ԱՄՆ նախագահ Դոնալդ Թրամփը հայտարարել է, որ Իսրայելի և արմատական պաղեստինյան ՀԱՄԱՍ շարժման միջև համաձայնագրի ստորագրումը, խաղաղության ծրագրի շրջանակում, տեղի կունենա Եգիպտոսում։
«Մենք պլանավորում ենք մեկնել Եգիպտոս, որտեղ տեղի կունենա ևս մեկ ստորագրում: Ես արդեն ստորագրել եմ փաստաթուղթը նախկինում, բայց այս անգամ այն կլինի պաշտոնական։ Եվ զարմանալի է, որ բոլոր երկրները՝ Կատարից մինչև Սաուդյան Արաբիա, ԱՄԷ և այլ երկրներ, թե՛ հարուստ, թե՛ աղքատ, միավորվել են, ինչը իսկապես տպավորիչ է», – ասել է նա Սպիտակ տանը։
Նախօրեին Թրամփը հայտարարել էր, որ Իսրայելի և ՀԱՄԱՍ-ի ներկայացուցիչները Եգիպտոսում բանակցություններից հետո համաձայնության են եկել խաղաղության ծրագրի առաջին փուլի վերաբերյալ։ Նրա խոսքով, այս փուլը ենթադրում է բոլոր պատանդների ազատ արձակում «մոտ ապագայում» և իսրայելական զորքերի դուրսբերում Գազայի հատվածի ներսում համաձայնեցված գիծ։ Թրամփի կարծիքով, առաջին քայլերն արդեն ձեռնարկվել են «երկարատև և կայուն խաղաղության ուղղությամբ»։
