armenpress.am: Ռուսաստանի արտաքին գործերի նախարարի տեղակալ Միխայիլ Գալուզինը հանդիպել է Ռուսաստանում Ադրբեջանի դեսպան Ռահման Սահիբ օղլու Մուստաֆաևի հետ։ Հանդիպման ընթացքում, ի թիվս այլ հարցերի, Գալուզինը պարզաբանումներ է տվել Կիևում Ադրբեջանի դեսպանատան հետ կապված միջադեպի վերաբերյալ։ Այս մասին հաղորդում է Ռուսաստանի արտաքին գործերի նախարարությունը։
«Զրույցի ընթացքում նշվել է, որ ադրբեջանական կողմից նոյեմբերի 14-ին ստացված դիմումը՝ Կիևում գտնվող Ադրբեջանի դիվանագիտական առաքելության շենքերին, գույքին և տարածքին հասցված վնասի վերաբերյալ, ուշադիր ուսումնասիրվել է Ռուսաստանի համապատասխան գերատեսչությունների կողմից», – ասվում է Արտաքին գործերի նախարարության հայտարարության մեջ։
«Միևնույն ժամանակ, առկա տեղեկատվության ուսումնասիրությամբ պարզվել է, որ Կիևում գտնվող Ադրբեջանի դիվանագիտական առաքելության շենքերին հասցված վնասն, ամենայն հավանականությամբ, պայմանավորված է Ուկրաինայի զինված ուժերի հակաօդային պաշտպանության համակարգերի սխալ աշխատանքով, ենթադրաբար, Patriot հրթիռի անկմամբ»,- նշվում է հայտարարության մեջ։
Գերատեսչությունը նշում է, որ «հատուկ ընդգծվել է, որ Ուկրաինայում գտնվող Ադրբեջանի Հանրապետության օբյեկտների դեմ ենթադրյալ «հրթիռային հարվածների նպատակային բնույթի» մասին պնդումները չեն համապատասխանում իրականությանը»։
Հիշեցնենք, որ 2025թ. նոյեմբերի 14-ին Ուկրաինայի նախագահ Վլադիմիր Զելենսկին հայտնել է, որ ռուսական հարվածների հետևանքով տուժել է Կիևում Ադրբեջանի դեսպանության շենքը:
