1lurer.am Այսօր գիշեր 4 օտարերկրացի տեղափոխվել է «Միքայելյան» համալսարանական հիվանդանոց, 1lurer.am-ին հայտնեցին ՆԳՆ-ից։
«Կան մարմնական վնասվածք ստացած օտարերկրյա քաղաքացիներ: Փաստաթղթերը փոխանցվել են նախաքննական մարմին: Նախաձեռնվել է քրեական վարույթ: Ձեռնարկվում են միջոցառումներ դեպքի բոլոր հանգամանքները պարզելու ուղղությամբ»,- հաստատեցին ՆԳՆ-ից:
«Միքայելյան» համալսարանական հիվանդանոցի հանրային կապերի բաժնից փոխանցեցին, որ հոկտեմբերի 3-ին՝ ժամը 03:00-ի սահմաններում, «Միքայելյան» համալսարանական հիվանդանոց են տեղափոխվել 4 օտարերկրյա քաղաքացիներ:
«Նրանցից 3-ը վնասվածքներ էին ստացել որովայնի շրջանում, 1-ը` կրծքավանդակի: Նրանք վիրահատվել են, վիճակը գնահատվում է ծանր կայուն, այժմ գտնվում են վերակենդանացման բաժանմունքում»,- հաստատեցին «Միքայելյան» համալսարանական հիվանդանոցի հանրային կապերի բաժնից:
ՔԿ-ից էլ փոխանցեցին, որ դեպքի առթիվ նախաձեռնվել է քրեական վարույթ՝ Քրեական օրենսգրքի 166-րդ հոդվածի 2-րդ մասի 6-րդ կետով (առողջությանը ծանր վնաս պատճառելը, որը կատարվել է զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ) և 297-րդ հոդվածի 3-րդ մասով (խուլիգանությունը, որը կատարվել է զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ կամ դրա գործադրման սպառնալիքով)։
