armenpress.am ԱՄՆ նախագահի հատուկ բանագնաց Սթիվ Ուիթքոֆը և ԱՄՆ առաջնորդի փեսան՝ Ջարեդ Քուշները, կարող են այս շաբաթ Մայամիում բանակցություններ վարել Ուկրաինայի նախագահի ազգային անվտանգության հարցերով խորհրդական Ռուստեմ Ումերովի հետ:
Այդ մասին հաղորդում է Axios պորտալը։
«Սպասվում է, որ ուկրաինական պատվիրակությունը՝ Ուկրաինայի նախագահ Վոլոդիմիր Զելենսկու ազգային անվտանգության հարցերով խորհրդական Ռուստեմ Ումերովի գլխավորությամբ, այս շաբաթ ավելի կժամանի Մայամի՝ Ուիթքոֆի և Քուշների հետ բանակցություններ վարելու համար», – գրել է պորտալը։
Axios-ը, հղում անելով Սպիտակ տան ներկայացուցչին, նաև հաստատել է Politico-ի՝ ավելի վաղ տարածած լուրն այն մասին, որ ԱՄՆ-ի և ՌԴ-ի պատվիրակությունները կարող են ուկրաինական կարգավորման շուրջ բանակցություններ վարել առաջիկա հանգստյան օրերին. ռուսական պատվիրակությունը, ինչպես սպասվում է, կգլխավորի ՌԴ նախագահի հատուկ ներկայացուցիչ Կիրիլ Դմիտրիևը։
Ինչպես գրում է Axios-ը, Թրամփի խորհրդականները Պուտինի բանագնացին կտեղեկացնեն ամերիկացի և ուկրաինացի պաշտոնատար անձանց միջև բանակցություններում ձեռք բերված առաջընթացի մասին և կփորձեն համոզել Ռուսաստանի կառավարությանը՝ համաձայնել պատերազմը դադարեցնելու վերաբերյալ նորացված առաջարկությանը։
Պորտալի աղբյուրներն ընդգծել են, որ ներկայում ԱՄՆ-ի, Ուկրաինայի և Ռուսաստանի պաշտոնատար անձանց միջև եռակողմ հանդիպում կազմակերպելու ծրագրեր չկան։
