Լեհաստան

Լեհաստանը հուլիսի 1-ից կդադարեցնի ուկրաինացի փախստականների ֆինանսական աջակցությունը |shantnews.am|

shantnews.am: Լեհաստանը հուլիսի 1-ից կդադարեցնի ուկրաինացի փախստականների մեծամասնությանը նպաստներ վճարել։ Այս մասին մայիսի 31-ին հայտնում է Rzeczpospolita-ն՝ վկայակոչելով Լեհաստանի ներքին գործերի փոխնախարար Պավել Շեֆերնակերի հայտարարությունը: Այսպիսով՝ նպաստներ կշարունակեն ստանալ միայն նրանք, ովքեր դրա կարիքն ունեն՝ հաշմանդամները, ինչպես նաև հղիներն ու բազմազավակ կանայք։ Այս որոշումը կայացվել է փախստականներին խրախուսելու համար, որպեսզի նրանք սկսեն ինքնուրույն գումար վաստակել։ «Մենք համոզված ենք, որ շատ փախստականներ Լեհաստանում կարողանում են անկախանալ և հարմարվել», – ասել է Շեֆերնակերը: Մայիսի 17-ին Լեհաստանի նախագահ Անջեյ Դուդան հայտարարել է, որ Եվրամիությունը (ԵՄ) անբավարար է ֆինանսավորում Լեհաստանին և Հունգարիային, որոնք ընդունում են ուկրաինացի փախստականներին։ Նրա խոսքով՝ Դոնբասի բնակիչների պաշտպանության համար Ռուսաստանի Դաշնության հատուկ ռազմական գործողության սկզբից ի վեր Ուկրաինայից ավելի քան 3 միլիոն փախստական է հատել Լեհաստանի սահմանը։ Նախօրեին Լեհաստանի փոխարտգործնախարար Մարչին Պրշիդաչը հայտարարել էր, որ Լեհաստանի հանձնաժողովը ձգտում է ապահովել, որ Եվրահանձնաժողովը (ԵՀ) լրացուցիչ միջոցներ հատկացնի երկրին աջակցելու համար՝ կապված փախստականների հոսքի հետ։ Նա ընդգծել է, որ հասարակ քաղաքացիները, ովքեր հաճախ են բացում իրենց տների դռներն ու ընդունում ուկրաինացի հարեւաններին, ֆինանսական աջակցության կարիք ունեն։ Միաժամանակ մայիսի 14-ին սոցցանցերում տեսանյութ է հայտնվել, որտեղ երևում է, թե ինչպես է Լեհաստանում ուկրաինացի փախստականների պահվածքը վրդովմունք առաջացրել տեղի բնակիչների մոտ։ Լեհերը պահանջել են ուկրաինացիների վերադարձը հայրենիք՝ իրենց երկրի տարածքում տեղի ունեցող ցույցերի պատճառով։

11:35 - 02 հունիսի, 2022

Լեհաստանում եւ Բալթիկայի երկրներում սկսվում են ՆԱՏՕ-ի ՀՕՊ-ի հրթիռային զորքերի վարժանքները |armenpress.am|

armenpress.am: Լեհաստանում եւ Բալթիկայի երեք երկրներում սկսվում է ՆԱՏՕ-ի հակաօդային պաշտպանության հրթիռային միացյալ զորքերի Ramstein Legacy 2022 (RALY 22) զորավարժությունների առաջին փուլը: Մայիսի 30-ին այդ մասին տեղեկացրել է Լեհաստանի զինված ուժերի Գլխավոր հրամանատարությունը: Հաղորդվում է, որ վարժանքները տեղի կունենան մայիսի 30-ից մինչեւ հունիսի 12-ը չորս երկրների եւ Բալթիկ ծովի տարածաշրջանի օդային տարածության օգտագործմամբ: Զորավարժությունների ընթացքում կկատարվեն իրական թռիչքներ: Զինավարժանքները պլանավորվում է անցակացնել յուրաքանչյուր երկու տարին մեկ: «Զորավարժություններին մասնակցում են դաշնակիցների ռազմա-օդային ուժերը եւ ցամաքային հրթիռային ստորաբաժանումները, որոնք ղեկավարում եւ կառավարում են ՆԱՏՕ-ի կառույցները»,- տեղեկացրել է Լեհաստանի հրամանատարությունը: Վարժանքներին կմասնակցեն զինծառայողներ ԱՄՆ-ից, Ֆրանսիայից, Գերմանիայից, Նորվեգիայից, Չեխիայից, Սլովակիայից, Մեծ Բրիտանիայից, Իտալիայից, Բելգիայից, Ռումինիայից, Թուրքիայից եւ Իսպանիայից: «Զինավարժանքները, որոնք կանցկացվեն Եվրոպայի տարբեր երկրներում, պլանավորվել են՝ ելնելով զանազան եւ իրական իրավիճակային պայմաններից»,- ընդգծված է հաղորդագրության մեջ: Այս տարի զորավարժությունների նպատակն է «ստորաբաժանումների փոխգործակցության եւ պատրատականության ամրապնդումը, ինչն արդյունքում կուժեղացնի դաշնային երկրների տարածքների, ուժերի եւ բնակչության պաշտպանությունը սպառնալիքներից, հրթիռային կամ օդային գրոհներից», հաղորդել է ՏԱՍՍ-ը:

15:48 - 30 մայիսի, 2022

Լեհաստանում ասել են, որ ԵՄ-ն անհրաժեշտ միջոցներ չի փոխանցել Վարշավային Ուկրաինացի փախստականների համար |armenpress.am|

armenpress.am: Եվրամիությունը դեռ Լեհաստանին չի փոխանցել այն միջոցները, որոնք անհրաժեշտ են Լեհաստանի տարածքում գտնվող Ուկրաինացի փախստականներին օգնելու համար։ Ինչպես հայտնում է ՏԱՍՍ-ը, այս մասին մայիսի 28-ին հայտարարել է Լեհաստանի ներքին գործերի փոխնախարար Պավել Շեֆերնակերը։ «Ուկրաինացի փախստականների ծախսերը, որոնք մենք կրում ենք, հաշվարկված են միլիարդներով, ոչ թե միլիոնավոր եվրոներով: Հետևաբար, ԵՄ օգնությունը փախստականներին օգնող երկրներին նույնպես պետք է տրվի միլիարդներով, ոչ թե միլիոնավոր եվրոներով», - ասել է նա: Շեֆերնակերի խոսքով՝ երեք ամիս առաջ Եվրահանձնաժողովը հայտարարել էր, որ 144,6 մլն եվրո է հատկացնում Լեհաստանին՝ ուկրաինացի փախստականներին օգնելու համար, սակայն Վարշավան դեռ չի ստացել այդ գումարը։ Նա բացատրել է, որ Լեհաստանի կառավարությունը չի կարող փախստականներին օգնել ԵՄ-ի միջոցներից, որոնք երկիրը ստանում է նպատակային ծրագրերի համար։ «Մենք չենք կարող նրանց վերաուղղորդել փախստականներին օգնելու համար, քանի որ այդ դեպքում մենք ստիպված կլինենք հրաժարվել պլանավորված ծրագրերից: Եվ այն միջոցները, որոնք ԵՄ-ն հատկացնում է միգրացիոն հիմնադրամներից, իսպառ բացակայում են», - ասել է ՆԳՆ փոխնախարարը:

14:15 - 28 մայիսի, 2022

Լեհաստանը խզում է գազի մատակարարման պայմանագիրը Ռուսաստանի հետ

Լեհաստանն այսօր հայտարարել է, որ խզել է Յամալի գազատարով ռուսական գազ ստանալու պայմանագիրը Ռուսաստանի հետ։ Վարշավան մերժել էր գազի դիմաց ռուբլով վճարելու պահանջը, ի պատասխան՝ Մոսկվան ապրիլին դադարեցրել էր գազի մատակարարումը, գրում է Reuters-ը։ Լեհաստանի կլիմայի հարցերի նախարար Աննա Մոսկվան, որն այս որոշման մասին հայտնել է Թվիթերում, լեհական PAP լրատվական գործակալությանն ասել է, որ Վարշավայի որոշումը չի ազդել լեհական ընկերության կառավարման ներքո գտնվող գազատարով Գերմանիայից Լեհաստան եկող գազի հոսքի վրա։ Ավելի վաղ Լեհաստանը հայտնել էր, որ մտադիր չէ երկարաձգել ռուսական գազի մատակարարման պայմանագիրը, որի ժամկետը լրանում էր 2022 թ-ի վերջին։ «Ուկրաինայի դեմ Ռուսաստանի ագրեսիան հաստատել է լեհական կառավարության վճռական մոտեցման իրավացիությունը՝ ռուսական գազից լիովին անկախ դառնալու հարցում։ Մենք միշտ ենք իմացել, որ «Գազպրոմը» հուսալի գործընկեր չէ», - հայտարարել է Մոսկվան։ «Գազպրոմը» Reuters-ին չի մեկնաբանել այս հարցը։ Կրեմլի ներկայացուցիչ Դմիտրի Պեսկովն ասել է, որ Ռուսաստանի իշխանությունը կուսումնասիրի պայմանագրի վաղաժամկետ խզման վերաբերյալ Լեհաստանի որոշումը։ Նա նշել է, որ Լեհաստանի իշխանությունը Ռուսաստանի նկատմամբ «լպիրշ, խելագարության հասնող դիրքորոշում» է զբաղեցնում։ Նորա Վանյան

