civilnet.am: Հունվարի 31-ին Ադրբեջանի ներքին գործերի նախարարությունը հայտարարել է իրանական «նոր գործակալական ցանցի» բացահայտման մասին, հաղորդում են ադրբեջանական առաջատար լրատվամիջոցները՝ հղում անելով այդ երկրի ՆԳՆ-ին:
Հաղորդվում է, որ SalamNews և Interaz լրատվամիջոցներում ստուգիչ միջոցառումներ են անցկացվել, որոնց հետևանքով Բաքվում և Ադրբեջանի այլ շրջաններում ձերբակալվել է 7 հոգի:
Նշենք, որ Ադրբեջանի ու Իրանի հարաբերությունները կրկին սրվել են 2023թ․ հունվարի 27-ին Իրանում Ադրբեջանի դեսպանատան վրա տեղի ունեցած հարձակումից հետո, ինչի հետևանքով սպանվել է անվտանգության ծառայության պետը, վիրավորվել՝ երկու աշխատակից։ Թեհրանի ոստիկանապետը հայտնել է, որ, ըստ նախնական քննության, հարձակման շարժառիթը եղել են անձնական և ընտանեկան խնդիրները։
Ադրբեջանը հունվարի 29-ին ամբողջությամբ կասեցրել է դիվանագիտական գործունեությունն Իրանում, դեսպանատան աշխատակիցները տարհանվել են։
Ադրբեջանի նախագահ Իլհամ Ալիևը դեպքը որակել է որպես «ահաբեկչություն», իսկ երկրի ԱԳՆ խոսնակ Այհան Հաջիզադեն նշել է․ «Մեր կարծիքով՝ հարձակման պատասխանատվությունը կրում է իրանական կողմը»։
comment.count (0)