Վլադիմիր Պուտին

Ռուսաստանի Դաշնության գործող նախագահ։ Ծնվել է 1952թ. հոկտեմբերի 7-ին։ 1975-1991թթ․ ծառայել է ՊԱԿ-ում (КГБ), զբաղեցրել հետախուզական պաշտոններ։ 1991թ. ըստ պաշտոնական տեղեկատվության սեփական զեկուցագրով զորացրվել է ՊԱԿ-ից։ 1990-1995թթ. զբաղեցրել է Լենինգրադի քաղաքային իշխանության տարբեր պաշտոններ։ 1996-1998թթ․ արագ վերելք է գրանցել Կրեմլի տարբեր պաշտոններում՝ ի վերջո ստանձնելով Նախագահի աշխատակազմի ղեկավարի տեղակալի պաշտոնը։ 1998-ին նշանակվում է ԱԴԾ (ФСБ) տնօրեն։

1999-ի օգոստոսին ընդունելով նախագահ Ելցինի առաջարկը ստանձնել է ՌԴ վարչապետի պաշտոնը։ 1999-ի դեկտեմբերի 31-ին հրաժարական տվեց Ելցինը եւ Պուտինը դարձավ նախագահի պաշտոնակատար։ 2000թ․ մարտին ընտրվեց նախագահ եւ պաշտոնավարեց առավելագույն երկու ժամկետով։ 2008-ին՝ վարչապետ Մեդվեդեւի նախագահ ընտրվելուց հետո Պուտինը ստանձնեց Վարչապետի պաշտոնը։ Այս դրվագը հանրային լայն շրջանակներում ընկալվեց որպես «փոխատեղում»։ 2012-ից ի վեր Պուտինը նորից նախագահի պաշտոնում է։

ՌԴ-ն, ԱՄՆ-ն և Ֆրանսիան Արցախում տիրող իրավիճակի կապակցությամբ համատեղ հայտարարություն են նախապատրաստում |ria.ru|

ՌԴ նախագահ Վլադիմիր Պուտինը Ռուսաստանի Անվտանգության խորհրդի մշտական անդամների հետ հանդիպման ընթացքում հայտնել է, որ ՌԴ-ն, ԱՄՆ-ն և Ֆրանսիան Արցախում տիրող իրավիճակի կապակցությամբ համատեղ հայտարարություն են նախապատրաստում։ Այս մասին տեղեկացրել է Վլադիմիր Պուտինի մամուլի քարտուղար Դմիտրի Պեսկովը, հայտնում է РИА Новости գործակալությունը։ «Հանդիպման ժամանակ հատուկ ուշադրություն է դարձվել Լեռնային Ղարաբաղի շփման գծում տիրող իրավիճակին։ Կրկին ծայրահեղ մտահոգություն է արտահայտվել շարունակվող մարտական գործողությունների կապակցությամբ»,- փոխանցել է Պեսկովը։

15:30 - 01 հոկտեմբերի, 2020

Մակրոնը Պուտինի ու Թրամփի հետ քննարկելու է Լեռնային Ղարաբաղում տիրող իրավիճակը |aysor.am|

aysor.am: Ֆրանսիայի նախագահ Էմանուել Մակրոնը հայտարարել է, որ մտադիր է հեռախոսային բանակցություններ վարել ՌԴ նախագահ Վլադիմիր Պուտինի և ԱՄՆ առաջնորդ Դոնալդ Թրամփի հետ՝ կապված Լեռնային Ղարաբաղում ռազմական գործողությունների հետ, հաղորդում է «РИА Новости»-ն: «Ես այս երեկո կխոսեմ նախագահ Պուտինի, և, կարծում եմ, վաղը՝ նախագահ Թրամփի հետ այս հարցի շուրջ, որպեսզի կարծիքների փոխանակում անցկացնեմ և ճգնաժամից դուրս գալու ուղիներ առաջարկեմ», - ասել է Մակրոնը Ռիգայում կայացած մամուլի ասուլիսում:

12:13 - 30 սեպտեմբերի, 2020

ՀՀ վարչապետը Պուտինի հետ չի քննարկել ռազմական գործողություններում ՌԴ հնարավոր ներգրավման հարցը |armenpress.am|

armenpress.am: ՀՀ վարչապետ Նիկոլ Փաշինյանը հայտարարել է, որ ՌԴ նախագահ Վլադիմիր Պուտինի հետ չի քննարկել Լեռնային Ղարաբաղի հակամարտության մեջ Ռուսաստանի հնարավոր ներգրավման հարցը: Այս մասին Փաշինյանը խոսել է ռուսական մի քանի լրատվամիջոցների տված հարցազրույցում: «Մենք ՌԴ նախագահի հետ չենք քննարկել ղարաբաղյան հակամարտության մեջ Ռուսաստանի ներգրավման հնարավորությունը: Մենք դեռևս կարիք չունենք օգտագործելու ռուսական 102-րդ բազայի ներուժը, սակայն նման անհրաժեշտության դեպքում առկա են բոլոր իրավական հիմքերը»,- ՀՀ վարչապետի խոսքը մեջբերել է ՏԱՍՍ-ը: Փաշինյանը նաև նշել է, որ Հայաստանը ցանկանում է Ռուսաստանի հետ կառուցել որակապես նոր հարաբերություններ:

10:48 - 30 սեպտեմբերի, 2020

Նիկոլ Փաշինյանը հեռախոսազրույց է ունեցել Վլադիմիր Պուտինի հետ

Վարչապետ Նիկոլ Փաշինյանը հեռախոսազրույց է ունեցել Ռուսաստանի Դաշնության նախագահ Վլադիմիր Պուտինի հետ: Ինչպես տեղեկացրին ՀՀ վարչապետի աշխատակազմի տեղեկատվության և հասարակայնության հետ կապերի վարչությունից, Վարչապետը մանրամասն անդրադարձել է Ադրբեջանի սանձազերծած ռազմական ագրեսիայի հետևանքով տեղի ունեցող զարգացումներին: ՌԴ նախագահը խոր մտահոգություն է հայտնել շարունակվող ռազմական գործողությունների կապակցությամբ և կարևորել հրադադարի ռեժիմի պահպանումն ու ապաէսկալացիայի ուղղությամբ քայլերի իրականացումը:

21:17 - 29 սեպտեմբերի, 2020

Կայացել է Փաշինյան-Պուտին հեռախոսազրույց |armenpress.am|

armenpress.am: Հայկական կողմի նախաձեռնությամբ կայացել է հեռախոսազրույց ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի միջև: Այս մասին հայտնում է Կրեմլի պաշտոնական կայքը: «Քննարկվել է իրավիճակի կտրուկ սրացումը Լեռնային Ղարաբաղի կոնֆլիկտի շրջանում: Ռուսական կողմը լուրջ մտահոգություն է հայտնել լայնամասշտաբ ռազմական բախումների վերսկսկման առնչությամբ: Նշվել է, որ այժմ կարևոր է ձեռնարկել բոլոր անհրաժեշտ ջանքերը՝ հակամարտության հետագա էսկալացիան թույլ չտալու համար, և կարևորը՝ անհրաժեշտ է դադարեցնել ռազմական գործողությունները», - ասված է հաղորդագրությունում: ՀՀ վարչապետի մամուլի ծառայությունից փոխանցում են, որ Նիկոլ Փաշինյանը հեռախոսազրույցի ընթացքում խորը մտահոգություն է հայտնել ադրբեջանական կողմից սանձազերծված ռազմական գործողությունների կապակցությամբ, որոնք ագրեսիա են Լեռնային Ղարաբաղի դեմ: Նա անթույլատրելի է համարել էսկալացիայի հետագա զարգացումը և դրանում արտատարածաշրջանային ուժերի ներգրավումը:

19:28 - 27 սեպտեմբերի, 2020

Պուտինը Վաշինգտոնին գործարք է առաջարկել |azatutyun.am|

azatutyun.am: Ռուսաստանի նախագահն առաջարկել է Միացյալ Նահանգներին «երկուստեք երաշխիքներ տալ` միմյանց ներքին գործերին, այդ թվում` ընտրական գործընթացներին չմիջամտելու մասին»: Պուտինի այդ հայտարարությունը հրապարակվել է երեկ` Կրեմլի պաշտոնական կայքում` նոյեմբերին ԱՄՆ-ում կայանալիք նախագահական ընտրություններից մոտ մեկ ամիս առաջ: Հեռակա դիմելով պաշտոնական Վաշինգտոնին` Ռուսաստանի առաջնորդը կոչ է արել վերաբեռնել հարաբերությունները տեղեկատվական տեխնոլոգիաների ոլորտում, և «միջկառավարական համաձայնագիր ստորագրել` համացանցում միջադեպերը կանխելու» համար: Պուտինի առաջարկը ներկայացվել է վերջին ամիսներին առավել հաճախակի դարձած հաղորդումների ֆոնին, որոնց համաձայն Մոսկվան կրկին փորձում է միջամտել ԱՄՆ նախագահական ընտրություններին: Ամերիկայի հետախուզական գործակալությունները եզրակացրել էին, որ Ռուսաստանը միջամտել է նախորդ` 2016-ի նախագահական ընտրություններին` Դոնալդ Թրամփի հաղթանակին աջակցելու նպատակով: Մոսկվան մինչ օրս կտրականապես հերքում է այդ մեղադրանքները և պնդում, թե որևէ երկրի ներքին գործերին չի միջամտում:

12:43 - 26 սեպտեմբերի, 2020

Ֆրանսիան Մակրոն-Պուտին հեռախոսազրույցի աղմկահարույց արտահոսքի վերաբերյալ պաշտոնական հետաքննություն է սկսել |tert.am|

tert.am: Ֆրանսիայի իշխանությունները պաշտոնական հետաքննություն են սկսել նախագահ Էմանուել Մակրոնի և ՌԴ ղեկավար Վլադիմիր Պուտինի հեռախոսազրույցի աղմկահարույց արտահոսքի առնչությամբ, գրում է ՏԱՍՍ գործակալությունը՝ հղում տալով Ֆրանսիայի արտգործնախարարության հայտարարությանը: «Ներքին գաղտնի փաստաթղթերի ցանկացած արտահոսք թույլատրելի չէ: Այս պատճառով մենք զերծ կմնանք մեկնաբանություններից: Այժմ անցկացվում է քննություն»,- նշել է դիվանագիտական գերատեսչության ներկայացուցիչը: Ավելի վաղ Կրեմլի խոսնակ Դմիտրի Պեսկովը հայտարել էր, որ Ելիսեյան պալատը չէր կարող գիտակցաբար, դիվանագիտական նորմերի խախտմամբ, լրատվամիջոցներին փոխանցել Ռուսաստանի և Ֆրանսիայի նախագահների զրույցի ձայնագրությունը: Պեսկովը հիշեցրել է, որ «Բեռլինյան հիվանդի (Ալեքսեյ Նավալնի) թեման իսկապես քննարկվել է Պուտինի ու Մակրոնի վերջերս կայացած զրույցի ընթացքում, և Կրեմլը տեղեկացրել է այդ մասին»:«Միևնույն ժամանակ, թերթը բնավ ճշգրիտ չէ ներկայացված ձևակերպումների մեջ: Եվ արդարության համար պետք է նշել, որ դժվար թե կարողանար ճշգրիտ լինել, քանի որ դա կնշանակեր, որ մեր ֆրանսիացի գործընկերները դիտմամբ լրատվամիջոցներին են փոխանցել երկու նախագահների զրույցի ձայնագրությունը, որը չի համապատասխանում դիվանագիտական պրակտիկային: Համոզված ենք, որ դա այդպես չէ», -ընդգծել է Պեսկովը:Նրա խոսքերով՝ Կրեմլի մտքով անգամ չի կարող անցնել, որ Ֆրանսիայի իշխանություններից դեպի լրատվամիջոցներ կարող էր առաջնորդների խոսակցության բովանդակության «արտահոսք» լինել:Հիշեցնենք, որ Le Monde պարբերականն ավելի վաղ հայտնել էր, որ Պուտինը Մակրոնի հետ զրույցում չէր բացառել, որ ռուս ընդդիմադիր գործիչ Ալեքսեյ Նավալնին ինքն է թույնը խմել: Շարունակությունը՝ tert.am-ում

11:42 - 25 սեպտեմբերի, 2020

Կրեմլը Պուտինին Խաղաղության Նոբելյան մրցանակի չի առաջադրել․ Պեսկով |factor.am|

factor.am: Կրեմլը ՌԴ նախագահ Վլադիմիր Պուտինին Խաղաղության Նոբելյան մրցանակի չի առաջադրել։ ՏԱՍՍ-ի փոխանցմամբ՝ այս մասին հայտնել է Կրեմլի խոսնակ Դմիտրի Պեսկովը։ «Գիտեք, որ շատ տարբեր մարդիկ են առաջադրվում այդ մրցանակին, և դա նրանց նախաձեռնությունն է, ովքեր հանդես են գալիս նման առաջարկությամբ։ Այս դեպքում դա ձեր հիշատակած գրողն է»,- գրող Սերգեյ Կոմկովի կողմից նման հայտի ներկայացման մասին հարցն այսպես է մեկնաբանել Դմիտրի Պեսկովը։ «Եթե մրցանակը շնորհելու որոշում կայացվի, հրաշալի է, եթե ոչ, նույնպես սարսափելի ոչինչ չկա»,- հավելել է նա։ Ավելի վաղ ռուսաստանցի մի շարք հասարակական գործիչներ, այդ թվում՝ գրող Սերգեյ Կոմկովը, հայտնել էին, որ ՌԴ նախագահ Վլադիմիր Պուտինին Խաղաղության Նոբելյան մրցանակ շնորհելու հայտ են ներկայացրել Նոբելյան կոմիտեին։ Հայտն Օսլո է ուղարկվել սեպտեմբերի 10-ին։

14:51 - 24 սեպտեմբերի, 2020

Մակրոնը Մոսկվային կոչ է անում լույս սփռել Նավալնիի մահափորձի վրա |azatutyun.am|

azatutyun.am: Պուտինը բողոքում է միջազգային հարաբերություններում «բարության և հումանիզմի պակասից»: Ֆրանսիայի նախագահը ՄԱԿ-ի Գլխավոր ասամբլեային հղած իր տեսաուղերձում կրկին պահանջել է Ռուսաստանից լույս սփռել «Նովիչոկ»-ով Ալեքսեյ Նավալնիին սպանելու փորձի վրա և հավաստիացրել է, որ քիմիական զենքին վերաբերող «կարմիր գծերը» կպահպանվեն: Էմանյուել Մակրոնը շեշտել է, որ Ֆրանսիան չի հանդուրժի Եվրոպայում կամ Ռուսաստանում քիմիական զենքի կիրառումը: Ռուսաստանի նախագահ Վլադիմիր Պուտինը ՄԱԿ-ին հղած տեսաուղերձում առաջարկել է վերացնել «ոչ լեգիտիմ պատժամիջոցները» համավարակի ֆոնին՝ համաշխարհային տնտեսության վերականգնումը դյուրացնելու համար, և բողոքել է միջազգային հարաբերություններում «բարության և հումանիզմի պակասից»:

10:16 - 23 սեպտեմբերի, 2020

Ռուսաստանը պատրաստ է անվճար տրամադրել կորոնավիրուսի դեմ իր պատվաստանյութը ՄԱԿ-ի աշխատակիցներին․ Պուտինը ելույթ է ունեցել ՄԱԿ-ի Գլխավոր ասամբլեայում |tert.am|

tert.am: ՌԴ նախագահ Վլադիմիր Պուտինը ելույթ է ունեցել ՄԱԿ-ի Գլխավոր ասամբլեայի 75-րդ նստաշրջանում, որին այս տարի համավարակի պատճառով համաշխարհային առաջնորդները մասնակցում են տեսաուղերձի ձևաչափով: Ելույթի սկզբում Պուտինը հիշեցրել է, որ ՄԱԿ-ի կանոնադրությունը շարունակում է լինել միջազգային իրավունքի գլխավոր աղբյուրը, իսկ միջազգային կազմակերպությունն արժանապատվորեն կատարում է իր գլխավոր առաքելությունը, այն է՝ պահպանել աշխարհը: Պուտինն ընդգծել է, որ ՄԱԿ-ը պետք է հարմարվի նոր իրականությանը, իսկ Անվտանգության խորհուրդը պետք է առավել ընդգրկուն կերպով հաշվի առնի բոլոր երկրների շահերը: Խոսելով կորոնավիրուսի համավարակի մասին՝ Պուտինն ընդգծել է, որ այն նոր մարտահրավեր է դարձել և անմիջականորեն խոցել է միլիոնավոր մարդկանց: Նրա խոսքով՝ համաշխարհային տնտեսության վերականգնումը ոչ ստանդարտ լուծումներ կպահանջի: Պուտինը կոչ է արել ամրապնդել Առողջապահության համաշխարհային կազմակերպության ներուժն ու ընդգծել, որ Ռուսաստանն ամենաշահագրգիռ մասնակցությունը կցուցաբերի այդ գործում: Նա նշել է, որ Ռուսաստանը պատրաստ է անվճար տրամադրել կորոնավիրուսի դեմ իր պատվաստանյութը ՄԱԿ-ի աշխատակիցներին:

21:38 - 22 սեպտեմբերի, 2020

«Ռուսաստանում կարևորում են Հայաստանի հետ բարեկամական, դաշնակցային հարաբերությունները». ՌԴ նախագահ Վլադիմիր Պուտինը շնորհավորել է ՀՀ վարչապետին Անկախության տոնի առթիվ

Հայաստանի Հանրապետության անկախության 29-րդ տարեդարձի առթիվ վարչապետ Նիկոլ Փաշինյանին շնորհավորական ուղերձ է հղել Ռուսաստանի Դաշնության նախագահ Վլադիմիր Պուտինը: Ուղերձում, մասնավորապես, ասված է. «Հարգելի Նիկոլ Վովայի, Ընդունեք անկեղծ շնորհավորանքներս Հայաստանի Հանրապետության Անկախության օրվա առթիվ: Ռուսաստանում կարևորում են Հայաստանի հետ բարեկամական, դաշնակցային հարաբերությունները: Վստահ եմ, որ մեր երկրների կառուցողական երկխոսությունը, տարբեր ոլորտներում երկկողմ համագործակցությունը, ինչպես նաև եվրասիական տարածքում ինտեգրման գործընթացների շրջանակներում փոխգործակցությունն այսուհետ ևս կշարունակեն ակտիվորեն զարգանալ: Այն, անկասկած, համապատասխանում է ռուս և հայ ժողովուրդների շահերին, ընթանում է տարածաշրջանային անվտանգության և կայունության ապահովման հունով: Մաղթում եմ Ձեզ, հարգելի Նիկոլ Վովայի, քաջառողջություն և հաջողություններ, իսկ Հայաստանի բոլոր քաղաքացիներին՝ խաղաղություն և բարեկեցություն»։

12:08 - 21 սեպտեմբերի, 2020