#armVote

2021 թվականի հունիսի 20-ին Հայաստանում կանխատեսվում են խորհրդարանական արտահերթ ընտրություններ: 

2021 թվականի մարտի 18-ին ՀՀ վարչապետ Նիկոլ Փաշինյանը հայտարարեց, որ այս որոշումը կայացվել է ՀՀ նախագահի, «Իմ քայլը» խմբակցության, «Լուսավոր Հայաստան» խմբակցության ղեկավար Էդմոն Մարուքյանի ու «Բարգավաճ Հայաստան» խմբակցության ղեկավար Գագիկ Ծառուկյանի հետ քննարկումներից հետո։

ՀՀ Սահմանադրությունը սահմանում է, որ խորհրդարանական արտահերթ ընտրություններ անցկացնելու համար Ազգային ժողովը պետք է արձակվի, դրա համար վարչապետը պետք է հրաժարական ներկայացնի, որից հետո 2 շաբաթում 2 անգամ անընդմեջ չընտրվի նոր վարչապետ, այնուհետեւ ոչ շուտ, քան 30 եւ ոչ ուշ, քան 45 օր հետո նշանակվեն նոր ընտրություններ։

Այս գործընթացի համար վարչապետը հրաժարական է ներկայացրել 2021 թվականի ապրիլի 25-ին, եւ արդեն մեկ անգամ չի ընտրվել։ Վարչապետի ընտրության հարցով հաջորդ նիստը կգումարվի մայիսի 10-ին։

Քաղաքական մի շարք ուժեր կարեւորում են նախքան ընտրությունները Ընտրական օրենսգրքի փոփոխությունների ընդունումը։ Խորհրդարանական մեծամասնությունը հայտարարել էր, որ Օրենսգրքում փոփոխություններ անելու որոշում ունեն, դրանցից որոշներն արդեն ընդունվել են, մասնավորապես, ռեյտինգային ընտրակարգը վերացվել է։ ԸՕ փոփոխությունների մեծ փաթեթը դեռեւս ընդունված չէ։

Կարող եք կատարել նվիրատվություն հետևյալ հղումով՝

Նվիրաբերել
Քաղաքական ուժերին ձեռնտու է, երբ կան քարոզարշավի ֆինանսավորման արգելքներ, սակայն դրանց խախտման համար պատասխանատվություն սահմանված չէ․ Վարդինե Գրիգորյան

Քաղաքական ուժերին ձեռնտու է, երբ կան քարոզարշավի ֆինանսավորման արգելքներ, սակայն դրանց խախտման համար պատասխանատվություն սահմանված չէ․ Վարդինե Գրիգորյան

