Շրջակա միջավայրի նախարար Համբարձում Մաթևոսյանը ընդունել է Հայաստանի Հանրապետությունում Ռուսաստանի Դաշնության արտակարգ և լիազոր դեսպան Սերգեյ Կոպիրկինի գլխավորած պատվիրակությանը։ Այս մասին տեղեկացնում են նախարարությունից:
Հանդիպման ընթացքում կողմերը անդրադարձ են կատարել շրջակա միջավայրի պահպանության ոլորտում Հայաստան-Ռուսաստան համագործակցության ընթացքին և դրա հետագա զարգացման հնարավորություններին։
Կողմերը քննարկել են շրջակա միջավայրի վրա ազդեցության կարգավորման և ստանդարտացման, կայուն կառավարման տնտեսական գործիքների, կենսաբազմազանության պահպանության և կայուն օգտագործման, քիմիական նյութերի և թափոնների կառավարման, պետական բնապահպանական վերահսկողության, շրջակա միջավայրի մոնիթորինգի, ինչպես նաև տեխնոլոգիական և նորարարական լուծումների զարգացման ուղղություններով համագործակցության հնարավորությունները։
Քննարկվել են նաև ՄԱԿ-ի Կենսաբազմազանության մասին կոնվենցիայի կողմերի համաժողովի՝ COP17-ի նախապատրաստական գործընթացները։
Հանդիպման ավարտին կողմերը վերահաստատել են երկուստեք պատրաստակամություն՝ շարունակելու արդյունավետ համագործակցությունը և համատեղ ջանքերով նպաստելու շրջակա միջավայրի պահպանությանն ու կայուն զարգացմանը։