15:59 - 23 մայիսի, 2022

Ուկրաինան իր ապագան որոշելու իրավունք ունի․ Լեհաստանի նախագահը՝ Ուկրաինայի Գերագույն ռադայում

Լեհաստանի նախագահ Անջեյ Դուդան այսօր ելույթ է ունեցել Ուկրաինայի Գերագույն ռադայում, հայտնում է Liga.net-ը։ Դուդան օտարերկրյա առաջին նախագահն է, որը ելույթ է ունեցել Ուկրաինայի խորհրդարանում ռուսական ներխուժումից ի վեր։ «Այսօր ազատ աշխարհի դեմքն Ուկրաինան է», - ասել է նա։ «Ձայներ են հայտնվել, որոնք ասում են, թե Ուկրաինան պետք է զիջի Պուտինի պահանջներին։ Սակայն միայն Ուկրաինան իրավունք ունի որոշելու իր ապագան», - ընդգծել է Լեհաստանի նախագահը։ Reuters-ը գրում է, որ ռուսական ներխուժումից հետո Վարշավան իրեն դրսևորել է՝ որպես Կիևի հավատարիմ դաշնակիցներից մեկը։ Լեհաստանը Ռուսաստանի դեմ խիստ պատժամիջոցների կողմնակից է և ակտիվորեն սատարում է Եվրամիությանն Ուկրաինայի անդամակցությունը։ «Չեմ հանգստանա, մինչև որ Ուկրաինան Եվրամիության անդամ չդառնա», - ասել է Անջեյ Դուդան։ Նորա Վանյան

15:48 - 22 մայիսի, 2022

«Եվրատեսիլում» վեց երկրների ժյուրիի քվեարկությունը չեղարկվել է

Եվրոպական հեռարձակողների միությունը (ԵՀՄ) չեղարկել են վեց երկրների՝ Ադրբեջանի, Վրաստանի, Չեռնոգորիայի, Լեհաստանի, Ռումինիայի և Սան Մարինոյի ժյուրիի քվեարկության արդյունքները «Եվրատեսիլ-2022» երգի մրցույթում, ասված է մրցույթի կայքում։ Հաղորդվում է, որ «ժյուրիներից վեցի քվեները կասկածելի են եղել և փոխարինվել են հավաքական արդյունքով»: «ԵՀՄ-ն ծայրահեղ լուրջ է վերաբերվում «Եվրատեսիլ» մրցույթում քվեարկության հարցում մեքենայությունների ենթադրյալ փորձերին և իրավունք ունի հետ կանչելու այդպիսի քվեները՝ Քվեարկության պաշտոնական հրահանգների համաձայն՝ անկախ նրանից, թե արդյոք այդ քվեները ազդում են քվեարկության արդյունքի և/կամ ելքի վրա», - ասված է հաղորդագրությունում։ Ինչպես հայտնում է «Էխո Կավկազա»-ն, երեկ Վրաստանն ու Ադրբեջանը տարակուսանք են հայտնել, որ «Եվրատեսիլի» կազմակերպիչներն ազգային ժյուրիի քվեարկության արդյունքների հաշվարկի ժամանակ ուրիշ միավորներ են նշել։ Երկու երկրներն էլ հայտարարել են, որ ժյուրին առավելագույն 12 միավոր է տվել Ուկրաինային, այլ ոչ թե Մեծ Բրիտանիային, ինչպես նշված է մրցույցի վերջնական արդյունքների ցանկում։ Այս առիթով հատուկ հայտարարություն էր տարածել Վրաստանի Հանրային հեռարձակողը։ Քվեների չեղարկման մասին ԵՀՄ հայտարարությունը Վրաստանը դեռ չի մեկնաբանել։ Ադրբեջանական լրատվամիջոցները հաղորդել են, որ մրցույթի եզրափակչի քվեարկության ընթացքում, երբ հերթը հասել է Ադրբեջանին, հայտարարվել է, որ տեխնիկական խնդիրների պատճառով քվեարկության արդյունքները հայտարարելու է ոչ թե ադրբեջանցի հեռուստահաղորդավարն, այլ ԵՀՄ ներկայացուցիչը։ Հայտարարվել են միավորներ, որոնք չեն համընկել ադրբեջանական ժյուրիի դիրքորոշման հետ։ Նորա Վանյան

15:37 - 16 մայիսի, 2022

Կրեմլն արձագանքել է Լեհաստանի վարչապետի այն հայտարարությանը, թե «ռուսական աշխարհը քաղցկեղային ուռուցք է» |tert.am|

tert.am: Ռուսաստանի Դաշնության նախագահի մամուլի քարտուղար Դմիտրի Պեսկովը վրդովեցուցիչ և անընդունելի է համարել Լեհաստանի վարչապետ Մատեուշ Մորավիեցկու հայտարարությունը, որում նա ռուսական աշխարհը համեմատել է «քաղցկեղային ուռուցքի» հետ, գրում է ՏԱՍՍ-ը։«Սա բացարձակապես վրդովեցուցիչ հայտարարություն է, կատաղի և անընդունելի», - ուրբաթ լրագրողներին ասել է Կրեմլի խոսնակը՝ ի պատասխան Լեհաստանի վարչապետի համապատասխան հայտարարությունների մեկնաբանության խնդրանքին։«Սա ռուսների հանդեպ այդ ատելության քվինտէսենցիան է, որը, ամենայն հավանականությամբ, մետաստազների պես ախտահարել է ինչպես ամբողջ Լեհաստանի քաղաքականությանը, ղեկավարությանը, այնպես էլ, ըստ էության, շատ առումներով լեհ հասարակությանը, ի ցավ մեզ», - ասել է Ռուսաստանի ղեկավարի մամուլի քարտուղարը:

14:02 - 13 մայիսի, 2022

«Արևմուտքը ֆաշիզմի վերակենդանացման ուղղություն է վերցրել»․ Զախարովան արձագանքել է Լեհաստանում ՌԴ դեսպանի վրա հարձակմանը |shantnews.am|

shantnews.am: Վարշավայում խորհրդային զինվորների գերեզմանատանը ծաղկեպսակ դնելու արարողության ժամանակ Ռուսաստանի դեսպանի վրա հարձակումը ապացուցում է, որ Արևմուտքը ֆաշիզմի վերակենդանացման ուղղություն է վերցրել։ ՏԱՍՍ գործակալության փոխանցմամբ՝ այս մասին Telegram-ի իր ալիքում գրել է ՌԴ ԱԳՆ պաշտոնական ներկայացուցիչ Մարիա Զախարովան։ «Նեոնացիզմի երկրպագուները ևս մեկ անգամ մերկացրին իրենց դեմքերը, և այն արյունոտ է։ Երկրորդ համաշխարհային պատերազմի հերոսների հուշարձանների քանդումը, գերեզմանների պղծումը, իսկ այժմ՝ յուրաքանչյուր պարկեշտ մարդու համար այս սուրբ օրը ծաղկադրման արարողության խափանումն ապացուցում են արդեն իսկ ակնհայտը՝ Արևմուտքը ֆաշիզմի վերակենդանացման ուղղություն է վերցրել»,- գրել է դիվանագետը: Ավելի վաղ Լեհաստանում Ռուսաստանի դեսպան Սերգեյ Անդրեևը հարձակման էր ենթարկվել Վարշավայի Ժվիրկի և Վիգուրա փողոցներում գտնվող խորհրդային զինվորների հուշահամալիրում ծաղիկներ դնելիս: Ռուսաստանի Դաշնության դեսպանի, նրա կնոջ և նրան ուղեկցող մի խումբ դիվանագետների վրա կարմիր ներկ էին լցրել և թույլ չէին տվել գնալ հուշահամալիր։

