ԿԳՄՍ նախարարությունը հանրային քննարկման է ներկայացրել ուսուցիչների վերապատրաստման նոր կարգը

ՀՀ կրթության, գիտության, մշակույթի և սպորտի նախարարությունը հանրային քննարկման է ներկայացրել ուսուցիչների վերապատրաստման նոր կարգը։ Այս մասին ֆեյսբուքյան էջում գրել է ԿԳՄՍ փոխնախարար Ժաննա Անդրեասյանը։ Նրա գրառումը՝ ստորև․

«Այս տարի Հանրակրթության մասին ՀՀ օրենքի փոփոխությամբ նախատեսել էինք, որ ուսուցիչների մասնագիտական զարգացման ծրագրերը պետք է բխեն իրենց կարիքներից: Այժմ հանրային քննարկման ենք ներկայացրել վերապատրաստման նոր կարգը, որում ամրագրել ենք, որ ուսումնական տարվա սկզբից պետք է իրականացվի ուսուցչի մասնագիտական զարգացման կարիքի գնահատում, որից ելնելով էլ կորոշվեն ուսուցչի վերապատրաստման ուղղությունները:

Ընդ որում, ուսուցչի մասնագիտական զարգացման կարիքը գնահատվելու է երեք միջոցներով.

- ինքնագնահատման՝ հենց ուսուցչի կողմից,

- դպրոցի ներսում՝ մեթոդմիավորման և մանկավարժական խորհրդի կողմից,

- արտաքին գնահատման միջոցով:

Կարգում ներկայացված է նաև այս երեք տարբեր միջոցների համադրման և հավասարակշռման մոտեցումը։

Ուսուցչի մասնագիտական զարգացման շրջափուլը սահմանվում է հինգ տարի և յուրաքանչյուր տարի ուսուցիչը կկարողանա հավաքել տվյալ տարվա համար սահմանված կրեդիտները:

Առաջիկայում կներկայացնենք նաև բուն վերապատրաստման ծրագիրն ու կրեդիտների չափաքանակները, որով պարզ կդառնա տարբերակված մոտեցումը ուսուցիչների մասնագիտական զարգացման նկատմամբ՝ կախված նաև վերջիններիս ստաժից և այլ գործոններից: Խնդրում եմ ակտիվորեն քննարկել, ներկայացնել առաջարկներ, որովհետև սա ուսուցիչների գործունեությանն առնչվող առանցքային նախագիծ է»,-գրել է նա։