ՀՀ Ազգային ժողովն այսօր Քրեական օրենսգրքում կատարեց փոփոխություններ, որոնք, մասնավորապես, առնչվում էին ընտրական գործընթացում հնարավոր հանցագործություններին։ Փոփոխություններով քրեականացվեց նախընտրական քարոզարշավին մասնակցելուն կամ հանրաքվեի քարոզչություն կատարելուն կամ նախընտրական քարոզարշավին մասնակցելուց կամ հանրաքվեի քարոզչություն կատարելուց հրաժարվելուն հարկադրելը կամ նախընտրական քարոզարշավին մասնակցելուն կամ հանրաքվեի քարոզչություն կատարելուն որեւէ եղանակով խոչընդոտելը։ Այս արարքը պատժվելու է տուգանքով՝ նվազագույն աշխատավարձի յոթհարյուրապատիկից հազարապատիկի չափով կամ ազատազրկմամբ՝ առավելագույնը երեք տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ մեկից երեք տարի ժամկետով:  Իսկ ահա տեղամասային կենտրոնում կամ դրա մուտքի մոտ բռնություն գործադրելը կամ բռնություն գործադրելու սպառնալիքը պատժվելու է տուգանքով՝ նվազագույն աշխատավարձի երեքհարյուրապատիկից հինգհարյուրապատիկի չափով կամ կալանքով՝ առավելագույնը երկու ամիս ժամկետով կամ ազատազրկմամբ՝ առավելագույնը երեք տարի ժամկետով: Հավաք անցկացնելուն կամ դրան մասնակցելուն խոչընդոտելը պատժվելու է տուգանքով՝ նվազագույն աշխատավարձի հարյուրապատիկից երեքհարյուրապատիկի չափով կամ կալանքով՝ առավելագույնը երեք ամիս ժամկետով կամ ազատազրկմամբ՝ առավելագույնը վեց ամիս ժամկետով: Իսկ հավաքին մասնակցելուն հարկադրելը կամ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը պատժվելու է տուգանքով՝ նվազագույն աշխատավարձի չորսհարյուրապատիկից վեցհարյուրապատիկի չափով կամ ազատազրկմամբ՝ վեց ամսից մեկ տարի ժամկետով: Վերոնշյալ երկու արարքները բռնության գործադրման կամ դրա սպառնալիքով կատարելու դեպքում պատժվելու են ազատազրկմամբ՝ առավելագույնը երեք տարի ժամկետով, հանրային ծառայողի մասնակցության դեպքում՝ մինչեւ հինգ տարի ժամկետով։ Պաշտոնատար անձի կարգավիճակ ձեռք բերելուն կամ պահպանելուն խոչընդոտող՝ իր այլ երկրի քաղաքացիություն ունենալու մասին տեղեկությունը սահմանված կարգով իրավասու մարմնին չհայտնելը կամ նման տեղեկությունը թաքցնելը պատժվելու է ազատազրկմամբ՝ երեքից հինգ տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա: Նախագծով, ինչպես երեւում է, քարոզարշավի ֆինանսավորման կարգի խախտման դեպքում պատասխանատվության վերաբերյալ որեւէ տեղ նշված չէ։ Սա, ի դեպ, դժգոհություն է առաջացրել քաղհասարակությունից նախագծի մշակմանը մասնակցած անձանց շրջանում։ «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանն ԱԺ-ում նախագծի քննարկումից առաջ ֆեյսբուքյան իր էջում գրել էր, որ նախագծի նախնական տարբերակում եղել են նաեւ քարոզարշավի ֆինանսավորման կարգի խոշոր խախտումների մասին հոդվածներ, որոնք, ի դեպ, արժանացել էին ոչ միայն հասարակական կազմակերպությունների ներկայացուցիչների ու արտախորհրդարանական ուժերի, այլ նաեւ Վենետիկի հանձնաժողովի հավանությունը։ Իսկ հիմա այդ հոդվածներն, ըստ Իոաննիսյանի, իշխանությունները հանել են՝ ի հեճուկս քաղհասարակության ու հանրային քննարկումների ժամանակ հնչեցրած այն մոտեցումների, որ գալիք ընտրությունների ժամանակ առավել կարեւոր է ֆինանսավորման կարգի ապահովումը, եւ հանել են՝ առանց հանրային քննարկման։ Խորհրդարանում նախագիծը ներկայացրեց ԱԺ «Իմ քայլը» խմբակցության պատգամավոր Վահագն Հովակիմյանը։ Նա ընդգծեց, որ ընտրական օրինախախտումների վերաբերյալ փոփոխությունների այս փաթեթն ավելի ընդլայնված առկա է Ընտրական օրենսգրքի բարեփոխման մեծ նախագծում։ Բայց, ըստ Հովակիմյանի, քանի որ հնարավոր է՝ զարգացումներն այնպես ընթանան, որ այդ մեծ փաթեթը ուժի մեջ չմտնի մինչեւ առաջիկա ընտրությունները, ուստի դրանց մեկնարկի համար խիստ անհրաժեշտ բոլոր փոփոխություններն առանձնացվել ու քննարկվում են հրատապության կարգով։  Խորհրդարանում, որն ունի ավելի քան 130 պատգամավոր, նախընտրական գործընթացում կուսակցությունների ֆինանսավորման թափանցիկության մասին գեթ մեկ հարց չհնչեց, չնայած՝ խորհրդարանական մեծամասնություն Իմ քայլը մշտապես կարեւորել է այս հարցը։  Այսօր ընդունված նախագծի մշակման աշխատանքներին մասնակցած, Հելսինկյան քաղաքացիական ասամբլեայի Վանաձորի գրասենյակի ժողովրդավարական ինստիտուտների մոնիտորինգի եւ զեկուցման համակարգող Վարդինե Գրիգորյանի կարծիքով՝ Ազգային ժողովում չխոսվեց այդ հարցի մասին, քանի որ բոլորի համար էլ օգտակար է այդ անորոշ վիճակը, երբ կա արգելքը, սակայն դրա խախտման դեպքում պատասխանատվություն սահմանված չէ։ Infocom-ի հետ զրույցում Գրիգորյանը նկատեց՝ կուսակցությունների ֆինանսավորմանը, նվիրատվությունների խախտումներին վերաբերող հոդվածներն, ըստ էության, նույն ձեւակերպմամբ ընդունելի են եղել «Իմ քայլի» ներկայացուցիչների համար, երբ մշակվում էին «Կուսակցությունների մասին» օրենքի փոփոխությունները։ Մեր զրույցում Գրիգորյանն ասաց, որ ֆինանսավորման արգելքի առնչությամբ փաստարկ է եղել, թե փոփոխությունը կարող է միանշանակ չընդունվել ու կարող է՝ որոշ ընդդիմադիրներ մտածեն, որ դա վերջին պահին կանոնների խստացում է կամ նման մի բան։ Այս մեկնաբանության հետ, սակայն, Գրիգորյանն ինքը համաձայն չէ․ «Իմ կարծիքով՝ այդ փաստարկները տեղին չէին, որովհետեւ արգելքն ամեն դեպքում կա, նոր չէ։ Այսինքն՝ ե՛ւ Օրենսգիրքն է սահմանում ինչ-որ սահմանափակումներ, եւ նման այլ սանկցիաներ են նախատեսված։ Ուղղակի եթե մինչ այս ասվում էր՝ արգելված է, ապա հիմա պետք է խստացվեին սանկցիաները, հիմա հստակեցվելու էր, թե այդ արգելքի խախտման դեպքում ինչ պատասխանատվություն է սահմանվում»,- մեկնաբանեց Վարդինե Գրիգորյանը։ Իսկ հիմա, փաստորեն, ստացվում է՝ ասում ես՝ այո՛, արգելված է, բայց խախտման համար պատասխանատվություն սահմանված չէ։  «Հիմա եթե կուսակցությունը տարբեր տեսակի ֆինանսավորում ստանա, պատասխանատվության համապատասխան մեխանիզմներ կան, իսկ նախընտրական հիմնադրամին նվիրատվությունների մասով այս պահի դրությամբ պատասխանատվություն չկա»։  Ըստ մեր զրուցակցի՝ լռություն պահպանելով՝ քաղաքական ուժերը փաստացի առաջ են տանում իրենց բոլորի համար օգտակար վիճակը, երբ որոշակի անորոշություն կա քարոզարշավի ֆինանսավորման մասով, իսկ դա նրանց ձեռնտու է՝ հատկապես դրամահավքների ժամանակ․ «Մենք գիտենք, որ կան կուսակցություններ կամ ուժեր, որոնք դրամահավաքի ժամանակ ընդունում են կամ անանուն, կամ անկախնիկ ֆինանսավորում, ինչը, ենթադրաբար, չի թույլատրվում, բայց բոլորն ուզում են, որ դրա հնարավորությունը լինի։ Եւ փորձում են շրջանցել պատասխանատվության մասը, մտածում են, որ քաղաքական ֆինանսավորում այլ ձեւով հնարավոր չէ։ Օրինակ՝ մտածում են, որ եթե պարզ լինի, թե ովքեր են ֆինանսավորողները, այդ մարդիկ կարող են խնդիր ունենալ, ընդ որում՝ կապ չունի՝ իշխանության համար, թե ընդդիմության։ Բայց հարցն այն է, որ ի սկզբանե անանուն ֆինանսավորումն արգելված է։ Այսինքն՝ կամ պետք է ազնվորեն ասել՝ կարծում ենք՝ անոնիմ ֆինանսավորման քաղաքական կամ այլ հետեւանքները ավելի քիչ վնասակար են, քան եթե իմացվի ֆինանսավորման աղբյուրը, ուրեմն եկեք թույլատրենք»,- ասաց Գրիգորյանը՝ հավելելով՝ ավելի լավ է՝ ազնիվ լինել, եւ ասել՝ եթե այդպիսի ֆինանսավորումն ընդունելի է, ուրեմն ընդունեն, որ այսուհետ հնարավորություն տրվի։ Նրա համոզմամբ՝ եթե նախընտրական շրջանում ֆինանսավորման թափանցիկության վերաբերյալ դրույթներն այս ընտրությունների ժամանակ չկիրառվեն, ապա անպայման պետք է ընդունվեն Ընտրական օրենսգրքի փոփոխությունների մեծ փաթեթով։  Հայարփի Բաղդասարյան
21:04 - 28 ապրիլի, 2021
Քարոզարշավը խոչընդոտողները կենթարկվեն քրեական պատասխանատվության. Վահագն Հովակիմյան

Քարոզարշավը խոչընդոտողները կենթարկվեն քրեական պատասխանատվության. Վահագն Հովակիմյան

