Անապահովությունը գնահատելիս պետությունն ընտանիքին ենթադրյալ եկամուտ է վերագրում.
նոր համակարգի նորամուծությունները

Այսպես․ գրավոր հարցմամբ խնդրել էինք հայտնել՝

• մարտի 17-ից մինչ հարցմանը պատասխանելու օրվա դրությամբ Կոտայքի եւ Սյունիքի մարզերի քանի՞ բնակիչ է անապահովության գնահատման դիմում ներկայացրել,

• դիմումներից քանի՞սն են բավարարվել, քանի՞սը՝ մերժվել եւ ի՞նչ հիմքերով,

• քանի՞ անձ է մերժման որոշումները բողոքարկել վերադասության կարգով, եւ ի՞նչ որոշումներ են կայացվել վերանայման արդյունքում,

• բավարարման արդյունքում քանի՞ անձ է ճանաչվել ծայրահեղ անապահով, քանի՞սը՝ չափավոր անապահով, քանի՞սը՝ միջին անապահով, քանի՞սը՝ անապահով։

Հարցման 5-րդ օրը նախարարությունը մեկամսյա ժամկետ էր խնդրել «Նորք» տեղեկատվական կենտրոնի միջոցով ամբողջական տվյալներ ստանալու համար։՝

Մեկամսյա ժամկետի ավարտից հետո պատասխան չստանալով՝ դիմել ենք Նախարարության լրատվական վարչություն, որտեղից տեղեկացրել են, որ հարցման պատասխանը պատրաստ է, հաջորդ օրը՝ սեպտեմբերի 5-ին, կստանանք։ Պատասխանը, սակայն, ստացել ենք սեպտեմբերի 9-ին՝ «Ֆեյսբուք» սոցիալական ցանցում գրառում անելուց եւ նախարարին, նախարարությանն ու կառավարությանը նշելու հաջորդ օրը միայն։

Ստացված պատասխանը, այնուհանդերձ, սպառիչ չէր, ինչի պատճառով ստիպված ենք եղել մի քան օր եւս սպասել։ Մասնավորապես, մեր հարցին ի պատասխան՝ Նախարարությունը նշել էր, որ դիմումները մերժվել են օրենքով սահմանված բոլոր հիմքերով՝ չմանրամասնելով դրանք։ Բացի այդ,  բավարարված դիմումների թվերը ներկայացված էին առանց բացվածքի։ Բանավոր կարգով խնդրել ենք տրամադրել այս երկու տվյալների բացվածքը՝ մերժման յուրաքանչյուր հիմքը՝ ըստ քանակի, եւ բավարարված դիմումների քանակը՝ ըստ ամիսների։

Առաջինը ստացել ենք 1 օր, իսկ երկրորդը՝ 9 օր անց՝ այն պատճառաբանությամբ, որ քանի որ ծրագիրը պիլոտային է, տվյալները ձեռքով են հավաքվում, եւ լրացուցիչ աշխատանքի անհրաժեշտություն կա։ Նկատենք՝ այդ տվյալների գումարային արժեքը Նախարարությունն արդեն ուղարկել էր, եւ պարզ չէ, թե այդ ինչ լրացուցիչ աշխատանք պիտի արվեր «գումարի» «գումարելիները» հաշվարկելու համար։

Այնուհանդերձ, այսքանից հետո պատասխանը դարձյալ սպառիչ չէր։ Նախարարությունը համառորեն խուսափում էր տրամադրել ամբողջական տվյալները՝ անտեսելով «Տեղեկատվության ազատության մասին» օրենքի պահանջները եւ արհեստական խոչընդոտներ ստեղծելով լրագրողական հոդվածի պատրաստման ընթացքում։

Բանն այն է, որ տրամադրված տվյալները վերաբերում էին միայն «ծայրահեղ անապահով» եւ «չափավոր անապահով» ճանաչված ընտանիքներին, իսկ «միջին անապահով» եւ «անապահով» ճանաչված ընտանիքների տվյալները բացակայում էինք։ Ճշգրտման համար դարձյալ կապ ենք հաստատել Նախարարության լրատվական ծառայության հետ՝ հետաքրքրվելով՝ «միջին անապահով» եւ «անապահով» աստիճան ստացած ընտանիքներ չե՞ն եղել թե՞ Նախարարությունը դրանք չի՞ ներառել գրության մեջ։ Ի պատասխան՝ փոխանցվել է հետեւյալը. «Եղել են, բայց քանի որ գնահատում ենք հետագայում նոր ծառայությունների ներդրումը դիտարկելու նպատակով, դրանք չենք հրապարակում»։ Ի պատասխան մեր դիտարկմանը, որ տեղեկության տրամադրումը մերժելու հիմքերը հստակ սահմանված են Օրենքով, իսկ դա Օրենքով սահմանված հիմք չէ, Նախարարությունից խոստացել են մինչ տվյալ օրվա՝ սեպտեմբերի 18-ի ավարտ, ուղարկել բացակայող տվյալները։

Դարձյալ պատասխան չստանալով՝ սեպտեմբերի 23-ին ստիպված ենք եղել գրավոր հարցում ուղարկել նորանշանակ նախարար Արսեն Թորոսյանին՝ նկարագրելով այս ողջ ընթացքը եւ խնդրելով կամ նշել, թե Օրենքով սահմանված որ հիմքով են մերժում տեղեկության տրամադրումը, կամ Օրենքով սահմանված կարգով տրամադրել ամբողջական տեղեկություն՝ ներառելով անապահովության բոլոր աստիճանների վերաբերյալ տվյալները։ 

Ժամեր անց ստացել ենք հայցվող ամբողջական տվյալները։ 

Հավելենք, որ սա առաջին դեպքը չէ, երբ Աշխատանքի եւ սոցիալական հարցերի նախարարությունը խախտում է «Տեղեկատվության ազատության մասին» օրենքն ու անհարգալից եւ ոչ հաշվետվողական վարքագիծ դրսեւորում ընթացիկ բարեփոխումների մասին մեր հարցումների առնչությամբ։