news.am Չինաստանի փոխարտգործնախարար Սուն Վեյդունը կանչել է Չինաստանում Ճապոնիայի դեսպան Կենձի Կանասուգիին եւ ներկայացրել Ճապոնիայի վարչապետ Սանաե Տակաիտիի Չինաստանի վերաբերյալ արած հայտարարությունները՝ զգուշացնելով հետեւանքների մասին, հաղորդել է «Սինհուա» գործակալությունը։
«Անցյալ շաբաթ խորհրդարանում Ճապոնիայի վարչապետ Սանաե Տակաիտին սադրիչ հայտարարություններ է արել Թայվանի հասցեին, որոնք ենթադրել են Թայվանի նեղուցում զինված միջամտության հնարավորություն»,- գործակալությունը մեջբերել է փոխնախարարի խոսքերը։
Նա ավելացրել է, որ Տակաիտիի խոսքերը կոպտորեն խախտում են միջազգային հարաբերությունների հիմնական նորմերը, խաթարում են միջազգային կարգը պատերազմից հետո, հակասում են «մեկ Չինաստան» սկզբունքին եւ «լրջորեն խաթարում են չին-ճապոնական հարաբերությունների քաղաքական հիմքը»։
Սուն Վեյդունն ընդգծել է, որ «Թայվանի հարցը Չինաստանի հիմնական շահերից է եւ անխախտելի կարմիր գիծ է»։
Նա հայտնել է, որ «Թայվանի գործերը զուտ Չինաստանի ներքին գործերն են»։ «Չինացի ժողովուրդը պետք է որոշի, թե ինչպես լուծել Թայվանի հարցը, եւ նրանք չեն հանդուրժի որեւէ արտաքին ուժի միջամտությունը», նշել է նա։
«Այսօր յուրաքանչյուր ոք, ով համարձակվի որեւէ կերպ միջամտել Չինաստանի վերամիավորման գործին, անկասկած, ծանր հարված կկրի Չինաստանի կողմից»,- զգուշացրել է փոխնախարարը։
Նա կոչ է արել Տոկիոյին «ճանաչել եւ ուղղել սխալները, հրաժարվել բացասական դիտողություններից եւ չշարունակել ընթանալ սխալ ճանապարհով»՝ հայտարարելով, որ հակառակ դեպքում Ճապոնիան կկրի բոլոր հետեւանքների պատասխանատվությունը։
Ինչպես տեղեկացվել է, Տակաիտին, նոյեմբերի 7-ին Ճապոնիայի խորհրդարանում ելույթ ունենալով, հայտարարել է, որ Չինաստանի կողմից Թայվանի վրա հարձակումը կհամարվի «Ճապոնիայի գոյատեւմանը սպառնացող» իրավիճակ եւ կարող է ռազմական արձագանք առաջացնել Տոկիոյի կողմից։