Քրեական օրենսգրքում վարչական իրավախախտումների, ընտրական օրինախախտումների, հանցանքների վերաբերյալ այս փաթեթը ավելի ընդլայնված տեսքով առկա է ԸՕ-ի մեծ բարեփոխման մեջ, ուղղակի ստեղծված իրավիճակում, երբ ակնհայտ է, որ Ընտրական օրենսգրքի մեծ փաթեթը հնարավոր է չկարողանա ուժի մեջ մտնել՝ առաջիկա ընտրությունների համար մեծ փաթեթը կիրառելի կարող է չլինել, հաշվի առնելով այդ ռիսկը՝ բոլոր այն փոփոխությունները, որոնք խիստ անհրաժեշտ են, որպեսզի մինչև գալիք արտահերթ ընտրությունների մեկնարկը իրականացվեն, դրանք ուղղակի առանձնացվեցին նախագծերի տեսքով և այսօր մենք հրատապության կարգով քննարկում ենք։ Այս մասին այսօր ԱԺ արտահերթ նիստում ՝ ՀՀ քրեական օրենսգրքում փոփոխություններ և լրացումներ կատարելու մասին և կից ներկայացված օրենքներում փոփոխությունների և լրացումների փաթեթի ներկայացման ժամանակ ասաց «Իմ քայլը» խմբակցության պատգամավոր Վահագն Հովակիմյան։  Պատգամավորը նշեց, որ այս առաջարկները մի քանի ամիս է քննարկվում են՝ ԱԺ Պետաիրավական հարցերի մշտական հանձնաժողովի նիստերի ընթացքում, ինչպես նաև Արդարադատության նախարարության ներկայացուցիչների հետ։ Հովակիմյանը ներկայացրեց, թե ինչ փոփոխություններ են առաջարկվում․ «Օրինակ՝ առաջարկվում է ընտրական գործընթացի խոչընդոտման դրույթում որպես ծանրացուցիչ նորմ նախատեսել տեղամասի արդյունքներն անվավեր ճանաչելու հետևանքը: Այլ կերպ ասած՝ եթե քվերարկության ամփոփման ժամանակ խոչընդոտում են, և դրա արդյունքում հետագայում քվեարկության արդյունքները ճանաչվում են անվավեր, խոչընդոտողներն ավելի խիստ պատասխանատվության պետք է ենթարկվեն, քան այն դեպքերում, երբ ուղղակի են խոչընդոտում ընտրական գործընթացը, ու դա չի ազդում քվեարկության արդյունքների ամփոփման վրա»։ Պատգամավորը տեղեկացրեց, որ մեկ այլ փոփոխությամբ քրեական պատասխանատվության կենթարկվեն այն անձիք, ովքեր կխոչընդոտեն քարոզարշավը։ Հովակիմյանը շեշտեց, որ նախկինում եղել են դեպքեր, երբ որոշ խմբեր խոչընդոտել են ընդդիմության քարոզարշավը և մնացել են անպատիժ, քանի որ այս նորմը չկար, հիմա այն անձը, ով կխոչընդոտի քարոզարշավի իրականացմանը՝ կենթարկվի քրեական պատասխանատվության։  «Հաջորդ կարգավորումը վերաբերում է տեղամասային կենտրոնում կամ դրա մուտքի մոտ բռնություն գործադրելուն, կամ բռնություն գործադրելու սպառնալիքին։ Առաջարկվում է առանձին նորմ սահմանել ՔՕ-ի ընտրական բլոկում, որովհետև մենք նախկինում նման դեպքեր նույնպես ունեցել ենք և այս փոփոխությունները բխում են նախկինում մեր ունեցած դառը փորձից»,- եզրափակեց պատգամավորը։  
12:45 - 28 ապրիլի, 2021
ԱԺ-ի, քաղաքական մեծամասնության, ընդդիմության լիազորությունների մեջ է մտնում լավագույն օրենսդրությունը ստեղծելը, որպեսզի հնարավոր լինի կազմակերպել արդար և թափանցիկ ընտրություններ․ Մակունց

ԱԺ-ի, քաղաքական մեծամասնության, ընդդիմության լիազորությունների մեջ է մտնում լավագույն օրենսդրությունը ստեղծելը, որպեսզի հնարավոր լինի կազմակերպել արդար և թափանցիկ ընտրություններ․ Մակունց

Ընտրությունների անցկացման համատեքստում եկեք ընդգծենք, որ յուրաքանչյուր մարմին ունի իր լիազորությունների շրջանակը։ Ազգային ժողովի, քաղաքական մեծամասնության, ինչպես նաև ընդդիմության լիազորությունների մեջ է մտնում լավագույն օրենսդրությունը ստեղծելը, լավագույն օրենսդրություն ունենալը, որպեսզի հնարավոր լինի կազմակերպել արդար և թափանցիկ ընտրություններ։ Այս մասին այսօր Ազգային ժողովում ասաց «Իմ քայլը» խմբակցության ղեկավար Լիլիթ Մակունցը։  Մակունցն իր խոսքում նշեց, որ ընտրությունների կազմակերպման համատեքստում՝ հատուկ և առաջնային կարևորագույն դեր ունի Կենտրոնական ընտրական հանձնաժողվոը, կան նաև այլ ստորաբաժանումներ և այլ մարմիններ, որոնք ունեն առանձին գործառույթներ։ Պատգամավորի խոսքով պետք  է հստակ առանձնացվեն թե՛ որն է Ազգային ժողովի, քաղաքական մեծամասնության և ընդդիմության դերը այս հարցում։ Անդրադառնալով անկախ պատգամավոր Արման Բաբաջանյանի այն հարցին, թե ինչո՞ւ աշխատանքներ չեն կատարվում հանրապետության նախագահի հետ, որպեսզի վերջինս սեղմ ժամկետներում ստորագրի փոփոխությունների փաթեթները և առարկություններ չունենա, Մակունցն ասաց․ «Ինչ վերաբերում է նախագահի հետ աշխատանքին, ուզում եմ տեղեկացնել,որ 2020 թվականի դեկտեմբերի վերջին ես և իմ գործընկեր Համազասպ Դանիելյանը նախագահի հետ ունեցել ենք հանդիպում և ներկայացրել ենք ոչ միայն «Կուսակցությունների մասին» օրենքի նախագիծը, այլ նաև ներկայացրել ենք ընդհանուր Ընտրական օրենսգրքի փաթեթի մասին տեղեկությունը։ Ինչպես գիտեք, ԸՕ-ն մենք ընդհանուր առմամբ բաժանել ենք 3 մասի՝ համամասնական ցուցակների հետ կապված,որն արդեն ընդունվել է, երկրորդ՝  այսօրվա մեր քննարկման առարկան, և երրորդը՝  արդեն կլինի մյուս փաթեթը։ Այո՛, ես անձամբ նախագահի աշխատակազմին եմ ուղարկել այն փաթեթը, որի վերաբերյալ Վենետիկի հանձնաժողովը տվել է դրական եզրակացություն և նաև առաջարկել եմ, որ եթե անհրաժեշտութուն լինի նախագահի աշխատակազմի կազմակերպմամբ մեն պատրաստ ենք քննարկել առանձին դետալներ և նաև ի գիտություն ընդունել բովանդակային առումով իրենց դիտարկումները։ Այդ առումով դեռևս արձագանք չեմ ստացել»։ Նշենք, որ այսօր Ազգային ժողովի արտահերթ նիստի օրակարգում երկու հարց է՝ Հայաստանի Հանրապետության քրեական օրենսգրքում փոփոխություններ և լրացումներ կատարելու մասին և կից ներկայացված օրենքներում փոփոխությունների և լրացումների փաթեթը, ինչպես նաև Հայաստանի Հանրապետության հարկային օրենսգրքում փոփոխություն կատարելու մասին օրենքի նախագիծը: 
12:06 - 28 ապրիլի, 2021
Կայացավ «Շանթ դաշինք» կուսակցության հիմնադիր համագումարը

