factor.am Իրանի նախագահը կոչ է արել երկրի կառավարությանը՝ լսել ցուցարարների «օրինական պահանջները»՝ Թեհրանում խանութպանների կողմից տնտեսական դժվարությունների դեմ մի քանի օր տևած ցույցերից հետո։ Այս մասին գրում են իրանական պետական լրատվամիջոցները ,փոխանցում է France 24-ը։
Երկուշաբթի մայրաքաղաքի վաճառականները երկրորդ օրն անընդմեջ փակել էին իրենց խանութները՝ այն բանից հետո, երբ Իրանի ազգային արժույթը ոչ պաշտոնական շուկայում նոր ցածրակետի էր հասել։ Կիրակի ԱՄՆ դոլարը վաճառվում էր մոտ 1,42 միլիոն ռիալով, ինչն արժեզրկում է մեկ տարի առաջվա 820,000 ռիալի համեմատ։ Միաժամանակ, եվրոն մոտեցել է 1,7 միլիոն ռիալի։
«Ես խնդրել եմ Ներքին գործերի նախարարին լսել ցուցարարների օրինական պահանջները՝ երկխոսություն սկսելով նրանց ներկայացուցիչների հետ, որպեսզի կառավարությունը կարողանա անել ամեն ինչ՝ խնդիրները լուծելու և պատասխանատու գործելու համար»,- պետական IRNA լրատվական գործակալության հաղորդմամբ՝ ասել է նախագահ Մասուդ Փեզեշքիանը։
Աշխատավորներին աջակցող ILNA գործակալությունը երկուշաբթի հաղորդել էր, որ ցուցարարները «պահանջում են կառավարության անհապաղ միջամտություն՝ փոխարժեքի տատանումները զսպելու և հստակ տնտեսական ռազմավարություն մշակելու համար»։ Գների տատանումները կաթվածահար են անում որոշ ներմուծված ապրանքների վաճառքը, թե՛ վաճառողները, թե՛ գնորդները նախընտրում են հետաձգել գործարքները՝ մինչև հեռանկարի պարզ դառնալը, հաղորդել են AFP-ի թղթակիցները։
Fars լրատվական գործակալությունը հրապարակել է լուսանկարներ, որոնցում ցուցարարների բազմությունն է, որը գրավել է բազմաթիվ խանութներով Թեհրանի կենտրոնական փողոցը։ Մեկ այլ լուսանկարում էլ երևում է, թե ինչպես է արցունքաբեր գազ օգտագործվում ցուցարարներին ցրելու համար։
Շարունակությունը՝ սկզբնաղբյուր կայքում