15:32 - 09 մայիսի, 2022

Լեհաստանում ՌԴ դեսպանի վրա կարմիր ներկ են լցրել և թույլ չեն տվել ծաղիկներ դնել խորհրդային զինվորների հուշահամալիրում

Լեհաստանում Ռուսաստանի դեսպան Սերգեյ Անդրեևը երկուշաբթի Վարշավայի Ժվիրկի և Վիգուրա փողոցներում գտնվող խորհրդային զինվորների հուշահամալիրում ծաղիկներ դնելիս հարձակման է ենթարկվել։ Այս մասին հայտնում է ՏԱՍՍ-ի թղթակիցը դեպքի վայրից։ Ռուսաստանի Դաշնության դեսպանին, նրա կնոջը և նրան ուղեկցող մի խումբ դիվանագետների վրա կարմիր ներկ են լցրել և թույլ չեն տվել հասնել հուշահամալիր։ Դեպքի վայր ժամանած ոստիկանները մի քանի րոպե անց շրջապատել են դիվանագետներին ու օգնել մոտենալ մեքենային։ Լեհաստանում Ռուսաստանի դեսպանը հայտնել է, որ ինքը և ռուս դիվանագետները լուրջ վնասվածքներ չեն ստացել միջադեպի ժամանակ, իսկ դեսպանատունը պաշտոնական բողոք կներկայացնի հարձակման կապակցությամբ։ Իսկ Դաշնային խորհրդի միջազգային կոմիտեի ղեկավարի առաջին տեղակալ Ջաբարովը ՌԻԱ Նովոստիի հայտնել է, որ դեսպանի վրա հարձակման ֆոնին հնարավոր կլինի դիտարկել Լեհաստանում Ռուսաստանի դիվանագիտական առաքելության մակարդակի իջեցումը։

14:52 - 09 մայիսի, 2022

Վերահաստատում եմ հայկական կողմի պատրաստակամությունը՝ խթանելու ՀՀ-ԵՄ գործընկերության օրակարգի զարգացումը. Նիկոլ Փաշինյանը՝ Լեհաստանի վարչապետին

ՀՀ վարչապետ Նիկոլ Փաշինյանը շնորհավորական ուղերձ է հղել Լեհաստանի Հանրապետության վարչապետ Մատեուշ Մորավեցկիին՝ երկրի ազգային տոնի առթիվ: Ուղերձում նշված է. «Ձերդ Գերազանցություն,Հայաստանի Հանրապետության կառավարության և անձամբ իմ անունից ի սրտե շնորհավորում եմ Ձեզ և Լեհաստանի բարեկամ ժողովրդին Լեհաստանի Հանրապետության ազգային տոնի` Սահմանադրության օրվա առթիվ: Այս տարի նշում ենք Հայաստանի և Լեհաստանի միջև դիվանագիտական հարաբերությունների հաստատման 30-ամյա հոբելյանը: Վստահ եմ, որ այս ընթացքում ձեռք բերված փորձը հնարավորություն է ընձեռում բացահայտելու մեր ժողովուրդների դարավոր բարեկամության վրա հիմնված միջպետական համագործակցության ողջ ներուժը և համալրելու երկկողմ օրակարգը բազմաբովանդակ ծրագրերով՝ բարձրացնելով հայ-լեհական համագործակցությունը որակական նոր մակարդակի ինչպես երկկողմ, այնպես էլ բազմակողմ ձևաչափերում։ Վերահաստատում եմ հայկական կողմի պատրաստակամությունը համատեղ ջանքերով խթանելու ՀՀ-ԵՄ գործընկերության՝ տարեցտարի ընդլայնվող օրակարգի զարգացումը։ Օգտվելով առիթից՝ մաղթում եմ Ձեզ քաջառողջություն, իսկ Լեհաստանի բարեկամ ժողովրդին՝ առաջընթաց և բարօրություն: Ընդունեք խնդրեմ, Ձերդ Գերազանցություն, խորին հարգանքիս հավաստիքը»:

11:53 - 03 մայիսի, 2022

ԵՄ երկրների էներգետիկայի նախարարները կքննարկեն գազի մատակարարման հետ կապված խնդիրները