Կայացավ «Շանթ դաշինք» կուսակցության հիմնադիր համագումարը

Այսօր կայացավ «Շանթ դաշինք» կուսակցության հիմնադիր համագումարը։ Համագումարը մեկնարկեց ՀՀ օրհներգով եւ մեկ րոպե լռությամբ հարգելով զոհերի հիշատակը։ Բացման խոսքով հանդես եկավ «Շանթ դաշինք»-ի հիմնադիր Շահեն Հարությունյանը՝ նշելով, որ համագումարի համար ընտրված օրը՝ ապրիլի 27-ը, պատահական չէ։ «Սրանից ուղիղ 100 տարի առաջ՝ 1921 թ․ ապրիլի 27-ին, Գարեգին Նժդեհը, դեմ դուրս գալով թուրքական, բոլշեւիկյան համատեղ բանակներին, Սյունիքում հռչակում է Լեռնահայաստան։ Համագումարի անցկացման համար քննարկում էինք երկու օր՝ մարտի 16-ը եւ ապրիլի 27-ը։ Մարտի 16-ին լրացավ Մոսկվայի կնքած պայմանագրի՝ «Լենին-Աթաթուրք»-ի 100 ամյակը, որը ամբողջովին ջախջախեց մեր նորաստեղծ հանրապետությունը։ Խորհրդային Ռուսաստանը Հայաստանը բաժանեց Թուրքիայի եւ Ադրբեջանի միջեւ, իսկ մնացած մասում հաստատեց խորհրդային կարգեր․ այդպիսով վերացավ մեր անկախ պետականությունը։ Որպես նշան որոշել էինք համագումարն անցկացնել եւ մեր կուսակցական պայքարը սկսել այդ օրը, սակայն դրանից առավել լավ ու հաղթական օր ունենք մենք՝ ապրիլի 27-ը, եւ որոշեցինք մեր կուսակցական գործունեությունը սկսել  ոչ թե մեզ պարտության մատնած պայմանագրի դեմ դուրս գալով, այլ մեզ հաղթանակներ բերած ապրիլի 27-ով՝ Լեռնահայաստանի օրով»,- բացման խոսքում ասաց Շահեն Հարությունյանը։ Կուսակցության անունի վերաբերյալ Հարությունյանն ասաց, որ ի սկզբանե որոշում էր կայացվել կուսակցությունը գրանցել որպես «Ազգային միացյալ նախաձեռնություն»․ «Սակայն հաշվի առնելով առաջիկա արտահերթ խորհրդարանական ընտրությունները եւ մեր առջեւ շատ սուղ ժամանակը, որոշեցինք հանրությանը ներկայանալ ավելի հեշտ հիշվող եւ ավելի ընդգրկուն իմաստ ունեցող անունով։ Մեր կուսակցությունը կկոչվի «Շանթ դաշինք»»։ Բացման խոսքից անմիջապես հետո եղավ կուսակցության անունը հաստատելու քվեարկությունը, եւ այն ընդունվեց միաձայն։ Այնուհետեւ ելույթներով հանդես եկան կուսակցության անդամները, որից հետո տեղի ունեցավ ծրագրի եւ կանոնադրության հաստատումը, ապա ընտրեցին կուսակցության նախագահին, խորհդրի կազմը եւ խորհրդի նախագահին։ «Շանթ դաշինք» կուսակցության նախագահի պաշտոնում առաջադրվեց Շահեն Հարությունյանի թեկնածությունը, որը միաձայն ընտրվեց կուսակցության նախագահ։ Շահեն Հարությունյանը շնորհակալություն հայտնեց վստահության համար եւ որպես կուսակցության նախագահ՝ իր առաջարկով «Շանթ դաշինք»-ի խորհրդի կազմում ընդգրկվեցին Վահե Մխիթարյանը, Մարիամ Սարգսյանը, Միքայել Գիշունցը, Լուսինե Նազարյանը, Մարինե Մուրադյանը, Արթուր Մահիկյանը, Նոնա Դիլանյանը, Էդուարդ Հովհաննիսյանը եւ Արա Հարությունյանը։ Կուսակցության նախագահի առաջարկով խորհրդի ղեկավար ընտրվեց Վահե Մխիթարյանը։ Շահեն Հարությունյանը ներկայացրեց նաեւ կուսակցության ծրագրից որոշ հատվածներ, համաձայն որի, կուսակցության նպատակն է կայացնել այնպիսի պետություն, որը հիմնված կլինի արդարության եւ ազատության իդեալի վրա։ Նրա խոսքերով՝ կուսակցության համար բարձրագույն արժեք է ճշմարտությունը, ազատությունը, հայրենիքի անկախությունն ու քաղաքացու արժանապատվությունը։ Ծրագրի համաձայն՝ կուսակցությունը նախատեսում է վերանայել պետությունների միջեւ հաստատված դաշնակցային, բարեկամական եւ թշնամական հարաբերությունների իմաստն ու էությունը, ստեղծել ազգային անվտանգության նոր հայեցակարգ՝ ազգային շահերի վրա խարսխված։ Կուսակցության նախագահի ներկայացմամբ՝ կուսակցության արտաքին քաղաքականությունը միտված է ՀՀ պետական եւ ազգային շահերի պաշտպանությանը։ «ՀՀ-ն պետք է վերանայի կնքված բոլոր միջազգային պայմանագրերը պետական եւ ազգային շահերին ներդաշնակեցնելու նպատակով։ Այս առումով անկյունաքարային է 1921 թվականի մարտի 16-ին կնքած Մոսկվայի (առավել հատնի որպես «Լենին-Քեմալ») պայմանագրի չեղարկումը, որը հակասում է ՀՀ շահերին եւ լրջագույն խոտան է Հայաստանի զարգացման համար։ Պայմանագրի չեղարկումը հնարավորություն է տալու կառուցել համագործակցության նոր ուղիներ, պոտենցիալ  դաշնակիցների հետ։ Պայմանագրի չեղարկումը մեծապես նպաստելու է Արցախյան հիմնահարցի կառուցողական լուծում գտնելու հնարավորությանը։ ՀՀ-ն պետք է կարողանա ամբողջությամբ ինքնուրույն ապահովել իր անվտանգությունը։ Մենք վերանայելու ենք ՀՀ անվտանգային համակարգը այն ամբողջությամբ արդիականացնելու նպատակով»,- ելույթում նշեց Շահեն Հարությունյանը՝ հավելելով, որ կուսակցության ծրագիրը ոչ թե ուղղակի տեքստ է, այլ իրենց կուսկացության առաջնահերթությունը։ Համագումարի վերջում ելույթ ունեցավ նաեւ Շանթ Հարությունյանը։ Նա շնորհակալություն հայտնեց համագումարի մասնակիցներին, ինչպես նաեւ ելույթ ունեցողներին գաղափարական ելույթների համար։ Հարությունյանը կարեւորեց գաղափարական համախմբումը՝ նշելով, որ պարտադիր չէ կուսակցությանն անդամագրվել․ «Կուսակցությունը մեզ համար միշտ էլ ձեւական բնույթ է կրել։ Մենք ընկերներ ենք եղել՝ հայրենիքին նվիրված եւ հայրենիքի գաղափարի շուրջ համախմբված»։ «Շանթ դաշինք» կուսակցությունը պատրաստվում է մասնակցել արտահերթ խորհրդարանական ընտրություններին։ Նարեկ Մարտիրոսյան
23:50 - 27 ապրիլի, 2021
ԲՀԿ-ն Փաշինյանի հրաժարականից հետո վարչապետի թեկնածու չի առաջադրի, մենք գնում ենք արտահերթ ընտրությունների. Միքայել Մելքումյան |tert.am|

