armenpress.am: ԱՄՆ նախագահ Ջո Բայդենը հայտարարել է, որ պլանավորում է մասնակցել 2024 թ.-ի նախագահական ընտրություններին, սակայն դեռ պատրաստ չէ պաշտոնապես առաջադրել իր թեկնածությունը։ Այս մասին Բայդենը հայտնել է NBC News հեռուստաընկերության «Today» շոուի հաղորդավար Ալ Ռոքերին:

«Ես պլանավորում եմ առաջադրվել, Ալ, բայց մենք դեռ պատրաստ չենք այդ մասին հայտարարել»,- ասել է Սպիտակ տան ղեկավարը:

Փորձելով հասնել Բայդենի կողմից 2024 թ.-ի պլանների հստակեցման՝ լրագրողը նրան հարցրել է, թե Զատկի քանի արարողություն է նա դեռ նախատեսում անցկացնել:

«Ես պլանավորում եմ առնվազն երեք-չորս… Գուցե` հինգ: Գուցե` վեց, Աստված գիտի», – պատասխանել է Բայդենը:

Ամենամյա արարողությունը, որին մասնակցելու են բազմաթիվ երեխաներ, տեղի է ունենալու երկուշաբթի օրը, Սպիտակ տանը։