news.am Տեղեկություններ չկան այն մասին, որ Արթիկի քրեակատարողական հիմնարկի պետի տեղակալը, որի որդին ներգրավված է եղել Զորական գյուղում ավագ դպրոցի աշակերտի աղմկահարույց ծեծի մեջ, միջամտել է քննությանը, ազդել քննության վրա կամ փորձել է բարելավել որդու պայմանները քրեակատարողական հիմնարկում, ուստի մենք չենք քննարկում նրա լիազորությունները կասեցնելու հարցը։ Այս մասին դեկտեմբերի 3-ին լրագրողների հետ զրույցում հայտարարել է Հայաստանի արդարադատության նախարար Սրբուհի Գալյանը։
«Եթե մեր անմիջական արձագանքը լիներ լիազորությունների դադարեցումը, մեզ վստահաբար, կմեղադրեին նրանում, որ մենք ուղղակի հաշվեհարդար ենք փորձում տեսնել», – հավելել է նա։
Գալյանը դրական երևույթ է որակել այն, որ նույնիսկ քրեակատարողական հիմնարկի աշխատակցի որդին էլ է խափանման միջոց կիրառելուց հետո տեղափոխվել քրեակատարողական հիմնարկ։
«Այսինքն՝ նույնիսկ համակարգի ընտանիքի անդամները անձեռնմխելի չեն։ Սա մեր իրականությունն է և դա ողջունելի փաստ է», – նշել է նախարարը։
Հիշեցնենք, որ համացանցում տեսանյութ էր տարածել, որտեղ երևում էր, թե ինչպես են մի խումբ դեռահասներ դաժանորեն ծեծում և նվաստացնում մեկ այլ տղայի։ Տեսանյութը հրապարակած օգտատերը տեսանյութին կից նշել է, որ բռնություն ենթարկողները Զորականի դպրոցի բարձր դասարանի աշակերտներ են, իսկ ծեծի ենթարկվող տղան՝ Նոյեմբերյանի պետական քոլեջի ուսանող։ Մոտ 2 րոպե տևողությամբ տեսանյութում տղաները հարվածում և հայհոյում են ուսանողին։