ԲՀԿ-ն Փաշինյանի հրաժարականից հետո վարչապետի թեկնածու չի առաջադրի, մենք գնում ենք արտահերթ ընտրությունների. Միքայել Մելքումյան |tert.am|

tert.am: Նախնական նպատակն այն էր, որ մենք հասնեինք վարչապետի հրաժարականին, որը եղավ և որով իսկ պայմանավորված է արտահերթ ընտրություններ լինելու հանգամանքը: Այս մասին ԱԺ-ում ճեպազրույցի ժամանակ ասաց ԲՀԿ խմբակցության պատգամավոր Միքայել Մելքումյանը` անդրադառնալով դիտարկմանը, որ տարբեր շրջանակներ այժմ ակնկալում են, որ ընդդիմությունը վարչապետի թեկնածու կառաջադրի առաջիկա նիստերին, քանի որ հայտնի է, որ մայիսի 3-ին վարչապետի ընտրության  հարցն է քննարկվելու: Նրա խոսքով՝ այդ առումով, պետք է գնան հունիսի 20-ին արտահերթ ընտրությունների իրականացմանը: Դիտարկմանը՝ սա նշանակում է, որ Փաշինյանի հրաժարականից հետո 2 անգամ էլ ԲՀԿ-ն չի առաջադրի վարչապետի թեկնածու, Մելքումյանը պատասխանեց.  «Ես ասացի այն, ինչ ասացի, այսինքն՝ մենք գնում ենք արտահերթ ընտրությունների, որը լինելու է հունիսի 20-ին, թե ոնց, ինչ, ընթացակարգերն արդեն թելադրում են: ԲՀԿ-ն ցուցակի հարց չի քննարկում, դեռ վաղ է: Մենք արդեն քննարկել ենք, և վերահաստատում ենք, որ ԲՀԿ-ն ընտրություններին մասնակցելու է միայնակ և դրան գնալն էլ ինքնանպատակ չի: Նախորդիվ հաստատել ենք, և հիմա պնդում ենք, որ վերջին 15 տարվա ընթացքում, լինելով  մշտապես պառլամենտում ներկայացված քաղաքական ուժ, միշտ լինելով 2-րդ քաղաքական ուժը, մի շարք ուժեր գնացին ու եկան, բայց մենք մնացինք մեր տեղում»,- ասաց Մելքումյանը՝ կարևորելով, թե թիմն ում հետ և ինչ ծրագրով է գնում ընտրությունների։  «Այս փաստը վերահաստատում է, որ մենք պետք է գնանք հաղթելու, դա լինելու է, և ես հավատում եմ, որ մենք հաղթելու ենք: Այդ հաղթելու հանգամանքը չի ենթադրում, որ որևէ քաղաքական ուժ 50+1 տոկոս ձայն ստանալու է: Լինելու է բալանսավորված իշխանություն, բայց նորից վերահաստատում եմ, որ Գագիկ Ծառուկյանը լինելու է պետության ղեկավար»,- ասաց Մելքումյանը:
13:11 - 27 ապրիլի, 2021
Առաջիկա ընտրությունների օրինակարգությունն ապահովելու մտահոգությամբ. Լևոն Տեր-Պետրոսյան |ilur.am|

Առաջիկա ընտրությունների օրինակարգությունն ապահովելու մտահոգությամբ. Լևոն Տեր-Պետրոսյան |ilur.am|

ilur.am: Հորդորում եմ քաղաքական բոլոր ուժերին, ՀՀ նախագահին, Սահմանադրական դատարանի դատավորներին եւ, հատկապես, վարչապետի հետ, ըստ էության, հակասահմանադրական պայմանավորվածության մեջ մտած Ազգային Ժողովի «Բարգավաճ Հայաստան» ու «Լուսավոր Հայաստան» խմբակցություններին՝ ամենայն լրջությամբ վերաբերվել Սահմանադրական դատարանի աշխատակազմի նախկին ղեկավար Էդգար Ղազարյանի «Համաձայն Սահմանադրության՝ վարչապետը հրաժարական ներկայացնելուց հետո պաշտոնավարման իրավունք չունի» վերնագիրը կրող հոդվածում եւ նրա հետագա հրապարակումներում բերված փաստարկներին։ Այս մասին հայտարարություն է տարածել ՀՀ առաջին նախագահ Լևոն Տեր-Պետրոսյանը։ «Այդ փաստարկները հաշվի չառնելու պարագայում նշածս բոլոր սուբյեկտները պատասխանատու կդիտվեն առաջիկայում նախատեսված հակասահմանադրական ընտրությունների անցկացման գործում։ 2018թ. դեկտեմբերի 9-ի նույնքան հակասահմանադրական ընտրությունները՝ կայացած համաժողովրդական անկասելի ոգեւորության վերելքի պայմաններում, լինելով ստեղծված իրավիճակի հանգուցալուծման թերեւս միակ միջոցը, ամենեւին չեն կարող իրավական նախադեպ հանդիսանալ առաջիկա ընտրությունների օրինակարգությունը հիմնավորելու համար»,- նշված է հայտարարության մեջ։
17:09 - 26 ապրիլի, 2021
Կայացավ «5165» շարժման հիմնադիր համագումարը

