Նախարարը ներկայացրել է «Շրջակա միջավայրի վրա ազդեցության գնահատման և փորձաքննության մասին» նոր օրենքի նախագծի մշակման աշխատանքները
11:19 - 01 մայիսի, 2021

Նախարարը ներկայացրել է «Շրջակա միջավայրի վրա ազդեցության գնահատման և փորձաքննության մասին» նոր օրենքի նախագծի մշակման աշխատանքները

Երեկ Շրջակա միջավայրի նախարարությունում կայացել է նախարարին կից նոր ձևավորված հասարակական խորհրդի երկրորդ նիստը։
 
Նիստի ընթացքում հաստատվել է հասարակական խորհրդի աշխատակարգը, խորհրդի կազմում առանձին ոլորտային աշխատանքային խմբերի կազմերը, ընտրվեցին դրանք համակարգողներ։
 
Քննարկվել են նախորդ նիստից հետո կատարած աշխատանքն ու գույքագրած խնդիրները։
 
«Ընդերք» աշխատանքային խմբի ներկայացուցիչ Վիկտորիա Բուռնազյանը հանդես է եկել «Հանքարդյունաբերության ոլորտի խնդիրները՝ հիմնված «ԷկոԼուր» տեղեկատվական ՀԿ-ի կողմից իրականացված «Չաշխատող հանքարդյունաբերական ընկերությունների պատասխանատվությունը ԱՃԹՆ գործընթացում» ծրագրի արդյունքների վրա» զեկույցով։ Զեկույցից հետո նախարար Ռոմանոս Պետրոսյանը խնդրել է պաշտոնական նամակով Շրջակա միջավայրի նախարարությանը տրամադրել ուսումնասիրության արդյունքները և ողջ փաստական տվյալները՝ դրանց հետագա ընթացք տալու նպատակով։
 
Նիստի օրակարգային հարցերից զատ, խորհրդի անդամների հետ անդրադարձ է կատարվել բնապահպանական խնդիրների լայն շրջանակի` ոլորտի օրենսդրական բարեփոխումներից մինչև հանքարդյունաբերություն։ Անդրադարձ է կատարվել նաև Ամուլսարի խնդրին։
 
Նախարարը խորհրդի անդամներին ներկայացրել է «Շրջակա միջավայրի վրա ազդեցության գնահատման և փորձաքննության մասին» ՀՀ նոր օրենքի նախագծի մշակման և ՇՄԱԳ գործընթացում փոփոխությունների ընթացիկ փուլի մասին տվյալներ։
 
Պայմանավորվածություն է ձեռք բերվել նախքան օրենքը շահագրգիռ բոլոր կողմերի և հանրային լայն քննարկումների ներկայացնելը, խորհրդի արտահերթ նիստ հրավիրել և խորհրդատվական քննարկում անցկացնել։


Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter

Կարդալ նաև


comment.count (0)

Մեկնաբանել