armenpress.am: Հայաստանի Հանրապետության նախագահ Վահագն Խաչատուրյանը վստահ է, որ Հայաստանի տարածքում TRIPP (Trump Route for International Peace and Prosperity) նախագծի իրագործումը ոչ թե վտանգներ կամ խնդիրներ կստեղծի, այլ նոր հնարավորություններ կբացի Թուրքիայի, Իրանի, Վրաստանի, ինչպես նաև Ռուսաստանի համար։
Այս մասին ՀՀ նախագահը հայտարարել է Տավուշի մարզի Կիրանց բնակավայրում լրագրողների հետ զրույցում։
Հարցին, թե կարելի՞ է արդյոք արձանագրել, որ Թբիլիսիում փարատվել են այն մտահոգությունները, թե Հայաստանի տարածքում TRIPP նախագծի իրագործումը կարող է ինչ-որ առումով նվազեցնել Վրաստանի տարանցիկ դերը տարածաշրջանում, ՀՀ նախագահը պատասխանել է.
«Կարող եմ ասել, որ վտանգ չի լինի նրանց համար, նրանք որևիցե կորուստ չեն ունենա։ Ընդհակառակը՝ Վրաստանի նշանակությունն ավելի է մեծանալու։ Եթե ստացվի այն ամենը, ինչի մասին խոսում ենք, այսինքն՝ իսկապես սահմանները բացվեն, TRIPP-ը իրականություն դառնա և սկսի աշխատել, նոր հնարավորություններ են բացվելու Հայաստանի, Թուրքիայի, Իրանի, Ադրբեջանի Վրաստանի, ինչու չէ՝ նաև Ռուսաստանի համար։ Դրանից հետո մենք բոլորս ինքներս մեզ քննադատելու ենք, թե ինչու նախկինում մենք չէինք օգտագործում այդ հնարավորությունները»,-նշել է Հայաստանի նախագահը։
Նախագահը հավելել է, որ Թբիլիսիում իր հանդիպումների ժամանակ վրացի պաշտոնյաներից նման մտահոգություններ չի լսել, նրանց մոտ անհանգստություն այդ հարցով չի նկատել։
«Ամեն ինչ կախված է լինելու մեզնից․եթե մենք ցանկանում ենք իսկապես խաղաղ ապրել, ցանկանում ենք հարևանների հետ խնդիրները լուծելու ճանապարհով գնալ, այլ ոչ թե ավելի մեծացնել դրանք, մենք հաջողություն կունենանք, բայց եթե տրամադրված չենք, այդ դեպքում պրոբլեմներ կունենանք և կհայտնվենք այն միջավայրում, որը կար նախկինում»,-շեշտել է ՀՀ նախագահը։
Նա նաև հայտնել է, որ Վրաստանը պատրաստակամություն է հայտնել աջակցել տարբեր հարցերում, այդ թվում՝ Հայաստան-Ադրբեջան հարաբերությունների կարգավորման առումով։
ՀՀ նախագահ Վահագն Խաչատուրյանը պաշտոնական այցով Վրաստանում էր գտնվել նոյեմբերի 19-ից 20-ը։ Նա Թբիլիսիում հանդիպել է Վրաստանի նախագահ Միխեիլ Կավելաշվիլիի, խորհրդարանի ղեկավար Շալվա Պապուաշվիլիի և վարչապետ Իրակլի Կոբախիձեի հետ։