Կայացավ «5165» շարժման հիմնադիր համագումարը

Այսօր կայացավ «5165» շարժման հիմնադիր համագումարը։ Համագումարն սկսվեց ՀՀ պետական օրհներգով, որից հետո մասնակիցները մեկ րոպե լռությամբ հարգեցին Հայոց ցեղասպանության եւ Արցախյան պատերազմներում զոհված մեր հայրենակիցների հիշատակը։ Բացման խոսքից հետո ելույթ ունեցավ շարժման առաջնորդ Կարին Տոնոյանը։ Նա նշեց, որ շարժման նպատակն է համախմբել բոլոր այն նվիրյալներին, բոլոր այն արհեստավարժ հայորդիներին եւ Հայաստանի քաղաքացիներին՝ անկախ ազգային պատկանելիությունից, որոնք շատ լավ հասկանում են այն իրավիճակը, որում այսօր գտնվում է մեր հայրենիքը, եւ որոնք պատրաստ են համախմբվելու եւ մեր երկիրը հանելու այս խորը ճգնաժամից։  «Մեր երկրի ապագան վտանգված է, եւ մեր պարտքն է կանգնեցնել այդ վտանգը․․․ Մենք հրավիրում ենք բոլորին միանալ այս շարժմանը, դարձնել այն բոլորինը, եւ միասին հայտարարենք, որ մենք ենք կերտելու մեր երկրի ապագան»,-ելույթում ասաց Կարին Տոնոյանը։ Անդրադառնալով սփյուռքին՝ Տոնոյանն ասաց, որ հազարավոր նամակներ է ստացել սփյուռքից եւ վստահ է, որ եթե սփյուռքահայերը տեսնեն պայքարող եւ համախմբված ուժի, կվերադառնան։ Տոնոյանը ելույթն ավարտեց խոսելով շարժման անվան՝ «5165»-ի ծագումնաբանության մասին․ «Շատերը երբեմն շփոթել են այն ինչ-ինչ թվերի հետ եւ չեն հասկացել, թե ինչու է ընտրված հենց այս թիվը։ Կարծում եմ՝ հասկանալուց հետո իրենք էլ իրենց սրտի անկյունում կբացահայտեն այս թիվը, կհասկանան, որ այն մեր սուրբ լեռան բարձրությունն է․․․»։ Համագումարի ժամանակ ելույթ ունեցան նաեւ միջագային հարաբերությունների մասնագետ Մենուա Սողոմոնյանը, «Հայրենիքի վերականգնման ու զարգացման» հիմնադրամի հոգաբարձուների խորհրդի նախագահ Հովհաննես Ղազարյանը, Հայաստանի վաստակավոր արտիստ Արսեն Գրիգորյանը (Մրոն), «Իրավական պետություն» կուսակցության նախագահ Վարդան Քալանթարյանը, «Մանկական քաղցկեղի եւ արյան հիվանդությունների» կենտրոնի ղեկավար Գեւորգ Թամամյանը, տնտեսագետ Աշոտ Պետրոսյանը։ Համագումարի վերջում ելույթ ունեցավ «5165» շարժման աշխատանքները համակարգող Սվետլանա Աճեմյանը։ Նա ներկայացրեց շարժմանն անդամագրվելու կարգը եւ ավարտեց ելույթը հետեւյալ խոսքերով․ «Համախմբումն ու ուժերի մեկտեղումն է այն միակ արդար ճանապարհը, որով մենք կվերստեղծենք մեր հզոր ազգային պետությունը»։ «5165» շարժման հիմնադիր համագումարն ավարտվեց մտքերի փոխանակությամբ։ Նարեկ Մարտիրոսյան
20:02 - 25 ապրիլի, 2021
Ոչ մի ավանտյուրայի չենք գնալու և չենք խոչընդոտելու արտահերթ ընտրությունների անցկացմանը. Մարուքյան |1lurer.am|

Ոչ մի ավանտյուրայի չենք գնալու և չենք խոչընդոտելու արտահերթ ընտրությունների անցկացմանը. Մարուքյան |1lurer.am|

1lurer.am: Ի հեճուկս նրանց, որոնք ասում էին, որ վարչապետը հրաժարական չի տա և արտահերթ ընտրություններ չեն լինի՝ վարչապետն այսօր հրաժարական տվեց, և այսօրվանից սկսվում է խորհրդարանի արձակման գործընթացը՝ վարչապետի և խորհրդարանական երեք ուժերի միջև ձեռքբերված պայմանավորվածության համաձայն: Այդ մասին ֆեյսբուքյան ուղիղ եթերում ասաց «Լուսավոր Հայաստան» կուսակցության նախագահ Էդմոն Մարուքյանը:  «Վարչապետը հրաժարական տվեց, և առավոտից սկսվեցին ճնշումներ, հայտարարություններ, կոչեր եղան՝ վատ հռետորաբանությամբ, որ եթե ընդդիմությունը թեկնածու չառաջադրի և չկանխի այս ընտրությունները, դավաճան և ազգադավ են: Մենք պայմանավորվել ենք, որ արտահերթ ընտրություններ պետք է լինեն, խոսք ենք տվել, որ չենք խոչընդոտելու, որ լինեն ընտրություններ: Ինչի՞ համար են այս կոչերը՝ երբ իշխանությունը հայտարարեց, որ ընտրություններ չեն լինելու, ասացին՝ վախեցան, երբ ասացին՝ լինելու են, օրը նշանակվեց, ասում են՝ ընտրություններ պետք չեն: Ուզում եմ պաշտոնապես հայտարարել՝ մեզ վրա ոչ մի ճնշում չի աշխատելու և ոչ մի ավանտյուրայի մենք չենք գնալու, հետևաբար որևէ մեկի թեկնածությունը չենք պաշտպանելու և չենք առաջադրելու թեկնածու, որպեսզի երկրում տեղի ունենան արտահերթ ընտրություններ և երկրում տիրի համերաշխություն, կարողանանք հաղթահարել ճգնաժամը»,- ասաց Մարուքյանը: 
18:09 - 25 ապրիլի, 2021
Կարևոր համարեցի, որ հրաժարականը տեղի ունենա հենց այսօր՝ Քաղաքացու օրը․ Նիկոլ Փաշինյան

Կարևոր համարեցի, որ հրաժարականը տեղի ունենա հենց այսօր՝ Քաղաքացու օրը․ Նիկոլ Փաշինյան

Հունիսի 20-ին արտահերթ ընտրություններ անցկացնելու ժամանակացույցի առումով ես կարող էի հրաժարական տալ ոչ պարտադիր այսօր, բայց կարևոր համարեցի, որ հրաժարականը տեղի ունենա հենց այսօր՝ Քաղաքացու օրը։ Այս մասին այսօր ուղերձում իր հրաժարականի վերաբերյալ ասաց Նիկոլ Փաշինյանը: «Սա կարևոր խորհրդանիշն է այն բանի, որ այսպիսով ՀՀ քաղաքացուց ստացված իշխանությունը մենք վերադարձնում ենք քաղաքացուն, որպեսզի նա որոշի իշխանության հետագա ճակատագիրը՝ ազատ, արդար, մրցակցային ընտրություններով»,– նշել է նա։   Նիկոլ Փաշինյանի խոսքով՝ իշխանության հետագա ճակատագիրը պետք է որոշի միայն ու միայն ժողովուրդը․ «Մեր հավատամքն այն է, որ ժողովրդի ազատ կամարտահայտումը իշխանության և ինքնիշխանության միակ աղբյուրն է։ Եվ իշխանության հետագա ճակատագիրը պետք է որոշի միայն ու միայն, բացառապես ժողովուրդը։ Եվ ինձ համարում եմ այս հնարավորության և իրավունքի երաշխավորը։ Մեր՝ ՔՊ կուսակցությունը մասնակցելու է արտահերթ խորհրդարանական ընտրություններին, ես հանդես եմ գալու որպես վարչապետի թեկնածու, և մենք հնազանդորեն կենթարկվենք ժողովրդի կայացրած որոշումներին»։
11:23 - 25 ապրիլի, 2021
Արտահերթ խորհրդարանական ընտրությունները կյանքի կոչելու համար այսօր ես հրաժարական եմ տալիս ՀՀ վարչապետի պաշտոնից․ Նիկոլ Փաշինյան

