Միացյալ Թագավորությունը, Կանադան և Ավստրալիան ճանաչեցին Պաղեստինի պետությունը: Այս մասին հայտնում է CNN լրատվամիջոցը։
Միացյալ Թագավորության վարչապետ Քիր Սթարմերը կիրակի օրը հայտարարեց, որ Լոնդոնը պաշտոնապես ճանաչում է Պաղեստինի պետությունը՝ հույս հայտնելով երկպետական լուծման կյանքի կոչմանը։
«Մերձավոր Արևելքում ահավոր զարգացումների պայմաններում մենք քայլ ենք անում՝ խաղաղության հնարավորությունը կենդանի պահելու համար», – ասել է Սթարմերը։
Նույն օրը Ավստրալիայի վարչապետ Էնթոնի Ալբանեզեն և արտգործնախարար Փենի Ուոնգը հայտարարեցին, որ Ավստրալիան ևս պաշտոնապես ճանաչում է անկախ և ինքնիշխան Պաղեստինի պետությունը։
«Այս քայլով Ավստրալիան ճանաչում է պաղեստինյան ժողովրդի երկարամյա ու լեգիտիմ ձգտումը՝ ունենալ սեփական պետություն», – ասված է նրանց համատեղ հայտարարության մեջ։
Կանադայի վարչապետ Մարք Կարնին ևս հաստատեց, որ Օտտավան պաշտոնապես ճանաչում է Պաղեստինի պետությունը։
«Կանադան ճանաչում է Պաղեստինի պետությունը և առաջարկում է մեր գործընկերությունը խաղաղ ապագայի կառուցման գործում՝ թե՛ Պաղեստինի, թե՛ Իսրայելի համար», – գրել է Կարնին X հարթակում։
Այս զարգացումները տեղի են ունենում ՄԱԿ-ի Գլխավոր ասամբլեայի շաբաթվա նախաշեմին, որտեղ սպասվում է, որ Ֆրանսիան և մի շարք այլ երկրներ ևս կհետևեն նույն օրինակին։