Բրյուսելում այսօր կկայանա Եվրամիության երկրների էներգետիկայի նախարարների հանդիպումը։ Նրանք պետք է միասնական դիրքորոշում մշակեն՝ քննարկելով ընթացիկ իրավիճակը, որն առաջացել է Լեհաստանին և Բուլղարիային ռուսական գազի մատակարարումների դադարեցման առնչությամբ։ Դա տեղի է ունեցել այն բանից հետո, երբ այս երկրները հրաժարվել են գազի դիմաց ռուբլով վճարել, ինչպես Ռուսաստանն է պահանջում, գրում է Euronews-ը։ Կապույտ վառելիքի մատակարարման դիմաց վճարումների ընթացակարգի փոփոխման վերաբերյալ «Գազպրոմ» ընկերության պահանջները կապված են Մոսկվայի դեմ Արևմուտքի սահմանած պատժամիջոցների ազդեցությունը նվազեցնելու ձգտման հետ։ Նախկին սխեմայով վճարումներն իրականացնելուց Ռուսաստանի հրաժարումը ԵՄ-ն «շանտաժ» է անվանել։ Իսկ ՌԴ արտգործնախարար Սերգեյ Լավրովն իր վերջերս տված հարցազրույցում հայտարարել է, որ, գազի վաճառքից ստացված միջոցներն արգելափակելով, արևմտյան երկրները Ռուսաստանից «գողացել են» ավելի քան 300 մլրդ դոլար։ Գազի գների կտրուկ աճը Եվրամիությանը սպառնում է էներգետիկ ճգնաժամով։ Ռուսական գազի մատակարարման դադարեցման հեռանկարը կարող է լրջորեն ազդել Գերմանիայի տնտեսության վրա, որի գազի պահանջարկի 55%-ն ապահովում են մատակարարումները Ռուսաստանից։ ԵՄ մի շարք այլ երկրներ գազի առումով նույնպես մեծապես կախված են Մոսկվայից։ Նորա Վանյան

15:34 - 02 մայիսի, 2022

Լեհաստանն ու Բուլղարիան Ռուսաստանին մեղադրել են գազով շանտաժ անելու համար

Լեհաստանի և Բուլղարիայի առաջնորդները Մոսկվային մեղադրել են իրենց երկրների դեմ բնական գազը՝ որպես շանտաժի միջոց օգտագործելու համար այն բանից հետո, երբ ռուսական «Գազպրոմ» պետական ընկերությունը հայտարարել է, որ դադարեցնում է գազի մատակարարումները եվրոպական այս երկրներին, գրում է Associated Press-ը։ Գազի մատակարարման դադարեցման հիմքն այն է, որ նախորդ ամիս Ռուսաստանի նախագահ Վլադիմիր Պուտինը հայտարարել է, որ «ոչ բարեկամ երկրները» պետք է գազի դիմաց ռուբլով վճարեն, ինչը Բուլղարիան ու Լեհաստանը հրաժարվել են անել։ Ռուսական «Գազպրոմ» էներգետիկ հսկան իր հայտարարությունում նշել է, որ ապրիլի մեկից Լեհաստանից և Բուլղարիայից ոչ մի վճարում չի ստացել, հետևաբար՝ դադարեցնում է գազի մատակարարումը։ Լեհաստանի վարչապետ Մատեուշ Մորավեցկին երկրի խորհրդարանում հայտարարել է, որ գազի մատակարարումների դադարեցումը վրեժ է համարում Ռուսաստանի դեմ նոր պատժամիջոցների համար, որոնք Վարվաշան սահմանել է ուկրաինական պատերազմի առնչությամբ։ Նորա Վանյան

16:00 - 27 ապրիլի, 2022

«Գազպրոմ»-ն ամբողջությամբ դադարեցրել է գազի մատակարարումը Բուլղարիա և Լեհաստան՝ ռուբլով չվճարելու պատճառով |tert.am|

tert.am: Ռուսական «Գազպրոմը» ամբողջությամբ դադարեցրել է բուլղարական Bulgargaz և լեհական PGNiG ընկերություններին գազի մատակարարումը՝ ռուբլով ժամանակին չվճարելու պատճառով, ասվում է հոլդինգի հաղորդագրության մեջ, հայտնել է kommersant.ru-ն:«Գազպրոմ Էքսպորտը» ծանուցել է Bulgargaz-ին և PGNiG-ին ապրիլի 27-ից գազի մատակարարումը դադարեցնելու մասին, մինչև վճարումը կատարվի հրամանագրով սահմանված կարգով», - հայտնել է «Գազպրոմը»:Հաղորդագրությունում նշվում է, որ «Գազպրոմ Էքսպորտը» ապրիլի 26-ի գործունեության ավարտի դրությամբ այդ ընկերություններից ապրիլին գազի մատակարարումների համար վճարումներ չի ստացել: Առավել մանրամասն՝ tert.am-ում