Արտահերթ խորհրդարանական ընտրությունները կյանքի կոչելու համար այսօր ես հրաժարական եմ տալիս ՀՀ վարչապետի պաշտոնից․ Նիկոլ Փաշինյան

Հունիսի 20-ին արտահերթ խորհրդարանական ընտրությունները կյանքի կոչելու համար այսօր ես հրաժարական եմ տալիս ՀՀ վարչապետի պաշտոնից։ Նշել է Նիկոլ Փաշինյանը այսօրվա իր ուղերձում․ «Ըստ Սահմանադրության՝ խորհրդարանի արտահերթ ընտրություն անցկացնելու համար, Ազգային ժողովը պետք է արձակվի, եթե վարչապետի հրաժարականից հետո 2 շաբաթում 2 անգամ անընդմեջ չի ընտրվում նոր վարչապետ, ապա ոչ շուտ, քան 30 և ոչ ուշ, քան 45 օր հետո նշանակվում է նոր ընտրություն։ Սահմանադրության ձևակերպումները ենթադրում են նաև, որ Ազգային ժողովը իրավունքի ուժով արձակված համարելու համար անհրաժեշտ է, որ խորհրդարանում վարչապետի ընտրության քվեարկություն տեղի ունենա։ Այս ընթացակարգերը պահպանելու համար ես երկու անգամ կառաջադրվեմ վարչապետի թեկնածու։ Խորհրդարանական մյուս խմբակցությունները, պատգամավորները թեկնածու չեն առաջադրի»,–ասել է նա։ Նիկոլ Փաշինյանը նշել է, որ այս ընթացքում ես կշարունակի կատարել ՀՀ վարչապետի պարտականությունները՝ օրենսդրությամբ ու Սահմանադրությամբ նախատեսված ամբողջ ծավալով։ 
11:07 - 25 ապրիլի, 2021
Կայացավ «Ինքնիշխան Հայաստան» կուսակցության հիմնադիր համագումարը

Կայացավ «Ինքնիշխան Հայաստան» կուսակցության հիմնադիր համագումարը

Այսօր տեղի ունեցավ «Ինքնիշխան Հայաստան» կուսակցության հիմնադիր համագումարը։ Համագումարի օրակարգը հաստատելուց հետո մասնակիցները կողմ քվեարկեցին «Ինքնիշխան Հայաստան» կուսակցության ստեղծմանը, որից հետո ելույթ ունեցան կուսակցության հիմնադիր անդամները։ Հիմնադիր անդամներից Դավիթ Սանասարյանն իր ելույթը սկսեց՝ անդրադառնալով երեք տարի առաջ այս օրը Հայաստանում տեղի ունեցող իրադարձություններին․ «Ժողովրդի ճնշման ներքո Հայաստանի ոչ լեգիտիմ վարչապետ Սերժ Սարգսյանը հրաժարական տվեց և ընդունեց իր սխալը։ Հենց այս օրը փողոցները ողողված էին հաղթանակի բերկրանքի, հուզմունքի, ուրախության ճիչերով»։ Սանասարյանի խոսքով՝ անցել է երեք տարի, բայց մեր երազանքները մնում են անկատար․ «Այո՛, կատարվել են փոփոխություններ, բայց դրանց ծավալն ու բովանդակությունը չեն համապատասխանում հեղափոխական հարթակից ու այլ ամբիոններից տված մեր խոստումներին։ Երեք տարին բավարար ժամանակ էր՝ իրականացնելու համակարգային լուրջ փոփոխություններ»։  Սանասարյանի խոսքով՝ կառավարությունը կարող էր փոփոխություններր իրականացնել Զինված ուժերում, դատաիրավական համակարգում, իրավապահ մարմիններում և առանցքային այլ ոլորտներում, բայց անկարող է եղել և հիմա էլ է անկարող։ Խոսելով Արցախյան հակամարտությունից և բանակցային գործընթացից՝ Դավիթ Սանասարյանը նշեց․ «Հայաստանի նման փոքր երկրի անվտանգության բարձրացման գրավականներից մեկն իր սուբյեկտայնությունն ու արտաքին քաղաքական որոշումներ կայացնելու արդյունքում ինքավարության մակարդակի բարձրացումն է, ասել է թե՝ որևէ երկրից միակողմանի արտաքին կախվածության ֆոնը թուլացնելու, հավասարակշռելու կարևորությունն է։ Մեզ համար ՀՀ արտաքին քաղաքական ոլորտում ռազմավարական առաջնահերթություններից է նաև երկրի սուբյեկտայնության և ինքնիշխանության մակարդակի էական բարձրացումը, ինչն իր հերթին կբարձրացնի Հայաստանի արտաքին քաղաքական կշիռը և հետևաբար՝ նաև անվտանգությունը»։ Սանասարյանը նշեց, որ իրենց կուսակցությունն Արցախի հարցի լուծումը տեսնում է Արցախի Հանրապետության ճանաչման, տարածքային ամբողջականության վերականգնման և միջազգային իրավունքի շրջանակներում․ «Մենք տեսնում ենք Հայաստանում այնպիսի հզոր պետության կառուցման հնարավորություն, որը կկարողանա ապահովել Արցախի ինքնորոշման իրավունքի ճանաչումը, ապա և վերամիավորումը Մայր Հայաստանին»։ Դավիթ Սանասարյանն ասաց, որ իրենք համագործակցելու են այնպիսի ուժերի հետ, որոնք չունեն արատավոր անցյալ, որոնց պատասխանատու դեմքերը պետության առջև հանցագործություն չեն իրականացրել․ «Մենք մերժում ենք «հինգերորդ շարասյուն» հանդիսացող ուժերի միութենական նկրտումները»։ Համագումարի ժամանակ ընդունվեցին «Ինքնիշխան Հայաստան» կուսակցության ծրագիրը և  կանոնադրությունը։ Աննա Սահակյան
23:51 - 23 ապրիլի, 2021
Ընտրությունը լինելու է երկու շատ պարզ բևեռների միջև․ մենք գիտենք, թե երբ ենք սկսելու, ոնց ենք սկսելու, ուղղակի այս հարցում վստահեք ինձ․ Ռոբերտ Քոչարյանը՝ իր աջակիցներին |tert.am|

