#armVote

2021 թվականի հունիսի 20-ին Հայաստանում կանխատեսվում են խորհրդարանական արտահերթ ընտրություններ:

2021 թվականի մարտի 18-ին ՀՀ վարչապետ Նիկոլ Փաշինյանը հայտարարեց, որ այս որոշումը կայացվել է ՀՀ նախագահի, «Իմ քայլը» խմբակցության, «Լուսավոր Հայաստան» խմբակցության ղեկավար Էդմոն Մարուքյանի ու «Բարգավաճ Հայաստան» խմբակցության ղեկավար Գագիկ Ծառուկյանի հետ քննարկումներից հետո։

ՀՀ Սահմանադրությունը սահմանում է, որ խորհրդարանական արտահերթ ընտրություններ անցկացնելու համար Ազգային ժողովը պետք է արձակվի, դրա համար վարչապետը պետք է հրաժարական ներկայացնի, որից հետո 2 շաբաթում 2 անգամ անընդմեջ չընտրվի նոր վարչապետ, այնուհետեւ ոչ շուտ, քան 30 եւ ոչ ուշ, քան 45 օր հետո նշանակվեն նոր ընտրություններ։

Այս գործընթացի համար վարչապետը հրաժարական է ներկայացրել 2021 թվականի ապրիլի 25-ին, եւ արդեն մեկ անգամ չի ընտրվել։ Վարչապետի ընտրության հարցով հաջորդ նիստը կգումարվի մայիսի 10-ին։

Քաղաքական մի շարք ուժեր կարեւորում են նախքան ընտրությունները Ընտրական օրենսգրքի փոփոխությունների ընդունումը։ Խորհրդարանական մեծամասնությունը հայտարարել էր, որ Օրենսգրքում փոփոխություններ անելու որոշում ունեն, դրանցից որոշներն արդեն ընդունվել են, մասնավորապես, ռեյտինգային ընտրակարգը վերացվել է։ ԸՕ փոփոխությունների մեծ փաթեթը դեռեւս ընդունված չէ։

Տիգրան Հակոբյանն անդրադարձավ հեռարձակողների անկախության հարցին |armenpress.am|

armenpress.am: Հեռուստատեսության եւ ռադիոյի հանձնաժողովը նկատել է, որ հեռարձակողների ազատությունն ու անկախությունը նախորդ տարի ավելի շատ վտանգել են համավարակը և պատերազմը, երբ լրատվամիջոցների եկամուտները կտրուկ նվազել են: Այս մասին ասաց հանձնաժողովի նախագահ Տիգրան Հակոբյանը` ԱԺ նիստում Հեռուստատեսության եւ ռադիոյի հանձնաժողովի 2020 թվականի գործունեության մասին տարեկան հաղորդման ներկայացմանը: Նա տեղեկացրեց, որ հանձնաժողովը ամեն տարվա վերջում գրավոր դիմում է բոլոր հեռարձակողներին՝ խնդրելով ներկայացնել այն բոլոր միջամտությունները, դժգոհությունները, որ նրանք ունեն իշխանություններից՝ գործադիր, դատական, օրենսդիր: «Գանգատը եղել է, որոշ պաշտոնատար անձինք, այդ թվում նաև պատգամավորներ խտրական, անհարգալից, երբեմն արհամարհական, սպառնալիքներով համեմված վերաբերմունք են դրսևորում՝ և լրագրողների, և լրատվամիջոցների նկատմամբ: Մենք գտնում ենք, որ դա իհարկե անթույլատրելի է, սակայն նաև համարում ենք, որ բացասական այդպիսի դրսևորումները համակարգված բնույթ չեն կրել և չեն վտանգել լրատվամիջոցների ազատությունն ու անկախությունը: Մեր կարծիքով` այդ ազատությունն ու անկախությունը նախորդ տարի ավելի շատ վտանգել են համավարակը և պատերազմը, որովհետև լրատվամիջոցների եկամուտների կտրուկ նվազումը շատերին կախվածության մեջ է դրել տարբեր քաղաքական ուժերի և ֆինանսական խմբավորումների ներքո: Եվ այդ վտանգները ցավոք որևէ անգամ չեն հաշվառվում և ներկայացվում»,-ասաց Տիգրան Հակոբյանը: Հանձնաժողովը հասկանում է, որ շատ դժվար է պաշտպանել ժողովրդավարական նորմերը արտակարգ իրավիճակներում, ինչպիսին էին համավարակը և պատերազմը, սակայն այդ դրական եզրակացությունը չի նշանակում, թե հանձնաժողովն այդ ոլորտում ազատության վիճակը համարում է բավարար, պատճառները շատ են: Հակոոբյանը մատնանշեց հանձնաժողովի սահմանափակ հնարավորությունները և լիազորությունները, տեղեկատվական հստակ քաղաքականության բացակայությունը և այլ գործոններ, որոնք լուրջ խոչընդոտ են հանդիսանում կայուն համակարգ ստեղծելու գործում, որը կսպասարկեր հանրային շահը: «Շատ ժամանակ մենք ուշադրություն չենք դարձնում և հեռարձակողների անկախությունը պայմանավորում ենք միայն իշխանության կամ պետության միջամտությամբ, բայց դա այդպես չէ: Առաջխաղացումն ակնհայտ է: Սակայն հիմնադիրների, քաղաքական ուժերի ազդեցությամբ խմբագրական և կադրային քաղաքականության միջամտությամբ, ստվերային ֆինանսավորմամբ ևս սահմանափակվում է լրատվամիջոցների ազատությունն ու անկախությունը: Ակնհայտ է, որ այդ ազդեցությամբ և միջամտությամբ է պայմանավորված այն, որ մի շարք հեռարձակողներ հաճախ անտեսում են հանրային շահը, քաղաքացիների իրավունքը՝ ստանալ անկողմնակալ և բազմակողմանի տեղեկատվություն և սպասարկում են քաղաքական ուժերի և անհատների շահերը»,-ասաց հանձնաժողովի նախագահը:

15:06 - 26 մայիսի, 2021