ՀՀ հակակոռուպցիոն կոմիտե

Այնթապ համայնքի նախկին ղեկավարի կողմից մի շարք չարաշահումներ կատարելու գործով նախաքննությունն ավարտվել է

ՀՀ քննչական կոմիտեի hատուկ հանձնարարություններով գործերի քննության վարչությունում ավարտվել է Այնթապ համայնքի նախկին ղեկավարի կողմից պաշտոնեական դիրքի չարաշահումներ և պաշտոնեական կեղծիքներ կատարելու մի շարք դեպքերի առթիվ նախաձեռնված քրեական վարույթի նախաքննությունը: Ինչպես տեղեկացնում են ՀՀ ՔԿ-ից՝ իրականացված քննչական և վարութային մեծածավալ գործողությունների արդյունքում պարզվել է, որ Կ.Ս-ն, 2010 թ. փետրվարի 28-ից մինչև 2021 թ. դեկտեմբերի 17-ը զբաղեցնելով ՀՀ Արարատի մարզի Այնթապ համայնքի ղեկավարի պաշտոնը, Այնթապի համայնքապետարանի աշխատակազմի առաջատար մասնագետի օժանդակությամբ անցել է պաշտոնեական լիազորությունները, կատարել է պաշտոնեական կեղծիքներ, ինչպես նաև օրենքով սահմանված կարգով չի ձեռնարկել միջոցներ՝ համայնքային սեփականություն հանդիսացող հողամասերի ինքնակամ զավթումը կասեցնելու ուղղությամբ: «Մասնավորապես, ՀՀ Արարատի մարզի Այնթապ համայնքի նախկին ղեկավարը, նույն համայնքի 12-րդ փողոցի 1-ին նրբանցքում գտնվող ընդհանուր 0.03676 հա մակերեսով հողատարածքը եղբորն օտարելու նպատակով, ստորագրել, ապա իր կնիքով հաստատել և եղբորն է տրամադրել պաշտոնական փաստաթուղթ հանդիսացող քաղվածք, որում ներառել է ակնհայտ կեղծ տեղեկություններ այն մասին, որ համայնքի տնտեսության գրքում իր եղբոր անվամբ գրանցվել է 004 հա տնամերձ հողամաս: Այնուհետև, համայնքի ղեկավարը, դուրս գալով իր լիազորությունների շրջանակից, նշված քաղվածքը, առանց համայնքի ավագանու որոշման, ներկայացրել է ՀՀ կադաստրի կոմիտեի տարածքային ստորաբաժանում, որի հիման վրա նշված հողատարածքի նկատմամբ գրանցվել է եղբոր սեփականության իրավունքը։ Բացի դրանից՝ Այնթապ համայնքի նախկին ղեկավարը համայնքում գտնվող, ՀՀ հողային oրենuգրքի 60-րդ հոդվածով օտարման ոչ ենթակա՝ տարբեր մակերեսներով հողամասերը, վրան առկա ինքնակամ կառույցներով իրեն և իր ծանոթներին ու մտերիմներին օտարելու նպատակով, ակնհայտորեն դուրս գալով իր լիազորությունների շրջանակից, ստորագրել է Այնթապի համայնքապետարանի աշխատակազմի առաջատար մասնագետի կողմից կազմված որոշումներ՝ դրանցում ներառելով ակնհայտ կեղծ տեղեկություններ այն մասին, որ հողամասերը հանդիսանում են բնակավայրի հասարակական կառուցապատման, ինքնակամ կառույցի պահպանումը չի հակասում քաղաքաշինական նորմերին և համայնքի գլխավոր հատակագծի պահանջներին, ինքնակամ կառույցը կառուցված չէ ինժեներատրանսպորտային օբյեկտների անվտանգության գոտիներում, չի առաջացնում սերվիտուտ, ընդգրկված չէ ՀՀ հողային օրենսգրքի 60-րդ հոդվածով սահմանված սահմանափակումների ցանկում: Նշված որոշումներով Կ.Ս.