Ավստրիայի եվրոպական և միջազգային հարցերի դաշնային նախարար Բեատե Մայնլ-Ռայզինգերը հայտարարել է Հայաստան այցելելու մտադրության մասին։
Ավստրիայի եվրոպական և միջազգային հարցերի դաշնային նախարարը Հայաստանի արտաքին գործերի նախարար Արարատ Միրզոյանի հետ համատեղ տեսանյութ է հրապարակել «Ինստագրամ»-ի իր էջի սթորի բաժնում։
«Այսօր մենք շատ արդյունավետ նախաճաշ ունեցանք Հայաստանի արտաքին գործերի նախարարի հետ։ Անհամբեր սպասում եմ Երևան այցելելու հնարավորությանը։ Սա շատ կարևոր գործընկերություն է»,– նշել է Ավստրիայի եվրոպական և միջազգային հարցերի դաշնային նախարարը։
Ի պատասխան՝ ՀՀ արտաքին գործերի նախարար Արարատ Միրզոյանը շնորհակալություն է հայտնել աջակցության և բարի խոսքերի համար՝ նշելով, որ անհամբեր սպասում է Ավստրիայի նախարարի այցին Հայաստան։
«Շատ շնորհակալ եմ աջակցության և բարի խոսքերի համար։ Անհամբեր սպասում եմ Հայաստան նախատեսվող ձեր այցին»,– ասել է Միրզոյանը։
