքաղաքական ճգնաժամը հաղթահարվել է, թե ոչ։ «Այն պատճառները, որոնք բերել են ներքաղաքական ճգնաժամի, վերացվե՞լ են։ Իհարկե չեն  վերացվել։ Հիմա մենք մեկ հարցի պատասխանը պետք է տանք։ Ընտրությունները ժամանակի մեքենա՞ է, կարո՞ղ է ժամանակը հետ պտտացնել, թե՞ չի կարող։ Հասկանալի է, որ չի կարող ժամանակը հետ պտտացնել, հետևաբար այն, ինչ կատարվել է հոկտեմբեր-նոյեմբերին, ամբողջ կյանքում հետապնդելու է այս քաղաքական թիմին»։ Քոչարյանի խոսքով՝ մոտ 400.000 մարդ քվեարկել է այն քաղաքական ուժերի օգտին, որոնք այս իշխանություններին համարում էին դավաճան, կապիտուլյանտ, ապիկար։ «Այս մարդիկ մնացել են Հայաստանում։ Այս մարդիկ, ի դեպ, երևի իրենց ակտիվությամբ, իրենց գիտակցությամբ, վերլուծելու ունակությամբ, բնակչության բավական որակյալ հատվածն են։ Ինչպե՞ս է կարելի խոսել քաղաքական ճգնաժամի հաղթահարման մասին այս պայմաններում»։ Նա նաև ընդգծել է, որ չկան ֆունդամենտալ հարցերի պատասխանները։ «Խոսքը չի գնում տարաձայնությունների մասին, թե ինչպիսի սոցիալական քաղաքականություն է իրականացվում Հայաստանում, մի քիչ ավելի լիբերա՞լ, թե՞ ավելի սոցիալիստական, խոսքը չի գնում պետության մասնակցության մասին տարբեր ոլորտներում, խոսքը գնում է ֆունդամենտալ հարցերի մասին, ֆունդամենտալ կորուստների մասին։ Մենք չունենք պատասխաններ մի շարք հարցերի վերաբերյալ։ Ինչպե՞ս ենք մենք կորցրել Շուշին, Հադրութը, այդ պատասխանները չունենալու պարագայում հնարավո՞ր է խոսել ներքաղաքական ճգնաժամի հաղթահարման մասին։ Չի կարող այդպիսի բան ուղղակի լինել»։
22:24 - 21 հուլիսի, 2021