-ն հիշյալ հողամասերի վրա առկա ինքնակամ շինությունները ճանաչել է համայնքային սեփականություն և օրինական։ Ապա համայնքի ավագանու որոշման բացակայության պայմաններում ուղղակի վաճառքով դրանք վաճառել է: Հետագայում, որոշումները ներկայացվել են ՀՀ կադաստրի կոմիտեի Մասիսի տարածքային ստորաբաժանում, որոնց հիման վրա հիշյալ հողամասերի, դրանց վրա առկա շինությունների նկատմամբ գրանցվել է համայնքի ղեկավարի կամ նրա մերձավորների սեփականության իրավունքը: Քննությամբ պարզվել է նաև, որ Այնթապ համայնքի բնակիչը, իրեն սեփականության իրավունքով պատկանող 0.058 հա մակերեսով բնակավայրերի տնամերձ գործառնական նշանակության հողամասը մետաղյա ցանցով ցանկապատելիս դուրս է եկել Այնթապ համայնքի 13-րդ փողոցի 2 փակուղու վրա, որը համայնքային սեփականության բնակավայրերի նպատակային նշանակության այլ գործառնական նշանակության հողամաս է։ Այդ կապակցությամբ հիշյալ փողոցի բնակչուհին դիմումներ է հասցեագրել համայնքի ղեկավարին՝ խնդրելով միջոցներ ձեռնարկել փողոցի փակուղում ապօրինի հողազավթումները կանխելու ուղղությամբ: Համայնքի ղեկավարը, տեղեկացված լինելով համայնքային սեփականության հողամասի զավթման մասին, դիտավորությամբ չի ձեռնարկել միջոցներ հողազավթումը կասեցնելու ուղղությամբ, վարչական պատասխանատվության միջոցներ չի կիրառել հողազավթում կատարած անձի նկատմամբ: Բացի դրանից՝ նպատակ ունենալով օրինականացնել համայնքի բնակչին պատկանող, Այնթապ համայնքի 17-րդ փողոցի 6-րդ նրբանցքի հասցեներից մեկում գտնվող՝ բնակավայրի նպատակային նշանակության բնակելի կառուցապատման գործառնական նշանակության 0.1 հա մակերեսով հողամասի վրա կառուցված անասնագոմը և տնտեսական պահեստը, ստորագրել է որոշում՝ դրանում ներառելով ակնհայտ կեղծ տեղեկություններ այն մասին, որ նշված հողամասի վրա կառուցված անասնագոմը և տնտեսական պահեստը չեն խախտում այլ անձանց իրավունքները և օրենքով պահպանվող շահերը, չեն հակասում քաղաքաշինական նորմերին: Այնուհետև, առանց հողամասի նպատակային նշանակությունը փոխելու, քաղաքաշինական նորմերի և կանոնների էական խախտումներով, օրինականացրել է վերոնշյալ հասցեում գտնվող արտադրական նշանակության անասնագոմը և տնտեսական պահեստը: Ձեռք բերված բավարար փաստերի հիման վրա Այնթապ համայնքի նախկին ղեկավարին մեղադրանք է առաջադրվել՝ ՀՀ նախկին քրեական օրենսգրքի 309-րդ հոդվածի 1-ին մասով, որը համապատասխանում է գործող քրեական օրենսգրքի 441-րդ հոդվածի 1-ին մասին (7 դրվագ), ՀՀ նախկին քրեական օրենսգրքի 308-րդ հոդվածի 1-ին մասով, որը համապատասխանում է ՀՀ գործող քրեական օրենսգրքի 441-րդ հոդվածի 1-ին մասին, ՀՀ նախկին քրեական օրենսգրքի 314-րդ հոդվածի 1-ին մասով, որը համապատասխանում է ՀՀ գործող քրեական օրենսգրքի 445-րդ հոդվածի 1-ին մասին (8 դրվագ), ՀՀ նախկին քրեական օրենսգրքի 3152-րդ հոդվածով, որը համապատասխանում է ՀՀ գործող քրեական օրենսգրքի 447-րդ հոդվածի 1-ին մասին: Քրեական վարույթը մեղադրական եզրակացությամբ ուղարկվել է դատախազին` դատարան ուղարկելու միջնորդությամբ»,- ասված է ՔԿ-ի տարածած հաղորդագրության մեջ: Ծանուցում. հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

18:57 - 02 մայիսի, 2023

Գագիկ Բեգլարյանի, Սամվել Ալեքսանյանի, Հրանտ Դավթյանի ու նրանց հարազատների չհայտարարագրված տները Դուբայում |hetq.am|

hetq.am: Գագիկ Բեգլարյանի կրտսեր եղբայրը՝ Հակոբ Բեգլարյանը, եւս բնակարան է ձեռք բերել Դուբայում: Գույքը նա գնել է 2007-2017 թթ. միջակայքում: Հ. Բեգլարյանը պետական պաշտոնյա էր 2005-2012 թթ., երբ զբաղեցնում էր «Պետական գնումների գործակալություն» ՊՈԱԿ-ի, այնուհետ՝ «Գնումների աջակցման կենտրոն» ՊՈԱԿ-ի պետի պաշտոնը: 2014-2017 թթ. կրտսեր Բեգլարյանը ՀՀ քաղաքաշինության նախարարի, ապա՝ քաղաքաշինության պետական կոմիտեի նախագահի տեղակալն էր, իսկ 2017-2019 թթ.՝ ԱԺ պատգամավոր: Նա անշարժ գույք է գնել «Palm Jumeirah»-ի «ցողունի» վրա գտնվող «Fairmont Palm Residence» համալիրի հյուսիսային մասնաշենքում՝ «The Residences North»-ում: Բեգլարյանի տունը 8-րդ հարկում գտնվող բնակարան է, որի մակերեսը 160 քմ է, ունի 2 ննջասենյակ, պատշգամբ (18 քմ): Նախկին պաշտոնյան նաեւ մեքենայի կայանատեղ ունի այստեղ: Դուբայի կադաստրի գնահատմամբ՝ «Palm Jumeirah»-ում գտնվող եւ 2 ննջասենյակ ունեցող բնակարանի վարձակալության տարեկան վճարը կարող է լինել 134.000-164.000 արաբական դիրհամ (36-45 հազ. դոլար), որը չի ներառում կոմունալ ծառայությունների վճարները: Այդուհանդերձ, ներկա պահին Հ. Բեգլարյանի բնակարանը վարձակալ չունի: Շեշտենք, որ մինչ օրս հենց Հակոբ Բեգլարյանն է տան սեփականատերը: Ներկայում «Fairmont Palm Residence»-ի վերոնշյալ մասնաշենքում կարելի է 2 ննջասենյակով բնակարան ձեռք բերել սկսած 3,3 մլն արաբական դիրհամից (900 հազ. դոլար): Նախկին պաշտոնյային ուղարկել էինք նույնատիպ հարցեր, ինչ եղբորը, բայց եթե Գագիկ Բեգլարյանը մեր նամակը ստացել է ու չի պատասխանել, ապա Հակոբ Բեգլարյանին փոստատարն այդպես էլ չի կարողացել հանձնել նամակը: Այնուհետ զանգահարել ենք նախկին պատգամավորի բջջային համարին: Ճշտելուց հետո, որ իր հետ զրուցողը լրագրող է, Բեգլարյանի ձայնով անձն ասաց. «Ինքը տեղում չի, քաղաքում չի», ապա անջատեց հեռախոսը: Հակոբ Բեգլարյանը չի ներկայացրել հայտարարագրման ենթակա տվյալը Հ. Բեգլարյանը, ՀՀ կոռուպցիայի կանխարգելման հանձնաժողովի (ԿԿՀ) տեղեկացմամբ, երբեւէ չի հայտարարագրել Դուբայում գտնվող գույք: Նա այս գույքը չի հայտարարագրել նաեւ 2017 թ. փետրվարին, երբ որպես ԱԺ պատգամավորության թեկնածու հայտարարագիր է ներկայացրել ՀՀ կենտրոնական ընտրական հանձնաժողով: Խնդիրն այն է, որ հայտարարագրման ենթակա տվյալ թաքցնելը Հայաստանում քրեական հանցանք է համարվում 2017-ի հուլիսից այս կողմ: Քրեականացումից հետո Հակոբ Բեգլարյանը պաշտոնավարման բերումով ԿԿՀ-ին ներկայացրել է 3 հայտարարագիր, որոնցից վերջինը՝ պաշտոնի դադարեցման հայտարարագիրը, պետք է պարունակեր ԱԺ պատգամավորի մանդատը թողնելու օրվա՝ 2019 թ. հունվարի 14-ի դրությամբ Բեգլարյանի ունեցած անշարժ գույքի բոլոր տվյալները: Բայց, ինչպես ասացինք, Դուբայի բնակարանը նա երբեւէ չի հիշատակել: Սա, թերեւս, խնդիրներ կառաջացնի նախկին պաշտոնյայի համար: 2019-ի փետրվարին, երբ Բեգլարյանը ներկայացրել է իր վերջին հայտարարագիրը, ուժի մեջ էր նախկին Քրեական օրենսգիրքը: Այն սահմանում էր, որ առանձնապես խոշոր չափերով (1 մլն դրամը գերազանցող) գույքը հայտարարագրումից թաքցնելը պատժվում է 2-4 տարվա ազատազրկմամբ՝ առավելագույնը 3 տարով որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով կամ առանց դրա: Նախկին պատգամավորը 2 բնակարան ունի Դուբայում Հրանտ Դավթյանն այն հայերից է, որոնք Դուբայում համեմատաբար շուտ են գույք ձեռք բերել: Հիշեցնենք, որ նա ԱԺ պատգամավոր է եղել 2012-2017 եւ 2018-2019 թթ.: Դավթյանի արաբական ունեցվածքի մասին գրել էինք 2018-ի աշնանը: Սակայն անդրադարձել էինք այն ժամանակ դեռեւս պաշտոնավարող Դավթյանի միայն մեկ բնակարանին, քանի որ մյուսի մասին տեղեկություններ չունեինք: Բնակարաններից մեկը Դավթյանը հայտարարագրել էր «Հետքի» հարցերից հետո Մեր ունեցած տվյալների հիման վրա գրել էինք, որ Հ. Դավթյանը բնակարան ունի Դուբայ Մարինայում (հայտնի է նաեւ որպես Մարսա Դուբայ), որը քաղաքի բավականին արագ զարգացող ու կառուցապատվող, գերժամանակակից շենքերից կազմված շրջան է: Դավթյանի տունը գտնվում է «Al Sahab» զույգ աշտարակներից առաջինում: 2018-ին նշել էինք, որ Դավթյանը բնակարան է ձեռք բերել 24-հարկանի «Al Sahab 1» աշտարակի 7-րդ հարկում, իսկ նրա ընկեր, նախկին պատգամավոր Հակոբ Հակոբյանը (Ճոյտ)՝ 44-հարկանի «Al Sahab 2»-ի 6-րդ հարկում: Հակոբյանը դեռ այն ժամանակ մեզ հայտնել էր, որ հարկային պարտավորությունների կատարման համար բնակարանը վաճառել է: Բայց ավելի հետաքրքիր էր Դավթյանի պարագան: Այսպես՝ «Al Sahab»-ում Հրանտ Դավթյանը գույք է գնել 1997-2007 թթ. միջակայքում, բայց երբ 2012-ին ԱԺ պատգամավոր է դարձել, չի հայտարարագրել արաբական այս բնակարանը, ինչը պարտավոր էր անել: Ամեն դեպքում, ինչպես վերեւում նշեցինք, հայտարարագրման ենթակա տվյալ թաքցնելը հանցանք չէր համարվում մինչեւ 2017 թ. հուլիս ամիսը, ինչն էլ լավ առիթ էր շատ հայ պաշտոնյաների համար, որոնք պարտաճանաչ չեն գտնվել իրենց պարտականությունները կատարելիս: Այն, որ Հ. Դավթյանը «Al Sahab»-ի իր գույքը չի հայտարարագրել մինչեւ 2018 թ., տեղեկացել ենք Կոռուպցիայի կանխարգելման հանձնաժողովից: Իսկ 2018-ին դա անելուն ակամա նպաստել է «Հետքի» լրագրողի հարցադրումը: 2012-2017 թթ. պատգամավորության շրջանից հետո Հրանտ Դավթյանն