Ընտրությունը լինելու է երկու շատ պարզ բևեռների միջև․ մենք գիտենք, թե երբ ենք սկսելու, ոնց ենք սկսելու, ուղղակի այս հարցում վստահեք ինձ․ Ռոբերտ Քոչարյանը՝ իր աջակիցներին |tert.am|

tert.am: Ես գիտակցում եմ, որ հիմնական թիրախը ես եմ լինելու և հպարտ եմ, որ այս իշխանության ատելությունը վաստակել եմ։ Այս մասին աջակիցների հետ հանդիպմանն ասել է  Ռոբերտ Քոչարյանը։«Ընտրությունները լինելու են երկբևեռ, և այն, ինչ անում է այսօր իշխանությունը՝ կապված իմ հետ, կամ հնարավոր այն դաշինքի հետ, որ ես եմ գլխավորելու, իրենք իմ դեմ քարոզչություն են անում, իրենք աջակցում են և աջակցելու են այս բևեռի ձևավորմանը։ Ես գիտեմ, որ շատերի մոտ կարծիք կա, որ իրենք արդեն քարոզարշավ են սկսել, և մենք հետ ենք մնում․ հանգիստ ենք, հանգիստ, պլանավորված մենք մեր քայլերով առաջ ենք գնալու, հենց հրաժարականը տվեց, հաջորդ օրը սկսելու ենք մեր աշխատանքները»,– ասաց նա։Նա նշեց, որ ընտրությունը լինելու է երկու շատ պարզ բևեռների միջև։ «Մենք ի՞նչ ենք ուզում, մենք ուզո՞ւմ ենք պարտված, ստորացված, անարժանապատիվ ապագա  և թշվառ ապագա, քանի որ տնտեսությունը բավականին ծանր վիճակում է, թե՞ մենք ուզում ենք արժանապատիվ խաղաղություն և բարեկեցիկ կյանք։ Սա է լինելու ընտրությունը, ցավոք էլի սև ու սպիտակի է վերածվելու, կոնտրաստի իմաստով եմ ասում, ոչ թե այն իմաստով, որը միշտ այս իշխանությունն էր օգտագործում։ Հիմա եթե մարդիկ ուզում են թշվառ ապագա, անարժանապատիվ ապագա, մենք իրենց առաջարկելու ենք լրիվ այլ հնարավորություն»,–ասաց նա։
16:44 - 23 ապրիլի, 2021
Կայացավ «Միասնական հայրենիք» կուսակցության հիմնադիր համագումարը․ կուսակցությունն առաջիկայում կհայտնի իր դիրքորոշումները տարբեր թեմաների վերաբերյալ

Կայացավ «Միասնական հայրենիք» կուսակցության հիմնադիր համագումարը․ կուսակցությունն առաջիկայում կհայտնի իր դիրքորոշումները տարբեր թեմաների վերաբերյալ

Այսօր կայացավ «Միասնական հայրենիք» կուսակցության հիմնադիր համագումարը։ Համագումարի սկզբում ելույթ ունեցավ Մհեր Տերտերյանը։ Նա նշեց, որ կուսակցությունն իր առջև նպատակ է դրել շատ կարճ ժամանակում ճանաչելիություն ձեռք բերել: «Մենք հրաժարվում ենք դատապարտել գործող և նախկին իշխանություններին, ժամանակը չէ, որ թողնենք մեր վտանգված ապագան և քննադատենք Պողոսին կամ Պետրոսին»,- ասաց Տերտերյանը: Նրա խոսքով՝ իրենց կուսացությունը նախատեսում է հանդիպումներ ունենալ բիզնես հատվածի, զինվորականների հետ, այցելել մարզեր, գյուղացիների հետ հանդիպել և նրանց խնդիրները հավաքագրել։ Մհեր Տերտերյանը նշեց, որ իրենց կուսակցությունն արդեն սկսել է աշխատել կառավարության ծրագրի վրա։ «Միասնական հայրենիք»-ն առաջիկայում կներկայացնի իր դիրքորոշումները տարբեր թեմաների վերաբերյալ։ Տերտերյանի ելույթից հետո հիմնադիր համագումարին ներկա եղողները միաձայն կողմ քվեարկեցին, որ հիմնադրվի «Միասնական հայրենիք» կուսակցությունը։ Մհեր Տերտերյանն առաջադրվեց որպես կուսակցության նախագահ։ Նա ևս ընտրվեց միաձայն։ Կուսակցության նախագահի ընտրությանը հաջորդեց վարչության անդամների փակ, գաղտնի քվեարկությունը։ Ձայների մեխամասնությամբ վարչության անդամեր ընտրվեցին Նաիրի Իսրայելյանը, Լուսինե Ավագյանը, Էդուարդ Աբովյանը, Տիգրան Պարսամյանը, Մելիք Փինաչյանը, Ավետիս Հովսեփյանը։ «Միասնական հայրենիք» կուսակցությունը կմասնակցի սպասվող խորհրդարանական արտահերթ ընտրություններին։  
15:58 - 23 ապրիլի, 2021
Բանակցություններ որևէ ուժի հետ չունենք. Գորգիսյանը՝ Մարուքյանի՝ նախկին ուժերին ուղղած կոչի մասին |armtimes.com|

Բանակցություններ որևէ ուժի հետ չունենք. Գորգիսյանը՝ Մարուքյանի՝ նախկին ուժերին ուղղած կոչի մասին |armtimes.com|

armtimes.com: «Հայտարարությունն արվել է հրապարակային: Առանձին բանակցություններ որևէ ուժի հետ այս փուլում չունենք: Եթե լինեն բանակցություններ, մենք դա կուլիսային չենք անի»: Այսօր ԱԺ-ում անդրադառնալով Էդմոն Մարուքյանի այն հայտարարությանը, որտեղ վերջինս առաջարկեց Ռոբերտ Քոչարյանին և մյուս ընդդիմադիր ուժերին մի կողք քաշվել, որպեսզի իրենք Փաշինյանի ուժին դարձնեն քիփլիկ ընդդիմադիր խմբակցություն, ասաց ԼՀԿ պատգամավոր Գևորգ Գորգիսյանը: «Բայց ես ուզում եմ հիշեցնել 2020 թվականի «Այո», «Ոչ»-ի քարոզարշավին մեր կոչին հետևեցին քաղաքական ուժերը, և ոչ ոք չձևավորեց «Ոչ»-ի ճամբարը, և այդպիսով քարոզարշավը վերացվեց ֆարսի, քանի որ Փաշինյանը չուներ հակառակորդ ում իր սովորության համաձայն պետք է «թաղեր»: Նա ուղղակի չէր կարողանում քարոզարշավ անել»,- նկատեց պատգամավորը: Շարունակությունը՝ armtimes.com-ում։
13:06 - 20 ապրիլի, 2021