11:13 - 27 ապրիլի, 2022

Արմեն Գրիգորյանը հանդիպել է Լեհաստանի արտաքին գործերի փոխնախարարի հետ

Ապրիլի 22-ին Վարշավայում Անվտանգության խորհրդի քարտուղար Արմեն Գրիգորյանը հանդիպել է Լեհաստանի Հանրապետության Արտաքին գործերի փոխնախարար Մարչին Պշիդաչի հետ։ Այս մասին տեղեկացնում են ԱԽ գրասենյակից։ ԱԽ քարտուղարն իր զրուցակցին է ներկայացրել անվտանգային իրավիճակը Հարավային Կովկասում և Հայաստանի կողմից իրականացվող ջանքերը տարածաշրջանային անվտանգության և կայունության ապահովման ուղղությամբ։ Փոխնախարար Պշիդաչն իր հերթին ընդգծել է Լեհաստանի պատրաստակամությունը՝ աջակցելու տարածաշրջանային խնդիրների լուծմանը թե՛ որպես ներկայումս ԵԱՀԿ նախագահող երկիր և թե՛ որպես Եվրամիության անդամ երկիր։ Երկուստեք ընդգծվել է հայ-լեհական բազմաոլորտ երկկողմ հարաբերություններն ընդլայնելու պատրաստակամությունը։

16:30 - 23 ապրիլի, 2022

Ավելի քան 5․1 միլիոն ուկրաինացի դարձել է փախստական․ ՄԱԿ |factor.am|

factor.am: Ուկրաինայի քաղաքների լայնածավալ հրետակոծությունն առաջացրել է փախստականների ամենամեծ հոսքը դեպի Եվրոպա Երկրորդ համաշխարհային պատերազմից ի վեր. 5․1 միլիոն մարդ լքել է Ուկրաինան փետրվարի 24-ին Ռուսաստանի ռազմական գործողության մեկնարկից հետո։ Այս մասին են վկայում ՄԱԿ-ի փախստականների հարցերով գերագույն հանձնակատարի նոր տվյալները։Մեկնածների 90 տոկոսը կանայք և երեխաներ են, զինվորական տարիքի տղամարդկանց թույլ չեն տալիս լքել երկիրը։ Բացի այդ, 7․7 միլիոն մարդ համարվում է ներքին տեղահանված, այսինքն՝ նրանք մնացել են երկրում, սակայն ստիպված են եղել լքել սեփական տները։ Փախստականների մեծ մասը մեկնել է Լեհաստան (ավելի քան 2․8 մլն), Ռումինիա (ավելի քան 769 հազար) և Մոլդովա (ավելի քան 430 հազար)։ UNHCR-ը նշում է, որ շատերն այս երկրներից ավելի հեռու՝ դեպի Արևմուտք են գնացել: Ռուսաստան է մեկնել 578 հազար ուկրաինացի։

22:18 - 22 ապրիլի, 2022

ՀՀ ԱԽ քարտուղարը և Լեհաստանի պետքարտուղարը քննարկել են տարածաշրջանային անվտանգության հարցեր

ՀՀ անվտանգության խորհրդի քարտուղար Արմեն Գրիգորյանը Վարշավայում հանդիպել է Լեհաստանի պետքարտուղար, Ազգային անվտանգության բյուրոյի ղեկավար Պավել Սոլոխի հետ: Այս մասին հայտնում են ՀՀ Անվտանգության խորհրդից։ Հանդիպմանը զրուցակիցները քննարկել են տարածաշրջանային անվտանգությանն առնչվող հարցեր: Այս համատեքստում ՀՀ ԱԽ քարտուղարը ներկայացրել է Լեռնային Ղարաբաղի շուրջ ստեղծված իրավիճակը, ինչպես նաև տարածաշրջանային անվտանգության ապահովման ուղղությամբ Հայաստանի մոտեցումները: Նշվում է, որ կողմերն ընդգծել են երկկողմ հարաբերությունները զարգացնելու կարևորությունը:

20:11 - 22 ապրիլի, 2022