ՀՀ կառավարության հերթական նիստի օրակարգում էր «Ներդրումային ծրագրին հավանություն տալու, «Ջի Թի Բի Դիվելոփմենթ» ՍՊ ընկերությանը առանց մրցույթի կառուցապատման իրավունքով հողամաս տրամադրելուն և ուղղակի վաճառքի ձևով հողամաս օտարելուն համաձայնություն տալու և լիազորություն վերապահելու մասին» նախագիծը, որն ուղղված է «Կասկադ մշակութային հանգույց» ճարտարապետական նախագծի իրագործմանը:
Նախագծի հեղինակը Երևանի քաղաքապետարանն է: Երևանի ավագանու նիստի ժամանակ քաղաքապետ Տիգրան Ավինյանը հույս է հայտնել, որ նախագիծը կիրականացվի 4-5 տարում՝ ընդգծելով, որ այդ գործընթացի նկատմամբ խիստ վերահսկողություն է սահմանված։
Ըստ հիմնավորման՝ կվերականգնվի կասկադ համալիրի անավարտ հատվածը, կկառուցվեն որակապես համայնքապատկան նոր համերգասրահ՝ նախատեսված 1000 հոգու համար, որն ապահովված կլինի ժամանակակից լուծումներով և հնարավորություն կտա հյուրընկալել միջազգային ճանաչում ունեցող ստեղծագործողների և խմբերի, ինչպես նաև նոր ընդարձակ ժամանակակից պատկերասրահ, որտեղ հնարավոր կլինի կազմակերպել աշխարահռչակ նկարիչների ցուցադրություններ, համագործակցել աշխարհի տարբեր հռչակավոր պատկերասրահների հետ և այդպիսով մշակութային կյանքին հաղորդել նոր որակ ու սահմանել նոր նշաձող, ինչը կնպաստի զբոսաշրջիկների հոսքերի ավելացմանը:
«Համաձայն «Կասկադ մշակութային հանգույց» նախագծի՝ հարակից հատվածում կկառուցվի բազմաֆունկցիոնալ համալիր, որը կգտնվի ներդաշնակության մեջ ակռա և ստեղծվելիք միջավայրի հետ և կամբողջացնի տվյալ հատվածի քաղաքաշինական պատկերը, կկառուցվի նոր քաղաքային այգի, կյանքի կկոչվի քաղաքի երկու հատվածները իրար միացնելու Ալեքսանդր Թամանյանի մտահղացումը»,- ասվում է նախագծի հիմնավորման մեջ»,- ասվում է հիմնավորման մեջ:
Կասկադ համալիրի անավարտ հատվածի վերականգնման նախագծի իրականացման նպատակով ներդրողի ներգրավելու նպատակով Երևանի քաղաքապետարանի հայտարարած բաց մրցույթի արդյունքներով հաղթել է միակ մասնակիցը՝ «Ջի Ջի Ջի Դիվելոփմենթ» ՍՊԸ-ն: Ներկայացված ներդրումային առաջարկը կազմել է 20 մլրդ 46 մլն ՀՀ դրամ:
«Կառուցապատող ընկերությունը [բացի մրցույթի փաթեթով առաջարկված ներդրման գումարից] Երևանի քաղաքապետարանին վճարելու է 10 449 միլիոն դրամ հողի կադաստրային արժեքի չափով, նաև իրականացնելու է կանաչապատման աշխատանքներ»,- հայտնեց Ավինյանը:
Այսինքն՝ տարածքի ընդհանուր մակերեսը մոտ 11 հա է։ Ներդրողը պետությունից գնելու է տարածքի 4․8 հեկտարը՝ կառավարությունը համաձայնությամբ տարաժամկետ վճարելով: Կանաչապատվելու է տարածքի 1․8 հեկտարը: Պայմանագրի գործողության ժամկետը 5 տարի է։ Մինչ գնի ամբողջական վճարումը հողամասերը կհամարվեն գրավադրված՝ հօգուտ Երևան համայնքի։
Նշենք, որ Ակտիվ քաղաքացի հարթակում քվեարկությամբ հաղթել էր սույն նախագիծը:
2024թ. մարտին Երևանի քաղաքապետ Տիգրան Ավինյանը հայտնեց, որ Երևանի «Կասկադ» համալիրի վերևի հատվածը, որի շինարարությունն անավարտ էր մնացել դեռևս խորհրդային տարիներից, վերադարձվել է Երևանին: Մինչ այդ Կասկադի անավարտ հատվածը հասարակական կառուցապատման նպատակով որպես սեփականություն տրամադրվել էր «Գաֆէսճեան թանգարան» հիմնադրամին, որը պետք է ավարտուն տեսքի բերեր այն, սակայն տարբեր պատճառներով հարցը ձգձգվել էր, իսկ խնդիրն այդպես էլ մնացել էր չլուծված: Դրանից հետո հայտարարվեց, որ այդ հատվածում կիրականացվեն արդիականացման աշխատանքներ՝ համալիրն ավարտուն տեսքի բերելու համար։
