Նոր կենսաչափական համակարգի ներդրման աշխատանքների շրջանակում միգրացիայի և քաղաքացիության ծառայության գրասենյակներ կբացվեն Երևանի մոլերում (Yerevan mall, Mega mall)։ Այս մասին հայտնել է ՆԳ նախարար Արփինե Սարգսյանը՝ նախարարության տարածած տեսաուղերձում։
Նախարարը հայտնել է, որ դրանք կլինեն ժամանակակից գրասենյակներ՝ հագեցած կենսաչափական տվյալների հավաքագրման ինքնասպասարկման սարքավորումներով, մանկական խաղասրահով և սպասարկման միջազգային չափանիշներով։
Նախարար Սարգսյանը հայտարարել է, որ Հայաստանում նոր կենսաչափական համակարգ ներդնելու լայնածավալ աշխատանքները գտնվում են ակտիվ փուլում, և շուտով քաղաքացիները կտեսնեն շինարարական աշխատանքներ Հանրապետության բոլոր մարզերում։
«Մասնավոր գործընկերոջ «Հայ փաս» ընկերության կողմից առաջարկվել և մեր կողմից արդեն իսկ հաստատվել են 13 գրասենյակներ։ Եվ ըստ 10 ընտրության փուլում են։ Հիմնովին վերանորոգվում է վարչական շենքը, որը ծառայելու է նաև որպես միջազգային ստանդարտներով կառուցվող տվյալների կենտրոն։ Այստեղ են իրականացվելու անձը հաստատող փաստաթղթերի անհատականացման և տպագրման աշխատանքները»,- նշել է նախարարը։
Նախարարի հավաստմամբ՝ Հայաստանը փակում է անձնագրային համակարգի հնամաշ և ցածրորակ ենթակառուցվածքի էջը։
The post Մոլերում կբացվեն միգրացիայի և քաղաքացիության ծառայության գրասենյակներ․ ՆԳ նախարար appeared first on CIVILNET.
