16:32 - 09 օգոստոսի, 2022
ԱԻ նախարարի տեղակալը և ԿԽՄԿ պատվիրակության ղեկավարի տեղակալը պայմանավորվել են մշակել դպրոցների անվտանգության չափորոշիչներ
Արտակարգ իրավիճակների նախարարի տեղակալ Դավիթ Համբարյանը հանդիպում է ունեցել Կարմիր խաչի միջազգային կոմիտեի (ԿԽՄԿ) պատվիրակության ղեկավարի տեղակալ Միրիամ Էլ Խոլիի հետ։ Հանդիպմանը մասնակցել են նաև ԿԽՄԿ կրթության ծրագրի ղեկավար Մանուկ Խաչատրյանը, աղետների կառավարման բաժնի պետ Լուսինե Քոչարյանը։
Ողջունելով հյուրերին՝ Դավիթ Համբարյանը երախտագիտություն է հայտնել ԱԻՆ-ի և Կարմիր խաչի միջև շարունակական և արդյունավետ համագործակցության համար։
Հանդիպման ընթացքում քննարկվել են ԱԻ նախարարության հետ համագործակցության ընդլայնման հնարավոր ուղղությունները, մասնավորապես՝ արտակարգ իրավիճակներում սահմանամերձ դպրոցների պատրաստվածության մակարդակի բարձրացումը, ինչպես նաև ապահով սենյակների տիպային նախագծերի ստեղծումը։
Զրույցի ընթացքում ընդգծվել է սահմանամերձ բնակավայրերի դիմակայության, դպրոցներում և մանկապարտեզներում քաղաքացիական պաշտպանության պաշտոնական շինությունների տեղակայման կարևորությունը։
Կողմերը պայմանավորվել են ԱԻՆ-ի աջակցությամբ մշակել դպրոցների անվտանգության չափորոշիչներ և այդ չափորոշիչներով Գեղարքունիքի, Սյունիքի մարզերի կրթական հաստատություններում ստեղծել տիպային ապահով սենյակներ։
Հանդիպման ավարտին Դ․ Համբարյանը հույս է հայտնել, որ երկուստեք համագործակցությունը շարունակական կլինի։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)