առաջադրվել էր նաեւ 2017 թ. ընտրություններում: Որպես թեկնածու նա ՀՀ կենտրոնական ընտրական հանձնաժողովին գույքի եւ եկամուտների հայտարարագիր էր ներկայացրել 2017-ի փետրվարին, սակայն դրանում նշել էր միայն Հայաստանում ունեցած 5 միավոր անշարժ գույք: Այդուհանդերձ, Դավթյանը նորից պատգամավոր էր դարձել ոչ թե 2017-ի, այլ 2018-ի ամռանը, երբ նրա կուսակիցներից մեկը հրաժարվել էր մանդատից: Եվ ահա դրանից հետո «Հետքի» լրագրողը մի քանի հարց էր տվել նրան Դուբայում ձեռք բերած գույքի մասին: Դավթյանը խոստովանել էր, որ այնտեղ, իր հիշելով, 86 քմ մակերեսով բնակարան ունեն, որն իր տնեցիներից մեկի անունով է, դրա համար էլ մինչ այդ չի հայտարարագրվել: Միաժամանակ նշել էր, որ այն ձեռք են բերել մոտ 15 տարի առաջ, երբ Դուբայում տուրիստական բիզնես էին հիմնել: «Հյուրանոցներից էժան էր էն վախտ, դրա համար էի վերցրել»,- ասել էր Հ. Դավթյանը: Այս զրույցից հետո՝ 2018-ի սեպտեմբերին, Հ. Դավթյանը ԿԿՀ-ին էր ներկայացրել պաշտոնի ստանձնման հայտարարագիր, որում առաջին անգամ ցույց էր տվել արաբական բնակարանը այն գնելուց տարիներ անց: Հանձնաժողովից վերջերս տեղեկացել ենք, որ 2018-ին հայտարարագրվածը համատեղ սեփականության իրավունքով գույք է: Հրանտ Դավթյանի խոսքերը համադրելով փաստերի հետ՝ տեսնում ենք, որ նա շատ լավ էլ հիշում էր մանրամասները, այդ թվում՝ գույքի չհայտարարագրված լինելը (չնայած համասեփականատերերից մեկն էլ ինքն է), ընտանիքի անդամներից մեկի սեփականատեր լինելը, անգամ՝ մակերեսը: Այսպես՝ 1997-2007 թթ. արանքում Դավթյանն ու կինը՝ Աննա Դավթյանցը, «Al Sahab 1»-ի 7-րդ հարկում 85 քմ մակերեսով բնակարան են գնել, որն ունի 1 ննջասենյակ, պատշգամբ (5 քմ): Ամուսինները նաեւ ավտոկայանատեղի ունեն: Փաստորեն, ըստ Դավթյանի, իրենք տունը ձեռք են բերել մոտավորապես 2003 թ. («Հետքի» լրագրողի հետ զրույցից շուրջ 15 տարի առաջ), ինչը եւս չի հակասում մեր ունեցած տվյալներին: Դուբայի կադաստրից տեղեկանում ենք, որ ամուսինները գույքը վարձակալության են հանձնել. ներկա պահին այն վարձակալ ունի: Ըստ կադաստրի՝ Դուբայ Մարինայում 1 ննջասենյակ ունեցող բնակարանի վարձակալության տարեկան վճարը կարող է լինել 71.000-87.000 արաբական դիրհամ (20-24 հազ. դոլար): Մյուս կողմից՝ ներկայում «Al Sahab» համալիրում կարելի է 1 ննջասենյակով բնակարան գնել սկսած 1,4 մլն արաբական դիրհամից (380 հազ. դոլար): 2018-ին պաշտոնը ստանձնելու եւ 2019-ին այն թողնելու առիթով Հ. Դավթյանը ներկայացրել է հայտարարագրեր, որտեղ նշել է այս բնակարանը: Այսինքն՝ այս առումով նա խախտում թույլ չի տվել: Բայց սա ամենը չէ: Հրանտ Դավթյանը եւս մի գույք է ձեռք բերել Դուբայում, որի մասին նա չի հայտնել ո՛չ «Հետքի» լրագրողին, ո՛չ Կոռուպցիայի կանխարգելման հանձնաժողովին: Շարունակությունը՝ սկզբնաղբյուր կայքում

13:17 - 17 ապրիլի, 2023