azatutyun.am Սանկտ Պետերբուրգի դատարանից նախօրեին փախուստի դիմած Արցախի արտակարգ իրավիճակների պետական ծառայության տնօրենի նախկին տեղակալ Բորիս Ավագյանը, նախնական տեղեկություններով, ինքնասպան է եղել Հայաստանի հյուպատոսության շենքում, РИА Новости-ին հայտնել են իրավապահ մարմինները:
Նախօրեին Սանկտ Պետերբուրգի դատարանների Միացյալ մամուլի ծառայության ղեկավար Դարյա Լեբեդևան գործակալությանը հայտնել էր, որ «Ռոսրեեստր»-ի Սանկտ Պետերբուրգի վարչության ղեկավարի նախկին տեղակալ Ավագյանը փախել է Կրոնշտադտի շրջանային դատարանի շենքից, որտեղ նրան տեղափոխել էին խափանման միջոց ընտրելու համար:
Դատախազությունը միջնորդել էր նրան կալանավորել:
Հիշեցնենք՝ Ավագյանը 2021-ին գերիների վերաբերյալ խորհրդարանում կազմակերպված քննարկումից ժամեր անց ազատվել էր պաշտոնից։
ԱԻՊԾ-ն պարզաբանել էր, որ Բորիս Ավագյանին հեռացնելու պատճառը պաշտոնական դիրքի չարաշահումն էր և աշխատանքային էթիկայի կանոնների խախտումը:
Նա Ռուսաստանում մեղադրվում էր մաքսային վճարումներից խուսափելու մեջ։
«Փաստինֆոն» նախօրեին գրել էր, որ Ավագյանն իրենց հետ կապ է հաստատել՝ ասելով, որ կամավոր ցանկանում է արտահանձնվել Հայաստանին:
